Pe e te Fefe e Faatuatuaina Isi?

‘E leai se tasi e mafai ona ou talanoa atu i ai. E lē malamalama tagata. E pisi naua foi i latou i o latou lava faafitauli. E leai so latou taimi mo oʻu faafitauli.’ E toatele tagata e iai lagona faapena, o lea la ua taofiofimamau ai lava o latou manatu ia i latou lava. Pe a fesili atu isi po o ā mai i latou, e masani ona latou mananao e faamatala atu, ae latou te lē faia faapea. E lē mafai lava ona ia i latou se lagona saʻoloto e faamatala atu.

E moni, e iai i latou o ē e lē manaomia se fesoasoani mai isi. Peitai, o le toatele lava e latou te matuā manaomia se fesoasoani ae popole e faailoa atu o latou lava manatu totino, faalogona, ma mea e oo ia i latou. Po o faapena ea oe? Pe e leai moni lava se tasi e mafai ona e maufaatuatuaina?

Malamalama i le Pogai o le Fefe

I le lalolagi i aso nei, ua taatele ai le lē maufaatuatuaina. E lē mafai e tagata talavou ona talanoa atu i o latou mātua. O mātua foi latou, e lē fetalanoaaʻi. E toaitiiti lava e mananao e talanoa atu ia i latou o ē pule. I le lē mafai ona maufaatuatuaina isi, ua liliu atu ai nisi i le ʻava malosi, fualaau faasaina, po o se olaga lē pulea ona o le taumafai e sola ese mai o latou faafitauli.—Faataoto 23:29-35; Isaia 56:12.

O le talanoa atu i tagata maualuluga e pei o taʻitaʻi lotu, fomai, tagata e faia togafitiga, ma faiaʻoga, ua lē mautonu ai ona o le anoanoai o faaaliga lē faamaoni ma amioga lē mamā. Mo se faaaoaoga, ua faapea mai se tasi suesuega, e sili atu i le 10 pasene o taʻitaʻi lotu o loo aafia i amioga leaga faaleituaiga. Ua mātauina e se tasi tusitala e faapea: “O nei tagata ua faaiuvaleina le maufaatuatuaina, ua latou ʻeli lua loloto e faaleagaina ai faiā faaletagata.” Ua faapefea ona aafia ai i lenei mea a latou faapotopotoga? Ua faaumatia ai le maufaatuatuaina.

O le salalau atu o le paʻū maulalo o amioga tatau, ua iu ai foi i se tulaga faigata i le aiga, ua avea ai o se tulaga masani le lē maufaatuatuaina i totonu o le aiga, ae ua lē o se mea e seāseā tupu. I le taimi muamua, sa avea ai le aiga ma maluapapa. I aso nei ua masani lava ona pei e na o se nofoaga e ʻai ai. A o tuputupu aʻe se tamaitiiti i totonu o se aiga “e le loto aiga,” o le iuga e masani lava ona iu i ai, o le lē mafai lea ona maufaatuatuaina e le tasi o le isi pe a oo ina matutua.—2 Timoteo 3:3.

E lē gata i lea, a o faateleina le leaga o tulaga o le lalolagi, ua tele ai foi ina lamatia i tatou i mea matautia e ono tutupu mai i le lumanai. I se tulaga faapena na tusi ai le perofeta o Mika e faapea: “Auā neʻi outou faatuatua i le uo.” (Mika 7:5) Atonu o le a oo ia te oe se faalogona faapena pe a mavae sina lē fiafia itiiti, se faamoemoe lē taulau, po o se mea telē foi na tupu na lamatia ai lou ola. Ua matuā faigata ai ona e toe faatuatuaina isi ma oo ai ina ese ou faalogona, ma oo ai ina pei e te nofo i tua o se papupuni i aso taitasi. (Faatusatusa i le Salamo 102:1-7.) E moni, o se uiga faapena atonu o le a fesoasoani ia te oe e faia ai gaoioiga masani, ae o lou “loto tiga” e lē mafai ai ona maua sou fiafia moni i le olaga. (Faataoto 15:13, NW) O le upu moni, ina ia e malosi ai faaleagaga, i faalogona ootia, i le mafaufau ma le faaletino, e tatau ona lepeti i lalo lena papupuni, ma e tatau foi ona e aʻoaʻoina le faatuatuaina o tagata. Pe mafai ona faia o lena mea? Ioe.

