‘E ui Tou te Lei Vāai Lava ia te Ia, Ae ua Outou Alolofa ia te Ia’
“Tou te le iloa atu o ia, a ua alolofa ia te ia; e le o vaai atu nei foi ia te ia, a o loo faatuatua ia te ia, tou te olioli ai.”—1 PETERU 1:8.
1. E ui lava e leai se tasi i le lalolagi i aso nei na vaai ia Iesu, ae ua faapefea e nisi tagata lotu ona taumafai ina ia faaalia le tuutoina atu ia te ia?
E LEAI lava se isi o soifua mai i le lalolagi i aso nei na vaai ia Iesu Keriso. Peitai, e faitau miliona tagata ua faapea mai e alolofa ia te ia. I tausaga taitasi ia Ianuari 9, i Manila i le Atu Filipaina, e fetosoai solo ai se koluse o le faatusa o Iesu Keriso, i le auala tele i se tulaga ua faamatalaina faapea, o se faaaliga sili ona tele ma sili ona mataina lea a le lotu autū i le atunuu. E fetuleiai ma omiomia solo le motu o tagata ua faagaeetia; e oo foi lava ina feaei isi i luga o isi i se taumafaiga fita ina ia paʻi atu i le faatusa. O le toatele e iai e matamata i lenei mea ua taaʻina faapitoa atu i ai ona o le fiafia o faaalia i le solo. Peitai o nisi o i latou e mautinoa o tagata o iai lagona naunau atu faamaoni ia Iesu. Atonu o se faamaoniga o lo latou tuutoina mo Iesu, o le latou asoaina lea o se faakoluse pe atonu o le ō atu e lē aunoa i le lotu. Peitai ane, pe e mafai ona manatu i lena ifoga i tupua o se tapuaiga moni?
2, 3. (a) O ai mai i soo o Iesu na latou vāai moni lava ma faalogo moni atu ia te ia? (e) O ai isi i le uluai senituri sa alolofa ia Iesu ma faatuatua ia te ia, e ui sa latou lei vaaitino lava ia te ia?
2 I le uluai senituri, e faitau afe i latou sa iai i itumalo o Roma i Iutaia, Samaria, Perea, ma Kalilaia na latou vaaitino ma faalogo atu ia Iesu Keriso. Na latou faalogo atu a o ia faamatalaina mai upu moni e faagaeetia ai le loto e uiga i le Malo o le Atua. Na avea i latou ma ē na vaaitino i vavega na faia e Iesu. O nisi o i latou ia na avea ma ona soo tuutoina, na talitonu faamaoni o ia “o le Keriso, o le Alo o le Atua soifua.” (Mataio 16:16) E ui i lea, o i latou na tusi atu i ai e le aposetolo o Peteru lana uluai tusi faagaeeina sa lei iai faatasi ma ia tagata.
3 O i latou na tusi atu i ai Peteru sa mau i itumalo o Roma o Pono, Kalatia, Kapatokia, Asia, ma Pitunia—o na nuu uma na iai i le mea lea ua tu ai Take i aso nei. Na tusi atu Peteru ia i latou e faapea: “Tou te le iloa atu o ia, a ua alolofa ia te ia; e le o vaai atu nei foi ia te ia, a o loo faatuatua ia te ia, tou te olioli ai ma le fiafia e le matalatalaina, e silisili ese lava.” (1 Peteru 1:1, 8) Ua faapefea ona latou iloa Iesu Keriso i le mamao ua mafai ai ona alolofa ia te ia ma faaalia le faatuatua ia te ia?
4, 5. Sa faapefea i tagata o ē e lei vāai lava ia Iesu ona lava mea na latou aʻoaʻoina e faatatau ia te ia e latou te alolofa ai ma faatuatua atu ia te ia?
4 E mautinoa o nisi sa iai i Ierusalema ina ua molimau atu le aposetolo o Peteru i le motu o tagata na auai i le tausamiga o le Penetekoso i le 33 T.A. Ina ua maeʻa le tausamiga, e toatele soo na nonofo i Ierusalema ina ia maua atili mai nisi faatonuga mai i aposetolo. (Galuega 2:9, 41, 42; faatusatusa i le 1 Peteru 1:1.) I malaga faifai pea faamisionare, na faaooina atu ai e le aposetolo o Paulo se faiva maelega i tagata na nonofo i le vaega lea na auina mulimuli atu i ai e Peteru le tusi muamua faale-Tusi Paia na faaigoaina i lona igoa.—Galuega 18:23; 19:10; Kalatia 1:1, 2.
