Ua Lata le Aso Sili ma le Matautia o Ieova

“Ona tusia lea o le tusi e faamanatu i ona luma, mo e matatau ia Ieova, ma mafaufau i lona suafa.”—MALAKI 3:16.

1, 2. O le ā le aso sili ma le matautia ua uluai lapatai mai ai Malaki?

SILI ma le matautia! A o tafa mai ata ia Aokuso 6, 1945, na faatafunaina ai se aai i se taimi faafuasei lava. Pe a ma le 80,000 na maliliu ai! E faitau sefuluafe na manunua tigaina! Sa aasa le afi! Na matuā tele mea na faatafunaina e le pomu niukelea. Na faapefea le tulaga o Molimau a Ieova i le taimi o lena mala? Sa na o le toatasi lava le Molimau na i ai i Hiroshima—ma na taofiofia i totonu o pa e malupuipuia ai o le falepuipui ona sa ia tausisia lona faamaoni faa-Kerisiano. Na nuti ma solo i lalo le falepuipui, a e sa lē afaina lo tatou uso. E pei ona ia faamatalaina mai, na pa le pomu atomika ma faasaoloto mai ai o ia mai le falepuipui—atonu na o le pau lava lena o se mea lelei na faatinoina ina ua pa lea pomu.

² I se tulaga sili ma le matautia sa i ai ina ua pa lea pomu, ua na o se meanoa e lē taulia pe a faatusatusa atu i le ‘aso sili ma le matautia o Ieova’ o loo faapea ona lalata tele mai. (Malaki 4:5) Ioe, na i ai ni aso sili ma le matautia ua mavae, a e o lea aso o Ieova o le a silisili atu i na aso uma.—Mareko 13:19.

3. O le ā le faaeseesega e ao ona mataulia i le va o “tagata” ma le aiga o Noa na taʻitaʻiina atu ai i le Lolo?

³ I aso o Noa, “o tagata uma ua leaga ia i latou a latou amio i le lalolagi,” ona folafola atu lea e le Atua e faapea: “Auā ua tumu le lalolagi i le saua ona o i latou; faauta foi, o aʻu lava, ou te faaumatia i latou atoa ma le lalolagi.” (Kenese 6:12, 13) E pei ona faamauina i le Mataio 24:39, na fetalai faapea Iesu, “na le iloa foi e i latou ina seia oo le lolo, ma aveesea i latou uma.” A e o Noa o le na faamaoni, o “lē talaʻi le amiotonu,” faatasi ai ma lona aiga e matatau i le Atua, na faasaoina i lena Lolo.—2 Peteru 2:5.

4. O le ā le faaaʻoaʻoga e fai ma lapataiga ua i ai e ala mai ia Sotoma ma Komoro?

⁴ Ua faamatala mai foi e le Iuta 7: “E pei o Sotoma ma Komoro, ma aai sa vagavagai ai, ua faitaaga . . . ma mulimuli atu i tuinanau ese o le tino, o lea ua tuu mai ai i latou e fai ma faailoga, ua faasalaina i latou i le afi faavavau.” Na faaumatia na tagata le amioatua ona o auala inosia ma le matagā na latou ola ai. Ia fai lea ma lapataiga mo vaega o le lalolagi o ona po nei o loo faatauaina feusuaiga i o latou manatu! E ui i lea, ia matau na faasaoina Lota o lē na mataʻu i le Atua ma ona afafine i le taimi o lena mala, e pei foi ona puipuia ē tapuai ia Ieova i le taimi e oo mai ai le puapuaga tele ua lalata tele mai.—2 Peteru 2:6-9.

