Tausisia o le Amio Lelei i Totonu o se Lalolagi ua Tumu i Amioga Leaga
“Ia faia mea uma lava ma le le muimui, ma le le fefinauai; ina ia avea outou ma e ua le mataʻuleagaina, ma e ua sao le amio, o le fanau a le Atua e le ponā i totonu o le tupulaga amio faapiopio ma le finau vale.”—FILIPI 2:14, 15.
1, 2. Aisea na poloaia ai e le Atua le faaumatiaga aʻiaʻi o sa Kananā?
O POLOAIGA a Ieova e lē faatagaina ai le faagutugutulua. A o toetoe lava ulu atu le fanauga a Isaraelu i le Nuu o le Folafolaga, na taʻu atu ai e le perofeta o Mose ia i latou: “Ia e matuā faaumatia i latou; o sa Hetī, ma sa Amorī, o sa Kananā, ma sa Perisē, o sa Hivī, ma sa Iepuse; e pei ona fetalai mai o Ieova lou Atua ia te oe.”—Teuteronome 7:2; 20:17.
2 Talu ai o Ieova o ia o le Atua e alofa mutimutivale, ae aisea na ia poloaia ai le faaumatiaga aʻiaʻi o sa Kananā? (Esoto 34:6) O se tasi o mafuaaga, ‘ina ia lē aʻoaʻoina e sa Kananā le fanauga a Isaraelu e fai e tusa ma mea inosia uma sa latou faia i o latou atua ma latou [Isaraelu] agasala ai ia Ieova le Atua.’ (Teuteronome 20:18) Na faapea atu foi Mose: “O le amio leaga a ia nuu e tulia ai i latou e Ieova ai ou luma.” (Teuteronome 9:4) Sa avea sa Kananā ma faataitaiga tonu lava o le amioleaga. O amioga leaga faaleituaiga ma faiga ifo i tupua sa avea ma vala sili ona tāua i a latou tapuaiga. (Esoto 23:24; 34:12, 13; Numera 33:52; Teuteronome 7:5) O le mataifale, o le faasotoma, ma feusuaiga ma manu ‘o amioga na sa faia i le nuu o Kanana.’ (Levitiko 18:3-25) O tamaiti loto mamā sa faaaogā ma le lē alofa e fai ai taulaga i atua sese. (Teuteronome 18:9-12) E lētioa a manatu Ieova i le tau lava o le iai o nei nuu, o le a avea o se faamataʻu i le lelei faaletino, faalemafaufau ma le faaleagaga o ona tagata!—Esoto 34:14-16.
3. O le ā na iu i ai talu ai sa lei atoatoa ona faataunuuina e le fanauga a Isaraelu faatonuga a le Atua e faatatau i tagata Kanana sa aināina le nuu?
3 Talu ai sa lei atoatoa ona faataunuuina faatonuga a le Atua, na toatele ai ni tagata Kanana sa faasaoina ina ua manumalo Isaraelu i le Nuu o le Folafolaga. (Faamasino 1:19-21) Na oo ane le taimi sa lagonaina ai taaʻiga faifai mālie a tagata Kanana, ma e mafai ona faapea atu: “Ua latou [le fanauga a Isaraelu] tiai foi ana sauniga [a Ieova] ma lana feagaiga na osi ma o latou tamā, atoa foi ma ana tulafono na ia fetalai mai ai ia te i latou; ua latou mulimuli atu foi i le mea faatauvaa, ona amio faatauvaa ai lea o i latou; ua faaaʻoaʻo foi i nuu ese na vagavagaia i latou, na poloai mai ai Ieova ia te i latou, Aua neʻi faia faapei o i latou.” (2 Tupu 17:15) Ioe, a o faagasolo tausaga, e toatele tagata Isaraelu na latou faatinoina amioga leaga lava na sa faapogaia ai le poloaiga a le Atua ina ia faaumatia sa Kananā—o ifoga tupua, o faiga lē mamā faaleituaiga, ma le faia o taulaga i tamaiti!—Faamasino 10:6; 2 Tupu 17:17; Ieremia 13:27.
4, 5. (a) O le ā na tupu ia Isaraelu ma Iuta lē faamaoni? (e) O le ā le timaiga o loo aumaia i le Filipi 2:14, 15, ma o ā fesili ua lāgā ai?
