E Tāua ia Ieova Lau Auaunaga ma le Loto Atoa

“O mea uma lava o loo tou faia, ia faia ma le loto atoa peiseai ua faia ia Ieova, ae lē i tagata.”—KOLOSE 3:23, “NW.”

1, 2. (a) O le ā le faaeaga silisili e mafai ona tatou mauaina? (e) Aisea atonu e iai ni taimi e lē mafai ai ona tatou faia mea uma o loo tatou mananao e fai i le auauna atu i le Atua?

O LE auauna atu ia Ieova o se faaeaga silisili lea ua mafai ona tatou maua. Ona o lea mafuaaga lelei, ua autausagā ai o faalaeiauina e lenei mekasini Kerisiano ina ia faia so latou sao i le faiva, e oo lava i le auauna ma le ‘matuā faasilisili pea i ai’ i so o se taimi e mafai ai. (1 Tesalonia 4:1) Ae peitai, e lē o mafai i taimi uma ona tatou faia mea uma o loo faanaunau o tatou loto e faia mo le auauna atu i le Atua. Ua faamatala mai e se tuafafine nofofua o lē ua toetoe 40 tausaga talu ona papatiso e faapea: “O tulaga o loo oʻu iai e manaomia ai ona ou faigaluega faasoloatoa. O le mafuaaga ou te faigaluega ai, e lē ina ia maua ai ni oʻu lavalava taugata ma mananaia, pe ina ia mafai ona ou faimalologa solo i ni malaga taugata, peitai ina ia maua mea talafeagai o loo oʻu manaomia, e aofia ai le totogia o tupe mo oʻu togafitiga faafomai ma le vaaia o oʻu nifo. Ou te lagona e pei o loo oʻu tuuina atu ia Ieova ni toega o loo totoe mai o loʻu taimi ma loʻu malosi.”

² O le alofa i le Atua e uunaia ai tatou ina ia mananao e faia ni mea se tele tatou te mafaia i le galuega talaʻi. Peitai o tulaga o loo iai i le olaga e masani ona faatapulaa mai ai mea e mafai ona tatou faia. O le tausia o isi tiute tauave faale-Tusi Paia, e aofia ai tiute faaleaiga, e ono alu uma i ai le tele o o tatou taimi ma le malosi. (1 Timoteo 5:4, 8) I nei “aso e gata ai e oo mai ai aso faigata,” ua atili ai ona avea le olaga ma luʻi. (2 Timoteo 3:1) Pe afai e lē mafai ona tatou faia mea uma o loo tatou mananao e fai i le faiva, atonu e oo ai se tulaga faaletonu i o tatou loto. Atonu tatou te tau mānatu po o fiafia mai le finagalo o le Atua i la tatou tapuaiga.

Le Matagofie o se Auaunaga e Faia ma le Loto Atoa

3. O le ā o faatalitalia e Ieova mai ia i tatou uma?

³ I le Salamo 103:14, ua faamautinoa ma le mafana mai ai i tatou e le Tusi Paia e faapea, “ua silafia lava e [Ieova] le mea na fai aʻi i tatou; ua manatu ia o le efuefu lava i tatou.” E sili atu ona ia malamalama nai lo se isi lava tagata i mea e gata mai ai lo tatou malosi. E na te lē tāpā mai ni mea e sili atu nai lo mea e mafai ona tatou tuuina atu. O ā mea na te faatalitalia maia? O se mea e mafai e tagata taitoatasi ona ofoina atu, e tusa lava po o ā tulaga o loo latou iai i le olaga: “O mea uma lava tou te faia, ia faia ma le loto atoa peiseai ua faia ia Ieova, ae lē i tagata.” (Kolose 3:23, NW) Ioe, e faatalitalia e Ieova i tatou—i tatou uma lava—e auauna atu ia te ia ma le loto atoa.

4. O le ā le uiga o le auauna atu ia Ieova ma le loto atoa?

⁴ O le ā le uiga o le auauna atu ia Ieova ma le loto atoa? O le upu Eleni ua faaaogā mo le “loto atoa” o lona faauigaga moni lava o le “sau mai le solu.” O le “solu” e faasino atu i le tagata atoa, e iai faatasi ma ona tomai uma tau i le tino ma lona mafaufau. O le auauna atu ma le loto atoa la e faauiga i le tuuina atu o i tatou lava, le faaaogaina o o tatou tomai uma, ma le faaaogaina o lo tatou malosi i se tulaga atoatoa e mafai ai i le auaunaga i le Atua. Pe a faafaigofie le manatu, lona uiga o le faia o mea uma lava e mafai e i tatou o tagata ola ona fai.—Mareko 12:29, 30.

