Pe E te Faaaloalogia lo Latou Tulaga Mamalu?

NA FAI e pei o le tulituliina o meaola ma tuu i se mea e lē talitonuina le palapalā ma le namu leaga, o le auala lena sa laʻuina atu ai tagata Aferika e pei o ni uta i luga o vaa agaʻi atu i atunuu o Amerika. Pe tusa o le ʻafa o i latou sa faatalitalia e feoti a o lei taunuu i le mea na uta atu i ai. Na tuueseeseina i se tulaga sauā tagata o aiga, ma e lei toe vaai lava le tasi i le isi. O fefaatauaiga o pologa o se gaoioiga pito sili lea ona leaga o faiga lē alofa a le tagata i isi ona uso a tagata. O isi o ia gaoioiga sa tutupu ina ua pulea ma le sauā e ni tagata malolosi o ē na faatoilaloina ia nei tagatanuu e aunoa ma se gaoioiga na mafai ona latou faia.

O le mea moni, o le aveesea o le tulaga mamalu o se tagata e mafai ona sili atu le ogaoga nai lo o ni sasa i le tino. Na te faaleagaina uiga faaletagata. E ui ua lē o toe iai ni pologa i le tele o atunuu, ae o loo faaauau pea le faaleagaina o le tulaga mamalu faaletagata, atonu i le tele o auala e lē iloagofie.

I le isi itu, o Kerisiano moni, e taumafai e utagia le fautuaga a Iesu Keriso ia ʻalolofa atu i o latou tuaoi ia pei o i latou lava.’ O lea ua latou fesili ai ia i latou lava, ‘Po o oʻu faaaloalogia ea le tulaga mamalu totino o isi?’—Luka 10:27.

Faaaoaoga o le Tulaga Mamalu

O le tulaga mamalu, e tusa ai ma se lomifefiloi, o se uiga po o se tulaga ua tatau ma talafeagai ona faamamaluina, ma faaeaeaina. Maeu se faamatalaga talafeagai lelei e faamatala ai le tulaga o le Pule Silisili Ese Aoao, o Ieova le Atua! O le mea moni, ua faatele ona taʻua e le Tusi Paia Ieova ma lana pule silisili ese ma le mamalu. Na mauaina e Mose, Isaia, Esekielu, Tanielu, le aposetolo o Ioane, ma isi le faaeaga o le tuuina atu i ai o ni faaaliga faagaeeina e faatatau i Lē Silisili Ona Maualuga ma lona afioaga faalelagi, ma o a latou faamatalaga o loo tau fai faaātaina ai le matautia o le tulaga malualii ma le mamalu. (Esoto 24:9-11; Isaia 6:1; Esekielu 1:26-28; Tanielu 7:9; Faaaliga 4:1-3) I se tatalo e vivii ai, na faapea mai le tupu o Tavita: “Ieova e, e ou le silisili ese, ma le malosi, ma le matagofie, ma le mamalu, ma le malualii; auā o ia te oe mea uma o i le lagi ma le lalolagi.” (1 Nofoaiga a Tupu 29:11) O le mea moni, e leai se tasi e sili ona talafeagai ona āva ma faamamaluina nai lo Ieova le Atua lava ia.

I le foafoaina o le tagata i lona faatusa ma ia foliga ia te ia, na tuuina atu ai e Ieova i tagata se tulaga ina ia maua ai le tauaogaina, faaaloalogia, ma le mamalu. (Kenese 1:26) O lea la, pe a tatou feutagai ma isi, e manaomia ona tatou avatu le āva e tatau ai ma le faaaloalo i tagata taitoatasi. Pe afai tatou te faia faapea, o lona uiga, ua tatou faailoa atu ai le Puna o le mamalu faaletagata, o Ieova le Atua.—Salamo 8:4-9.

Le Tulaga Mamalu i Faiā Faaleaiga

O le aposetolo o Peteru o se tagata faaipoipo, ma i le faagaeeina i le agaga paia, na ia fautuaina ai tane Kerisiano ina ia feutagai ma a latou avā i le “āva, auā o le ipu ia ua sili ona vaivai.” (1 Peteru 3:7, NW; Mataio 8:14) Na fautua mai le aposetolo o Paulo: “O le fafine foi ia ava o ia i lana tane.” (Efeso 5:33) O lea la, i le faaipoipoga, o le āva ma le faaaloalo mo le tulaga mamalu totino o le isi o le paaga o se manaoga faale-Tusi Paia. O ā la auala e mafai ai ona faaalia ai lenei mea?