4 O lea na folafola atu ai e le perofeta o Hosea: “Le fanauga a Isaraelu e, ia outou faalogologo mai i le afioga a Ieova; auā o loo ia Ieova le finauga ma e o nonofo i le nuu; auā e leai se faamaoni, e leai se alofa, e leai foi se na te iloa le Atua i le nuu. O loo o tauto, ma tala pepelo, ma fasioti tagata, ma gaoi, ma mulilua, ua latou faasaua lava, ua fepaiaʻi toto. O le mea lea e faanoanoa ai le nuu, e tauāu ina vaivai o i latou uma o e nonofo ai; atoa ma manu vaefa, ma manu felelei, e mavae atu foi lava o iʻa o le sami.” (Hosea 4:1-3) I le 740 T.L.M., na matuā faatoilaloina ai e Asuria le malo amioleaga o le itu i mātū o Isaraelu. Pe ā ma le silia i se senituri mulimuli ane, na faatoilaloina ai e Papelonia le malo lē faamaoni o le itu i saute o Iuta.
5 O nei mea tutupu ua faataitaia mai ai le matautia e mafai ona oo i ai pe a tatou faatagaina i tatou lava e pulea e amioga leaga. E ʻinoʻino le Atua i le amioletonu ma o le a ia lē faapalepale mai i na amioga i ona tagata. (1 Peteru 1:14-16) E moni o loo tatou ola i “le olaga leaga ua i ai nei,” i totonu o se lalolagi o loo faateteleina pea le leaga. (Kalatia 1:4; 2 Timoteo 3:13) E oo lava i na tulaga, ua timai mai ai le Afioga a le Atua i Kerisiano uma ina ia gaoioi pea i se auala ina ia avea ai i latou ma ē “ua le mataʻuleagaina, ma e ua sao le amio, o le fanau a le Atua e le ponā i totonu o le tupulaga amio faapiopio ma le finau vale; ua [latou] susulu atu i ai faapei o mea e faamalamalama aʻi le lalolagi.” (Filipi 2:14, 15) Ae mafai faapefea ona tatou amio lelei pea i totonu o se lalolagi ua tumu i amioga leaga? Pe mafai moni ea ona faia faapena?
Le Malo o Roma na Faatumulia i Amioga Leaga
6. Aisea na fesagai ai Kerisiano o le uluai senituri ma se luʻi i le tausisia o le amio lelei?
6 Na fesagai Kerisiano i le uluai senituri ma le luʻi o le tausisia o le amio lelei auā sa matuā olaola amioga leaga i vala taitasi o le olaga masani o tagata i Roma. Na faapea mai le faifilosofia Roma o Seneca e faatatau i ē na latou tupulaga faatasi: “O loo tauivi tagata i se tauiviga malosi o le amioleaga. O aso taitasi e faateteleina ai le tuinanau atu i mea sese, ae faaitiitia le mataʻu i le faia o na mea sese.” Sa ia faatusatusaina le olaga masani o tagata i Roma i “se nofoaga o manu feai.” E lē se mea la e ofo ai, i faafiafiaga, sa saili atu tagata Roma i tauvaga sauā e tau ai tagata ma manu feai, ma faaaliga e faalialia ai faiga lē mamā faaleituaiga na faia i malae o mataaga.
7. Na faapefea ona faamatalaina e Paulo amioga leaga sa taatele i le toatele o tagata i le uluai senituri T.A.?
7 Atonu sa mafaufau le aposetolo o Paulo i amioga leaga a tagata i le uluai senituri ina ua ia tusi: “Na tuuina atu ai i latou e le Atua i manao e masiasi ai; auā o latou fafine foi, ua latou fesuiai le tu e tatau ma le tu e le tatau; e faapea foi tane, ua tuua e i latou le tu e tatau i le fafine, ina ua mu i lo latou femanaoai; o tane ua fefaiai i latou i mea e masiasi ai; ua tauia foi i latou i o latou lava tino e tusa ma lo latou sese.” (Roma 1:26, 27) Ona o le maumauai e sailia o latou tuinanauga lē mamā faaletino, na matuā faatumulia ai le olaga masani o tagata Roma i amioga leaga.
