Faasaoina Mai se ‘Tupulaga Amioleaga’

“Le tupulaga lē faatuatua ma le faapiopio, ou te i ai ia te outou, ma onosai ia te outou seia afea?”—LUKA 9:41.

1. (a) O le ā ua faaataina mai e o tatou taimi o mala? (e) O ā fa a le Tusi Paia e faatatau i ē e faasaoina?

UA TATOU ola i vaitaimi o mala. O mafuie, lologa, oge, faamaʻi, solitulafono, o pomu, o taua matautia—o nei mea ma le anoanoai o isi mala ua lofia ai tagata i lo tatou senituri lona luasefulu. E ui i lea, o le mala e aupito sili ona matautia i mala uma, o loo faamataʻu mai i le lumanai ua lalata tele mai. O le ā lena mala? O le “puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.” (Mataio 24:21) E ui i lea, o le toatele o i tatou e mafai ona taulai atu le vaai i luma i se lumanai fiafia! Aisea? Auā ua faamatala mai e le Afioga a le Atua lava ia “le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi . . . O i latou ia o e o mai nai le puapuaga tele . . . Latou te le toe fia aai, e le toe fia inu foi . . . e sōloieseina foi e le Atua o loimata uma nai o latou mata.”—Faaaliga 7:1, 9, 14-17.

2. Na uluai faataunuuina muamua faapefea fuaiupu amata o le Mataio 24, Mareko 13, ma le Luka 21?

² O faamaumauga faagaeeina o i le Mataio 24:3-22, Mareko 13:3-20, ma le Luka 21:7-24, ua faatomuaina mai ai faamatalaga faavaloaga a Iesu o ‘le faaiuga o le faiga o mea.’a O lenei valoaga na iai sona uluai faataunuuga i le faiga o mea faapiopio faa-Iutaia o le uluai senituri o o tatou Aso Taatele, na taualugaina i se “puapuaga tele” sa lei faapea ona tupu muamua i tagata Iutaia. O le fausaga aoao faaletapuaiga ma faalemalo o le faiga o mea faa-Iutaia, lea na faauluulu i le malumalu i Ierusalema, na tafiesea, na lei toe fausiaina lava.

3. Aisea ua faanatinati ai i aso nei ona tatou usiusitai i le valoaga a Iesu?

³ Seʻi o tatou talanoaina nei tulaga na faapea ona siosiomia ai le uluai faataunuuina o le valoaga a Iesu. O le a fesoasoani lenei mea ia i tatou e malamalama lelei ai i le faataunuuga tutusa i aso nei. O le a faaalia ai ia i tatou le faanatinati tele o le gaoioi loa ma le mautinoa i le taimi nei ina ia mafai ona faasaoina mai le puapuaga e sili atu ona matautia ua faapea ona faamataʻu mai i tagata uma.—Roma 10:9-13; 15:4; 1 Korinito 10:11; 15:58.

“Le Iuga”—O Afea?

4, 5. (a) Aisea na naunau ai Iutaia o ē na matataʻu i le Atua o le uluai senituri T.A., i le valoaga o i le Tanielu 9:24-27? (e) Na faataunuuina faapefea lena valoaga?

⁴ I le tausaga pe tusa o le 539 T.L.M., na tuuina atu ai i le perofeta a le Atua o Tanielu se faaaliga o mea e tutupu i le faagasologa o le ‘vaiaso’ faaiu o se vaitaimi o ‘vaiaso e fitugafulu’ o tausaga. (Tanielu 9:24-27) Na amataina nei ‘vaiaso’ i le 455 T.L.M. ina ua faatonuina e le tupu o Aretaseta mai Peresia le toe fausiaina o le aai o Ierusalema. Na amataina le ‘vaiaso’ faaiu i le aliaʻi mai o le Mesia, o Iesu Keriso, i lona papatisoga ma le faauuina i le 29 T.A.b O Iutaia o le uluai senituri T.A na matataʻu i le Atua na latou iloaina lelei lenei taimi tāua o le valoaga a Tanielu. Mo se faaaoaoga, e faatatau i le motu o tagata na faapea ona lolofi atu e faalogo i le talaʻiga a Ioane le Papatiso i le 29 T.A., ua faapea mai le Luka 3:15: “[Na] faatalitali le nuu, ma manatunatu uma lava i o latou loto ia Ioane, po o ia o le Keriso.”