5. O le ā e mafai ona tatou aʻoaʻoina mai i le faaooina atu o le faasalaga tau faamasinoga ia Ierusalema?

⁵ Mafaufau foi i faaaʻoaʻoga e fai ma lapataiga ina ua faaaogā e Ieova autau e osofaia ma faatafunaina Ierusalema, le aai matagofie sa avea muamua ma mea “e fiafia ai le lalolagi uma.” (Salamo 48:2) O nei mea pagatia na tutupu muamua i le 607 T.L.M ma faapena foi ma le 70 T.A., talu ai na lafoaia le tapuaiga moni e i latou na faapea mai o tagata o le Atua. E fiafia lava ona na faasaoina auauna faamaoni a Ieova. O le mala i le 70 T.A. e pei ona (faaatagia mai i lalo) ua faamatalaina o se “puapuaga e leai sona tusa talu lava le amataga o mea na faia e le Atua, ua oo mai i ona po nei.” Na aveesea atoatoa ai le faiga o mea a Iutaia faaaposetate, ma e mautinoa lava e tusa i lena vala, “e le toe faapea foi amuli.” (Mareko 13:19) A e e oo foi lava i lenei faaoosala tau Atua, ua na o sina ata o “le puapuaga tele” ua faapea ona faamatauina ai le faiga o mea i le lalolagi aoao.—Faaaliga 7:14.

6. Aisea ua faataga ai e Ieova mala matautia?

⁶ Aisea ua faatagaina ai e le Atua mala matautia, ua faapea ona faaumatia ai le tele o ola? I mea na tutupu ia Noa, o Sotoma ma Komoro, ma Ierusalema, na faaoo atu e Ieova faasalaga ia i latou ua leaga ai le lalolagi, o ē ua faatamaia moni lenei lalolagi e ala i le faaoonaina ma faaleagaina, ma amioga faalumaina, ma i latou ua teena le tapuaiga moni po o le liliu atu i le faaaposetasi. Ua tatou i ai nei i le faatausiusiuga o le faaoosala tau faamasinoga e silisili i lo taimi uma o le a faapea ona aofia ai le lalolagi atoa.—2 Tesalonia 1:6-9.

“I Ona Aso e Gata Ai”

7. (a) O le ā ua fai ma ata faavaloaga o faamasinoga tau Atua anamua? (e) O le ā le faamoemoe matagofie o tuu mai i le lumanai?

⁷ O na faaumatiaga o aso anamua na avea o ata faavaloaga o le aso sili ma le matautia o le puapuaga tele o faamatalaina i le 2 Peteru 3:3-13. Ua faapea mai le aposetolo: “Ua muamua ona iloa o lenei mea, e o mai i ona aso e gata ai o e tauemu, latou te savavali e tusa ma o latou lava tuʻinanau.” Ona ia taulai atu ai lea i ona po o Noa, ua tusi Peteru e faapea: “O le mea foi lea sa faaumatia ai le lalolagi tuai ina ua lofia i le vai; a o le lagi ma le lalolagi o ona po nei ua tuu mo le afi ona o lea lava afioga; ua taofia ai foi mo le aso e faamasino ai ma fano ai tagata faalematau.” Pe a uma le puapuaga e silisili atu i lo puapuaga uma lava, ona sosoo ai lea ma le faataunuuina i se tulaga fou o le pule a le Malo o le Mesia ua loa o faatalitalia—“le lagi fou ma le lalolagi fou, . . . e mau ai le amiotonu.” Maeu se faamoemoega olioli o faatalitalia!

8. O faapefea ona agaʻi atu mea o tutupu i le lalolagi i sona mutaaga?

⁸ I le faagasologa o lo tatou 20 senituri, ua agaʻi atu i luma mea o tutupu i le lalolagi i sona mutaaga. E ui o le faatafunaga i Hiroshima e le o le aso na asiasi mai ai le Atua, a e e mafai ona aofia i “faaiteite” na faapea ona valoia e Iesu mo le vaitaimi o le iuga. (Luka 21:11) Na faapogaia ai se faamatauga faaniukelea ua faapea ona faamalumalu mai e pei o se afā i luga o tagata. E pei ona faitauina faapea se ulutala i le New York Times o Novema 29, 1993: “Atonu ua Fai si Elea o Fana a e o Auupega Faaniukelea ua Saunia Lelei mo le Faaaogaina i so o se Taimi.” I le taimi nei, o taua i le va o malo, i va o lanu, ma va o ituaiga, ua faaauau ona fua mai ai se tulaga sili ona pagatia. O le tele o taua i taimi ua mavae, o le tele lava o ē na pagatia ai o fitafita. I aso nei, o le 80 pasene o ē afaina i taua, o tagata sivili, e lē taulia ai le faitau miliona o ē ua sosola ese mai i o latou atunuu o ni tagata sulufai.