E pei lava ona faaolaolaina e le vai se laau o loo tuputupu aʻe, o faamatalaga faaaloalo ma gaoioiga agaalofa i le va o le tane ma le avā, i le lautele ma pe a na o i laua, e mafai ona faamalosia ai le la faiā vavalalata. I le tuufaafeagai, o le inaina, le faalumaina i faamatalaga e sofai atu po o le lē faaaloalo, o faamatalaga soonafai, e faamasiasi ai ia e masani ona faalogo i ai i ata faasolo fai mea mālie o le TV, e faaleagaina ai. E mafai ona faapogaia ai faalogona tiga o le lē tauaogaina, o le loto mafatia ma le tauvalea, e mafai foi ona faamanualia ai faalogona o le mea e lē faigofie ona toe faaleleia.

O le faaaloalogia o le tulaga mamalu totino o isi o lona uiga foi o le taliaina o i latou i le tulaga o loo latou iai, nai lo le taumafai e faafetaui atu i latou i faamatalaga fatu po o le faia foi o ni fefaatusatusaaiga lē talafeagai ma isi. E tāua tele lenei mea i le va o tane ma avā. Pe afai e saʻoloto ma faigofie fesootaiga ma talanoaga ma leai se tasi e popole ina neʻi faitioina pe otegia, o le a mafana foi le faiā. Pe afai e mafai e le tane ona gaoioi e tusa ai ma lona tagata moni po o le avā e pei o lona tagata moni i le faaipoipoga, ona avea moni lea o le aiga ma sulufaiga mai le lalolagi sauā ma le soonafai.

Ua iai i fanau le faatonuga faale-Tusi Paia ina ia faaaloalo ma usiusitai i o latou mātua. E lē gata i lea, o mātua atamamai ma alolofa o le a faaaloalogia foi le tulaga mamalu o a latou fanau. O se faamālō māfana mo amioga lelei, faatasi ai ma aoaiga ma le onosai pe a manaomia, e aogā mo le faatatauina o “apoapoaiga a le Alii.” O faitioga faifai pea, le ʻeʻē, le faia o igoa e tau faifai ai e pei o le “valea” po o le “soso” o le a na ona faaʻonoʻono ai ia i latou.—Efeso 6:4.

O se tasi o toeaina Kerisiano ma o se tamā, o lē na tausia aʻe ona atalii e toatolu ma afafine e toatolu, ua faapea mai: “I le Maota o le Malo, ma te tuuina atu ai aoaiga manaomia i le filemu e mafai ai. E masani lava ona lava le tau ina eu atu i le tulilima po o le pupula faapaū atu i ai. Pe afai e manaomia nisi aoaiga e mamafa atu, e ma te tuuina atu le aoaiga i le fale a o lē o iai isi tamaiti. I le taimi nei ua matutua tamaiti, ua faaaofia ai i aoaiga le avatuina ma le alofa i tamaiti taitoatasi, o fautuaga poto mai i le Afioga a le Atua e tusa ai ma o latou manaoga taitoatasi. Ma te taumafai e tausisia le faaliloliloina o nei mataupu totino, ona o le faaalia o le faaaloalo mo aiā tatau a tamaiti taitoatasi i mea e patino i le tagata lava ia ma le tulaga mamalu.”

E lē faagaloina foi le manaoga mo amioga lelei i upu ma gaoioiga i totonu o le aiga. Ia lē avea le masani ma pogai e lē amanaia ai upu e pei o le “faamolemole,” “faafetai,” “tulou,” ma le “ou te faatoese atu.” O amioga lelei e fai ma faavae o le faatumauina o le tulaga mamalu lava ia o se tasi ma le faaaloalogia o isi.

I Totonu o le Faapotopotoga Kerisiano

Na fetalai mai Iesu: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou.” (Mataio 11:28) O ē lotomomomo, o ē mafatia, e oo lava i tamaiti, na lē mataofiofia le tosina atu ia Iesu. Na vaai maulalo i ai taʻitaʻi lotu ma taʻitaʻi faalemalo faamaualuluga ma le faafiaamiotonu o na aso. Ae na latou iloaina sa na o Iesu na avatua ia te i latou le faaaloalo na tatau ai.

