Le Fanau a le Gata—Ua Faapefea Ona Faaalialia?

“Ou te faatupuina le feitagai ia te oulua ma le fafine, o lau fanau foi ma lana fanau.”—KENESE 3:15.

1. (a) Aisea ua avea ai Ieova o le Atua fiafia? (e) O le ā ua ia faia ina ia mafai ai ona tatou auai i lona olioli?

O IEOVA o le Atua e fiafia ona o mafuaaga tatau. O ia o Lē silisili ma le matuā taʻua i le Foai maia o mea e lelei, ma e leai se mea e mafai ona taofiaina le faataunuuga o ana fuafuaga. (Isaia 55:10, 11; 1 Timoteo 1:11; Iakopo 1:17) E finagalo o ia ina ia auai faatasi ana auauna i lona olioli, ma ua ia saunia ai mafuaaga tatau mo lo latou faia faapea. O lea, i se tasi o taimi e matuā sili ona leaga i talafaasolopito o le tagata—le fouvalega i Etena—na ia saunia ai le faavae mo i tatou ina ia tulimatai atu ai se faamoemoe i le lumanai.—Roma 8:19-21.

2. Ina ua fofogaina atu le faasalaga i le ʻau fouvale i Etena, sa faapefea ona saunia ai e Ieova se faavae mo se faamoemoe mo ē o le a tupuga mai ia Atamu ma Eva?

² Ona o le tetee ma le taufaaleaga o se tasi o atalii agaga o Ieova ia te ia, na ia faia ai lava o ia ma Satani le Tiapolo. O uluai tagata foi o Eva faapea ai ma Atamu, na lolo atu i laua i taaʻiga a lenei atalii agaga ma la solia ai le tulafono a Ieova sa manino ona folasia atu. Ua talafeagai ai la le faasalaina o i laua i le oti. (Kenese 3:1-24) Peitai, ina ua fofogaina atu le faasalaga i lenei ʻau fouvale, sa saunia e Ieova se faavae mo se faamoemoe mo ē o le a tupuga mai ia Atamu ma Eva. I le ā le itu? E pei ona tusia i le Kenese 3:15, na fetalai Ieova: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” O lena valoaga o le ki lea e malamalama ai i le Tusi Paia atoa faapea ma mea sa tutupu i taimi ua tuanai ma o loo tutupu foi i le taimi nei, o loo aofia ai ē o i le lalolagi ae faapea foi i auauna a Ieova.

Le Uiga o le Valoaga

3. E pei ona faasino i ai i le Kenese 3:15, ia faailoa mai (a) le Gata, (e) “le fafine,” (i) le “fanau” a le Gata, (o) le “fanau” a le fafine.

³ Ina ia talisapaia lona faauigaina, seʻi iloiloina vaega eseese o le valoaga lava ia. O lē ua fai atu i ai upu i le Kenese 3:15 o le Gata lea—e lē o se gata masani ae o lē na faaaogaina le gata e tautala atu ai. (Faaaliga 12:9) O “le fafine” e lē o Eva ae o le faalapotopotoga faalelagi a Ieova, le tinā o ana auauna o i le lalolagi o ē ua faauuina e lona agaga. (Kalatia 4:26) O le “fanau” a le Gata, o le fanau lea a Satani, o ē tupuga mai ia te ia—o temoni ma tagata faapea ma faalapotopotoga a tagata o loo latou faaalia mai uiga o Satani ma ua faaalia ai lo latou ʻinoʻino i le “fanau” a le fafine. (Ioane 15:19; 17:15) O le “fanau” a le fafine ua faaautū ia Iesu Keriso, o lē na faauuina i le agaga paia i le 29 T.A. O le 144,000, o ē ua “toe fanau . . . i le vai ma le Agaga” ma o i latou o suli o le Malo faalelagi faatasi ma Keriso, o le vaega lona lua lea o lena fanau o le folafolaga. Na amata ona faaopoopo atu i latou nei i le fanau a le fafine mai le Penetekoso 33 T.A. ma faasolo mai ai.—Ioane 3:3, 5; Kalatia 3:16, 29.

4. Ua faapefea ona fesootai atu le Kenese 3:15 i le avea o le lalolagi ma parataiso, e faatumulia i tagata ua saʻoloto mai le agasala ma le oti?

