“E Avegofie Laʻu Amo, o Laʻu Avega Foi e Māmā Ia”
“Ia outou amoina laʻu amo, ma ia outou faaaʻoaʻo ia te au.”—MATAIO 11:29.
1, 2. (a) O le ā se mea ua e tofo i ai o le olaga, ua faafouina ai oe? (e) O le ā e tatau ona fai e se tasi ina ia maua ai le faafouina lea na folafola mai e Iesu?
O SE faamālūga manaia ina ua iu se aso vevela ma le afu, po o se tofā lelei i le po ina ua mavae atu se faigamalaga umi ma le vaivai—oka, e maeu le faafouina ai! E faapena tonu lava lagona pe a oo ina aveese atu se avega mamafa po o le faamagaloina o agasala ma sese. (Faataoto 25:25; Galuega 3:19) O le faafouina e maua mai i na gaoioiga, e toe faafouina ai lo tatou malosi, ma faamalosia ai i tatou e faia atili nisi mea.
2 O i latou uma o loo lagona le mafatia i avega ma ua vaivai, e mafai ona ō mai ia Iesu, auā na ia folafola mai ia i latou lena mea—le faafouina. A e peitai, o le mauaina o le faafouina lea e matuā manaomia, e iai se mea e tatau i se tasi ona lotomalie e faia. Na fetalai Iesu: “Ia outou amoina laʻu amo, ma ia outou faaaʻoaʻo ia te au, . . . ona maua lea e outou o le malologa [“faafouina,” NW] mo outou agaga.” (Mataio 11:29 O le ā lenei amo? E faapefea ona maua mai ai le faafouina?
O se Amo e Avegofie
3. (a) O ā ituaiga o amo na faaaogā i vaitaimi o le Tusi Paia? (e) O le ā le uiga faafaatusa ua sootaga faatasi ma le amo?
3 Talu ai sa ola aʻe Iesu ma lana ʻau faalogologo i ni nuu e tele ai galuega faafaatoaga, sa latou masani lelei ai la i le amo. O le amo, o se ogalaau umī lea e lua ona vaega o loo vane pito i lalo ina ia taoto lelei le taatitia i luga o ua o ni manu se lua, e masani lava o ni povi pulu, ina ia sai faatasi le amo a nei manu ina ia malolosi mo le tosoina o se suotosina, se taavale toso, po o nisi lava avega mamafa. (1 Samuelu 6:7) Sa iai foi amo e faaaogā e tagata. O nei amo e fai i ni laau, e taatia faalava i luga o tauʻau, ma se avega lea o loo faalave i pito uma e lua o le amo. O amo na sa mafai ai e tagata galulue ona feaveai a latou avega mamafa. (Ieremia 27:2; 28:10, 13) Talu ai la le sootaga a le amo, ma avega ma galuega mamafa, ua masani ai ona faaaogā faafaatusa e le Tusi Paia le amo e faatusa i ai le puleaina ma le faatonutonuina.—Teuteronome 28:48; 1 Tupu 12:4; Galuega 15:10.
4. O le ā ua fai ma faatusa o le amo lea na ofoina mai e Iesu ia i latou o ē ō mai ia te ia?
4 O le ā la le amo lea na valaaulia e Iesu i latou na ō mai ia te ia mo se faafouina, ina ia latou amoina? Seʻi toe manatu i lana fetalaiga: “Ia outou amoina laʻu amo, ma ia outou faaaʻoaʻo ia te au.” (Mataio 11:29) O le tagata o loo aʻoaʻoina se mea, o ia o se soo. O lea, o le amoina o le amo a Iesu, e faauiga i le avea ma ona soo. (Filipi 4:3) Peitai, o lenei mea e iai ma nisi mea e manaomia ai nai lo le tau ina iloa ana aʻoaʻoga. E manaomia ai gaoioiga e ogatusa ma na aʻoaʻoga—le faia o le galuega na ia faia ma le ola i le ituaiga o olaga na ia soifua ai. (1 Korinito 11:1; 1 Peteru 2:21) E manaomia ai le gauai atu ma le lotomalie i lana pule ma i latou o ē ua ia faaee atu i ai le pule. (Efeso 5:21; Eperu 13:17) O lona uiga, o le avea ma Kerisiano tuuina atu, ma papatisoina, o loo talia faaeaga uma ma tiute tauave e aumai faatasi ma lena tuuina atu. O le amo lena na ofo atu e Iesu i ē uma e ō mai ia te ia mo se faamafanafanaga ma se faafouina. Po ua e lotomalie ea e talia lena amo?—Ioane 8:31, 32.