Aisea e Tatau ai ona Lepeti i Lalo le Papupuni?

O le tatala atu o ou faalogona i isi e aumaia ai le mapusaga i se loto ua tiga. Sa oo ia Hana se mea faapena. Sa sologa lelei lana faaipoipoga, se aiga malupuipuia, ae sa matuā mafatia lona loto. E ui lava sa “tiga lona loto,” ae sa ia faaalia le atamai ma ‘tatalo atu ia Ieova,’ ma le faatauanau na tete ai ona laugutu. Ioe, sa tatala atu lona loto ia Ieova. Ona sasaa atu lea o ona faalogona ia Eli o lē na fai ma sui o le Atua. O le ā le iuga? “Ona alu ai lava lea o [Hana], ua ʻai o ia ua le toe mata faanoanoa.”—1 Samuelu 1:1-18.

E tele aganuu ua iloa le aogā o le faia o ni talanoaga totino. Mo se faaaoaoga, o le fetufaaʻi o manatu ma i latou o ē na oo i ni tulaga faapena, ua faamaonia le aogā. Ua manatu tagata suesue e faapea: “O le taofiofi o faalogona e oo mai ai maʻi—e manaomia ona tatou faaali atu o tatou faafitauli ina ia maloloina ai o tatou mafaufau.” Ua faamautinoa mai e le toatele o saienitisi suesue le moni o le faataoto faagaeeina o loo faapea mai: “O lē ua vavaeese o ia, ua saili o ia i lona lava manao manatu faapito; e tetee atu o ia i poto aogā uma lava.”—Faataoto 18:1, NW.

Afai e lē sasaaina atu ou faalogona i isi, e mafai la faapefea ona latou fesoasoani ia te oe? E ui o Ieova le Atua e silafia loto, o ou mafaufauga lilo la ma faalogona loloto, e lē mafai ona iloa e lou aiga ma au uo—seiloga ua e faailoa atu. (1 Nofoaiga a Tupu 28:9) Pe afai o le faafitauli e aafia ai le solia o le tulafono a le Atua, o lou lē tautino atu o le mataupu, o le a na ona faateleina ai le leaga.—Faataoto 28:13.

E mautinoa, o aogā o le faailoa atu o se mafatiaga i isi, e sili mamao atu lena nai lo o le popole ina neʻi afaina ai. O le mea moni, e lē o le uiga o lenei mea e faapea, e tatau ona faailoa auiliili atu o tatou faafitauli totino. (Faatusatusa i le Faamasino 16:18; Ieremia 9:4; Luka 21:16.) ‘E iai uo e iu ina faaleagaina e le tasi le isi,’ ua lapatai mai ai le Faataoto 18:24, ona toe faaopoopo mai lea e faapea: “A o i ai le tagata alofa e sili ona pipii mai i lo le uso.” O fea e mafai ona e maua ai se uo faapena?

Maufaatuatuaina i Totonu o Lou Aiga

Afai e iai sou faafitauli, po ua e taumafai e talanoaina ma lau paaga faaipoipo po o ou mātua? Ua faailoa mai e se tasi faufautua e iai le poto masani e faapea: “Mo le tele o faafitauli, e na o le pau lava le mea e manaomia, o le matuā talanoaina lelei.” (Faataoto 27:9) O tane Kerisiano o ē ‘alolofa i a latou avā e pei o i latou lava,’ o avā “o ē usiusitai atu i a [latou] lava tane,” ma mātua o ē manatu mamafa i la latou tiute tauave mai le Atua ‘ina ia tausia aʻe a latou fanau i aoaiga ma tulafono faalemafaufau a Ieova’ o le a galulue malolosi e avea o ni faufautua o ē faalogologo ma le alofa ma le manatu e fia fesoasoani. (Efeso 5:22, 33; 6:4) E ui lava e leai sana avā po o se fanau i le tulaga faaletino, ae maeu se faaaoaoga matagofie na faataatia e Iesu e tusa ai o lenei mataupu!—Mareko 10:13-16; Efeso 5:25-27.

