Ia Loto Tetele Auā ua Latalata Mai le Laveaiina

“Ou te ia te oe e laveai ia te oe, ua fetalai mai ai Ieova.”—IEREMIA 1:19.

1, 2. Aisea e manaomia ai e le aiga faaletagata le laveaiina?

LAVEAIINA! Maeu se upu e faamafanafanaina ai! O le laveaiina o lona uiga o le faasaoina, faasaoloto mai se tulaga leaga, se tulaga lē fiafia. E aofia ai i lenei le manatu o le oo atu lea i se tulaga e sili atu le lelei ma le fiafia.

² Maeu le matuā manaomia e le aiga faaletagata o se laveaiina faapena i lenei taimi! Ua omia tagata i so o se mea ma loto vaivai i faalavelave faigata—i tulaga tau tamaoaiga, vafealoai, faaletino, faalemafaufau, ma faalogona ootia. O le toatele ua oono ma lē fiafia i le tulaga o agaʻi atu i ai le lalolagi ma ua mananao i se suiga e sili ona lelei.—Isaia 60:2; Mataio 9:36.

‘O Aso Faigata’

3, 4. Aisea ua matuā manaomia ai lava se laveaiina i le taimi nei?

³ Talu ai ua sili atu puapuaga ua tutupu mai i lenei 20 senituri nai lo so o se isi lava vaitaimi, ua matuā manaomia ai lava se laveaiina i le taimi nei nai lo se isi lava taimi ua teʻa. I aso nei, e silia ma le piliona tagata o loo ola i tulaga ua matuā matitiva lava, ma ua faatuputeleina lena fuainumera pe ā ma le 25 miliona i le tausaga. I tausaga taitasi, e tusa ma le 13 miliona tamaiti e feoti ona o le lē lelei o meaʻai po o nisi mafuaaga ona o le mativa—e silia ma le 35,000 i le aso e tasi! Ma e faitau miliona tagata matutua e maliliu ona o faamaʻi eseese ae lei tāitai o latou tausaga.—Luka 21:11; Faaaliga 6:8.

⁴ O taua ma vevesiga faaleatunuu ua māfua ai le anoanoai o mafatiaga e lē mafaamatalaina. Ua faapea mai le tusi Death by Government, o taua, o fevaevaeaiga i le va o ituaiga ma tapuaiga, ma le fasiotia e faiga malo o le anoanoai o o latou lava tagatanuu, ua “maliliu ai le silia ma le 203 miliona tagata i lenei senituri.” Ua faapea mai atili: “O le aofaiga moni o ē ua fasiotia ai e toeitiiti lava atoa le 360 miliona tagata. E tai pei ua faatafunaina lo tatou ituaiga e se Mala Uliuli faaonaponei. Ma o le tulaga moni lava lea ua iai, o se mala e ala mai i le Pule, ae lē o se mala ona o siama.” Na matauina e le tusitala o Richard Harwood e faapea: “O taua sauā o senituri ua mavae e na o se mea noa pe a faatusatusa atu i ai.”—Mataio 24:6, 7; Faaaliga 6:4.

5, 6. O le ā ua māfua ai ona matuā faigata o tatou taimi?

⁵ E ese ai mai tulaga pagatia i tausaga e lei mamao atu, ua matuā faateteleina solitulafono sauā, amioga lē mamā, ma le malepelepe o aiga. Na matauina e lē na failautusi muamua i le vaega o aʻoaʻoga a le Iunaite Setete o William Bennett e faapea, i le 30 tausaga, na faateleina ai i le 41 pasene le faitau aofai o tagata i Amerika, ae o solitulafono sauā na faatuputeleina i le 560 pasene, o pepe o le po e 400 pasene, o alei e 300 pasene, ma tupulaga talavou na pule i o latou lava ola e 200 pasene. Na lapatai mai Polofesa John DiIulio Jr., mai le Iunivesite o Princeton e faatatau i le faatuputupulaia o talavou o ē e “matuā taufeai,” o ē e “fasioti tagata, fasi tagata, toso teine, gaoi, talepe fale, ma faatupu vevesi i alalafaga. E lē fefefe i le taʻuvalea pe a maua, le tiga o le falepuipui, po o mafatiaga o le loto fuatia ifo.” I lena lava atunuu, o le maliu ina ua fasiotia e se tasi o le mafuaaga numera lua lea o le oti ia i latou e 15 e oo i le 19 tausaga le matutua. Ma e toatele tamaiti e laiti ifo i le fa tausaga le matutua ua maliliu ona o faiga sauā, nai lo tamaiti na maliliu ona o faamaʻi.

