Pe a Lē Toe Iai ni Puapuaga

O PUAPUAGA sa lē o se vaega o le uluai fuafuaga a le Atua mo le aiga faaletagata. Na te lei fuafuaina ia puapuaga, e lei finagalo foi i ai o ia. ‘Afai o lea,’ atonu la e te fesili mai, ‘na faapefea la ona amata puapuaga, ma aisea ua faataga ai e le Atua e faaauau pea seia oo mai i le taimi nei?’—Faatusatusa i le Iakopo 1:13.

O loo maua le tali i le uluai faamaumauga o le talafaasolopito o le tagata, le Tusi Paia, ae maise lava le tusi o Kenese. Ua faapea mai lea tusi, na mulimuli o tatou uluai mātua o Atamu ma Eva i le fouvalega a Satani le Tiapolo faasaga i le Atua. O a la gaoioiga na lagā ai ni mataupu tāua na aafia saʻo ai lava le faavae o le tulafono tau i le pule silisili ese ma le faasologa maopoopo o le lalolagi. Ina ua la filifilia le aiā e faia ai a laua lava filifiliga i le mea e lelei ma le mea e leaga, na la luʻia ai le pule silisili ese a le Atua. Na la fesiligia ai lana aiā tatau e pule ai ma avea ai ma faamasino o “le lelei ma le leaga.”—Kenese 2:15-17; 3:1-5.

Aisea na Lē Faamalosi ai Loa le Faia o Lona Finagalo?

Atonu o le a e fesili mai: ‘Aisea la na lē faamalosia ai loa e le Atua le faia o lona finagalo?’ I le toatele, e foliga mai e matuā faigofie lava le mataupu. Ua latou faapea mai: ‘E iai le mana o le Atua. Sa tatau ona ia faaaogaina lona mana e faaumatia ai le ʻau fouvale.’ (Salamo 147:5) Ae seʻi fesili ifo ia te oe lava i le fesili lenei, ‘Pe ou te fiafia ea ia i latou uma o ē faaaogā lo latou malosi tele e faia faamalosi ai mea e latou te mananao e fai? Pe ou te lē ʻinoʻino ea pe a faaaogā e se taʻitaʻi tautalatasi se ʻau faaoosala e faaumatia ai ona fili?’ E toatele tagata mafaufau o le a meia i lena mea.

Ae o le a e faapea mai, ‘Oi, ae afai e faaaogā e le Atua lena mana, e leai se tasi e fesiligia ana gaoioiga.’ O e mautinoa lena mea? Pe e lē moni ea ua fesiligia e tagata le faatinoina e le Atua o lona mana? Ua latou fesiligia aisea ua ia lē faaaogaina ai lona mana i isi taimi, e pei ona ia faapalepale i amioga leaga. Ma ua latou fesiligia foi le mafuaaga ua ia faaaogaina ai lona mana i nisi taimi. E oo foi ia Aperaamo o lē na faamaoni sa ia fesiligia le faaaogaina e le Atua o lona mana e faaumatia ai Ona fili. Manatua, ina ua finagalo le Atua e faaumatia Sotoma. Sa sese le mataʻu o Aperaamo e faapea ina neʻi feoti ai tagata lelei faatasi ma tagata leaga. Na ia alaga atu: “Ia mamao lava ia te oe ona e faia faapea e fasioti i e amiotonu faatasi ma e amio leaga.” (Kenese 18:25) E oo lava i tagata e saʻo o latou mafaufau e pei o Aperaamo, e manaomia se faamautinoaga e faapea o le a lē faaaogaseseina atoatoa le mana.