5 Aisea na malosi ai le tosina atu ia Iesu o na tagata, o ē e lei vāai lava ia te ia? I o tatou vaitaimi, aisea ua faitau miliona ai foi isi i le lalolagi aoao o loo matuā alolofa loloto atu ia te ia?
O Mea na Latou Faalogo i Ai
6. (a) Pe afai sa e faalogo a o molimau atu Peteru e faatatau ia Iesu i le Penetekoso e 33 T.A., o le ā se mea e mafai ona e aʻoaʻoina ai? (e) Na faapefea i lenei mea ona aafia ai se toʻa 3,000 o ē na auai?
6 Pe ana fai sa e iai i Ierusalema ina ua lauga atu Peteru i le motu o tagata i le tausamiga i le 33 T.A., o le ā e te ono aʻoaʻoina mai ai e faatatau ia Iesu? E matuā aunoa lava ma se masalosalo, o vavega na ia faia na faaalia ai na auina mai o ia e le Atua. Ma e ui ina fasiotia e tagata agasala Iesu, ae na lē toe iai o ia i le tuugamau peitai na toe faatūina ma ua faaeaina i le lagi i le aao taumatau o le Atua. O Iesu, o ia moni lava lea o le Keriso, o le Mesia o lē na tusi faatatau i ai perofeta. E ala mai ia Iesu Keriso, na māfua ai ona liligi mai le agaga paia i ona soo ma na mafai ai loa ona latou molimau atu i tagata mai le tele o atunuu e faatatau i mea mamana na faia e le Atua e ala mai i lona Alo. Na matuā pāʻia loto o le toatele na faalogo atu ia Peteru i lena sauniga, ma pe tusa ma le 3,000 na papatisoina o ni soo Kerisiano. (Galuega 2:14-42) Pe ana fai sa e iai iina, pe o le a e faia ea foi se gaoioiga mautinoa faapena?
7. (a) Pe ana fai sa e iai i Anetioka a o talaʻi atu ai le aposetolo o Paulo iina, o le ā se mea na semanū e te aʻoaʻoina ai? (e) Aisea na iu ai ina avea nisi o le aofia ma ē talitonu ma latou tufa atu le tala lelei i isi?
7 Pe ana fai sa e iai ia i latou na iai a o aʻoaʻo atu le aposetolo o Paulo i Anetioka i le itumalo o Kalatia i Roma, o ā nisi mea semanū e te iloaina e faatatau ia Iesu? Semanū e te faalogo atu ai ia Paulo o ia faamatala mai faapea na faasalaina Iesu i le oti e taʻitaʻi o Ierusalema e pei ona valoia e perofeta. Semanū e te faalogo atu foi i ai i faamaoniga mai ē na vaaitino i le toe faatūina aʻe o Iesu. O le a mautinoa le faagaeetia ai o oe i le faamatalaina e Paulo e faapea o le toe faatūina o Iesu mai le oti, na faamaonia ai e Ieova o ia moni lenei o le Alo o le Atua. Ma pe e lē ono faagaeetia ai ea lou loto a o e iloaina faapea e mafai ona faamagaloina agasala e ala i le faatuatua ia Iesu ma taʻitaʻia atu ai i le ola e faavavau? (Galuega 13:16-41, 46, 47; Roma 1:4) I le iloaina o le tāua o mea na latou faalogo atu i ai, na avea ai nisi mai Anetioka ma soo, ma sa auai ma le maelega i le tufaina atu o le tala lelei i isi, e ui lava na fesagai ai i latou ma sauāga matuitui ona o le faia faapea.—Galuega 13:42, 43, 48-52; 14:1-7, 21-23.
8. Pe ana fai sa e iai i le sauniga a le faapotopotoga i Efeso i le taimi na maua atu ai le tusi a Paulo ia i latou, o le ā se mea na semanū e te aʻoaʻoina ai?
