O Afea o le a Iu ai le Mataʻu?

PO O le a faateʻia oe i le iloaina o le saogalemu moni e fesootai ma se tagata na soifua e tusa ma le 2,000 tausaga ua mavae? I le faaalia o le manaomia o le alofa, na faamatala ai e Iesu Keriso se faataoto mataʻina: “O le tasi tagata na alu ifo mai Ierusalema i Ieriko, ua maua o ia e tagata fao mea; ua latou toeseina ona ofu, ma fasi ia te ia, ua latou o, ua tuua ia, ua tāli oti.” E ui lava sa lē amanaia e ni tagata faimalaga se toalua le tagata puapuagatia, na faaalia e se tagata Samaria agalelei le alofa. O ai la o tausia tagata puapuagatia o loo aafia i solitulafono i aso nei? O le ā se mapusaga mai le mataʻu e mafai ona tatou faatalitalia?—Luka 10:30-37.

A o faapea mai le toatele e talitonu i le Atua, ua latou manatu, o le tulafono ma le poloaiga, e tatau ona faamalosia e tagata. A e po o le a mafai e faasalaga mamafa i falepuipui, po o le faateleina o leoleo e lelei totogi ona faaiuina solitulafono sauā? Pe e te talitonu moni o le a mafaia e faalapotopotoga e faamalosia tulafono, e ui i taumafaiga faamaoni e saunia se fua o le saogalemu, ona soloiesea mea e pei o le faaaogaseseina o fualaau faasaina, solitulafono fuafuaina, ma le mativa? A e peitai, o lo tatou fia ʻaai ma fiainu mo le amiotonu, o le a lē iuvale.—Mataio 5:6.

Ua faapea mai le Salamo 46:1: “O le Atua, o lo tatou malu ia ma lo tatou malosi; e fai o ia ma fesoasoani silisili i puapuaga.” O le a tatou iloa ai o nei upu, e lē na o ni solo matagofie ua fatuina.

E pei ona outou silafia, ua lipotia mai pea i tala fou o le uaealesi faasalalau fasiotiga tagata lē alolofa i taua a atunuu ma osofaiga a tagata faatupu faalavelave. I nisi vaega o le lalolagi, ua taatele ai le fasiotia o talavou po o tamaiti e lē o manaomia, po o ni molimau na vaaitino i ni solitulafono na faia. Aisea ua matuā faatauvaa ai le olaga? E ui atonu e iai mafuaaga eseese o na faiga sauā, a e tasi le mafuaaga e lē tatau ona tatou manatu māmā i ai.

E tusa ai ma le Afioga a le Atua, le Tusi Paia, “o le lalolagi uma o loo nofo toilalo i loo leaga.” (1 Ioane 5:19) O le mea moni, na faailoa mai e Iesu Keriso, o Satani le Tiapolo e lē gata o sē e pepelo, a e o se “fasioti tagata” foi. (Ioane 8:44) I le taaina ai o tagata i auala eseese, ua siitia ai e lenei meafaiola malosi le faateleina o faiga sauā i aso nei. “O i talofa ia te outou o e nonofo i le fanua ma le sami, auā ua alu ifo ia te outou le tiapolo ua lotoa tele, auā ua na iloa ua saasaa ona po,” ua fai mai ai le Faaaliga 12:12. E fiafia lava la, ona o le a suia lenei faiga leaga o mea i “le lagi fou ma le lalolagi fou . . . , e mau ai le amiotonu.”—2 Peteru 3:13.

E faaopoopo i lenei faamoemoe ofoofogia i se lalolagi fou, o le ā se fesoasoani o tatou maua i le taimi nei?

A o lei tilofaia le tali saʻo i lena fesili, e lelei ona manatua, e oo lava i Kerisiano moni e lē faapea o le a puipuia mai le aafia ai i solitulafono. Na faamatalaina e le aposetolo o Paulo nisi o lamatiaga na fesagai ma ia. Na semanū a ia “leaga i vaitafe, se manū aʻu leaga i e fao mea, se manū aʻu leaga i tagata o loʻu lava nuu, se manū aʻu leaga i tagata o nuu ese, se manū aʻu leaga i le aai, se manū aʻu leaga i le vao, se manū aʻu leaga i le vasa.” (2 Korinito 11:26) A e peitai, na sao lava Paulo mai nei tulaga lamatia. E faapena foi i aso nei; o le gaoioi ma le faautauta, e mafai ai ona tatou faaauau pea i le tauaveina o a tatou avega i le tulaga masani tatou te mafaia. Seʻi o tatou talanoaina nisi o mea o le a mafai ona fesoasoani mai.

Afai e nofo se tasi i se nofoaga e iai ni tuaoi matautia, e mafai ona avea amioga lelei o se puipuiga, talu ai, e mātaʻitū e tagata isi tagata. E ui e fuafuaina e tagata gaoi ma faia solitulafono, e toatele latou te manatu ia i latou lava e faapea o ni tagata lelei. Ia aloese mai le faitioina o mea o latou faia, ma aua le taumafai e suesue po o ā mea o latou aafia ai. I lea, e mafai ai ona e faaitiitia le ono avea oe ma autū o le toe taui mai i ai o se mea na tupu. Ia manatua o tagata gaoi, latou te taumafai e fia iloa po o ai na faatauina se mea fou ma po o ai o ō mo se faiga mālōlōga ma toesea ai mai o latou fale, o lea, ia faautauta i mea o e faaali atu i isi.

