Ia Vivii Atu Tagata Uma Ia Ieova!

“Ia outou vivii atu ai ia Ieova i le afi.”—ISAIA 24:15.

1. Sa faapeī manatu o perofeta a Ieova i lona suafa, i le faaeseesega mai le uiga o loo i Kerisinetoma i aso nei?

IEOVA—o le suafa ua sili ona taʻutaʻua o le Atua! Maeu le olioli na iai perofeta faamaoni anamua e taʻutaʻu atu lena suafa! Sa latou faamamaluina ma le fiafia tele lo latou Alii Pule Silisili Ese, o Ieova, o lē ana le suafa ua mātaulia ai o ia o Lē Sili na Fuafuaina Mea. (Isaia 40:5; Ieremia 10:6, 10; Esekielu 36:23) E oo lava i ē na taʻua o perofeta laiti, sa latou matuā faaleo atu le avatuina o le viiga ia Ieova. O se tasi o i latou nei o Hakai. I le tusi o Hakai, ua faia aʻe i le na o le 38 fuaiupu, ua faaaogā ai le suafa o le Atua i le aofaiga e 35. Ua pei e lē uigā lena valoaga ina ua suia le suafa tāua o Ieova i le tofi “Alii,” e pei ona taʻua ai e aposetolo fia faaalialia o Kerisinetoma i a latou faaliliuga o le Tusi Paia.—Faatusatusa i le 2 Korinito 11:5.

2, 3. (a) Na faapefea ona faataunuuina se tasi o valoaga mataina e faatatau i le toe faafoisia o Isaraelu? (e) O le ā le olioli na auai faatasi ai le vaega totoe o Iutaia ma a latou aumea?

² I le Isaia 12:2, ua faaaogā ai vala uma e lua o le suafa.a Ua faalauiloa mai e le perofeta e faapea: “Faauta, o le Atua, o loʻu faaolataga ia; ou te faatuatua, ou te le fefe; auā o Ioa, Ieova, o loʻu malosi ia ma laʻu pese; ua avea foi o ia moʻu faaolataga.” (Tagai foi i le Isaia 26:4.) I ni tausaga la e 200 a o lei faasaʻolotoina Isaraelu mai le faaaunuua i Papelonia, na avatu ai e Ioa Ieova e ala atu i lana perofeta o Isaia se faamautinoaga e faapea o ia o lo latou Faaola malosi. Sa faagasolo lena faaaunuua mai le 607 e oo atu i le 537 T.L.M. Na tusi foi Isaia e faapea: “O aʻu o Ieova le na faia mea uma; . . . O lē fai atu ia Kuresa, O loʻu leoleo mamoe o ia; na te faataunuuina foi o mea uma ou te loto i ai; o loo fai atu foi i Ierusalema, E faia lava oe; o loo fai atu foi i le malumalu, E faavaeina lava oe.” O ai lenei Kuresa? Ma le mataina lava, sa faamaonia mai o ia o le tupu o Kuresa o Peresia, o lē na faatoilaloina Papelonia i le 539 T.L.M.—Isaia 44:24, 28.

³ I le faataunuuina o fetalaiga a Ieova ia sa faamaumauina e Isaia, na faaoo atu ai e Kuresa i tagata Isaraelu o ē sa faaaunuuaina le poloaiga e faapea: “O ai ea o ia te outou ai lona nuu uma? Ia ia te ia lona Atua, ma ia alu ae o ia i Ierusalema o loo i Iuta, ma fai le fale o Ieova le Atua o Isaraelu, [“o le Atua moni o ia,” NW] o loo i Ierusalema.” Ona toe taliu atu ai lea i Ierusalema o le vaega totoe o tagata Iutaia ua latou matuā fiafia lava, faatasi ai ma le ʻau Netini e lē o ni Isaraelu, ma atalii o auauna a Solomona. Na latou taunuu tonu lava i le taimi e faamanatuina ai le Tausamiga o Fale Apitaga i le 537 T.L.M. ma sa latou faia ai taulaga ia Ieova i luga o lona fata faitaulaga. I le tausaga na sosoo ai, i le masina lona lua, sa latou faataatiaina ai le faavae o le malumalu lona lua, a o latou alalaga atu ma le leo tetele i le olioli ma vivii atu ia Ieova.—Esera 1:1-4; 2:1, 2, 43, 55; 3:1-6, 8, 10-13.

