E Pule Ieova ma le Alofa Mutimuti Vale
I LE faagasologa o le talafaasolopito o le tele o pulega faaletagata, ua latou faatinoina a latou pulega ma le leai o se tiga alofa, ua lē amanaia ai mafatiaga o o latou tagatānuu. Peitai, ua saunia e Ieova se faaeseesega e ala i le filifilia o se nuu—Isaraelu—ma puleaina i le alofa mutimuti vale.
A o pologa pea le fanauga a Isaraelu i Aikupito anamua, sa lagona e Ieova lo latou tagi atu mo se fesoasoani. “I taimi o o latou puapuaga uma sa puapuaga ai o ia. . . . Na ia faatauina i latou i lona alofa ma lona alofa mutimuti vale.” (Isaia 63:9, NW) Sa faasaoina e Ieova Isaraelu, saunia faavavega meaʻai mo i latou, ma faasaoina i se laueleele na fai mo i latou.
O uiga o le alofa mutimuti vale o Ieova sa faaalia atili i tulafono sa ia tuuina atu i lenei nuu. Sa ia poloaia le fanauga a Isaraelu ia tausia ma le alofa mutimuti vale tamaiti ua mātuaoti, fafine ua oti a latou tane, ma tagata ese sa aumau ai. Sa lē tatau ona latou mauaina ni o latou lelei i faiga lē tatau mai ia i latou e lē atoatoa le malosi.
Sa manaomia e le Tulafono le faaalia o le alofa mutimuti vale mo i latou e lē tagolima. Sa mafai e i latou e matitiva ona aoina mea pe a uma le seleselega. Sa faaleaogaina aitalafu i le tausaga o le Sapati (le tausaga lona fitu). O fanua uma tau i le aiga sa faatauina atu e tatau ona toe faafoisia i le Iupeli (le lona 50) o tausaga. Sa lipotia mai e le Ancient Israel—Its Life and Institutions e faapea: “I Isaraelu, sa lei iai moni ni vaega na faaeseesea i ai tulaga o tagata e tusa ai ma le uiga ua iai i aso nei. I le amataga o le uluai ʻaināina o le laueleele, sa taufai olioli Isaraelu uma i le tulaga tutusa o olaga sa ola ai.”—Levitiko 25:10; Teuteronome 15:12-14; 24:17-22; 27:18.
Faataitai i le Alofa Mutimuti Vale o Ieova
Ua faagaeetia auauna a le Atua i lona alofa mutimuti vale. Mo se faataitaiga, i le faagasologa o le talafaasolopito, o nisi o tupu fou na tulai mai sa latou fasiotia tagata ia na soifua o le aiga tupu sa iai muamua. Ae sa lei faia faapea e le auauna a Ieova o Tavita. Ina ua mavae le oti o le tupu o Saulo, sa puipuia e Tavita ia Mefiposeta, o le atalii o le atalii o Saulo lea na soifua ma o ia foi o le suli. “Sa lagona e le tupu le alofa mutimuti vale ia Mefiposeta le atalii o Ionatana le atalii o Saulo.”—2 Samuelu 21:7, NW.
E leai se isi tagata ua ia faaaʻoaʻo i le alofa mutimuti vale o Ieova e pei ona sa faia e Iesu. O le tele o ana vavega sa uunaia e le alofa mutimuti vale tauatua. I se tasi o mea na tupu na aioi ane ai se lepela ia te ia: “Afai ua e finagalo i ai, e te mafaia ona faamamā ia te au. Ona mutimuti vale lea o le alofa o Iesu ia te ia, ua aapa atu lona aao, ua paʻi atu ia te ia, ma fetalai atu ia te ia, Ou te loto i ai, ina mamā ia oe.” (Mareko 1:40-42) I se isi taimi sa mulimuli atu ai le motu o tagata ia Iesu. I totonu o le vāvāo o tagata, sa uaʻi atu Iesu i tamaloloa tauaso e toalua sa alalaga ane: “Le Alii e, le alo o Tavita, ia e alofa mai ia te i maua. . . . Ona mutimuti vale ai lea o le alofa o Iesu, ua paʻi atu i o la mata; ona vaai loa ai lea o la mata.”—Mataio 20:29-34.
Sa lei avea le tumutumu o tagata ma mea na mou ai lagona o Iesu mo isi. Talu ai e latou te lei ʻaai mo se taimi umi, sa ia fetalai ai i se tasi o mea na tupu: “Ou te alofa atu i le motu o tagata.” O lea sa ia fafagaina ai i latou faavavega. (Mareko 8:1-8) A o faimalaga Iesu sa lē gata ina ia aʻoaʻo le motu o tagata ae sa ia mataʻituina foi o latou manaoga. (Mataio 9:35, 36) I le iuga o lea faigamalaga, sa leai se taimi paganoa mo i latou seʻi ʻai ai sina meaʻai. Ua taʻu mai ia i tatou e le faamatalaga a le Tusi Paia e faapea: “Ona latou o atu ai lea ua na o i latou i le vaa i le mea tuufua. A ua vaai atu le motu o tagata ina ua latou o, e toatele foi ua iloa o ia; ona latou taufetuli atu ai lea mai aai uma, ua ui a uta, ua muamua ia te i latou; ua toloʻaʻi mai ia te ia. Ua maliu atu Iesu, ua na silafia le motu o tagata e toatele, ona mutimuti vale ai lea o lona alofa ia te i latou, auā ua faapei o mamoe i latou e leai so latou leoleo; ona aʻoaʻo atu lea o ia ia te i latou i mea e tele.”—Mareko 6:31-34.
