‘O le a Lē Tuulafoaia e Ieova Lona Nuu’
“E tele lava mea leaga e oo i le ua amiotonu; a e laveaiina o ia e Ieova ai ia mea uma.”—SALAMO 34:19.
1, 2. (a) O loo faapefea ona faamanuia mai e Ieova ona tagata i aso nei? (e) O ā mea o loo fesagai ma le toatele o Kerisiano, ma o ā fesili ua mapuna aʻe?
I LE faataunuuina o le valoaga a le Tusi Paia, ua maeva ai tagata tapuai o Ieova i totonu o se parataiso faaleagaga. (2 Korinito 12:1-4) Ua avea Molimau a Ieova o se vaega o le aufaatasiga faava-o-atunuu lea ua mataulia i le alofa ma le autasi. (Ioane 13:35) Ua latou olioli i le mauaina o se malamalamaga loloto ma le lautele o upu moni o le Tusi Paia. (Isaia 54:13) Ua latou matuā faafetaia Ieova ona o lona foaiina mai ia i latou o le faaeaga e avea ai o ni mālō i lona fale fetafai faaleagaga!—Salamo 15:1.
2 A o olioli tagata uma o loo i le faalapotopotoga a Ieova i se tulaga olaola faaleagaga, ae o loo iai nisi e foliga mai o loo maua sina filemu ma toamalie, a o isi o loo mafatia i puapuaga eseese. E toatele Kerisiano ua latou iai i ni tulaga puapuagatia mo ni vaitaimi faaumiumi e aunoa ma le tau aliali atu o se mapusaga. O le mea masani le iai o lagona loto vaivai a o fesagai ma na tulaga. (Faataoto 13:12) Po o mala ea o se faamaoniga lena o le lē fiafia mai o le Atua? Po o saunia ea e Ieova se puipuiga faapitoa mo nisi Kerisiano ae tuulafoaia isi?
3. (a) Pe tuuaʻia Ieova mo mala o loo oo i ona tagata? (e) Aisea ua oo ai foi i tagata tapuai o Ieova mafatiaga?
3 Ua tali mai le Tusi Paia: “A faaosoosoina se tasi, aua le faapea, ‘Ua faaosoosoina aʻu mai le Atua,’ auā e le mafai ona faaosoosoina o le Atua i mea leaga, e le faaosooso atu foi o ia i se tasi.” (Iakopo 1:13) O Ieova o Lē na te Puipuia ma Lē na te Tausia ona tagata. (Salamo 91:2-6) “E le tuuna e Ieova lona nuu.” (Salamo 94:14) E lē o le uiga o lenei mea faapea o le a lē oo lava i tagata tapuai faamaoni ni mafatiaga. O loo pulea le faiga o mea a le lalolagi nei i tagata o ē ua tuufaasolo mai i ai le lē lelei atoatoa. E toatele le au fai mea piopio, ma o nisi ua matuā leaga lava. E augapiu ma se isi o i latou e saili atu ia Ieova mo le atamai. O lenei mea ua iu ai i le tele o mafatiaga o tagata. Ua taʻu manino mai e le Tusi Paia faapea, e lē mafai e tagata o Ieova ona alofia āuga faanoanoa o le tulaga lē lelei atoatoa faaletagata ma le amioleaga.—Galuega 14:22.
E Faatalitalia e Kerisiano Faamaoni Puapuaga
4. O ā mea e mafai e Kerisiano uma ona faatalitalia a o latou ola ai pea i lenei faiga amioleaga o mea, ma aisea?
4 E ui e leai sa latou vaega i le lalolagi, ae o loo ola soo o Iesu i le lotolotoi o lenei faiga o mea. (Ioane 17:15, 16) Ua faaalialia mai Satani i le Tusi Paia e faapea o le malosi fia pule lea o loo uunaia gaoioiga a lenei lalolagi. (1 Ioane 5:19) O lea, e mafai ai e Kerisiano uma ona latou faatalitalia, i so o se taimi lava latou te fesagai ai ma ni faafitauli matuia. I le manatuaina o lena mea, ua faapea mai ai le aposetolo o Peteru: “Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ʻaina e ia; ia outou tetee atu ia te ia, o mausali outou i le faatuatua, ina ua outou iloa o loo oono lo outou au uso o i le lalolagi i ia lava mea tiga.” (1 Peteru 5:8, 9) Ioe, e mafai e le aufaatasiga atoa o Kerisiano ona latou faatalitalia puapuaga.