4. Na faapefea ona faataunuuina moni le Isaia mataupu e 35 ma le 55?

⁴ Sa tatau ona faataunuuina i se tulaga mamalu i Isaraelu le valoaga a Ieova mo le toe faafoisiaina: “E olioli ona o i latou le vao lafulafua, ma le nuu naumati; e fiafia le toafa, ma fua mai e pei o le aute. . . . Latou te vaavaai i le pupula o Ieova, o le matagofie o lo tatou Atua.” “Auā tou te o atu ma le fiafia, e taʻitaʻiina foi outou ma le manuia; o atu mauga ma mauga e leo tetele ma le alaga fiafia i o outou luma, e pāti lima foi laau uma o le vao. . . . E fai foi ma igoa e viia ai Ieova, e fai foi ma faailoga e faavavau e le mavae atu lava.”—Isaia 35:1, 2; 55:12, 13.

5. Aisea na puupuu ai le olioli o Isaraelu?

⁵ Peitai ane, na puupuu lena olioli. Na saili ane tagata tuaoi ina ia faia ni sootaga tuufaatasi faaletapuaiga mo le fausiaina o le malumalu. I le taimi muamua sa maumauai tagata Iutaia e lē lolo atu i ai, i lo latou folafola atu: “Tatou te le faia le fale o lo matou Atua ma outou; na o i matou nei lava matou te faia le fale o Ieova le Atua o Isaraelu, pei ona fetalai mai le tupu o Kuresa le tupu o Peresia ia te i matou.” Ona amata loa lea ona matuā tetee ane na tuaoi. Sa ‘faaauau pea ona faavaivaia tagata o Iuta e tagata o le nuu, ma latou faaatuatuvaleina i latou a o faia le fale.’ Sa latou faaseseina foi lē na sosoo ane ia Kuresa, o Aretaseta lea, ma ia faasaina ai loa le fausiaina o le malumalu. (Esera 4:1-24) E 17 tausaga na lē toe faia ai le galuega. E faanoanoa lava ona sa maileia tagata Iutaia i se olaga matapeapea i lena taimi.

Ua Fetalai “Ieova o ʻAu”

6. (a) Na faapefea ona tali atu Ieova i le tulaga sa iai i Isaraelu? (e) Aisea na talafeagai ai le uiga o le igoa o Hakai?

⁶ E ui i lea, sa faaalia e Ieova ‘lona malosi ma lona mana’ mo le puipuiga o Isaraelu, e ala i le aauina atu o perofeta, ae maise lava o Hakai ma Sakaria, ina ia toe faamanatu i tagata Iutaia a latou matafaioi. E iai se sootaga o le igoa o Hakai ma tausamiga, auā e foliga mai o le uiga o le igoa “Na Fanau i se Taimi o le Tausamiga.” Ma le talafeagai la, sa amata ona ia vavalo atu i le uluai aso o le masina o le Tausamiga o Fale Apitaga, le taimi lea na manaomia ai tagata Iutaia ina ia ‘matuā olioli lava.’ (Teuteronome 16:15) Sa aauina atu e Ieova, e ala ia Hakai, ni feau se fa i se vaitaimi e 112 aso.—Hakai 1:1; 2:1, 10, 20.

