O le Faatuatua e Uunaia ai i Tatou e Gaoioi!

“E te iloa na galulue faatasi le faatuatua [o Aperaamo] ma ana galuega, o galuega foi ua atoatoa ai le faatuatua.”—IAKOPO 2:22.

1, 2. O le a faapefea ona tatou gaoioi pe afai tatou te faatuatua?

UA FAAPEA mai le toatele o tagata o loo latou faatuatua i le Atua. Peitai, o le na ona faapea mai e faatuatua, e leai se ola, e pei o se tino oti. Na tusi mai le soo o Iakopo: “E faapea foi le faatuatua, pe afai e le i ai galuega, e mate lava ia ina ua na o ia.” Na faapea mai foi o ia, o Aperaamo o lē na mataʻu i le Atua sa ia te ia le faatuatua na ‘galulue faatasi ma ana galuega.’ (Iakopo 2:17, 22) O le ā le uiga o na upu mo i tatou?

² Pe afai e moni lo tatou faatuatua, o le a tatou lē tau la ina talitonu i mea o loo tatou faalogologo ai i sauniga faa-Kerisiano. O le a tatou faaali atu faamaoniga o le faatuatua auā o i tatou o ni Molimau o loo galulue a Ieova. Ioe, o le faatuatua o le a uunaia ai i tatou e faatatauina le Afioga a le Atua i le olaga ma uunaia ai i tatou e gaoioi.

E Lē Fesootai le Faatuatua ma le Faailoga Tagata

3, 4. E tatau faapefea ona aafia le faatuatua i le auala tatou te feutagai ai ma isi?

³ Pe afai e moni aʻiaʻi lo tatou faatuatua i le Atua ma Keriso, o le a tatou lē faaalia la le faailoga tagata. (Iakopo 2:1-4) O nisi o ē na tusi atu i ai Iakopo latou te lei faaalia le lē faailoga tagata lea sa tatau ona iai i Kerisiano moni. (Roma 2:11) O lea, ua faapea atu ai Iakopo: “Aua tou te faailoga tagata i lo outou taofi i le faatuatua i lo tatou Alii mamalu o Iesu Keriso.” Pe afai e alu ane i se sauniga se tagata tamaoaiga e lē talitonu o loo iai ni ana mama auro ma ni ona ofu pupula, ma o loo alu ane foi ma se tagata lē talitonu o “se tagata mativa ma le ofu leaga,” sa tatau ona tutusa le talileleia o i laua, peitai na faaalia le uaʻi faapitoa atu i le tagata tamaoaiga. Sa tuuina atu i ē tamaoaiga nofoa i le “mea lelei,” a o tagata matitiva lē talitonu sa faatonu atu i ai ina ia tutū ia pe nonofo i lalo ifo o le mea o loo tuu ai vae o se tasi.

⁴ Na saunia e Ieova le taulaga togiola a Iesu Keriso mo ē tamaoaiga faapea foi mo ē matitiva. (2 Korinito 5:14) O le mea lea, pe afai tatou te faaʻauʻau atu i tagata tamaoaiga, o le a tatou see ese ai mai le faatuatua ia Keriso, o lē na ‘faamativaina ina ia mafai ona faatamaoaigaina i tatou i lona mativa.’ (2 Korinito 8:9) Ia aua lava neʻi o tatou faatulagaina tagata i se auala faapena—i se faanaunauga sese ia faamamaluina tagata, mo ni o tatou lava lelei. E lē faailoga tagata le Atua, ae afai tatou te faaalia le faailoga tagata, o le a tatou ‘faia ai faamasinoga leaga.’ (Iopu 34:19) Pe a iai le faanaunauga e faafiafia le Atua, ona mautinoa lea o le a tatou lē lolo atu i le faaosoosoga e faaalia le faailoga tagata pe ia ‘faaneenee atu i tagata ina ia mauaina ai ni a tatou lava mea.’—Iuta 4, 16.