5. Aisea o le a lē o se mea mamafa ai le tauaveina o le amo a Iesu?
5 O le mauaina o le faafouina pe a amoina le amo—pe ua lē feteenai ea la na manatu? E mautinoa e leai, auā na fetalai Iesu o lana amo e “avegofie.” O lenei upu ua iai le uiga o le agamalu, le tausaafia, ma le lolo gofie. (Mataio 11:30; Luka 5:39; Roma 2:4; 1 Peteru 2:3) Talu ai o Iesu sa iai sona poto faapitoa i le faakamuta, e foliga mai la na ia faia ni suotosina ma ni amo, ma na te silafia le auala e fafau aʻe ai se amo ina ia paleni lelei, ma mafai ai ona faatino se galuega i se tulaga e sili ona faigofie. Atonu na te ufitiaina le pito i lalo o amo i se ie po o se paʻumanu. E tele amo e faia faapena ina ia lē soona fesoloaʻi ai ma oloia ai le ua. I le tulaga tutusa, o le amo faafaatusa lea e ofoina mai e Iesu ia i tatou, e “avegofie.” E ui lava o le avea ma ona soo e aofia ai ni avega tauave ma tiutefai, a e lē o se mea mamafa pe tigaina, a e o se mea e faafouina ai. O poloaiga a lona Tamā Faalelagi o Ieova, e lē amogatā foi.—Teuteronome 30:11; 1 Ioane 5:3.
6. O le ā atonu na mafaufau i ai Iesu ina ua ia fetalai: “Ia outou amoina laʻu amo”?
6 E iai foi se isi mea ua “avegofie” ai le amo a Iesu, pe ua faigofie ai ona gafatia. Ina ua fetalai o ia: “Ia outou amoina laʻu amo,” e ono mafai ona ia faaaogā mai se uiga se tasi mai i ni faauigaina se lua. Pe afai sa mafaufau o ia i le amo e sai faatasi ai, le ituaiga lea e soofaatasia ai ni manu se lua, ina ia mafai ona toso se avega, o lena la sa ia valaauliaina i tatou ina ia tatou amoina faatasi ma ia le amo lena. Maeu se na faamanuiaga—o le iai o Iesu i o tatou autafa ina ia tatou tosoina faatasi la tatou avega! A e pe afai sa mafaufau Iesu i le amo masani lea e faaaogā e se tagata galue, o lona uiga o lena sa ia ofoina mai ia i tatou le auala e sili atu ai le faigofie ma mafai ona tatou tauaveina so o se avega. Po o le ā lava la le amo sa ia uiga i ai, a e o lana amo o le puna lea o le faafouina moni auā ua ia faamautinoa mai ia i tatou: “Auā o aʻu lē agamalu ma le loto maulalo.”
7, 8. O le ā le mea sese ua fai e nisi pe a latou lagona le mafatia?
7 O le ā la e tatau ona tatou faia, pe a tatou lagona ua amata ona tau lē gafatia le avega o faafitauli o le olaga lea o loo tatou tauaveina, ma ua oo atu lo tatou mafatia i se tulaga ua tau lē mafai ona tatali? O nisi ua lē saʻo lo latou lagona e faapea, o le amo o le avea ma soo o Iesu Keriso ua mamafa naʻuā pe ua soona tagisā, e ui lava o le mafuaaga o a latou avega mamafa ona o lo latou popole i mea o le olaga i aso taitasi. O nisi tagata ua oo i ai lena tulaga, ua lē toe auai i sauniga faa-Kerisiano, pe ua latou lē toe auai i le faiva, ona o lagona e faapea seʻi tau saili sina mapusaga. A e peitai, o se mea sese matuiā lena.