5. Ua faapefea i le faataitaiga a le au aposetolo ona faaalia ai e lē tatau ona tutusa mea e faia e tagata uma i le faiva?

⁵ Po o le loto atoa ea e faauiga faapea e tatau ona tutusa uma le tele o mea tatou te faia i le faiva? E matuā faigata ona mafai lena mea, auā e eseese tulaga ma tomai o le isi tagata mai le tasi tagata. Seʻi manatu i aposetolo faamaoni o Iesu. Sa lei tutusa mea na mafai e i latou uma ona fai. Mo se faataitaiga, e itiiti ni mea tatou te iloa e uiga i nisi aposetolo, e pei o Simona le Kanana ma Iakopo le atalii o Alefaio. Atonu pe sa itiiti ni a la galuega na fai a o avea ma aposetolo. (Mataio 10:2-4) E ese la mai ia Peteru, o lē na mafai ona ia talia le tele o tiute tauave tāua—lea foi na oo lava ina tuuina atu e Iesu ia te ia “ki o le malo”! (Mataio 16:19) Peitai, sa lei faasilisilia ai Peteru mai isi. Ina ua maua e Ioane le vaaiga o le Ierusalema Fou i le Faaaliga (pe tusa o le 96 T.A.), na ia vaaia ai ni maa faavae se 12 ma o loo tusia i luga o na maa “igoa o le au aposetolo . . . e toasefulu ma le toalua.”a (Faaaliga 21:14) Sa faatāua e Ieova auaunaga a aposetolo uma lava, e ui e foliga mai sa mafai e nisi ona latou faia ni mea e sili atu ona tele nai lo isi.

6. I le tala faatusa a Iesu i le tagata lūlū saito, o le ā e tupu i fatu ia ua paʻūū i “le eleele lelei,” ma o ā fesili ua lāgā ai?

⁶ Ua faapena foi ona lē tāpā e Ieova se aofaiga tutusa o le talaʻiga mai ia i tatou uma. Sa faaalia e Iesu lenei manatu i le tala faatusa i le tagata lūlū saito, lea sa faatusa atu ai le galuega talaʻi i le lūlūina o fatu. E eseese uma ituaiga o eleele na paʻūū ifo i ai fatu, e faataitaia ai le eseese o ituaiga o loto o loo faaalia e i latou o ē faalogo i le feau. Na faamatala mai e Iesu: “A o le mea sa luluina i le eleele lelei, o ia lea ua faalogo i le upu, ma lagona ai; ua fua mai lava ia, e taiselau i nisi, e taionogafulu i nisi, e taitolugafulu foi i nisi.” (Mataio 13:3-8, 18-23) O le ā lenei fua, ma aisea ua eseese ai le tele o mea e fuaina mai?

7. O ā fua o fatu ia sa lūlūina, ma aisea ua eseese ai le aofaiga o fua o loo fuaina mai?

⁷ Talu ai o le fatu na lūlū o “le upu o le malo” lea, o le fuaina mai la o fua o loo faasino atu i le faalauiloaina o lea upu, le tautala atu ai i isi. (Mataio 13:19) E eseese le tele o fua o loo fuaina mai—mai le taʻi tolusefulu e oo atu i le taʻi selau—auā e eseese tomai ma tulaga o mea i le olaga. O se tagata e lelei lona soifua maloloina ma tulaga lelei lona tino atonu e mafai ona ia faaaluina se taimi tele i le talaʻiga nai lo le mea e mafai e se tasi o loo lē lava sona malosi ona o se maʻi o loo faaauau pea pe ona ua matua foi le soifua. O se tagata talavou nofofua o loo saoloto mai ni tiute tauave i le faia o se aiga, e mafai ona ia fai ni mea e tele atu nai lo mea e mafai e se tagata o loo tatau ona faigaluega faasoloatoa ina ia maua mea e tausi ai le aiga.—Faatusatusa i le Faataoto 20:29.