5. O ai ua filifilia e le Atua e avea ma ‘ē tamaoaiga i le faatuatua,’ ma e masani ona gaoioi faapefea tagata e tamaoaiga faaletino?

⁵ Ua faailoa mai e Iakopo tagata mauoa moni ma faalaeiauina ai le tatau ona faaalia le alofa i tagata uma ma le lē faailoga tagata. (Iakopo 2:5-9) ‘Ua filifilia e le Atua o ē matitiva ina ia tamaoaiga i le faatuatua ma ia fai ma suli o le malo.’ O le tulaga lena talu ai o ē matitiva e masani ona sili lo latou uaʻi mai i le tala lelei. (1 Korinito 1:26-29) I le avea o se vasega, ua masani tagata e tamaoaiga faaletino ona latou faia mea e mafatia ai isi e tusa ai o aitalafu, o totogi, ma nisi faiga faaletulafono. Latou te upuvale i le Keriso ma faasauā ia i tatou ona o lo tatou tauaveina o le suafa o Keriso. Ae tau ina ia tatou filifili maumauai e usiusitai atu i “le tulafono silisili,” lea e manaomia ai le alofa i tuaoi—ia tutusa le alofa atu i ē tamaoaiga ma ē matitiva. (Levitiko 19:18; Mataio 22:37-40) Ona e manaomia e le Atua lenei faiga, o lea la, o le faaalia o le faailoga tagata o se “agasala” lea.

‘E Olioli le Alofa Mutimutivale pe a Faamasinoina’

6. E avea faapefea i tatou o ni tagata solitulafono pe afai tatou te lē feutagai i le alofa mutimutivale ma isi?

⁶ Pe afai tatou te faaalia ma le leai o se alofa mutimutivale le faailoga tagata, o i tatou la o tagata solitulafono. (Iakopo 2:10-13) O le uia o se laasaga sese i lenei itu, ua tatou nofosala ai i tulafono uma lava a le Atua. O tagata Isaraelu o ē na lei faia le mulilua, ae sa latou faia le gaoi, na avea ma ē agasala i le Tulafono Faa-Mose. Ona o ni Kerisiano, ua faamasinoina ai i tatou e “le tulafono o le saʻolotoga”—o Isaraelu faaleagaga o loo i totonu o le feagaiga fou, ua iai ia Isaraelu faaleagaga tulafono i o latou loto.—Ieremia 31:31-33.

7. Aisea e lē mafai ai e i latou o loo faaalia pea le faailoga tagata ona latou faatalitalia le alofa mutimutivale mai o le Atua ia i latou?

⁷ Pe afai tatou te faapea atu o loo ia i tatou le faatuatua ae tatou te faaauau ona faaalia le faailoga tagata, ua tatou iai i se tulaga matautia. O i latou o ē lē alolofa ma lē alolofa mutimutivale o le a faamasinoina foi i latou e aunoa ma le alofa mutimutivale. (Mataio 7:1, 2) Ua faapea mai Iakopo: ‘O lē alofa mutimutivale, e olioli ia pe a faamasinoina.’ Pe afai tatou te talia le taitaiga a le agaga paia o Ieova e ala i le faaalia o le alofa mutimutivale i a tatou feutagaiga uma, ona lē taʻusalaina lea o i tatou pe a faamasinoina. Nai lo lea, o le a faaalia mai ia i tatou le alofa mutimutivale ma o le a tatou manumalo ai i faamasinoga mamafa.

