Faatalitali ma le Onosai

O LE leoleo mamoe lea na faaauau ona valaau mai “Auoi le luko!” ae e leai se luko e iu ina valaau mai mo se fesoasoani ina ua ia vaaia se luko moni ae leai se tasi na amanaiaina. E faapena le mea o loo tupu i aso nei, e toatele tagata ua lē manatu mamafa i le latalata mai o le aso o Ieova ona ua latou faalogo i le tele o lapataiga ae lē faataunuuina. O le mea moni lava ia o le toatele o tagata ua lē taulau ona iloa po o lē fea lapataiga e moni ma utagia, ua faigofie ona lavevea i faiga a le fili sili o le Atua, o Satani, le “agelu [pepelo] o le malamalama.”—2 Korinito 11:14.

E matautia tele le agaga o le faifaimalie e oo lava ia i latou ua leva ona auauna ia Ieova. Aisea? Ia manatunatu i le lapataiga mai ia Peteru i le uluai senituri.

Ia Mafaufau Lelei

O le tusi faagaeeina lona lua a Peteru sa avea o se faamanatu i uluai Kerisiano, ma e faatatau foi ia i tatou. Na ia tusia e faapea: “Le au pele e, ou te tusi atu ia te outou lenei tusi e lua, o ia tusi, ou te fafagu i o outou mafaufau lelei e ala i le faamanatu atu.” (2 Peteru 3:1, NW) O le ā le faavae o ia Peteru mo lenei manatu mamafa? Ua faamatilatila mai e Peteru le iai o ē tauemu, o a latou tauemuga e aveesea ai le mafaufau saʻo i le faanatinati o le taimi lea o loo soifua ai nei auauna a le Atua. O le taimi lenei e faaeteete ai ina neʻi faaseseina e ē tauemu. O le mea lena ua faamanatu atu ai Peteru i lana au faitau ina ia “manatu ai i valoaga na fai mai e le au perofeta paia.” (2 Peteru 3:2; Galuega 3:22, 23) O le ā na fai mai ai perofeta?

E tele taimi sa faasino atu ai auauna a le Atua i le aumaia o le iuga o le amioleaga e ala mai i faasalaga tauatua. Ua faamanatu mai e Peteru i lana au faitau le Lolo i aso o Noa lea sa faaaogā e le Atua o se auala e faalaa mai ai ina ua tumu le lalolagi i le leaga. Na matuā faaumatia le lalolagi uma sa iai i lena taimi i lena Lolo matautia. Ae na faasaoina e le Atua Noa ma lona aiga i se vaa faatasi ai ma ni mea ola sa fai ma sui o ‘ituaiga uma o mea ola.’ E molimau le tele o talatuu i le moni o lenei faamatalaga faale-Tusi Paia.a—Kenese 6:19; 2 Peteru 3:5, 6.

Ua taʻua e Peteru lena faalaa tauatua ‘o se mea moni na lē iloa’ e nisi tagata. A o isi na iu ina lē manatu mamafa ona o gaoioiga a tagata tauemu i na aso. E lē tatau lava la ia i tatou ona faagaloina mea ua uma ona faia e Ieova. Ua taʻu mai ia i tatou e Peteru: “A o le lagi ma le lalolagi o ona po nei ua tuu mo le afi ona o lea lava afioga; ua taofia ai foi mo le aso e faamasino ai ma fano ai tagata faalematau.” (2 Peteru 3:7) Ioe, o le a toe tupu foi le faalaa tauatua.

E Lē Faatuai Mai le Atua

Ua teʻa atu le faitau meleniuma o taimi. Aisea ua umi ai o faatali le Atua ina ia faaleleia faafitauli o tagata? Iinei, ua toe faasino atu ai foi Peteru i se tasi mea moni. Ua ia faapea mai: “A e aua neʻi lilo ia te outou, le au pele, lenei mea e tasi, e tusa i luma o le Alii le aso e tasi ma tausaga e afe, o le afe foi o tausaga e tusa ma le aso e tasi.” (2 Peteru 3:8) E ese le silasila a Ieova i le taimi nai lo i tatou. O le silasila a le Atua o Lē soifua e faavavau, o le vaitaimi mai le faia o Atamu seʻi oo mai i le taimi nei e tusa e lei atoa se vaiaso. Peitai po o le ā lava la tatou vaaiga i le taimi o loo iai, o le mavae atu o meleniuma taitasi ma aso taitasi o lo tatou latalata atu foi lea i le faataunuuina o le fuafuaga a Ieova.

