O Molimau Kerisiano mo le Pule Silisili Ese Tauatua

“Ia outou taʻutaʻu atu ana galuega lelei—o le na valaau ia te outou nai le pouliuli e oo i lona lava malamalama e matuā ofo ai.”—1 PETERU 2:9.

1. O le ā le molimau uigā na tuuina atu e faatatau ia Ieova i vaitaimi a o lei oo i le Faa-Kerisiano?

I LE vaitaimi a o lei oo i le Faa-Kerisiano, na taʻutino ai ma le loto tele e se lisi umi o molimau e faapea e na o Ieova lava le Atua moni. (Eperu 11:4–12:1) I le malosi o lo latou faatuatua, na latou usiusitai ai ma le lē matataʻu i tulafono a Ieova ma mumusu e faalotolotolua i mataupu tau tapuaiga. Na latou tuuina atu se molimau malosi i le pule silisili i le vateatea aoao a Ieova.—Salamo 18:21-23; 47:1, 2.

2. (a) O ai le Molimau silisili a Ieova? (e) O ai na suia le nuu o Isaraelu e avea ma molimau a Ieova? E faapefea ona tatou iloa?

² O le molimau mulimuli ma le silisili a o lei oo mai i le vaitaimi o le Faa-Kerisiano, o Ioane le Papatiso. (Mataio 11:11) Na ia te ia le faaeaga o le folafolaina atu o le afio mai o Lē na Filifilia, ma na ia muai faailoa maia Iesu o le Mesia na folafolaina. (Ioane 1:29-34) O Iesu o le Molimau silisili lea a Ieova, “le molimau moni ma le faamaoni.” (Faaaliga 3:14) Ona sa teena e Isaraelu faaletino ia Iesu, na teena ai foi i latou e Ieova ma tofia ai se nuu fou, le Isaraelu faaleagaga a le Atua, ina ia avea ma ana molimau. (Isaia 42:8-12; Ioane 1:11, 12; Kalatia 6:16) Na sii mai e Peteru se valoaga e faatatau ia Isaraelu, ma na faaalia ai e faatatau atu i “le Isaraelu o le Atua,” le faapotopotoga Kerisiano, ina ua ia faapea mai: “O outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai e le Atua ina ia outou taʻutaʻu atu ana galuega lelei—o le na valaau ia te outou nai le pouliuli e oo i lona lava malamalama e matuā ofo ai.”—1 Peteru 2:9; Esoto 19:5, 6; Isaia 43:21; 60:2.

3. O le ā le tiute tauave autū a le Isaraelu a le Atua ma e faapena foi ma le “motu o tagata e toatele”?

³ Ua faaalia i upu a Peteru e faapea o le tiute tauave autū o le Isaraelu a le Atua, o le tuuina atu lea o se molimau i le lautele e faatatau i le mamalu o Ieova. I o tatou aso, ua aufaatasi atu ai i le nuu faaleagaga ia “le motu o tagata e toatele” o molimau, o ē o loo vivii atu foi i le Atua i le lautele. Ua latou alalaga ai ma le leo tetele ina ia lagonaina e tagata uma e faapea: “O i ai le faaolataga i lo tatou Atua, o lē tietie i le nofoālii, atoa ma le Tamai Mamoe!” (Faaaliga 7:9, 10; Isaia 60:8-10) E mafai faapefea e le Isaraelu a le Atua ma ana aumea ona faamaeʻaina la latou molimau? E ala i lo latou faatuatua ma le usiusitai.