Le Faatuatua e Iu i Galuega Lelei

8. O le ā le tulaga o le tagata o loo faapea mai e faatuatua ae leai ni ana galuega?

⁸ E lē gata ina uunaia i tatou e le faatuatua e faaalia le alofa ma le agalelei, ae e iu foi i isi galuega lelei. (Iakopo 2:14-26) O le mea moni, o le na ona faapea mai e faatuatua ae leai ni galuega e lē mafai ona faasaoina ai i tatou. E moni, e lē mafai ona tatou maua se tulaga amiotonu ma le Atua e ala i galuega o le Tulafono. (Roma 4:2-5) O loo tautala Iakopo i galuega e uunaia, e lē i le tulafono, ae i le faatuatua ma le alofa. Pe afai e uunaia i tatou e na uiga, o le a tatou lē na ona faaleo atu ai o ni moomooga agalelei mo se uso talitonu o loo iai le manaomia. O le a tatou tuuina atu se fesoasoani faaletino i se uso po o se tuafafine Kerisiano o loo manaomia ni lavalava po o ni meataumafa. Ua fesili Iakopo: ‘A fai atu so outou i se uso o loo iai se manaomia: “Ina o ia outou ma le manuia, ia mafanafana, ma ia maoona,” a ua le foai atu ia te ia ni mea e tatau i le tino, se a lona aoga?’ E lē aogā. (Iopu 31:16-22) O le “faatuatua” lena e leai se ola!

9. O le ā e faaalia ai o loo tatou faatuatua?

⁹ Atonu e iai ni vala o tatou auaufaatasi ai ma tagata o le Atua, peitai e na o galuega e faatinoina ma le loto atoa, e mafai ona faamaonia ai la tatou mau faapea o loo tatou faatuatua. E lelei pe a tatou teteeina le aʻoaʻoga o le Tolutasi ma talitonu e na o le toatasi le Atua moni. Peitai, e lē o se faatuatua le tau ina talitonu. “Ua talitonu foi temoni,” ma ua latou “tetemu” i le matataʻu auā o loo faatalitali mai lo latou faaumatiaga. Afai e moni lo tatou faatuatua, o le a uunaia ai i tatou e fua mai na galuega e pei o le talaʻia o le tala lelei ma le saunia o meaʻai ma lavalava o uso talitonu o loo latou manaomia. Ua fesili Iakopo: “Le tagata valea e, [e lē o iai le poto saʻo e uiga i le Atua] e te le fia iloa ea ua mate lava le faatuatua pe a leai ni galuega?” Ioe, e manaomia e le faatuatua ni gaoioiga.

10. Aisea ua taʻua ai Aperaamo o le “tamā o e faatuatua uma lava”?

¹⁰ O le faatuatua o le augātamā o Aperaamo o lē na mataʻu i le Atua, na uunaia ai o ia e gaoioi. I le avea o le “tamā o e faatuatua uma lava,” na “taʻuamiotonuina [ai o ia] i galuega, ina ua avatu e ia o Isaako lona atalii i luga o le fata faitaulaga.” (Roma 4:11, 12; Kenese 22:1-14) Ae faapefea pe ana fai sa lei iai ia Aperaamo le faatuatua lea na mafai ai e le Atua ona faatuina aʻe Isaako, ma faataunuu ai Lana folafolaga i se fanau e ala mai ia te ia? Semanū la e lē tāitai ona taumafai Aperaamo e ofoina atu lona atalii. (Eperu 11:19) O galuega usiusitai a Aperaamo “ua atoatoa ai [lona] faatuatua,” pe na faaatoatoaina ai. O lea la, “sa taunuu ai foi le Tusi [Kenese 15:6], ua faapea mai: ‘Na faatuatua Aperaamo i le Atua, ona taʻua ai lea ia te ia e fai ma amiotonu.’” O galuega a Aperaamo i le taumafai e ofoina atu Isaako sa faamaonia ai le taʻuamiotonuina o ia e le Atua i se taimi muamua atu. E ala i galuega o lona faatuatua, na ia faaalia ai lona alofa mo le Atua ma iu ai ina taʻua o ia o le “uo a le Atua.”