E toatele Molimau a Ieova ua latou iloa o lo latou talaaga o ni faifeau, ua puipuia ai i latou i se tulaga mataʻina. E masani ona faaalia e tagata solitulafono lo latou faaaloalo i na Kerisiano, o ē e aunoa ma le faailoga tagata, ua latou fesoasoani atu ai i tagata o le nuu. E lē fasioti tagata pe gaoi Molimau, pe ‘aiā fua i mataupu a isi tagata,’ e lē o ni taufaamataʻu foi.—1 Peteru 4:15.

Saogalemu i le Lalolagi Fou a le Atua

E tatou te lē fiafia ona o “le tupu tele o le amio leaga” lea na valoia e Iesu Keriso, a e nai lo o le popolevale, e mafai ona tatou mautinoa e faapea, o le a lē pine ona soloiesea lea e le Atua lenei faiga o mea amioleaga. E lē gata ina valoia le talaʻiina “o lenei tala lelei o le malo” i le lalolagi aoao, a e na faamanatu atu e Iesu i ona soo e faapea: “A o lē tumau seia oo i le gataaga, e faaolaina lea.”—Mataio 24:12-14.

E mafai ona tatou mautinoa e faapea, o i latou e faoa mea a isi, i nisi taimi i faiga e sili ona sauā, o le a faaumatia. Ua faapea mai le Faataoto 22:22, 23: “Aua e te faoa mea a le tagata mativa, ina ua mativa o ia; aua foi e te faasaua i le faitotoa o le ua tiga. Auā o Ieova, o ia na te faia la latou finauga; na te fasiotia foi i latou o e faasaua ia i latou.” O le a faaumatia e Ieova tagata fai amio leaga, e pei o tagata gaoi, fasioti tagata, ma e tuinanau i feusuaiga. E lē gata i lea, o le a na lē tuulafoaiina tagata na aafia fua ona o na solitulafono. O le a ia toe faafoisia a latou mea na lē iloa ma toe faafoisia atoatoa lo latou soifua mālōlōina.

O le mea moni, o i latou e “aloese i mea leaga ma faia mea lelei,” o le a maua le ola e faavavau, a lē i le faasaoina atu i le puapuaga tele o loo sau, ia pe ala i le toe faatutuina aʻe nai le oti. “E fai lava le nuu mo tagata amiotonu, e nonofo ai pea i latou.” (Salamo 37:27-29) O le a mafai ona maua na aogā ona o le taulaga togiola a Iesu. (Ioane 3:16) A e o le a faapeī le olaga i le Parataiso pe a toe faafoisia?

O le olaga i le pulega a le Malo o le Atua, o le a avea o se fiafiaga moni. Ua valoia e Ieova e faapea: “E nonofo foi loʻu nuu i le mea e manuia ai, ma fale e saogalemu ai, ma mapusaga e filemu ai.” (Isaia 32:18) O i latou uma o ē maua le ola e faavavau, o le a suia o latou uiga. O le a lē toe amio leaga pe faamasino lē tonu se tasi, o le a leai foi se tasi e toe aafia i se tagata faapena i le lumanai. Ua faapea mai le perofeta o Mika: “A e taitasi ma nofo i lalo o lona vine, ma lalo o lona mati; e leai foi se na te faamatau mai.” (Mika 4:4; Esekielu 34:28) Paga se eseesega ma tuaoi matautia i aso nei!

[Pusa i le itulau 6]

IA FAAETEETE

E toatele tagata solitulafono ua fai ma a latou galuega i o latou olaga atoa le solitulafono. E mafai ona latou galulue i ni vaega taʻi toalua pe taʻi toatolu, e tusa lava pe na o le toatasi na te fāʻata atu se fana ia te oe. Ua faateleina faamaoniga e faapea, o le talavou o le tagata solitulafono, o le sili atu foi lena ona matautia. O le ā se mea e mafai ona e faia pe a e aafia ai?

Ia e toafilemu ina ia aua neʻi fefe le tagata gaoi—o lona lē agavaa, e iu ai i lou oti. Afai o oe o se Molimau a Ieova, ia faailoa atu i ai e faapea. Ma ia nofo sauni e tuuina atu mea e manao ai le tagata gaoi. Afai e te faatuai, o le a faateleina ai le tulaga matautia. Mulimuli ane, atonu o le a e lagona ai ua lē afaina lou talosaga atu ina ia toe faafoi ane lou pepa ID po o lou pasese.

E masani lava ona lē mafai ona e iloa po o ai le tagata gaoi. O nisi tagata gaoi, o ni tagata o tagofia fualaau faasaina po o ni tagata tomai i le gaoi, o isi atonu e na ona mananao lava i se meaʻai. I le tele o tulaga, aua le feaveaia ni tupe se tele. Ia alofia le faaalialia o ni maataua, o mama auro, po o ni uati taugata. Savali ma faimalaga e pei ona masani ai, aua le faaalia le fefe. Aua e te faataupupula i tagata e pei e foliga o loo e manao e matauina ona foliga ma faapea o loo masalomia. I le tulaga o ni tauga fana i le auala, ia e faapaʻū i le eleele; e mafai lava ona toe tatā mulimuli ane ou lavalava.—O sē na avea muamua ma leoleo i Rio de Janeiro.

[Ata i le itulau 5]

Ia toafilemu ma tuu atu mea o manaomia e le tagata gaoi. Pe afai e te faatuai o le a faateleina le tulaga matautia