Le Loto Fuatia Ifo—O se Avega Mamafa po o se Mea Aogā?
‘UA FAALAVELAVEA lava aʻu e loʻu loto fuatia ifo!’ E mai lea taimi i lea taimi, o le mea moni e oo ai ia i tatou uma se faalogona tiga o le loto fuatia ifo. O na lagona e ono mafai ona amata mai i le na o ni nai faalogona lē mautonu o le mafaufau seia oo ina avea ma tiga matuitui o le loto. O se loto fuatia ifo e ōia, e mafai ona faapogaia ai mafatiaga o le mafaufau po o se lagona o le matuā lē taulau.
E tusa ai la ma lenei manatu, pe ua lē avea ai ea la le loto fuatia ifo o se avega mamafa? Atonu e faapena lagona o nisi. E toatele augatupulaga malamalama ua mavae sa masani ona manatu i le loto fuatia ifo e faapea o se lagona i totonu o le tagata, o se tomai na fanau mai ma ia. E toatele sa iai le lagona e faapea o se taiala tau amio na tuusaʻo mai e le Atua lava ia. O lea ua taʻua ai le loto fuatia ifo e faapea “o le iai o le Atua i totonu o le tagata,” “o lo tatou natura mai le amataga,” ma ua oo lava ina faapea mai “o le musumusuga a le Atua.”
Ae peitai, i tausaga na seʻi mavae atu, ua oo ai ina taatele le manatu e faapea, o le loto fuatia ifo, o se tomai e tele lava ina mafai ona mauaina—o se fua o taaʻiga a mātua ma tagata lautele. Mo se faaaoaoga, ua finau mai nisi o tagata suesue tau i le mafaufau e faapea, ua aʻoaʻoina e se tamaitiiti ina ia taumamao mai amioga lē lelei ona o le fefe i se faasalaga, i le talitonu e faapea, o le mea ua tatou taʻua o le loto fuatia ifo, ua na o se taaʻiga na mauaina mai i uiga totino ma talitonuga o o tatou mātua. O isi ua faasino atu i le vaega e masani ona faia e tagata lautele i le tuuina mai o uiga ma tapulaa. Ua manatu nisi i tiga o le loto fuatia ifo e faapea, ua na o se feteenaiga i le va o mea e tatou te mananao e fai ma mea o loo uunai mai e le sosaiete pule malosi ina ia tatou faia!
E ui i manatu eseese e faatatau i le loto fuatia ifo, ua tumau pea ona matuā maumaututū tagata i o latou lava ala e ui i taaʻiga a mātua, aiga, ma le sosaiete atoa, auā o le mea lena o fai atu ai o latou loto fuatia ifo e fai. Ua oo lava ina loto malilie nisi e faataulagaina o latou ola ona o o latou loto fuatia ifo! Ma e ui lava i le matuā tele o eseesega i tu ma aganuu i le lalolagi, ae o gaoioiga e pei o le fasioti tagata, gaoi, mulilua, pepelo, ma le mataifale, ua toetoe lava o le lalolagi aoao ua manatu i ai e sese. Po ua lē faamaonia ai ea i lenei mea e faapea, o le loto fuatia ifo, o se lagona i totonu, na fananau mai ma i tatou?
Loto Fuatia Ifo—Le Vaaiga a le Tusi Paia
O le pule moni lava o lenei mataupu, o Ieova le Atua. I mea uma lava, “o ia [le Atua] na faia i tatou, ae lē o i tatou.” (Salamo 100:3, NW) E matuā malamalama lelei o ia i lo tatou fausaga. Ua faamatala mai e le Afioga a le Atua, le Tusi Paia e faapea, o le tagata na faia i le “faatusa” o le Atua. (Kenese 1:26) Na foafoaina le tagata faatasi ma se lagona e iloa ai le saʻo ma le sese; mai lava i le amataga, o le loto fuatia ifo, sa avea o se vaega moni o le natura faaletagata.—Faatusatusa i le Kenese 2:16, 17.
Ua faamautinoa mai e le aposetolo o Paulo lenei mea i lana tusi atu i Kerisiano i Roma e faapea: “Auā pe a fai fua e nuu ese e le o i ai le tulafono o mea e tusa ma le tulafono, e ui ina le o i ai le tulafono, ua avea i latou ma tulafono ia te i latou; o i latou ia ua iloa mai ai le galuega o le tulafono ua tusia i o latou loto, e ō faatasi ai foi o latou loto fuatia ifo, o loo fefaaleagai foi, pe fefaatonuai o latou manatu.” (Roma 2:14, 15) Ia mātau e faapea, o le toatele e lei tausia aʻe i le Tulafono a le Atua lea na tuuina atu i tagata Iutaia, o loo mulimuli pea i nisi o mataupu silisili o le tulafono a le Atua, e lē ala i taaʻiga mai tagata, ae ‘e ala i uiga faalenatura na ola aʻe ma i latou’!
O lea, nai lo o le avea o se avega mamafa, o le loto fuatia ifo o se meaalofa mai le Atua, o se mea aogā. E moni, e mafai ona faapogaia ai mafatiaga ia i tatou. Ae afai e utagia lelei, e mafai foi ona tauia ai i tatou i faalogona o le matuā loto malie ma maua ai le filemu i totonu o o tatou loto. E mafai e le loto fuatia ifo ona taitaia, puipuia, ma uunaia i tatou. Ua faapea mai le Interpreter’s Bible: “E mafai ona maua le maloloina o le mafaufau ma faalogona pe a tau lava ina taumafai le tagata lava ia e faafetaui lelei le va o mea na te faia ma mea o ia lagona e tatau ona faia.” E mafai faapefea e se tasi ona faaleleia lena va? Pe faamata e mafai ona faatulaga ma toleni o tatou loto fuatia ifo? O le a talanoaina nei fesili i le isi mataupu o sosoo mai.