“Ua Lafotuina i Lalo, a e le Fano”

E PEI ONA FAAMATALAINA E ULF HELGESSON

Ia Iulai 1983, na fai mai ma le ofo tele ia fomai na tilotilo ifo ia te au: “Ua ala o ia!” Na faatoʻā uma ona aveesea se tuma (tumor) e fa ma le tolu kuata inisi le umī mai loʻu maea ario i se taotoga faigata e 15 itula le umi na faia ai. Na iu ai ina pe atoa loʻu tino ua lē mafai ona toe gaoioi.

E LEI umi ni nai aso mulimuli ane ai, ae siitia loa aʻu i se falemaʻi e toeitiiti 40 maila [60 kilomita], mai le mea ou te nofo ai o Hälsingborg, i le itu i saute o Suetena. O i inā na ou auai atu ai i se polokalama o toleniga e toe faafoi ai le tagata i le malosi na iai muamua. Na fai mai le fomaʻi na faia lea toleniga o le a tele ni taumafaiga e matuā manaomia ai, ae na ou naunau tele seʻi amata ia. Sa ou manao moni lava ou te toe fia savali. I le tausisi atu pea la ma le naunautai i se polokalama e lima itula i le aso o le toleniga, sa vave ai ona ou faia ni faaleleiga.

I le masina na sosoo ai, na asiasia ai la matou faapotopotoga e le ovasia faimalaga, na ō mai ai i se malaga umi o ia ma isi toeaina Kerisiano, e faia le fonotaga a toeaina o le faapotopotoga i loʻu potu i le falemaʻi. E maeu le olioli o loʻu loto i lenei faailoaga o le alofa faaleuso! Na saunia e teine tausimaʻi i le itu o le falemaʻi na ou taoto ai, ia ipu ti ma sanuisi ma i matou uma ina ua uma le fonotaga.

I le taimi muamua, na ofo ai fomaʻi i le faaleleiga o loʻu malosi. Ina ua mavae le tolu masina sa mafai loa ona ou nofo i luga i loʻu nofoa toso ma mafai foi ona tu mo sina taimi. Sa ou fiafia ma matuā maumauai ina ia ou toe mafai ona savali. Na aumaia e loʻu aiga ma uso Kerisiano le tele o faalaeiauga i taimi o a latou asiasiga. Sa mafai foi ona ou alu i lo matou aiga mo ni vaitaimi pupuu.

Se Matuā Toe Solo i Tua

E ui i lea, ina ua mavae lena, sa ou lē toe mafaia loa ona faia nisi faaleleiga atili. E lei leva ae taʻu mai e le fomaʻi e faia toleniga ia te au se feau matuā tiga lava e faapea: “O le a e lē toe oo atu i se isi tulaga sili atu ona lelei nai lo lea ua e iai nei!” Sa avea loa ma sini i le taimi lea le faamalosi mai ia te au ina ia ou mafaia lava ona ou alu aʻu i se nofoa toso. Na ou taumānatu, po o le ā le tulaga o le a oo ia te au. Pe o le a faapefea ona faafoeina ma le manuia e laʻu avā le nofo ai na o ia? Na feagai foi o ia ma se taotoga tele lava ma na ia manaomia ai laʻu fesoasoani. Pe o le a manaomia ona tausiaina aʻu i se fale tausi maʻi faapitoa?