⁴ O le gata moni lea sa i Etena na faaaogā e fai ma auala e tautala mai ai lē e ana le mailei ua iu i le leiloa ai o le Parataiso mai tagata. Ua faasino atu le Kenese 3:15 i le taimi o le a matuā tuʻimomomoina ai lē na faatonutonuina lena gata. Ona toe maua ai lea o le avanoa mo tagata o loo auauna i le Atua ina ia latou ʻaināina le Parataiso, i le saʻoloto mai le agasala ma le oti. Maeu se taimi olioli o le a iai!—Faaaliga 20:1-3; 21:1-5.

5. O ā uiga ua mātaulia ai le fanau faaleagaga a le Tiapolo?

⁵ Ina ua mavae atu le fouvalega i Etena, na amata loa ona aliaʻi mai tagata ma faalapotopotoga o loo faaalialia uiga e pei o uiga o Satani le Tiapolo—le fouvale, le pepelo, le taufaaleaga, le fasioti tagata, faatasi ai ma le tetee atu i le finagalo o Ieova ma i latou o loo tapuai ia Ieova. O na uiga ua mātaulia ai ē na tupuga mai, le fanau faaleagaga a le Tiapolo. E aofia ai ia i latou nei Kaino, o lē na fasiotia Apelu ina ua talia e Ieova le tapuaiga a Apelu nai lo Kaino. (1 Ioane 3:10-12) O Nimarota o lē ua taʻu mai lava i le uiga o lona igoa le avea o ia o sē fouvale ma na avea ma se tagata malosi i le tutulimanu ma o se pule na tetee ia Ieova. (Kenese 10:9) E lē gata i lea, sa iai se faasologa mai o malo anamua, e aofia ai Papelonia, faatasi ai ma a latou lotu sa lagolagoina e le malo na faavaeina aʻe i mea pepelo, ma sa matuā faatiga foi nei malo i tagata tapuai a Ieova.—Ieremia 50:29.

“Le Feitagai ia te Oulua ma le Fafine”

6. O ā auala ua faaalia ai e Satani le ʻinoʻino i le fafine a Ieova?

⁶ I nei lava taimi uma, ua iai pea le feitagai i le va o le Gata ma le fafine a Ieova, i le va o Satani le Tiapolo ma le faalapotopotoga faalelagi a Ieova o ana foafoaga agaga faamaoni. Sa faaalia le matuā ita o Satani a o ia fāifai atu ia Ieova ma saili e faaleaga le faalapotopotoga faalelagi a Ieova, i lona faatosina mai lea o agelu ina ia lafoaia lo latou nofoaga sa tatau ona iai. (Faataoto 27:11; Iuta 6) Sa faaalia lena ina ua faaaogā e Satani ana temoni e taumafai ina ia faalavelave ai i agelu ia sa aauina atu e Ieova e ave ni feau. (Tanielu 10:13, 14, 20, 21) Ua matuā matilatila le faamaonia mai i lenei 20 senituri ina ua taumafai Satani e faaumatia le Malo faa-Mesia ina ua fanau mai.—Faaaliga 12:1-4.

7. Aisea na feita ai agelu faamaoni a Ieova i le Gata faafaatusa, peitai o le ā le onosai ua latou faaalia?

⁷ Sa faaalia foi e le fafine a Ieova, o le tino lea o agelu faamaoni, lo latou feita atu i le Gata faafaatusa. Sa taufaaleaga Satani i le suafa lelei o le Atua; na ia fesiligia foi le faamaoni o foafoaga atamamai taitoatasi a le Atua, e aofia ai agelu uma, ma sa ia taumafai malosi ai e faaleaga lo latou faamaoni atu i le Atua. (Faaaliga 12:4a) E na o le pau le lagona na iai i agelu faamaoni, o kerupi, ma serafi o le matuā ʻinoʻino atu lea i lē na ia faia o ia lava ma Tiapolo ma Satani. Peitai, ua latou faatalitali atu pea ia Ieova na te tauaaoina mataupu i lana lava taimi ma i lana lava auala.—Faatusatusa i le Iuta 9.

Faiga Sauā i le Fanau a le Fafine a le Atua

8. O ai sa matuā tulimataʻia e Satani?

⁸ I le taimi lava lena, sa matuā tulimataʻia ai e Satani po o ai le Fanau folafolaina a le fafine, o lē na fetalai Ieova o le a na tuʻimomomoina le ulu o le Gata. Ina ua faasilasila e le agelu mai le lagi e faapea o Iesu, o lē o le a fanau i Peteleema, o ia o le “Faaola, o ia o Keriso le Alii,” sa o se faamautinoaga maumaututū lena o le avea o ia ma Fanau folafolaina a le fafine.—Luka 2:10, 11.

