Le Au Faauu a Kiliata, “O Misionare Moni Lava!”
“O LE ā lea mea o le misionare?” Na aumaia lena fesili e se fai nusipepa toetoe fa sefulu tausaga ua mavae. Na finau mai le tusitala e faapea o misionare moni sa avea ma mea faigaluega o le lelei lautele ma tulaga tau tamaoaiga. E ui i lea, i le Aso Sa, ia Mati 5, 1995, i le Maota Fono o Molimau a Ieova i le aai o Jersey, na faamamafaina ai le aumaia o se tali e matuā ese lava. O le ā le faatasiga? O le faauuga o le vasega lona 98 o le Aʻoga o Le Olomatamata ma le Tusi Paia o Kiliata—o se aʻoga ua auina atu ai misionare i so o se itu o le lalolagi!
Ina ua maeʻa le pese amata ma le tatalo, ona faafeiloai mafana atu loa lea e Albert D. Schroeder o le Vaega Pule i latou uma e 6,430 o ē na auai. I ana upu faafeiloai, na faamaninoina atu ai e le uso o Schroeder le mafuaaga ua eseese ai le au faauu a Kiliata mai isi ua latou taʻua i latou lava o misionare. Na ia fai mai: “O le Tusi Paia o le tusi autū lea mo Kiliata.” O le au faauu a Kiliata ua toleniina ina ia le avea ma tagata galulue mo le lelei lautele, a e ia avea ma faiaʻoga o le Afioga a le Atua. O lea ua agavaa tutasi ai i latou e fesoasoani i manaoga faaleagaga o tagata i atunuu ese.
Na faamatala mai e isi failauga na sosoo ai le tele o isi vaipanoa ua faamaonia ai le avea o le au faauu a Kiliata ma misionare “moni.” Na lauga atu Charles Molohan ia i latou i le mataupu “Ia Faaauau ona Fuaina mai Fua Lelei i le Avea ma Misionare.” I le tataʻi atu i upu a le aposetolo o Paulo i le Kolose 1:9, 10, na faamanatu atu ai e le uso o Molohan i le au faauu e faapea o le lima masina ua mavae o lo latou i ai i Kiliata na fesoasoani ia i latou e faateleina ai lo latou “iloa lelei o le Atua.” E fesoasoani lea ia i latou i le fuaina mai o fua i auala e lua: i le faailoaina mai o fua o le agaga o le Atua ma le tufaina atu o upu moni o le Tusi Paia i isi.
Na sosoo mai ai Daniel Sydlik o le Vaega Pule ma le matua malosi o le “Aua E te Faatalale i Mea e Lamatia ai Lou Ola.” Na ia taʻua le fesili a Iesu e faapea: “Se a foi se mea e avatu e le tagata e togiola aʻi lona ola?” (Mataio 16:26) Na taʻua e le uso o Sydlik e faapea: “Ua faataulagaina e tagata o latou ola mo se olaga faigofie, ma filemu.” A e ui i lea, o i latou ua i ai le faatuatua ola e le mafai ona faagutugutulua pe a fetaiai ma tofotofoga. O upu a Iesu e faaalia ai e tatau i se tasi ona loto malie e “avatu,” po o le faataulaga, ina ia faasaoina ai lona ola. Na matuā timaia misionare fou ina ia avatu ia Ieova o latou ola atoa, le mea sili latou te mafaia, i lana auaunaga!
Na sosoo ai ma le lauga atu a William Van de Wall o le Komiti o le Matagaluega o Auaunaga i le mataupu “Le Aposetolo o Paulo—O se Faaaʻoaʻoga e Onomea ona Faataʻitaʻi i Ai.” Na faamatala mai e le uso o Van de Wall e faapea: “Na taulamua Paulo i le galuega faamisionare i le uluai senituri.” Ua talafeagai lelei ai la ona faamatilatilaina vaipanoa e fa na faataatia ai e le aposetolo o Paulo se faataʻitaʻiga lelei mo misionare i aso nei: (1) o le naunau moni ma le alofa o Paulo mo tagata, (2) o lona uigā i le faiva, (3) o lona teena ma le agaga maulalo o le faasilisilia o ia lava, (4) o lona faatuatua atoatoa ia Ieova.