5. Na faapefea ona faamanino mai e Iesu faapea o le a tofo Kerisiano faamaoni i ni faanoanoaga i le olaga?
5 E tusa lava pe tatou te matuā alolofa ia Ieova ma faamaoni i ana mataupu silisili, ae o le a tatou tofo lava i faanoanoaga i le olaga. Sa faamanino mai e Iesu lenei mea i lana tala faatusa o loo faamauina i le Mataio 7:24-27, lea na ia faia ai se faaeseesega i le va o i latou o ē usiusitai i ana fetalaiga ma i latou o ē e lē usiusitai i ai. Sa ia faatusaina soo usiusitai i se tagata poto o lē na te fauina se fale i luga o le papa. O i latou e lē usiusitai i ana fetalaiga sa ia faatusaina i se tagata valea o lē na te fausia lona fale i luga o le oneone. Ina ua uma le afā malosi, e na o le fale lea na fausia i luga o le papa e faasaoina. Seʻi mātau i le tulaga o le fale o le tagata poto, “ona to mai lea o uaga, ua oo mai foi tafega, ua agi mai foi o matagi, ua pesi mai i lea fale, a e lei paū lava ia.” Sa lei folafola mai e Iesu faapea o le a maua i taimi uma e le tagata poto le filemu ma le toamalie. Nai lo lea, o le poto o lena tagata o le a sauniunia ai o ia e malupuipuia mai le afā. O se manatu foi faapena ua faaoo mai i le tala faatusa i le tagata lūlū saito. I lena tala o loo faamatala ai e Iesu faapea e oo lava i tagata tapuai usiusitai o loo iai “le loto ua faamaoni ma le lelei” o le a latou “fua mai . . . ma le onosai.”—Luka 8:4-15.
6. I le tala faatusa a Paulo i mea e lē mu i le afi, o ai o le a oo i ai le tofotofoga e pei o le afi?
6 I le tusi atu a le aposetolo o Paulo i uso i Korinito, na ia faaaogā ai se gagana faafaatusa e faataitai atu ai le manaoga mo ni uiga anagata e mafai ona fesoasoani ia i tatou e fesagaia ai tofotofoga. O na mea e lē mu i le afi e pei o le auro, ario, ma maa tāua ua faatusaina i uiga faale-Atua. (Faatusatusa i le Faataoto 3:13-15; 1 Peteru 1:6, 7.) I le isi itu, o uiga faaletino ua faatusaina i mea e faigofie ona mu i le afi. Ona faapea mai lea o Paulo: “O le a faaalia galuega a tagata taitoatasi; o le a faailoa foi e le Aso, auā o le a faaalia i le afi; o le a tofotofoina foi galuega a tagata taitoatasi i le afi po ua faapefea. Afai o le a tumau le galuega a se tasi na ia ati ae, o le a maua e ia le taui.” (1 Korinito 3:10-14) O iinei foi, ua faamatala mai ai e le Tusi Paia faapea o i tatou uma lava o le a lē mafai ona alofia le fesagai ma ni tofotofoga aasa.
7. E tusa ai o le Roma 15:4, e mafai faapefea ona fesoasoani le Tusi Paia ia i tatou ina ia onosaia tofotofoga?
7 E anoanoai tala i le Tusi Paia o auauna faamaoni a le Atua o ē na onosaia mala, i nisi taimi sa faia i se vaitaimi faaumiumi. Peitai, sa lei tuulafoaia e Ieova i latou. E foliga mai o faaaoaoga na sa mafaufau i ai le aposetolo o Paulo ina ua ia faapea mai: “O mea uma foi na tusia anamua, na tusia ia e aʻoaʻo mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi.” (Roma 15:4) Seʻi manatu i faaaoaoga a ni tane se toatolu o ē, a o latou olioli i se faiā mafana ma le Atua, na latou mafatia ai i le tele o puapuaga.