⁵ O le ‘vaiaso’ lona fitusefulu sa avea o tausaga e fitu o le agalelei faapitoa na faalauteleina atu i tagata Iutaia. E amata i le 29 T.A., na aofia ai le papatisoga o Iesu ma lana faiva, lona maliu faataulagaina ‘i le vaeluagalemu o le vaiaso’ i le 33 T.A., ma le isi ʻafa o le vaiaso’ e oo atu i le 36 T.A. I le gasologa o lea ‘vaiaso,’ o le avanoa e avea ai ma soo faauuina o Iesu na tatala faapitoa atu lava i Iutaia e matataʻu i le Atua ma Iutaia ua liu lotu. Ona oo ai lea i le 70 T.A., o se aso sa lei faailoaina muamua mai, na faaumatia ai le faiga o mea aposetate faa-Iutaia e autau a Roma i le taʻitaʻiga a Tito.—Tanielu 9:26, 27.

6. Na faapefea ona gaoioi “le mea e inosia” i le 66 T.A., ma na faapefea ona tali atu i ai Kerisiano e tusa ai ma lena mea?

⁶ O lea, o ositaulaga faa-Iutaia na lē taulau ona faapaiaina le malumalu o Ierusalema ma taupulepule e fasiotia le Alo o le Atua, sa faaumatia. Na faatafuna faatasi ai ma faamaumauga faaleatunuu ma ituaiga. Na amata mai ai i lena taimi ona leai se Iutaia e mafai ona toe tāpā ma le tonu ai faaletulafono se aiā e avea ai o se ositaulaga po o se tupu. Ae o se mea e fiafia ai, o Iutaia faauuina faaleagaga ua uma ona vavaeesea o ni tupu ma ositaulaga ina ia “taʻutaʻu atu . . . galuega lelei” a Ieova le Atua. (1 Peteru 2:9) Ina ua vagaia muamua e autau a Roma ia Ierusalema ma eliina le lotoā na tu ai le malumalu i le 66 T.A., na iloa ai e Kerisiano o lena autau faafitafita o “le mea e inosia e faatafunaina aʻi, na fai mai ai e le perofeta o Tanielu, ua tu i le mea paia.” I le usitaia o le poloaiga faavaloaga a Iesu, na sosola ai Kerisiano nai totonu o Ierusalema ma Iutaia i nofoaga maugā mo le puipuiga.—Mataio 24:15, 16; Luka 21:20, 21.

7, 8. O le ā le “faailoga” na mātauina e Kerisiano, ae o le ā na latou lē iloaina?

⁷ Na mataʻituina e na Kerisiano Iutaia faamaoni le faataunuuga o le valoaga a Tanielu ma na vaaitino i taua matautia, o oge, faamaʻi, mafuie, ma le tele o le solitulafono na faapea ona valoia e Iesu o se vaega o le “faailoga . . . i le tau faaiuiuga o le faiga o mea.” (Mataio 24:3, NW) Ae pe na taʻu atu e Iesu ia i latou po o afea moni o le a faaoo atu ai e Ieova le faamasinoga i lena faiga o mea faapiopio? E leai. O le mea na ia valoiaina e faatatau i le tumutumuga o lona faatasi mai tautupu i le lumanai e mautinoa lona faatatauina foi i le “puapuaga tele” o le uluai senituri: “A o lea aso ma lea itu aso e le iloa e se tasi, e le iloa lava e agelu i le lagi, e le iloa foi e le Atalii, ua na o le Tamā lava.”—Mataio 24:36.

⁸ Na ono mafai e Iutaia ona faitauina le taimi o le aliaʻi mai o Iesu e avea o le Mesia mai le valoaga a Tanielu. (Tanielu 9:25) Ae na lei tuuina atu ia i latou se aso o le “puapuaga tele” lea na mulimuli ane ai lava faatafunaina le faiga o mea faa-Iutaia aposetate. Ina ua uma le faatafunaina o Ierusalema ma lona malumalu, ona faatoʻā latou iloa ai lea e faapea, o le 70 T.A., sa avea o lena aso. E ui i lea, na latou matauliaina upu faavaloaga a Iesu e faapea: “E le mavae atu lava lenei tupulaga, seia oo mai nei mea uma.” (Mataio 24:34) E foliga mai, o le faatatauina o le upu “tupulaga” i inei, e ese mai i lea o taʻua i le Failauga 1:4, o loo faapea ona talanoaina ai le faagasologa o augatupulaga o tulai mai ma mavae atu i se vaitaimi.