7. E tatau faapefea ona faalaeiauina i tatou i upu amata a Hakai?

⁷ I le faatomuaina mai o lana valoaga, na faapea atu ai Hakai: “Ua faapea ona fetalai mai o Ieova o ʻau.” (Hakai 1:2a) O ai atonu o loo faasino atu i ai na “ʻau”? O ʻau faaagelu ia a Ieova, o nisi taimi o loo taʻua ai i latou i le Tusi Paia o malosi faavaegaʻau. (Iopu 1:6; 2:1; Salamo 103:20, 21; Mataio 26:53) Pe ua lē faalaeiauina ai ea la i tatou i aso nei talu ai, o loo faaaogā e le Alii Pule Silisili Ese o Ieova lava ia, nei ʻau faalelagi malolosi e taʻitaʻiina la tatou galuega o le toe faafoisiaina o le tapuaiga moni i le lalolagi?—Faatusatusa i le 2 Tupu 6:15-17, NW.

8. O le ā le vaaiga na aafia ai Isaraelu, ma faatasi ai ma ā iuga?

⁸ O le ā sa talanoaina i le uluai feau a Hakai? Na faapea mai tagata: “E lei oo i ona aso, o aso e fai ai le fale o Ieova.” Sa lei toe avea le fausiaina o le malumalu lea, e fai ma sui o le toe faafoisiaina o le tapuaiga tauatua, ma mea sa latou muai manatunatu mamafa i ai. Sa latou liliu atu e fausia fale tetele mo i latou lava. O se vaaiga matapeapea i mea faitino na māfua ai ona faaitiitia lo latou maelega mo le tapuaiga ia Ieova. O le iuga, na aveesea ai lana faamanuiaga mai ia i latou. Sa lē toe fua mai o latou laufanua, ma sa leai foi ni o latou lavalava mo le maʻatiʻati mai o le tau mālūlū. Sa faaitiitia a latou tupe na maua, e peiseai na latou tuuina a latou tupe i se taga o loo pūpū solo.—Hakai 1:2e-6.

9. O le ā le timaʻiga malosi, ma le faamalosiau na saunia e Ieova?

⁹ E faalua ona avatu e Ieova le timaʻiga malosi lenei: “Ia outou mafaufau i o outou ala.” E foliga mai, sa talia e Serupapelu, le kovana o Ierusalema, ma le ositaulaga sili o Iosua ma la maumauai ai e faalototele tagata uma ina ia “faalogo . . . i le siufofoga o Ieova lo latou Atua, ma upu a le perofeta o Hakai, e tusa ma mea na auina mai ai o ia e Ieova lo latou Atua; ua matatau foi le nuu ia Ieova.” E lē gata i lea, “ona fai mai lea o Hakai le sāvali a Ieova i le feau a Ieova i le nuu, ua faapea mai, O loo fetalai mai Ieova, O aʻu, ou te ia te outou.”—Hakai 1:5, 7-14.

10. Na faapefea ona faaaogā e Ieova lona mana e fesoasoani ai ia Isaraelu?

¹⁰ Atonu sa manatu nisi tagata matutua i Ierusalema o le malumalu lea na toe fausia e peiseai e “leai” sona mamalu pe a faatusatusa atu i le malumalu na iai muamua. Peitai ane, i le pe tusa ma le 51 aso mulimuli ane, na faagaeeina ai e Ieova Hakai ina ia faalauiloa atu le feau lona lua. Na ia folafola atu: “Ia e faamalosi o oe o Serupapelu, ua fetalai mai ai Ieova; ma ia e faamalosi o oe o Iosua le atalii o Iosataka le faitaulaga sili; ma ia faamalolosi outou tagata uma o le nuu, ua fetalai mai ai Ieova, ma ia outou galulue; auā o aʻu, ou te ia te outou, ua fetalai mai ai Ieova o ʻau. . . . aua le fefefe outou.” O Ieova, o lē na te faaaogaina i lana taimi atofaina lona mana e silisili ona malosi ina ia ‘luluina ai le lagi ma le lalolagi,’ sa ia faamautinoaina o teteega uma, e oo lava i se faasasaaga faalemalo, sa toe aveesea. E lei atoa le lima tausaga ae faaiuina loa ma le manuia tele le fausiaina o le malumalu.—Hakai 2:3-6.