Ae faapefea pe afai e lē gafatia e tagata o le aiga ona taulimaina le faafitauli? I le faapotopotoga Kerisiano, e lē tatau ona tatou manatu ua tuua na o i tatou. Na faapea mai le aposetolo o Paulo: “Po o ai le ua vaivai, ou te le vaivai ai?” (2 Korinito 11:29) Na ia apoapoai mai: “Ia outou fesui i a outou avega e ave.” (Kalatia 6:2; Roma 15:1) I o tatou uso ma tuafafine faaleagaga, e mautinoa e mafai ona tatou maua ai e sili atu nai lo o le tasi le ‘uso na fanau mai mo le aso vale.’—Faataoto 17:17.

Maufaatuatuaina i Totonu o le Faapotopotoga

I le sili atu i le 80,000 faapotopotoga a Molimau a Ieova i le lalolagi aoao, o loo iai tane loto maulalo o ē o loo auauna “o se aufaigaluega faatasi mo lo outou olioli.” (2 Korinito 1:24, NW) O i latou nei o toeaina. Ua mātauina e Isaia e faapea: “E fai foi le tagata e pei o se lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foi o le papa tele i le nuu ua le o i ai se vai.” O le uiga lena o loo taumafai le ʻau toeaina e faatino.—Isaia 32:2; 50:4; 1 Tesalonia 5:14.

E ausia e toeaina mea e manaomia e le Tusi Paia a o lei ‘tofia e le agaga paia.’ O le iloa e uiga i lenei mea, o le a faamalosia ai lou mautinoa ia i latou. (Galuega 20:28; 1 Timoteo 3:2-7; Tito 1:5-9) O se mea e te lua talanoaina ma se toeaina, o le a matuā lilo lava. O le maufaatuatuaina, o se tasi lea o ona agavaa.—Faatusatusa i le Esoto 18:21; Neemia 7:2.

O toeaina o le faapotopotoga “o loo leoleo i latou mo o outou agaga, latou te tala atu le tala i ai.” (Eperu 13:17) Pe e lē uunaia ai ea oe e lenei mea e te maufaatuatuaina nei tane? E masani lava, e lē tutusa toeaina uma i nei uiga. O nisi e foliga mai e faigofie ona talanoa atu i ai, e agalelei, pe malamalama foi nai lo o isi. (2 Korinito 12:15; 1 Tesalonia 2:7, 8, 11) Aisea e te lē talanoa atu ai i se toeaina e te lagona ai le toafilemu?

O nei tane e lē totogia. Nai lo o lea, o i latou o “mea alofa i tagata,” ua saunia e Ieova e fesoasoani ia te oe. (Efeso 4:8, 11-13; Kalatia 6:1) E faapefea? I le faaaogaina ma le tomai o le Tusi Paia, o le a latou faatatauina le mana o le Tusi Paia e faamālōlō ai lou tulaga totino. (Salamo 107:20; Faataoto 12:18; Eperu 4:12, 13) O le a latou tatalo faatasi ma oe, ma tatalo mo oe. (Filipi 1:9; Iakopo 5:13-18) O le fesoasoani e aumai i faufautua alolofa faapena, e tele se sao e faia ai i le faamaloloina o se agaga ua mafatia, ma toe faafoisia ai le filemu o le mafaufau.