9. Ina ua mavae le fanau mai o Iesu, na faapefea ona faaalia e Satani le matuā sauā o lona ita?

⁹ E lei umi lava ae faaalia loa le matuā sauā o le ita o Satani ina ua ia taitaiseseina makoi faapaupau i se feau lea na latou taunuu muamua atu ai i le tupu o Herota i Ierusalema ae faatoʻā ō atu ai i le fale i Peteleema lea na latou maua i ai le tamaitiiti o Iesu ma lona tinā, o Maria. E lei umi ae poloaiina loa e le tupu o Herota le fasiotia o tama tane uma mai le lua tausaga agaʻi i lalo le matutua, o ē sa i Peteleema ma ona nuu tuaoi uma. O lenei faiga, na faaalia ai e Herota le ʻinoʻino faasatani mo le Fanau. E foliga mai na iloa lelei lava e Herota lona taumafai e faaumatia le ola o lē o le a avea ma Mesia. (Mataio 2:1-6, 16) E molimau talafaasolopito e faapea o le tupu o Herota o sē na matuā amio lē pulea, na faitogafiti, ma fasioti tagata—o ia moni o se tasi o le fanau a le Gata.

10. (a) Ina ua mavae le papatisoga o Iesu, na faapefea ona taumafai totino Satani lava ia e faaleagaina le fuafuaga a Ieova e faatatau i le Fanau folafolaina? (e) Na faapefea ona faaaogā e Satani taʻitaʻi lotu Iutaia i le tulituliloaina pea o ona faanaunauga?

¹⁰ Ina ua uma ona faauuina Iesu i le agaga paia i le 29 T.A. ma ua fofoga e Ieova mai le lagi lona faamaonia o Iesu o lona Alo, sa taumafai pea Satani e uunaia Iesu ina ia lolo atu i faaosoosoga, ma ia saili ai e faaleagaina le fuafuaga a Ieova e faatatau i lona Alo. (Mataio 4:1-10) I lona lē taulau i lena mea, sa ia saili atu ai pea e toe faaaogā tagata e faataunuu ai ona faamoemoega. O nisi na faaaogā e taumafai ina ia faaleaga ia Iesu, o taʻitaʻi lotu faafiaamiotonu. Sa latou faaaogā pepelo ma ni tala taufaaleaga, o ituaiga o mailei sa faaaogā foi e Satani ia. Ina ua fetalai atu Iesu i se tagata supa, “Ina faalototele ia oe, ua faamagaloina au agasala,” sa lei faatali le ʻau tusiupu seʻi vāai pe na faamaloloina moni le tamaloa, ae na latou tuuaʻia loa Iesu e faapea o ia o sē fāifai. (Mataio 9:2-7) Ina ua faamalolo e Iesu tagata i le aso Sapati, na taʻusalaina o ia e le ʻau Faresaio e faapea ua ia solia le tulafono o le Sapati ma latou taupulepule ai e fasiotia o ia. (Mataio 12:9-14; Ioane 5:1-18) Ina ua tulia e Iesu temoni, na tuuaʻia o ia e le ʻau Faresaio e faapea sa faifaimea faatasi o ia ma “Pelesepulo le alii o temoni.” (Mataio 12:22-24) Ina ua toe faatūina Lasalo mai le oti, e toatele na faatuatua atu ia Iesu, ae na toe taupulepule foi iina faitaulaga sili ma le ʻau Faresaio e fasiotia o ia.—Ioane 11:47-53.

11. I aso e tolu a o lei oo i le maliu o Iesu, o ai na ia faailoa atu e faapea o le vaega o le fanau a le Gata, ma aisea?

¹¹ Ia Nisani 11, 33 T.A., sa afio saʻo atu ai ma le lē fefe Iesu i le malumalu i Ierusalema, e ui lava i lona silafia lelei o a latou faufauga, ma ia faalauiloa atu ai iina i le lautele le faasalaina o i latou. A o faaauau ona faailoa mai e le vaega, o le ʻau tusiupu ma le ʻau Faresaio le ituaiga o tagata sa iai i latou; o lea na fetalai atu ai Iesu: “Oi talofa ia te outou tusiupu ma faresaio, tagata faafiaamiotonu! Auā ua outou pupuni le malo o le lagi i tagata; auā tou te le ulu atu i ai outou, ua outou vavao foi i e a ulu atu i ai.” Na fetaui lava le folafola atu e Iesu e faapea o i latou o le vaega o le fanau a le Gata, i lona fetalai atu: “O outou gata, o fanau a gata feai, pe faapefea ona outou sosola i le faasala i Kēna?” (Mataio 23:13, 33) O ana upu na faaaogā ua toe faamanatu mai ai le valoaga i le Kenese 3:15.