11. Na faapefea ona faatumulia e le Atua le malumalu lona lua i le ‘mamalu na sili’ atu?

¹¹ Ona faataunuu ai lea o se folafolaga mataina: “Ona oo mai ai lea o mea ua manaomia e nuu uma; ou te faatumuina foi lenei fale i le pupula, ua fetalai mai ai Ieova o ʻau.” (Hakai 2:7) O na “mea ua manaomia” sa faamaonia e faatatau atu i tagata e lē o ni Isaraelu o ē na ō mai e tapuai i lena malumalu, e pei ona faaatagia atu e le mamalu o lona afio ai tautupu. Sa faapefea ona faatusatusa atu lenei malumalu ua toe fausia, i le malumalu lea na fausia i aso o Solomona? Na faalauiloa mai e le perofeta a le Atua e faapea: “E sili le mamalu o lenei fale ua mulimuli i le na muamua, ua fetalai mai ai Ieova o ʻau.” (Hakai 2:9) I le uluai faataunuuga o le valoaga, na sili atu ona umi le taimi na tumau ai le malumalu lea na toe fausia, nai lo le malumalu o Solomona. Sa iai pea le malumalu e oo lava i le taimi na aliaʻi mai ai le Mesia i le 29 T.A. E lē gata i lea, a o lei fasiotia o ia e ona fili faaaposetate i le 33 T.A., na aumaia foi i ai e le Mesia lava ia le mamalu ina ua ia talaʻi atu ai iina upu moni.

12. O le ā le fuafuaga sa faatinoina e uluai malumalu e lua?

¹² Sa faatinoina e le malumalu muamua ma le lona lua lea na iai i Ierusalema se fuafuaga tāua tele i le faaātaina mai o vala tāua o le auaunaga faaositaulaga a le Mesia, ma le tausia pea o le tapuaiga mamā a Ieova i le lalolagi seia oo ina aliaʻi moni mai le Mesia.—Eperu 10:1.

Le Malumalu Faaleagaga Matagofie

13. (a) O ā mea e faatatau atu i le malumalu faaleagaga lea na tutupu mai le 29 e oo atu i le 33 T.A.? (e) O le ā le matafaioi tāua o le taulaga togiola a Iesu na faia i nei mea tutupu?

¹³ Pe e iai ea i le valoaga a Hakai e faatatau i le toe faafoisiaina se uiga faapitoa mo taimi mulimuli ane? O le mea moni lena! Na avea le malumalu lea na toe fausia i Ierusalema ma taulaʻiga o tapuaiga moni uma i le lalolagi. Ae na muai faaāta mai ai se malumalu faaleagaga e sili mamao atu lona mamalu. Na amata ona faagaoioi lena malumalu faaleagaga i le 29 T.A. i le taimi o le papatisoga o Iesu i le Vaitafe o Ioritana, ina ua faauuina e Ieova Iesu e avea ma Ositaulaga Sili, e ala i le agaga paia lea na faapepepepe aʻe i ona luga e pei se lupe. (Mataio 3:16) Ina ua uma ona faamaeʻaina e Iesu lana faiva faalelalolagi i se maliu faataulagaina, sa toe faatūina aʻe o ia i le lagi, lea na faaatagia mai e le Mea e Silisili ona Paia o le malumalu, ma o iina na ia ofoina atu ai ia Ieova le aogā o lana taulaga. Sa avea lena mea o se togiola, i le faamagaloina ai o agasala a ona soo, ma tatala ai le avanoa mo le faauuina o i latou i le aso o le Penetekoso 33 T.A., e avea ma ositaulaga lagolago i le malumalu faaleagaga o Ieova. O a latou auaunaga faamaoni seia oo i le oti i le lotoā o loo i le lalolagi o le malumalu, o le a taʻitaʻia atu ai i se toetu faalelagi i le lumanai ina ia faaauau ai le auaunaga faaositaulaga.

