Faateʻaina—Pe o se Sauniuniga Alofa Ea?

“E PAIA, e paia, e paia Ieova le Atua, o Lē Ona le Malosi Uma Lava.” (Faaaliga 4:8, NW) E tusa ai ma lena faamatalaga, o Ieova o le Puna o tapulaa paia. Ua faataatitia mai nei tapulaa i le “tusi paia,” ma o le matafaioi a Kerisiano le usitaia o nei taʻiala. O le mea moni, e tatau ona latou alofia so o se mea e lē mamā i le silafaga a Ieova.—2 Timoteo 3:15; Isaia 52:11.

Ua poloai manino mai le Tusi Paia e faapea: “E pei ona paia o ia na valaauina outou, ia faapea foi outou ona paia i a outou amio uma; auā ua tusia, Ia paia outou, auā o aʻu nei e paia lava aʻu.” (1 Peteru 1:15, 16) Talu mai lava ona amata le faapotopotoga Kerisiano i le 19 senituri ua mavae, o loo tauivi malosi ai pea Kerisiano moni ina ia puipuia mai mea lē mamā faaleagaga ma lē mamā tau i amioga.—Iuta 3.

Le Mafuaaga ua Talafeagai ai le Puipuiga

Ua fesagai auauna uma a le Atua ma le luʻi o le tumau i le mamā tau i amio ma i le faaleagaga. Ona o lena mafuaaga, e tatau ai ona teena ni fili malolosi se tolu—o Satani, lana lalolagi, ma o tatou faanaunauga o le tino agasala. (Roma 5:12; 2 Korinito 2:11; 1 Ioane 5:19) O le a tofotofoina oe e le lalolagi a Satani ina ia e amio lē mamā, o le a tofotofoina oe ina ia e faataʻitaʻi i le auala o loo latou amioaʻi ai, ma o le a ofoina atu ia te oe le tamaoaiga faaletino, le taʻutaʻua, ni tulaga aloaia, le lauiloa, ma le malosi. A e o i latou e filifili ina ia faasilisilia le tapuaiga moni latou te teena mea e ofo mai e Satani, ma tumau pea i le lē “pisia mai . . . i le lalolagi.” Aisea? Auā latou te mananao ina ia latou maua le puipuiga ma le tausiga alofa a le faalapotopotoga mamā a Ieova.—Iakopo 1:27; 1 Ioane 2:15-17.

Ua saunia e Ieova fesoasoani mo so o se sui o le faapotopotoga Kerisiano o lē ua maileia i faaosoosoga a Satani ona o vaivaiga faaletagata. Ua tofia toeaina o ē ua agavaa faaleagaga ina ia latou puipuia le faapotopotoga ma fesoasoani atu ma le alofa i ē ua faia ni mea sese ina ia latou salamō mai a latou agasala ma faia ni suiga e manaomia ina ia toe malolosi ai. So o se Kerisiano ua ia faia se mea sese e ao ona avatu i ai ma le onosai se fesoasoani ina ia toe salamō o ia ma suia ona ala.—Kalatia 6:1, 2; Iakopo 5:13-16.

Le Auala ua Avea ai le Faateʻaina o se Faatulagaga Alofa

O auauna papatisoina a Ieova, o ē ua latou uia ma le loto i ai se ala amioleaga ma ua mumusu e suia, e tatau ona manatu i ai o se tasi e lē salamō ma ua lē fetaui ona toe i ai i le auuso Kerisiano. (Faatusatusa i le 1 Ioane 2:19.) O na tagata e lē mafai ona faatagaina ina ia i ai pea i totonu o le faapotopotoga mamā faa-Kerisiano ma faaleagaina ai. Ua tatau ona tuuesea i latou.

O le talafeagai o le tuuesea o i latou o ē faia ni gaoioiga leaga, e mafai ona faataʻitaʻia mai i le tulaga lenei: Talu ai le faateleina o solitulafono o le fasi tagata ma faiga faasauā i tamaiti aʻoga, ua faia ai e nisi aʻoga se tulafono ua “tatau ai ona tuliesea mai le aʻoga e lē toe faatagaina, ni tamaiti aʻoga o ē latou te faaaogā pe ua fuafua foi e faaaogā ni auupega,” e pei ona lipotia mai e le Globe and Mail, o se nusipepa i Toronto, i Kanata. Ua faia lea tuuesea ona o le fia puipuia o tamaiti aʻoga o ē o loo mananao latou te fia maua ni mea lelei mai polokalama tau aʻoaʻoga e aunoa ma le faia i ai o ni gaoioiga faasauā.

