Pe o Faamuamua le Atua i Lou Aiga?

“Ia e alofa foi i le Alii [Ieova] lou Atua ma lou loto atoa.”—MAREKO 12:29, 30.

1. O le ā le tāua o lo tatou alolofa atu ia Ieova?

NA FESILI se tusiupu ia Iesu: “O le fea poloaiga e sili i poloaiga uma?” Nai lo le avatuina o lona lava manatu, na tali ai e Iesu lana fesili i le sii atu i ai o upu mai le Afioga a le Atua o i le Teuteronome 6:4, 5. Na ia tali atu: “E sili lenei, Faalogo mai ia Isaraelu e; o le Alii [Ieova] lo tatou Atua, o le Alii [Ieova] e toatasi ia. Ia e alofa foi i le Alii [Ieova] lou Atua ma lou loto atoa, ma lou agaga [“tagata,” NW] atoa, ma lou manatu atoa, ma lou malosi atoa.”—Mareko 12:28-30.

2. (a) O le ā le teteega sa tatau ia Iesu ona ia faafesagaia? (e) O le ā atonu e māfua ai i nisi taimi ona faafaigata ona usiusitai atu ia Ieova?

² Ina ia usiusitai i le mea na taʻua e Iesu o le poloaiga muamua—le poloaiga e sili i poloaiga uma lava—e manaomia ai ona tatou faia i taimi uma lava mea e fiafia i ai Ieova. Sa faia faapea e Iesu, e ui na teena e Peteru i se tasi taimi le gaoioiga na faia e Iesu, ma i le isi foi taimi, na faapea ona faia foi e ona lava tauaiga vavalalata. (Mataio 16:21-23; Mareko 3:21; Ioane 8:29) Ae faapefea pe a oo ia te oe se tulaga faapena? Seʻi faapea ua mananao ou auaiga e taofia lau suesuega o le Tusi Paia faapea ma lou faatasitasi atu i Molimau a Ieova. Pe o le a e faamuamua ea le Atua i le faia o le mea e fiafia i ai o ia? Pe o le a faamuamua le Atua, e tusa lava pe tetee sui o le aiga i au taumafaiga e auauna atu ia te ia?

Le Mailei o Teteega Mai Aiga

3. (a) Atonu o ā iuga o le a iai i se aiga ona o aʻoaʻoga a Iesu? (e) E mafai faapefea e tagata o le aiga ona faaalia po o ai e sili lo latou alolofa i ai?

³ Sa lei faatauvaa ia Iesu faigata e ono oo i ai pe a tetee isi sui o le aiga i se tasi ua faapea ona taliaina ana aʻoaʻoga. Na fetalai Iesu e faapea: “E fai foi le tagata ma fili o lona aiga.” Peitai e ui lava i lena taunuuga faanoanoa, ae na faaalia e Iesu po o ai e ao ona faamuamua i lona fetalai mai e faapea: “O le ua tele lona alofa i lona tamā po o lona tinā, a e itiiti ia te au, e le aoga lea ia te au; o le ua tele foi lona alofa i lona atalii po o lona afafine, a e itiiti ia te au, e le aoga foi lea ia te au.” (Mataio 10:34-37) Tatou te faamuamua Ieova le Atua e ala lea i le mulimuli i aʻoaʻoga a lona Alo, o Iesu Keriso, o lē “ua matuā tusa lava ma [le Atua].”—Eperu 1:3; Ioane 14:9.

4. (a) O le ā na fetalai i ai Iesu i le mea na aofia ai i le avea ma ona soo? (e) O le ā le uiga o le ʻinoʻino o Kerisiano i tagata o le auaiga?

⁴ I se isi mea na tupu a o talanoaina e Iesu mea moni e aofia ai i le avea ma ona soo moni, na ia fetalai ai: “Afai e sau se tasi ia te au, a e le ʻinoʻino i lona tamā, ma le tinā, ma le avā, ma le fanau, ma uso, ma tuafāfine e oo lava i lona ola, e le mafai ona fai o ia moʻu soo.” (Luka 14:26) E manino sa lei iai i le finagalo o Iesu e faapea e tatau i ona soo ona ʻinoʻino moni atu i sui o o latou aiga, talu ai na ia poloaiina tagata ina ia alolofa atu i o latou fili. (Mataio 5:44) Nai lo lea, o le mea sa iai i le finagalo o Iesu, e tatau i ona soo ona itiiti atu le alofa i sui o le aiga ae sili i le Atua. (Faatusatusa i le Mataio 6:24.) I le ogatusa ma lena malamalamaga, ua faapea mai le Tusi Paia na “inosia” e Iakopo ia Lea ae alofa ia Rasela, o lona uiga, sa lē tutusa le tele o lona alofa ia Lea e pei ona sa alofa atu ai i lona uso o Rasela. (Kenese 29:30-32) E oo foi i o tatou lava “ola,” na fetalai Iesu e ao ona tatou ʻinoʻino i ai, po o le itiiti le alofa i ai nai lo le alofa ia Ieova!

