E Nonofo i le Lalolagi ae Lē Faia ai se Vaega

“E lē ni o le lalolagi outou, . . . e ʻinoʻino ai le lalolagi ia te outou.”—IOANE 15:19.

1. O le ā le faiā a Kerisiano ma le lalolagi, peitai o le ā le vaaiga a le lalolagi ia i latou?

I LONA po mulimuli faatasi ai ma ona soo, na fetalai atu Iesu ia i latou: “E lē ni o le lalolagi outou.” O lē fea lalolagi sa ia fetalai i ai? Pe sa ia lei taʻua ea i se taimi muamua atu e faapea: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau”? (Ioane 3:16) Sa manino lava le avea o soo ma vaega o lena lalolagi auā o i latou na muamua faaalia le faatuatua ia Iesu mo le mauaina o le ola e faavavau. Aisea la, na fetalai ai Iesu e faapea o ona soo sa tatau ona vavae ese mai le lalolagi? Ma aisea foi na ia fetalai ai: “E lē ni o le lalolagi outou, . . . o le mea lea e ʻinoʻino ai le lalolagi ia te outou”?—Ioane 15:19.

2, 3. (a) O le ā le “lalolagi” lea sa leai ai se vaega a Kerisiano? (e) O ā fa a le Tusi Paia e tusa ai ma le “lalolagi” lea e leai ai se vaega a Kerisiano?

² O le tali, ona e faaaogā e le Tusi Paia le upu “lalolagi” (faa-Eleni, koʹsmos) i ni auala eseese. E pei ona faamatalaina i le mataupu na muamua atu, o nisi taimi i le Tusi Paia e faatatau “le lalolagi” i tagata. O le lalolagi lena e alofa i ai le Atua ma lea foi na maliu ai Iesu mo i latou. Peitai, ua taʻua e le Oxford History of Christianity e faapea: “E faaaogā foi e Kerisiano le faaupuga ‘lalolagi’ mo se mea ua vavae ese mai le Atua ma e tetee ia te ia.” E faapefea ona moni lenei mea? I lana tusi Les chrétiens et le monde (Kerisiano ma le lalolagi), na taʻua ai e se tusitala Katoliko e suafa ia Roland Minnerath e faapea: “I se tulaga e lē logolelei, e manatu ai i le lalolagi o se . . . nofoaga o loo faagaoioia ai gaoioiga a faiga malo ia e tetee atu i le Atua, ma o iina foi, e ala i lona tetee atu i le pulega manumalo a Keriso, ua faia aʻe ai se emepaea e avea ma fili i lalo o le taitaiga a Satani. O lenei “lalolagi” o le tuufaatasiga o tagata ua vavae ese mai le Atua. O Kerisiano moni e lē o se vaega o lenei lalolagi, ma e ʻinoʻino ia i latou.

³ A o agaʻi mai i le iuga o le uluai senituri, sa mafaufau Ioane i le lalolagi lenei ina ua ia tusia: “Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā. Auā o mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e le mai le Tamā ia, a e mai le lalolagi.” (1 Ioane 2:15, 16) Na ia tusi mai foi: “Ua tatou iloa e mai le Atua lava i tatou, a o le lalolagi uma o loo nofo toilalo i loo leaga.” (1 Ioane 5:19) O Iesu lava ia sa ia taʻua Satani o “le alii [pule] o lenei lalolagi.”—Ioane 12:31; 16:11.

Le Tupu Aʻe o Malo Malolosi o le Lalolagi

4. Na faapefea ona oo mai malo malolosi o le lalo-lagi lea ua iai nei?

⁴ O le lalolagi o tagata ua vavae ese mai le Atua e pei ona iai nei na amata ona iai ina ua faatoʻā mavae le Lolo i ona po o Noa, ina ua lē toe tapuai atu ia Ieova le Atua le toatele o ē na tupuga mai ia Noa. Sa matilatila i le amataga ia Nimarota, o lē na faavaeina se aai ma o “lē malosi i tuli manu [“sa tetee atu,” NW] i luma o Ieova.” (Kenese 10:8-12) I na vaitaimi o le tele lava o le lalolagi sa faamaopoopo i ni tamai aai sa avea o ni malo, ma e mai lea taimi i lea taimi sa faapotopoto ma sii taua atu le tasi malo i le isi malo. (Kenese 14:1-9) O nisi o nei tamai aai sa avea o ni malo na iu ina pule i isi malo ma avea ai ma malo malolosi i isi vaipanoa. O nisi malo malolosi na pule, na tutupu aʻe ma avea ma malo malolosi o le lalolagi.