8. Sa masani faapefea ona faataumaoia tamaiti i le faiga o mea a Eleni ma Roma?
8 E lē o faamanino mai e le talafaasolopito po o le ā le tele na oo i ai faiga faatauatane ma tauafafine a tagata Roma. Ae e lē masalomia, sa taaʻina i latou e tagata Eleni ia na muamua atu, o i latou na sa matuā taatele ai faiga faatauatane. O se faiga masani mo tamaloloa matutua ona latou faaleagaina tamaiti laiti, sa iai i le latou vaavaaiga i se faiā o se faiaʻoga ma lana tamaitiiti aʻoga, lea e masani ona taitaia atu ai tamaiti i le faia o amioga lē mamā faaleituaiga. Ma le lē masalomia, sa uunaia e Satani ma ana temoni na amioga leaga ma le faaleagaina o tamaiti.—Ioelu 3:3; Iuta 6, 7.
9, 10. (a) O le ā le auala na tausalaina ai e le 1 Korinito 6:9, 10 ituaiga eseese o amioga leaga? (e) O le ā le talaaga o nisi i le faapotopotoga a Korinito, ma o le ā le suiga na faia i o latou tulaga?
9 I ana tusitusiga e ala i le faagaeega tauatua, na taʻu atu ai e Paulo i Kerisiano i Korinito e faapea: “Tou te le iloa ea, o e amio leaga e le fai mo latou tofi le malo o le Atua? Aua neʻi faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua. Sa faapea foi nisi o outou; a ua taeele outou, a ua faapaiaina outou, a ua taʻuamiotonuina outou i le suafa o le Alii o Iesu Keriso, i le Agaga foi o lo tatou Atua.”—1 Korinito 6:9-11.
10 O lea la ua taʻusalaina ai e le tusi faagaeeina a Paulo feusuaiga lē mamā, i le faapea mai o “e faitaaga” o le a “le fai mo latou tofi le malo o le Atua.” Peitai, ina ua uma ona lisiina mai le tele o amioga leaga, ona faapea mai lea o Paulo: “Sa faapea foi nisi o outou; a ua taeele outou.” Ona o le fesoasoani a le Atua sa mafai ai e tagata faimea sese ona mamā i lana silafaga.
11. Na faapefea ona ola ai Kerisiano o le uluai senituri i le siomaga leaga i o latou aso?
11 Ioe, sa olaola pea le amio lelei faa-Kerisiano e oo lava i totonu o se lalolagi sa tumu i amioga leaga i le uluai senituri. O tagata talitonu na ‘faaliliuina i latou i le toe fuataiina o o latou mafaufau.’ (Roma 12:2) Na latou lafoaia a latou “amioga faaanamua” ae ‘toe fuataiina o latou mafaufau.’ O lea na latou sosola ese ai mai amioga leaga a le lalolagi ma “oofu . . . i le tagata fou ua faia e foliga i le Atua, i le amiotonu ma le amio lelei e faamaoni.”—Efeso 4:22-24.
Le Lalolagi i Aso Nei ua Tumu i Amioga Leaga
12. O ā suiga ua oo mai i le lalolagi talu mai le 1914?
12 Ae faapefea i o tatou aso? O le lalolagi o loo tatou ola ai, ua iai i se tulaga e sili atu ona faateleina amioga leaga o loo iai nai lo se isi lava taimi. Ae maise lava talu mai le 1914, ua matuā paʻū maulalo le tulaga o amioga tatau i le lalolagi aoao. (2 Timoteo 3:1-5) I le teena o manatu o tu masani e faatatau i amioga lelei, i amioga mamā, le igoa lelei, ma amioga tatau, e toatele ua oo ina manatu faapito i o latou mafaufauga ma o loo “latou le lagona [ai] se mea.” (Efeso 4:19) Na faapea mai le mekasini o le Newsweek: “O loo tatou ola i se tupulaga o loo iai le manatu e pule lava le tagata i ana amioga,” ma faaopoopo mai e faapea o le tulaga faaleamio o loo iai nei “ua faaitiitia ai manatu uma e uiga i mataupu o le saʻo ma le sese e tusa ai o manatu totino e fiafia i ai le tagata lava ia, i ona lava lagona ootia po o filifiliga e tusa ai ma agaifanua.”