12, 13. (a) Na faapefea e faitaulaga sili ma le ʻau tusiupu ona aumaia faamaoniga atili po o ai lo latou tamā faaleagaga? (e) O ai na aufaatasi atu ia i latou? (i) E tusa ai ma le faataunuuga o le Kenese 3:15, na faapefea ona tuʻimomomoina le mulivae o le Fanau a le fafine?

¹² Ina ua latou faalogo i fetalaiga a Iesu, pe sa ootia ea o latou loto, ina ia latou maua ai le alofa mutimutivale mai le Atua? Pe na latou salamō ea mai a latou amioleaga? E leai! Ua taʻua e le Mareko 14:1 e faapea i le aso lava na sosoo ai, i se fono na faia i le lotoā o le fale o le faitaulaga sili, na “saili lea e le au ositaulaga sili ma le au tusiupu, pe faapefea sa latou mailei e pue ai ia [Iesu], ma fasiotia.” Sa latou faaalia mai pea uiga fasioti tagata o Satani, o lē na muai faamatala mai e Iesu e faapea o le fasioti tagata. (Ioane 8:44) E lei umi ae aufaatasi atu loa ia i latou Iuta le Sekara, o lē na maileia e Satani ina ia avea ma aposetate. Na lafoaia e Iuta le Fanau lē ponā a le fafine a le Atua ae aufaatasi atu i le fanau a le Gata.

¹³ I le taeaopo o Nisani 14, na avatu faapagota ai e le ʻau taupulega faalelotu a Iutaia ia Iesu, i le kovana o Roma. O iina na taulamua ai faitaulaga sili i lo latou alaga atu ia faasatauroina o ia. Ina ua fesili mai Pilato, “Ou te faasatauro ea i lo outou Tupu?” o faitaulaga sili lava na tali atu, “E leai so matou tupu, na o Kaisara.” (Ioane 19:6, 15) Ioe, sa faamaonia i vala uma lava le avea o i latou ma fanau a le Gata. Ae mautinoa sa lē na o i latou. Ua aumaia e le faamaumauga faagaeeina i le Mataio 27:24, 25 lenei tala: “Ona tago ai lea o [Pilato] i le vai, ua fafano ai ona lima i luma o le motu o tagata.” Ona faapea mai lea o tagata uma: “Ia i luga ia i matou, ma a matou fanau lona toto.” Sa faamaonia mai ai la e le toatele o tagata Iutaia o lena tupulaga le avea o i latou lava ma vaega o le fanau a le Gata. A o lei iu lena aso, ae maliu loa Iesu. E ala i le faaaogaina o lana fanau vaaia, sa tuʻimomomoina ai e Satani le mulivae o le Fanau a le fafine a le Atua.

14. Aisea na lē avea ai le tuʻimomomoina o le mulivae o le Fanau a le fafine, o se manumalo mo Satani?

¹⁴ Pe na manumalo ea Satani? E matuā leai lava! Na manumalo Iesu Keriso i le lalolagi ma na manumalo foi i lē o loo avea ma pule i le lalolagi. (Ioane 14:30, 31; 16:33) Sa ia tausisia pea lona alofa faamaoni ia Ieova seia oo i lona maliu. O lona maliu o se tagata lelei atoatoa na saunia ai le tau o le togiola na manaomia ina ia toe faatau mai ai le aiā tatau e ola ai lea na leiloa ia Atamu. O lea na ia tatalaina ai le ala i le ola e faavavau mo i latou o ē faaalia le faatuatua i lena sauniuniga ma usiusitai i poloaiga a le Atua. (Mataio 20:28; Ioane 3:16) O Ieova na ia faatūina aʻe Iesu mai le oti i se ola e lē mafai ona oti i le lagi. I le taimi atofaina a Ieova, o le a tuʻimomomoina ai e Iesu Satani e lē toe iai lava. I le Kenese 22:16-18, ua valoia ai e faapea, o le a finagalo malie mai Ieova i aiga uma o le lalolagi o ē latou te faia gaoioiga e manaomia ina ia faamanuia ai i latou lava e ala i lena Fanau alofa faamaoni.

15. (a) Ina ua mavae le maliu o Iesu, na faapefea ona faaauau pea e ona aposetolo le faaalialia mai o le fanau a le Gata? (e) O le ā le faiga faasauā atili ua faaalia mai e le fanau a le Gata seia oo mai lava i o tatou aso?

