O le a Toe Tutū mai Ē ua Amiotonu
“O loo ia te au le faamoemoe i le Atua . . . o le a toe tutū mai e ua amiotonu atoa ma e ua amioletonu.” —GALUEGA 24:15.
1. O le ā le tulaga ua feagai ma tagata uma talu ona agasala Atamu ma Eva?
“O MEA uma ua e iloa e faia e ou lima, ina faia ia ma lou malosi; auā e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” (Failauga 9:10) O nei upu pupuu na filifilia lelei, ua faamatalaina ai e le tupu poto o Solomona le tulaga ua feagai ma tupulaga uma o tagata talu ona agasala ō tatou uluai mātua, o Atamu ma Eva. Ua faafanoina e le oti tagata uma lava—o ē mauoa ma ē matitiva, o tupu ma tagata lautele, o ē faatuatua ma ē e lē faatuatua. E moni lava, “ua pule le oti e pei o se tupu.”—Roma 5:17, NW.
2. Aisea atonu ua lē fiafia ai nisi o ē faamaoni i lenei vaitaimi o le iuga?
2 E ui i le lelei o faiga fou faafomai, ae ua pule pea le oti e pei o se tupu i aso nei. E ui ina e lē o se mea lenei e faateia ai, ae o nisi atonu ua tumu i le lē fiafia pe a fesagai mulimuli ane i latou ma lenei fili ua loa ona iai. Aisea? I tuā i vaitausaga e amata mai i le 1920, na folafola ai e le Sosaiete o le Olo Matamata le feau e faapea, “E faitau miliona o loo soifua nei, o le a lē taitai ona maliliu.” O ai ē o le a avea ma lenei faitau miliona? O “mamoe” o loo taʻua i fetalaiga a Iesu e faatatau i mamoe ma ʻoti. (Mataio 25:31-46) O i latou nei e pei ni mamoe, na valoiaina lo latou aliai mai i le vaitaimi o le iuga, ma o lo latou faamoemoe o le ola e faavavau i luga o le lalolagi parataiso. A o mavae atu taimi, na maua ai e tagata o le Atua se malamalamaga lelei e tusa ai ma tulaga o nei “mamoe” i fuafuaga a Ieova. Na iloa o i latou nei e usiusitai, e tatau ona matuā ese lava mai i “ʻoti” faalogogata, ma a mavae le faaumatiaga o ʻoti, ona aināina ai lea e mamoe le nofoaga faalelalolagi o le Malo ua saunia mo i latou.
Aoaoina mai o Ē Pei ni Mamoe
3. O le ā le galuega ua uaʻi atu i ai tagata o le Atua talu mai le 1935?
3 E amata mai i le 1935, na uaʻi atu ai ʻle auauna faamaoni’ i le sailia o i latou ia e pei ni mamoe ma aumaia i latou i totonu o le faalapotopotoga a Ieova. (Mataio 24:45; Ioane 10:16) O nei Kerisiano ua loto atu ina ia aʻoaʻoina i latou, ua latou iloa ua pule nei Iesu i le Malo faalelagi a Ieova, ma ua lalata tele mai le taimi o le iuga o lenei faiga amioleaga o mea, ma le faaooina mai o le lalolagi fou e mau ai ē amiotonu. (2 Peteru 3:13; Faaaliga 12:10) I lena lalolagi fou, o le a faataunuuina ai upu faamafanafana loto a Isaia e faapea: “E faaumatia e ia le oti e faavavau.”—Isaia 25:8.
4. E ui ina faamoemoe atu ma le naunautai e vāai i le faaeaina o le pule silisiliese a Ieova i a Amaketo, ae o le ā ua tupu i le tele o isi mamoe?
