Na Latou Faia le Finagalo o Ieova

O se Fafine Faautauta na te Taofia Mala

O SE fafine atamai na faaipoipo atu i se tamaloa ulavale e leai se mafaufau—o le tulaga lena sa iai Apikaila ma Napalu. O Apikaila sa “mafaufau lelei, ma le lalelei.” I se faaeseesega, o Napalu sa “finauvale ia ma le leaga i ana mea e fai.” (1 Samuelu 25:3) O le tala ua faamatala mai o loo aofia ai lenei ulugalii e matuā eseese o la uiga, ua matilatila ai o la igoa i le talafaasolopito a le Tusi Paia. Seʻi tatou vaai i ai pe faapefea.

Se Agalelei na Lē Amanaiaina

O le senituri lona 11 T.L.M. na faauuina ai Tavita e avea ma tupu i le lumanai mo Isaraelu, ae nai lo le avea ma tupu, sa sola ese o ia. Sa naunau Saulo lea sa tupu i lena vaitaimi ina ia fasiotia o ia. O le iuga, sa ola ai Tavita i se olaga fesolasolatai. Mulimuli ane ona maua ai lea e ia ma ana aumea fitafita e toʻa 600 se lafitaga i le vao o Parana, i le itu i saute o Iuta ma i le agaʻi atu i le vaomatua o Sinai.—1 Samuelu 23:13; 25:1.

A o iai iina, na latou fetaiai ai ma ni leoleo mamoe a le tagata e igoa ia Napalu. O lenei tagata mauoa o lē na tupuga mai ia Kalepo, sa iai ni ana mamoe e 3,000 ma ʻoti e 1,000 ma na ia seleina fulufulu o ana mamoe i Karamelu, o se aai i le itu i saute o Heperona ma atonu e na o le 25 maila [40 kilomita] le mamao mai Parana.a Na fesoasoani Tavita ma ona tagata i leoleo mamoe a Napalu e puipuia a latou lafu manu mai tagata gaoi o ē na feofeoai solo i le vao.—1 Samuelu 25:14-16.

I le taimi lea, sa amata ai le seleina o fulufulu o mamoe i Karamelu. O le taimi lea o tausamiga, e tai tutusa i le taimi o le seleselega mo se faifaatoaga. O se taimi foi e faaali atu ai le limafoai, lea e taui atu ai e i latou e ana mamoe tagata sa faigaluega mo i latou. Sa lei faamaualuga la Tavita ina ua ia aauina atu taulelea e toasefulu i le aai o Karamelu e talosaga atu ia Napalu mo ni meaʻai e totogi ai le auaunaga na latou faia mo ana lafu manu.—1 Samuelu 25:4-9.

Sa matuā leai se limafoai o Napalu. Ae na ia fai mai ma le aamu: “O ai ea Tavita?” I le tau uiga mai faapea o Tavita ma ona tagata ua na o ni auauna o loo fesolasolatai solo, na ia fesili ai: “Ou te ave ea aʻu areto, ma aʻu vai, ma aʻu manu ua ou fasia mo e sele mo aʻu, ou te foai atu ai i tagata ou te le iloa pe maifea i latou?” Ina ua logotala Tavita i lenei mea, ona ia fai atu lea i ona tagata: “Ia taitasi ma fusi i lana pelu.” E tusa ma le toʻa 400 tane na sauniuni mo le taua.—1 Samuelu 25:10-13.

Le Faautauta o Apikaila

Na logotala i ai Apikaila le avā a Napalu, e uiga i faamatalaga leaga a lana tane. Atonu sa lē o le uluai taimi lea na ia faalaa ane ai ma gaoioi o sē faatupuina le filemu mo Napalu. Po o le ā lava le tulaga, ae sa vave ona gaoioi Apikaila. E aunoa ma le taʻu atu ia Napalu, ae na ia aoaoina ni mea—e aofia ai mamoe e lima ma le anoanoai o meaʻai—ma alu atu loa e faafetaiai ia Tavita i le vao.—1 Samuelu 25:18-20.