⁶ O solitulafono ma faiga sauā faapenei e lē o gata mai i se atunuu se tasi. E tele atunuu ua lipotia mai ai le faatuputeleina o nei mea. O se mea ua lagolago atu i le faatupulaia o nei mea o le anoanoai lea o vailaau faasaina ua faapea ona amio piopio ai le faitau miliona o tagata. Ua faapea mai le Sydney Morning Herald a Ausetalia: “O le fefaatauaiga o vailaau faasaina i le lalolagi atoa ua avea ma pisinisi lona lua e sili atu lona tamaoaiga e pito atu i le fefaatauaiga o meatau.” O se tasi o vala, o le faatuputeleina lea o faiga sauā ma amioga lē mamā ua faatumulia ai televise. I le tele o atunuu, e oo atu le matua o se tamaitiiti i le 18 tausaga, ua ia vaaia le faitau afe o gaoioiga sauā i le televise ma le anoanoai o amioga lē mamā. O se taaiga e sili ona leaga, ona o mea ia o loo fafaga ai e lē aunoa o tatou mafaufau, e fafau aʻe ai o tatou uiga totino.—Roma 12:2; Efeso 5:3, 4.

7. Na faapefea ona muai taʻua mai e valoaga o le Tusi Paia tulaga leaga o loo iai nei?

⁷ Ua muai taʻua mai ma le tonu e valoaga o le Tusi Paia le faatuputeleina o mea leaga e tutupu i lo tatou senituri. Ua faapea mai o le a iai taua i le lalolagi aoao, o mala e ala mai i faamaʻi, o oge, ma le faatuputeleina o le amioleaga. (Mataio 24:7-12; Luka 21:10, 11) Ma pe a tatou manatunatu i le valoaga ua tusia i le 2 Timoteo 3:1-5, ua pei lava o loo faalogologo i tala fou o aso taitasi. Ua faailoa mai ai lo tatou vaitaimi o “aso e gata ai,” ma ua faamatala mai ai tagata o ‘ē alolofa ifo ia i latou lava, o ē mananao i tupe, o ē lē faalogo i matua, o ē lē faamaoni, o ē lē loto aiga, o ē lē pulea, o ē faasauā, o ē faamaualuluga, o ē mananao i mea faafiafia nai lo le alolofa i le Atua.’ O le tulaga moni lava lena ua iai le lalolagi i aso nei. E pei ona tautino mai e William Bennett e faapea: “Ua anoanoai faailoga . . . o le oo atu o le tulaga malamalama o le lalolagi i le matuā faaleagaina.” Ua oo foi lava ina taʻua faapea na faamutaina le tulaga malamalama o le lalolagi i le Taua Muamua a le Lalolagi.

8. Aisea na faaoo mai ai e Ieova le Lolo i aso o Noa, ma e faapefea ona fesootai mai i o tatou aso?

⁸ Ua sili atu ona leaga le tulaga o iai nei nai lo le vaitaimi a o lei oo le Lolo i aso o Noa, ina “ua tumu le lalolagi i le saua.” I tuā i lena vaitaimi, na mumusu ai le toatele o tagata e salamō mai o latou ala leaga. O lea na fetalai ai le Atua e faapea: “Ua tumu le lalolagi i le saua ona o i latou; faauta foi, o aʻu lava, ou te faaumatia i latou atoa ma le lalolagi.” Na faamutaina e le Lolo lena lalolagi sauā.—Kenese 6:11, 13; 7:17-24.

E Leai se Laveaiina Mai Tagata

9, 10. Aisea e lē tatau ai ona tatou faamoemoe atu i tagata e aumaia le laveaiina?

