Na Latou Faia le Finagalo o Ieova

Se Faaaoaoga o le Faataulagaina Totino ma le Alofa Faamaoni

MO SE faifaatoaga talavou e igoa ia Elisaia, o se aso na amata ai faasologa masani o le aso o galuega o le suōtosina, na suia e avea ma aso na sili ona iloga i lona olaga. A o ia galue i le fanua, na afea ai Elisaia e se asiasiga na te lei faatalitalia mai ia Elia, le perofeta sili o Isaraelu. ‘O le ā atonu o ia manao ai ia te au?’ O le tau mānatu lea a Elisaia. Sa lei umi ona faatali o ia mo se tali. Na togi atu e Elia lona ofu tele ia Elisaia, e faailoa atu ai faapea e iai se aso o le a avea ai o ia ma sē e suitulaga ia te ia. Sa lei manatu māmā Elisaia i lenei valaaulia. Na ia tuua ai lava i lena taimi lona fanua ina ia avea ma auauna a Elia.—1 Tupu 19:19-21.

Pe ā ma le ono tausaga mulimuli ane ai, na tonu ai o le a toe foi Elia. O le tala e uiga i lona alu ese o “se tasi o tala e sili ona mataina” i Tusitusiga Paia Eperu.

Ua Sauniuni Elia e Alu

Na faanaunau Elia e faia se asiasiga mulimuli i Peteli, Ieriko, ma Ioritana. O lenei tulaga e aofia ai le tele o maila e savali ai, o nisi o savaliga e ui atu i vaega lafulafuā o le mauga. I vaega taitasi o le faigamalaga, na faalaeiau atu ai Elia ia Elisaia ina ia nofo. Ae na maumauai lava Elisaia e faatasi pea ma lona matai seia oo i le iuga.—2 Tupu 2:1, 2, 4, 6.

A o iai i Peteli ma Ieriko, na oo atu ai “soo o le au perofeta” ia Elisaia.a “Ua e iloa ea, o le aso nei o le a ave ese ai e Ieova lou matai ia te oe?” o la latou fesili lea ia te ia. “Ua ou iloa lava,” na tali atu ai o ia. “Soia le fai mai ai.”—2 Tupu 2:3, 5.

Na sosoo ai ma le agaʻi atu o Elia ma Elisaia i le vaitafe o Ioritana. Ina ua la taunuu atu i le Ioritana, na faia ai e Elia se vavega a o vaavaai ane i ai mai se mea mamao ia soo o le au perofeta e toʻa limasefulu. “Ua tago Elia i lona ofu tele, ua taataai, ua taia aʻi le vai, ona vaeluaina ai lea i le tasi itu ma le tasi itu. Ona la savavali atu ai lea i le iliti vai matutu.”—2 Tupu 2:8.

O le taimi lava na la oo ai i le isi itu, na faapea atu ai Elia ia Elisaia: “Fai mai ia pe se a se mea ou te faia mo oe manū o lei aveeseina aʻu ia te oe.” Na manao Elisaia “ia faalua mai” le agaga o Elia—o lona uiga, o le vaega faaluaina lea e masani lava e ono tuu atu i se atalii ulumatua. O le mea moni, sa āva Elisaia ia Elia e faapei lava o se atalii ulumatua ona āva atu i lona tamā. E lē gata i lea, na tofia o ia ina ia suitulaga ia Elia e avea ai ma se perofeta a Ieova i Isaraelu. O lea la, o lana talosaga sa lē faapito ae na talafeagai. Ae peitai, i le iloaina faapea e na o Ieova lava e mafai ona ia taliaina lenei talosaga, na tali atu ai ma le faautauta Elia: “O le mea faigata ua e fai mai ai.” Ona ia toe faapea atu lea: “Afai e te iloa mai aʻu pe a aveeseina aʻu ia te oe, ona faapea lea ia te oe; a e afai e leai, ona le faapea lea.”—2 Tupu 2:9, 10; Teuteronome 21:17.

E lē taumatea le atili ai ona maumauai Elisaia e pipiimau atu i lona matai. Ona oo mai lea o se “nofoa afi faataavalevale ma solofanua afi.” Na vaavaai atu ma le teʻi tele Elisaia, a o aveesea faafuasei atu Elia i se asiosio—na faavavega ona aveina atu i se isi nofoaga.b Na avae foi e Elisaia le ofu tele o Elia ma toe savali atu i le auvai o le vaitafe o le Ioritana. Na ia taia le vai, ma faapea atu: “O ifea ea Ieova le Atua o Elia?” Na vaeluaina le vai, ma avatu ai se faamaoniga manino faapea na iai ia Elisaia se lagolagosua tauatua e avea ai ma sui o Elia.—2 Tupu 2:11-14.

Lesona mo i Tatou

Ina ua oo atu Elia ma le valaaulia mo le auaunaga faapitoa, na tuua ai lava i lena taimi e Elisaia lona fanua ina ia auauna atu i le perofeta sili o Isaraelu. O le mea moni lava, o nisi o ona tiute sa faatauvaa, auā na lauiloa o ia o se tasi na te “liligi le vai i lima o Elia.”c (2 Tupu 3:11) Peitai ane, na manatu Elisaia i lana galuega o se faaeaga, ma na ia pipiimau atu ma le alofa faamaoni ia Elia.

O le toatele o auauna a le Atua i aso nei ua faapea foi ona latou faaalia se agaga faataulagaina. O nisi ua latou tuua o latou “fanua,” a latou galuega, ina ia talaʻia le tala lelei i oganuu mamao pe ina ia auauna o ni sui o le aiga Peteli. O nisi ua faimalaga atu i atunuu ese ina ia galulue ai i faugafale a le Sosaiete. E toatele ua latou taliaina tulaga ia atonu e manatu i ai o galuega e maulalo. Peitai, e leai se tasi o auauna ia Ieova e faapea e lē tāua ana galuega. E talisapaia e Ieova i latou uma o ē auauna atu ia te ia ma le loto malie, ma o le a ia faamanuia foi lo latou agaga faataulagaina.—Mareko 10:29, 30.

Na pipiimau atu Elisaia ia Elia seia oo lava i le iuga. Na musu o ia e tuulafoai le perofeta matua e ui lava na iai se avanoa e na te faia ai faapea. E lē taumatea, o le faiā vavalalata na ia atiina ae ma Elia na avea ai lena alofa faamaoni ma fiafiaga. I aso nei, ua taumafai malosi ai auauna a le Atua ina ia faamalosia la latou faiā ma le Atua ma tosina vavalalata atu i o latou uso talitonu. O se faiā autasi o le a faamanuiaina, auā ua faapea mai le Tusi Paia e uiga ia Ieova: “E te alofa faamaoni oe i le ua alofa faamaoni.”—2 Samuelu 22:26, NW.

[Faaopoopoga i lalo]