5, 6. (a) O ā malo malolosi e fitu o le lalolagi i le talafaasolopito a le Tusi Paia? (e) Ua faapefea ona faaāta mai nei malo malolosi o le lalolagi, ma o fea e maua mai ai lo latou pule?

⁵ I le mulimuli atu i ala o Nimarota, sa faapena foi ona lei tapuai atu pule o le lalolagi ia Ieova, o se mea moni na atagia mai i a latou faiga matautia ma le sauā. O nei malo malolosi o le lalolagi o loo faaāta mai i le Tusi Paia e ni manu feai, ma i le gasologa mai o senituri, ua faamanino mai ai e le Tusi Paia le ono o nei malo, ia sa iai ni a latou taaʻiga malolosi i tagata o Ieova. O nei malo o Aikupito, Asuria, Papelonia, Metai ma Peresia, Eleni, ma Roma. Pe a mavae Roma, sa valoia mai o le a aliaʻe le malo malosi lona fitu o le lalolagi. (Tanielu 7:3-7; 8:3-7, 20, 21; Faaaliga 17:9, 10) Ua faamaonia o le Malo Malosi lea o le Lalolagi, le malo fuifuilua o Amerika ma Peretania, o loo faia aʻe i le Emepaea o Peretania ma lana aumea o le Iunaite Setete, lea sa oo ina sili aʻe ia Peretania i lona malosi. Na amata ona fausia aʻe le Emepaea o Peretania ina ua matuā mou ese atu atoatoa vaega mulimuli lava sa iai o le Emepaea o Roma.a

⁶ O malo malolosi e fitu o le lalolagi o loo faaāta mai i le tusi o Faaaliga i ulu o le manu feai e fitu ona ulu lea na alu aʻe mai le sami o faiga sousou a tagata. (Isaia 17:12, 13; 57:20, 21; Faaaliga 13:1) O ai e avatua le pule i lenei manu feai o loo pule? Ua tali mai le Tusi Paia: “Ua tuuina atu foi ia te ia e le tarako lona malosi, ma lona nofoālii, ma le pule tele.” (Faaaliga 13:2) Ma le mautinoa lava, o le tarako o Satani le Tiapolo lea.—Luka 4:5, 6; Faaaliga 12:9.

Le Fotuai Mai o le Pulega a le Malo o le Atua

7. O le ā o loo faamoemoe atu i ai Kerisiano, ma ua faapefea i lena mea ona aafia ai la latou faiā ma faiga malo a le lalolagi?

⁷ Ua toeitiiti nei 2,000 tausaga, o tatalo pea Kerisiano: “Ia oo mai lou malo, Ia faia lou finagalo, I le lalolagi e pei ona faia i le lagi.” (Mataio 6:10) Ua iloa e Molimau a Ieova e na o le Malo lava o le Atua na te aumaia le filemu moni i le lalolagi. Ona o lo latou uaʻi totoʻa atu i valoaga o le Tusi Paia, ua latou talitonu ai ua lē o toe mamao ona taliina loa lea o lenei tatalo, ma ua lē o toe umi ona pulea lea e le Malo mataupufai a le lalolagi. (Tanielu 2:44) O lo latou pipii atu i lenei Malo ua māfua ai ona latou solitū i meafai a faiga malo o le lalolagi.