⁹ Pe e mafai e taumafaiga a tagata ona laveaiina i tatou mai nei tulaga leaga? Ua tali mai faapea le Afioga a le Atua: “Aua tou te faatuatua i alii, po o le fanau a tagata, e le o i ai se olataga.” “E le o i le tagata e savali ona faatonuina le mea e ui ai o ia.” (Salamo 146:3; Ieremia 10:23) O le faitau afe o tausaga o le talafaasolopito ua faamaonia ai le saʻo o na upu moni. Ua faataitaia e tagata ia ituaiga o faiga malo uma lava, o faiga tau tamaoaiga, ma faiga tau vafealoai e oo i ai lo latou iloa, ae ua faateleina pea le leaga o tulaga o iai. Pe ana iai se vaifofo faaletagata, semanū ua manino mai i le taimi nei. Nai lo lea, o le tulaga moni o loo iai, ua “pule . . . le tasi tagata i le tasi, e leaga ai o ia lava.”—Failauga 8:9; Faataoto 29:2; Ieremia 17:5, 6.

¹⁰ I ni tausaga ua tuanai atu, na taʻua ai e Zbigniew Brzezinski o lē sa avea muamua ma faufautua i le puipuiga o le saogalemu o le malo o Amerika e faapea: “O le faaiuga mautinoa o so o se faatulagaga lē faaituau o tulaga o mea o tutupu i le lalolagi aoao e faapea, o le fesouaina i le vafealoai, o vevesiga i faiga malo, o faafitauli tau i le tamaoaiga, ma feteenaiga i atunuu uma, e foliga mai o le a matuā salalau atu.” Na ia faaopoopo mai e faapea: “O le lamatiaga o fesagai nei ma le tagata [o le] leai o se pulea lelei i le lalolagi aoao.” O le faavasegaina o tulaga o le lalolagi o iai nei ua matuā fetaui lelei i aso nei. Na faamatala mai e se faatonu o le New Haven Register, i Connecticut e faatatau i le faatuputupulaia o sauaga e faapea: “E aliali mai ua taumasuasua le ipu, ua lē mafai ona toe pulea le tulaga ua iai.” Ioe, o le a lē toe mafai ona pulea le tulaga faaleagaina ua oo atu i ai le lalolagi, auā o le valoaga e faatatau i nei “aso e gata ai,” ua faapea mai foi: “A o tagata amio leaga ma e taupelopelo, e alualu pea lava lo latou leaga, o loo faasese atu, ua faaseseina foi i latou.”—2 Timoteo 3:13.

11. Aisea e lē mafai ai e taumafaiga a tagata ona toe suia le agaʻi atu ina matuā leaga tulaga o iai nei?

¹¹ E lē mafai e tagata ona toe suia faagasologa ua iai nei talu ai o Satani o le “atua o le lalolagi nei.” (2 Korinito 4:4) Ioe, “o le lalolagi uma o loo nofo toilalo i loo leaga.” (1 Ioane 5:19; tagai foi i le Ioane 14:30.) Ua moni ai le faamatalaga a le Tusi Paia e faatatau i o tatou aso e faapea: “Oi talofa ia te oulua le fanua ma le sami, auā ua alu ifo ia te oulua le tiapolo ua lotoa tele, auā ua na iloa ua saasaa ona po.” (Faaaliga 12:12) Ua iloa e Satani e faapea o lana pule ma lana lalolagi ua toeitiiti lava faamutaina, o lea ua pei ai “o se leona tagi, ua saili se tasi e ʻaina e ia.”—1 Peteru 5:8.

Ua Latalata le Laveaiina—Mo Ai?

12. O le laveaiina o ai lea ua lata mai?

¹² O le faatuputupulaia o tulaga faigata i le lalolagi o faamaoniga manino ia o le a iai se suiga tele—ioe, o se laveaiina sili—ua matuā lata mai lava! E mo ai? O le laveaiina ua lata mai mo i latou o ē mataala i faailoilo e fai ma lapataiga ma latou gaoioi e talafeagai ai. Ua faaalia i le 1 Ioane 2:17 le mea e tatau ona fai i le faapea mai: “E mavae atu foi le lalolagi [le faiga o mea a Satani], atoa ma lona tuʻinanau, a o lē fai le finagalo o le Atua, e tumau lea e faavavau.”—Tagai foi i le 2 Peteru 3:10-13.