8 Tatou te talisapaia e faapea, o le amo ua ofoina mai e Iesu e “avegofie.” Pe a lē saʻo ona tatou amoina, e mafai ona oloia ai o tatou ua. I lena la tulaga, e tatau ai ona tatou tagai totoʻa atu i le amo lea o loo i o tatou tauʻau. Pe afai, ona o se mafuaaga, ua lei toe faia faalelei ai le amo pe ua lē saʻo ona faataatia, o le faaaogaina la, e lē gata o le a manaomia atili ai ni a tatou taumafaiga, a e o le a iu ai foi i ni āuga tiga. I se isi faaupuga, pe a amata ona foliga mai gaoioiga faatiokarate o ni avega mamafa ia i tatou, e tatau ona tatou tilofaia po o saʻo le auala o loo tatou taulimaina ai. O le ā le faanaunauga o loo tatou faia ai se mea? Po o lelei ea a tatou sauniuniga pe a tatou ō atu i sauniga? Po o tatou sauniuni lelei ea i le tino ma le mafaufau, a o tatou auai i le faiva i le fanua? Po o tatou olioli ea i se faiā lelei ma isi i le faapotopotoga? A o le sili o na mea uma, o faapeī la tatou faiā totino ma Ieova le Atua ma lona Alo, o Iesu Keriso?
9. Aisea e lē tatau ai lava ona avea le amo faa-Kerisiano o se avega e lē magafatia?
9 Pe a tatou talia ma le loto atoa le amo ua ofo mai e Iesu ma tatou iloa ona tauaveina ma le tonu, o le a lē taitai la iai se mafuaaga e foliga mai ai o se avega e lē magafatia. O le mea moni, pe afai tatou te faaātaina i o tatou mafaufau le tulaga lea o loo iai—o loo tatou amoina faatasi ma Iesu le amo—e lē faigata la ona tatou iloa po o ai moni lea na te tauaveina le mamafa o le avega. E tutusa lena ma se pepe o loo tau piipii i ʻau o le taavale pepe ma tau laalaa ai, o loo mafaufau o ia lea o loo tuleia i luma le taavale, peitai o le mea moni, e lē o le pepe a e o le matua lea o loo tuleia. Ona o Ieova le Atua, o ia o se Tamā alofa, ua ia silafia lelei foi o tatou vaivaiga ma masei, ma ua tali mai o ia i o tatou manaoga e ala mai ia Iesu Keriso. Na faapea mai Paulo: “O loʻu Atua e faaatoa e ia ia te outou mea uma e matitiva ai outou, e tusa ma le faulai o lona viiga, ia Keriso Iesu.”—Filipi 4:19; faatusatusa i le Isaia 65:24.
10. O le ā ua tupu i se tasi ua ia matuā faatāuaina le avea ma soo?
10 E toatele Kerisiano tuuina atu ua latou talisapaia lenei manatu ona o ni mea na latou tofo moni i ai. Mo se faaaʻoaʻoga, o Jenny, o lē na ia iloa, o lona avea ma paeonia lagolago i masina taitasi ma faigaluega faasoloatoa i se galuega sa tele ai omiga, ua matuā tele ai ona mafatiaga. E ui i lea, ua ia lagona, o loo fesoasoani moni le galuega paeonia ia te ia ina ia tausia ai pea le paleni o ona faalogona. O le fesoasoani atu i tagata ina ia latou aʻoaʻoina upu moni o le Tusi Paia, ma vaai atu ua suia o latou olaga ina ia finagalo malie mai i ai le Atua—o mea na ua ia matuā olioli ai i se olaga ua tele mea e faia ai. E ioe atoatoa o ia i upu a le faataoto lea e faapea mai: “O le faamanuia a Ieova, o lea e faatamaoaiga aʻi; na te le faaopoopo i ai se tiga.”—Faataoto 10:22.