¹⁵ Ina ua mavae le maliu o Iesu, sa faaauau pea e Kerisiano ua faauuina e le agaga ona latou faaalialia mai le fanau a le Gata, e pei ona sa faia e lo latou Alii. I le uunaiga a le agaga paia, na lapatai ai le aposetolo o Paulo e uiga i “le tagata o le amioleaga” o lē e māfua lona iai ona “o le galuega a Satani.” (2 Tesalonia 2:3-10) O lenei “tagata” ua faia aʻe i se vaega tuufaatasi ua faamaonia mai o taʻitaʻi lotu o Kerisinetoma. Ona faasauā ai lea o le fanau a le Gata i soo o Iesu Keriso. I le valoaga o loo faamauina i le Faaaliga 12:17, na valoia ai e le aposetolo o Ioane e faapea o le a faaauau ona sii taua atu Satani i le vaega totoe o le fanau a le fafine a le Atua seia oo mai lava i o tatou aso. Ma o le mea tonu lava lena o loo tupu. I le tele o atunuu, ua faasaina ai Molimau a Ieova, ua osofaia, ua faafalepuipuiina, pe lafoina i nofoaga o faasalaga ona o lo latou tulaga mausalī mo le Malo o le Atua ma ona ala amiotonu.

Le Faaalialia i Ona Po Nei o le Fanau a le Gata

16. I ona po nei, o ai ua faaalialia mai le avea ma vaega o le fanau a le Gata, ma e faapefea?

¹⁶ I le faataitai ia Iesu Keriso, ua lē faavaivai ai Kerisiano moni i lo latou faaalialia ma le lē fefe o le Gata ma lana fanau. I le 1917 na lomia e Tagata Aʻoga o le Tusi Paia, e pei ona faaigoa ai Molimau a Ieova i na taimi le tusi, The Finished Mystery, lea na latou faaalialia ai i lumāmea le pepelo faafiaamiotonu o taʻitaʻi lotu a Kerisinetoma. Na sosoo lena, ma le lomia o se iugafono i le 1924, na faaulutalaina e faapea Ecclesiastics Indicted. E limasefulu miliona kopi na tufatufaina i le tele o atunuu. I le 1937, na fofoga atu ai e J. F. Rutherford, o le peresitene o le Sosaiete o le Olo Matamata i lena taimi, ni lauga na faamatuaina, “Exposed” (Ua Faaalialia) ma le “Religion and Christianity” (O Lotu ma le Faa-Kerisiano), sa matuā faaalialia ai le fanau a Satani. I le tausaga na sosoo ai, a o faalogologo aofia sa iai i tauaofiaga e 50 mai atunuu eseese, na ia fofoga atu ai le lauga “Face the Facts” (Ia Tagai Atu i Mea Moni) e ala i laina o telefoni mai Lonetona, i Egelani. I se masina mulimuli ane, na faasalalau atu ai e se polokalame o le leitio sa oo atu i nuu e tele o le Iunaite Setete le lauga “Fascism or Freedom” (Faiga Faapolotiki po o le Saʻolotoga). Sa lagolagoina nei lauga e ni faaalialia malolosi sa iai i tusi e pei o le Enemies ma le Religion faapea le tamai tusi o le Uncovered. Ina ia ogatusa ma mea sa faasalalauina talu mai tausaga i le va o le 1920 ma le 1929, ua lomia ai nei le tusi Revelation—Its Grand Climax At Hand!a (Faaaliga—Ua Latalata Lona Tumutumuga Matagofie!), i gagana e 65, ua faaalia mai ai taʻitaʻi faapolotiki talapepelo ma tagata faipisinisi matapeapea, ma le faimea piopio, ua aofia i sui taulamua o le fanau vaaia a le Gata. Pe a fai ma masani a taʻitaʻi faapolotiki lo latou tāpā o mea pepelo e taitaiseseina ai ē o loo lagolagoina i latou, le leai o se faaaloalo i le paia o le toto, ma le faatiga atu i auauna a Ieova (ua faaalia ai le matuā ʻinoʻino i le fanau a le fafine a le Atua), e mautinoa la lo latou faaalialia ai o i latou lava o se vaega o le fanau a le Gata. Ua faapena foi ona moni i tagata faipisinisi o ē, e aunoa ma se tau aafia o o latou loto fuatia ifo, ua latou faia pepelo ina ia maua ni o latou lelei tau tupe ma ua latou gaosia pe faatau atu ni oloa ua lauiloa le faapogaia ai o faamaʻi.