4 Ona ua lalata tele mai le iuga o le lalolagi a Satani, ua matuā olioli ai Kerisiano e pei ni mamoe e ola seia oo ina faaeaina le pule silisiliese a Ieova pe a oo mai le puapuaga tele i a Papelonia le Aai Tele ma le isi vaega uma o le lalolagi a Satani. (Faaaliga 19:1-3, 19-21) O se aofaiga tele o isi, ua lē faapea ona taunuu i a i latou. O le toatele na faamoemoe e iai i totonu o le “faitau miliona” o le a lē taitai ona maliliu, ua maliliu moni lava. O isi na faamaturoina i falepuipui ona o le upu moni po o le faaoolima foi i ai o le au fia mapo lotu. O isi ua maliliu i ni faalavelave faafuasei, po o mafuaaga faalenatura—o le maʻi ma le tino matua. (Salamo 90:9, 10; Failauga 9:11) E manino lava, e toatele o le a maliliu a o leʻi oo mai le iuga. O le a faapefea la e i latou ia ona vāai i le faataunuuga o le folafolaga mo le lalolagi fou e mau ai ē amiotonu?
Le Faamoemoe o le Toetu
5, 6. O le ā le lumanai o loo iai mo i latou e iai le faamoemoe faalelalolagi o ē e maliliu a o leʻi oo mai Amaketo?
5 Na aumaia e le aposetolo o Paulo le tali ina ua ia tautala atu i luma o le kovana Roma o Filiki. E pei ona faamauina i le Galuega 24:15, na folafola atu ma le lototele e Paulo e faapea: “O loo ia te au le faamoemoe i le Atua . . . o le a toe tutū mai e ua amiotonu atoa ma e ua amioletonu.” Ua aumaia i a i tatou e le faamoemoe o le toetu le lototele e feagai ai ma tulaga e silisili ona leaga. Ona o lena faamoemoe, o le a lē oo ai i ō tatou uso ma tuafāfine pele ua mamaʻi ma lagona o le a feoti, le matuā loto faanoanoa. Po o le ā lava le mea e tupu, ua latou iloa o le a latou selesele mai le taui ona o le faamaoni. Ona o le faamoemoe i le toetu, ua iloa ai e ō tatou uso ma tuafāfine loto tetele o ē ua oo i ai le oti i lima o tagata faasauā, e leai se auala e mafai ona manumalo ai ē o sauāina i latou. (Mataio 10:28) Pe a maliu se tasi o le faapotopotoga, tatou te faanoanoa ona ua lē toe iai lea tagata. I le taimi lava e tasi, pe afai o ia o se tasi o isi mamoe, tatou te olioli ina ua tumau ma le faamaoni lo tatou uso talitonu seia oo i le iuga, ma o loo mālōlō nei o ia ma se lumanai mautinoa i le lalolagi fou a le Atua.—1 Tesalonia 4:13.
6 Ioe, o le faamoemoe i le toetu o se vala tāua lea o lo tatou faatuatua. Peitai ane, aisea ua malosi tele ai lo tatou talitonu i le faamoemoe o le toetu, ma o ai ē o iai lea faamoemoe?
7. O le ā le toetu, ma o ā nisi o mau o faamatalaina mai ai lona mautinoa?
7 O le upu Eleni mo le toetu o le a·naʹsta·sis, o lona uiga moni lava o le “tu i luga.” O lona uiga autū lava e faasino i le tulai mai nai le oti. O le mea e mataina ai, e lē o maua le upu “toetu” i le Tusi Paia Eperu, ae ua manino le faamatalaina mai ai o le faamoemoe o le toetu i inā. Mo se faataitaiga, ua mafai ona tatou iloa i upu na taʻua e Iopu i le luluti o ōna puapuaga ina ua faapea mai: “E! fia natia aʻu e oe i le tuugamau . . . ia e atofaina mai se aso mo aʻu, ma ia e manatua mai ai aʻu.” (Iopu 14:13) Ua tatou faitau ai foi i se uiga tali tutusa i le Hosea 13:14 e faapea: “Ou te laveai ia te i latou ai le malosi o le tuugamau; ou te faaola ia te i latou ai le oti. Le oti e, o fea o i ai le malaia mai ia te oe? Le tuugamau e, o fea o i ai se mea e fano ai mai ia te oe?” I le 1 Korinito 15:55, na siiina mai ai e le aposetolo o Paulo nei upu ma faaalia e faapea o le manumalo i le oti lea na valoia, e faataunuuina e ala i le toetu. (O le mea moni, i lena mau, sa tautala ai Paulo e faatatau i le toetu faalelagi.)