11. O le ā le faamaoniga o le faatuatua ua tatou iloa mai le tulaga o Raava?

¹¹ Sa faamaonia mai e Aperaamo faapea “ua taʻuamiotonuina le tagata i galuega, a e le na o le faatuatua.” Na moni foi lena manatu i le tulaga o Raava, o se fafine talitane i Ieriko. Sa “taʻuamiotonuina . . . o ia i galuega, ina ua talia e ia [avefeau Isaraelu] na aauina atu, na ia au ese atu ai foi ia te i laua i le tasi ala” ina ia sosola ese ai mai o la fili o tagata Kanana. A o ia lei feiloai atu i sipai Isaraelu, sa ia talitonu o Ieova o le Atua moni lea, ma o ana upu na faia mulimuli ane ma lona lafoaia o lona olaga faatalitane, o se faamaoniga lea o lona faatuatua. (Iosua 2:9-11; Eperu 11:31) Ina ua uma ona taʻua lenei faaaoaoga lona lua o le faatuatua e faaalia mai i galuega, ona faapea mai lea o Iakopo: “E faapei o le tino ua oti ia pe a teʻa le agaga, e faapea foi le faatuatua ua mate pe a leai ni galuega.” Pe a oti le tagata, e lē iai se malosi o le ola, po o le “agaga,” i totonu o ia, ma e leai se mea na te toe mafai ona faataunuu. O le na ona faapea mai e faatuatua, ua tutusapau lava ma le leai o se ola ma leai se aogā, e pei o le tino oti. Ae pe afai e ia i tatou le faatuatua moni, o le a uunaia ai i tatou e faia gaoioiga faaleatua.

Ia Pulea Lou Laulaufaiva!

12. O le ā e tatau ona tilofaia e toeaina o le faapotopotoga?

¹² O le tautala ma le aʻoaʻo atu e mafai foi ona faamaonia mai ai le faatuatua, ae o loo iai se manaoga mo le pulea o lagona ma manatu. (Iakopo 3:1-4) I le avea o ē o loo aʻoaʻo atu i totonu o le faapotopotoga, ua tauaveina e toeaina se avega mamafa ma se tulaga e tali atu ai i le Atua. O lea, e tatau ona latou iloiloina ma le lotomaulalo uunaiga o a latou gaoioiga ma o latou agavaa. E lē gata i le poto ma le tomai, ae e tatau ona iai foi i nei tane se alofa loloto mo le Atua ma o latou uso talitonu. (Roma 12:3, 16; 1 Korinito 13:3, 4) E ao i toeaina ona faavae aʻe a latou fautuaga i le Tusi Paia. Afai e avatu e se toeaina ni fautuaga sese ma iu ai i ni faafitauli ma isi, o le a mamafa le faamasinoina o ia e le Atua e ala mai ia Keriso. O lea e tatau ai i toeaina ona lotomaulalo ma suesue maelega, ia pipii atu ma le faamaoni i le Afioga a le Atua.

13. Aisea tatou te sese ai i upu?

¹³ E oo lava i faiaʻoga e sili ona lelei—o le mea moni lava, o i tatou uma—‘e tele taimi e sese ai’ ona o le lē lelei atoatoa. O le sese i upu o se tasi o vaivaiga faifai pea ma e ono faaleagaina ai. Ua faapea mai Iakopo: “A lē sese se tasi i le upu, o le tagata lea ua sao, na te mafaia foi ona taofi i le tino uma.” E lē pei i tatou o Iesu Keriso, e lē mafai ona tatou pulea lelei atoatoa o tatou laulaufaiva. Pe ana fai e lelei atoatoa, semanū e mafai ona tatou puleaina foi isi vaega o o tatou tino. E faaaogā faagutu e tataʻi atu ai solofanua i mea tatou te manao e ō i ai, ma e oo lava i sina tamai foeuli, e mafai ona faatautaia ai se vaa telē o loo uunaia e ni matagi malolosi, ma agaʻi atu ai i le mea o loo manao ai le kapeteni.