O Molimau Pepelo

4. Aisea na avea ai Iutaia i ona po o Iesu o ni molimau pepelo?

⁴ O le faatuatua ma le usiusitai e aofia ai le ola e tusa ma mataupu silisili mai le Atua. O le tāua o lea mea e mafai ona vaaia i le mea na fetalai i ai Iesu e faatatau i taʻitaʻi lotu Iutaia o ona aso. O i latou nei na “tietie . . . i le nofoa o Mose,” e avea o ni aʻoaʻo o le Tulafono. Na oo foi ina latou aauina atu ni misionare ina ia faaliulotu le au lē talitonu. Ae na fetalai Iesu ia i latou e faapea: “Auā ua soo le sami ma le laueleele ia te outou ina ia lotu mai o se tasi; pe a maua foi o ia, ona outou faia lea o ia ma tagata o Kēna ua sili ona leaga ia te outou.” Na avea nei tagata lotu ma molimau pepelo—e faamaualuluga, e faaʻoleʻole, ma e lē alolofa. (Mataio 23:1-12, 15) I se tasi mea na tupu, na fetalai atu ai Iesu i nisi o Iutaia e faapea: “O outou nai lo outou tamā le tiapolo, tou te fia faia foi mea e tuʻinanau i ai lo outou tamā.” Aisea na ia fetalai atu ai faapea i sui o le nuu filifilia o le Atua? Ona sa lei utagia e i latou upu a le Molimau silisili a Ieova.—Ioane 8:41, 44, 47.

5. E faapefea ona tatou iloa ua tuuina atu e Kerisinetoma se molimau pepelo e uiga i le Atua?

⁵ I se auala tai faapea foi, i le faagasologa o senituri talu mai le vaitaimi o Iesu, e faitau selau miliona ē o i Kerisinetoma ua faapea mai o loo avea ma ona soo. E ui i lea, latou te lē o faia le finagalo o le Atua ma ua faapea ai ona lē iloa i latou e Iesu. (Mataio 7:21-23; 1 Korinito 13:1-3) Ua auina atu e Kerisinetoma ia misionare, o le toatele e lē taumatea o ni ē e loto naunau. Peitai, na latou aʻoaʻoina tagata ia tapuai atu i se atua Tolutasi o lē na te faamuina tagata agasala i le afi i seoli, ma o le toatele o a latou tagata liu lotu e itiiti faamaoniga e faailoa atu ai le avea o i latou o ni Kerisiano. Mo se faaaʻoaʻoga, o le nuu o Rwanda i Aferika, ua avea o se fanua ua toatele ai ē ua faaliliuina e misionare Katoliko Roma. Ae sa auai ma le loto atoa tagata Katoliko i Rwanda i le fetauaiga a ituaiga talu ai nei i lena atunuu. O fua o maua mai i lena fanua o auaunaga faamisionare ua faaalia ai e faapea, sa ia lei mauaina se molimau faa-Kerisiano moni mai ia Kerisinetoma.—Mataio 7:15-20.

Ola e Tusa ai ma Mataupu Silisili Mai le Atua

6. O ā auala e avea ai amioga lelei o se vaega tāua i le avatuina o se molimau?

⁶ O amioga sese a i latou o ē e faapea mai o Kerisiano e upuleagaina ai “le ala o le upu moni.” (2 Peteru 2:2) O se Kerisiano moni e ola e talafeagai ai ma mataupu silisili mai le Atua. E lē gaoi, pepelo, faaʻoleʻole, po o lona faia foi o ni amioga lē mamā. (Roma 2:22) E mautinoa lava na te lē fasiotia lona tuaoi. E faafoeina ma le alofa e tane Kerisiano le puleaina o o latou aiga. E lagolago ma le āva e avā lena pule. O fanau ua toleniina e o latou mātua ma ua faapea ai ona saunia e avea ma Kerisiano matutua maufaatuatuaina. (Efeso 5:21–6:4) E moni, o i tatou uma lava e lē lelei atoatoa ma tatou te faia mea sese. Ae o se Kerisiano moni, e faaaloalo i faatulagaga a le Tusi Paia, ma na te faia se taumafaiga faamaoni ina ia faatatauina. E mataulia mai e isi lenei mea ma e tuuina atu ai se molimau lelei. I nisi o taimi, o i latou na tetee muamua i le upu moni ua latou matauina amioga lelei a se Kerisiano ma ua suia ai i latou.—1 Peteru 2:12, 15; 3:1.

7. O le ā le tāua o le fealofani o Kerisiano?

⁷ Na faaalia e Iesu se vala tāua o amioga Kerisiano ina ua ia fetalai e faapea: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) Ua iloga le lalolagi a Satani e ala “i amio leaga uma lava, o le faitaaga, o le amio ulavale, o le manumanu, o le loto leaga; o loo tumu saisai i le mataua, o le fasioti tagata, o le misa, o le ʻoleʻolega, ma le faatāutala; o tuaupua i latou, o e fai tala leaga, o e ʻinoʻino i le Atua, o e faasiasia, o e faasaua, o e faafiasilisili, o e fia fai togafiti i mea leaga, o e le anaana i mātua.” (Roma 1:29, 30) I se siosiomaga faapea, o se faalapotopotoga faalelalolagi aoao ua iloga i le alofa o le a avea o se faamaoniga malosi o gaoioiga o le agaga o le Atua—o se molimau aogā. O Molimau a Ieova, ua faia aʻe ai se faalapotopotoga faapea.—1 Peteru 2:17.