9. Ua faaalia faapefea e taʻitaʻi lotu le faauo atu i le lalolagi?

⁹ Ua masani ona faaalia ma o loo faaauau pea ona faaalia e taʻitaʻi lotu le “fefaauoai ma le lalolagi” e ala i le aafia moni i taua ma fouvalega faamasaa toto. (Iakopo 4:4) Ua faifai mea faatasi isi ma tagata iloga matapeapea o le lalolagi o fefaatauaiga a o latou fau aʻe ni faalapotopotoga tetele o auupega ma vailaau faasaina. Mo se faaaʻoaʻoga, i le lipotia mai o le tagatavaleina o se matai taʻutaʻua i vailaau faasaina i Amerika i Saute, ua faapea mai le faamatalaga i le New York Times: “Na nanaina ana fefaatauaiga o vailaau faasaina i le faia lea o se isi pisinisi ese tamaoaiga faatulafonoina ma faatagā faafoliga atu e agalelei, na fai sana lava polokalama e ala mai i le leitio ma sa masani ona feoai ma patele o le lotu Katoliko Roma.” Ua lipotia mai e le Wall Street Journal e faapea, e ese ai mai le faaleagaina o ola o le faitau miliona o ē ua pulea e vailaau faasaina, o lenei matai taʻutaʻua o vailaau faasaina, na ia faatonutonuina totino foi le fasiotia o le faitau afe. Na matauina e le Times i Lonetona e faapea: “E masani ona totogi e tagata fasioti tagata le faia o se Misasā faapitoa . . . a e i le taimi lava lea e tasi, o faia ai le misasā mo le falelauasiga o lē ua fasiotia i se isi nofoaga.” Pagā se amioleaga ina a tetele!

10. E ao faapefea ona tatou manatu i le faagasolo ina leaga tele tulaga o le lalolagi?

¹⁰ O ai na te iloa po o ā nisi faatamaiaga tetele e ono faaoo mai e tagata ua faagaee e temoni i luga o lenei lalolagi? E pei ona faapea mai le 1 Ioane 5:19: “A o le lalolagi uma o loo nofo toilalo i loo leaga,” o Satani le Tiapolo. I aso nei, o le taimi lenei “oi talofa ia te oulua le fanua ma le sami, auā ua alu ifo ia te oulua le tiapolo ua lotoa tele, auā ua na iloa ua saasaa ona po.” (Faaaliga 12:12) E ui i lea, e fiafia lava ona ua faamautinoa mai e le Roma 10:13 ia i tatou e faapea, “e faaolaina i latou uma o e valaau i le suafa o le Alii [“Ieova,” NW].”

E Faalatalata mai le Atua i le Faamasinoga

11. O ā tulaga sa i Isaraelu na mafua ai le vavalo o Malaki?

¹¹ Ua faamanino mai e le valoaga a Malaki le mea ua toeitiiti nei tupu i le lumanai lata mai. Ua faamulimuli ia Malaki le lisi umi o perofeta Eperu anamua. Ua uma ona oo le faaumatiaga ia Ierusalema i le 607 T.L.M. Peitai ane, i le 70 tausaga mulimuli ane, na faaalia ai e Ieova le agalelei alofa mutimuti vale i le toe faafoisiaina o lena nuu i lona laueleele. E ui i lea, i totonu o le selau tausaga, na toe see ese atu ai foi Isaraelu i le aposetasi ma le amioleaga. Na tauvaleaina e tagata le suafa o Ieova, le amanaia ana tulafono amiotonu, ma faaleagaina lona malumalu e ala i le avatuina i ai o manu tauaso, pipili, ma mamaʻi mo taulaga. Sa latou faatea i a latou avā na fai a o taulelea ina ia faaipoipo i fafine ese.—Malaki 1:6-8; 2:13-16.