O se Avega e Māmā
11, 12. O le ā na uiga i ai Iesu ina ua fetalai: “O laʻu avega foi e māmā ia”?
11 E lē gata ina folafola mai e Iesu ia i tatou se amo e “avegofie,” a e ua ia faamautinoa mai foi i tatou e faapea: “O laʻu avega foi e māmā ia.” Ona o le “avegofie” o se amo ua mafai ai ona faafaigofie le faiga o se galuega; a e afai foi la o le a māmā atu ma le avega, ona avea moni ai lea o le galuega o se mea e faafiafiaina ai. Peitai, o le ā na mafaufau i ai Iesu ina ua ia fetalai mai faapena?
12 Seʻi manatu i le mea o le a faia e se faifaatoaga pe a manao e sui galuega o loo faia e ana manu, atonu o le a lē toe suotosinaina le fanua, a e o le a tosoina le taavale toso. O le mea muamua na te faia, o le tatala ese o le suotosina, a e faapipii atu i ai le taavale toso. O se mea lē fetaui lona nonoa faatasi uma o le suotosina ma le taavale toso i ua o manu. I se tulaga tutusa, e lei fetalai atu Iesu i tagata ina ia faatietie lana avega i luga o le avega o loo latou tauaveina. Na ia fetalai atu i ona soo: “E le mafai se auauna ona auauna i alii e toalua.” (Luka 16:13) O lona uiga la, na tuu atu e Iesu i tagata se filifiliga. Pe o le a latou faaauau pea i le tauaveina o le avega mamafa sa ia i latou, pe latou te tuu ese lena a e talia le avega na ia ofoina mai? Na taʻu atu e Iesu ia i latou se faamautinoaga faagaee fiafia: “O laʻu avega foi e māmā ia.”
13. O le ā le avega na tauave e tagata i aso o Iesu, ma o le ā na iu i ai?
13 I aso o Iesu, sa mafatia ai tagata i avega mamafa na faaee atu i ai e taʻitaʻi sauā o Roma, ma taʻitaʻi lotu mapo tulafono ma le faagutugutulua. (Mataio 23:23) I se taumafaiga ina ia aveesea le avega a Roma, na taumafai ai nisi tagata e faia suiga i a latou lava auala. Na oo ina latou aafia ai i faiga faapolotiki, a e na o iuga malaia na oo i ai. (Galuega 5:36, 37) O isi na lolo atu e faaleleia o latou tulaga, e ala i le matuā aafia i sailiga matapeapea o meafaitino. (Mataio 19:21, 22; Luka 14:18-20) Ina ua ofo atu e Iesu ia i latou le auala i le mapusaga, i lona valaaulia o i latou ia avea ma ona soo, sa lē o tagata uma na lotomalilie e talia. Sa faatalatū i latou i le tuu ese o le avega na latou tauaveina e ui ina mamafa, a e tauave le avega a Iesu. (Luka 9:59-62) Pagā se mea sese matuiā!
14. E mafai faapefea e popolega o le olaga ma tuinanauga i meafaitino ona faavaivaia ai i tatou?
14 Afai tatou te lē faaeteete, e mafai foi ona tatou faia lena lava mea sese i aso nei. O le avea ma soo o Iesu e faasaoloto mai ai i tatou i le tausinio atu i sini ma mea foi na o loo faasilisilia e tagata o le lalolagi. E ui e tatau pea ona tatou galulue mamafa ina ia maua mea manaomia mo aso taitasi, a e ia lē avea nei mea ma taulaʻiga o lo tatou olaga. A e mafai e popolega o le olaga ma le mailei o le fia tulelei faaletino ona iai sona uunaiga malosi ia i tatou. Pe a tatou faatagaina la, e mafai e na tuinanauga ona tineia le upu moni lea ua uma ona tatou talia ma le naunautai. (Mataio 13:22) E mafai ai ona tatou matuā pisi i le faamalieina o na tuinanauga ma avea ai o tatou tiutefai faa-Kerisiano o ni avega tauave e mamafa, lea tatou te mananao e tau ina faataunuu ma vave faateaese atu ai. E mautinoa la tatou te lē o faatalitalia se faafouina e maua mai i la tatou auaunaga i le Atua pe afai o le agaga lena o loo faia ai.