“O se vaivevela e tunu ma tilotilo i ai seʻi puna e lē taitai ona puna” o se faaupuga e faauiga faapea o le tau lava ina nofonofo ma faatalitali i se mea e aunoa ma se mea e fai e ono faatuai ai lona oo mai. Ae e ui i lea, ua fautuaina e Peteru le “faatalitali ma naunau atu ia aulia mai le aso o le Atua.” (2 Peteru 3:12) E faapefea ona tatou ati ae le uiga faalemafaufau lea e tumau ai lo tatou mataala i le oo mai o le faalaa tauatua?

E Leotele Gaoioiga Nai lo Upu

O loo taulai atu e Peteru ia manatu i amio ma gaoioiga. Sa ia faasino atu i “gaoioiga paia tau amio” faapena foi ma “amio lelei o le tuutoina faaleatua.” (2 Peteru 3:11, NW) O ā e aofia ai i nei mea?

O le auauna moni lava a le Atua e gaoioi i le ala e faafiafia ai o Ia. O le faatuatua o le ituaiga tagata tapuai faapea e atagia mai i lana amio. O lenei mea o le a faaesea ai o ia mai ia i latou o ē e na ona faapea mai e talitonu i le Atua ma ana folafolaga. Atonu ua e matauina ua avea le faiva i le lautele a Molimau a Ieova ma mea ua faatulagaina ai i latou e ese mai isi. Latou te ō atu i lou aiga ina ia tataʻi le uaʻi atu i folafolaga a le Atua o loo i le Tusi Paia. Ae latou te molimau atu foi i o latou faamoemoega ma talitonuga i so o se mea lava latou te feiloai ai ma tagata.

O le Molimau e pisi e faalauiloa atu lona faatuatua i isi e faamautū ai ma faamalosia ona talitonuga. O faamatalaga e mafai ona iai ni āuga loloto i totonu ma aumaia ai foi le olioli ma le loto malie. Pe a tatou folafola atu le tala lelei o le Malo o le Atua, tatou te faafiafia ai foi Ieova. Ua tatou iloa o ia e ‘le amioletonu na te le faagalogaloina la outou galuega ma le alofa ua outou faaali mai ai i lona suafa,’ e pei ona faalauiloa mai e le aumea aposetolo a Peteru o Paulo.—Eperu 6:10; Roma 10:9, 10.

O le ā ua iu i ai lenei naunau atu e faalauiloa le tala lelei o le Malo i nei aso e gata ai o lenei faiga amioleaga o mea? E faitau selau afe tagata loto faamaoni ua latou aʻoaʻoina nei pe faapefea ona latou maua se faiā vavalalata ma Ieova, ia maua aogā mai lona alofa agalelei ma maua le fiafia moni i le faamoemoe o le ola e faavavau i le lalolagi parataiso.

Le Muai Iloa

E ui lava ua tatou iloa mai le Tusi Paia e faapea o le a faalaa Ieova le Atua i lana taimi atofaina, e manaomia ona tatou utagia le isi lapataiga mai ia Peteru: “Ia outou faaeteete ia te outou, auā ua muai iloa e outou, neʻi taʻitaʻieseina outou i le sese o e faaletaupulea, tou te pauu ai i le mea sa outou tumau ai.”—2 Peteru 3:17.

E mautinoa lava na uluai silafia e Ieova e faapea o nisi e lē malosi le faatuatua e ono faavaivaia ona o le foliga faatuai mai o le faalaa tauatua. Sa ia silafia foi e ono faaleagaina ana auauna moni i taaʻiga a tagata lē amioatua ia, a le o lena foi, po o le lē amanaiaina foi o lo latou talitonuga i le latalata mai o le taimi e faapaiaina ai le suafa o le Atua. Pagā le matautia o le toe paʻū ese mai i le tutumau i nei aso mulimuli!

