Fesili Mai le Au Faitau

E faapefea ona faatatau i “isi mamoe” i le taimi nei aogā o auaunaga faaositaulaga sili a Iesu Keriso o loo taʻua i le Eperu 4:15, 16?

E ui lava o le tulaga o Iesu o se Ositaulaga Sili e muai tāua mo i latou o le a faatasi ma ia i le lagi, a e ua maua foi i le taimi nei lava e Kerisiano o loo i ai le faamoemoe faalelalolagi, aogā mai i auaunaga faaositaulaga a Iesu.

E talu mai le taimi o Atamu, ua matuā mafatia ai tagata i le agasala. Ua tatou mafatia i le lē lelei atoatoa tuufaasolo, e pei foi ona sa i ai tagata Isaraelu. Na latou ō atu i se faasologa umi o ositaulaga sili ma faitaulaga lagolago o ē na ofoina atu taulaga mo a latou lava agasala faapea foi ma agasala a tagata. A e na oo mai le taimi, na faauuina ai loa Iesu e avea ma ositaulaga “e uiga faatasi ma Mekisateko.” Ina ua mavae ona toe faatuina, sa iloa ai loa Iesu i luma o Ieova e avatu le tāua o lana taulaga faaletagata lelei atoatoa.—Salamo 110:1, 4.

O le ā le uiga o lenei mea mo i tatou i aso nei? I lana tusi i tagata Eperu, na faamatala atu ai e Paulo le auaunaga a Iesu o se Ositaulaga Sili. I le Eperu 5:1, e tatou te faitau ai e faapea: “Auā o ositaulaga sili uma lava ua filifilia mai i tagata, ua tofia i latou mo tagata i mea a le Atua, ina ia faitaulaga i latou i mea alofa ma taulaga mo agasala.” I le fuaiupu la e 5 ma le 6, ua faaali mai ai e Paulo faapea na avea Iesu ma ositaulaga sili, lea e taʻitaʻia atu ai i faamanuiaga mo i tatou.

E faapefea? Na tusi Paulo e faapea: “E ui lava o ia o le Alo, a o mea sa tiga ai o ia na aʻoaʻoina ai o ia ia usiusitai, ua faaatoatoaina foi o ia, ona avea ai lea o ia ma tupuga o le ola e faavavau ia i latou uma o e usiusitai ia te ia.” (Eperu 5:8, 9) Pe a tatou muai faitau i ai i lena fuaiupu, tatou te ono manatu ai i le auala o le a mafai ai ona tatou maua aogā i le lalolagi fou, pe a aveesea le tulaga agasala o i latou e faamaoni i le Atua ma Iesu ma mauaina le ola e faavavau. O se faamoemoega aogā lena ua faavae i le tāua faasaoola o le taulaga na faia e Iesu ma lana auaunaga o se Ositaulaga Sili.

A e o le mea moni lava, e mafai ona tatou maua aogā i le taimi nei mai lona tulaga po o lana auaunaga o se Ositaulaga Sili. Ia seʻi mātau le Eperu 4:15, 16: “Auā e le ia te i tatou se ositaulaga sili e le mafaia ona tiga alofa faatasi ma i tatou i o tatou vaivai, a ua faaosoosoina o ia i mea uma pei o i tatou, a ua leai se agasala ia te ia. O le mea lea ia tatou faalatalata atu ai ma le loto tele i le nofoālii o le alofa tunoa, ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai.” O afea ona “aso e tatau ai”? O le taimi lea tatou te manaomia ai le alofaina ma le alofa tunoa. O i tatou uma lava, ona o lo tatou tulaga lē lelei atoatoa, ua mautinoa le tatau ona lagonaina lenei manaoga i le taimi nei.

Ua taʻua mai e le Eperu 4:15, 16 e faapea o Iesu—i le avea nei ma ositaulaga i le lagi—sa avea foi ma tagata, ma e i ai foi la ona lagona alofa loloto. Ia te ai? Ia i tatou. Afea? I le taimi nei. A o avea o ia ma tagata, sa feagai ai Iesu ma omiga ma faigata ia e taatele i tagata. I nisi o tulaga na fiaai ai ma fiainu Iesu. Ma e ui lava ina lelei atoatoa, a e sa vaivai foi o ia. O lena mea e tatau ona faamautinoaina ai i tatou. Aisea? Auā na oo ia Iesu le tulaga vaivai e masani ai faalenatura, ma ua ia malamalama lelei i o tatou faalogona masani. Manatua foi, na faafesagai Iesu ma le onosaia o fefinauaiga o le lotoleaga i le va o ona aposetolo. (Mareko 9:33-37; Luka 22:24) Ioe, sa lei fiafia o ia. Pe e lē aumaia ai ea ia i tatou e lena mea le mautinoa e faapea e malamalama o ia pe a tatou lē fiafia ma loto vaivai? E mautinoa lava.