8 E faapefea pe a na faapea sa e aufaatasi atu i le faapotopotoga Kerisiano i Efeso, i le itumalo o Roma i Asia, ina ua taunuu atu le tusi faagaeeina a Paulo iina i le ausoo? O le ā semanū e te aʻoaʻoina mai ai e faatatau i le vaega fai a Iesu i le fuafuaga a le Atua? I lena tusi sa faamatala ai e Paulo e faapea e ala mai ia Keriso, o le a toe autasia ai i le Atua mea uma i le lagi ma le lalolagi, ma o le mea alofa a le Atua e ala mai ia Keriso ua faasafua atu i tagata o atunuu uma lava, ma o tagata taitoatasi o ē na feoti i le silasila a le Atua ona o a latou agasala ua toe faaolaina i le faatuatua ia Keriso, ma ona o lenei sauniuniga, ua toe mafai ai ona avea tagata ma fanau pele a le Atua.—Efeso 1:1, 5-10; 2:4, 5, 11-13.
9. (a) O le ā e mafai ona fesoasoani ia te oe ina ia e iloa ai pe ua e malamalama lelei i le uiga o le mea na tusi atu ai Paulo i uso i Efeso? (e) Na faapefea i uso mai itumalo o Roma, ia na taʻua e Peteru, ona aafia i mea na latou aʻoaʻoina e faatatau ia Iesu?
9 Pe e avea ea lou talisapaia o na mea uma e faaloloto ai lou alofa mo le Alo o le Atua? Pe o le a taaʻina ea e lena alofa lou olaga i aso fai soo e pei ona faalaeiauina mai e le aposetolo o Paulo i le mataupu e 4 e oo i le 6 o le tusi o Efeso? Pe o lena ea talisapaia o le a uunaia ai oe e iloilo ma le faaeteete mea e faamuamua i lou olaga? Ona o le alofa mo le Atua ma le loto faafetai i lona Alo, pe e te ono faia ea fetuutuunaiga manaomia ina ia avea ai le faia o le finagalo o le Atua ma tumutumuga o lou olaga? (Efeso 5:15-17) E tusa ai ma le auala na aafia ai Kerisiano i Asia, Kalatia, ma isi itumalo o Roma i mea na latou aʻoaʻoina, na tusi atu le aposetolo o Peteru ia i latou e faapea: “[E ui] tou te le iloa atu [Iesu Keriso], a ua [outou] alolofa ia te ia. . . . [Ua tou] faatuatua ia te ia, tou te olioli ai ma le fiafia e le matalatalaina, e silisili ese lava.”—1 Peteru 1:8.
10. (a) O le ā le mea na mautinoa le fesoasoani atu i le alofa o uluai Kerisiano mo Iesu? (e) E mafai foi faapefea ona aogā mo i tatou?
10 Sa iai se isi mea na mautinoa le fesoasoani atu i le alofa mo le Alo o le Atua lea sa faapea ona lagona e na uluai Kerisiano o ē na tusi atu i ai Peteru. O le ā lena mea? E oo ane i le taimi na tusia ai e Peteru lana uluai tusi, a itiiti mai e lua tusi o le Evagelia—o le Mataio ma le Luka—ua uma ona faasalalauina i tagata. O Kerisiano o le uluai senituri sa lei vāai lava ia Iesu sa mafai ona faitau i nei tala a Evagelia. E mafai foi ona tatou faia faapea. O tusi o Evagelia e lē o ni tala lē moni; o loo iai uma faamaoniga o talafaasolopito maufaatuatuaina. I na tusitusiga faagaeeina, ua tatou maua ai le tele o mea e faaloloto ai lo tatou alofa mo le Alo o le Atua.
Le Agaga na Ia Faaalia
11, 12. O le ā se mea e faatatau i le agaga lea na faaalia e Iesu i isi tagata, ua māfua ai foi ona e alofa atu ia te ia?
11 I tala tusitusia i le soifuaga o Iesu, tatou te aʻoaʻoina ai le auala na ia feagai ai ma isi tagata. O le agaga na ia faaalia na pāʻia ai loto o tagata e oo lava i le taimi nei, ua silia ma le 1,960 tausaga talu ona mavae lona maliu. O so o se tagata o soifua nei ua puapuagatia i āuga o le agasala. E faitau miliona ua afaina fua i faiga lē tonu, o loo tauivi ma maʻi, po o isi lava mea o loo māfua ai lagona mafatia ona o le lē fiafia. Ua fetalai faapea Iesu i tagata faapena: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. . . . Auā e avegofie laʻu amo, o laʻu avega foi e māmā ia.”—Mataio 11:28-30.
