Po ua Faamaonia Masalosaloga e Uiga ia Iesu?

PE NA faia moni e Iesu le Nasareta vavega? Pe na toe faatūina moni ea o ia nai le oti, e pei ona faalauiloa ai e ona soo? Pe na soifua moni ea o ia? I o tatou aso, e toatele e foliga mai ua lē mafai ona latou taliina ma le mautinoa na fesili. Aisea? Ona o loo iai o latou masalosaloga e uiga ia Iesu, ma o masalosaloga o ni lagona ia o le lē mautonu, i le lē iloa pe moni pe mafaia foi se mea faapea. A e pe e faamaonia na lagona lē mautinoa e uiga ia Iesu? Seʻi o tatou vaai.

Na Faapefea ona Luluina Masalosaloga e Uiga ia Iesu

O nisi o faifeau Siamani i le faaiuiuga o lona 19 ma le amataga o lona 20 o senituri, na latou faaatagiaina Iesu e faapea “e lē o se tagata moni o le Lotu anamua.” O lo latou teena o le talafaasolopito o Iesu, na iu ai i se finauga aasa i le va o tagata aʻoga i le amataga o lenei senituri, na oo atu ai i tagata lautele i lena taimi ma o loo taaina ai pea i aso nei. Mo se faaaʻoaʻoga, na faaalia i se suesuega na faia i Siamani talu ai nei e faapea, o le 3 pasene o i latou na faatalanoaina e talitonu e “lei soifua lava” Iesu, ma “o ia o se tagata na fatuina i mafaufauga o le au aposetolo.” Ioe, o fatu o masalosaloga e uiga ia Iesu ia na lūlūina i le amataga o lenei senituri, ua matuā mauaa i loto o tagata e oo mai lava i le taimi nei.

Aisea ua lē faamaonia ai le faaiuga e faapea o Iesu, o se tagata na “fatuina i mafaufauga”? Ua faapea mai le tagata aʻoga o le Tusi Paia o Wolfgang Trilling: “O le finauga i le pe na soifua moni Iesu, i se isi faaupuga, pe sa avea moni o ia o se tagata o le talafaasolopito po o se tala fatu, na foia. Na taliina le fesili i se auala faaleaʻoaʻoga, ma i se auala na lē toe manatu ai tagata fai mafaufau i le faafitauli e faapea, o se mataupu e tatau ona talanoaina.” E ui i lea, o loo tumau pea ona masalomia e nisi pe na soifua moni Iesu. O lea la, seʻi o tatou iloiloina pe na faapefea ona faamautinoaina e se tasi le talafaasolopito o Iesu, ma le aveesea o isi masalosaloga e faatatau ia te ia.

Faamaoniga na Aveesea ai Masalosaloga

O le faasalaga faalumaina o Iesu e pei o se tagata solitulafono inosia, ua lagā ai “se finauga na matuā faatalitonuina ai tagata na tetee i le talafaasolopito o Iesu,” ua taʻua ai e Trilling. Aisea? Auā o le faasalaga “na faavaivaia ai, ma oo lava ina faalavelavea ai le faasalalauina atu o le faatuatuaga fou ia Iutaia ma ē e le ni Iutaia.” (Faatusatusa i le 1 Korinito 1:23.) Afai o le faasalaga o Iesu le Mesia o se mea na inosia e tagata Iutaia ma Nuuese, e faigata la ona manatu e faapea o se mea na faatupu i mafaufauga o le au aposetolo! E lē gata i lea, ua faasino atu foi i le maliu o Iesu e faapea, o se mea moni na tupu i le talafaasolopito e lē gata i Evagelia e fa, a e faapea foi le tusitala Roma o Tacitus, ma le tusi Talmud faa-Iutaia.a