O le “Ia Tuu Atu ia Ieova Na te Suesueina Oe i Lou Tofiga Fou,” o le mataupu lea na talanoaina mai e Lyman A. Swingle o le Vaega Pule. I le faaaogaina o le mau o le aso, o le Salamo 139:16, na faailoa mai ai e le uso o Swingle e faapea, o misionare fou, e latou te fetaiai ma faafitauli i a latou tofiga ma ua silafia e Ieova le vaifofo. Na ia timai atu e faapea, “Ia saili atu i lana fesoasoani, ia talanoa atu ia te ia pe a i ai sou faafitauli. Ia saili po o le ā lona finagalo.”
Sa mulimuli ane talanoa atu John E. Barr o le Vaega Pule i le mataupu e faapea “Ua Tupu Tele Lava Lo Outou Faatuatua.” (2 Tesalonia 1:3) I le Luka 17:1, tatou te faitau ai e faapea i le tala a Iesu: “E le mafai lava ona le oo mai o mea e tausuai ai.” Ua tausuai nisi ona o uiga o uso misionare. A e na faamalosiau atu le uso o Barr i misionare ina ia i ai ia i latou le faatuatua manaomia e faamagalo ai. O le mea moni, o le tulaga foi lea e tusa ai o le manatu lenei na ole atu ai soo o Iesu: “Ia e faatuputeleina lo matou faatuatua.” (Luka 17:2-5) E ono tofotofoina foi le faatuatua o misionare i fetuunaiga eseese faalefaalapotopotoga. Na fesili atu le uso o Barr, “Pe ua ia i tatou ea le faatuatua e talia ai nei mea, pe o le a avea ma faafitauli e pei ni mauga?”
Na sosoo ai ma nisi o lapataiga mālū mai i faiaʻoga e toalua o Kiliata. Na uunaia e Jack Redford le au faauu ina ia faatumauina pea se vaaiga mautinoa. Na ia faamatalaina se misionare na tuua lona tofiga ona o nisi o tala tausua mai uso misionare. A e ui i lea, ua lapataia i tatou e le Tusi Paia i le tiga vave o le loto i mafuaaga e le tāua. (Failauga 7:9) Na ia timai atu: “Ia maua le manatu saʻo. Ia loto faamagalo i mea sese ma vaivaiga o isi o siomia ai oe.”
Na fesili mulimuli ane ai U. V. Glass, o le lesitala o Kiliata e faapea: “Po ua e saunia ea e faafetaiaia le ‘taimi ma mea le mailoa e tutupu mai i lea taimi i lea taimi’”? (Failauga 9:11) Na taʻua e le uso o Glass, “O lo tatou olaga e feagai pea ma suiga eseese, ma o nisi o nei suiga e mafai ona matuā pagatia ai.” Ua i ai misionare ua faafuasei ona fesagai ma le lē lelei o le soifua maloloina, o faamaʻi, ma faafitauli faaleaiga, ua faamalosia ai nisi e tuua o latou tofiga. Na fai mai le uso o Glass: “E tusa lava po o ā mea le mailoa e ono tutupu mai, ua tatou iloa ua silafia lelei e Ieova ma e manatu mai. Pe afai tatou te faalagolago atu ia te ia, tatou te iloa ai o le a tatou sao mai ai ma le manumalo!”