8. O le ā le silafaga a Ieova i ē o loo foai atu le mea sili latou te mafaia?

⁸ I le silafaga a le Atua, po o le tagata ea o loo auauna ma le loto atoa o loo ia fuaina mai le taʻi tolusefulu, ua itiiti lona faamaoni nai lo lē o loo fuaina mai le taʻi selau? E leai! E ono eseese le tele o mea e fuaina mai, ae o loo fiafia le finagalo o Ieova pe afai o loo tuuina atu le auaunaga i le mea silisili e mafai ona tatou faia. Ia manatua, o le aofaiga eseese o fua e tutupu uma mai lava i loto po o le “eleele lelei.” O le upu Eleni (ka·losʹ) ua faaaogā mo le “lelei” e faamatalaina ai se mea e “matagofie” ma “e faafiafia ai le loto, ma avatu ai se vaaiga manaia i mata.” Maeu le faamafanafanaloto o le iloaina e faapea, pe afai tatou te faia mea silisili tatou te mafai, ona matagofie ai lea o o tatou loto i le silafaga a le Atua!

Aua le Faatusatusa Atu le Tasi i le Isi

9, 10. (a) E ono taitaia i tatou e o tatou loto i le ā le ituaiga o mafaufauga sese? (e) Ua faapefea i le tala faatusa i le 1 Korinito 12:14-26 ona faaalia ai e lē o faatusatusaina e Ieova i tatou i isi i mea o loo tatou faia?

⁹ Peitai, atonu e eseese auala e fuafuaina ai e o tatou loto lē lelei atoatoa mea. Atonu e faatusatusa atu ai la tatou auaunaga i auaunaga a isi. E ono faapea ifo, ‘E tele naʻuā mea o loo faia e isi i le faiva nai lo mea o loo oʻu faia. O le a faapefea la ona fiafia mai le finagalo o Ieova i laʻu auaunaga?’—Faatusatusa i le 1 Ioane 3:19, 20.

¹⁰ E sili atu ona maualuluga manatunatuga ma ala o Ieova nai lo o i tatou. (Isaia 55:9) E mafai ona tatou maua sina malamalamaga i le auala o loo silasila ai Ieova i a tatou taumafaiga taitoatasi, mai le 1 Korinito 12:14-26, lea o loo faatusaina ai le faapotopotoga i se tino e tele ona vaega eseese—mata, lima, vae, taliga, ma isi mea faapena. Seʻi manatu mo sina taimi, i le tino moni lava. Pagā se valea pe afai e te faatusatusaina ou mata i ou lima pe faatusatusa ou vae i ou taliga! E tofu vaega taitasi ma a latou matafaioi eseese o loo faatino, peitai o vaega uma lava e aogā ma e tāua. Ua faapena foi ona faapelepeleina e Ieova la tatou auaunaga ma le loto atoa e tusa lava po o loo faia e isi mea e sili atu po o latou faia mea e itiiti ifo.—Kalatia 6:4.

11, 12. (a) Aisea atonu e lagona ai e nisi faapea o i latou e “vaivai” pe “matagā”? (e) E faapeī le silasila a Ieova i la tatou auaunaga?

¹¹ Talu ai ua gata mai mea tatou te mafaia ona o le faaletonu o le soifua maloloina, le soifuaga matua, po o isi lava tuatuagia, e iai taimi atonu e lagona ai e nisi o i tatou faapea o i tatou o ni ē ua “vaivai” pe “matagā.” Peitai e lē o le auala lena e silasila ai Ieova i mataupu. Ua taʻu mai e le Tusi Paia ia i tatou: “E sili lava ona aoga o itutino e taʻua e vaivai; ma itu tino ua taʻua e i tatou e matagā, ua sili lo tatou taʻulelei i ai; . . . a ua faatatauina e le Atua le tino uma, ua ia tuuina foi le ava i le itu tino ua vaivai.” (1 Korinito 12:22-24) E mafai ona pele ia Ieova tagata taitoatasi uma lava. Na te faapelepeleina la tatou auaunaga o loo faia mai le mea e gata ai lo tatou mafai. Po ua lē uunaia ea oe e lou loto e manao e faia mea uma e te mafaia i le auauna atu i lena Atua e finagalo malamalama ma alofa?

¹² O le mea la e tāua ia Ieova, e lē o lou faia o ni mea se tele e pei ona faia e le isi tagata, ae o lou faia o mea o loo mafaia moni lava e oe—o lou lava tagata—ona fai. O le faatāuaina e Ieova o o tatou tomai taitoatasi sa faataitaia mai i se auala e matuā pāʻia ai o tatou loto, i feutagaiga a Iesu ma ni fafine se toalua sa matuā eseese lava tulaga o le tasi mai le isi, a o toe lava o ni nai aso faaiuina lona soifua i luga o le lalolagi.