O Molimau, o Tagata Aʻoga o le Tusi Paia

8, 9. (a) Na faapefea ona faamalosia le faisalamo i lana suesuega o le Tulafono a le Atua ma manatunatu loloto i ai? (e) I ā auala o le a faamalosia ai i tatou e a tatou suesuega o le Tusi Paia ma manatunatu loloto i ai ina ia faaauau pea ona tuuina atu se molimau?

⁸ Ina ia taulau i le tuuina atu o se molimau lelei, e tatau i se Kerisiano ona iloa ma alofa i mataupu silisili amiotonu a Ieova, ma ia inoino moni i faiga piopio a le lalolagi. (Salamo 97:10) Ua faatosina tele le lalolagi i le faaauilumaina o ona mafaufauga, ma e mafai ona faigata tele ona tetee atu i lona agaga. (Efeso 2:1-3; 1 Ioane 2:15, 16) O le ā e mafai ona fesoasoani ia i tatou ina ia tausia le uiga saʻo i le mafaufau? O suesuega uigā ma le faifai pea i le Tusi Paia. Na taʻua soo e le tusitala o le Salamo e 119 lona fiafia i Tulafono a Ieova. Na ia faitauina ma manatunatu loloto i ai e lē aunoa “i le aso atoa.” (Salamo 119:92, 93, 97-105) O le iuga, ua mafai ai ona ia tusi mai e faapea: “Ou te ʻinoʻino i le tala pepelo, ou te matuā ʻinoʻino i ai; a ou te naunau i lau tulafono.” E lē gata i lea, o le loloto o lona alofa sa uunaia ai o ia e gaoioi e talafeagai ai. Ua ia faapea mai: “E taʻi foi faafitu i [le] aso ona ou vivii atu ia te oe, ona o au faamasinoga tonu.”—Salamo 119:163, 164.

⁹ I se uiga tutusa foi la faapea, o a tatou suesuega e lē aunoa o le Afioga a le Atua ma manatunatu loloto i ai, o le a pāʻia ai o tatou loto ma uunaia ai i tatou e ‘vivii atu ia te ia’—molimau faatatau ia Ieova—faia e lē aunoa, pe oo foi ina “faafitu i [le] aso.” (Roma 10:10) I le talafeagai ai ma lenei mea, ua faapea mai ai le tusitala o le salamo muamua, o le tagata e manatunatu loloto e lē aunoa i afioga a Ieova “e faapei o le laau ua totō i tafatafa ane o vaitafe, e fua mai ona fua i ona lava tau; e le toulu foi ona lau; e manuia foi mea uma na te faia.” (Salamo 1:3) Na faaalia foi e le aposetolo o Paulo le mana o le Afioga a le Atua ina ua ia tusi e faapea: “O tusi paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.”—2 Timoteo 3:16, 17.

10. O le ā ua matuā manino e uiga i tagata o Ieova i aso nei e gata ai?

¹⁰ O le vave o le faateleina o le numera o ē tapuai faamaoni i lenei luasefulu o senituri ua faailoa mai ai le faamanuiaga a Ieova. E mautinoa lava, i le avea o se vaega, o nei molimau faaonaponei mo le pule silisili ese tauatua ua faatupuina le naunau i tulafono a Ieova i o latou loto. I le pei o le faisalamo, ua uunaia i latou e usiusitai i Ana tulafono ma molimau atu ma le faamaoni “i le ao ma le po” i le mamalu o Ieova.—Faaaliga 7:15.

O Galuega Tetele a Ieova

11, 12. O le ā na faataunuuina e vavega na faia e Iesu ma ona soo?