E moni, sa ono mafai e le Atua ona faaumatia loa Atamu, Eva, ma Satani i lea taimi. Ae seʻi mafaufau i le aafiaga e faaono oo ai i isi agelu po o foafoaga i le lumanai, o ē atonu o le a iloa mulimuli ane e uiga i ana gaoioiga. Pe faamata o le a faaoso ai lo latou faia ai pea o fesili faatiga taliga e uiga i le tonu o le pule a le Atua? Po o le a lē tuuaia ai ea le Atua e faapea, o ia moni o se ituaiga o pule tautalatasi e faaaogā sese lana pule, e pei ona faamatalaina ai o ia e Nietzsche, o se Atua o lē na te faaumatia ma le lē alofa so o se tasi e tetee atu ia te ia?

Aisea e Lē Faamalosia ai Tagata e Faia le Mea Saʻo?

Atonu o le a fesili mai nisi: ‘Pe e lē mafai e le Atua ona faamalosia tagata e faia le mea saʻo?’ Ia, seʻi manatu foi i lenei mea. I le faagasologa atoa o le talafaasolopito, sa taumafai ai faigamalo ia gauai atu tagata i o latou mafaufauga. Ua faia foi e nisi faigamalo po o ni pule taitoatasi ia ituaiga o pulega eseese e ala i le taumafai e pulea mafaufau o tagata, atonu i le faaaogaina o vailaau po o le faia o ni taotoga, e taofia ai o latou tagata le mea alofa ofoofogia o le filifiliga saʻoloto. Pe e lē tāua ea ia i tatou le avea o ni tagata e iai le filifiliga saʻoloto, e tusa lava pe ono faaaogaseseina lea mea alofa? Pe tatou te faatagaina ea taumafaiga a so o se malo po o se taʻitaʻi e faoa lena saʻolotoga?

O le ā la se isi mea na faia nai lo o le vave faaaogā e le Atua o le mana e faamalosia ai le tulafono? Na filifilia e Ieova le Atua e faapea, o le auala e sili ona lelei e foia ai le fouvalega, o le faatagaina lea o se taimi lē tumau e tutoatasi ai mai lana pulega i latou o ē teena ana tulafono. O le a faatagaina ai i lenei mea le aiga faaletagata, o ē tupuga mai ia Atamu ma Eva se taimi faatapulaaina e pulea ai e i latou i latou lava e aunoa ma le gauai atu i le tulafono a le Atua. Aisea na ia faia ai lena mea? Auā na ia silafia e faapea, i se taimi, o le a aliai mai ai le mea moni e lē mafinauina, e faamaonia ai o lana auala e pule ai e saʻo pea ma tonu, e tusa lava pe na te faaaogaina lona mana e lē uma e faamalosia ai le faia o lona finagalo, ma so o se fouvalega lava e faia faasaga ia te ia, o le a iu, i se mala i le taimi nei, pe i se taimi mulimuli ane.—Teuteronome 32:4; Iopu 34:10-12; Ieremia 10:23.

Ae Faapefea Tagata Uma Lē Sala ua Afaina Fua?

Atonu e te fesili mai: ‘Ae faapefea i latou uma e lē sala ua afaina fua i le taimi nei?’ ‘Pe e aogā moni o latou tiga e faamaonia ai ni manatu taitasi o le tulafono?’ E leai, e leʻi faatagaina e le Atua le iai o mea leaga ina ia faamaonia ai ni manatu lavelave o le tulafono. Nai lo lea, ua faia ina ia faatumauina ai e faavavau le mea moni e faapea, e na o ia lava o le pule silisili ese ma e tatau ona usiusitai i ana tulafono ina ia maua ai pea e ana foafoaga uma le filemu ma le fiafia.

O le tasi o mea e sili ona tāua e tatau ona manatua e faapea, ua silafia e le Atua e mafai ona ia soloiesea atoatoa so o se mea leaga e ono afaina ai le aiga faaletagata. Ua ia silafia e faapea, o le vaitaimi lē tumau o tiga ma puapuaga ia na oo i ai, o le a maua ai ni iuga aogā. Seʻi manatu i se tinā a o taofiofia sana tama o loo tagi a o tuiina atu e le fomai se vailaau e puipuia ai o ia mai ni faamaʻi semanū e oti ai le tamaitiiti. E leai se tinā e manao e faalogoina e sana tama le tiga. E leai se fomai e manao e faapuapuagatia sana tagata maʻi. I lea taimi, e lē malamalama le tamaitiiti i le mafuaaga o le tiga, ae mulimuli ane, o le a ia iloa le pogai na faatagaina.