Mea ua Tatou Aʻoaʻoina Mai Tala a le Tusi Paia
8. O le ā na faatagaina e Ieova i le tulaga o Iosefa, ma mo le ā le umi?
8 Sa fiafia le finagalo o Ieova ia Iosefa le atalii o Iakopo, mai lava a o itiiti. Peitai, e ui e lē o sona sese, ae na ia mafatia lava i se faasologa o puapuaga. Sa ave faamalosia o ia ma fai i ai faiga leaga e ona lava uso. Sa faatauina atu o ia o se pologa i se nuu ese, o iina na tuuaʻia pepelo ai o ia ma tuuina i se “lua.” (Kenese 40:15) O iina, na “latou faatiga [ai] i lona vae i le noanoaga; ua oo lava o ia i le uamea.” (Salamo 105:17, 18) I taimi o lona faapologaina ma le faafalepuipuiina, e mautinoa sa faalausosoo ona aioi atu Iosefa ia Ieova mo se faasaolotoina. Peitai, mo le 13 tausaga, e ui sa faamalosia o ia e Ieova i ni auala eseese, ae sa tumau pea ona iai o se pologa po o se pagota i le falepuipui.—Kenese 37:2; 41:46.
9. O le ā sa tatau ona tumau ai Tavita mo ni tausaga?
9 O le tulaga foi lena na oo ia Tavita. Ina ua filifilia e Ieova se tagata agavaa e fai ma pule i Isaraelu, na ia fetalai: “Ua ou maua Tavita le atalii o Iese, o le tagata e tusa ma loʻu nei loto.” (Galuega 13:22) E ui i lona tulaga sa faafiafiaina ai le silafaga a Ieova, ae na tele lava mafatiaga na oo ia Tavita. I se lamatiaga e ono oo ai i le oti, na lafi ai o ia mo ni tausaga i le vaomatua, i ana, i atumauga, ma i laueleele o nuu ese. I le tuliloaina e pei o se manu feai, na mafatia ai o ia i le loto vaivai ma le fefe. Ae ui i lea, sa tumau pea o ia i le malosi mai ia Ieova. Ua matuā talafeagai ai le faapea mai o Tavita i mea moni na tutupu ia te ia: “E tele lava mea leaga e oo i le ua amiotonu; a e laveaiina o ia e Ieova ai ia mea uma.”—Salamo 34:19.
10. O le ā le mala matuitui na oo ia Napota ma lona aiga?
10 I aso o le perofeta o Elia, sa na o le toʻa 7,000 tagata i Isaraelu sa lē tootutuli atu i le atua pepelo o Paala. (1 Tupu 19:18; Roma 11:4) E foliga mai o se tasi o i latou, o Napota, o lē na oo i ai se faamasinoga e sili ona lē tonu. Sa matuā faamasiasia o ia i ni tuuaʻiga o le taufaifai i le Atua. Ina ua taʻusalaina, sa faasalaina ai i le poloaiga mai le tupu ina ia fasiotia e ala i le tauai i maa, ma na etoeto e ulī lona toto. Na fasiotia foi ona atalii! Peitai, sa lē sala o ia e tusa ai o le tuuaʻiga. Sa pepelo uma molimau ia na faia ia te ia. O le mataupu atoa o se togafiti na fafau e le masiofo o Iesepela ina ia mafai ai e le tupu ona ia pulea le tovine o Napota.—1 Tupu 21:1-19; 2 Tupu 9:26.
11. O le ā ua taʻu mai e le aposetolo o Paulo ia i tatou e faatatau i tane ma fafine faatuatua o loo i le talafaasolopito a le Tusi Paia?
11 O Iosefa, Tavita, ma Napota, o i latou na e toatolu mai le toatele o tane ma fafine faatuatua o loo taʻua i le Tusi Paia o ē na mafatia i puapuaga. Sa tusia e le aposetolo o Paulo se toe autaluga o talaaga o auauna a Ieova i le gasologa mai o tausaga. O iina sa ia taʻua ai i latou o ē “na tofotofoina . . . i tauemuga, ma sasaina, atoa ma noanoataga, ma tuuina i fale puipui; na fetogia i latou i maa, na vaevaeesea i ʻili, na oti i latou na fasia i le pelu; na feoai solo ma oofu i paʻu mamoe ma paʻu ʻoti; o mativa i latou, ma puapuagatia, ma faasaunoaina—e le aoga le lalolagi ona i ai o i latou—na feoai solo i latou i vao, ma mauga, ma ana, ma lua i le eleele.” (Eperu 11:36-38) Peitai sa lei tuulafoaia i latou e Ieova.
