Lipoti a Ē Faalauiloa le Malo

Talaʻi i Aso e Lē Taugalemu Ai

NA VALOIA e le aposetolo o Paulo e faapea “o ona aso e gata ai e oo mai ai aso faigata.” (2 Timoteo 3:1) Maeu le faamaonia o le saʻo o na upu! Ua leva ona faafeagai tagata o El Salvador i Amerika Tutotonu ma le matuitui o lenei mea moni. Mo le sili atu i le sefulu tausaga, na feagai ai lena atunuu ma fetauaiga i le va o o latou lava tagata lea na faaatuatuvaleina ai ma maliliu ai le faitau afe o tagata. Ua uma nei le taua, a e o loo tumau pea ona atuatuvale tagata. Ua faateteleina soligatulafono ina ua uma le taua. Na taʻua talu ai nei e se tasi tagata faasalalau o tala fou o le televise a le atunuu e faapea: “O faiga sauā ma le gaoi ua fai ma mea masani o aso uma.”

Ua afaina ai foi Molimau a Ieova i lenei sasao aʻe o soligatulafono. Ua osofaia e le au gaoi le tele o Maota o le Malo ma gaoia mea faalelei leo. I nisi taimi e osofai atu ai vaega o talavou faaauupegaina i totonu o Maota o le Malo a o faagasolo polokalama o sauniga faa-Kerisiano, ma gaoia tupe, uati, ma isi mea aogā mai ia i latou o auai. A o feagai ma a latou galuega e masani ai i aso taitasi, ua fasiotia ai foi se vaega o Molimau e le au gaoi.

E ui lava i nei toatuga, a e o loo galulue malolosi pea Molimau a Ieova i El Salvador i le talaʻia o le tala lelei. Ua latou faia lenei mea i le usitaia o le faatonuga faale-Tusi Paia e faapea: “Ia muai talaʻiina foi le tala lelei i nuu uma lava e ao ai. (Mareko 13:10) O loo i ai pea i lenei atunuu le toatele o ē o loo faananau atu i le faamoemoe ua tuuina mai e le Tusi Paia, ma o loo vilivilitai Molimau ia oo atu ia i latou uma ia. Ua faamaonia le aogā o le talaʻi atu e lē fuafuaina.

A o faataotolia i le falemai mo togafitiga, na faaaogā ai e se tasi Molimau avanoa uma e talanoa atu ai i isi maʻi e uiga i folafolaga a le Atua mo le lumanai, o loo i le Tusi Paia. Na faapea ane ma le faanoanoa se tasi maʻi tigaina: “Ua lē o toe mamao a e ou oti!” Peitai, o le vaaiga faavaivailoto mai o le maʻi sa leʻi faavaivaia ai le Molimau i lona taʻuina atu i ai o le tala lelei o le Malo o le Atua. Nai lo lea, na ia faitau leotele atu i le tamaloa manatu mai le tusi E Mafai ona E Ola e Faavavau i Parataiso i Le Lalolagi, na lomia e Molimau a Ieova. I nai aso mulimuli ane, na tuua ai e le Molimau le falemai, ma le faanoanoa i le tulaga oti o le tamaloa ua i ai.

I le fa tausaga mulimuli ane, na toe togafitia ai le Molimau lea i se isi falemai. A o i ai o ia i inā, na alu ane ai se maʻi ia te ia ma fai atu: “E te manatua aʻu?” O le tamaloa lea na ia feiloai i ai i le fa tausaga muamua atu, lea na manatu i ai ua oti! Maeu le faateia ma le fiafia o ia ina ua fusimau o ia e le tamaloa ma faaopoopo atu: “Ua avea nei foi aʻu o se tasi o Molimau a Ieova!” Sa faatāuaina e le tamaloa le faamoemoe o le Tusi Paia mo le lumanai, o lea na ia suesueina ai le Tusi Paia ma Molimau a Ieova, ma tuuina atu lona ola ia Ieova. E lē gata la ina avea o ia ma Molimau a e na auai foi o ia i le faiva faataimi atoa o se paeonia sauatoa mo tausaga e lua.

I lenei la tala, o fatu o le upu moni na luluina i se auala e leʻi fuafuaina, na pāʻia ai se loto gauai. O lenei faaeaga o le fesoasoani i tagata ina ia latou mauaina le malamalamaga o le upu moni, ua uunaia ai Kerisiano moni e faaauau le galuega talaʻi e ui i nei “aso faigata.”