Po o se Mapusaga Moni mo Ē Puapuaga?

Atonu e lagona e nisi e faapea, o le tau ina iloa o nei mea, o le a maua ai sina mapusaga e i latou o puapuagatia. Ua taʻua e Hans Küng e faapea, o se faamalamalamaga lelei i le pogai o le iai o puapuaga i lē o puapuagatia, e “tai pei lava o le aogā o lou taumafai e faamatala lelei atu mea o faia ai meaʻai i se tagata o ogotia i le fia ʻai.” Ua fesili mai o ia e faapea: “Pe e mafai e mafaufauga atamai uma o tagata ona faamafanafanaina moni ai tagata ua lofituina i puapuaga?” Ia, o “mafaufauga atamai uma” o tagata o ē e lē amanaia le Afioga a le Atua, le Tusi Paia, e lē o faamafanafanaina ai i latou o ē o puapuagatia. O na mafaufauga faaletagata ua na ona atili faateleina ai o le faafitauli e ala i lo latou faapea mai, na finagalo le Atua ina ia puapuagatia le tagata ma na fuafuaina le lalolagi e avea o se vanu o tofotofoga mo i latou o ē o le a mulimuli ane maua le ola i le lagi. Pagā se upuvale!

Peitai, ua aumaia e le Tusi Paia lava ia se faamafanafanaga moni. E lē gata ua saunia mai ai se faamalamalamaga talafeagai i le iai o puapuaga, ae ua atiina aʻe ai foi le talitonu atoatoa i le folafolaga mautinoa a le Atua e faapea, o le a ia aveesea mea leaga uma ua afaina ai mai lenei faatagaina mo se taimi lē tumau o puapuaga.

‘Toe Fuatai Mea Uma Lava’

Ua lē o toe umi nei se taimi ona toe faafoisia mai loa lea e le Atua o mea i le auala na ia finagalo iai a o lei fouvale lana uluai foafoaga faaletagata. Ua toeitiiti nei ona uma loa lea o lana taimi faatulagaina e pule ai le tagata. Ua tatou ola i le taimi o le a ia auina mai ai “Iesu Keriso lea; e tatau ona nofo o ia i le lagi seia oo i tausaga e toe fuatai ai mea uma lava, ua fetalaia mai e le Atua i fofoga o ana perofeta paia uma lava talu mai anamuā.”—Galuega 3:20, 21.

O le ā o le a faia e Iesu Keriso? O le a ia soloiesea mai le lalolagi fili uma o le Atua. (2 Tesalonia 1:6-10) O lenei faasalaga, o le a lē faatuai mai e pei ona faia e pule faaletagata. O le fau ma soloi o faamaoniga e faamaonia ai mala ua oo mai ona o le leaga o pulega a tagata, o le a faaalia ai ua matuā tonu atoatoa i le Atua le toeitiiti ona ia faaaogaina lea o lona mana e lē gata mai, e faamalosia ai le faia o lona finagalo. (Faaaliga 11:17, 18) O lona uiga o le a muamua lava le “puapuaga tele” o se mea e lei faapea ona oo muamua i le lalolagi, e tali tutusa ma le Lolo i ona po o Noa, ae e sili atu nai lo lena. (Mataio 24:21, 29-31, 36-39) O i latou o le a sao mai lenei “puapuaga tele” o le a tofo i “tausaga e filemu ai” pe a latou vaaia le faataunuuga o folafolaga uma a le Atua na faaooina mai “e ala i fofoga o ana perofeta paia.” (Galuega 3:19; Faaaliga 7:14-17) O le ā ua folafolaina mai e le Atua?