5. Ua faaaogaseseina faapefea ma le faaʻoleʻole e Satani le fuafuaga faaleaiga?

⁵ Ona o Lē na Foafoaina Mea ma o Lē Foai Ola, ua tatau ai ona tuuina atu le tuutoina atoatoa ia Ieova e ana auauna uma lava. (Faaaliga 4:11) Na tusi le aposetolo o Paulo e faapea: “Ou te tootuli ai i le Tamā, o ia ua faaigoaina ai le aiga uma o i le lagi atoa ma le lalolagi.” (Efeso 3:14, 15) Na foafoaina e Ieova le faatulagaga faaleaiga i se auala matagofie ua iai ai i sui o le aiga le alofa o le tasi i le isi ona e aiga. (1 Tupu 3:25, 26; 1 Tesalonia 2:7) E ui i lea, na faaaogaseseina ma le faaʻoleʻole e Satani le Tiapolo lenei alofa ona e aiga, lea e aofia ai le naunau ina ia faafiafiaina ē e alolofa i ai. Ua na faateteleina le malosi o sauāga mai i aiga, ma ua toatele ua latou iloaina o se luʻi tele le tutumau mausalī mo le upu moni o le Tusi Paia pe a oo ina fetaiai ma ia sauāga.—Faaaliga 12:9, 12.

Faafetaiaia ma le Manuia le Luʻi

6, 7. (a) E mafai faapefea ona fesoasoani atu i sui o le aiga ia talisapaia le tāua o suesuega i le Tusi Paia ma aufaatasiga faa-Kerisiano? (e) E mafai faapefea ona tatou faataʻitaʻia tatou te alolofa moni i tagata o lo tatou aiga?

⁶ O le ā lau mea o le a fai pe a e feagai ai ma se filifiliga, o le faafiafiaina o le Atua, po o le faafiafiaina o se sui o le aiga? Pe o le a e mafaufau ea e faapea, e lē o faatalitalia i tatou e le Atua ia suesueina lana Afioga ma faatatauina ona mataupu silisili pe afai o le faia faapea e faapogaia ai le fevaevaeai o le aiga? Ae mafaufau i ai. Pe afai o le a e lolo atu ma lē toe faia lau suesuega o le Tusi Paia po o le toe aufaatasi atu i Molimau a Ieova, pe o le a faapefea la e i latou e te alofa i ai ona malamalama o le poto saʻo o le Tusi Paia o se mataupu o loo aafia ai le ola ma le oti?—Ioane 17:3; 2 Tesalonia 1:6-8.

⁷ E ono mafai ona tatou faataʻitaʻia le tulaga i lenei auala: Atonu e iai se tagata o le aiga e matuā manao tele i le ʻava. Pe o le lē amanaiaina ea po o le faaalia o le faapalepale i lona faafitauli o le pulea e le ʻava, e iai moni se aogā ia te ia? Pe e sili ai ona tausi le filemu i le gauai atu i ai ma aua neʻi faia lava se mea e tasi i lona faafitauli? E leai, atonu o le a e ioe e faapea, e sili atu ona lelei le taumafai e fesoasoani ia te ia ina ia manumalo i lona faafitauli o le pulea e le ʻava, e tusa lava po o le iuga o le faia faapea o le a feagai ai ma lona ita ma faamataʻuga. (Faataoto 29:25) I se tulaga tutusa foi la, pe afai e te alofa moni i tagata o lou aiga, o le a e lē gauai atu ai la i a latou taumafaiga ina ia taofia oe mai le suesueina o le Tusi Paia. (Galuega 5:29) E na o le tumau mausalī lava o le a mafai ai ona e fesoasoani ia i latou e talisapaia e faapea o le ola e tusa ma aʻoaʻoga a Keriso e aafia moni ai lo tatou ola.