12, 13. (a) O le ā le faamamāina na manaomia mo le vaega faaositaulaga faauuina? (e) E aogā foi faapefea le faamamāina mo le motu o tagata e toatele?

¹² Sa manaomia ai se galuega o le faamamāina. Ua faamatalaina lea i le Malaki 3:1-4. E pei o Isaraelu anamua, ua manaomia ona faamamāina Molimau a Ieova o ona po nei, o lea e mafai ona faatatauina le galuega o le faamamāina o faamatalaina mai e Malaki ia i latou. A o lalata atu le taua muamua o le lalolagi i lona iuga, sa leʻi tausisia e nisi o Tagata Aʻoga o le Tusi Paia, e pei ona sa faaigoa ai Molimau i lena vaitaimi, se solitu aiai mai mataupu fai a le lalolagi. I le 1918, na auina mai ai e Ieova Lana “sāvali . . . o le feagaiga,” o Iesu Keriso, i Lana faatulagaga i le malumalu faaleagaga ina ia faamamāina se vaega toaitiiti o ē tapuai atu ia te Ia mai le matauleagaina i le lalolagi. I se uiga faavaloaga, na fesili ai Ieova e faapea: “O ai se na te lavā tali le aso o lona afio mai [o le sāvali]? o ai foi se na te tulai pe a faaalia mai o ia? auā o ia e tusa ma le afi a lē tunu ario; e tusa foi ma le moli a lē tāofu; e nofo o ia, o lē tunu ma faamamā i le ario; na te faamamāina le fanauga a Levi [le vaega faaositaulaga faauuina], na te faateʻa ese foi le eleele ia te i latou e pei o le auro ma le ario; latou te avatu ai ia Ieova le taulaga e fai i le amiotonu.” I le avea o i latou ma tagata ua faamamāina, ua faapea ai ona latou faia!

¹³ O lena vaega faaositaulaga faauuina e na o le 144,000. (Faaaliga 7:4-8; 14:1, 3) A e faapefea isi Kerisiano tuuina atu i aso nei? O i latou nei ua faatoateleina i le faitau miliona, ua faia aʻe ai le “motu o tagata e toatele” ua faapea foi ona faamamāina mai ala o le lalolagi ‘ua taina foi o latou ofu ma faasinasinaina i le toto o le Tamai Mamoe.’ (Faaaliga 7:9, 14) O lea, e ala i le faaalia o le faatuatua i le taulaga togiola a le Tamai Mamoe o Iesu Keriso, ua mafai ai ona tausia se tulaga mamā i luma o Ieova. Ua folafola atu i ai le faasaoina i le taimi o le puapuaga tele, le aso sili ma le matautia o Ieova.—Sefanaia 2:2, 3.

14. O ā upu e tatau ona usitaia i aso nei e tagata o le Atua a o latou faaauau ona faatupuina aʻe le tagata fou?

¹⁴ Faatasi ai ma le vaega totoe faaositaulaga, e tatau ona usitaia ai e lenei motu o tagata e toatele fetalaiga atili a le Atua o loo faapea mai: “Ou te faalatalata foi ia te outou i le faamasinoga; e vave foi ona fai o aʻu ma molimau i e fai togafiti faataulāitu, ma ē mulilulua, ma ē tauto pepelo, ma ē faasaua i le taui o le auauna tauia, o le fafine ua oti lana tane, ma le ua mātuaoti, atoa ma ē faapioina le faamasinoga o le tagata ese; ua latou le matatau foi ia te au, . . . Auā o aʻu o Ieova, ou te le liliu.” (Malaki 3:5, 6) E lē suia tulaga o Ieova, o lea ona o le mataʻu ia Ieova, e tatau ai i ona tagata i aso nei ona teena so o se ituaiga o ifoga i tupua uma lava, ma ia moni ma faamaoni, ma lima foai a o faaauau ona latou atiina aʻe le tagata fou faa-Kerisiano.—Kolose 3:9-14.