O le lauga na faaulutalaina faapea “Faaavanoaina mo le Auaunaga Faamisionare” na taualuga ai faasologa o lauga o le taeao. Na faatomua mai e Theodore Jaracz o le Vaega Pule le fesili lea na taʻua i le amataga, e faapea, “O le ā lea mea o le misionare?” I le tali, na ia talanoaina ai le mataupu e 13 ma le 14 o le Galuega e uiga i le galuega faamisionare a Paulo ma Panapa. E manino lava, o lena galuega sa lei faaautū i le faaleleia o faafitauli o tagata lautele, a e na uai totoʻa atu i le ‘folafolaina o le tala lelei.’ (Galuega 13:32) Na fesili atu le uso o Jaracz: “Pe tou te le ioe na faatinoina e Paulo ma Panapa le tulaga moni e tatau ona i ai se misionare moni?” Na mulimuli ane valaaulia le misionare agavaa o Robert Tracy o Mekisikō e alu atu i luga e taʻu mai nisi o mea e faalaeiauina ai na tutupu ia te ia i le avea o se faievagelia.
Na faaiuina le polokalama o le taeao ina ua tufatufaina atu e le uso o Schroeder tusi pasi i le au faauu e 48. Na faagaeetia le aofia ina ua faalogo atu i igoa o atunuu e 21 ia na tofia atu i ai misionare: o Barbados, Benin, Bolivia, Central African Republic, Costa Rica, Côte d’Ivoire, Ecuador, Equatorial Guinea, Estonia, Guinea-Bissau, Honduras, Latvia, Leeward Islands, Mauritius, Mozambique, Nicaragua, Paraguay, Peru, Senegal, Taiwan, ma Venezuela.
Ina ua maeʻa se malologa puupuu mo le aiga o le aoauli, na toe faapotopotoina faatasi mai loa le aofia ma olioli ai i se suesuega ola o Le Olomatamata, na faia e Robert P. Johnson o le Matagaluega o Auaunaga. O sui o le vasega lona 98 na taliina fesili. Na mulimuli mai ai ma se faasologa fiafia o faatalanoaga na faia e sui faiaʻoga o le aʻoga o Kiliata. Na matuā faalaeiauina le aofia a o tufaina mai e le au faauu mea na tutupu ia i latou i le fanua ma faamatala mai o latou faalogona e faatatau i o latou tofiga i atunuu ese.
E mo le ono ma le afa tausaga, na i ai Kiliata i le nofoaga o le Sosaiete o Le Olomatamata i Wallkill, New York. A e e ui i lea, ia Aperila 1995, na siitia ai le aʻoga i le nofoaga fou o le Nofoaga Tutotonu Tau Aʻoaʻoga o Le Olomatamata i Patterson, New York. Na faapeʻī lagona o le aiga Peteli i Wallkill i lenei suiga? I le faauuga lenei sa faatalanoa ai nisi mai Wallkill. O a latou faamatalaga faagaeeloto na faamanino mai ai e faapea ua tuua e tagata aʻoga o Kiliata se faagaeega e faavavau ia i latou. O le mea moni, o nei alii ma tamaitai loto naunau, o misionare moni lava—e agamalu, e faataulagaina totino, e manatu mamafa i le fesoasoani atu i isi.
A o faaiuina le faauuga, na mautinoa ai e tagata uma i le aofia e faapea o le Aʻoga o Kiliata o le a faaauau pea ma le manuia ona faia le mea lava lea na ia faia mo le sili atu i le 50 tausaga—o le aumaia o misionare moni lava!
[Pusa i le itulau 18]
Faamaumauga o le Vasega:
Aofai o atunuu o loo i ai o latou sui: 8
Aofai o atunuu ua tofia i ai: 21
Aofai o tagata aʻoga: 48
Faatatauga o tausaga: 32.72
Faatatauga o tausaga i le upu moni: 15.48
Faatatauga o tausaga i le faiva sauatoa: 10.91
[Ata i le itulau 18]
Vasega Faauu Lona 98 o le Aʻoga Faale-Tusi Paia a Le Olomatamata o Kiliata
I le lisi i lalo, o laina e amata mai i luma agaʻi i tua, ma o igoa e lisi mai le itu agavale i le itu taumatau i laina taitasi.
(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.