8. E faapefea ona aogā ia i tatou le mea moni e faapea sa faia ma le faamaoni e Iesu le finagalo o le Atua?

⁸ O le faamuamua o le Atua atonu e iai taimi e matuā faigata ai. Ae ia manatua, na faia foi e Satani ina ia faigata mo Iesu ona faia le finagalo o le Atua. E ui i lea, sa lei faavaivai ai lava Iesu; na ia tumau e oo lava i tiga o le satauro mo i tatou. Ua faapea mai le Tusi Paia: “O Iesu Keriso lo tatou Faaola.” “O le na maliu mo i tatou.” (Tito 3:6; 1 Tesalonia 5:10) Pe tatou te lē loto faafetai ea ona sa lei gauai atu Iesu i sauāga? Ona sa onosai o ia i se maliu faataulagaina, ua tatou maua ai le faamoemoe o le ola e faavavau i se lalolagi fou filemu amiotonu e ala i le faaalia o le faatuatua i lona toto ua faamaligiina.—Ioane 3:16, 36; Faaaliga 21:3, 4.

Se Taui Faaoaina e Mafai ona Maua

9. (a) E mafai faapefea e Kerisiano ona faia se vaega i le faasaoina o isi? (e) O le ā le tulaga sa iai le aiga o Timoteo?

⁹ Pe e te iloaina e mafai foi ona iai sou sao i le faaolaina o isi, e aofia ai ma aiga pele? Na faamalosi atu le aposetolo o Paulo ia Timoteo e faapea: “Ia e tumau pea i ai [i mea ua aʻoaʻoina ai oe]; auā a ē fai lena mea, e faaolaina ai oe e oe atoa ma e ua faalogologo ia te oe.” (1 Timoteo 4:16) Na ola aʻe Timoteo i se aiga e eseese lotu, o lona tamā o se tagata Eleni e lē talitonu. (Galuega 16:1; 2 Timoteo 1:5; 3:14) E ui tatou te lē iloa pe na oo ina avea mulimuli ane le tamā o Timoteo ma sē na talitonu, ae o le avanoa atonu na ia faia ai faapea sa telē ona o le amio faamaoni a lana avā, o Eunike, ma faapena foi ma Timoteo.

10. O le ā e mafai ona faia e Kerisiano mo a latou paaga lē talitonu?

¹⁰ Ua faaalia e le Tusi Paia e faapea, o tane ma avā o ē e taofimau i upu moni o le Tusi Paia, e mafai ona fesoasoani atu i le faaolaina o a latou paaga e lē o ni Kerisiano e ala i le fesoasoani atu lea ia i latou ina ia avea ma ē e talitonu. Na tusi faapea le aposetolo o Paulo: “Ai se tasi o le au uso ua i ai le avā le faatuatua, ua loto ina la nonofo ma ia, aua le molia o ia; o se fafine foi o i ai le tane le faatuatua ua loto ina la nonofo ma ia, aua le faatea ia te ia. E le ma iloa e oe le avā, pe faaolaina lau tane ia te oe; ma oe foi le tane pe faaolaina lau avā ia te oe.” (1 Korinito 7:12, 13, 16) Ua faamatala mai e le aposetolo o Peteru pe faapefea e avā ona iu ina faaolaina ai a latou tane i le faalaeiau mai e faapea: “Ia usiusitai i a outou lava tane, afai foi e le faalogo nisi i le upu, ia maua i latou i le amio lelei a avā, a e leai se upu.”—1 Peteru 3:1.

11, 12. (a) O le ā le taui ua maua e le faitau afe o Kerisiano, ma o le ā na latou faia ina ia mauaina ai? (e) Faamatala se mea na tupu o le tauia o se tagata o se aiga ona o le tutumau ma le faamaoni.

¹¹ I tausaga faatoʻā mavae atu, e faitau afe ua avea ma Molimau a Ieova ina ua tuanai le tele o masina ma tausaga o tetee i galuega faa-Kerisiano a o latou auaiga Molimau. Maeu se tauia ai o Kerisiano o ē na tutumau ma le mausalī ona o lenei mea, ma maeu foi le faamanuiaina ai o ē sa tetee! Na faamatala mai i ni faalogona ootia e se toeaina Kerisiano e 74 tausaga le matua e faapea: “E masani ona ou faafetai i laʻu avā ma le fanau mo le pipiimau i le upu moni i tausaga sa ou tetee ai ia i latou.” Na ia faapea mai, e tolu tausaga na ia teena ai ma le maumauai lana avā, ma faasā o ia mai le talanoa atu e faatatau i le Tusi Paia. Ae na faapea mai le toeaina, “na faaaogā e ia taimi na ia iloa ou te gauai atu ai, e talaʻi mai ai ia te au a o ia fofōina oʻu vae. Maeu loʻu loto faafetai tele ona sa lei faavaivai o ia i aʻu teteega!”