8. Ua faapefea ona tali atu faiga malo i le pule o le Malo o le Atua, e pei ona valoia mai i le Salamo 2?

⁸ E iai nisi atunuu e faapea mai o loo latou tausia mataupu silisili faatapuaiga. Peitai, i lona faatinoga ua latou lē o amanaiaina le mea moni faapea, o Ieova o le Pule Silisili Ese Aoao ma ua ia faanofoina Iesu o le Tupu faalelagi ua iai le pule i le lalolagi. (Tanielu 4:17; Faaaliga 11:15) Ua taʻua i se salamo faavaloaga e faapea: “Ua tutū mai tupu o le lalolagi, ua pulega faatasi foi alii, e tetee atu ia Ieova ma le na ia faauuina [Iesu], ua faapea ane: ‘Seʻi tatou motusi ese a laua noataga, ma lafoaieseina a laua maea ia te i tatou.’” (Salamo 2:2, 3) E matuā lē taliaina lava e faiga malo ni “noataga” tauatua po o ni “maea” lea e ono faatapulaa mai ai a latou pulega faalemalo. O lea, ua fetalai atu ai Ieova ia Iesu, lana Tupu filifilia: “Ia e fai mai ia te au, ona ou foaiina atu ai lea ia te oe o nuu ese e fai mou tofi, ma tuluiga o le lalolagi e fai mou. E te fasi gaugauina i latou i le tootoo uamea; e pei o le ipu a le fai ipu omea e te nutililii ia te i latou.” (Salamo 2:8, 9) Peitai, o le lalolagi o tagata lea na maliu ai Iesu o le a lē ‘nutililiia’ atoatoa.—Ioane 3:17.

Alofiaina o “le Faailoga” o le “Manu Feai”

9, 10. (a) O le ā le mea lea o loo lapataia ai i tatou i le tusi o le Faaaliga? (e) O le ā ua faaāta mai e le tauaveina o ‘le faailoga o le manu feai’? (i) O ā faailoga ua taliaina e auauna a le Atua?

⁹ Sa lapatai mai le Faaaliga lea na maua e le aposetolo o Ioane e faapea, o le lalolagi o tagata lea ua vavae ese mai le Atua o le a faateteleina mea na te faia faamalosi a o latalata lava lona iuga, i le “faailogaina [lea] o tagata uma, o tagata nuu atoa ma alii, o e mauoa ma e matitiva, o e saʻoloto ma e pologa, ia faailogaina i latou i o latou lima taumatau, po o latou muaulu; ina ia le mafaia ona faatau mai pe faatau atu e se tasi, tau lava o e ua i ai le faailoga.” (Faaaliga 13:16, 17) O le ā le uiga o lenei mea? O le faailoga i le lima taumatau ua fetaui lelei e faaāta ai gaoioiga olaola e lagolago atu ai. Ae faapefea le faailoga i le muaulu? Ua taʻua e le Expositor’s Greek Testament e faapea: “O lenei faiga e pei ona faaāta mai iinei e fesootai atu i le faiga masani o le faailogaina o fitafita ma pologa i se faailoga e ta i le tino . . . ; ia a lē o lena foi, e fesootai atu i le tu faalotu o le tauaveina o le igoa o se atua mo se puipuiga.” E toatele tagata o loo latou tauaveina i se uiga faafaatusa lenei faailoga, e ala i a latou gaoioiga ma faamatalaga, ua mataulia ai i latou o ni “pologa” po o “fitafita” a le “manu feai.” (Faaaliga 13:3, 4) E tusa ai ma lo latou lumanai, ua fai mai le Theological Dictionary of the New Testament: “Ua faataga e fili o le Atua le [faailoga] o le manu feai, le fuainumera lilo lea o loo iai lona igoa, ina ia faailogaina ai o latou muaulu ma le lima. Ua avatu e lenei mea ia i latou ni avanoa e sili ona lelei mo faiga faapisinisi ma fefaatauaiga auiluma, peitai ua aumaia ai i latou i le toasa o le Atua ma aveesea ai i latou mai lona malo faameleniuma, Faaa. 13:16; 14:9; 20:4.”