Aisea ua avea ai o se faatulagaga alofa le tuuesea o se tagata fai mea sese e lē salamō mai le faapotopotoga? O le faia faapea o se faaaliga lea o le alofa mo Ieova ma ona ala. (Salamo 97:10) O lenei gaoioiga e faaalia ai le alofa mo i latou o loo faasilisilia le ala o le amiotonu auā o le a aveesea mai ai i lo latou lotolotoi se tasi o lē e mafai ona ia faia ni aafiaga leaga ia i latou. E puipuia ai foi le mamā o le faapotopotoga. (1 Korinito 5:1-13) Pe afai e faatagaina pea ni amioga e sili ona lē mamā po o nisi mea lē mamā faaleagaga e i ai pea i le faapotopotoga, o le a oo ina faaleagaina ma o le a lē talafeagai ai foi mo le avatuina o le auaunaga paia ia Ieova, o lē e paia. E lē gata i lea, o le tuuesea o lē fai mea sese e mafai ona fesoasoani ia te ia ina ia ona iloa ai le matuiā o le ala o loo ia uia, ona salamō ai lea, ma faia ni suiga manaomia ma toe taliaina ai i totonu o le faapotopotoga.

O Aafiaga i Isi

Pe a faia e se tasi o le faapotopotoga se agasala matuiā, e pei o le mulilua, e na te lē o faafiafiaina la le finagalo o Ieova. (Faataoto 27:11) So o se Kerisiano lava o lē ua lolo atu i faiga lē mamā faaleituaiga, e mautinoa lava e lē o manatunatu o ia e pei ona sa faia e Iosefa ina ua taumafai le avā a Potifara e uunaia ina ia faia ni a la feusuaiga. Sa tali atu i ai Iosefa e faapea: “Pe faapefea ona ou faia lenei mea leaga tele ma ou agasala ai i le Atua?” (Kenese 39:6-12) Sa faaaloalo Iosefa i tapulaa paia a Ieova, ma sola ese ai mai le mea na tofotofoina ai. I le isi itu, e foliga mai o le tagata lea ua faia le mulilua, e lē o matuā lava lona alofa mo le Atua, ina ia aloese ai mai le faamalieina o ona lava faanaunauga faaletino.—Kalatia 5:19-21.

O se tagata ua papatisoina a e ua ia solia poloaiga a le Atua, na te lē o faaalia maia se manatu mamafa i le faaleagaina ma tiga o le a ia faapogaia i ona tauaiga talitonu. O aafiaga tau i faalogona ootia e sili atu ona matuiā nai lo mea e mafai e nisi ona gafatia. Ina ua iloa ane e se tasi fafine Kerisiano o loo aafia lana tama tama i amioga lē mamā, na ia oi mai: “E itiiti lava, pe afai foi o i ai, ni uso ma ni tuafāfine e foliga latou te malamalama i le tiga ma le matuitui ua matou oo i ai. . . . Ua matuā nutimomoia o matou loto.” Atonu o le a tau lē talitonuina le talaaga lelei sa i ai i le aiga atoa. Atonu o le a mafatia ma leaga faalogona o tagata o le aiga o ē o loo faamaoni pea. O ala leaga o le tagata ua fai mea sese e aumaia ai tiga i le aiga.

Le Fesoasoani Alofa mo Tagata o le Aiga

O tagata o loo avea pea ma Kerisiano faamaoni i aiga o ē ua tuuesea, e tatau ona latou manatua, o le faateʻaina e lē gata o se faatulagaga alofa a e o se puipuiga foi. Ua faia taumafaiga uma e mafai ina ia fesoasoani atu ai i lē ua fai mea sese. A e afai e faamaonia pea lona lē usitai i le Atua ma faauamaaa pea e lē salamō, ua manaomia la ona puipuia le faapotopotoga, ma ua leai se isi filifiliga nai lo le faia loa o le mea ua faatonuina mai e le Afioga a le Atua: “Ia faateaeseina e outou lena tagata amio leaga ia te outou.” (1 Korinito 5:13) E pei ona faapea mai se tasi Molimau, “o le faateʻaina o se mataupu o le faamaoni atu ia Ieova.”

Pe a faateʻaina se tagata o le aiga, e oo i ona tauaiga Kerisiano le tiga. E ao ai la i toeaina tofia ona latou matuā taumafai ina ia avea i latou o se faafouina faaleagaga i na tauaiga. (1 Tesalonia 5:14) E mafai e toeaina ona tatalo mo na tauaiga pe tatalo faatasi foi ma i latou. E masani lava, e mafai ona asiasi atu i nei Kerisiano faamaoni ina ia talatalanoa i ni manatu faalaeiau mai le Tusi Paia. O leoleo mamoe o le lafu e tatau ona latou faaaogā avanoa uma e faamalosiau faaleagaga atu ai i nei uso pele i taimi a o lei amataina pe o le tuua foi o sauniga faa-Kerisiano. E mafai foi ona avatu nisi faamalosiauga e ala i le galulue faatasi ma i latou i le faiva i le fanua. (Roma 1:11, 12) E manaomia i leoleo mamoe faaleagaga ona faaali atu i nei auauna faamaoni a Ieova le alofa ma le tausiga ua onomea mo i latou.—1 Tesalonia 2:7, 8.