¹¹ I le uluai senituri, na faamalosia ai e le agaga paia molimau Kerisiano faamaoni ina ia faia vavega, na faaoo atu ai se faamaoniga malosi e faapea sa moni la latou molimau. A o iai Ioane le Papatiso i le falepuipui, na ia auina atu ai ni soo e fesili ia Iesu: “O oe ea lē maliu mai, pe matou te faatali i se tasi?” Sa lei tali atu i ai Iesu e ioe po o le leai. Nai lo lena, na ia fetalai e faapea: “Ina o atu ia oulua, ma faailoa atu ia Ioane o mea na oulua faalogo i ai, ma vaai i ai; ua pupula tauaso ma ua savavali pipili, ua faamamāina lepela ma ua logo tutuli, ua faatutūina o e na oti ma ua folafolaina foi le tala lelei i e matitiva. E manuia foi se le tausuai ia te aʻu.” (Mataio 11:3-6) O na galuega mamana na fai ma molimau ia Ioane e faapea o Iesu sa mautinoa lava o “lē maliu mai.”—Galuega 2:22.

¹² I se uiga tali tutusa foi faapea, na faamālōlōina ai e nisi o soo o Iesu ē na mamaʻi ma faatutūina foi ē na maliliu. (Galuega 5:15, 16; 20:9-12) O na vavega sa pei o se molimau mai le Atua lava ia mo i latou. (Eperu 2:4) Ma o galuega faapena na faaalitino ai le mana malosi o Ieova. Mo se faaaʻoaʻoga, e moni o Satani o “le alii o lenei lalolagi,” ua mafai ona faapogaia ai le oti. (Ioane 14:30; Eperu 2:14) Ae ina ua faatūina mai e Peteru le fafine faamaoni o Toreka mai le oti, e na o le mana lava o Ieova na mafai ai ona ia faia o lea mea, auā e na o Ia lava e mafai ona toe faafoisia maia le ola.—Salamo 16:10; 36:9; Galuega 2:25-27; 9:36-43.

13. (a) O le ā le ala ua faaauau ai pea ona molimau vavega ua i le Tusi Paia e faatatau i le mana o Ieova? (e) E faapefea i le faataunuuina o valoaga ona faia se vaega tāua i le faamaonia o le tulaga tauatua o Ieova?

¹³ I aso nei, o nei galuega faavavega ua lē o toe faia. Ua uma lo latou aogā. (1 Korinito 13:8) E ui i lea, ua iai pea ia i tatou faamaumauga i le Tusi Paia, ua molimauina e le toatele o ē na vaai tino i ai. Pe a faaali atu e Kerisiano i aso nei, nei mea na tutupu ua faamauina i le talafaasolopito, o loo mafai pea ona avatu e na galuega se molimau uigā e faatatau i le mana o Ieova. (1 Korinito 15:3-6) E faaopoopo atu i ai, i ona po o Isaia, na faasino atu e Ieova o valoaga saʻo, o se faamaoniga mataina lea e iloa ai o Ia o le Atua moni. (Isaia 46:8-11) E tele valoaga faagaeeina mai le Atua ua i le Tusi Paia o loo faataunuuina i aso nei—o nisi o na valoaga o loo faataunuuina i le faapotopotoga Kerisiano. (Isaia 60:8-10; Tanielu 12:6-12; Malaki 3:17, 18; Mataio 24:9; Faaaliga 11:1-13) E lē gata ina faasino mai ai o loo tatou ola i “aso e gata ai,” ae o le faataunuuina o nei valoaga ua faaeaina mai ai Ieova ua na o ia lava o le Atua moni.—2 Timoteo 3:1.

14. O ā auala ua avea ai le talafaasolopito faaonaponei o Molimau a Ieova o se molimau malosi e faapea o Ieova o le Alii Silisili ese?

¹⁴ O le mea mulimuli, o loo faia pea e Ieova mea tetele, mea e ofoofogia, mo ona tagata. O le faatuputeleina o le malamalama i le upu moni o le Tusi Paia, ua faatonutonuina e le agaga o Ieova. (Salamo 86:10; Faaaliga 4:5, 6) O le faatelega mataina ua lipotia mai le lalolagi aoao o faamaoniga e faapea, o Ieova ua ia ‘faatelevaveina i lana lava taimi.’ (Isaia 60:22) Ina ua mānu aʻe sauāga tugā mai lea atunuu i lea atunuu i aso e gata ai, o le tutumau ma le loto tetele o tagata o Ieova ua mafaia ona o le lagolago malosi a le agaga paia. (Salamo 18:1, 2, 17, 18; 2 Korinito 1:8-10) Ioe, o le talafaasolopito faaonaponei o Molimau a Ieova, ua avea lea o se molimau malosi e faapea o Ieova o le Alii Silisili ese.—Sakaria 4:6.