Sa ou matuā loto vaivai lava. Na mou malie ese atu loʻu malosi, loʻu lototele ma loʻu mafaia ona faia o mea. Na mavae atu aso, ma sa tumau pea ona ou lē toe gaoioi. Sa lē gata ina ou lē toe gaoioi faaletino, ae sa ou matuā lē iloa lava fai se mea tau i faalogona ma le itu faaleagaga. Sa “lafotuina [aʻu] i lalo.” Sa masani ona ou manatu lava aʻu ia te au, ou te malosi faaleagaga. Sa matuā mauaa loʻu faatuatua i le Malo o le Atua. (Tanielu 2:44; Mataio 6:10) Sa ou matuā mautinoaina le folafolaga a le Tusi Paia e faapea o faamaʻi uma ma lē atoatoa o le tino ma le mafaufau o le a faamālōlōina i le lalolagi fou amiotonu a le Atua ma o le a toe faafoisia ai tagata uma i le olaga lelei atoatoa i inā. (Isaia 25:8; 33:24; 2 Peteru 3:13) Ae o lea ua lē gata ina ou lagonaina le pe atoa i le itu faaletino ae faapena foi ma le itu faaleagaga. Sa ou lagona le ‘faafanoina.’—2 Korinito 4:9.

A o lei faaauaua atu atili laʻu tala, seʻi oʻu taʻu atu ia te outou sina tala e uiga i loʻu talaaga mai.

Se Aiga Fiafia

Sa ou fanau i le 1934, ma sa ou matuā malosi lava i taimi uma. I le amataga lava o tausaga o le 1950, na ou fetaui ai ia Ingrid, ma sa ma faaipoipo i le 1958 ma faamautu ai lo ma aiga i le taulaga o Östersund, i Suetena tutotonu. O se suiga tele i o ma olaga na oo mai i le tausaga e 1963 ina ua amata ona ma suesueina le Tusi Paia faatasi ma Molimau a Ieova. I le taimi lena ua iai la ma fanau laiti e toatolu—o Ewa, Björn, ma Lena. E lei leva ae suesue faatasi uma lo matou aiga atoa ma agaigai lelei i luma i le poto o upu moni o le Tusi Paia.

E lei leva talu ona amataina la matou suesuega, ae matou siitia atu i Hälsingborg. O i inā, na ma tuuina atu ai i maʻua ma laʻu avā e auauna ia Ieova ma papatisoina ai i maʻua i le 1964. Na faateleina lo ma fiafia ina ua papatisoina la ma tama teine matua o Ewa, i le 1968. I le fitu tausaga mulimuli ane, i le 1975, na papatisoina ai foi Björn ma Lena, ma i le tausaga na sosoo ai na tofia ai aʻu o se toeaina i le faapotopotoga Kerisiano.

Na fesoasoani laʻu galuega faaletino ia te au i le tausiaina lelei o manaoga faaletino o loʻu aiga. Ma na faatuputeleina lo ma fiafia ina ua auauna i le faiva faataimi atoa ia Björn ma Lena. Sa lei leva ae valaaulia mai Björn e auauna i le ofisa o le lālā a Molimau a Ieova i Arboga. Sa matuā solosolo lelei mea uma o le olaga ia i matou. Ae, i le amataga lava o le 1980, na amata ai ona ou lagonaina aafiaga totino o le tuma, lea na mulimuli ane ai lava aveesea i le taotoga tele lena sa faia i le 1983.

Foia le Lē Toe Gaoioi Faaleagaga

Ina ua taʻu mai o le a ou lē toe mafai ona savali, na foliga mai ua leai se faamoemoe o le olaga ia te au. Na faapefea la ona ou toe faafoisia loʻu malosi faaleagaga? Sa faigofie tele nai lo le mea na ou manatu i ai. Sa na ona ou tago atu lava i laʻu Tusi Paia ma amata loa ona faitau. O le tele o loʻu faitau atu i ai, o le tele foi lea o le malosi faaleagaga na ou maua mai ai. Na pito sili ona ou fiafia i le Lauga a Iesu i luga o le Mauga. Na ou faitau ma toe faitau ma mafaufau loloto i ai.