13. (a) Ua faapefea i le tele o faafiafiaga i aso nei ona uunaia ai amioga leaga? (e) O ā aafiaga leaga e mafai e faafiafiaga lē talafeagai ona aafia ai tagata taitoatasi?
13 E pei ona iai i le uluai senituri, ua faapena foi ona taatele i aso nei faafiafiaga o amioga lē mamā. Ua aumaia e televise, leitiō, tifaga, ma vitiō se faasologa lē motusia o mea o loo faaautū atu i faiga faaleituaiga. Ua oo foi ina sao atu amioga leaga i le lio o fesootaiga tau komepiuta (computer networks). Ua oo ina matuā faigofie ona mauaina i na fesootaiga tau komepiuta i aso nei, ata ma faamatalaga o faiga matagā faaleituaiga, ma ua mafai ona maua e tamaiti ma tagata matutua. O ā ni aafiaga o nei mea uma? Ua faapea mai se tasi fainusipepa: “Pe a oo ina ulu le faamasaatoto ma faiga sauā ma faiga lē mamā faaleituaiga i a tatou agaifanua taatele, e oo lava ina tatou masani ai i le faamasaatoto ma faiga sauā ma faiga lē mamā faaleituaiga. E tatou te lē manatu mamafa ai i le matuia o na mea. E iu ina atili sasao aʻe ai amioga matagā auā ua matuā lē toe faateia pe a tutupu mai na mea.”—Faatusatusa i le 1 Timoteo 4:1, 2.
14, 15. O le ā le faamaoniga e iloa ai ua matuā leaga lava amioga faaleituaiga i le lalolagi aoao?
14 Seʻi manatu i le lipoti lenei i le New York Times: “O se mea sa faateia ai i le 25 tausaga ua mavae ae ua avea o se mea e taliaina e le soifuaga i le taimi nei. O le aofai o ulugalii o loo filifili e nonofo faapouliuli nai lo le faaipoipoina ua oso aʻe i le 80 pasene [i le Iunaite Setete] i le va o le 1980 ma le 1991.” Ua lē na o Amerika i Mātū o loo taatele ai lenei mataupu. Ua lipotia mai e le mekasini o le Asiaweek: “O loo vātau se finauga tau i agaifanua i atunuu uma o [Asia]. O le mataupu, o le feteenaiga i le va o le saolotoga tau i faiga faaleituaiga, ma mea e faatāuaina i tū masani, ma ua matuā televave le faatupulaia o uunaiga ina ia suia.” Ua faaalia i faamaumauga o fuainumera le toatele o tagata mai le tele o atunuu latou te taliaina le mulilua ma feusuaiga a o lei faaipoipo.
15 Ua valoia e le Tusi Paia e faapea o le a matuā sasao mai na gaoioiga faasatani i o tatou aso. (Faaaliga 12:12) E lē tatau ai la ona faateia i tatou, ua matuā taatele amioga leaga i se tulaga matautia. Mo se faaaoaoga, o le faataumaoia o tamaiti i faiga faaleituaiga ua matuā sosolo atu i ni vaega tetele ua aafia ai.a Ua lipotia mai e le Faalapotopotoga o Faaputugatupe a Malo Aufaatasi mo Tamaiti e faapea “o le faataumaoia i faiga faaleituaiga i faatosinaga faapisinisi ua faaleagaina ai i amioga leaga tamaiti i atunuu uma o le lalolagi.” I tausaga taitasi “e silia i le miliona tamaiti i le lalolagi aoao ua lipotia mai le ave faamalosia e faaaogā i faiga faaleituaiga e suʻe ai tupe, ua faafesuiaia ma faatau atu mo ni fuafuaga i faiga faaleituaiga, ma ua faaaogā e faia ai ata lē mamā faaleituaiga.” Ua taatele foi faiga faatauatane ma tauafafine, ae o loo taulamua ai nisi faipolotiki ma taʻitaʻi lotu i le uunaia atili o na mea e faapea o se “ituaiga o olaga faaopoopo.”