Le Tala Lelei e Ao ona Talaʻia

15. O le ā le molimau faateleina sa ao ona tuuina atu e le faapotopotoga Kerisiano?

¹⁵ Na tofia e Ieova Isaraelu o sana molimau i nuu. (Isaia 43:10) Ae peitai ane, e na o se vaega toaitiiti o tagata Isaraelu na tuuina atu i ai le poloaiga mai le Atua ina ia ō e talaʻi i ē e lē ni Isaraelu, ma sa masani ona faia ina ia faasilasila atu ai faamasinoga a Ieova. (Ieremia 1:5; Iona 1:1, 2) E ui i lea, o valoaga ua iai i Tusitusiga Eperu ua aliali mai ai e faapea o le a iai le aso e liuliualo atu ai Ieova i nuu i se auala e sili ona tele, ma ua ia faia lenei mea e ala mai i le Isaraelu faaleagaga o le Atua. (Isaia 2:2-4; 62:2) A o lei afio aʻe i le lagi, na poloaia e Iesu ona soo e faapea: “Ia outou o atu e fai nuu uma lava ma soo.” (Mataio 28:19) A o uaʻi atu Iesu i “mamoe o le aiga o Isaraelu ua le iloa,” na auina atu ona soo i “nuu uma lava,” e oo i “tuluʻiga o le lalolagi.” (Mataio 15:24; Galuega 1:8) Sa tatau ona faalogo tagata uma i le molimau faa-Kerisiano.

16. O le ā le poloaiga na faataunuuina e le faapotopotoga Kerisiano o le uluai senituri, ma o le ā le tele na faia ai?

¹⁶ Na faaalia e Paulo sa ia malamalama lelei i lenei mea. E oo ane i le tausaga e 61 T.A., sa mafai ona faapea atu o ia: “E pei ona i le lalolagi uma lava; o loo fua mai ai foi le fua” o le tala lelei. Sa lei faatapulaaina le tala lelei i se atunuu e tasi po o se ituaiga lotu e tasi, e pei o lea na “ifo atu i agelu.” Nai lo le faia faapea, sa faia i le vaaiga a le lautele, “sa talaʻiina atu . . . i tagata uma lava i le lalolagi.” (Kolose 1:6, 23; 2:13, 14, 16-18) O lea, na faataunuu ai e le Isaraelu o le Atua i le uluai senituri lona tofiga o le “taʻutaʻu atu ana galuega lelei o le na valaau ia te [i latou] nai le pouliuli e oo i lona lava malamalama e matuā ofo ai.”

17. Ua faaauau faapefea ona faataunuuina le Mataio 24:14 i se auala e sili atu ona tele?

¹⁷ E ui i lea, o lena galuega talaʻi i le uluai senituri sa na o se uluai ata o le mea o le a faataunuuina i aso e gata ai. I le vaavaai atu i le lumanai ae maise lava i o tatou taimi, na fetalai Iesu e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14; Mareko 13:10) Pe ua faataunuuina ea lenei valoaga? Ioe, ma le mautinoa lava. Mai i se amataga laitiiti i le 1919, ua faateleina atu nei le talaʻiga o le tala lelei i le silia ma le 230 atunuu. O loo lagonaina le molimau i vaega aisā i Mātū, ma i vaega o aasa ai le vevela i le teropika. Ua tuuina atu se molimau i konitineta tetele, ma ua sailia foi motu tu ese ina ia tuuina atu se molimau i ē o nonofo ai. E oo lava i le lotolotoi i mea o iai vevesiga, e pei o le taua i Bosnia ma Herzegovina, o loo faaauau ai lava le talaʻia o le tala lelei. E pei lava ona sa iai i le uluai senituri, ua fuaina mai ai ni fua i le molimau atu “i le lalolagi uma lava.” Ua folafola atu i le lautele le tala lelei “i tagata uma lava i le lalolagi.” O le ā le iuga? Muamua, ua aoaoina ai ē o totoe o le Isaraelu a le Atua “mai ituaiga uma, ma gagana eseese, ma nuu, atoa ma atunuu.” Lona lua, na amata ai le aoaoina mai o le faitau miliona o le “motu o tagata e toatele mai atu nuu uma, ma aiga, ma nuu, ma gagana eseese.” (Faaaliga 5:9; 7:9) Ua faaauau ona faataunuuina le Mataio 24:14 i se auala e sili atu ona tele.