“Lenei Tupulaga” —O le ā Lena Mea?

9. Ua faamatalaina faapefea e lomifefiloi o le gagana Eleni le upu Eleni o le ge·ne·aʹ?

⁹ Ina ua faalogo aposetolo e toʻa fa sa nonofo faatasi ma Iesu i le Mauga o Olive i lena valoaga e faatatau i “le faaiuiuga o le faiga o mea,” na faapefea ona latou malamalama i le faaupuga o “lenei tupulaga”? O le upu “tupulaga” i Evagelia, ua faaliliuina mai le upu Eleni o le ge·ne·aʹ, ua faamatalaina e lomifefiloi fou i le gagana Eleni i faaupuga nei: “O le uiga [moni lava], o i latou e tupuga [mai] se tuaa e tasi.” (Walter Bauer’s Greek-English Lexicon of the New Testament) “Ua fanauina mai, o se aiga; . . . o sui o le faasologa o se gafa . . . po o se ituaiga o tagata . . . po o se aofaiga atoa o tagata e toatele o ola i le vaitaimi e tasi, Mata. 24:34; Mare. 13:30; Luka 1:48; 21:32; Fili. 2:15, ma e faapitoa lava ia i latou o le ituaiga o Iutaia na ola i le vaitaimi lava e tasi.” (W. E. Vine’s Expository Dictionary of New Testament Words) “O ē ua fanauina mai, o tagata o le ituaiga e tasi, o se aiga; . . . o le aofaiga atoa o tagata o ola i le vaitaimi e tasi: Mata. xxiv. 34; Mare. xiii. 30; Lu. i. 48 . . . na faaaogā [faapitoa] i le ituaiga o Iutaia o loo ola i le vaitaimi lava lea e tasi.”—J. H. Thayer’s Greek-English Lexicon of the New Testament.

10. (a) O le ā le faauigaga tutusa ua aumaia e nisi tagata atamamai se toalua i le siiina mai o le Mataio 24:34? (e) Ua lagolagoina faapefea e se lomifefiloi o le Tusi Paia ma isi faaliliuga o le Tusi Paia lenei faauigaga?

¹⁰ O lea ua sii mai ai e Vine ma Thayer le Mataio 24:34 i le faamatalaina o “lenei tupulaga” (he ge·ne·aʹ hauʹte) “o le aofaiga uma o tagata o ola i le vaitaimi lava lea e tasi.” Ua lagolagoina e le Theological Dictionary of the New Testament (1964) lenei uiga i le faapea mai: “O le faaaogaina o le ‘tupulaga’ e Iesu, ua ia faamatala mai ai lana fuafuaga auiliili: na ia taulai atu i tagata i se tulaga aufaatasi, ma ua mātauina lo latou faatasia i le agasala.” E moni o le “faatasia i le agasala” na aliali manino mai i le nuu o Iutaia a o iai Iesu i le lalolagi, e pei lava ona faailogaina ai le faiga o mea a le lalolagi i aso nei.c

11. (a) O le ā le pule e ao ona faavaeina aʻe ai le taʻitaʻiina o i tatou ina ia iloa pe faapefea ona faatatauina le he ge·ne·aʹ hauʹte? (e) Na faapefea ona faaaogaina e lenei pule le faaupuga?

¹¹ O le mea moni, o Kerisiano o suesueina lenei mataupu e taʻitaʻia o latou manatu e faavae autū lava i le auala na faaaogā ai e tusitala faagaeeina o Evagelia le faaupuga faa-Eleni o le he ge·ne·aʹ hauʹte, po o “lenei tupulaga,” i le lipotia mai o fetalaiga a Iesu. Na faaaogaina e lē aunoa lea faaupuga i se auala faalelelei. O lea, na taʻua ai e Iesu taʻitaʻi lotu Iutaia “o gata, . . . o fanau a gata feai,” ma faaauau ona fetalai atu e faapea, o le a faaoo atu le faasalaga o Kena i “lenei tupulaga.” (Mataio 23:33, 36) E ui i lea, pe na faagata mai lea faasalaga i taʻitaʻi lotu faatagafai? E leai. I nisi taimi, na faalogo ai soo o Iesu o ia fetalai atu i “lenei tupulaga,” i se uiga tutusa faapea, ae e i se auala e sili atu ona faalauitele. O le ā sa uiga i ai?