Ia, ua faapea mai perofeta a le Atua anamua, o le a faaiuina puapuaga na māfua ona o taua ma le totomasaa. Mo se faaaoaoga, ua taʻu mai ia i tatou e le Salamo 46:9 e faapea: “Ua faaiua e ia o taua e oo lava i tuluʻiga o le lalolagi.” E lē toe iai ni tagata e afaina fua ma ni tagata sulufai ona o mea matautia, o le a lē toe iai i latou e tatoso faamalosia, pipili, ma fasiotia i faigataua sauā! Ua faapea mai le perofeta o Isaia: “E le sii atu le pelu e le tasi nuu i le tasi nuu, latou te le toe aʻoaʻo foi i taua.”—Isaia 2:4.

Ua valoia foi e perofeta se iuga i puapuaga ua faapogaia e solitulafono ma le lē faamasinotonu. Ua folafola mai i le Faataoto 2:21, 22 e faapea, “auā o e amio saʻo, latou te mau i le nuu;” a o i latou e faapogaia tiga ma puapuaga “e vavaeeseina . . . ai le laueleele.” O le a lē toe ‘pule le isi tagata i le isi e leaga ai o ia lava.’ (Failauga 8:9) O le a aveesea e faavavau ē amio leaga uma. (Salamo 37:10, 38) O le a mafai ona ola filemu ma saogalemu tagata uma, e aunoa ma ni puapuaga.—Mika 4:4.

E lē gata i lea, ua folafola mai foi e perofeta o le a faaiuina puapuaga e pogai ona o maʻi o le tino ma faalogona faamaʻia. (Isaia 33:24) Ua folafola mai e Isaia o le a faamaloloina uma ē tauaso, ē tutuli, ē pipili, ma i latou uma lava ua mafatia i maʻi ma faamaʻi. (Isaia 35:5, 6) O le a aveesea foi e le Atua āuga o le oti. Na valoia e Iesu e faapea, “e faalogo ai i lona leo o i latou uma ua i tuugamau, ma latou o mai ai.” (Ioane 5:28, 29) I le faaaliga na ia vaaia “o le lagi fou ma le lalolagi fou,” na taʻu atu ai i le aposetolo o Ioane e faapea, “e sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga.” (Faaaliga 21:1-4) Seʻi manatu i lena mea! E lē toe iai se tiga, leai ni loimata, leai ni auē, leai se oti—le toe iai ni puapuaga!

Po o ā lava ni mala ua mafai ona tutupu mai ona o lenei vaitaimi lē tumau o mea leaga, o le a foia uma lava. E oo lava i manatunatuga o tiga faaletagata ma puapuaga—e lei fuafuaina e le Atua—o le a matuā soloiesea. Na valoia e Isaia e faapea: “Auā ua galo muai puapuaga. . . e le toe manatua mea na muamua, e le alu ae foi i le loto.” (Isaia. 65:16, 17) O le a faataunuuina atoatoa le uluai fuafuaga a le Atua mo se olaga lelei atoatoa faaletagata i le filemu atoatoa ma le fiafia i se lalolagi parataiso. (Isaia 45:18) O le a matuā mautinoa aʻiaʻi lana pule silisili ese. Maeu se faaeaga o le ola ai i le taimi o le a faaiuina ai e le Atua puapuaga o tagata, o se taimi o le a ia faaalia ai e lē o ia o se “pule e faaaogaseseina le mana, o se pule taufaasese, faaʻoleʻole, o se faaoosala,” e pei ona tuuaia ai e Nietzsche, ae o ia o se pule e lē mavae lona alofa, e atamai, ma tonu i le faatinoina atoatoa o lona mana!

[Ata i le itulau 5]

ua faia e nisi taʻitaʻi faiga e pulea ai mafaufau, ua taofia mai ai i o latou tagata le filifiliga saʻoloto

[Ē Ana le Ata i le itulau 5]

UPI/Bettmann

[Ata i le itulau 7]

O le a olioli atoatoa tagata uma i le ola pe a lē toe iai ni puapuaga