¹² Na tusi mai se tasi tane o lē na tetee i lona aiga e faapea: ‘Na avea aʻu ma fili sa sili ona leaga i laʻu avā talu ai ina ua ia mauaina le upu moni, sa ou faamataʻu atu ia te ia, ma, ma te finau i aso uma; o aʻu lava e amataina le finauga i taimi uma. Ae na lē aogā na mea uma; sa taofimau atu laʻu avā i le Tusi Paia. E sefululua tausaga ua tuanai o laʻu taua fita faasaga i le upu moni ma i laʻu avā ma le ma tama. Sa pei aʻu o le Tiapolo ia i laua uma.’ Mulimuli ane, na amata ai e le tamaloa ona toe iloilo lana amio. Na ia faamatala mai e faapea: ‘Na ou iloaina loʻu sauā tele. Sa ou faitauina le Tusi Paia, ma e faafetai ai ona o ana faatonuga, o lea ua avea nei aʻu o se Molimau ua papatisoina.’ Sei mafaufau i le tauia tele o le avā, ioe, o le fesoasoani atu lea e ‘faaolaina lana tane’ ona o le tutumau ma le faamaoni mai i ana teteega mo le 12 o tausaga!

Aʻoaʻoina Mai ia Iesu

13. (a) O le ā le lesona autū e ao i tane ma avā ona aʻoaʻoina mai le soifuaga o Iesu? (e) E mafai faapefea e tagata o faafaigata ona usiusitai atu i le finagalo o le Atua ona maua ni aogā mai faaaoaoga a Iesu?

¹³ O le lesona autū e tatau ona aʻoaʻoina e tane ma avā mai le olaga o Iesu, o le usiusitai lea i le Atua. Na fetalai Iesu e faapea: “Ou te faia pea lava o mea e lelei ia te ia.” “Ou te le usiusitai i loʻu lava loto, a o le finagalo o le na auina mai aʻu.” (Ioane 8:29; 5:30) E ui ina sa oo Iesu i se tasi o vala patino o le faia o le finagalo o le Atua na oona ia te ia, ae na usiusitai pea o ia. Na ia tatalo: “A e finagalo i ai, ia e ave ese lenei ipu ia te au.” Peitai na ia toe vave faaopoopo atu: “A e aua le faia loʻu loto, a o lou finagalo.” (Luka 22:42) Na lei talosaga atu Iesu i le Atua ina ia suia Lona finagalo; na ia faaalia lona alofa moni i le Atua e ala i le gauai atu ma le usiusitai po o le ā lava na finagalo i ai le Atua mo ia. (1 Ioane 5:3) O le faamuamua o le finagalo o le Atua i taimi uma e pei ona sa faia e Iesu, e tāua tele mo le manuia e lē gata i le olaga e lei faitoalua, ae faapena foi i le olaga faaipoipo ma le fai aiga. Manatunatu i le pogai ua faapea ai.

14. E faapefea ona lē saʻo manatunatuga o nisi Kerisiano?

¹⁴ E pei ona sa mātauina muamua, pe a faamuamua e ē talitonu le Atua, latou te taumafai ai ina ia faatasia pea ma a latou paaga lē talitonu, ma e masani ona mafai ona latou fesoasoani atu ia i latou ina ia maua le faaolataga. E tusa lava pe e talitonu uma foi paaga, ae o le la faaipoipoga e mafai foi ona faasala ese mai i le mea e tatau ona iai. Ona o faanaunauga agasala, e masani ona lē iai i tane ma avā, manatu alofa o le tasi i le isi i taimi uma. (Roma 7:19, 20; 1 Korinito 7:28) O nisi ua oo lava ina latou saili atu ia mauaina se isi paaga ese, e ui ina e lē o iai se faavae faale-Tusi Paia mo le tatalaina o le faaipoipoga. (Mataio 19:9; Eperu 13:4) Ua latou manatu e sili ona lelei mo i latou le faia faapea, ua faigata tele mo i latou le finagalo o le Atua ia nonofo faatasi pea tane ma avā. (Malaki 2:16; Mataio 19:5, 6) O lenei mea e mautinoa lava o se tasi foi o itu e manatu ai i manatu faaletagata nai lo le manatu i manatu o le Atua.