‘Lenei Tupulaga Amioleaga’

12. A o faalogo atu ona soo, na faapefea ona faafesootai atu e Iesu “le motu o tagata” ma “lenei tupulaga?”

¹² I le 31 T.A., i le vaitaimi o le faiva tele a Iesu i Kalilaia ma ina ua faatoʻā uma lava le Paseka, na faalogo atu ai ona soo o ia fetalai atu i “le motu o tagata” e faapea: “Ou te faatusaina i ni a lenei tupulaga? E tusa ia ma tamaiti ua nonofo i malae, ma valaau atu i a latou aumea, ua faapea atu, Ua matou faaili atu ia te outou, a e tou te lei saasaa mai; ua matou tagi aue ia te outou, a e tou te lei taufaitagituʻi mai. Auā na sau Ioane [le Papatiso], e lei ʻai, e lei inu foi ia; ona latou fai ane ai lea, Ua ia te ia le temoni. Ua sau foi le Atalii o le tagata [o Iesu], ua ʻai o ia ma inu; ona latou fai ane ai lea, Faauta, o le tagata ʻai tele ma le inu uaina, o le uo a tagata ao lafoga ma ē agasala.” Sa leai se fiafia i lena “motu o tagata” lē taupulea!—Mataio 11:7, 16-19.

13. A o iai ma ona soo, o ai na faailoaina ma taʻusalaina e Iesu o ‘lenei tupulaga amioleaga’?

¹³ Mulimuli ane, i le 31 T.A., a o faimalaga atu Iesu ma ona soo i la latou malaga lona lua e ō e talaʻi i Kalilaia, na fesili atu ai “isi o le au tusiupu ma le au faresaio” ia Iesu mo se faailoga. Na ia fetalai atu ia i latou ma “le motu o tagata” na iai ma i latou e faapea: “O le tupulaga leaga ma le mulilulua ua latou sailia mai se faailoga; a e leai se faailoga e avatua i ai, ua na o le faailoga o Iona le perofeta. Auā e pei o Iona sa i le manava o le iʻa tele i ao e tolu ma po e tolu, e faapea foi ona i ai o le Atalii o le tagata i lalo i le eleele i ao e tolu ma po e tolu. . . . E faapea foi ona fai i lenei tupulaga leaga.” (Mataio 12:38-46) E manino lava, o ‘lenei tupulaga amioleaga,’ na aofia ai taʻitaʻi lotu ma “le motu o tagata,” o ē sa lē taitai ona malamalama i le faailoga lea na faataunuu i le maliu ma le toetu o Iesu.d

14. O le ā le taʻusalaina o le au Satukaio ma le au Faresaio na faalogo le au soo o faia e Iesu?

¹⁴ Ina ua mavae le Paseka i le 32 T.A., a o maliu atu Iesu ma ona soo i Makatala, o se oganuu i Kalilaia, ona toe fesili atu lea o le au Satukaio ma le au Faresaio ia Iesu mo se faailoga. Na ia toe fetalai atu foi ia i latou: “O le tupulaga leaga ma le mulilulua ua saili mai se faailoga; a e leai se faailoga e avatu i ai, ua na o le faailoga o Iona le perofeta.” (Mataio 16:1-4) O na taʻitaʻi lotu faatagafai, o i latou ia sa sili atu ona mataʻuleagaina o ni taʻitaʻi mai “le motu o tagata” lē faatuatua lea na taʻusalaina e Iesu o ‘lenei tupulaga amioleaga.’

15. A o toeitiiti oo i le liliuga ma ina ua faatoʻā uma foi le liliuga, o le ā le fetaiaiga na faia e Iesu ma ona soo ma ‘lenei tupulaga’?