13, 14. Na faapefea ona faatāuaina e Iesu le manaomia ona tausisia pea le mataala?

¹³ Na valoia e Iesu ua toe o se aga ona tafiesea lea o faiga a le sosaiete piopio a tagata i aso nei i le taimi o le puapuaga “e leai sona tusa talu le amataga o le lalolagi, ua oo lava i ona po nei; e le toe faapea foi amuli.” (Mataio 24:21) O le mafuaaga lena na ia lapatai mai ai e faapea: “Ia outou, neʻi mafatia o outou loto i le soona ulavale [“aai,” NW] ma le onā, ma le popole i mea a le olaga nei, neʻi faafuasei mai lea aso ia te outou e pei o se mailei; auā e oo mai ai i e nonofo uma lava i le fogāeleele uma. O lea ia outou mataala e le aunoa ma tatalo ina ia outou maua le malosi e sao mai ia mea uma ua tāli oo mai.”—Luka 21:34-36.

¹⁴ O i latou e ‘uaʻi atu’ ma “mataala” o le a saili atu mo le finagalo o le Atua ma latou faia. (Faataoto 2:1-5; Roma 12:2) O i latou nei o le a “sao mai” i le faaumatiaga ua toe o se aga ona oo mai lea i le faiga o mea a Satani. Ma e mafai ona iai ia i latou le mautinoa atoatoa faapea o le a laveaiina i latou.—Salamo 34:15; Faataoto 10:28-30.

Le Laveai Sili

15, 16. O ai le Laveai sili, ma aisea tatou te mautinoa ai o le a tonu ana faamasinoga?

¹⁵ Ina ia laveaiina auauna a le Atua, e manaomia ona tafiesea Satani ma lana faiga o mea i le lalolagi aoao. E manaomia ona auala mai le laveaiina mai se puna e sili mamao atu lona malosi nai lo malosi faaletagata. O lena puna o Ieova le Atua, o le Pule Silisili Ese Aoao, o Lē ona le malosi uma lava na Foafoaina le vateatea ofoofogia. O Ia o le Laveai sili: “O aʻu o aʻu lava o Ieova; a e leai se faaola ua na o aʻu lava.”—Isaia 43:11; Faataoto 18:10.

¹⁶ O loo iai ia Ieova le malosi silisili, atamai, faamasino tonu, ma le alofa. (Salamo 147:5; Faataoto 2:6; Isaia 61:8; 1 Ioane 4:8) O lea, pe a faaoo mai e ia lana faamasinoga, e mafai ona tatou mautinoa o ana gaoioiga o le a tonu ia. Na fesili Aperaamo e faapea: “O le na te faamasinoina le lalolagi uma, e le faia ea e ia le faamasinoga tonu?” (Kenese 18:24-33) Na alaga Paulo e faapea: “O i le Atua ea le amioletonu? Aua neʻi faapea.” (Roma 9:14) Na tusi mai Ioane e faapea: “E moni, le Alii [Ieova] e, le Atua e ou le malosi uma lava; e faamaoni ma le tonu au faamasinoga!”—Faaaliga 16:7.

17. Na faapefea ona faailoa atu e auauna i taimi ua mavae a Ieova lo latou mautinoa atoatoa i ana folafolaga?

¹⁷ Pe a folafola mai e Ieova le laveaiina, o le a ia faataunuuina moni lava. Na faapea mai Iosua: “E lei iuvale se upu i upu lelei uma na fetalai mai ai Ieova.” (Iosua 21:45) Na taʻua faapea e Solomona: “E leai se upu e tasi ua le taunuu o ana upu lelei uma na ia folafolaina mai.” (1 Tupu 8:56) Na tusi faapea le aposetolo o Paulo e faatatau ia Aperaamo “e lei masalo vale ia ma le le faatuatua . . . ua na mautinoa foi, e mafai ia te ia [le Atua] ona faia o le mea na folafolaina e ia.” Na faapena foi ona manatu Sara “e faamaoni mai o ia [le Atua] na folafola mai.”—Roma 4:20, 21; Eperu 11:11.