12 Na faaalia e Iesu le matuā naunau atu mo ē matitiva, o ē fia ʻaai, ma i latou na faanoanoa. Ina ua tulai mai tulaga sa tatau ai ona ia faia faapea, sa oo lava ina ia fafagaina faavavega se motu o tagata e toatele. (Luka 9:12-17) Na ia faasaʻolotoina i latou mai tulaga na faapologaina ai. Na ia atiina ae foi lo latou faatuatua i le sauniuniga a le Atua i le aumaia lea o se iuga i faigata mai faiga faapolotiki ma tulaga tau tamaoaiga. Sa lei nutimomoia e Iesu agaga o i latou o ē na lotomomomo. Na ia faamalosia ma le tomai ē na lotovaivai i faiga faapelepele ma le alofa. Na ia faafouina i latou o ē na matuā mafatia ma i latou na pei o vavae ua mu itiiti ua toe a pepē. E amata mai lava i lena taimi seia oo mai i le taimi nei, ua avea lona suafa ma mea e faatupuina ai le faamoemoe, e oo lava i loto o i latou o ē e lei vāai lava ia te ia.—Mataio 12:15-21; 15:3-10.
13. Aisea ua tosina atu ai tagata i le auala lea na feutagai ai Iesu ma tagata agasala?
13 Sa lei taliaina e Iesu mea leaga na faia, peitai na ia faaalia le malamalama agaʻi i tagata o ē na faia measese i le olaga ae na latou faaalia le salamō ma liliu atu ia te ia mo le fesoasoani. (Luka 7:36-50) Sa nofo o ia ma talisua faatasi ma tagata o ē na lē amanaiaina e le lautele pe afai na lagona e ia o le faia faapea e saunia ai se avanoa e fesoasoani ai faaleagaga ia i latou. (Mataio 9:9-13) O le iuga o le agaga na ia faaalia, e faitau miliona tagata e faapea o latou tulaga o ē e lei vāai lava ia Iesu ua faagaeeina ina ia latou iloa lelei o ia ma faatuatua atu ia te ia.
14. O le ā e mataina ia te oe e faatatau i le auala na fesoasoani ai Iesu i tagata o ē sa mamaʻi, lē atoatoa vaega o tino, po o ē sa faanoanoa?
14 O le auala na feagai ai Iesu ma tagata o ē na mamaʻi pe lē atoatoa le malosi ua aumaia ai faamaoniga o lona māfana ma le alofa mutimutivale e faapena foi ma lona mafaia ona faaooina atu o le vaifofo ia i latou. O lea, ina ua faalatalata atu se tamaloa maʻi ua tumu i le lepela ma augani atu mo se fesoasoani, sa lei meia Iesu i le tulaga na vaai atu i ai. Ma sa lei fai atu o ia i le tamaloa e faapea, e ui lava ina mutimutivale lona alofa ia te ia, ae ua tugā le maʻi e leai se mea e mafai ona fai e fesoasoani atu ai. Na faatauanau atu le tamaloa e faapea: “Le Alii e, a ē finagalo i ai e te mafaia lava ona faamamā mai ia te au.” Ma le lei faatuai, sa aapa atu Iesu ma tago atu lona aao i le tagata lepela, ma fetalai atu: “Ou te loto i ai; ina mamā ia oe.” (Mataio 8:2, 3) I se isi mea na tupu, na saili atu ai se fafine ina ia faamalolo i lona maʻi i le tau lava i le paʻi atu i le pito o lona ofu. Na feagai Iesu ma ia i se auala agalelei ma atiina ae. (Luka 8:43-48) Ma ina ua ia fetaiai ma se solo o se maliu, na tumu o ia i le faanoanoa ona o le faavauvau o le fafine ua oti lana tane o lē e ana le tamaitiiti lea ua maliu. E ui lava ina sa lei fia faaaogaina e Iesu le mana na foai atu i ai e le Atua e saunia faavavega meaʻai mo ia lava, ae sa ia saoloto e faaaogā e toe faatūina ai le taulealea lea na oti ma toe faafoisia atu o ia i lona tina.—Luka 4:2-4; 7:11-16.
15 Ua faapefea i le faitauina o tala e uiga ia Iesu ma manatunatu loloto i ai ona aafia ai oe?
15 A o tatou faitauina nei tala ma manatunatu loloto i le agaga na faaalia e Iesu, e atili loloto ai lo tatou alofa mo ia lenei na foaiina mai lona soifua faaletagata ina ia mafai ai ona tatou ola e faavavau. E ui tatou te lei vāai lava ia te ia, ae tatou te lagona le māfana atu ia te ia, ma tatou fia mulimuli i ona tulagaaao.—1 Peteru 2:21.