E Tausia e Ieova i Latou o Loo Mafatia
12. O ā nisi o mala ua tofo i ai Molimau a Ieova i aso nei?
12 Ae faapefea tagata o Ieova i aso nei? I le avea o se faalapotopotoga, e mafai ona tatou faalagolago atu i le puipuiga tauatua ma le ulu saogalemu atu i aso e gata ai ma le puapuaga tele. (Isaia 54:17; Faaaliga 7:9-17) Peitai ane, i le avea o ni tagata taitoatasi, ua tatou ioeina “o le tausaga ma le mea e tupu ai” e oo i tagata uma. (Failauga 9:11) I aso nei, e toatele Kerisiano faamaoni o loo mafatia i puapuaga. O nisi o loo latou onosaia oge matautia. O loo taʻua e le Tusi Paia ia Kerisiano ua “mātua oti ma fafine ua oti a latou tane” o ē o loo puapuagatia. (Iakopo 1:27) O isi o loo mafatia ona o mala faalenatura, o taua, o solitulafono, le faaaogaseseina o le pule, o maʻi, ma le oti.
13. O ā tulaga faigata ua lipotia mai talu ai nei?
13 Mo se faaaoaoga, i a latou lipoti o le auaunaga o le 1996 na tuuina atu i le Vaega Pule o Molimau a Ieova, ua faamatala atu ai e ofisa o lālā o le Olo Matamata e faapea, o nisi o o tatou uso ma tuafāfine o loo mafatia i le faafalepuipuiina i ni tulaga e sili ona leaga ona o lo latou pipii mau atu i mataupu silisili o le Tusi Paia. E tolu ni faapotopotoga i se atunuu i Amerika i Saute sa lē toe iai ina ua tutuli ese faamalosi e vaega o fitafita lalafi solo faatupu faalavelave le faitau selau o Molimau mai lea nofoaga. I se atunuu i Aferika i Sisifo, sa afaina ai nisi Molimau ona o se taua a tagata o le atunuu lava latou ma fasiotia ai. I se atunuu i Amerika Tutotonu, o le tulaga leaga tau tupe o nisi uso sa atili faaleagaina ona o faatamaiaga a se afā. I nisi nofoaga atonu e lē o avea ai le mativa ma le utiuti o meataumafa o ni faafitauli matuia, atonu o āuga leaga ua faaitiitia ai le olioli o nisi. O isi ua faavaivaia i omiga o le olaga i ona po nei. Talu ai uiga lē ano mai o tagata, ua loto vaivai ai pea isi a o latou talaʻia atu le tala lelei o le Malo.
14. (a) O ā mea tatou te aʻoaʻoina mai le faaaoaoga a Iopu? (e) Nai lo le iai o mafaufauga sese, o le ā e ao ona tatou fai pe a oo ia i tatou le loto mafatia?
14 O nei tulaga e lē tatau ona faapea ai o se faamaoniga lea o le lē fiafia mai o le Atua. Ia manatua le tulaga o Iopu ma le tele o mala na ia mafatia ai. O ia o “le tagata ua sao lana amio ma le amiotonu.” (Iopu 1:8) Pagā se loto vaivai atonu na lagona e Iopu ina ua molia o ia e Elifasa i le fai mea sese! (Iopu, mataupu e 4, 5, 22) Tatou te lē fia vave ona faia se faaiuga faapea ua ala ona tatou oo i mala ona ua iai ni mea ua tatou faatiga ai ia Ieova, pe ona ua aveesea e Ieova ana faamanuiaga. O le iai o mafaufauga sese a o fesagai ma puapuaga e mafai ona faavaivaia ai lo tatou faatuatua. (1 Tesalonia 3:1-3, 5) Pe a oo mai le loto mafatia, e sili atu ona lelei le mafaufau loloto i le mea moni faapea e latalata mai Ieova ma Iesu i ē amiotonu e tusa lava po o ā mea o loo tutupu.