Teteeina o Amioga Leaga a le Lalolagi
16. O le ā le tulaga o loo tutū ai Molimau a Ieova e tusa ai o amioga faaleituaiga?
16 E lē auai Molimau a Ieova i manatu o i latou o loo lagolagoina tulaga tuufau o amioga lē mamā faaleituaiga. Ua faapea mai le Tito 2:11, 12: “O le alofa tunoa o le Atua ua au mai ai le faaolataga, ua faaalia mai lea i tagata uma lava, o loo aʻoaʻo mai ai ia te i tatou, ia tatou teteʻa ese ma le faalematau atoa ma tuʻinanau faalelalolagi, a ia tatou nonofo ma le faautauta ma le amiotonu atoa ma le amio Atua i lenei olaga.” Ioe, tatou te faatupuina aʻe se ita moni, se ʻinoʻino i na amioga leaga e pei o feusuaiga a o lei faaipoipo, le mulilua, ma faiga faatauatane ma tauafafine.b (Roma 12:9; Efeso 5:3-5) Na tuuina mai e Paulo le timaiga lenei: “Ia o ese i le amio leaga i latou uma o e taʻutaʻu le suafa o le Alii [Ieova].”—2 Timoteo 2:19.
17. E faapefea ona manatu Kerisiano moni i le faaaogaina o le ava malosi?
17 E teena e Kerisiano moni le manatu o le lalolagi faapea e iai mea e foliga mai e lē leaga naua. Mo se faaaoaoga, e toatele tagata i aso nei latou te manatu māmā i le faaaogaseseina o le ava malosi. Peitai o tagata o Ieova latou te utagia le fautuaga a le Efeso 5:18: “Aua foi neʻi onā outou i le uaina, o le mea e ulavale ai; a ia faatumuina outou i le Agaga.” Pe afai e filifili se Kerisiano e inu i le ava malosi, e na te faia faapea ma le fuafua lelei.—Faataoto 23:29-32.
18. E faapefea i mataupu silisili o le Tusi Paia ona taitaia ai auauna a Ieova i a latou feutagaiga ma tagata o o latou aiga?
18 Ona o ni auauna a Ieova, tatou te teena ai foi le manatu o nisi tagata i le lalolagi e faapea, o se amioga e taliaina le eē ma soona leotele atu o se tasi i lana paaga ma lana fanau, pe faatiga foi ia i latou e faaaogā ai ni upu matuitui. Pe a iai le naunautaiga e uia le ala o amioga lelei, e galulue faatasi ai tane ma avā Kerisiano ina ia faatatauina le fautuaga a Paulo: “Ia teʻa ma outou upu faafiufiu uma lava, ma le lotoa, ma le ita, ma le leo tele, ma le upu faaleaga, atoa ma le loto leaga uma lava. A ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.”—Efeso 4:31, 32.
19. O le ā le taatele ua oo i ai mea leaga i faiga pisinisi?
19 Ua taatele foi i aso nei le lē faamaoni, le taufaasese, le pepelo, o togafiti leaga ina ia maua ai ni tupe faasili i faiga pisinisi, ma le gaoi. Ua lipotia mai e se mataupu i se mekasini faapisinisi o le CFO e faapea: “O se suesuega na faia i ni tagata faigaluega e toʻa 4,000 . . . na iloa ai o le 31 pasene o i latou na suesueina sa latou vaaitino lava i ni ‘amioga leaga matuia’ a o faagasolo le tausaga ua mavae.” O na amioga leaga e aofia ai le pepelo, le faia o faamaumauga sese, o faiga faasoesa faaleituaiga, ma le gaoi. Pe afai tatou te fia tumau ona mamā tau amio i le silafaga a Ieova, e tatau la ona tatou alofia na amioga ma ia faamaoni i a tatou feutagaiga uma tau tupe.—Mika 6:10, 11.