14. (a) O le ā le olioli lea sa iai faatasi i le galuega maelega a le uluai faapotopotoga Kerisiano? (e) Aisea na puupuu ai lenei olioli?

¹⁴ E faitau afe tagata Iutaia o ē na salamō—ma tagata o Nuu Ese mulimuli ane ai—na lolofi atu i lena faapotopotoga Kerisiano ma auai i le folafolaina atu le tala lelei o le pulega o le Malo o le a oo mai o le Atua i luga o le lalolagi. Ina ua mavae ni tausaga e 30, sa mafai e le aposetolo o Paulo ona faapea mai ua talaʻia atu le tala lelei “i tagata uma lava i le lalolagi.” (Kolose 1:23) Ae ina ua mavae ona maliliu le ʻau aposetolo, ona aliaʻi lea o le aposetasi sili, ma amata ai ona tau mou atu le malamalama o le upu moni. Sa lilofia le Faa-Kerisiano moni e faiga vaega faalotu a Kerisinetoma, lea e faavae aʻe i aʻoaʻoga ma filosofia faapaupau.—Galuega 20:29, 30.

15, 16. (a) Na faapefea ona faataunuuina le valoaga i le 1914? (e) O le ā le aoaoina lea na faailogaina ai le faaiuiuga o le lona 19 senituri, ma le amatamataga o le lona 20 senituri?

¹⁵ Na mavae atu senituri. Ona oo mai lea i vaitausaga na amata mai i le 1870, sa amata ai e se vaega o Kerisiano naunau faamaoni ona latou suesueina maeʻaeʻa le Tusi Paia. Sa mafai ai ona latou faasino atu mai le Tusi Paia le tausaga e 1914 e faailogaina ai le vaitaimi faaiuiu o “tausaga o nuu ese.” I le taimi lena na faaiuina ai “tausaga” (taimi) e fitu faafaatusa (2,520 tausaga o pulega faamanu a tagata), faatasi ai ma le faanofotupuina i le lagi o Keriso Iesu—o Lē ua iai “le tonu” e avea ai ma Tupu Faa-Mesia o le lalolagi. (Luka 21:24; Tanielu 4:25; Esekielu 21:26, 27) Ae maise lava i le 1919 ma faasolo mai ai, ua auai ai nei Tagata Aʻoga o le Tusi Paia, lea ua iloa i aso nei o Molimau a Ieova, i le faasalalauina atu ma le maelega i le lalolagi atoa le tala lelei o le Malo o loo fotuai mai. I le tausaga e 1919, na iai ni nai afe o i latou nei sa tali atu i le valaau ina ia galulue lea na fofoga mai i le tauaofiaga i Cedar Point, Ohio, i le Iunaite Setete o Amerika. Sa faateleina lo latou aofai seia oo mai i le tausaga e 1935 ina ua lipotia mai e le toʻa 56,153 a latou auaunaga i le fanua. I lena tausaga, e toʻa 52,465 na latou taumafaina le areto ma le uaina i le Faamanatuga faaletausaga o le maliu o Iesu, lea ua faailogaina ai lo latou faamoemoe o le avea ma ositaulaga faatasi ma Keriso Iesu i le vaega faalelagi o le malumalu sili faaleagaga o Ieova. O le a latou auauna ai foi faatasi ma ia o ni tupu lagolago i lona Malo Faa-Mesia.—Luka 22:29, 30; Roma 8:15-17.