Le Meaalofa “Tau Tele” a se Fafine Loto Talisapaia

13. (a) O ā tulaga o mea sa iai i le taimi na liligi ifo ai e Maria le uu nato i le ao ma aao o Iesu? (e) O le ā le tau o le uu a Maria?

¹³ I le afiafi o le Aso Faraile, Nisani 8, na taunuu ai Iesu i Petania, o se tamai nuu i le malifa i sasaʻe o le Mauga o Olive, e tusa ma le lua maila [3 kilomita] mai Ierusalema. Sa iai ni uo mamae a Iesu i lenei aai—o Maria, Mareta, ma lo la tuagane o Lasalo. Sa masani ona talimalo lo latou aiga ia Iesu. Peitai i le afiafi o le Aso Toonai, sa faiʻaiga ai Iesu ma ana uo i le fale o Simeona, lē na avea muamua ma lepela, o lē e foliga mai sa faamaloloina e Iesu. A o taoto faalagolago atu Iesu i le laulau, sa faia ai e Maria se gaoioiga loto maulalo na faataitaia mai ai le loloto o lona alofa mo le tagata o lē na faatuina aʻe lona tuagane. Sa ia tataʻe le fagu alapasa o loo iai se uu nato, ‘tautele.’ E matuā tautele lava! Sa tusa lona tau ma le 300 tenari, ua tutusa lena ma le totogi o se tagata faigaluega mo le tausaga atoa. Sa ia liligi ifo lenei uu manogi i le ao o Iesu ma faasolo ifo ai i ona aao. Sa ia faaaogā foi lona laulu e solo mātū ai aao o Iesu.—Mareko 14:3; Luka 10:38-42; Ioane 11:38-44; 12:1-3.

14. (a) Sa faapeī uiga faaalia o soo i le gaoioiga na fai e Maria? (e) Sa faapefea ona lagolagoina e Iesu Maria?

¹⁴ Na feita le au soo! ‘Aisea ua faamaimau ai?’ o la latou fesili lea. I le taumafai o Iuta e nanā ona tuinanauga gaoi ae faatagā tautala ane e pei o se tagata loto alofa mo ē matitiva, na ia faapea ane ai: “Pe se a le mea na le faatau ai lena uu manogi i tenari e tolu selau, ma avatu ai i e matitiva?” Sa lei tautala Maria. Peitai, na fetalai atu Iesu i le au soo: “Tuupea ia ia te ia; se a le mea tou te faalavelave ai ia te ia? O le mea [se ituaiga o ka·losʹ] lelei ua faia e ia ia te au nei. . . . Ua faia e ia le mea ua ia mafai ai; ua na uuina loʻu tino e fai ma faataimuaga o loʻu tanuga. E moni, ou te fai atu ia te outou, o nuu uma lava i le lalolagi e talaʻiina i ai lenei tala lelei, e taʻua ai foi lenei mea ua faia e ia, e faamanatu aʻi ia te ia.” Maeu le toafilemu atonu na oo i le loto o Maria ona o fetalaiga faamafanafana a Iesu!—Mareko 14:4-9; Ioane 12:4-8.

15. Aisea na matuā ootia ai Iesu i le gaoioiga na faia e Maria, ma o le ā tatou te aʻoaʻoina mai ai e faatatau i le auaunaga e faia ma le loto atoa?

¹⁵ Na matuā ootia Iesu i le gaoioiga na faia e Maria. I le fuafua atu i ai a Iesu, sa faatinoina e Maria se gaoioiga ua ono ma tatau ona viiviia. Sa lei faatāua e Iesu le tau o le meaalofa ae sa ia faatāuaina le mea moni e faapea sa “faia e ia le mea ua ia mafai.” Sa ia faaaogā le avanoa ma foaiina atu se mea na mafai ona ia foai. O upu nei o loo faaaogā e isi faaliliuga, “Ua ia faia mea uma na te mafaia,” po o le, “Ua ia faia le mea sa mafai e lona malosi ona faia.” (An American Translation; The Jerusalem Bible) Sa loto atoa le foai a Maria, auā na ia foai atu le mea e sili ona lelei sa ia te ia. O le uiga moni lava lena o le auaunaga e faia ma le loto atoa.