Ina ua vaai atu Apikaila ia Tavita, sa ifo toele atu o ia i ona luma. Na ia aioi atu ia te ia: “Aua neʻi tuu e loʻu alii i lona finagalo o amio a lena tagata ulavale, o Napalu. . . . o le alofa lenei ua au mai e lau auauna fafine i loʻu alii; ia avatu ia i taulelea o loo mulimuli mai i loʻu alii.” Na ia toe faapea atu: “E le fai le mea nei [le tulaga e faatatau ia Napalu] ma faalavelave ia te oe, ma mea e tiga ai le finagalo o loʻu alii.” O le upu Eperu iinei ua faaliliuina “faalavelave” e faatatau atu i lagona lē mautū o le loto fuatia ifo. O lea sa lapataia ai e Apikaila Tavita i lona faia o se gaoioiga lē lelei o le a mulimuli ane toe salamō ai.—1 Samuelu 25:23-31.

Sa utagia e Tavita le fautuaga a Apikaila. Na ia faapea atu i ai: “Faafetai foi i lou mafaufau, ma faafetai ia te oe, ina ua e taofi ia te au i lenei aso, ina neʻi ou alu e sasaa le toto. . . . ana e le faataalise ona sau e faafetaiai ia te au, po ua le toe ia Napalu i le malama ae o le taeao se tulai atu i se aupa.”b—1 Samuelu 25:32-34.

Lesona mo i Tatou

O lenei tala a le Tusi Paia e faamautinoa ai e lē sese mo se fafine e mataʻu i le Atua ona tausolomua ma le talafeagai e faia se mea pe a manaomia. Sa faia e Apikaila se gaoioiga e feteenai ma manaoga o lana tane, o Napalu, peitai e lē o aoaia maia e le Tusi Paia o ia ona o lenei mea. Nai lo lea, o loo viiviia o ia o se fafine e faautauta ma mafaufau lelei. E ala i le tausolomua e gaoioi i lenei tulaga matautia, na faasaoina ai e Apikaila le tele o ola.

E ui i le tulaga lautele e tatau ai i se avā ona faaalia le agaga o le gauai atu faale-Atua, ae mafai ona talafeagai lona lē ioe atu i lana tane pe a oo i se tulaga ua lamatia ai mataupu silisili saʻo. O le mea moni, e tatau ona ia tauivi e tausisia le “loto agamalu ma le filemu” ma e lē tatau ona gaoioi fia tutoatasi ona o lona mimita, faamaualuga, pe fouvale. (1 Peteru 3:4) Peitai ane, e lē tatau ona iai i se avā e mataʻu i le Atua se uunaiga fai faamalosia na te faia ai so o se mea o loo ia iloa e matuā lē atamai pe solia ai mataupu silisili o le Tusi Paia. O le mea moni, o le tala ia Apikaila ua aumaia ai se faavae mausalī e tetee atu ai ia i latou o loo maumauai pea faapea o loo taʻua e le Tusi Paia fafine o ni pologa.

O lenei tala ua aʻoaʻo mai ai foi ia i tatou le pulea totino. Sa iai ni taimi na faaalia atoatoa ai e Tavita lenei uiga. Mo se faaaoaoga, sa musu o ia e fasiotia le tupu lotoa o Saulo, e ui lava sa tele avanoa na ia maua e faia ai faapea, ma na semanū foi o le oti o Saulo e maua ai e Tavita le filemu. (1 Samuelu 24:2-7) I se faaeseesega, ina ua faia e Napalu ni faaupuga ʻinoʻino e tetee mai ai ia te ia, sa masei ai iina Tavita ma ia folafola atu ai lana taui ma sui. O se lapataiga manino lenei i Kerisiano, o ē o loo taumafai ina ia “le taui atu le leaga i le leaga i se tasi.” I tulaga uma lava, e tatau ona latou usitaia le timaiga a Paulo: “Afai e mafaia ia te outou, ia outou nofo lelei ma tagata uma lava. Le au pele e, aua le taui atu ma sui, a ia outou tuu atu i le toasa.”—Roma 12:17-19.

[Faaopoopoga i lalo]

[Ata i le itulau 15]

Ua aumai e Apikaila meaalofa ia Tavita