¹⁶ Peitai, i le Faaaliga 7:4-8 ma le 14:1-4 ua faaalia ai o le aofai atoa o nei Kerisiano faauuina e faatapulaa mai i le 144,000, o le toatele o i latou na aoaoina i le gasologa o le uluai senituri a o lei tupu aʻe le aposetasi sili. Mai le iuga o le lona 19 senituri ma faasolo atu ai i le lona 20 senituri, ua faamaeʻa ai e Ieova le aoaoina o lenei vaega o ē ua faamamāina i le vai o lana Afioga, ua taʻuamiotonuina i lo latou faatuatua atu i le taulaga togiola a Iesu, ma ua iu ina faamaufaailogaina e avea o ni Kerisiano faauuina e faia aʻe ai le numera atoa o le 144,000.

17. (a) O le ā le aoaoina na amata talu mai vaitausaga e amata i le 1930? (e) Aisea e tāua ai iinei le Ioane 3:30? (Tagai foi i le Luka 7:28.)

¹⁷ O le ā e sosoo ai ina ua maeʻa ona filifilia uma le aofaiga atoa o ē faauuina? I le 1935, i se tauaofiaga lauiloa i Washington, D.C., i le Iunaite Setete o Amerika, na faailoa mai ai e faapea o le “motu o tagata e toatele” o le Faaaliga 7:9-17 o se vaega lea o le a iloaina pe a “mavae” le aoaoina o le 144,000, ma o lo latou faamoemoe o le ola e faavavau i se lalolagi parataiso. Ina ua uma ona ia faailoa manino mai Iesu o ia lea ua faauuina, ona faapea mai lea o Ioane le Papatiso, o lē o le a toe faatūina mai i le lalolagi e avea o se tasi o “isi mamoe” e faatatau i le Mesia: “E ao ina tupu pea o ia; peitai aʻu nei, e tauāu ina itiiti o aʻu.” (Ioane 1:29; 3:30; 10:16; Mataio 11:11) O le galuega a Ioane le Papatiso o le sauniunia o soo mo le Mesia, na faasolo ina faamuta ina ua tauaveina loa e Iesu le filifiliga o se aofai faateleina o ē o le a iai i le 144,000. I vaitausaga e amata mai i le 1930, na tupu ai se suiga. Sa faaitiitia le aofai o ē “na valaauina ma filifilia” e avea ma vaega o le 144,000 ae ua amata ona iai le faatelega uigaese o le aofai o le “motu o tagata e toatele” o “isi mamoe.” Ua faaauau ona faatoateleina pea lenei motu o tagata e toatele a o latalata atu le faiga amioleaga o mea a le lalolagi i lona iuga ia Amaketo.—Faaaliga 17:14e.

18. (a) Aisea e mafai ai ona tatou faatalitalia ma le mautinoa e faapea “e faitau miliona o loo soifua nei o le a lē tāitai ona maliliu”? (e) Aisea e tatau ai ona tatou utagia ma le maelega le Hakai 2:4?

¹⁸ I le amatamataga o vaitausaga e amata mai i le 1920, na tauaaoina ai se lauga lautele tāua e Molimau a Ieova o lona matua e faapea “E Faitau Miliona o Loo Soifua Nei o le a Lē Tāitai Ona Maliliu.” Atonu ua atagia atu ai i lena faaupuga ni faatalitaliga matuā mautinoa i lena taimi. Peitai i aso nei, ua mafai ai ona fai atu lena faaupuga ma se tulaga e atoatoa le mautinoa. Ua lē gata i le malamalama faateleina o valoaga a le Tusi Paia, ae o fevesiaiga o lenei lalolagi ua faaleagaina, ua matuā faailoa mai ai le matuā latalata lava o le iuga o le faiga o mea a Satani! O le lipoti o le Faamanatuga mo le 1996 ua faaalia ai e toʻa 12,921,933 na auai, ae e na o le toʻa 8,757 (.068 pasene) ē sa faaalia lo latou faamoemoe faalelagi e ala i le taumafaina o le areto ma le uaina. O le toe faafoisiaina o le tapuaiga moni ua latalata nei ina faamutaina. Ae seʻi aua lava neʻi o tatou faavaivai i le faia o lena galuega. Ioe, ua taʻua i le Hakai 2:4: “Ia faamalolosi outou tagata uma o le nuu, ua fetalai mai ai Ieova, ma ia outou galulue; auā o aʻu, ou te ia te outou, ua fetalai mai ai Ieova o ʻau.” Tau ina ia tatou maumauai ia lē tāitai lava ona faatagaina faanaunauga o le matapeapea i meafaitino po o faiga faalelalolagi e faamutaina ai lo tatou maelega mo le galuega a Ieova!—1 Ioane 2:15-17.