Lona Faalagolago Atu ma le Lotomaulalo i le Atua
16. O ai sa faataulai faapitoa atu i ai e Iesu manatu, ma o le ā na ia faalaeiauina i tatou e fai?
16 Ae sili i isi mea uma, sa taulai atu e Iesu ona manatu ma o tatou manatu foi i lona Tamā faalelagi, o Ieova le Atua. Sa ia faaalia mai le poloaiga silisili o le Tulafono i lona fetalai mai: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.” (Mataio 22:36, 37) Na ia apoapoai atu i ona soo: “Ia outou faatuatua i le Atua.” (Mareko 11:22) Ina ua latou fesagai ma tofotofoga matuitui o lo latou faatuatua, sa ia faamalosiau atu ia i latou: “Ia outou . . . tatalo e lē aunoa.”—Mataio 26:41, NW.
17, 18. (a) Sa faapefea ona faataitaia e Iesu lona faalagolago atu ma le lotomaulalo i lona Tamā? (e) Aisea ua tāua tele ai ia i tatou le mea na ia faia?
17 Na faataatia e Iesu lava ia le faaaoaoga. Sa avea le tatalo ma vaega tāua o lona soifuaga. (Mataio 14:23; Luka 9:28; 18:1) Ina ua oo mai le taimi mo ia e filifilia ai ona aposetolo, sa lei tau ina faalagolago Iesu i lana lava faamasinoga, e ui lava sa muai iai agelu uma i le lagi i lana vaavaaiga. Sa ia faaaluina ma le lotomaulalo le po atoa e tatalo atu ai i lona Tamā. (Luka 6:12, 13) Ina ua fesagai ma le puʻeina faapagota o ia ma oo i ai se maliu tiga, sa toe saili atu foi Iesu i lona Tamā, i le tatalo atu i ai faatauanau. Sa lei manatu o ia faapea, ua ia iloa lelei lava Satani ma e faigofie lava ona ia taulimaina so o se mea e ono faufau e lē o loo leaga. Sa silafia lelei e Iesu le tāua o le tatau ona ia taulau. Pe a lē taulau o ia, pagā se matuā faalumaina o le a ono oo ai i lona Tamā! E pagā foi se lē taulau mo tagata, o ē o loo faamoemoe atu o latou ola i le togiola lea e tatau ona ofoina atu e Iesu!
18 Sa tatalo e lē aunoa Iesu—a o iai faatasi ma ona aposetolo i le afeafe aupito i luga i Ierusalema ma na atili foi ona toe tatalo naunautai a o iai i le faatoaga i Ketesemane. (Mataio 26:36-44; Ioane 17:1-26; Eperu 5:7) A o puapuagatia i le satauro, sa ia lei toatamai ia i latou o ē na fāifai ane ia te ia. Nai lo lea, na ia tatalo mo i latou o ē na gaoioi ona o lo latou lē iloa e faapea: “Loʻu Tamā e, ia e faamagaloina atu ia te i latou; auā ua latou le iloa le mea ua latou faia.” (Luka 23:34) Sa taulai atu pea lona finagalo i lona Tamā, i lona “tuuina atu o ia e ia i le na te faamasino tonu.” O fetalaiga faaiu lava na ia fofogaina atu a o i luga o le satauro sa avea o se tatalo atu i lona Tamā. (1 Peteru 2:23; Luka 23:46) Maeu so tatou agaga faafetai, ona o le faalagolago atoatoa atu o Iesu ia Ieova, ua mafai ai ona ia faaatoatoaina ma le faamaoni le tofiga na tuuina atu e lona Tamā ia te ia! E ui tatou te lei vāai lava ia Iesu Keriso, ae maeu le loloto o lo tatou alofa ia te ia mo mea na ia faia!