¹⁰ E manaomia lava le matuā lototele ma le onosai ina ia teena ai omiga e talia “le faailoga.” (Faaaliga 14:9-12) Peitai, o loo iai i auauna a le Atua lena malosi, ma ona o lena, e masani ona itagia ma faileagaina ai i latou. (Ioane 15:18-20; 17:14, 15) Nai lo le tauaveina o le faailoga o le manu feai, na fai mai Isaia o le a tusia faafaatusa i o latou lima, “Mo Ieova.” (Isaia 44:5) E faaopoopo atu i lena, talu ai lo latou ‘oi ma mapu i tiga’ ona o mea inosia ua faia e lotu aposetate, ua latou mauaina ai se faailoga faafaatusa i o latou muaulu e mataulia ai i latou o ē ua talafeagai ona faasaoina pe a oo mai faamasinoga faaoosala a Ieova.—Esekielu 9:1-7.

11. O ai o faatagaina faiga malo a tagata ina ia pule seia oo mai le Malo o le Atua e puleaina le lalolagi?

¹¹ Ua faatagaina e le Atua faiga malo a tagata e pule seia oo i le taimi e pulea atoatoa ai lenei lalolagi e le Malo faalelagi o Keriso. O le faatagaga lenei tauatua ua avatu i malo faapolotiki, sa faasino atu i ai faamatalaga a le polofesa o Oscar Cullmann i lana tusi The State in the New Testament. Ua ia tusia e faapea: “O le tulaga fenumiai ma le ‘lē tumau’ o setete faapolotiki o le mafuaaga lea o le lē auaufaatasi atu o uluai Kerisiano i le Setete, nai lo lea e foliga mai e feteenai. Ou te faamamafa atu e foliga mai o le tulaga lena. Na pau lava le mea tatou te manaomia o le taʻua o le Roma 13:1, ‘Ia usiusitai tagata uma i le pule . . . ,’ faatasi ma le Faaaliga 13: o le Setete o le manu feai lea mai le to e lē gata.”

Le “Manu Feai” ma “Kaisara”

12. O le ā le vaaiga paleni o loo iai i Molimau a Ieova e faatatau i faiga malo a tagata?

¹² O le a lē o se mea saʻo pe a tatou manatu e faapea o tagata uma lava o loo i pulega faalemalo o sui ia o Satani. E toatele ua faamaonia mai o i latou o ni tagata e manatu saʻo ma fai mea tonu, e pei o le suikonesula o Sekio Paulo o lē o loo faamatalaina e le Tusi Paia o “le tagata faautauta.” (Galuega 13:7) O nisi pule ua latou puipuia ma le lototele aiā tatau a ni vaega toalaiti o tagata, ua taitaia i latou e o latou loto fuatia ifo mai le Atua e tusa lava pe sa latou lei iloa Ieova ma ana fuafuaga. (Roma 2:14, 15) Manatua, o loo faaaogā e le Tusi Paia le upu “lalolagi” i ni auala se lua e tuufaafeagai: le lalolagi o tagata, lea e alofa i ai le Atua ma e ao foi ona tatou alolofa i ai, ma le lalolagi o tagata lea ua vavae ese mai ia Ieova, lea o loo avea ai Satani ma ona atua ma e manaomia foi ona tatou tutū ese mai ai. (Ioane 1:9, 10; 17:14; 2 Korinito 4:4; Iakopo 4:4) O lea la, e paleni le vaaiga a auauna a Ieova agaʻi i pulega faaletagata. Tatou te solitū i mataupufai faapolotiki ona o loo tatou auauna o ni amepasa po o ni sāvali o le Malo o le Atua, ma ua tuuina atu o tatou ola mo le Atua. (2 Korinito 5:20) I le isi itu, e tatau ona fai faatatau lo tatou gauai atu ia i latou o loo iai le pule.

13. (a) O le ā le silasila a Ieova i faiga malo a tagata? (e) O le ā le mamao e oo i ai le gauai faa-Kerisiano i faiga malo a tagata?

