Pe e Te Manatua?

Pe ua e mafaufau loloto ea i lomiga talu ai nei o Le Olomatamata? Afai o lea, o le a e fiafia la e manatuaina manatu ia o loo mulimuli mai:

◻ Ua faapefea e le tele o ulugalii faaipoipo i aso nei ona mulimuli i le faaaoaoga e sili ona lelei na faataatia e Akula ma Pisila?

Sa auauna Akula ma Pisila i nisi o faapotopotoga eseese. I le pei o i laua, ua faapena i le toatele o Kerisiano i aso nei ona faaavanoaina i latou e siitia atu e auauna i nofoaga o loo manaomia tele ai le fesoasoani. Ua latou tofo foi i le olioli ma le loto malie e maua mai i le vaai atu ua faateleina manaoga o le Malo ma mafai ai ona atiina ae ni faauooga faapelepele faa-Kerisiano.—12/15, itulau 24.

◻ O le ā le vaaiga a le Tusi Paia i le ʻava malosi?

E paleni le manatu o le Tusi Paia i le faaaogaina o le ʻava malosi. I le isi itu, ua faapea mai le Tusi Paia o le uaina o le mea alofa mai le Atua. (Salamo 104:1, 15) A o le isi itu, ua tausalaina e le Tusi Paia le inu tele. (Luka 21:34; 1 Timoteo 3:8; Tito 2:3; 1 Peteru 4:3)—12/15, itulau 27.

◻ O le ā se vala ua mataina ai le tusi o le Tusi Paia o Hakai?

E ui lava o le tusi a Hakai e na o le 38 fuaiupu o loo faia aʻe ai, ae ua faaaogaina ai le suafa o le Atua i se aofaiga e 35. O lena valoaga ua foliga mai ua lē uigā pe a suia le suafa o Ieova i le taʻu o le “Alii.”—1/1, itulau 6.

◻ O le ā le lesona e mafai ona tatou aʻoaʻoina mai agasala a Tavita ma Manase?

E ui sa faamagaloina e Ieova, Tavita ma Manase, ae o nei tane—faatasi ai ma le nuu o Isaraelu—sa tatau ona latou faafesagaia āuga o a latou gaoioiga agasala. (2 Samuelu 12:11, 12; Ieremia 15:3-5) E faapena foi, a o faamagaloina e Ieova i aso nei tagata agasala ua salamō, ae atonu e iai pea āuga o a latou gaoioiga e lē mafai ona alofia.—1/1, itulau 27.

◻ I le ā le itu ua “matuā matagofie” ai ‘vae o lē e aumaia le tala lelei’ o le Malo o le Atua? (Isaia 52:7)

O vae e masani lava ona faagaoioia ai se tagata a o alu atu o ia e talaʻi i isi. O vae na ua fai moni lava ma sui o le tagata. O lea, i le toatele o ē faalogo ma tali atu ma le fiafia i le tala lelei o le Malo, o vae o ia avefeau e matagofie i le vaai.—1/15, itulau 13.

◻ O le ā le galuega vala lua lea ua aofia ai i le ‘folafolaina o le tala lelei’? (1 Korinito 9:16)

Muamua, e tatau ona tatou folafola atu le tala lelei o le Malo. O le vala lona lua o lenei galuega e aofia ai le aʻoaʻo atu ia i latou o ē tali lelei mai i le faalauiloaina atu o le Malo.—1/15, itulau 23.

◻ O ā aogā totino e maua mai le usuina o pese o le Malo i sauniga a le faapotopotoga?

O le usuina o pese e aumaia ai ia i tatou le avanoa e faaali atu ai o tatou faalogona mo Lē na Foafoaina i tatou. (Salamo 149:1, 3) A o sasaa atu o tatou loto i pesega a le faapotopotoga, e mafai ona uunaia ai i tatou i le mafaufau ma le loto saʻo mo le polokalame o loo mulimuli mai. E mafai ona uunaia ai i tatou ia faia atili se sao i le tapuaiga a Ieova.—2/1, itulau 28.

◻ O afea e sili ai le aso e oti ai nai lo le aso e fanau mai ai? (Failauga 7:1)

O le aso e oti ai e mafai ona sili atu ona lelei nai lo le aso na fanau ai se tasi pe afai e oo ane i lea taimi ua faamautuina e se tasi se igoa lelei ma Ieova, o lē e mafai ona faatuina mai ē faamaoni ua maliliu. (Ioane 11:25)—2/15, itulau 12.

◻ Aisea e tatau ai ona fesoasoani totino le tusi o Failauga ia i tatou?

E mafai ona fesoasoani ia i tatou taitoatasi ina ia taulai saʻo atu i le olaga ma mea e tatau ona tatou faatāuaina. (Failauga 7:2; 2 Timoteo 3:16, 17)—2/15, itulau 16.

◻ Po o Molimau a Ieova ea o ni ē mapolotu?

E leai. E ui ina iai o latou talitonuga malolosi faalotu, ae e lē o i latou o ni tagata mapolotu e pei ona faauiga nei i ai lena upu. E latou te lē liliu atu i solo tetee ma sauā e fouvale atu ai ia i latou e lē tutusa o latou manatu. E latou te faaaʻoaʻo i lo latou Taʻitaʻi, o Iesu Keriso.—3/1, itulau 6.

◻ O le lē iloaina o le taimi tonu e afio mai ai Iesu e faaoo le taui ma sui a le Atua, e aumaia ai le ā le aafiaga i Kerisiano?

O lenei tulaga e tausia ai le mataala o Kerisiano ma maua ai le avanoa i aso taitasi e faamaonia ai o loo latou auauna ia Ieova mai i ni uunaiga e lē manatu faapito.—3/1, itulau 13.

◻ O le ā e ao ona tatou manatunatu i ai a o lei faia se gaoioiga faaletulafono e faasaga i se uso o lē ua foliga mai ua na faavaleaina i tatou?

E ao ona tatou manatunatu i aafiaga e ono oo ia i tatou, ma isi o aofia ai, i le faapotopotoga, ma isi i fafo atu. (1 Korinito 6:7)—3/15, itulau 22.

◻ E mafai faapefea ona maua le fiafiaga moni?

O le fiafiaga moni, o se tulaga i le loto, e faavae mai le faatuatua moni ma se faiā lelei ma Ieova. (Mataio 5:3)—3/15, itulau 23.

◻ O le ā e ao ona faia e se Kerisiano pe a valaaulia o ia mo se tiute o se faatonu i le faamasinoga?

O Kerisiano taitoatasi ua fesagai ma le tiute o le avea ma faatonu i le faamasinoga e tatau ona filifili lelei po o le ā le ala e mulimuli ai, e faavae i lona malamalamaga i le Tusi Paia ma lona lava loto fuatia ifo. (Kalatia 6:5)—4/1, itulau 29.