Ua “Taʻuamiotonuina” Ē Talitonu
8, 9. (a) E mafai faapefea e tagata lē lelei atoatoa ona iai i le toe tutū o ē amiotonu? (e) O le ā le faavae o lo tatou faamoemoe i le ola o le a lē toe faamutaina e le oti?
8 I lana faamatalaga i a Filiki lea na taʻua i le palakalafa e 5, na faapea mai ai Paulo o le a toe tutū mai ē amiotonu ma ē amioletonu. O ai ē amiotonu o le a faatutuina mai? Ia, e leai lava se tagata e amiotonu talu ona fanau mai. O i tatou uma lava e fananau mai ma le agasala, ma tatou te faia agasala a o faagasolo lo tatou olaga—lea ua tatau ai ona tatou feoti ona o na mea e lua. (Roma 5:12; 6:23) Peitai ane, ua tatou maua le faaupuga i le Tusi Paia e faapea, ua “taʻuamiotonuina.” (Roma 3:28) Ua faasino lea i tagata o ē e ui lava ina lē lelei atoatoa, ae ua faamagaloina ā latou agasala e Ieova.
9 Ua taatele le faaaogaina o lea faaupuga e faatatau i Kerisiano faauuina, o ē e iai le faamoemoe faalelagi. Ua faapea mai le aposetolo o Paulo i le Roma 5:1 e faapea: “O lenei, ua taʻuamiotonuina i tatou i le faatuatua, o lea ua tatou lelei ai ma le Atua, ona o lo tatou Alii o Iesu Keriso.” Ua taʻuamiotonuina uma Kerisiano faauuina ona o le faatuatua. Faatuatua i le ā? Ua faamatala auiliili mai e Paulo i le tusi o Roma e faapea, o le faatuatua i a Iesu Keriso. (Roma 10:4, 9, 10) Na maliu Iesu o se tagata lelei atoatoa ma mulimuli ane ona faatuina ai lea o ia nai le oti ma afio aʻe i le lagi e ofoina atu le tāua o lona ola faaletagata e fai ma sui mo i tatou. (Eperu 7:26, 27; 9:11, 12) Ina ua talia e Ieova lena taulaga, o lea na faatauina ai e Iesu tagata mai le nofo pologa i le agasala ma le oti. O ē faatuatua i lenei fuafuaga, e tele aogā e mafai ona latou mauaina ai. (1 Korinito 15:45) E faavae i lenei mea, ua mafai ai e tane ma fafine faatuatua ona maua le faamoemoe o le mauaina o le ola e lē toe faamutaina e le fili leaga, o le oti.—Ioane 3:16.
10, 11. (a) O le ā le toetu o faatalitalia mai mo Kerisiano faamaoni ua faauuina? (e) O le ā le ituaiga o toetu na faamoemoe i ai ē tapuai a o leʻi oo i le vaitaimi o le Faa-Kerisiano?
10 E faafetaia le taulaga togiola a Iesu, auā ua maua ai e i latou faamaoni ua faauuina, o ē ua taʻuamiotonuina, ona iai so latou faamoemoe mautinoa o le toe faatutuina aʻe e avea o ni foafoaga agaga, e lē toe oo lava i ai le oti e pei o Iesu. (Faaaliga 2:10) Ua taʻua lo latou toe tutū i le Faaaliga 20:6 e faapea: “Amuia mona ua paia le ua i ai se tofi i le uluai toe tu; e le oo foi le pule a le oti faalua ia te i latou, a e avea i latou ma ositaulaga a le Atua ma Keriso, latou te fai ma tupu foi faatasi ma ia i tausaga e afe.” O le toetu faalelagi lenei. E ui i lea, mātau mai, ua taʻua e le Tusi Paia o le “uluai toe tu,” o lona uiga e toatele nisi tagata e ao ona toe faatutuina mai.