15. E faapefea ona tatou iloa e matuā manatu mamafa mai Ieova i mala o loo puapuagatia ai ona tagata?
15 Ua toe faalaeiau mai le aposetolo o Paulo ia i tatou ina ua ia faapea mai: “O ai se na te faateaeseina mai i tatou i le alofa o Keriso? o le puapuaga ea, po o le atuatuvale, po o le saua, po o le oge, po o le lē lavalavā, po o le pagatia, po o le pelu? . . . Ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.” (Roma 8:35, 38, 39) E matuā manatu mamafa mai Ieova ia i tatou o loo ia silafia o tatou puapuaga. A o fesolasolatai pea Tavita, na ia tusi mai: “O fofoga o Ieova o loo faasaga i e amiotonu, e liliu mai foi ona taliga i a latou alaga. Ua latalata mai Ieova i e ua loto momomo.” (Salamo 34:15, 18; Mataio 18:6, 14) E tausi mai lo tatou Tamā faalelagi ia i tatou ma e mutimutivale lona alofa ia i latou o loo mafatia. (1 Peteru 5:6, 7) Na te saunia mea tatou te manaomia ina ia tumau ai, e tusa lava po o ā mafatiaga o loo tatou fesagai.
E Tausia i Tatou e Meaalofa Mai ia Ieova
16. O le ā le sauniuniga mai ia Ieova ua fesoasoani ia i tatou e tumau ai, ma e faapefea?
16 E ui e lē mafai ona tatou faatalitalia se olaga e saoloto mai mala i lenei faiga tuai o mea, ae ua “le tuulafoaiina” lava i tatou. (2 Korinito 4:8, 9) Na folafola mai e Iesu lona saunia o se fesoasoani mo ona soo. Na ia fetalai: “Ou te fai atu foi i le Tamā, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau; o ia o le Agaga o le upu moni.” (Ioane 14:16, 17) I le Penetekoso 33 T.A., na taʻu atu ai e le aposetolo o Peteru i lana au faalogologo e faapea e mafai ona latou maua “le mea foai fua mai, o le Agaga Paia lea.” (Galuega 2:38) Po o fesoasoani mai ea le agaga paia ia i tatou i aso nei? Ioe! Ua aumaia e le malosi galue o Ieova ia i tatou fua ofoofogia: “O le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le amio mamā.” (Kalatia 5:22, 23) O nei fua uma o uiga taitasi na e fesoasoani ia i tatou ina ia tumau ai.
17. O ā nisi o upu moni o le Tusi Paia e faamalosia ai lo tatou faatuatua ma lo tatou maumauai e faatalitali ma le onosai ia Ieova?
17 Ua fesoasoani mai foi le agaga paia ina ia tatou malamalama ai o puapuaga o loo iai nei e “mamasagia ma le vave mavae” pe a faatusatusa atu i le taui o le ola e faavavau. (2 Korinito 4:16-18) Ua tatou talitonu ma le mautinoa o le a lē faagaloina e le Atua a tatou galuega ma le alofa o loo tatou faaalia ia te ia. (Eperu 6:9-12) E ala i le faitauina o upu faagaeeina o le Tusi Paia, ua faamafanafanaina ai i tatou mai faaaoaoga a auauna faatuatua o aso anamua o ē na latou onosaia le tele o mala, ae sa fiafia foi. Ua tusi mai Iakopo: “Oʻu uso e, ia outou faaaʻoaʻo i le faatoatoa i le leaga, atoa ma le onosai o le au perofeta, e na tautala mai i le suafa o le Alii [Ieova]. Faauta, ua tatou taʻuamuia i e onosai.” (Iakopo 5:10, 11) Ua folafola mai e le Tusi Paia le “matuā tele o le mana” ina ia fesoasoani ia i tatou e onosaia tofotofoga. Ua faamanuiaina foi i tatou e Ieova i le faamoemoe o le toetu. (2 Korinito 1:8-10; 4:7) E ala i le faitauina o le Tusi Paia i aso taitasi ma mafaufau loloto i nei folafolaga, o le a faamalosia ai lo tatou faatuatua ma lo tatou maumauai e faatalitali ma le onosai i le Atua.—Salamo 42:5.