15. Aisea ua avea ai le faamuamua o le Atua o se puipuiga?

¹⁵ Maeu le avea o se puipuiga le faamuamua o le Atua! O ulugalii faaipoipo e faia faapea o le a taumafai e nonofo faatasi pea ma faaleleia le la faafitauli e ala i le faatatauina o fautuaga o le Afioga a le Atua. Ona faapea ai lea ona alofia mea eseese e oo i ai e tiga ai le loto ona o le lē amanaiaina o le finagalo o le Atua. (Salamo 19:7-11) Ua faataʻitaʻia mai lenei tulaga i se mea na tupu i se ulugalii talavou o ē na toeitiiti lava a tatala le la faaipoipoga, ae na faia se faaiuga e mulimuli atu i le fautuaga a le Tusi Paia. I tausaga mulimuli ane ina ua toe manatunatu le avā i le olioli sa iai i lana faaipoipoga, sa faapea mai o ia: “Ou te nofo i lalo ma tagi pe a ou manatunatu i le olaga semanu ou te ola ai pe ana ma teteʻa ma loʻu toalua i nei tausaga uma. Ona ou tatalo ai lea ia Ieova le Atua ma faafetai atu ia te ia ona o ana fautuaga ma taʻitaʻiga ua faapea ona faatasia ai i maʻua i se faiā fiafia.”

Tane, Avā—Ia Faaaʻoaʻo ia Keriso!

16. O le ā le faaaoaoga na faataatia e Iesu mo tane ma avā?

¹⁶ O Iesu o lē na te faamuamua le Atua i taimi uma, ua na faataatia maia se faaaoaoga lelei mo tane ma avā, e aogā mo i latou ona uaʻi atu ma le faaeteete i ai. Ua uunaia tane ina ia faaaʻoaʻo i le auala ua faataʻitaʻia ai ma le agalelei e Iesu le tulaga ulu i sui o le faapotopotoga Kerisiano. (Efeso 5:23) E mafai foi e avā Kerisiano ona aʻoaʻo mai i le faaaoaoga lē ponā a Iesu o le usiusitai atu i le Atua.—1 Korinito 11:3.

17, 18. O ā auala na faataatia ai e Iesu se faaaoaoga lelei mo tane?

¹⁷ Ua faatonu mai le Tusi Paia e faapea: “O outou tane, ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai o ia e ia e fai mona sui.” (Efeso 5:25) O se auala tāua na faapea ona faaalia ai e Iesu lona alofa i lana faapotopotoga o ona soo o le avea lea o ia ma a latou uo māfana. Na fetalai Iesu: “Ua ou taʻua outou o uo, auā ua ou faailoa atu ia te outou mea uma na ou faalogo ai i loʻu Tamā.” (Ioane 15:15) Seʻi mafaufau i le tele o le taimi na faaalu e Iesu e talanoa atu ai i ona soo—le anoanoai o felafolafoaiga na ia faia ma i latou—ma lona faatuatuaina o i latou! Pe e lē o se faaaoaoga ea lea e sili ona lelei mo tane?

¹⁸ Na faaalia e Iesu se naunau moni i ona soo ma sa iai se naunautaiga faamaoni mo i latou. (Ioane 13:1) Ina ua latou lē manino i ana aʻoaʻoga, na ia faaalu ma le onosai le taimi e na o i latou lava e faamanino atu ai mataupu. (Mataio 13:36-43) Tane e, po o faapea le tāua o le tulaga lelei faaleagaga o lau avā ia te oe? Pe e te faaalu le taimi faatasi ma ia, ia faamautinoa o loo tutusa le manino lelei ia te oulua o upu moni o le Tusi Paia i le mafaufau ma le loto? Na aufaatasi atu Iesu i ona aposetolo i le faiva, atonu i le toleniina o i latou taitoatasi. Pe lua te ō ma lau avā i le faiva, auai faatasi i le asiasi atu mai lea fale i lea fale ma le faia o suesuega faale-Tusi Paia?

19. E faapefea i le auala na feagai ai Iesu ma le vaivaiga o ona aposetolo lea na toe aliali aʻe ona faataatia ai se faaaoaoga mo tane?