Le Auala e Atiina Ae ai ni Faiā Maufaatuatuaina

O le talosaga atu mo se fesoasoani, fautuaga, pe na ona faalogologo lelei, e lē o se faailoga o se vaivaiga po o le lē taulau. E na o se faailoaga moni lea e faapea o i tatou e lē lelei atoatoa ma e leai se tasi e mafai ona maua tali uma. E mautinoa, o le faufautua silisili ma lē e maufaatuatuaina o loo ia i tatou, o lo tatou Tamā faalelagi lea, o Ieova le Atua. E tatou te ioe faatasi ma le faisalamo o lē na tusi mai e faapea: “O Ieova, o loʻu malosi ma loʻu talita o ia; na faatuatua loʻu loto ia te ia, ona ou maua ai lea o le fesoasoani.” (Salamo 28:7) I le tatalo e mafai ona tatou ‘sasaa atu o tatou loto’ ma le lē mataofiofia ia te ia i so o se taimi, ma le mautinoa e faafofoga mai o ia ia te i tatou ma tausia i tatou.—Salamo 62:7, 8; 1 Peteru 5:7.

Ae e mafai faapefea ona e faatuatuaina toeaina ma isi o le faapotopotoga? Muamua, suesue ifo ia te oe lava. Po o iai ni faavae moni o lou popole? Pe e te masalosalo i gaoioiga a isi? (1 Korinito 13:4, 7) Pe e iai se auala e faaitiitia ai le tulaga e ono tiga ai? Ioe. E faapefea? Taumafai e faamasani totino ma isi i le itu faaleagaga. Talanoa ma i latou i sauniga a le faapotopotoga. Auai faatasi ma i latou i le galuega mai lea fale i lea fale. O le maufaatuatuaina, e tatau ona galue i ai ina ia maua, e pei lava o le faaaloalo. O lea ia onosai. Mo se faaaoaoga, a o agaʻi ina e masani lelei i se leoleo mamoe faaleagaga, o le a tupu ai lou mautinoa e uiga ia te ia. Faailoa auauaʻi atu ou popolega. Afai e tali mai o ia i se auala talafeagai, loto alofa, ma le faamaoni, ona mafai lea ona sasaa atili atu ou lagona.

O uso tapuai ia Ieova, ae maise lava toeaina Kerisiano, e galulue malolosi e faataitai i uiga agalelei o le Atua i a latou faiā ma isi. (Mataio 5:48) O lenei mea e iu ai i se siomaga e maufaatuatuaina i totonu o le faapotopotoga. Ua faapea mai se tasi ua loa ona auauna o se toeaina: “E tasi lava le mea e tatau ona iloa e uso: E tusa lava po o le ā se mea e faia e se tagata, e lē aveesea ai le alofa faa-Kerisiano o le toeaina mai ia te ia. Atonu e lē fiafia o ia i le mea na faia e le tagata, ae e tumau pea ona alofa o ia i lona uso ma manao e fesoasoani ia te ia.”

O lea, e lē manaomia ona ia te oe se lagona e na o oe lava ma lou faafitauli. Talanoa atu i se tasi “e iai agavaa faaleagaga,” o sē e mafai ona fesoasoani ia te oe e amo faatasi lau avega. (Kalatia 6:1) Manatua, “o le atuatuvale i le loto o le tagata ua faavaivai ai o ia,” ae “o upu matagofie, o le meli ua sisina ifo ia; e suamalie i le loto, ma le mea e malolo ai ivi.”—Faataoto 12:25; 16:24.

[Pusa i le itulau 26]

E mafai ona valaaulia so o se Kerisiano e fesoasoani atu i se faafitauli totino o se tasi o le aiga, se uo, po o se uso faaleagaga. E te iloa le auala e fesoasoani ai?

O Se Faufautua e Taulau Manuia

e faigofie ona faalatalata atu i ai tagata: Mataio 11:28, 29; 1 Peteru 1:22; 5:2, 3

na te filifilia se faatulagaga e fetaui lelei: Mareko 9:33-37

e saili ina ia malamalama i le faafitauli: Luka 8:18; Iakopo 1:19

e faatoʻatoʻa: Kolose 3:12-14

e fesoasoani i faalogona mafatia: 1 Tesalonia 5:14; 1 Peteru 3:8

na te iloaina ōna lava tapulaa: Kalatia 6:3; 1 Peteru 5:5

na te avatua fautuaga maʻoti: Salamo 19:7-9; Faataoto 24:26

ena te tausisia upu faalilolilo: Faataoto 10:19; 25:9