Pe a e loto vaivai, o le ā e mafai ona e faia? Pe na fai mai Paulo e tau lava o lou faatali seʻi oo i le lalolagi fou, ona fesoasoani atu ai lea o lou Ositaulaga Sili o Iesu ia te oe ia atoatoa i le mafaufau ma le tino? E leai. Na fai mai Paulo: “Ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai,” ma e aofia ai le taimi nei. E le gata i lea, a o avea Iesu ma tagata, na feagai o ia ma puapuaga ma faigata, na “faaosoosoina o ia i mea uma pei o i tatou.” O lea, pe a tatou fesagai ma na mea, ua sauni o ia e fesoasoani mai ia i tatou, e faavae i lona malamalamaga i mea o loo tutupu ia i tatou. Pe e lē lalata ai ea oe ia te ia ona o lena mea?

Seʻi mātau nei la le fuaiupu e 16. Ua faapea mai ai Paulo, ia tatou—ma e aofia ai iinei le au faauuina ma i latou o isi mamoe—faalatalata atu ai ma le loto tele e talanoa i le Atua. (Ioane 10:16) Sa lei uiga le aposetolo faapea a fai a tatou tatalo e mafai ona tatou fai atu so o se mea tatou te mananao ai e oo lava i mea o tatou te feita ai ma mea lē fetaui. Nai lo lea, e faavae i le taulaga a Iesu ma lona tulaga o se Ositaulaga Sili, ua mafai ai ona tatou faalatalata atu i le Atua e ui lava o tatou o tagata agasala.

O le isi auala e mafai ai ona faamanuiaina i tatou i le taimi nei i le auaunaga a lo tatou Ositaulaga Sili o Iesu Keriso, e aofia ai a tatou agasala po o mea sese. E mautinoa lava tatou te le faatalitalia i lenei faiga o mea le faaaogaina ia i tatou e Iesu o aogā atoatoa o lana taulaga. A e tusa lava pe faapena, e tumau lava ona tatou le mauaina le ola e faavavau. Manatua foi le mea o loo faamauina i le Luka 5:18-26, lea e aofia ai le tamaloa maʻi supa na tuutuu ifo i lona moega mai le taualuga na avanoa o le fale? Na fetalai atu Iesu ia te ia: “Sole, ua faamagaloina au agasala.” Sa lei uiga lena mea i ni agasala faapitoa na māfua ai le maʻi supa. Atonu na uiga i le tulaga agasala o le tamaloa, lea e aofia ai lona lē lelei atoatoa tuufaasolo mai, ua māfua ai ona maʻi.

E faavae i le taulaga na ia ofoina, sa mafai ai e Iesu ona aveesea agasala a le tamaloa, e pei o le ʻoti e alu i le vao na te aveesea agasala a Isaraelu i le Aso o le Togiola. (Levitiko 16:7-10) A e peitai, sa avea pea le tamaloa maʻi supa ma tagata. Sa toe agasala foi, ma na iu ina oti, e pei ona oo i tagata agasala. (Roma 5:12; 6:23) E lē faapea o le tala a Iesu sa fai na uiga i le maua faafuasei loa e le tamaloa o le ola e faavavau. A e na faamanuiaina le tamaloa i le mauaina o se vaega o le faamagaloga i lena taimi.

Seʻi iloilo nei la lo tatou tulaga. I le tulaga lē lelei atoatoa, tatou te sese ai i aso uma. (Iakopo 3:2) O le ā tatou te ono faia i lena tulaga? Ia, i le lagi o loo i ai lo tatou Ositaulaga Sili alofa mutimutivale lea e mafai ai ona tatou faalatalata atu ia Ieova i le tatalo. Ioe, e pei ona tusia e Paulo, ua mafai e i tatou uma lava ona “faalatalata atu ai ma le loto tele i le nofoalii o le alofa tunoa [o le Atua], ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai.” O lea la, o i latou uma lava i aso nei o isi mamoe, o loo mautinoa le mauaina o faamanuiaga matagofie e aofia ai ma se loto fuatia ifo mamā, mai auaunaga faaositaulaga sili a Keriso.

O Kerisiano uma lava o loo i ai le faamoemoe faalelalolagi e mafai ona vaavaai atu i faamanuiaga e sili atu i le lalolagi fou ua lata mai. Ona faaaogā atoatoa ai lea e lo tatou Ositaulaga Sili le aogā o lana taulaga, ma taʻitaʻiina atu ai i le faamagaloina atoatoa o agasala. O le a ia faalauaitele atu foi faamanuiaga sili i le faaleleia o le soifua maloloina faaletino ma faaleagaga o tagata. O le a matuā faalauteleina atu foi e Iesu le aʻoaʻoina o tagata o le Atua i luga o le lalolagi, auā o le aʻoaʻoina o le Tulafono o le tiute tauave tele lea a le au faitaulaga i Isaraelu. (Levitiko 10:8-11; Teuteronome 24:8; 33:8, 10) O lea la, a o tatou mauaina faamanuiaga mai auaunaga faaositaulaga a Iesu i le taimi nei, e tele isi faamanuiaga o loo faatali mai mo i tatou!