O “Tupe Iti e Lua” a se Fafine ua Oti Lana Tane

16. (a) Na faapefea ona matauina e Iesu le foai na faia e se fafine mativa ua oti lana tane? (e) O le ā le telē o se tau o tupe siliva a le fafine ua oti lana tane?

¹⁶ I le lua aso mulimuli ane, ia Nisani 11, na atoa le aso o iai Iesu i le malumalu, o iina na fesiligia ai lana pule ma sa ia tali faavave atu ai foi i ni fesili faigata sa lāgā e faatatau i lafoga, le toetu, ma isi lava mataupu. Sa ia tausalaina le au tusiupu ma le au Faresaio, ona e lē gata i isi mau mea, ae faapena foi ona o lo latou “faauma [o] fale a fafine ua oti a latou tane.” (Mareko 12:40) Ona nofo lea o Iesu, e foliga mai i totonu o le Lotoā o Fafine, o iina, e tusa ai ma le tū faa-Iutaia, sa iai pusa e 13 e teu ai tupe. Na umi se taimi o nofoi pea o ia, o loo silasila totoʻa atu a o lafo e tagata a latou meaalofa i pusa e teu ai tupe. E toatele tagata mauoa na ō ane, o nisi atonu na ō ane ma ni foliga faafiaamiotonu, e oo lava i uiga faalialiavale. (Faatusatusa i le Mataio 6:2.) Sa patino lava se fafine na taulai atu i ai le silasila a Iesu. Atonu i le vaai masani a tagata, e leai se mea mataina latou te ono iloa atu i le fafine mativa po o lana meaalofa. Peitai o Iesu, o lē sa mafai ona ia silafia loto o isi, sa ia silafia o se “fafine mativa ua oti lana tane.” Na ia silafia foi le aofai o le meaalofa a le fafine—o ni “tupe iti e lua.”b—Mareko 12:41, 42.

17. Na faapefea ona viiviia e Iesu le foai a le fafine ua oti lana tane, ma o le ā tatou te aʻoaʻoina mai ai e faatatau i le foai atu i le Atua?

¹⁷ Ona valaau atu lea o Iesu i ona soo, auā sa ia manao ina ia latou muai vāai i le lesona o le a ia aʻoaʻo atu. Na fetalai Iesu: “O mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai.” I le fua a Iesu, e tele atu mea na tuu e le fafine i totonu nai lo o mea uma lava o loo tuu e isi. Sa ia foai atu “ana mea uma sa ia te ia”—o ana toe tupe lava sa totoe. O le faia faapea, sa ia faalagolago atu ai i aao alofa o Ieova e tausia o ia. O le tagata sa faamatilatila atu e avea o se faaaoaoga o le foai atu i le Atua, o lē ana le meaalofa e toeitiiti lava leai se aogā faaletino. Peitai i le silafaga a le Atua, sa matuā lē mafaatusalia lona tāua!—Mareko 12:43, 44; Iakopo 1:27.

Ia Aʻoaʻoina Mai Auala e Silasila ai Ieova i Auaunaga e Faia ma le Loto Atoa

18. O le ā tatou te aʻoaʻoina mai feutagaiga a Iesu ma nei fafine e toalua?

¹⁸ I feutagaiga a Iesu ma nei fafine e toalua, ua tatou aʻoaʻoina mai ai ni lesona faamafanafanaloto e faatatau i le auala e silasila ai Ieova i le auaunaga e faia ma le loto atoa. (Ioane 5:19) Sa lei faia e Iesu se faatusatusaga i le va o le fafine ua oti lana tane ma Maria. Sa tāua ia te ia tupe siliva e lua a le fafine ua oti lana tane, e pei lava foi o le tāua ia te ia o le uu ‘tautele’ a Maria. Talu ai sa foai atu e fafine uma e toalua mea e sili ona lelei sa la mafaia, i le silafaga la a le Atua, sa taufai tutusa uma le tāua o a la meaalofa. Pe afai la o loo faalavelavea oe i ni lagona faapea e leai sou aogā talu ai e te lē o mafai ona faia mea uma o loo e manao e fai ina ia auauna atu ai i le Atua, aua le loto vaivai. E fiafia le finagalo o Ieova e taliaina le mea sili e mafai ona e foai atu. Ia manatua, “e vaai Ieova i le loto,” o lona uiga la o loo matuā silafia mai e ia moomooga o lou loto.—1 Samuelu 16:7.