¹⁵ I le faaiuiuga o lana faiva i Kalilaia, na faapotopoto mai ai e Iesu le motu o tagata ma ona soo ma fetalai atu e faapea: “Auā ai sē mā ia te au, ma aʻu upu i lenei tupulaga mulilulua ma le agasala, e mā foi le Atalii o le tagata ia te ia.” (Mareko 8:34, 38) O lea, o le anoanoai o Iutaia lē salamō i lena vaitaimi, ua manino lava na faia aʻe ai “lenei tupulaga mulilulua ma le agasala.” I ni nai aso mulimuli ane ai, ina ua uma le liliuina o Iesu, a o malaga atu o ia ma ona soo, na “oo atu [ai] i le motu o tagata,” ma sa talosaga atu ai se tamaloa ia te ia ina ia faamālōlō i lona atalii. Na fetalai atu Iesu: “Le tupulaga le faatuatua ma le faapiopio, ou te i ai ia te outou seia afea? Ou te faapalepale ia te outou seia afea?”—Mataio 17:14-17; Luka 9:37-41.

16. (a) O le ā le taʻusalaina o “le motu o tagata” na toe taʻua e Iesu i Iutaia? (e) Na faapefea ona faia e “lenei tupulaga” le solitulafono e sili atu ona amio leaga o solitulafono uma lava?

¹⁶ Ina ua uma le Tausamiga o Fale Apitaga i le 32 T.A. i Iutaia, ina ua “lolofi mai le motu o tagata” ia Iesu, o i inā atonu na toe taʻua ai e Iesu lona taʻusalaina o i latou i le fetalai atu: “O le tupulaga leaga lenei, ua saili mai se faailoga, a e le avatu i ai se faailoga, tau lava o le faailoga o Iona le perofeta.” (Luka 11:29) Mulimuli ane ai lava, ina ua avatu e taʻitaʻi lotu Iesu e faamasinoina, na ofo atu ai Pilato e faasaoloto ia te ia. Ua faapea mai faamaumauga tusia: “A ua faaoso e le au ositaulaga sili ma toeaina i le motu o tagata ia latou fai atu, o Parapa, a ia fasiotia Iesu. . . . Ona fai atu ai lea o Pilato ia te i latou, ‘Se a foi le mea ou te faia ia Iesu o le ua igoa ia Keriso?’ Ona fai mai ai lea o i latou uma ia te ia, ‘Ia faasatauroina ia.’ A ua fai atu le alii, ‘Pe se a foi se leaga ua ia faia?’ A ua atili ai ona alalaga i latou, ua faapea mai, ‘Ia faasatauroina ia.’” O lena ‘tupulaga amioleaga’ sa latou faatonuina malosi le fasiotia o Iesu!—Mataio 27:20-25.

17. Na faapefea i nisi o “lenei tupulaga faapiopio” ona tali atu i le talaʻiga a Peteru i le Penetekoso?

¹⁷ O se “tupulaga le faatuatua ma le piopio,” na uunaia e ona taʻitaʻi lotu, na faapea ai ona faia se vaega autū i le faaooina atu o le maliu i le Alii o Iesu Keriso. E limasefulu aso mulimuli ane ai, i le Penetekoso i le 33 T.A., na mauaina ai e aposetolo le agaga paia ma na amata ai ona tautatala i gagana eseese. Ina ua lagona le taalili o le leo, “ona faapotopoto mai ai lea o le motu o tagata,” ona lauga atu lea o Peteru ia i latou: “O outou Iutaia e, atoa foi ma e ua nonofo i Ierusalema uma lava, . . . o ia [o Iesu lea] ua . . . outou faamau i le laau ma fasioti i lima o tagata faaletaupulea.” Na tali atu i ai faapefea nisi na faalogo i ai? Na “tuia . . . o latou loto.” Ona augani atu ai lea o Peteru ia i latou ina ia salamō. Na ia “molitino atu ma apoapoai atu ai ua faapea atu, ‘Ia faaolaina outou ai lenei tupulaga faapiopio.’” I le tali atu i ai, “ona papatisoina lea o e na talia lana upu ma le fiafia,” pe tusa ma le tolu afe o tagata.—Galuega 2:6, 14, 23, 37, 40, 41.

Faailoaina o “Lenei Tupulaga”

18. O le faaaogaina e Iesu o le faaupuga o “lenei tupulaga,” e faatatau atu e lē aunoa i le ā?

¹⁸ O le ā la le “tupulaga” lea na taʻua soo e Iesu a o iai lona au soo? O le ā le malamalamaga na ia i latou e faatatau i ana fetalaiga: “E le mavae atu lava lenei tupulaga, seia oo mai nei mea uma”? E mautinoa lava, sa lei suia e Iesu le uiga faavae o le faaupuga o “lenei tupulaga,” lea na ia faatatauina atu e lē aunoa i le vao o tagata faapiopio na iai i lena vaitaimi faatasi ai ma o latou “taʻitaʻi . . . tauaso,” o i latou uma na, na faia aʻe ai le nuu o Iutaia. (Mataio 15:14) Na oo i “lenei tupulaga” puapuaga uma na valoia e Iesu, ma na mavae i se “puapuaga tele” sa lei faapea ona oo muamua i Ierusalema.—Mataio 24:21, 34.