¹³ O lenei faatulagaga paleni ua atagia mai ai le silafaga a Ieova le Atua lava ia. Pe afai e faaaogā sese e malo malolosi o le lalolagi, e oo lava foi i atunuu laiti le pule ua ia i latou, pe latou te faatigaina i o latou tagatānuu, pe faasauā i ē o loo tapuai i le Atua, e mautinoa la ua fetaui ona faamatalaina faavaloaga i latou o ni manu ua sili ona taufeai. (Tanielu 7:19-21; Faaaliga 11:7) Ae peitai, pe a faataunuu e pulega faalemalo le fuafuaga a le Atua i le tausisia o tulafono ma faamaopoopo i le tulaga faamasinotonu, ona ia silasila lea ia i latou o ni ana “auauna mo le lautele.” (Roma 13:6, NW) Ua faatalitalia e Ieova ana auauna ina ia faaaloalo atu i faiga malo a tagata ma gauai atu ia i latou, peitai e faatapulaa lo latou gauai atu. Pe a tāpā e tagata mai auauna a le Atua ni mea o loo faasaina e le tulafono a le Atua po o lo latou faasaina foi o mea o loo finagalo le Atua ina ia faia e ana auauna, ona mulimuli atu loa lea i le tulaga lea sa faia e le au aposetolo, e faapea: “E tusa ona sili o lo matou anaana i le Atua i lo matou anaana i tagata.”—Galuega 5:29.

14. Ua faapefea ona faamatala mai e Iesu le gauai faa-Kerisiano i faiga malo a tagata? ae faapefea Paulo?

¹⁴ Na taʻua e Iesu faapea e iai tiute tauave o ona soo e ao ona faatino atu i faiga malo ma faatino atu foi i le Atua, ina ua ia fetalai: “O lenei, o mea a Kaisara, ia outou avatu ia Kaisara; a o mea a le Atua ia avatu ia i le Atua.” (Mataio 22:21) Ina ua faagaeeina le aposetolo o Paulo, na ia tusi ai: “Ia usiusitai tagata uma i faipule silisili; . . . a e afai e te amio leaga, ia e fefe ai, auā e le fai fua e ia lana pelu; auā o le auauna o ia a le Atua, o le na te taui atu le toasa i lē amio leaga. O lenei, e tatau ona usiusitai, e le gata ona o le toasa, a e peitai ona o le loto fuatia ifo. O le mea foi lea tou te avatu ai taulaga.” (Roma 13:1, 4-6) Mai le uluai senituri T.A. e oo mai i aso nei, sa tatau ai i Kerisiano ona latou iloiloina lelei mea o loo tāpā mai e le Faiga Malo. Ua manaomia ona latou manatunatu lelei po o le usitaia o na faatonuga o le a oo atu ina faafitia ai la latou tapuaiga, po o le mea, o na faatonuga o loo talafeagai ma e tatau ona faatinoina lelei.

O Tagatānuu Magafagafa

15. Ua faapefea ona magafagafa Molimau a Ieova ina ia totogi atu ia Kaisara mea o loo latou aitalafu ai?

¹⁵ O “faipule silisili” faapolotiki, o i latou o ni “auauna” a le Atua pe afai latou te faatino a latou matafaioi ua faamaonia e le Atua, lea e aofia ai le pule “ina [ia] faasalaina ai ē amio leaga, a ia viia ē amio lelei.” (1 Peteru 2:13, 14) E magafagafa auauna a Ieova ina ia totogi atu ia Kaisara mea ua talafeagai ma le tulafono ona ia tāpā mai i le tulaga o lafoga, latou te usitaia i le tele e mafai ai e o latou loto fuatia ifo ua aʻoaʻoina e le Tusi Paia, e tusa ai ma le “usiusitai i alii sili ma faipule, . . . ia nofo sauniuni foi i latou i galuega lelei uma lava.” (Tito 3:1) O “galuega lelei” e aofia ai le fesoasoani atu i isi, e pei o taimi e aafia ai i se mala. Ua molimauina e le toatele le agalelei lea o loo faaalia e Molimau a Ieova i o latou uso a tagata i nei tulaga.—Kalatia 6:10.