18. (a) I le 2 Korinito 1:3, 4, o le ā ua faalaeiauina ai i tatou e fai? (e) E mafai faapefea ona faamaonia le avea o ovasia Kerisiano ma puna o faamafanafanaga ma le faafouina?
18 E lē gata i lea, ua foai mai e Ieova ia i tatou le parataiso faaleagaga o iina e mafai ona tatou olioli ai i le alofa moni o o tatou uso ma tuafāfine Kerisiano. E tofu uma i tatou ma le matafaioi e faatino i le fefaamafanafanaai. (2 Korinito 1:3, 4) E mafai faapitoa ona avea ovasia Kerisiano o se puna tele o faamafanafanaga ma le faafouina. (Isaia 32:2) I le avea o i latou o ni “mea alofa i tagata,” ua tofia ai i latou e faalaeiauina ē o loo mafatia, ia “faamafanafana i e loto iti,” ma ia “fesoasoani i e o vaivai.” (Efeso 4:8, 11, 12; 1 Tesalonia 5:14) Ua faalaeiauina toeaina ina ia faaaogā tatau mekasini o Le Olomatamata ma le Ala Mai!, faapea ma isi lomiga ua saunia mai e “le auauna faamaoni ma le mafaufau.” (Mataio 24:45-47) Ua iai i nei lomiga le oa o fautuaga faale-Tusi Paia e mafai ona fesoasoani ia i tatou ina ia foia—ma puipui mai foi—i nisi o faafitauli e faapogaia ai o tatou popolega. Tau ina ia tatou faataitai atu ia Ieova e ala i le fefaamafanafanaai ma fefaalaeiauai i taimi o faigata!
19. (a) O le ā e fesoasoani ia i tatou e alofia ai nisi o mala? (e) I le iuga, o ai e tatau ona tatou faatuatua atu i ai, ma o le ā tatou te mafai ai ona fesagaia tofotofoga?
19 A o tatou agaʻi atu i le loloto o aso e gata ai, ma ua atili leaga tulaga i lenei faiga o mea, ua faia ai e Kerisiano mea latou te mafai ina ia alofia ai mala. (Faataoto 22:3) O manatunatuga lelei, o le fetuutuunai o le mafaufau, ma le poto i mataupu silisili o le Tusi Paia e mafai ona fesoasoani ia i tatou e faia ai filifiliga atamai. (Faataoto 3:21, 22) Tatou te faalogo atu i le Afioga a Ieova ma usiusitai i ai ina ia alofia ai le faia o ni mea sese e lē talafeagai. (Salamo 38:4) E ui i lea, ua tatou iloa e leai ni a tatou taumafaiga e mafai ona soloia atoatoa ai mafatiaga mai o tatou olaga. I lenei faiga o mea, e toatele tagata amiotonu ua fesagai ma mala matuia. Peitai ane, e mafai ona tatou faafetaiaia o tatou tofotofoga ma le mautinoa atoatoa e faapea “e le tuuna e Ieova lona nuu.” (Salamo 94:14) Ma e tatou te iloa ua toeitiiti ona mavae atu lea o lenei faiga o mea ma ona mala. O lea la, tau ina ia tatou faapea atu ia “aua neʻi tatou faapalapala i le amio lelei; auā o ona po e tatau ai tatou te selesele mai ai, pe afai tatou te le faavaivai.”—Kalatia 6:9.
O le ā na Tatou Aʻoaʻoina?
◻ O ā tofotofoga ua tofo i ai le au uso atoa o Kerisiano?
◻ O ā faaaoaoga faale-Tusi Paia e fesoasoani ia i tatou e malamalama ai o mala e lē o se faamaoniga lea o le lē fiafia mai o Ieova?
◻ O ā lagona o Ieova e faatatau i mala o loo mafatia ai ona tagata?
◻ O ā nisi o meaalofa mai ia Ieova e fesoasoani ia i tatou e tumau ai i tofotofoga?
[Ata i le itulau 10]
O Tavita, Napota, ma Iosefa o i latou na e toatolu na mafatia i mala