O isi mea na tutupu i le soifuaga o Iesu, ua manatu foi i ai o se faamaoniga totino i le malosi o le faagaeeina o Evagelia, e ala i mea ua taʻu mai ai ia i tatou e uiga ia te ia. Mo se faaaʻoaʻoga, po o le a fatu fua e soo o Iesu lona maliu mai i Nasareta o se nofoaga e foliga mai e faaletaualoa? Pe e foliga mai na latou fatuina le faalataina o ia e Iuta, o se uo maufaatuatuaina? Pe e foliga mai o se mea moni le manatu e faapea, na latou fatu se tala e uiga i le tuulafoaia o Iesu e le isi vaega o le au soo i se auala na faailoa ai le palaaai? E mautinoa lava le lē saʻo o le faapea na fatuina e le au soo na faamatalaga lē moni e matuā leaga ma faasalalau atu i le lalolagi aoao! E faaopoopo i ai, o le tomai tau aʻoaʻoga na faaaogā e Iesu, na faatinoina i se auala tutasi. E leai ni tusitusiga o i tusi faa-Iutaia o le uluai senituri e mafai ona faatusatusa i ana talafaatusa. O ai sea tagata faalilolilo na te mafaia ona “fatu fua” sea ituaiga o faamatalaga e matuā atamai e pei o le Lauga i Luga o le Mauga? O nei finauga uma ua mafai ona lagolagoina ai le maufaatuatuaina o Evagelia, e avea o lipoti o le soifuaga o Iesu.

E iai foi faamaoniga mai fafo e uiga i le talafaasolopito o Iesu. Ua faaatagia o ia e Evagelia e fa e faapea sa soifua i se talaaga faatalafaasolopito patino, e matuā saʻo ona faamatalaina. O nofoaga e pei o Peteleema ma Kalilaia; o tagata lauiloa ma ni vaega o tagata, e pei o Ponotio Pilato ma le au Faresaio; faapea ma tu faa-Iutaia ma isi lava mea e lē masani ona tutupu, sa lē o ni tala fatu fua. Sa faia aʻe ai i na mea se vaega o le olaga na ola ai tagata o le uluai senituri, ma ua faamautinoa foi e faamatalaga e lē faale-Tusi Paia faapea ma mea anamua na eliina aʻe mai le eleele.

I lea, ua iai faamaoniga mautinoa, mai totonu ma fafo, e faapea o Iesu o se tagata moni lava o le talafaasolopito.

A e peitai, e toatele pea tagata o loo iai masalosaloga e uiga i vavega na ia faia. O le mea moni, e tusa ai ma suesuega e pei ona taʻua i luga, e na o le toaitiiti tagata lotu i Siamani e talitonu mausali i vavega a Iesu ma lona toe faatūina e faapea o ni mea “na tutupu moni lava.” Po ua faamaonia masalosaloga e uiga i vavega ma le toe faatūina o Iesu?

Le Pogai ua Masalomia ai e Nisi Vavega a Iesu

Ua lipotia mai i le Mataio 9:18-36 e faapea, na faamālōlō faavavega e Iesu tagata mamaʻi, toe faatutū tagata oti, ma tutuli temoni. Ua faapea mai Polofesa Hugo Staudinger, o se tusitala o talafaasolopito: “O se mea e matuā faigata lava ona talitonuina, ma o se mea e lē mafaia e tusa ai ma le manatu o le talafaasolopito e faapea, o nei lipoti uiga ese, o ni fua o se mafaufau malaulau.” Aisea? Auā e foliga mai, o uluai Evagelia, na tusia i se vaitaimi a o soifua pea i latou na molimau vaaitino i nei vavega! O isi faamautinoaga atili o loo maua ai i inā, e pei ona faaauau mai Staudinger e faapea, o tagata Iutaia tetee “latou te lei faafitia lava le faia e Iesu o galuega uiga ese.” I le lē amanaia o isi faamaoniga uma, ma faavae la tatou faamasinoga i le na o lenei lava faamaoniga mai fafo, ona tatou iloa ai lea, e tatau ona tatou talitonu i vavega a Iesu.—2 Timoteo 3:16.

E ui lava “o le toatele o tagata Siamani e talitonu e faapea na faamālōlōina e Iesu tagata mamaʻi,” e toatele ua latou masalomia le mana na faia ai nei faamālōlōga. Mo se faataʻitaʻiga, na taʻua faalauaitele e se faifeau lauiloa i Siamani e faapea, o faamālōlōga na faia e Iesu, na mafaia ona o faiga e pulea ai le mafaufau ua taaina ai tagata o ē na mafatia i maʻi o le mafaufau. Po o se faamalamalamaga fetaui lea?