11 I le Eperu mataupu e 11, ua faasino mai ai e Paulo se faasologa umi o auauna a le Atua sa iai a o leʻi oo mai i le vaitaimi o le Faa-Kerisiano, o ē na faaalia le malosi o le faatuatua i a Ieova le Atua. Na latou faatuatua foi i le toetu. Ua taʻua e Paulo i le fuaiupu e 35 o le mataupu lava lena, ni toetu faavavega na tutupu i le talafaasolopito o Isaraelu i lona faapea mai: “Na maua mai e fafine o latou tagata oti ina ua toe tu mai; na faataugaina nisi, ua le talia e i latou le olataga, ina ia maua e i latou le toe tu mai e sili ona lelei.” O na molimau faamaoni o aso anamua e mafai ona tepa taulai atu i se toetu e sili atu na ia na faia e Elia ma Elisaia, e fai ma faaaoaoga. (1 Tupu 17:17-22; 2 Tupu 4:32-37; 13:20, 21) O lo latou faamoemoe o le toe tutū mai lea i se lalolagi o le a lē toe faataugāina ai auauna a le Atua ona o lo latou faatuatua, se lalolagi o le a lē toe toesea mai ai i fafine, ē e pele i a i latou ona o le oti. Ioe, na tepa taulai atu i latou i le toe faatutuina mai le oti i totonu o le lalolagi fou lava lea e tasi o loo tatou faamoemoe atu i ai. (Isaia 65:17-25) Sa leʻi faaalia atu e Ieova i a i latou le tele o mea e pei ona ia faaalia mai i a i tatou e uiga i lenei lalolagi fou. E ui i lea, na latou iloa lelei lava o loo fotuai mai, ma na latou mananao e iai i inā.
Le Toetu Faalelalolagi
12. Pe na taʻuamiotonuina ē na faamaoni a o leʻi oo i le vaitaimi o le Faa-Kerisiano? Faamatala.
12 Pe e ao ona tatou manatu o le toe tutū mai o nei tane ma fafine faatuatua o ē na iai a o leʻi oo i le vaitaimi o le Faa-Kerisiano i lena lalolagi fou, o se vaega lea o le toe tutū o ē amiotonu? E manino lava o le tali o le ioe, ona ua faasino atu le Tusi Paia i a i latou, o ē e amiotonu. Mo se faaaoaoga, ua taʻua e le soo o Iakopo se tamaloa ma se fafine anamua o ē na taʻuamiotonuina. O lea tamaloa o Aperaamo, o lē na tupuga mai ai sa Eperū. Ua tatou faitau ai e faapea e uiga i a te ia: “Na faatuatua Aperaamo i le Atua, ona taʻua ai lea ia te ia e fai ma amiotonu; sa taʻua foi o ia o le uo a le Atua.” O le fafine o Raava, sa lē o se tagata Isaraelu, ae na ia faaalia le faatuatua i a Ieova. Sa “taʻuamiotonuina” o ia ma avea ai ma tagata o le nuu o Iutaia. (Iakopo 2:23-25) O lea, o tane ma fafine anamua o ē na faaalia le faatuatua malosi i a Ieova ma āna folafolaga ma tumau i le faamaoni seia oo i le oti, na taʻuamiotonuina i latou e Ieova e ala i lo latou faatuatua, ma e aunoa ma se masalosalo, o le a aofia i latou i le ʻtoe tutū mai o ē amiotonu.’
13, 14. (a) E mafai faapefea ona tatou iloa e mafai ona taʻuamiotonuina Kerisiano o ē o loo iai se faamoemoe faalelalolagi? (e) O le ā le uiga o lea mea mo i latou?