I le faaaoao ia Iesu, tatou te mananao foi e avea i tatou ma puna o faalaeiauga mo o tatou uso talitonu. E uiga lenei mea i le sailia o avanoa e atiina ae ai i latou e ala i a tatou upu ma a tatou gaoioiga. E talafeagai le faia moni o faaupuga agaalofa ma le mautinoa i a tatou talanoaga. (Roma 1:11,12; 1 Tesalonia 5:11) Tatou te faaalia lo tatou magafagafa i faalogona o isi e ala i le faaeteete i faaupuga tatou te fai atu ma le auala e fai atu ai. (Kolose 4:6) O laei onomea ma amioga faaaloalo i sauniga faa-Kerisiano e faaatagia atu ai foi le faaaloalo loloto mo le tulaga mamalu o lo tatou Atua, o lana tapuaiga, ma o tatou uso tapuai.

Na faaaloalogia e Iesu le tulaga mamalu o tagata e oo lava i lona faia o se auaunaga mo i latou. Sa lē tāitai ona ia faasilisilia ia lava ina ia faamasiasi ai isi po o le tuu foi o latou i se tulaga maualalo. Ina ua alu atu se lepela ia te ia e saili se vaifofo, sa lei tuliesea e Iesu le tamaloa ona o sē e lē mamā ma lē aogā, na te lei faia foi se gaoioiga e tatai atu ai manatu o tagata ia te ia lava. Nai lo lena, ina ua aioi atu le lepela ia Iesu, “Le Alii e, a e finagalo i ai, e mafai lava ia te oe ona faamamā ia te au,” na Ia faaaloalogia le lepela i lona faapea atu, “Ou te loto i ai.” (Luka 5:12, 13) Maeu le ofoofogia o lenei mea mo i tatou e lē gata i le fesoasoani ia i latou o loo iai le manaoga ae faapea foi ona faamautinoa ia i latou e lē o i latou o se avega ae o loo manaomia ma alofagia! O i latou e matamumuli, loto mafatia, ma ē lē atoatoa le malosi e masani ona lē amanaiaina, e alofia ma vaai faatauvaa i ai le lalolagi. Ae e tatau ona latou mauaina le mafutaga ma le talileleia moni pe a iai faatasi ma uso ma tuafāfine Kerisiano. E tatau ona faia la tatou vaega e saosaolaumea ai i lenei uiga.

Na alofagia e Iesu ona soo e pei o “ona tagata” ma ua “alofa ia i latou ua oo i le gataaga” e ui i o latou vaivaiga ma uiga totino faalelelei. (Ioane 13:1) Na ia silafia lo latou loto mamā ma lo latou tuutoina atu atoa i lona Tamā. Ia faapena foi, ona aunoa i tatou ma ni uunaiga leaga i o tatou uso talitonu ona atonu ua latou lē faia mea i la tatou auala po ona o la latou masani po o latou uiga totino e faatiga ai ia i tatou. O le faaaloalo i le tulaga mamalu o o tatou uso o le a uunaia ai i tatou e alolofa ma talia i latou i le tulaga ua latou iai, ia talitonu e faapea latou te alolofa foi ia Ieova ma auauna ia te ia i uunaiga saʻo.—1 Peteru 4:8-10.

Ae maise lava i toeaina, e tatau ona faaeteete ina ia latou lē faapogaia ni popolega lē talafeagai mo i latou o ē o loo faalagolago atu i la latou vaavaaiga. (1 Peteru 5:2, 3) Pe a feiloai ma se sui o le faapotopotoga o sē ua faia se agasala, e sili ona lelei mo toeaina ona faamālū a latou upu i le agalelei ma le magafagafa ma alofia le faia o ni fesili lē manaomia e faamasiasi ai. (Kalatia 6:1) Tusa lava po o ua manaomia ona faia se aoaiga mamafa, e tatau ona faaauau pea ona latou āva i lē fai measese i le āva e tatau ai ma le faaaloalo totino.—1 Timoteo 5:1, 2.