Sa toe faafoisiaina mai laʻu vaaiga fiafia i le olaga. E ala i le faitau ma mafaufau loloto i ai, na amata ai ona ou vaavaai atu i mea e mafai ona ou faia nai lo faafitauli. Na toe iai loʻu naunau e tufa atu upu moni o le Tusi Paia i isi, ma ou faamalieina lea faanaunauga i le molimau atu i le aufaigaluega a le falemaʻi ma isi na ou feiloai i ai. Na lagolagoina atoatoa aʻu e loʻu aiga ma aʻoaʻoina i latou i le auala e tausiaina ai aʻu. Mulimuli ane, sa ou mafai loa ona tuua le falemaʻi.

O lea la ua ave loa aʻu i le fale. E maeu le fiafia o lena aso mo i matou uma lava! Sa faia e loʻu aiga se faasologa ua faaaofia ai ma le tausiaina o aʻu. Na filifili loʻu atalii o Björn e tuua le galuega i le ofisa o le lālā o Molimau a Ieova, ma foi mai i le aiga e fesoasoani i le tausiaina o aʻu. Sa avea o se faamafanafanaga sili le avea ma taulaʻiga o ia mau alofaaga ma le manatunatu loloto mai i loʻu aiga.

Faafetaiaia o le Isi Toe Solo i Tua

Ae peitai, a o mavae atu taimi, na toe faaleagaina ai loʻu malosi, ma sa faigata mo aʻu ona ou migoi. Mulimuli ane ai e ui i taumafaiga vilivilitai a loʻu aiga, ae sa lē mafai ona latou toe tausia aʻu i le fale. O lea na ou mafaufau ai e sili atu ona lelei pe a aveina atu aʻu i le nofoaga e tausi ai tagata mamaʻi. O lona uiga la, o nisi foi suiga ma se faasologa fou o mea e fai. Ae sa ou lei faatagaina lenei mea ou te toe solo atili ai i tua faaleagaga.

Sa lei taitai ona ou tuua laʻu faitauga Tusi Paia ma suesuega. Sa ou manatunatu pea i mea e mafai ona ou faia ae lē o mea e lē mafai ona ou faia. Sa ou mafaufau loloto i faamanuiaga faaleagaga o loo iai i Molimau a Ieova uma lava. Na ou pipii mau atu pea ia Ieova i le tatalo ma faaaogā avanoa uma e talaʻi atu ai i isi.

I le taimi nei la ou te nofo ai i po ma vaega o aso i le nofoaga e tausi ai tagata mamaʻi. O aoauli ma afiafi, ou te alu ai a lē i loʻu aiga, po o i a matou sauniga faa-Kerisiano. Ua faatulagaina e le nofoaga tausi maʻi se taumafaiga mo le feaveaiga e lē aunoa o aʻu i sauniga ma toe aumaia ma faapena foi i le aveina i loʻu aiga ma toe aumaia. E tausia lelei aʻu e loʻu aiga alolofa, o uso i le faapotopotoga, ma tagata galulue i le nofoaga tausi maʻi, i se auala matuā uigaese.

Faia le Mea Ou te Mafaia

Ou te lē manatu ia te au lava o se tagata ua maʻi, ma e lē vaai faapena foi loʻu aiga ia te au, po o oʻu uso Kerisiano. E tausia aʻu ma le alofa, e faamalosia ai aʻu e faaauau ona auauna i se auala uigā o se toeaina. Ou te faia se Suesuega Tautusi a le Faapotopotoga i vaiaso taitasi, faapena foi ma le suesuega o Le Olomatamata faalevaiaso a le faapotopotoga i le Maota o le Malo. E faigata mo aʻu ona suʻe le Tusi Paia, ma e tofia ai se tasi e fesoasoani mai ia te au e faia le mea lena i sauniga. Ou te faia sauniga ma avatua lauga mai loʻu nofoa toso.