18. Aisea ua matuā mautinoa ai e auauna a Ieova i aso nei o le a laveaiina i latou?

¹⁸ O Ieova e lē pei o tagata, e matuā maufaatuatuaina lava o ia, e faamaoni foi o ia i ana afioga. “Ua tauto Ieova o ʻau, o loo faapea mai, E moni, e pei ona ou manatu e faapea lava ona taunuu, e pei ona aʻu pule e faapea lava ona faatumauina.” (Isaia 14:24) O lea la, pe a faapea mai le Tusi Paia “ua silafia e le Alii [Ieova] se mea e laveai mai ai i e amio Atua ai le tofotofoga, a e taofi i e amio leaga e oo i le aso faamasino ina ia faasalaina i latou,” e mafai ona tatou mautinoa atoatoa o le a tupu lenei mea. (2 Peteru 2:9) E tusa lava pe faamataʻuina e ala i se faaumatiaga mai ʻau malolosi a le fili, ae o le a loto tetele auauna a Ieova ona o lagona o Ieova ua atagia mai i lana folafolaga i se tasi o ana perofeta e faapea: “Latou te sii mai le taua ia te oe, a e latou te le manumalo ia te oe; auā o aʻu ou te ia te oe e laveai ia te oe, ua fetalai mai ai Ieova.”—Ieremia 1:19; Salamo 33:18, 19; Tito 1:2.

O Laveaiina i Taimi ua Mavae

19. Na faapefea ona laveaiina e Ieova ia Lota, ma ua faapefea ona tutusa ma o tatou vaitaimi?

¹⁹ E mafai ona faalototeleina i tatou e ala i le toe manatunatu i nisi o gaoioiga faasaoola a Ieova. E fai ma faataitaiga, sa “tiga” tele le loto o Lota i amioga leaga a Sotoma ma Komoro. Ae na matauina mai e Ieova le “alaga mai” o faitioga e faasaga i na aai. I le taimi tonu na talafeagai ai, na ia aauina atu ai ana avefeau ina ia faatonuina Lota ma lona aiga e sosola ese vave mai lena oganuu. O le ā le iuga? O Ieova “na ia laveai foi ia Lota o le amiotonu,” o “aai foi o Sotoma ma Komoro ua na taui atu i ai i le olopalaina, ina ua lelefu.” (2 Peteru 2:6-8; Kenese 18:20, 21) I aso nei, o loo silasila mai Ieova i le alaga atu ona o amioleaga matagā a lenei lalolagi. Pe a faaiuina e ana avefeau o ona po nei la latou galuega faanatinati o le molimau atu i le mamao e finagalo i ai o ia, ona ia gaoioi ai loa lea faasaga i lenei lalolagi ma laveaiina ana auauna e pei ona sa ia faia ia Lota.—Mataio 24:14.

20. Faamatala le laveaiina e Ieova o Isaraelu anamua mai ia Aikupito.

²⁰ Na faapologaina le faitau miliona o tagata o le Atua i Aikupito anamua. Na tulei faapea Ieova e faatatau ia i latou: “Ua ou faalogo foi i lo latou alaga . . . ua ou iloa foi lo latou tiga. O lenei, ua ou alu ifo, ou te laveai mai ia te i latou.” (Esoto 3:7, 8) E ui i lea, ina ua uma ona tuu atu tagata o le Atua e ō, ona toe sui ai lea o le manatu o Farao ma tuliloa atu ia i latou ma ana autau malolosi. Na foliga mai ua lē mafai ona sao Isaraelu ona o le Sami Ulaula. Peitai na faapea atu Mose: “Aua tou te fefefe, a ia outou laulau tutū ma vāai atu i le olataga mai ia Ieova, o le a faia e ia mo outou i le aso nei.” (Esoto 14:8-14) Na vaeluaina e Ieova le Sami Ulaula, ma na sao atu ai Isaraelu. Na osofaia i latou e autau a Farao, ae na faaaogā e Ieova lona mana ma “gogoto i latou pei o le pulu i le moana sausau.” Mulimuli ane ona lagi ai lea e Mose o le pese ia Ieova e faapea: “O ai ea se ua tusa ma oe i le vao atua? O ai se ua tusa ma oe, o lē silisili ona paia, o lē matautia i viiga, o lē fai vavega?”—Esoto 15:4-12, 19.