O ala agasala o se tagata e lē o se mafuaaga lena mo tagata o le faapotopotoga latou te lē amanaia ai isi o le aiga o lena tagata o ē o loo tausisia pea le faamaoni ia Ieova. Na teena e le Atua le tupu amioleaga o Isaraelu, o Saulo, peitai e lei faatagaina e Tavita lena mea e taofia ai fua ona lava lagona alofa mo le atalii o Saulo, o Ionatana. O le mea moni, o le faiā i le va o Tavita ma Ionatana na matuā malosi. (1 Samuelu 15:22, 23; 18:1-3; 20:41) E tatau ai la i tagata uma o le faapotopotoga ona lagolagosua ma alolofa atu i Kerisiano o ē ua agasala ia Ieova nisi o o latou tauaiga.

Pagā se lē alofa pe a lē amanaia pe lē agalelei atu i na tagata faamaoni! O sui faamaoni o le aiga, ua ia i latou se manaoga faapitoa mo ni faalaeiauga. Latou te ono lagona le tuua toatasi ma atonu ua matuā faigata lava le tulaga o loo latou i ai. Atonu e mafai ona e faamatala atu i ai se mea tāua faaleagaga pe e te telefoni i ai ma faamatala atu se tala i se mea na tupu e faalaeiauina ai. Pe afai o le tagata o loo tuuesea lea na te taliina mai le telefoni, tau lava ina talosaga atu i ai e te fia talanoa i le tauaiga Kerisiano. E mafai ona e valaauliaina sui faamaoni o lena aiga i se faatasitasiga faasamasamanoa pe tou te faitaumafataga foi i lou fale. Afai tou te fetaui ma i latou a o faia se faatauga, e mafai ona e faaaogā lena avanoa mo ni faatasitasiga faalaeiau. Ia manatua, o Kerisiano faamaoni, o ē o loo i ai ni o latou tauaiga ua faateʻaina, o na Kerisiano o loo avea pea i latou ma vaega o le faalapotopotoga mamā a Ieova. E faigofie lava ona latou tafetafea ese atu ma faavaivai. O lea la, ia mataala e faaali atu ia i latou le agalelei ma le alofa. Ia faaauau i le faia o mea lelei ‘i tagata uma ua outou aiga i la le faatuatua.’—Kalatia 6:10.

Ia Talisapaia le Sauniuniga a Ieova

Maeu so tatou loto faafetai ona o le faaalia mai e Ieova le Atua o le manatu alofa i tagata taitoatasi i le aiga aoao o ona tagata tapuai. Ua ia saunia ma le alofa e ala mai i lana faalapotopotoga, se fuafuaga ina ia fesoasoani ia i tatou e savavali ai i ona luma i le ala o le amiotonu. E tusa lava pe faia ma le loto i ai e se sui o le aiga se agasala ma ua tatau ai ona tuuesea mai le faapotopotoga, a e ua i ai se ala e toe foi mai ai i le faapotopotoga pe a ia salamō moni. Ua faataʻitaʻia mai lenei mea i le faaaʻoaʻoga o loo sosoo mai:

Na taumafai le ʻau toeaina e fesoasoani i se tagata o le a tatou faaigoaina ia Ana, peitai na ia liliu atu i le ulaula, inuʻava, ma fualaau faasaina. Sa leai sona salamō ma aveesea ai loa mai le faapotopotoga. Peitai, e lei umi lava, a e amata ona misia e Ana le fegalegaleaiga alofa faaleuso ma le faapotopotoga mamā a Ieova, ona ia tatalo atu ai lea ia te Ia mo se fesoasoani. Ua ia taʻutino mai lona lei matuā talisapaia o le tele o le manatu mamafa atu o le ʻau toeaina ia i latou ua faaseseina. Na amata ona toe auai Ana i sauniga, ma oo atu ai lava ina salamō. Mulimuli ane, na toe faaeaina o ia i totonu o le faapotopotoga alofa ma le malupuipuia. Ua toe tausisia nei e Ana tapulaa maualuluga a Ieova i tulaga tau amio. Ua loto faafetai o ia i le alofa na faaalia atu e le ʻau toeaina ma ia faapea mai ai: “Ailoga tou te iloa le tele o le fesoasoani na ou maua mai lomiga faa-Kerisiano. E mautinoa lava le tausia lelei e Ieova o o tatou manaoga.”

Ioe, ua saunia e le Atua se ala e toe faafoisia mai ai i latou o ē ua tuuesea mai le faapotopotoga a e ua toe salamō. Ua tatou vaaia, e oo lava foi i le faatulagaga o le faateʻaina o se sauniuniga alofa. A e maeu le sili atu ona lelei pe a alofia le tofo atu i lenei tulaga faanoanoa, e ala i le pipii atu pea i ala amiotonu a lo tatou Atua paia! Tau ina ia tatou loto faafetai pea mo le faaeaga o le vivii atu ia Ieova, i le avea ma vaega o lana faalapotopotoga mamā, e alofa, ma malupuipuia.

[Ata i le itulau 26]

Po o e faaalia ea le alofa i tauaiga faamaoni o i latou ua tuuesea mai le faapotopotoga?