16. O ā galuega lelei o loo faatinoina e Molimau a Ieova mo faiga malo ma i o latou uso a tagata?

¹⁶ E alolofa Molimau a Ieova i o latou uso a tagata ma latou te manatu, o le galuega e sili ona lelei e mafai ona latou faia mo na uso a tagata o le fesoasoani lea i ai ina ia latou maua le poto saʻo e uiga i fuafuaga a le Atua mo le aumaia i se tulaga amiotonu o se “lagi fou ma le lalolagi fou.” (2 Peteru 3:13) E ala i le aʻoaʻoina atu ma le faatatauina pea o mataupu silisili maualuluga tau i amioga tatau a le Tusi Paia, ua avea ai i latou o se vaega sili ona tāua i le sosaiete faaletagata, i le faasaoina o le toatele o tagata mai amioga leaga. E usiusitai auauna a Ieova i le tulafono ma faaaloalo i minisita o malo, o tagata i ofisa maualuluga, o faamasino, ma ē o loo pulea aai, i le tuuina atu o le āva ia i ‘latou ua tatau i ai le āva.’ (Roma 13:7) E fiafia mātua Molimau e lagolagosua atu i faiaʻoga o a latou fanau, ma fesoasoani foi i a latou fanau ina ia faia lelei a latou aʻoga, ina ia mafai e nei fanau i se taimi mulimuli ane ona latou tausia i latou lava nai lo le avea ma avega mamafa i le lautele. (1 Tesalonia 4:11, 12) I totonu o a latou faapotopotoga, e lē taliaina ai e Molimau ni uiga faailogalanu ma ni faaeseesega o tulaga o tagata, ma latou te matuā faatāuaina le faamalosia o olaga faaleaiga. (Galuega 10:34, 35; Kolose 3:18-21) E ala la i a latou gaoioiga, ua latou faamaonia atu ai le sese o tuuaʻiga faapea o i latou o ni tagata e lē alolofa i aiga pe e lē loto fesoasoani i le nuu. Ua moni ai la upu a le aposetolo o Peteru: “Ua finagalo le Atua ina ia outou amio lelei, ia iʻu ai ina faalologo le valea o tagata pouliuli.”—1 Peteru 2:15.

17. E mafai faapefea e Kerisiano ona latou “savavali ma le poto i e o i tua”?

¹⁷ E ui la ina ‘leai se vaega i le lalolagi’ a soo Kerisiano moni, ae o loo nonofo pea i latou i le lalolagi o le sosaiete faaletagata ma e tatau ona latou “savavali ma le poto i e o i tua.” (Ioane 17:16; Kolose 4:5) Po o le ā lava le umi e faataga ai e Ieova faipule silisili e gaoioi o sana auauna, o le umi foi lena o le a tatou faaalia ai le faaaloalo tatau ia i latou. (Roma 13:1-4) A o tatou tutumau i le solitū i faiga faapolotiki, tatou ste tatalo mo “tupu ma i latou uma ua i ai le pule,” ae maise lava pe afai o i latou nei o le a manaomia ona latou faia ni faaiuga e ono aafia ai le saolotoga tau tapuaiga. O le a tatou faia pea lenei mea “ina ia tatou nonofo [ai] ma le le atuatuvale ma le filemu, i le amio Atua uma lava ma le amio matagofie,” ina ia “faaolaina o tagata uma lava.”—1 Timoteo 2:1-4.

[Faaopoopoga i lalo]

Fesili Autalu

◻ O lē fea “lalolagi” o loo avea ai Kerisiano ma vaega, ae o lē fea “lalolagi” e lē mafai ona faia ai sa latou vaega?

◻ O le ā ua faaāta mai e le iai o “le faailoga” o le “manu feai” i le lima po o le muaulu o se tagata, ma o ā faailoga ua maua e auauna faamaoni a Ieova?

◻ O le ā le vaaiga paleni a Kerisiano moni e faatatau i faiga malo a tagata?

◻ O ā nisi o auala ua saosaolaumea ai Molimau a Ieova i le sologa lelei o le sosaiete faaletagata?

[Ata i le itulau 16]

Ua faaigoa e le Tusi Paia faiga malo a tagata o se manu feai ma o se auauna foi a le Atua

[Ata i le itulau 17]

Ona o le faaalia o le manatu alofa mo isi, ua avea ai Molimau a Ieova o ni ē e aogā i o latou nuu