Na uunaia Iesu e lē na o maʻi ma le matitiva o tagata ae o lo latou tulaga foi faaleagaga. Sa faamatapoto le faaaogaina o i latou e o latou taʻitaʻi, “ona mutimuti vale ai lea o lona alofa ia te i latou.” O le upu Eleni mo le “mutimuti vale o le alofa” o lona uiga “o uunaiga o lagona mai totonu o le manava.” E moni o Iesu lava o se tagata e alofa mutimuti vale!
Alofa Mutimuti Vale i se Lalolagi Sauā
Ua avea nei Iesu Keriso ma Tupu o le Malo faalelagi o Ieova. E pei lava ona sa ia faia i Isaraelu anamua, i aso nei o loo pulea e le Atua ona tagata i le alofa mutimuti vale. “E fai foi i latou maʻu oloa tāua, ua fetalai mai ai Ieova o ʻau, i le aso ua ou tofia; ou te alofa foi ia te i latou.”—Malaki 3:17.
O i latou e mananao e mauaina le alofa mutimuti vale o Ieova e tatau ona faataitai atu i ona ala. E moni, o loo tatou ola i se lalolagi o loo iai tagata e sili atu ona pupū i le faatumauina o le ituaiga olaga o ola ai nai lo le fesoasoani atu ia i latou o loo manaomia le fesoasoani. O tagata o loo i tulaga pule e masani ona sailia o latou lelei ae lē amanaia ai tulaga e lamatia ai tagata faigaluega ma i latou o loo latou faaaogaina mea o loo gaosia. I le 2 Timoteo 3:1-4, ua faamatalaina ai ma le saʻo e le Tusi Paia le tulaga tau amio i o tatou aso ua faaleagaina ai le alofa mutimuti vale i loto o le toatele.
Peitai, o loo ono mafai pea ona maua avanoa e faaalia ai le alofa mutimuti vale. Pe e mafai ona ofoina atu se fesoasoani manaomia i o tatou tuaoi? Po o iai se isi o maʻi e mafai ona tatou asia? Pe e mafai ona tatou faafiafiaina i latou o loo mafatia, e ogatasi ma le fautuaga: “Ia faamafanafana i e loto iti, ia fesoasoani i e o vaivai”?—1 Tesalonia 5:14.
O le a fesoasoani foi le alofa mutimuti vale ia i tatou e alofia ai le soona tali atu ma le inainā pe a faia e isi measese. Ua taʻuina mai ia i tatou e faapea: “Ia teʻa ma outou upu faafiufiu uma lava, ma le lotoa, ma le ita, ma le leo tele, ma le upu leaga, atoa ma le loto leaga uma lava. A ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.”—Efeso 4:31, 32.
O le a fesoasoani le alofa mutimuti vale ia i tatou e alofia le uunaiga e faaaogāseseina le pule. Ua faapea mai le Tusi Paia: “O lenei, ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai.” (Kolose 3:12) O le loto maulalo ua tatou mafai ai ona tuu i tatou i le tulaga o i latou o loo i lalo o la tatou vaaiga. O le alofa mutimuti vale e aofia ai le loto maulalo ma le fetuutuunai nai lo le faigata ona faamalie. O le faimea maeʻa e lē tatau ona avea ma faamolemolega o le faia o tagata e pei o ni masini. E lē gata i lea, i totonu o aiga, o tane e alolofa mutimuti vale e latou te manatuaina o a latou avā o ipu ia ua sili ona vaivai. (1 Peteru 3:7) O le manatunatu i faataitaiga a Iesu o le alofa mutimuti vale e mafai ona fesoasoani ia i tatou i nei mea uma.
Ona sa manatu mamafa tele Iesu i tagata a o faia lana auaunaga i le lalolagi, e mafai la ona tatou mautinoa ua avea nei o ia, ma o le a faaauau pea ona avea, o se Pule e alofa mutimuti vale. Sa tautala faavaloaga le Salamo 72 e faatatau ia te ia: “E faamasino e ia o e puapuaga o le nuu; e faaolaina foi e ia le fanau a e ua matitiva, a e faamomomoina e ia o le ua faasauā. E pule foi o ia e pau mai i le tasi sami e oo atu i le tasi sami; e pau mai le vaitafe e oo atu i tuluʻiga o le lalolagi. E alofa atu ia i le ua vaivai ma le ua mativa; e faaola lava e ia e ua matitiva.”—Salamo 72:4, 8, 13.
Ua valoia e le Afioga a le Atua: “A e faamasino o ia ma le tonu i e matitiva, e aoai foi o ia ma le tonu, ona o e faamaulalo o i le lalolagi. . . . na te fasioti . . . lē amio leaga.” Ina ua uma ona faamatalaina le auala e oo ai lava i nisi o tagata sa sauā ma amio faamanu o le a suia o latou ala, sa faaauau le valoaga e faapea: “Latou te le faia se mea leaga, latou te le faaumatia foi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.” (Isaia 11:4-9) Ua folafola mai ma le moni e lenei valoaga se sosaiete o tagata i le lalolagi aoao e latou te iloa Ieova ma faataitai ia te ia i ona ala o le alofa mutimuti vale!