19. E mafai faapefea ona tatou auai i le faataunuuga o le Hakai 2:6, 7?

¹⁹ Tatou te matuā olioli i lo tatou faaeaga o le auai i le faataunuuga faaonaponei o le Hakai 2:6, 7 e faapea: “O loo faapea ona fetalai mai o Ieova o ʻau, E toe tasi, e toe itiiti lava, ona ou luluina ai lea o le lagi, ma le lalolagi, ma le sami, atoa ma le eleele matutu. Ou te luluina foi nuu uma; ona oo mai ai lea o mea ua manaomia e nuu uma; ou te faatumuina foi lenei fale i le pupula, ua fetalai mai ai Ieova o ʻau.” O le manao tele, le faapiopio, ma le feainai ua matuā taatele i le gasologa o lenei lalolagi i lenei 20 o senituri. E mautinoa lava ua iai nei i ona aso e gata ai, ma ua uma ona amata “luluina” e Ieova e ala i le iai o ana Molimau e ‘folafola atu le aso o lona toasa.’ (Isaia 61:2) O lenei muai luluga o le a taualuga i le faaumatiaga o le lalolagi ia Amaketo, peitai a o lei oo mai lena taimi, o loo aoaoina ai e Ieova mo lana auaunaga “o mea ua manaomia e nuu uma”—o tagata agamalu o le lalolagi o ē pei ni mamoe. (Ioane 6:44) O loo ‘tuuina atu nei le auaunaga paia’ e lenei “motu o tagata e toatele” i le lotoā faalelalolagi o lona maota o le tapuaiga.—Faaaliga 7:9, 15.

20. O fea e maua i ai le oa e silisili ona tāua?

²⁰ O le auaunaga i totonu o le malumalu faaleagaga o Ieova e aumaia ai le tele o mea tāua nai lo so o se isi lava oa faaletino. (Faataoto 2:1-6; 3:13, 14; Mataio 6:19-21) E lē gata i lea, ua taʻua faapea i le Hakai 2:9: “E sili le mamalu o lenei fale ua mulimuli i le na muamua, ua fetalai mai ai Ieova o ʻau; ou te avatu foi le manuia i le mea nei, ua fetalai mai ai Ieova o ʻau.” O le ā le uiga o nei upu mo i tatou i aso nei? O le a taʻu mai e la tatou mataupu o loo sosoo mai.

[Faaopoopoga i lalo]

Fesili mo le Autaluga

◻ O le ā le faaaoaoga a le ʻau perofeta e tatau ona mulimuli i ai e faatatau i le suafa o Ieova?

◻ O le ā le faalaeiauga ua tatou maua mai le feau malosi a Ieova ia Isaraelu ua toe faafoisiaina?

◻ O le ā le malumalu faaleagaga matagofie lea o loo faagaoioia i aso nei?

◻ O ā aoaoga na amata faasolosolo mai a o faagasolo senituri lona 19 ma le lona 20, faatasi ai ma le ā le faamoemoega matagofie?

[Ata i le itulau 7]

O loo taʻitaʻia ma faatumauina e ʻau faalelagi a Ieova ana Molimau i le lalolagi