14. Ua faapefea ona faamamafa mai e Iakopo le manaoga mo ni taumafaiga ina ia pulea ai le laulaufaiva?

¹⁴ E tatau ia i tatou uma lava ona taʻutino mai ma le faamaoni, e manaomia lava ni taumafaiga filigā ina ia pulea ai le laulaufaiva. (Iakopo 3:5-12) Pe a faatusatusa atu i se solofanua, e laitiiti tele le faagutu; e faapena foi le foeuli pe a faatusatusa atu i se vaa. Ma pe a faatusatusa i le tino o le tagata, o le laulaufaiva o se mea itiiti lava “a ua lafo upu faasausili.” Talu ai o loo manino mai le Tusi Paia o le tautala faasausili e lē fiafia i ai le finagalo o le Atua, seʻi o tatou saili atu la mo lana fesoasoani ina ia taumamao ese ai mai na uiga. (Salamo 12:3, 4; 1 Korinito 4:7) Tau ina ia tatou taofiofi foi i o tatou laulaufaiva pe a oso aʻe le ita, ia manatua e na o sina aloiafi lava e mafai ona sasao aʻe ai se afi tele i se togavao. E pei ona faaalia mai e Iakopo, “o le laulaufaiva o le afi lea” e iai lona tomai e faapogaia ai le tele o se faaleagaina. (Faataoto 18:21) Ioe, o se laulaufaiva e lē pulea “o le faupuega lea o amio leaga”! O uiga leaga uma lava o lenei lalolagi lē amioatua ua fesootai atu i le lē puleaina o le laulaufaiva. E faapogaia ai mea na e faaleagaina ai e pei o le tautala taufaaleaga ma aʻoaʻoga pepelo. (Levitiko 19:16; 2 Peteru 2:1) O le ā sou manatu? Pe e lē tatau ea i lo tatou faatuatua ona uunaia ai i tatou e taumafai malosi e pulea o tatou laulaufaiva?

15. O ā ni aafiaga leaga e mafai ona faapogaia e le laulaufaiva e lē o puleaina?

¹⁵ O se laulaufaiva e lē o puleaina ‘e matuā faalumaina ai i tatou.’ Mo se faataitaiga, pe afai e maua soo i tatou i le faia o tala pepelo, atonu o le a tatou lauiloa ai o ni tagata talapepelo. Ae faapefea la i se laulaufaiva e lē o puleaina ona ‘faamuina ai le olaga uma lava’? E faavevesi ai le gasologa o le olaga. Atonu e tasi lava sina laulaufaiva ua lē pulea, ae mafai ona faavevesi ai le faapoto-potoga atoa. O loo taʻua e Iakopo “Kēna,” le Vanu o Hinoma. Muamua, o iina sa susunuina ai taulaga ia na faaaogā ai tamaiti, ona sosoo lea ma le faaaogā o se faatafuna e susunu ai i le afi otaota uma i Ierusalema. (Ieremia 7:31) O Kena la o se faailoga o le faaumatiaga aʻiaʻi. Ua faapea ona faatusa atu i ai le matautia o le malosi e faaumatia ai i Kēna, i le laulaufaiva e lē pulea. Afai tatou te lē puleaina o tatou laulaufaiva, e ono mafai ona toe afaina ai lava i tatou i le mumū o le afi na tatou amataina. (Mataio 5:22) Atonu foi e oo lava ina faateaina i tatou mai le faapotopotoga ona o le taufaaleaga atu i se isi.—1 Korinito 5:11-13.

16. I le manatu atu i se aafiaga leaga e mafai ona faapogaia e se laulaufaiva e lē puleaina, o le ā la e tatau ona tatou faia?