Seʻi tau lava ina manatu: Ua lipoti mai i le Mareko 3:3-5 e faapea, na faamālōlō e Iesu se tamaloa na gase lona lima. A e po o le lima gase o se iuga o mafatiaga o le mafaufau? E matuā leai lava. I le iuga, o lenei faamālōlōga, e le faapea na mafai ona o le le malosi e pulea ai le mafaufau. O lea, o le ā na mafai ai e Iesu ona faia vavega? Ua ioeina e Polofesa Staudinger e faapea: “Afai e leai ni tulafono e matuā fetaui, ma afai e lē teena atoatoa e se tasi le Atua, o le mea moni la, e lē mafai e se tasi ona faaleaogaina le manatu e faapea, e mafai e le Atua o lē e sili ona malosi i lo o le tagata ona faia o mea uiga ese.” Ioe, o le mea moni, o le fesoasoani a le “mana o le Atua,” na mafai ai e Iesu ona faamālōlōina moni tagata na mamaʻi. O lea, e leai se mafuaaga e masalomia ai le moni aʻiaʻi o ana vavega.—Luka 9:43; Mataio 12:28.

E pei ona taʻua e le American Peoples Encyclopedia e faapea, afai na tupu moni lava le vavega aupito sili o vavega uma—le toe faatūina mai o Iesu—“e mafai foi la ona tutupu” isi vavega uma lava e pei ona lipotia mai i Evagelia. Pe na toe faatūina moni mai Iesu nai le oti?

Po ua Faamaonia Masalosaloga e Uiga i le Toe Faatūina o Iesu?

Seʻi manatu muamua lava i se mea moni e avea o se faamaoniga malosi e lagolagoina ai le moni o le toe faatūina mai o Iesu—o lona tuugamau ua gaogao. O le mea moni e faapea na maua atu le tuugamau o Iesu ua gaogao, sa lē finauina e ana tupulaga, e oo lava ia i latou na tetee ia te ia. (Mataio 28:11-15) Semanu e faigofie lava ona faaalialia le mea sese! Ua faaiu mai ma le saʻo le faamatalaga o loo i luga e faapea: “E leai se faamatalaga fetaui ua faapea ona tuuina mai mo le tuugamau ua gaogao seʻi vaganā ai le faamatalaga a le Tusi Paia lea e faapea mai, ‘E le o iinei o ia; auā ua toe tu mai o ia’ (Mata. 28:6).”

Ua tetee nisi ma faapea mai, sa na o soo lava o Iesu na latou folafola atu i so o se mea e faapea o ia o le Mesia ua toe faatūina mai. E moni. A e pe sa lei faamausaliina ea le faavae o la latou feau uigaese i mea moni o le talafaasolopito, a e maise le maliu ma le toe tu mai o Iesu? O le mea moni lava. Sa iloa lelei e le aposetolo o Paulo le sootaga lea ina ua ia tusi mai e faapea: “Afai foi ua le toe faatūina mai Keriso, po ua faaleaoga la matou talaʻi, ua faaleaoga foi lo matou faatuatua. Ua avea foi i matou ma molimau pepelo i a le Atua; auā ua molimau i matou i le Atua, na ia toe faatuina mai Keriso.”—1 Korinito 15:14, 15; faatusatusa i le Ioane 19:35; 21:24; Eperu 2:3.

I le uluai senituri, sa iai tagata lauiloa e toatele ma o ē sa mafai ona molimau i le faaalia mai o Iesu ina ua mavae lona maliu. Ia i latou na, sa iai aposetolo e toʻa 12 ma Paulo, faapea ma le sili atu i le 500 isi molimau vaaitino.b (1 Korinito 15:6) Ia manatua foi le mafuaaga na faataunuuina ai e Matatia agavaa e fai ai ma sui o le aposetolo lē faamaoni o Iuta. Ua lipotia mai i le Galuega 1:21-23 e faapea, sa mafai ona molimau Matatia i le toe faatūina mai o Iesu faapea ma mea na tutupu muamua atu ia te Ia. Pe ana faapea o le soifuaga ma le toe faatūina mai o Iesu o ni mea na fatu i mafaufauga nai lo o mea moni, semanu la e matuā leai lava se uiga o agavaa mo le tofiga.