O lea tulaga, o loo mafai ai pea ona ou faia mea e tele sa ou olioli ai e faia i le taimi muamua, e aofia ai le faia o asiasiga faaleoleo mamoe. (1 Peteru 5:2) Ou te faia lea pe a ō mai ia te au uso ma tuafāfine mo se fesoasoani po o se fautuaga foi. Ou te faaaogaina foi le telefoni, ma tausolomua i le vili atu ma talanoa i isi. O faalaeiauga e iu i ai e lē gata mo i latou ae faapea foi ma aʻu. (Roma 1:11, 12) Na fai mai talu ai nei se uo e faapea: “O le taimi lava lea na ou lagonaina ai le loto vaivai, ae e telefoni mai loa e faamalosiau mai ia te au.” Peitai, e faamalosiauina ai foi aʻu, i le iloaina o loo faamanuiaina e Ieova aʻu taumafaiga.

I taimi a o lei amataina sauniga ma taimi e uma ai, ou te maua ai ni aufaatasiga lelei ma tamaiti i le faapotopotoga. Talu ai ona o lea ou te nofo i loʻu nofoa toso, e tutusa ai lo matou maualuluga a o matou fetalanoaai. Ou te fiafia tele i lo latou tāutala faamaoni ma le tuusaʻo. Na faapea mai se isi tama itiiti ia te au: “O oe o se tagata maʻi aulelei tele!”

O loʻu taulai atu i mea e mafai ona ou faia nai lo le popole i mea e lē mafai ona ou faia, ua ou olioli ai e auauna ia Ieova. Ua ou aʻoaʻoina le tele o mea mai le tulaga ua ou oo i ai. Ua ou matuā iloaina e faapea e toleniina ma faamalosia ai i tatou i faafitauli tatou te oo i ai.—1 Peteru 5:10.

O le toatele o tagata malolosi, ua ou mātauina, ua lē taulau ona latou talisapaia le tatau ona tatou matuā manatu mamafa i le tapuaiga a lo tatou Tamā faalelagi. Afai tatou te lē faia faapea, o a tatou faasologa la o suesuega, sauniga, ma le faiva i le fanua o le a avea e na o se masani. Ou te manatu i nei faatulagaga e manaomia tele ina ia faasaoina atu ai i le iuga o lenei lalolagi, agaʻi atu i totonu o le Parataiso faalelalolagi ua folafolaina mai e le Atua.—Salamo 37:9-11, 29; 1 Ioane 2:17.

E tatau pea ona tatou faatumauina i o tatou loto le faamoemoe o le ola i le lalolagi fou o loo fotuai mai a le Atua. (1 Tesalonia 5:8) Ua ou aʻoaʻoina mai ai foi le lē tatau ona faavaivai i le taua faasaga i so o se itu lava e ono faavaivaia ai. Ua ou aʻoaʻoina le vaai atu ia Ieova e pei o soʻu Tamā ma lana faalapotopotoga e pei o soʻu Tinā. Ua ou malamalama foi afai tatou te taumafai malosi, e mafai e Ieova ona faaaogā so o se tasi o i tatou e avea ma ana auauna aogā.

E ui lava la i le tele o taimi na ou lagonaina ai, “ua lafotuina aʻu i lalo,” ae ou te ‘lei fano.’ E lei tuulafoaiina lava aʻu e Ieova ma lana faalapotopotoga, po o loʻu aiga foi ma oʻu uso Kerisiano. E faafetaia le fesoasoani a loʻu tago atu i le Tusi Paia ma amata faitauina, ua toe faafoisia ai loʻu malosi faaleagaga. Ou te faafetai tele ai ia Ieova le Atua, o lē foai mai “le matuā tele o le mana” i le taimi tatou te faatuatua ai ia te ia.—2 Korinito 4:7.

Ua ou vaavaai atu nei ma le naunautai i le lumanai, faatasi ma le mautinoa ma le faatuatua atoatoa ia Ieova. Ua ou lototele o le a lē toe mamao ae faataunuuina e Ieova le Atua lana folafolaga e uiga i se parataiso toe faafoisiaina iinei i luga o le lalolagi faatasi ai ma faamanuiaga ofoofogia uma lava o le a aumaia ai.—Faaaliga 21:3, 4.