20. Aisea e manaomia ai i Kerisiano ona alo ese mai “le manao i tupe”?
20 Seʻi manatu i le mea na tupu i se tasi tamaloa o lē na ia faaāta i lona mafaufau le tele o se taimi o le a ia faaaluina i le auaunaga i le Atua pe afai na te faia se faiga e vave lava ona maua ai ni tupe. Sa ia faaaofia mai isi tagata ina ia latou faia se faaputugatupe ma le fuafuaga o le a matuā tele ni a latou tupe mamā e maua mai ai. Ina ua lē taulau ona maua mai nei tupe mamā, sa matuā mafatia o ia i le tau totogiina o nei aofaiga tetele o tupe ua gau ma oo ai ina gaoia e ia le tupe lea sa tuu na te teuina. Ona o ana gaoioiga ma lona uiga lē salamō, na faateʻaina ai o ia mai le faapotopotoga Kerisiano. Ua matuā moni le lapataiga a le Tusi Paia: “O e manao i le fia mauoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia. Auā o le manao i tupe, o le pogai lea o mea leaga uma lava; ua mananao tele i ai nisi, ona sese ai lava lea o i latou i le faatuatua, ua tuʻia ai ua ati i latou e i latou i puapuaga e tele.”—1 Timoteo 6:9, 10.
21. O le ā le amioga ua taatele i tagata o loo iai i tulaga pule i le lalolagi, ae e ao faapefea ia i latou o loo iai ni tiute tauave i le faapotopotoga Kerisiano ona latou amioai?
21 O se mea masani i tagata o le lalolagi o loo iai i tulaga pule ma nisi tulaga maualuluga ona lē ia i latou ni amioga lelei ae latou te faaalia mai le moni o le manatu, ‘E faaleagaina e le pule.’ (Failauga 8:9) I nisi atunuu, ua avea ma masani a faamasino, o leoleo, ma le aufaipisinisi le faia o faiga faatogafalea, ma isi ituaiga o faiga piopio. Peitai, o i latou o loo taimua i totonu o le faapotopotoga Kerisiano e tatau ona amio lelei ma ia lē aliitai i luga o isi. (Luka 22:25, 26) O toeaina, faapea foi ma auauna o le faiva, e lē auauna i latou ona o ‘le fia fai oloa i ala faapiopio.’ E tatau ona matuā āuliuli lo latou lē auai i so o se taumafaiga ina ia faapogaia pe faaaafia la latou faamasinoga i se fuafuaga ina ia maua ai ni o latou lava tamaoaiga.—1 Peteru 5:2; Esoto 23:8; Faataoto 17:23; 1 Timoteo 5:21.
22. O le ā o le a talanoaina i le mataupu o sosoo mai?
22 I se tulaga lautele, o loo faafetaiaia ai ma le manuia e Kerisiano le luʻi i aso nei o le tausisia o le amio lelei i lo tatou lalolagi ua faatumulia i amioga leaga. Peitai, o le amio lelei e aofia ai nisi mea e tele atu nai lo le tau ina alofia mea leaga. O le a talanoaina i le mataupu o sosoo mai le mea e manaomia moni lava ina ia atiina ae ai le amio lelei.
[Faaopoopoga i lalo]
a Tagai i le faasologa o mataupu “Ia Puipuia Lau Fanau!” (Protect Your Children!), o loo iai i le Awake! o Oketopa 8, 1993.
b O i latou sa auai i faiga faatauatane ma tauafafine i taimi ua tuanai e mafai ona latou faia ni suiga i a latou amioga, e pei lava ona sa faia e nisi i le uluai senituri. (1 Korinito 6:11) Sa tuuina mai ni faamatalaga aogā i le Awake! o Mati 22, 1995, itulau 21-23.
Manatu mo le Autaluga
◻ Aisea na poloaia ai e le Atua le faaumatiaga aʻiaʻi o sa Kananā?
◻ O ā amioga leaga sa taatele i le uluai senituri, ma na faapefea ona ola ai Kerisiano i lena siomaga?
◻ O le ā le faamaoniga e iloa ai ua molimauina e le lalolagi le faaitiitia o amioga tatau i le lalolagi aoao talu mai le 1914?
◻ O ā amioga leaga o loo taatele e tatau i tagata o Ieova ona teena?
[Ata i le itulau 9]
Sa amio lelei Kerisiano o le uluai senituri, e ui lava sa ola i latou i se lalolagi na tumu i amioga leaga
[Ata i le itulau 10]
Ua oo foi ina sao atu amioga leaga i ala o fesootaiga faakomepiuta, ua mafai ai e le toatele o talavou ma isi ona latou faitau ma vāai i ata o amioga matagā faaleituaiga
[Ata i le itulau 12]
E tatau i Kerisiano ona tausisia le amio lelei, ia lē faataitai i togafiti lē faamaoni a isi