21. Na faapefea ona faasaoina tagata o Ieova mai ia Amoni, Moapi, ma Seira?

²¹ O se tasi mea na tupu, o atunuu tetee o Moapi, Amoni, ma Seira (Etoma) na latou faamataʻu atu latou te faaumatiaina tagata o Ieova. Na fetalai Ieova e faapea: “Aua neʻi fefefe, aua foi neʻi matatau outou, ona o lenei vao tagata [o fili] e toatele; auā e le o lo outou taua lenei, a o lo le Atua. . . . E le tau outou i lenei taua; tutū ia outou, ma ia outou tumau, ma outou vaai atu i le olataga mai ia Ieova o loo ia te outou.” Na laveaiina e Ieova ona tagata i lona faatupuina lea o le fenuminumiai i autau a le fili ma na faapea ai ona toe fefasiai lava i latou.—2 Nofoaiga a Tupu 20:15-23.

22. O ā laveaiina faavavega mai ia Asuria na saunia e Ieova mo Isaraelu?

²² Ina ua siitau Asuria le Malo Malosi o le Lalolagi i lena taimi faasaga ia Ierusalema, na faifai atu ai le tupu o Sanerivi ia Ieova i lona faapea atu i tagata o i luga o le pa: “Po o ai ea ni atua uma o ia nuu [na ou manumalo ai] ua latou laveaiina o latou nuu ai loʻu lima, ina ia laveaiina Ierusalema e Ieova ai loʻu lima?” Na ia faapea atu i auauna a le Atua: “Aua neʻi faatupuina foi e Esekia so outou faatuatua ia Ieova, o loo faapea ane o ia, E laveai mai lava Ieova ia te i tatou.” Ona tatalo faatauanau atu ai lea o Esekia mo le laveaiina, “ina ia iloa ai e malo uma o le lalolagi, o oe lava o Ieova, na o oe lava.” Na fasia e Ieova fitafita a Asuria e 185,000, ma na laveaiina mai ai auauna a le Atua. Mulimuli ane, a o tapuai atu Sanerivi i lona atua sese, na tagatavaleina o ia iina e ona atalii.—Isaia, mataupu e 36 ma le 37.

23. O ā fesili e manaomia ona taliina e faatatau i le laveaiina i aso nei?

²³ E mautinoa lava e maua lo tatou loto tetele pe a tatou iloaina le auala na laveaiina ai ma le ofoofogia e Ieova ona tagata i taimi ua mavae. Ae faapefea aso nei? O le ā le tulaga matautia o le a toeitiiti ona fetaiai lea ma ana auauna faamaoni lea o le a manaomia ai lana laveaiina faavavega? Aisea ua ia faatalitali ai pea seia oo mai i le taimi nei e aumaia ai lo latou laveaiina? O le ā le faataunuuga o le a iai i fetalaiga nei a Iesu: “A afua ona faia o ia mea, ia tepa ae outou, ma ia ea i luga o outou ulu; auā e latalata ina faaolaina outou”? (Luka 21:28) Ma o le a faapefea ona oo mai le laveaiina mo auauna a le Atua o ē ua maliliu? O le a iloiloina i le mataupu o sosoo mai nei fesili.

Fesili Autalu

◻ Aisea ua matuā manaomia ai lava se laveaiina?

◻ Aisea e lē tatau ai ona tatou faamoemoe atu i tagata mo le laveaiina?

◻ O le laveaiina o ai lea ua lata mai?

◻ Aisea tatou te matuā mautinoa ai i le laveaiina mai ia Ieova?

◻ O ā faataitaiga o laveaiina i taimi ua mavae e faalototeleina ai?

[Ata i le itulau 10]

O Aperaamo o se tasi o i latou o ē na matuā faatuatua ia Ieova