¹⁶ E pei ona e silafia mai le faitauina o le Afioga a le Atua, sa faatonuina e Ieova le tatau i manu ona usiusitai atu i le tagata. (Kenese 1:28) Ma o so o se ituaiga o meaola, ua uma ona faalataina. Mo se faataitaiga, ua faaaogā le oreva ua uma ona toleniina mo tuligāmanu. O ‘meaola fetolofi’ o loo taʻua e Iakopo atonu e aofia ai gata, ua puleaina e ē faaʻoleʻoleina gata. (Salamo 58:4, 5) E oo foi i tafolā ua mafai e le tagata ona faatonutonuina, ae ona o i tatou o tagata agasala ua lē mafai ai ona tatou pulea atoatoa le laulaufaiva. E ui i lea, e tatau ona tatou alofia le faia o ni tuuaʻiga sese, ni faamatalaga tutui, pe taufaaleaga. O le laulaufaiva e lē puleaina e mafai ona avea o se meafaigaluega matautia ua lilofia i se mea oona e oti ai. (Roma 3:13) O se tulaga faanoanoa, talu ai o laulaufaiva po o faamatalaga a aʻoaʻo pepelo na taitaieseina ai nisi uluai Kerisiano mai le Atua. O lea, seʻi aua lava neʻi o tatou faatagaina i tatou e pulea e faamatalaga oona faaaposetate, i ni faamatalaga po o ni tusitusiga foi.—1 Timoteo 1:18-20; 2 Peteru 2:1-3.

17, 18. O le ā le tulaga femoumouai lea o loo faasino atu i ai le Iakopo 3:9-12, ma o le ā e tatau ona tatou faia i lenei tulaga?

¹⁷ O le faatuatua i le Atua ma se faanaunauga e faafiafia o ia e mafai ona puipuia ai i tatou mai le faaaposetasi ma taofia ai i tatou mai le faaaogaina o le laulaufaiva i se tulaga femoumouai. I le faasino atu i uiga femoumouai o nisi, ua faapea atu ai Iakopo, ‘o o tatou laulaufaiva o loo tatou vivii atu ai i lo tatou Tamā, o Ieova, ma o lea foi tatou te fetuu aʻi i tagata ua faia e foliga i le Atua.’ (Kenese 1:26) O Ieova o lo tatou Tamā, auā “o loo foai mai e ia le ola, ma le mānava, ma mea uma lava i le vao mea atoa.” (Galuega 17:24, 25) I se uiga faaleagaga, o ia foi o le Tamā o Kerisiano faauuina. O i tatou uma lava “ua faia e foliga i le Atua” i uiga faalemafaufau ma amioga tatau, e aofia ai le alofa, faamasinotonu, ma le atamai, lea ua matuā eseese ai i tatou ma manu. O lea la, e tatau faapefea ona tatou gaoioi pe afai tatou te faatuatua ia Ieova?

¹⁸ Afai tatou te fetuuina tagata, o lona uiga ua tatou mananao e tutupu ni mea leaga, pe faamalaiaina i latou. Talu ai e lē o i tatou o ni perofeta ua faagaeeina e le Atua e aumai i ai le pule e faamalaia ai se tasi, o ni faamatalaga la faapena o se faamaoniga lea o le ʻinoʻino, ma leai ai se aogā o la tatou tapuaiga. E lē talafeagai ona puna faatasi mai le “vivii ma le fetuu” i le gutu e tasi. (Luka 6:27, 28; Roma 12:14, 17-21; Iuta 9) Pagā se agasala pe a vivii atu i le Atua i sauniga, ae mulimuli ane faia faamatalaga leaga e faatatau i o tatou uso talitonu! E lē mafai e vai suamalie ma vai oona ona puna faatasi mai se punāvai e tasi. E pei ‘ona lē mafai e le mati ona fua mai ai olive, po o le vine e lē mafai ona fua mai ai mati,’ e faapena foi i le vai magalo ona lē mafai ona maua mai ai le vai mai. O loo iai se mea sese i lo tatou tulaga faaleagaga pe afai, o i tatou o ē tatau ona tautala i mea lelei, ae o loo faaauau pea ona tatou tāutala i upu faatiga. Afai ua fai ma a tatou masani lena uiga, seʻi o tatou tatalo atu mo le fesoasoani a Ieova, ina ia taofia le tautala faapena.—Salamo 39:1.