15. (a) O le ā le valaaulia alofa mutimuti vale ua tatala mai e Ieova? (e) E mafai faapefea ona tatou alofia le “faoa” o mea a Ieova?

¹⁵ Ua tatala atu e Ieova le valaaulia i so o se tasi ua liliuese mai i ona ala amiotonu, i le faapea mai: “Foi mai ia ia te au, ona ou foi atu lea ia te outou.” A fesili mai i latou nei: “Matou te foi atu ma ni a?” O lana tali mai: “Ua outou faoa aʻu mea.” I le tali atu i isi fesili: “Ni a ea au mea ua matou faoa?” Ua faapea mai Ieova ua latou faoa ana mea e ala lea i le lē taulau ona latou avatua a latou mea e silisili ona lelei e ofoina e fai ma taulaga mo lana auaunaga i le malumalu. (Malaki 3:7, 8) I le avea ma tagata o Ieova, e tatau ona tatou mananao ma le faamaoni e tuuina atu lo tatou malosi silisili, tomai ma meafaitino i le auaunaga ia Ieova. O lea, na i lo le faoa ai o mea a le Atua, ua tatou ‘faaauau ai ona saili muamua le malo ma lana amiotonu.’—Mataio 6:33.

16. O ā ni faalaeiauga tatou te maua i le Malaki 3:10-12?

¹⁶ E i ai se taui tele mo i latou uma o e lafoaia ala o le lalolagi manatu faapito matapeapea e pei ona faailoa mai e le Malaki 3:10-12 e faapea: “Ia outou tofotofo mai ai ia te au i lenei mea, ua fetalai mai ai Ieova o ʻau; pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele.” O i latou uma e faaalia le loto talisapaia, ua folafola i ai e Ieova le manuia faaleagaga ma le fuatele mai. Ua ia faaopoopo mai atili: “E faaamuia foi ia te outou e nuu uma lava; auā e fai outou ma nuu e moomia.” Pe ua le faamaonia ea le moni o lea mea i le faitau miliona o tagata loto faafetai o Ieova i le lalolagi aoao i aso nei?

O Ē Tausisi i le Faamaoni ua Tusia i le Tusi O le Ola

17-19. (a) Ua faapefea ona aafia o tatou uso i le fevesiaiga tele i Rwanda? (e) O le ā le talitonuga maumauai ua faaauau ai pea i latou uma nei faamaoni?

¹⁷ I lenei vaega, e fia faamatala atu le faamaoni o o tatou uso ma tuafafine i Rwanda. Ua faaauau pea ona latou avatu taulaga faaleagaga e silisili ona lelei i le fale faaleagaga o le tapuaiga ia Ieova. Mo se faaaʻoaʻoga, i la latou Tauaofiaga Itumalo o “Aʻoaʻoga mai le Atua” ia Tesema 1993, na ausia ai e la latou autalaʻi o le Malo e 2,080 se aofaiga o le aofia na auai e 4,075. E 230 Molimau fou na papatisoina, ma mai ia i latou ia, pe a ma le 150 na auai i le auaunaga paeonia lagolago i le masina na sosoo atu ai.

¹⁸ Ina ua sasao aʻe le feainaiga i le va o ituaiga ia Aperila i le 1994, a itiiti mai e toʻa 180 Molimau, e aofia ai ma le ovasia o le aai i Kigali le laumua, ma lona aiga atoa, na fasiotia. Na faaauau ona galulue le aufaaliliu e toaono, e toafa o ni Hutu a e toalua o Tutsi i le ofisa o le Sosaiete o le Olo Matamata i Kigali mo ni vaiaso i lalo o tulaga matautia o faamatauga seia oo ina tatau ona sosola ese Tutsi, a e na fasiotia i se tasi o nofoaga e sueina ai tagata. I le taunuuga mulimuli, na sosola ai le toafa na totoe i Goma i Zaire, ma avea mea na totoe o a latou komepiuta, ma sa latou faaauau ai ma le faamaoni i inā ona faaliliuina Le Olomatamata i le gagana Kinyarwanda.—Isaia 54:17.