19. O anafea ma na faapefea foi ona mavae atu le “lagi ma le lalolagi” o le faiga o mea faa-Iutaia?

¹⁹ I le uluai senituri, na faamasinoina ai e Ieova ia tagata Iutaia. O ē na salamō, o i latou na faaalia le faatuatua i sauniuniga alofa mutimuti vale a Ieova e ala ia Keriso, na faasaoina mai i lena “puapuaga tele.” E pei ona sa uluai fetalaia e Iesu, na taunuu mea uma na valoiaina, ona mavae atu ai lea o le “lagi ma le lalolagi,”—le faiga aoao o mea faa-Iutaia—le atunuu atoa, faatasi ai ma ona taʻitaʻi lotu ma le sosaiete o tagata amioleaga. Na faaoo atu i ai e Ieova le faasalaga!—Mataio 24:35; faatusatusa i le 2 Peteru 3:7.

20. O le ā le fautuaga faanatinati ua fetaui lelei mo Kerisiano uma lava i lenei taimi?

²⁰ O Iutaia na usiusitai i fetalaiga faavaloaga a Iesu na iloaina e faapea o lo latou faasaoina, na lē faalagolago i le taumafai e fuafua po o le ā le umi o se “tupulaga,” po o “ona po ma ona tausaga” tonu, ae e ala i le faaauau pea ona vavae ese mai le tupulaga leaga i o latou vaitaimi ma maelega i le faia o le finagalo o le Atua. E ui o upu mulimuli o le valoaga a Iesu e faatatau i le faataunuuina sili i o tatou aso, ae na manaomia foi ona usitaia e Kerisiano Iutaia o le uluai senituri le fautuaga: “O lea ia outou mataala e le aunoa ma tatalo ina ia outou maua le malosi e sao mai ia mea uma ua tāli oo mai, ma ia tutū i luma o le Atalii o le tagata.”—Luka 21:32-36; Galuega 1:6-8.

21. O le ā le mea o le a tupu faafuasei e mafai ona tatou faatalitalia ua lalata tele mai i le lumanai?

²¹ I aso nei, “o loo latalata mai le aso tele o Ieova, . . . o loo matuā tele vave mai lava.” (Sefanaia 1:14-18; Isaia 13:9, 13) E faafuasei lava, i le taimi atofaina a Ieova lava ia o “lea aso ma lea itu aso,” o le a tatala mai ai lona toasa i luga o lotu, o faiga faapolotiki, ma faiga tau fefaatauaiga a le lalolagi, faatasi ai ma tagata faapiopio o ē o iai i lenei vaitaimi o faia aʻe ai lenei “tupulaga leaga ma le mulilulua.” (Mataio 12:39; 24:36; Faaaliga 7:1-3, 9, 14) E mafai faapefea ona faasaoina oe mai le “puapuaga tele”? O le a taliina e la tatou mataupu o sosoo mai ma faamatala mai ai le faamoemoe sili mo le lumanai.

[Faaopoopoga i lalo]

O le a Faapefea ona E Taliina?

◻ O le ā ua tatou aʻoaʻoina mai i le faataunuuina o le Tanielu 9:24-27?

◻ Ua faauigaina faapefea e lomifefiloi fou o le gagana Eleni le faaupuga o “lenei tupulaga” e pei ona faaaogā ai e le Tusi Paia?

◻ Na faaaogaina e lē aunoa faapefea e Iesu le faaupuga “tupulaga”?

◻ Na faataunuuina faapefea le Mataio 24:34, 35 i le uluai senituri?

[Ata i le itulau 12]

Na faatusatusa atu e Iesu “lenei tupulaga” i ni potopotoga a tamaiti e lē mafai ona pulea

[Ata i le itulau 15]

E na o Ieova lava sa ona muai silafia le itula mo le faaooina mai o le faasalaga i le faiga amioleaga o mea faa-Iutaia