18. O ā nisi o mea ua faataunuuina nei e ala i le talaʻiina o le tala lelei i le lalolagi aoao?

¹⁸ O le talaʻiina o le tala lelei i le lalolagi aoao ua fesoasoani e faamaonia ai e faapea ua amata le faatasi mai tau tupu o Iesu. (Mataio 24:3) E faaopoopo atu i ai, o le auala autū lea ua “selesele ai, . . . le saito o le lalolagi,” a o ia tataʻi atu tagata i le faamoemoe moni e tasi o tagata, le Malo lea o Ieova. (Faaaliga 14:15, 16) Talu ai e na o Kerisiano moni e auai i le talaʻia o le tala lelei, ua fesoasoani lenei galuega tāua e faaeseese ai Kerisiano moni mai Kerisiano pepelo. (Malaki 3:18) I lenei auala, e iu ai i le faaolaina o i latou o talaʻi e faapena foi ma i latou o ē taliaina. (1 Timoteo 4:16) Ae sili atu ona tāua, o le talaʻiina o le tala lelei e tuuina atu ai le viiga ma le mamalu ia Ieova le Atua, o lē e ana le faatonuga e ao ona faia, o lē e lagolagoina i latou o loo faia, ma lē o loo māfua ai ona fuatele mai.—2 Korinito 4:7.

19. O le ā le filifiliga maumaututū ua faalaeiauina ai Kerisiano uma ia mauaina a o latou ulu atu i le tausaga fou faaleauaunaga?

¹⁹ E letioa ona faagaeetia le aposetolo o Paulo e faapea mai: “Oi talofa foi ia te au, pe a ou le folafolaina le tala lelei!” (1 Korinito 9:16) E faapea foi le lagona o i Kerisiano i aso nei. O se faaeaga tele ma se tiute tauave tāua le avea ma se “au faigaluega . . . faatasi ma le Atua,” i le faasusulu atu lea o le malamalama o le upu moni i lenei lalolagi pogisa. (1 Korinito 3:9; Isaia 60:2, 3) O le galuega sa itiiti sona amataga mai i le 1919, ua ausia nei se faatelega ofoofogia. E toetoe lava atoa le lima miliona Kerisiano o molimau atu i le pule silisili ese a le Atua a o latou faaaluina le sili atu i le piliona itula i le tausaga ina ia faaoo atu le feau o le faaolataga i isi. Maeu se olioli o le faia ai o se vaega i lenei galuega o le faapaiaina o le suafa o Ieova! A o tatou ulu atu i le tausaga faaleauaunaga o le 1996, seʻi tatou finafinau ia ae aua le faavaivai. Nai lo le faia faapea, o le a tatou matuā utagiaina i le taimi nei nai lo se isi lava taimi upu a Paulo ia Timoteo e faapea: “Ia e talaʻi atu le upu, ia e faamalosi.” (2 Timoteo 4:2) A o tatou faia faapea, tatou te tatalo ai ma o tatou loto atoa, o le a faaauau ona faamanuia e Ieova a tatou taumafaiga.

Pe E te Manatua?

◻ O ai na suia Isaraelu e avea o se “molimau” a Ieova i atunuu?

◻ E fesoasoani atu faapefea le amioga faa-Kerisiano i le avatuina o se molimau?

◻ Aisea e tāua ai suesuega i le Tusi Paia ma manatunatu loloto i ai mo le Molimau Kerisiano?

◻ O le ā le auala ua avea ai le talafaasolopito faaonaponei o Molimau a Ieova o se faamaoniga e faapea o Ieova o le Atua moni?

◻ O le ā ua faataulauina e le talaʻiga o le tala lelei?

[Ata i le itulau 15]

Nai lo le taofiofia, ua folafolaina atu nei le tala lelei “i tagata uma lava i le lalolagi”