¹⁹ E ui ina i ai nei Molimau sulufai i tulaga pagatia, a e e talosaga muamua mai pea i latou mo meaai faaleagaga na i lo le tausiga faaletino. I se faataulagaina tele, na mafai ai e uso alolofa mai i isi nuu ona faaoo atu mea o manaomia mo i latou. I upu latou te tautatala ai ma e ala i lo latou maopoopo lelei i lalo o tulaga mafatia, ua tuuina atu ai e nei tagata sulufai se molimau ofoofogia tele. Ua faamaonia lo latou avatuina pea o a latou mea e silisili ona lelei i le tapuaiga a Ieova. Ua latou faatinoina se talitonuga maumauai e pei o Paulo, lea o loo faaalia i le Roma 14:8 e faapea: “Auā afai tatou te ola, tatou te ola mo le Alii [Ieova] pe afai e oti, e oti mo le Alii; o lenei, pe ola pe oti i tatou, o tagata lava o le Alii [Ieova] i tatou.”

20, 21. (a) O igoa o ai ua lē tusia i le tusi faamanatu a Ieova? (e) O igoa o ai o loo i ai i le tusi, ma aisea?

²⁰ E tausia e Ieova faamaumauga o i latou uma o auauna ia te ia ma le faamaoni. Ua faaauau mai faapea le valoaga a Malaki: “Ona fetautalatalai lea e na matatau ia Ieova; ua liliu mai foi e Ieova ona fofoga, ma ua faafofoga mai; ona tusia lea o le tusi e faamanatu i ona luma, mo e matatau ia Ieova, ma mafaufau i lona suafa.”—Malaki 3:16.

²¹ Maeu le tāua o le faaalia o le mata’u i le Atua i aso nei e ala i le faamamaluina o lona suafa! I le faia faapea, o le a lē oo ai ia i tatou le faasalaga tau faamasinoga, e pei ona faia ia i latou e fiafia e lagolagoina le faiga o mea o lenei lalolagi. Ua faamatala mai e le Faaaliga 17:8 e faapea “e lei tusia o latou igoa i le tusi o le ola.” Ua talafeagai ai la, o le igoa e sili ona matilatila le tusiaina i le tusi o le ola a Ieova, o le Sui Sili o le ola, le Alo e toatasi o le Atua, o Iesu Keriso. Ua faapea mai le Mataio 12:21: “O lona igoa foi e faamoemoe i ai nuu ese.” O le taulaga togiola a Iesu ua mautinoa ai le mafai ona maua le ola e faavavau mo i latou uma e faaalia i ai le faatuatua. Maeu se faaeaga o le tusia ai o o tatou lava igoa e faaopoopo atu i le suafa o Iesu i lena tusi!

22. O le ā le eseesega o le a matuā manino pe a faaoo mai e Ieova le faamasinoga?

²² O le a faapefea mai auauna a le Atua i le faamasinoga? Ua tali mai Ieova i le Malaki 3:17, 18: “Ou te alofa foi ia te i latou, e pei ona alofa o le tagata i lona atalii ua auauna ia te ia. Ona outou toe iloa lea e eseese lē amiotonu ma lē amio leaga; e ese le ua auauna i le Atua, ma le ua le auauna ia te ia.” O le a manino le tuueseeseina i tagata uma: o ē amioleaga o le a tuuesea mo le fanoga e faavavau, ma o ē amiotonu, e talileleia mo le ola e faavavau i le pulega a le Malo. (Mataio 25:31-46) O lea, o se motu o tagata e toatele o ē e pei o ni mamoe o le a faasaoina i le aso sili ma le matautia o Ieova.

Pe E te Manatua?

◻ O ā faamasinoga na faaoo atu e Ieova i le vaitaimi o le Tusi Paia?

◻ E faapefea ona tutusa lelei tulaga o aso nei ma aso anamua?

◻ O le ā le faamamāina o faia e faataunuuina ai le valoaga a Malaki?

◻ O igoa o ai o tusia i le tusi faamanatu a Ieova?