¹⁹ E faapitoa lava i le auala na ia feagai ai ma le lē lelei atoatoa o ona aposetolo, na saunia mai ai e Iesu se faaaoaoga e silisili atu ona lelei mo tane. I le taimi o lana taumafataga mulimuli ma ona aposetolo, na mafai ai ona ia mātauina le toe tupu aʻe o se agaga feainaʻi. Pe na ia matuā faitioina i latou? E leai, ae na ia mulumuluina ma le lotomaulalo vae o i latou taitoatasi. (Mareko 9:33-37; 10:35-45; Ioane 13:2-17) Pe e te faaalia ea se onosai faapena i lau avā? Nai lo le faitio i se vaivaiga ua toe aliali aʻe, pe e te taumafai ma le onosai e fesoasoani ia te ia ma pāʻia lona loto e ala i lau faaaoaoga? E mafai ona tali lelei atu avā i se alofa mutimuti vale faapena, e pei ona sa mulimuli ane ai lava faia e aposetolo.

20. O le ā e lē tatau ona faagaloina e avā Kerisiano i taimi uma lava, ma o ai ua aumaia e avea o se faaaoaoga mo i latou?

²⁰ E manaomia foi e avā ona manatunatu ia Iesu, o lē sa lei galo lava ia te ia “o le ulu o Keriso o le Atua lea.” Na gauai atu o ia i taimi uma i lona Tamā faalelagi. E faapea foi la i avā ona aua neʻi galo, “o le ulu o le avā o le tane lea,” ioe, o a latou tane, o o latou ulu ia. (1 Korinito 11:3; Efeso 5:23) Na faamalosiau mai foi le aposetolo o Peteru i avā Kerisiano ina ia manatunatu i le faaaoaoga a “fafine paia” o aso anamua, ae maise lava ia Sara, o lē sa “faalogo ia Aperaamo, na ia taʻua o ia o le alii.”—1 Peteru 3:5, 6.

21. Aisea na manuia ai le faaipoipoga a Aperaamo ma Sara ae lē taulau le faaipoipoga a Lota ma lana avā?

²¹ E mautinoa na lafoaia e Sara se fale lelei i se aai mauoloa ina ia mau i faleie i se atunuu ese. Aisea? Pe ona sa manao i ai o ia i lena ituaiga olaga? E foliga mai e leai. Pe ona sa talosagaina o ia e lana tane ina ia alu? E lē masalomia o se tasi lena o mafuaaga, ona sa alofa ma faaaloalo Sara ia Aperaamo ona o ona uiga faaleatua. (Kenese 18:12) Ae o le mafuaaga autū na ō ai o ia ma lana tane ona o lona alofa ia Ieova ma lona naunau mai le loto ina ia mulimuli i taʻitaʻiga mai le Atua. (Kenese 12:1) Na fiafia o ia e usiusitai i le Atua. I le isi itu, na faatalatu le avā a Lota i le faia o le finagalo o le Atua, ma o lea na toe tepa ai ma le moomoo i tua i mea na tuua i lona nuu o Sotoma. (Kenese 19:15, 25, 26; Luka 17:32) Pagā se iuga matautia i lena faaipoipoga—o le pogai o mea uma lava, ona o le lē usiusitai i le Atua!

22. (a) O le ā le iloiloga totino o le a faia ma le atamai e sui o le aiga? (e) O le ā o le a tatou talanoaina i le isi a tatou suesuega o sosoo mai?

²² O lea, i le avea o se tane po o se avā, e tāua ona fesili ifo ia te oe lava, ‘Po o faamuamua ea le Atua i lo ma aiga? Po o oʻu taumafai moni ea e faataunuu le tofiga faaleaiga ua tuuina mai e le Atua ia te au? Po o oʻu faia ea se taumafaiga faamaoni ina ia alofa i laʻu paaga ma fesoasoani ia te ia ina ia maua po o le tausia foi o se faiā lelei ma Ieova?’ I le tele lava o aiga, o loo iai foi tamaiti. O le a tatou talanoaina e sosoo ai le vaega a mātua ma le manaoga mo i laua uma ma le la fanau ina ia faamuamuaina le Atua.

Pe E te Manatua?

◻ Atonu o āuga aogā o aʻoaʻoga a Iesu i le tele o aiga?

◻ O le ā le taui ua mauaina e le faitau afe o Kerisiano ua tutumau ma le mausalī?

◻ O le ā o le a fesoasoani i paaga e alofia ai amioga lē mamā ma talagā faaipoipoga?

◻ O le ā e mafai ona aʻoaʻoina e tane mai le faaaoaoga a Iesu?

◻ E mafai faapefea e avā ona saosaolaumea atu i se faaipoipoga fiafia?

[Ata i le itulau 10]

Na faapefea ona saosaolaumea atu Sara i le manuia o lana faaipoipoga?