I le uluai senituri, sa iai tagata lauiloa e toatele o ē sa mafai ona molimau vaaitino i le soifuaga o Iesu, i vavega, o lona maliu, ma lona toe tu mai, na vave ai loa ona salalau atu le Faa-Kerisiano i lena taimi i le Emepaea atoa o Roma, e ui lava i toatuga e pei ona taʻua i luga. Sa loto malilie ona soo e onosaia faigata, sauaga, e oo lava i le oti, ina ia folafola atu i so o se mea le toe tu ma le upu moni faavae e uiga i ai. O le fea upu moni? E faapea o lona toe tu na mafaia i le na o le mana lava o le Atua. Ma aisea na toe faatūina ai e Ieova le Atua Iesu mai le oti? O le tali i lena fesili e faaalia ai po o ai Iesu o le talafaasolopito.

I le aso o le Penetekoso, na faalauiloa mai ai ma le saoloto e le aposetolo o Peteru i tagata Iutaia ua segia o latou mauli i Ierusalema e faapea: “O Iesu lava lena ua toe faatuina e le Atua; o molimau i matou uma i lena mea. O lenei foi, ona ua siitia o ia i luga e le aao taumatau o le Atua, ma ua maua e ia mai le Tamā o le Agaga Paia na folafolaina, ua liligi ifo ai e ia lenei mea ua outou iloa ma faalogo ai nei. Auā e lei alu ae Tavita i le lagi, a ua fai mai o ia, Ua fetalai mai le Alii i loʻu Alii, Ia e nofo i loʻu itu taumatau, seia ou fai o e ita ia te oe ma mea e tu ai ou vae. O lenei foi, ia matuā iloa e le aiga uma o Isaraelu, o Iesu lava lena na faasatauroina e outou, ua faia lea e le Atua ma Alii ma Keriso.” (Galuega 2:32-36) Ioe, ua faia e Ieova le Atua Iesu le Nasareta ma “Alii ma Keriso.” Po ua faamaonia masalosaloga faatatau i le tulaga o Iesu i lenei vaega o le fuafuaga a le Atua?

Aisea ua Masalomia ai le Tulaga o Iesu i le Taimi Nei?

E mafai faapefea ona faaleaogaina masalosaloga uma e uiga i le faailoaina mai ma le tulaga o Iesu? E ala i le mea moni e faapea, o ia o se perofeta moni lava. Sa ia valoia taua, oge, mafuiʻe, solitulafono, ma le leai o se alofa lea ua tatou vaaia i aso nei. E faaopoopo i ai, sa ia valoia e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:3-14) O le faataunuuga o nei valoaga ua faamaonia ai o Iesu o le Keriso ua toe faatūina, ua pule lē vaaia nei ‘i totonu o ona fili,’ ma ua lē pine ona ia aumaia lea o le lalolagi fou a le Atua.—Salamo 110:1, 2; Tanielu 2:44; Faaaliga 21:1-5.

I le taimi nei, ua matuā manaomia ai e le fanau a tagata i se tulaga sa lei faapea ona iai muamua se Faaola e faaauupegaina i le atamai uiga ese. Aisea o le a tatou masalomia ai Iesu o lē ua filifilia ma le tonu na te laveaiina le fanau a tagata? O Ioane, o se molimau vaaitino i vavega ofoofogia ma le toe faatūina o Iesu, ua faalauiloa mai e faapea: “O i matou foi, ua matou vaaia, ua matou molimau ai foi, na auina mai e le Tamā o le Alo, o le Faaola o le lalolagi.” (1 Ioane 4:14; faatusatusa i le Ioane 4:42.) E pei lava ona leai se faavae mo i tatou e masalomia ai le iai o Iesu, ana vavega, lona maliu, ma lona toe tu, e leai foi la se mafuaaga tatou te masalomia ua faanofotupuina o ia e Ieova le Atua o se Tupu moni i Lona itu taumatau. E aunoa ma se masalosalo, o Iesu le Nasareta, o le Tupu o le Malo o le Atua ma o le “Faaola o le lalolagi.”—Mataio 6:10.

[Faaopoopoga i lalo]