Le Faaaliga o lo Tatou Alofa mo Ia
19. I le faaalia o le alofa mo Iesu, o ā faiga o le a tatou alofia ona ua matuā lē talafeagai lava?
19 E mafai faapefea ona tatou avatu le faamaoniga e faapea o le alofa o loo tatou taʻua e sili atu nai lo na o upu? Talu ai o lona Tamā, o lē na alofa i ai Iesu, sa ia faasaina le faia o ni faatusa ona avea lea o nei mea e tuutoina atu i ai, e mautinoa la lo tatou lē āva ia Iesu e ala i le ʻulaina o na faatusa i se filifili i o tatou ua pe tauamoina i luga o le auala. (Esoto 20:4, 5; Ioane 4:24) O le a lē o se āva ia Iesu pe a tatou auai i ni sauniga faalotu, e tusa lava pe faafia ona fai i le vaiaso, pe afai tatou te lē o ola e tusa ai ma ana aʻoaʻoga i isi taimi atoa o le vaiaso. Na fetalai Iesu: “O le ua ia te ia aʻu poloaiga ma tausi i ai, o ia lea e alofa mai ia te au; o lē alofa mai foi ia te au, e alofaina o ia e loʻu Tamā.”—Ioane 14:21, 23; 15:10.
20. O ā nisi o mea o le a faaalia ai pe tatou te alolofa moni ia Iesu?
20 O ā poloaiga na ia tuuina mai ia i tatou? O le poloaiga silisili, ia tapuai atu tau lava i le Atua moni e toatasi, o Ieova. (Mataio 4:10; Ioane 17:3) Ona o lana matafaioi i le fuafuaga a le Atua, na aʻoaʻo ai foi e Iesu e faapea e tatau ona tatou faaalia le faatuatua ia te ia o le Alo o le Atua ma e tatau ona tatou faaalia lea mea e ala i le teteeina o galuega leaga ae savavali i le malamalama. (Ioane 3:16-21) Sa ia fautuaina i tatou ina ia muai saili le Malo o le Atua ma lana amiotonu, ia muai manatunatu mamafa i nei mea nai lo o manaoga faaletino. (Mataio 6:31-33) Sa ia poloai mai ina ia tatou fealofani e pei foi ona ia alofa mai ia i tatou. (Ioane 13:34; 1 Peteru 1:22) Ma na ia faatonuina foi i tatou ina ia tatou molimau atu i fuafuaga a le Atua, e pei foi ona sa ia faia. (Mataio 24:14; 28:19, 20; Faaaliga 3:14) E ui latou te lei vāai lava ia Iesu, ae ua iai le lima miliona o Molimau a Ieova i aso nei ua uunaia e le alofa moni mo ia ina ia usitaia ai na poloaiga. Ua lē avea lo latou lei vaaitino ia Iesu e faavaivaia ai lo latou naunautai ina ia usiusitai. Latou te manatua le fetalaiga a lo latou Alii i le aposetolo o Toma: ‘Pe ua e faatuatua ea, auā ua e vaai mai ia te au? Amuia o e lē vaai mai, a e faatuatua mai pea.’—Ioane 20:29.
21. E faapefea ona aogā ia i tatou le auai atu i le Faamanatuga o le maliu o Keriso, lea o le a faia i lenei tausaga i le Aso Sa, Mati 23?
21 E iai le faamoemoe o le a e iai faatasi ma i latou o loo i le lalolagi aoao o ē o le a potopoto faatasi i Maota o le Malo o Molimau a Ieova pe a goto le la i le Aso Sa, Mati 23, 1997, ina ia toe manatua ai le faaaliga silisili o le alofa o le Atua i tagata, ma faamanatu ai le maliu o lona Alo faamaoni, o Iesu Keriso. O mea o le a taʻua ma faia i lena faatasiga e tatau ona faalolotoina ai le alofa mo Ieova ma lona Alo ma faateleina ai le faanaunauga ina ia tausia poloaiga a le Atua.—1 Ioane 5:3.
O le a Faapefea Ona E Tali?
◻ Na faapefea ia i latou na sa faasino atu i ai le uluai tusi a Peteru ona latou iloa ma alolofa ia Iesu?
◻ O ā nisi o mea na faalogo i ai uluai Kerisiano o loo e maofa ai?
◻ O le ā se mea e faatatau i le agaga lea na faaalia e Iesu e faalolotoina ai lou alofa mo ia?
◻ Aisea ua tāua tele ai ia i tatou le faalagolago atu ma le lotomaulalo o Iesu i le Atua?
◻ E mafai faapefea ona tatou faataitaia lo tatou alofa mo Iesu Keriso?
[Ata i le itulau 16]
Tatou te māfana atu ia Iesu ona o le agaga sa ia faaalia