Lipoti a Ē Faalauiloa le Malo

Sosola i le Faalapotopotoga Faatiokarate a Ieova

I ANAMUĀ lava na uunaia ai le perofeta o Isaia e faalauiloa atu e faapea: ‘Ia latou vivii atu ia Ieova i nuu tuloto o le sami.’ (Isaia 24:15) E vaai Molimau a Ieova i nuu tuloto o le sami o se vaega “o le atu laulau” lea na fetalai i ai Iesu ia ‘e ao ona talaʻiina atu i ai le tala lelei.’—Mataio 24:14; Mareko 13:10.

O le Atu Marquesas e 900 maila [1,400 kilomita], i le itu i mātū i sasaʻe o Tahiti. O i latou o se vaega o atumotu mamao ese o le Pasefika i Saute e taʻua o French Polynesia. E lafulemu le eleele ma mafanafana, e susū le tau, ua lauolaola ai laau i nei motu. Peitai, ua fuaina mai foi i le Atu Marquesas se isi ituaiga o fua. Seʻi talanoa i le tulaga o se tasi o aiga na tali atu i le feau o le Malo i le motu o Hiva Oa.

O Jean ma lana avā, o Nadine, sa lē fiafia i le olaga o le sosaiete faaonaponei o tagata i Europa i Sisifo i le mea sa latou nonofo ai. O lea, sa la filifili ai e tuua lea ituaiga o olaga pisi ae siitia atu ma le la tama i le Atu Marquesas. O lo latou fale fou, sa fausia i ofe, ma sa tu i totonu o se vanu e mamao ese. Ina ia oo atu i o latou tuaoi pito sili ona latalata ane, e tatau ona aea se ala gaoā i le mauga mo le lua itula. O le nuu e pito sili ona latalata ane lea e iai se fomai, le aʻoga, ma le faleoloa, e tolu itula le mamao ese pe a malaga i se sipi.

O Jean ma Nadine sa lē naunau i lotu. Peitai, na la auai atu i se talanoaga e faatatau i le amataga o le ola. E masani lava, ona la fafauina aʻe le talitonuga fenuminumiai o le evolusione. Ae e leai ma se faamatalaga o lena talitonuga na faamalieina ai i laua.

Ina ua mavae le ono tausaga o nonofo na o i latou i lena vaipanoa, sa faateia i latou i le asiasi atu o ni Molimau a Ieova se toalua. Na iloa e Molimau le nofoaga o Jean ma Nadine mai tagata o le nuu e tuaoi ane. E pei ona masani ai, na iu ina oo atu le talanoaga i le talitonuga faaevolusione. Na fiafia le ulugalii, ona na iai i Molimau se kopi o le tusi Life—How Did It Get Here? By Evolution or by Creation?, na lomia e Molimau a Ieova. Sa fiafia Jean ma Nadine e mauaina se tusi o loo aumaia ai faamatalaga auiliili o le auala na oo mai ai le ola iinei.

E lei umi mulimuli ane, ae amataina loa se suesuega faale-Tusi Paia. I le sili atu ma le tolu tausaga, sa faia loa e Jean ma Nadine se agaigai i luma. Na oo ina faatalitonuina i laua e lē o toe umi ona avea lea o le lalolagi atoa ma parataiso. Ina ua toatolu le la fanau, ona oo ai lea ina avea le ō atu mo le fa itula e auai i sauniga faa-Kerisiano i le Maota o le Malo ma faafitauli. Peitai, e lei taofia ai i latou mai le auai. Na iu lava ina faailoa atu e Jean ma Nadine lo la tuuina atu ia Ieova e ala i le papatisoga i le vai. Na la papatiso i se tauaofiaga na faia i le aai lea na maua ai le tumutumuga e 38 le aofia!

Ina ia fesoasoani i se vaega toaitiiti o tagata talaʻi o le Malo, na filifili ai le aiga e tuua lo latou aiga tu mamao ese. Na latou siitia atu i se nuu e tusa ma le tasi le afe tagata e nonofo ai, lea ua auauna ai nei Jean o se auauna o le faiva i le faapotopotoga o Molimau a Ieova iina. O lenei aiga, o ē na muai sosola atu i motu ina ia ō ese ai mai i suiga o le olaga faaonaponei, ua iloa o se faaeaga le mauaina o le sulufaiga moni, le faalapotopotoga faatiokarate a Ieova.