Ia Tausisia le Mamalu Totino

I le foafoaina i le faatusa ma ia foliga i le Atua, ua tatau ai ona tatou faaatagia atu, i le tele e mafai ai, ia uiga ofoofogia o le Atua—e aofia ai lona tulaga mamalu—i o tatou olaga i aso uma. (Kenese 1:26) E faapena foi ona faatatauina atoatoa le faatonuga ia “alofa atu i lē lua te tuaoi, ia pei o oe lava ia te oe” o le manaoga lea mo le paleni o le tulaga mamalu ma le faaaloalo totino. (Mataio 22:39) O le mea moni pe afai tatou te mananao i isi e faaalia mai ia i tatou le faaaloalo ma tuuina mai le tulaga mamalu, e ao ona tatou faaalia atu e talafeagai ia i tatou le faia mai i ai faapea.

O se itu tauā i le faatumauina o le faaaloalo ma le mamalu totino o le faatumauina lea o se loto fuatiaifo mamā. O se loto fuatiaifo ua leaga ma faalogona nofosala e faigofie ona tatai atu i lagona o le lē toe aogā, o le lē mautonu ma le mafatia. O lea, pe afai e faia e se tagata se measese matuiā e tatau loa ona ia uia faanatinati laasaga o le salamō ma sailia le fesoasoani faaleagaga a le au toeaina ina ia olioli ai i “tausaga e filemu ai mai luma o le Alii.” E aofia ai i le faafouina le faafoisiaina o le tulaga mamalu ma le faaaloalo totino.—Galuega 3:19.

E sili atu le faia o se taumafaiga faifai pea e puipuia ai o tatou loto fuatiaifo ua toleniina i le Tusi Paia, ma lē faatagaina ai so o se mea e pisia ai pe faavaivaia ai. O le faataitaia o le pulea totino i vala uma o o tatou olaga i aso taitasi—le ʻai, le inu, o faiga faapisinisi, faafiafiaga, le feagai ai ma le isi ituaiga—o le a fesoasoani ai ia i tatou e tausia se loto fuatiaifo mamā ma fesoasoani ai ia i tatou e faaatagia atu le tulaga paia ma le mamalu o le Atua i o tatou olaga.—1 Korinito 10:31.

Ae faapefea pe afai o faalogona nofosala e uiga i a tatou measese ua lē mafai ona faateatea mālie ese atu? Po o le faapea foi o āuga o se mea na faileagaina ai o loo tumau pea ona mafatia ai? O nei faalogona e mafai ona faaleagaina ai lo tatou tulaga mamalu ma aumai ai mafatiaga e tele. Maeu se faamafanafana loto o upu a le tupu o Tavita o loo maua i le Salamo 34:18: “Ua latalata mai Ieova i e ua loto momomo; ua ia faaola foi i e ua loto nutimomoia”! O Ieova e nofo sauni ma loto malie e fesoasoani i ana auauna pe afai e feagai ma mafatiaga ma faalogona o le lē toe aogā. O le ole atu ia te ia faatasi ai ma le saili i le fesoasoani a i latou o loo agavaa faaleagaga, e pei o mātua Kerisiano, toeaina, ma isi tagata matutua i le faapotopotoga, o auala ia e toe faafoisia mai ai le faaaloalogia ma le faamamaluina totino.—Iakopo 5:13, 15.

I le isi itu, tatou te manaomia ona iloaina le eseesega o le faamamaluina totino ma le faamaualuga. O le fautuaga a le Tusi Paia “aua le faasili le manatu o se tasi i le mea ua tatau ona manatu ai, a ia māmā le manatu, ia tusa ma le tofiga o le faatuatua ua taitasi ma tofu ai mai le Atua.” (Roma 12:3) A o talafeagai la ona atiina ae le faaaloalo totino, tatou te lē mananao e faasili i tatou lava po o le faafilogia le tulaga mamalu faaletagata faatasi ai ma le manatu faapito ma taumafaiga malolosi ua faia e isi e fialelei ai i luma o isi.

Ioe, o le faaaloalo i le tulaga mamalu o isi o se manaoga faa-Kerisiano. O o tatou tauaiga ma uso Kerisiano ua tatau ma fetaui ona avatu i ai la tatou faaaloalo, āva, ma le amanaiaina. Ua aumaia e Ieova ia i tatou le tulaga mamalu ma le āva lea e tatau ona tatou faailoa ma tausisia. Ae sili atu i na mea uma, e tatau ona tatou atiina ae le faaaloalo loloto mo le tulaga mamalu silisili ese ma le malualii mo lo tatou Tamā faalelagi, o Ieova le Atua.

[Ata i le itulau 31]

E mafai e tamaiti ona faaalia le faaaloalo mo i latou ua lē atoatoa le malosi