15. O le ā le lapataiga na tuuina mai e Iesu e faatatau i tuinanauga i meafaitino?
15 Na taʻua e Iesu, o le olaga faamalieina, e lē maua i le tauivi e faamalie o tatou lava manao, a e i le faamautinoa lelei o mea e sili atu ona tāua i le olaga. Na ia timai mai: “Aua neʻi outou popole i o outou ola, i mea tou te aai ai, ma mea tou te inu ai, po o outou tino, i mea tou te oofu ai. E le sili ea le ola i le mea e ʻai, ma le tino i le ofu?” Ona ia tataʻi atu lea o manatu i manufelelei o le lagi ma ia faapea atu: “Latou te le lulu saito, pe selesele, pe faaputu i fale saito, a e fagaina i latou e lo outou Tamā o i le lagi.” I le faasino atu i lautalotalo o le vao, na ia fetalai: “Latou te le galulue, latou te le milo foi; a ou te fai atu ia te outou, o Solomona ma lona matagofie tele na le ofu o ia pei o le tasi o na mea.”—Mataio 6:25-29.
16. O le ā ua faaalia mai i mea tutupu, o le a avea ma āuga o le tuliloaina o sini faaletino?
16 Pe mafai ona tatou aʻoaʻoina ni mea mai nei faataʻitaʻiga na faaaogā ai mea moni faigofie o le olaga? O le mea masani e tupu, pe a taumafai malosi se tagata ina ia faaleleia lona tamaoaiga faaletino, o le tele foi lena o lona saisaitia ai i sini faalelalolagi, ma o le mamafa foi lena o le avega o loo ia amoina. Ua tumu le lalolagi i tagata faipisinisi o loo sologa lelei o latou manuia faaletino a e puapuagatia i le malepelepe o o latou aiga, ua masofa faaipoipoga, ua pagatia o latou soifua maloloina, ma isi lava mau mafatiaga. (Luka 9:25; 1 Timoteo 6:9, 10) Na fai mai Albert Einstein, o lē na manumalo i se faailoga maualuga o le Nobel e faapea: “O meafaitino, o le manuia i le vaaiga a tagata, le taʻutaʻua, se olaga taugata—o loʻu manatu, o nei mea ua masani lava ona lē aogā. Ou te talitonu e sili atu ona lelei mo tagata uma le iai o se olaga faafaigofie ma le lē soona manao tele.” O lenei faamatalaga ua toe fafagu mai ai le fautuaga faigofie a le aposetolo o Paulo e faapea: “A o le amio Atua ma le loto mālie, o le ola tele lava lea.”—1 Timoteo 6:6.
17. O le ā le ituaiga o olaga o loo fautuaina mai e le Tusi Paia?
17 E iai se vala tāua e lē tatau ona tatou faagaloina. E ui lava e tele aogā o le iai o “se olaga faafaigofie ma le lē soona manao tele,” a e ua lē o le pau lena o le auala e maua ai le faamalieina. E toatele i latou ua māfua ona faafaigofie o latou olaga ona o tulaga o loo siomia ai, peitai, e lē o faamalieina ma fiafia ai i latou. E lē o uunaia e le Tusi Paia i tatou ina ia lafoaia uma fiafiaga i meafaitino ma ola ai e pei o se monike. O le faamamafa o loo autū atu i le tuutoina i le Atua, a e lē o le ola tutoatasi o le tagata lava ia. Seʻi vaganā ua tatou tuufaatasia mea na e lua, ona tatou maua lea o le “oloa tele lava.” O le ā le oloa? I le sosoo atili atu o le tusi lava lena, na taʻua ai e Paulo e faapea, o i latou o ē ‘faamoemoe atu, e lē i oloa e faaletumau, a e i le Atua’ o le a “latou teua oloa mo i latou lava, o le faavae lelei mo aso atali, ina ia latou fetagofi atu i le ola moni lava.”—1 Timoteo 6:17-19.