13 E ui i lea, ae faapefea tagata taitoatasi o ē e pei ni mamoe i aso nei, o ē ua iai le faamoemoe faalelalolagi ma ua tuuina atu i latou i a Ieova, ma ua maliliu ma le faamaoni i lenei vaitaimi o le iuga? Pe o le a aofia ai i latou i le toe tutū mai o ē amiotonu? E foliga mai o le tulaga lena. Na iloa e le aposetolo o Ioane se vaaiga e faatatau i le motu o tagata e toatele o ē faamaoni. Seʻi mātau le auala ua ia faamatalaina ai i latou: “Ua mavae atu ia mea, ona ou iloa lea, faauta foi i le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi, o loo tutū i latou i luma o le nofoālii ma luma o le Tamai Mamoe, ua oofu i latou i ofu sisina, ua i ai foi lau pama i o latou lima; ua latou alalaga foi ma leo tetele, ua faapea atu, ʻO i ai le faaolataga i lo tatou Atua, o lē tietie i le nofoālii, atoa ma le Tamai Mamoe!’”—Faaaliga 7:9, 10.
14 Seʻi mātau le mausali o le mautinoa o nei tagata agamalu i lo latou faaolataga, ma ua latou saafiafi atu lenei mea i a Ieova ma Iesu, “le Tamai Mamoe.” E lē gata i lea, o loo tutū i latou i luma o Ieova ma le Tamai Mamoe, o loo oofu uma i ofu papaʻe. Aisea ua oofu papaʻe ai? Ua taʻu atu e se foafoaga faalelagi i a Ioane e faapea: “Ua faasinasinaina o latou ofu i le toto o le Tamai mamoe.” (Faaaliga 7:14) I le Tusi Paia, ua avea le paʻepaʻe po o le sinasina ma ata o le mamā, ma le amiotonu. (Salamo 51:7; Tanielu 12:10; Faaaliga 19:8) Ona o le mea moni ua vaaia le motu o tagata e toatele o loo oofu i ofu papaʻe, o lona uiga ua faapea ona silasila i ai Ieova i a i latou e amiotonu. Ua mafai faapefea lena mea? Ona ua uma ona tāina ō latou ofu i le toto o le Tamai Mamoe. Ua latou faaalia le faatuatua i le toto faamaligiina o Iesu Keriso ma o lea ua taʻuamiotonuina ai o uō a le Atua faatasi ai ma se vaaiga o le faasaoina mai i le puapuaga tele. O lea, so o se Kerisiano lava o avea nei ma vaega o le “motu o tagata e toatele” e maliu a o leʻi oo mai le puapuaga tele, e mafai ona mautinoa le aofia ai i le toe tutū mai o ē amiotonu i le lalolagi.
15. Ona o le a toe faatutuina uma mai ē amiotonu ma ē amioletonu, aisea e sili ai ona lelei le toe tutū o ē amiotonu?
15 O le toetu lea o loo faamatalaina i le Faaaliga mataupu e 20, a o le fuaiupu e 13, o upu nei o loo iai: “Ua avae foi e le sami e na oti sa i ai, ua avae foi e le oti ma seoli e na oti sa i ai; e taitasi foi o i latou ma faamasinoina e tusa ma a latou amio.” O lea, a o faagasolo le Aso Faamasino sili e afe tausaga a Ieova, o le a toe faatutuina mai ai i latou uma o ē e finagalo le Atua e faatutuina mai—o ē amiotonu atoa ma ē amioletonu. (Galuega 17:31) Ae maeu le sili ona lelei mo ē amiotonu! Ua uma ona latou ola i ni olaga na faaalia ai le faatuatua. Ua uma ona iai sa latou faiā vavalalata ma Ieova ma maua le mautinoa i le faataunuuina o āna fuafuaga. O molimau amiotonu a o leʻi oo i le Vaitaimi o le Faa-Kerisiano o le a ala mai nai le oti ma le naunautai e aʻoaʻoina pe na faapefea ona faataunuuina folafolaga a Ieova e faatatau i le Fanau. (1 Peteru 1:10-12) O i latou o isi mamoe ua silasila i ai Ieova e amiotonu i lo tatou vaitaimi, o le a toe foi mai i le tuugamau ma le naunautai e fia vaai i le lalolagi Parataiso lea na latou talanoa i ai ina o latou folafolaina le tala lelei i lenei faiga o mea. Maeu se fiafiaga sili o le a iai i lea taimi!