19. Aisea e lē tatau ai ona tatou faamasino atu i mea o loo faia e isi i le auaunaga i le Atua?

¹⁹ O le silasila a Ieova i auaunaga e faia ma le loto atoa e tatau ona taaʻina ai le auala o loo tatou vaai ai i isi ma feutagai ai ma i latou. Pagā se lē alofa o le faitioina o taumafaiga a isi pe faatusatusa atu le auaunaga a le tasi tagata i le auaunaga a le isi! O se mea e faanoanoa ai, na tusi mai se tasi Kerisiano: “I nisi taimi, e manatu ai nisi e faapea, pe afai e te lē o paeonia lona uiga e lē o iai sou aogā. O nisi o i matou o loo tauivi malosi ina ia faaauau pea, ‘i le avea’ ma tagata talaʻi pea o le Malo, o loo manaomia foi ona faaalia i ai le agaga talisapaia.” Seʻi o tatou manatua e lē o ia i tatou le pule e faamasino ai i mea o loo faia aʻe ai le auaunaga ma le loto atoa a se isi uso Kerisiano. (Roma 14:10-12) E faapelepeleina e Ieova le auaunaga ma le loto atoa a i latou taitoatasi o le faitau miliona o tagata talaʻi faamaoni o le Malo, ma e tatau foi ona faapena la tatou vaai i ai.

20. E sili atu ona lelei pe a tatou manatu faapefea e faatatau i o tatou uso tapuai?

²⁰ Ae faapefea pe a foliga mai e itiiti mea o loo faia e isi nai lo mea e mafai ona latou faia i le faiva? O se faaitiitiga e iai i le auaunaga a se uso talitonu atonu e faailoa atu ai i toeaina alolofa e faapea, o loo iai se manaoga mo se fesoasoani po o ni faalaeiauga. I le taimi lava e tasi, e lē tatau ona galo ia i tatou, o nisi tagata, atonu o la latou auaunaga ma le loto atoa ua matuā atagia mai ai tupe siliva iti a le fafine ua oti lana tane, nai lo le atagia mai ai o le uu taugata a Maria. E masani lava ona sili atu le lelei o le manatu faapea o loo alolofa o tatou uso ma tuafāfine ia Ieova, ma o lena alofa o le a uunaia ai i latou e faia ni mea se tele—ae lē o ni mea itiiti—latou te mafai. E mautinoa e leai se auauna faamaoni a Ieova o le a filifili e itiiti ni mea na te fai nai lo mea e mafai ona ia faia e auauna atu ai i le Atua!—1 Korinito 13:4, 7.

21. O le ā le galuega tauia o loo sailia e le toatele, ma o ā fesili ua lāgā ai?

²¹ Peitai, ua iloa e le toatele o tagata o le Atua, o le auaunaga ma le loto atoa, e faauiga atu i le sailia o se galuega e matuā tauia lava—le faiva faapaeonia. O ā faamanuiaga latou te maua? Ae faapefea nisi o i tatou o ē e lei mafai ona avea ma paeonia—e mafai faapefea ona tatou faaalia le agaga faapaeonia? O fesili nei o le a talanoaina i le mataupu o loo sosoo mai.

[Faaopoopoga i lalo]

E Faapefea Ona E Tali?

◻ O le ā le uiga o le auauna atu ia Ieova ma le loto atoa?

◻ Ua faapefea e le tala faatusa i le 1 Korinito 12:14-26 ona faaalia ai, e lē faatusatusaina e Ieova i tatou i isi?

◻ O le ā ua tatou aʻoaʻoina mai fetalaiga a Iesu e uiga i le uu taugata a Maria ma tupe siliva a le fafine ua oti lana tane, e faatatau i le foai atu ma le loto atoa?

◻ E tatau faapefea i le silafaga a Ieova e faatatau i le auaunaga ma le loto atoa ona taaʻina ai auala tatou te manatu ai le tasi i le isi?

[Ata i le itulau 15]

Sa foai atu e Maria le mea e sili ona lelei na te mafai ona foai, i le faamanogiina o le tino o Iesu i le uu e ‘sili ona tautele’

[Ata i le itulau 16]

O tupe siliva a le fafine ua oti lana tane—e toetoe lava leai sona aogā faaletino ae sa lē mafaatusalia lona aogā i le silafaga a Ieova