Ia Gaoioi e Tusa o le Poto Mai Lugā

19. Pe afai e taitaia i tatou e le poto faalelagi, e faapefea la ona tatou faaaafiaina ai isi?

¹⁹ Tatou te manaomia uma lava le poto e tautala ma fai ai mea e aogā mo i latou o loo iai i le faatuatua. (Iakopo 3:13-18) Afai e ia i tatou le mataʻu faaaloalo i le Atua, e na te aumaia ia i tatou le poto faalelagi, o le tomai lea e faaaogā saʻo ai le atamai. (Faataoto 9:10; Eperu 5:14) Ua aʻoaʻoina i tatou e lana Afioga i le auala e faaalia ai “le agamalu o i ai le poto.” Ma ona o lo tatou agamalu, tatou te faatupuina ai le filemu i le faapotopotoga. (1 Korinito 8:1, 2) So o se tasi o lē gugutu mai faapea o i latou o ni faiaʻoga sili i o latou uso talitonu, o lona uiga ua ‘latou talapepelo e faaleaga ai le upu moni,’ ma tauleagaina lo latou fia tāua naʻuā. (Kalatia 5:26) O lo latou “poto” e ‘faalelalolagi’—lea o loo faamatalaina ai uiga o tagata agasala o ē ua vavae ese mai le Atua. E “faaletino,” o iuga o faanaunauga faaletino. Ioe, ua oo lava ina “faatemoni,” auā o agaga leaga e faamaualuluga! (1 Timoteo 3:6) O lea, seʻi o tatou gaoioi ma le poto ma le lotomaulalo ina ia tatou lē faia se mea e faapogaia ai se siomaga e mafai ona olaola ai na “mea leaga” e pei o le taufaaleaga ma le faailoga tagata.

20. E faapefea ona e faamatalaina le poto faalelagi?

²⁰ “O le poto mai lugā e muamua ona mamā,” e faamamāina ai i tatou i amioga ma i le faaleagaga. (2 Korinito 7:11) E “filemu” foi, ma o loo uunaia ai i tatou e saili le filemu. (Eperu 12:14) O le poto faalelagi ua mafai ai ona tatou ‘faautauta,’ e lē faaulumalō ma faigofie ona feutagai ai. (Filipi 4:5) O le poto mai lugā e “ganagofie,” e faatupuina ai le usiusitai atu i aʻoaʻoga tauatua ma felagolagomai ma le faalapotopotoga a Ieova. (Roma 6:17) O le poto mai lugā e māfua ai foi ona tatou agamalu, ma alofa mutimutivale. (Iuta 22, 23) O le faatumulia i “fua lelei,” e uunaia ai pea le manatu mamafa mo isi ma le faia o gaoioiga e ogatasi ma le lelei, le amio-tonu, ma le upu moni. (Efeso 5:9) Ona o i tatou o ni ē faatupu le filemu, ua tatou olioli ai i “le fua o le amiotonu” lea e olaola i tulaga fifilemu.

21. E tusa ai ma le Iakopo 2:1–3:18, o ā gaoioiga e tatau i lo tatou faatuatua i le Atua ona uunaia ai i tatou e fai?

²¹ Ua manino la le mata o le vai, o le faatuatua e uunaia ai i tatou e gaoioi. E tatou te lē faailoga tagata ai, alofa mutimutivale, ma mataalia i le faia o galuega lelei. O le faatuatua e fesoasoani ia i tatou e pulea ai le laulaufaiva ma gaoioi ai e tusa ma le poto faalelagi. Ae ua lē na o le pau na o mea tatou te mafai ona aʻoaʻoina mai i lenei tusi. E iai isi fautuaga atili a Iakopo e mafai ona fesoasoani ia i tatou ina ia tatou amioai ai i se uiga e talafeagai ma i latou o ē o loo faatuatua atu ia Ieova.

E Faapefea Ona E Tali?

◻ O le ā e sese ai le faaalia o le faailoga tagata?

◻ E faapefea ona fesootai le faatuatua ma galuega?

◻ Aisea e tāua tele ai le puleaina o le laulaufaiva?

◻ E faapefea ona faamatalaina le poto faalelagi?