17. O le ā le avanoa o loo iai pea mo nisi o tagata iloga o ē atonu o le a ō ese mai le faiga o mea a le lalolagi?

¹⁷ E lē o tagata uma ua pisipisia i lotu, o polotiki ma pisinisi a le lalolagi, o le a oo atu lava i le iuga o mātaulia pea e avea ma vaega o le fanau a le Gata. Ua oo ina fiafia nisi o nei tane ma fafine i Molimau a Ieova. Ua latou faaaogā mea ua ia i latou e fesoasoani atu ai i Molimau a Ieova, ma i se taimi mulimuli ane, ua oo ina latou talia le tapuaiga moni. (Faatusatusa i le Galuega 13:7, 12; 17:32-34.) O tagata uma na, ua faasalafa atu i ai lenei valaau māfana: “O lenei, outou tupu e, ia outou atamamai; ia aʻoaʻoina foi outou faamasino o le lalolagi. Ia auauna ia Ieova ma le mataʻu, ia fiafia foi ma le gatete. Ina sogi ia i le Atalii, neʻi toasa mai o ia, ma outou fano ai i le ala; auā e faafuasei ona tupu o lona toasa. Amuia i latou uma o e faatuatua ia te ia.” (Salamo 2:10-12) Ioe, e matuā tāua mo ē uma o loo faanaunau mo le finagalo malie o Ieova ona gaoioi i le taimi nei, a o lei tapunia e le Faamasino faalelagi le avanoa!

18. E ui ina lē avea ma vaega o le fanau a le fafine, ae o ai foi o loo avea pea ma tagata tapuai ia Ieova?

¹⁸ E na o i latou o ē o le a faia aʻe ai le Malo faalelagi ua avea ma vaega o le fanau a le fafine. E toaitiiti le aofai o i latou. (Faaaliga 7:4, 9) Peitai, ua iai le motu o tagata e toatele, ioe, o isi, e faitau miliona i latou, o ē i le avea ma tagata tapuai ia Ieova ua latou tulimataia ai le ola e faavavau i le parataiso i le lalolagi. E lē gata i upu a o gaoioiga, ua latou faapea atu ai i ē faauuina a Ieova: “Tatou te o ma outou; auā ua matou faalogo, o loo ia te outou le Atua.”—Sakaria 8:23.

19. (a) O le ā le filifiliga e tatau ona faia e tagata uma? (e) Ia te ai patino lava ua faia atu ai i ai se valaaulia faanatinati, ina ia gaoioi ma le poto a o iai pea le avanoa?

¹⁹ O le taimi lenei mo tagata uma e tatau ona faia ai se filifiliga. Pe latou te mananao ea e tapuai ia Ieova ma lagolagoina lana pule silisili ese, po o le a latou faataga Satani e avea ma o latou pule e ala i le faia o mea e faafiafia ai o ia? Ua iai se lima miliona o tagata mai atunuu uma ua latou lagolagoina le itu a Ieova e ala i le auaufaatasi ma le vaega totoe o le fanau a le fafine, o suli ia o le Malo. E valu miliona isi ua faaalia le naunau i le suesueina o le Tusi Paia ma i latou po o le auai atu i a latou sauniga. Ua faapea atu Molimau a Ieova ia i latou uma nei: O loo matala pea le avanoa. Ia e lagolagoina nei loa ma le lē maluelue le itu a Ieova. Ia talia Keriso Iesu o ia o le Fanau folafolaina. Ia olioli e auaufaatasi ma le faalapotopotoga vaaia a Ieova. Tau ina ia e auai i faamanuiaga uma o le a Ia saunia e ala mai i le pulega a le Tupu, o Keriso Iesu.

[Faaopoopoga i lalo]

E te Manatua?

◻ O ai le Gata lea e faasino i ai i le Kenese 3:15? Ma o ai le fafine?

◻ O ā uiga ua mātaulia ai le fanau a le Gata?

◻ Na faapefea ona faaalialia e Iesu le fanau a le Gata?

◻ O ai ua faaalialia e avea o se vaega o le fanau a le Gata i ona po nei?

◻ O le ā le gaoioiga faanatinati ua manaomia ina ia alofia ai le mātauliaina faatasi ma le fanau a le Gata?

[Ata i le itulau 10]

Sa faaalialia atu e Iesu taʻitaʻi lotu faafiaamiotonu e faapea o se vaega o le fanau a le Gata