18. (a) E mafai faapefea e se tasi ona maua le faafouina moni? (e) E tatau faapefea ona tatou manatu i suiga atonu e manaomia ona tatou faia?
18 O le a tatou maua le faafouina pe a tatou iloa ona faataatia ese a tatou lava avega mamafa na atonu o loo tauaveina, a e tauave le avega māmā ua ofo mai e Iesu. O le toatele o ē ua toe faatulagaina o latou olaga ina ia mafai ona latou auai atoatoa i le auaunaga o le Malo, ua latou maua le auala i le olaga o le fiafia ma le faamalieina. O le mea moni, e manaomia le faatuatua ma le lototele o se tasi na te faia ai faapea, ma atonu e iai toatuga i le ala. A e ua faamanatu mai e le Tusi Paia ia i tatou e faapea: “O le na te manatunatu i le matagi e le lulu saito e ia; o le na te vaavaai foi i ao e le selesele lava o ia.” (Failauga 11:4) O le tele lava o mea e lē matuā faigata tele, pe afai o le a faia loa la tatou filifiliga ina ia faatino. O le vaega e sili ona faigata, e foliga mai o le faia o la tatou filifiliga. Atonu tatou te ono faavāivāia i tatou lava ona o le tauivi po o le tetee atu i le faataunuuina o se mea. Pe afai e maua sa tatou filifiliga ma talia le luʻi, atonu tatou te maofa ai i se faamanuiaga o le a iu ane i ai. Ua faalaeiau mai le faisalamo e faapea: “Ina tofotofo ia outou, ma ia outou iloa e lelei Ieova.”—Salamo 34:8; 1 Peteru 1:13.
“Faafouina mo Outou Agaga”
19. (a) O le ā e mafai ona tatou faatalitalia a o faaauau pea ona leaga tulaga o le lalolagi? (e) A o tatou tauaveina le amo a Iesu, o ā mea ua faamautinoa mai ia i tatou?
19 Na faamanatu atu e le aposetolo o Paulo i soo i le uluai senituri e faapea: “O puapuaga e tele e tatau ona tatou sao atu ai i le malo o le Atua.” (Galuega 14:22) O loo moni pea lena mea i aso nei. A o faasolo pea ina leaga tulaga o mea i le lalolagi, o le a faateteleina foi omiga e oo ia i latou o loo maumauai ina ia ola i se olaga o le amiotonu ma le tuutoina i le Atua. (2 Timoteo 3:12; Faaaliga 13:16, 17) Peitai, ua ia i tatou lagona sa iai foi ia Paulo ina ua ia faapea mai: “Ua puapuagatia i matou i mea uma, a e le faaatuatuvaleina; ua fememeai, a e le matuā fememeai; ua sauaina, a e le tuulafoaiina; ua lafotuina i lalo, a e le fano.” O le mafuaaga, talu ai tatou te faalagolago atu ia Iesu Keriso na te foai mai ia i tatou le malosi e silisili. (2 Korinito 4:7-9) O le taliaina ma le loto atoa o le amo o le avea ma soo, o le a tatou olioli ai i le faataunuuga o le folafolaga a Iesu e faapea: “Ona maua lea e outou o le malologa [“faafouina,” NW] mo outou agaga.”—Mataio 11:29.
Pe Mafai ona E Faamatala?
◻ O le ā le amo avegofie lea na ofo mai e Iesu?
◻ O le ā e tatau ona tatou faia pe afai ua tatou lagona ua amata ona amogatā la tatou amo?
◻ O le ā na uiga i ai Iesu ina ua ia fetalai: “O laʻu avega foi e māmā ia”?
◻ E mafai faapefea ona tatou faamautinoa o loo māmā pea la tatou avega?