Lipoti a Ē Faalauiloa le Malo

Ua Faatupuina e le Atua i Alaska

I LALO o le kiona ma le aisa mafiafia, ua faatalitalia ai e se fatu itiiti le avanoa e tuputupu aʻe ai. I masina pupuu e tolu ia e oo mai ai le taumafanafana i Alaska, e ono tupu ai se fatu kapisi e tusa lona telē ma le tasi vae valu o le insi (3 milimita) i le pe ā ma le 90 pauna (40 kilokalama)! Ioe, o lenei laufanua aisā lea na manatu i ai le toatele e lafulafuā, ua mafai ona fuatele mai.

E sili ona moni lenei mea i le laufanua faaleagaga o Alaska. Iina, i le laufanua e umi tele lona taumalulu, ua faaauau ona lūlū i ai e Molimau a Ieova fatu o le Malo. E pei o isi vaega o le lalolagi, ua faatupuina e le Atua fatu i loto e lelei.—1 Korinito 3:6, 7.

● A o tietie i se pasi a le aʻoga, na mātau ai e se tasi o Molimau e igoa ia Vanesa se teineitiiti e la te aooga faatasi e igoa ia Ana, e nofo toatasi lava i taimi uma i totonu o le pasi. Na foliga faanoanoa Ana, o lea na fai atu ai Vanesa ia Ana la te nonofo faatasi. E letioa lava faanoanoa Ana! Ua maliu lona tinā ona o le maʻi fatu na oso faafuasei, ma e lei umi ae maliu lona tamā i le kanesa. O le mafuaaga lena ua nofo ai Ana i ona tauaiga i Alaska.

Na alu atu Vanesa i le fale o lana aumea fou i se tasi Aso Toonai a o auai i le auaunaga i le fanua, ma tuu atu ia te ia le polosiua Po o Silasila Alofa mai ea le Atua ia i Tatou? I le aso Gafua na sosoo ai i le aʻoga, na sailia ai e Ana le Molimau talavou. Na tele fesili faale-Tusi Paia a Ana, lea na mafai ona tali e Vanesa. “O fea e fai ai tou lotu?” o lana fesili lea. O le afiafi lena na auai ai Ana i lana uluai sauniga i le Maota o le Malo.

E lei leva ae maua e lenei teineitiiti mātuaoti e 17 tausaga le tele o “tamā” ma “tinā,” e pei ona sa folafolaina e Iesu. (Mataio 19:29) Ma maeu se taimi fiafia i le vaai atu ia Ana i ona foliga fiafia ma ataata o tuuina atu o ia lava ia Ieova e ala i le papatisoga i le vai i le Tauaofiaga Itumalo “O Avefeau o le Filemu Mai le Atua”!

● I nofoaga mamao o le laufanua telē i le Atika i Alaska—lea e tūtū vavamamao ai nuu ona e faitau selau maila (kilomita) le telē o laufanua vavaloloa—ua faaaogaina ai e le Sosaiete o le Olo Matamata le vaalele e lūlū ai fatu o le Malo i nuu e 150. Ae e faalagolago le agaigai i luma faaleagaga o suesuega faifai pea o le Tusi Paia, i fetusiaiga. Talu ai o le tusiaina o tusi ua avea ma luʻi mo le toatele, e ao la i se faiaoga o le Tusi Paia ona ola le auala e fetusiai ai ina ia faatumauina le naunau o le tagata suesue. E mafai faapefea ona ausia lenei tulaga?

Na faia e Katerina se suesuega faale-Tusi Paia e sologa lelei ma Etena, e ui e 400 maila (600 kilomita) le mamao la te nonofo eseese ai! Nai lo le tau ina siiina o fesili mai le tusi o loo faia ai le suesuega, na faaaogā e Katerina se isi fasi pepa e tusi ai fesili ma tuu ai ma avanoa mo tali o na fesili. Pe a uma ona tusia e Etena tali, ona toe tusi atu lea o Katerina ma faia ana faaopoopoga manaomia ina ia faamanino ai le manatu. Na faapea mai Katerina: “Ou te faaavanoaina le afiafi o Aso Lulu mo le ma ‘suesuega,’ ma ou te taumafai e tausisi atu i ai e faapei ona ou faia i isi suesuega faale-Tusi Paia masani. Na ou lafoina foi ia Etena se teutusi e faatuatusi ia te au ma faapipii i ai le faailoga e lafo ai tusi. Talu ai e atoa le lua vaiaso e lafo ai tusi, e foliga mai la e telegese le gasologa o se suesuega e faia i fetusiaiga.”

Faaata i lou mafaufau le matuā fiafia o Katerina ma Etena ina ua la feiloai i le tauaofiaga itumalo i Anchorage ina ua sefulu masina talu ona faia le suesuega e ala i le meli! Na faafiafiaina foi Molimau ona na iai foi i le aofia tagata suesue o le Tusi Paia faapea ai ma isi tagata fiafia mai isi nuu mamao ese o Alaska.

E ui o nisi taimi e foliga mai ai e tuai le tuputupu aʻe, ae e matuā vave le totogo aʻe o isi “tamai laau” pe a oo i ai le malamalama o le upu moni. I se fua faatatau, e sili atu i le selau tagata fou o loo vivii atu ia Ieova ua papatisoina i tausaga taitasi i Alaska! Ua tatou faapea atu, “Faafetai lava Ieova” mo le faatupuina aʻe!