16. O le ā e mafai ona tatou taʻua e faatatau i le toe tutū i le Aso Faamasino, o ē o loo maliliu i ō tatou vaitaimi?
16 A o faagasolo lena Aso Faamasino e afe tausaga, o le ā tonu lava le taimi o le a faatutuina aʻe ai i latou na maliliu ma le faamaoni i nei tausaga faaiu o le faiga o mea a Satani? E lē o taʻua mai e le Tusi Paia. E ui i lea, pe ua lē talafeagai ea ona manatu o ē ua taʻuamiotonuina ua maliliu i ō tatou vaitaimi, o le a vave ona faatutuina mai ma faapea ona faia ai se sao ma le motu o tagata e toatele o ē faasaoina atu i a Amaketo, i le faafeiloaia mai le oti o tupulaga ua leva ona maliliu? Ioe, o le mea moni lava lea!
O se Faamoemoe e Faamafanafanaina Ai
17, 18. (a) O le ā le faamafanafanaga ua aumaia e le faamoemoe i le toetu? (e) O le ā ua uunaia i tatou e taʻutaʻu atu e uiga i a Ieova?
17 Ua aumaia e le faamoemoe i le toetu le malosi ma faamafanafanaga i Kerisiano uma i aso nei. Pe afai tatou te tutumau ma le faamaoni, e leai se mea e lē mailoa e tupu e leai se fili e mafai ona toesea lo tatou taui! Mo se faaaoaoga, i le 1992 Yearbook of Jehovah’s Witnesses, i le itulau e 177, o loo iai ni ata o Kerisiano loto tetele i Aitiope o ē na sili atu i a i latou le maliliu na i lo le faagutugutulua i lo latou faatuatua. Ua faitauina faapea sina faamatalaga o iai: “O foliga na o i latou o tatou faatalitalia e vāai i ai i le toetu.” Maeu se faaeaga o le a iai i le faamasani atu i a i latou nei ma le anoanoai o isi o ē ua faaalia le faamaoni i le feagai ai ma le oti!
18 Ae faapefea ē e pele i a i tatou ma ō tatou uso ma tuafāfine, o ē atonu ona ua matutua po o ni maʻi o le a lē aulia atu ai le puapuaga tele? Ina ia tusa ai ma le faamoemoe o le toetu, ua i a i latou se lumanai matagofie pe afai latou te tutumau ma le faamaoni. Ma afai foi tatou te faaalia ma le lototele le faatuatua i le taulaga togiola a Iesu, ua iai foi so tatou lumanai matagofie. Aisea? Ona i le pei o Paulo, tatou te faamoemoe ai i le “toe tutū mai [o] e ua amiotonu atoa ma e ua amioletonu.” Tatou te faafetai atu ai i a Ieova ma ō tatou loto atoa ona o lenei faamoemoe. E mautinoa lava, e uunaia ai i tatou e toe faaleo atu upu a le faisalamo e faapea: “Ia outou taʻutaʻu atu . . . [le] mamalu [o le Atua] i nuu ese, ma ona vavega i nuu uma lava. Auā e silisili Ieova, e tusa foi ona matuā viia o ia; e sili ona matautia o ia i atua uma.”—Salamo 96:3, 4.
Pe Mafai ona E Faamatalaina?
◻ O ā mau ua fesoasoani e faamautinoa ai lo tatou faamoemoe i se toetu faalelalolagi?
◻ O le ā le faavae ua taʻuamiotonuina ai nei Kerisiano?
◻ E faapefea e le faamoemoe i le toetu ona aumaia ai i a i tatou le lototele ma le faamalolosi?
[Ata i le itulau 9]
I le pei o Paulo, o Kerisiano faauuina e faamoemoe i le toetu faalelagi