E lē o se taimi lenei e faatalatū ai pe faaletonu e faatatau i le mea o le a faia e Ieova. (Eperu 12:1) Nai lo lena, o le taimi lenei e tutupu aʻe ai i le talisapaia o mea ua aumaia e le onosai o Ieova—le avanoa o le faasaoina mo le faitau miliona o ē ua avea ma vaega o le motu o tagata e toatele mai atunuu uma ma tepa taulaʻi atu i le faasaoina mai le puapuaga tele i le lumanai. (Faaaliga 7:9, 14) Ua timai mai Peteru e faapea: “A ia tutupu outou i le alofa tunoa ma le poto i a lo tatou Alii, o lo tatou Faaola lea o Iesu Keriso. Ia ia te ia le viiga i ona po nei, ma ia oo i le aso faavavau.”—2 Peteru 3:18.

“Ia Outou Faatumau ia te Outou i le Alofa o le Atua”

O lo tatou pisi i le talaʻia o le Malo ma auai e lē aunoa i sauniga faa-Kerisiano mo le tapuaiga ma le suesue o le Afioga a le Atua ua aumai ai ia i tatou se puipuiga. O le faia faapea, o le a leai ai se taimi tatou te soona popole ai agaʻi i tulaga o loo faaauau pea ona leaga o le faiga amioleaga o mea i aso nei. E lē tatau ona manumalo le mataʻu ma le popole i olaga o Kerisiano moni. (1 Korinito 15:58) O le tele o lo tatou pisi i le auaunaga ia Ieova, o le vave foi lea o le mou atu o le taimi.

O Iuta, o lē na soifua i le taimi lava lea sa iai Peteru ma o ia o le ʻafa uso o Iesu, ua timai mai e faapea: “O outou le au pele e, ia outou ati ae ia te outou i lo outou faatuatua e silisili ona paia, o le Agaga Paia tou te tatalo ai; ia outou faatumau ia te outou i le alofa o le Atua, ma faatalitali atu i le alofa mutimutivale o lo tatou Alii o Iesu Keriso, e oo atu i le ola faavavau.” (Iuta 20, 21) Mātau le tāua o le manatu mautinoa lea e maua i le finafinau i le tatalo. (1 Tesalonia 5:17) Ua faaopoopo mai i ai Iuta: “Ia outou alolofa atu i nisi o e ua faaletonu; a o isi ia outou faaola ia i latou ma le mataʻu, ia seʻi ia te i latou mai le afi, ma ia outou ʻinoʻino i le ofu ua pisia i le tino.” (Iuta 22, 23) Maeu le tāua o le faalaeiau o le tasi i le isi i nei aso faigata! Ma maeu le tāua o le aua le paʻū atu i tofotofoga, ma faaaogā le faaumiumi o le “aso o le faaolataga” e fai ma faamolemolega o “amioga lē taupulea,” ia ua matuā faateteleina i nei aso o amioga paʻū maulalo i le lalolagi.—Iuta 4; 2 Korinito 6:1, 2.

O le utagia o fautuaga alofa a Peteru, Paulo, ma Iuta, ma e ala i le pisi ma maelega i le auaunaga a le Atua, e mafai ai ona e faatalitali ma le onosai i le faalaa mai a Ieova. Peitai po o le a e faia ea faapea?

Aua e te faatalatū e faafesootai Molimau a Ieova i le mea o e alala ai mo se fesoasoani ina ia faamalosia lou faatuatua i le folafolaga a Lē na Foafoaina Mea e uiga i le ola e faavavau. Aʻoaʻo po o ā mea e manaomia ina ia agavaa ai e fai sou sao i le galuega molimau i le lalolagi aoao lea e lē toe faia lava pe a faaiuina i le puapuaga tele ua lata mai. (Mareko 13:10) Ona iai ai lea ia te oe le faamoemoe o le ola ai i le lalolagi fou amiotonu lea ua folafola mai e Ieova. (2 Peteru 3:13) Utagia lana faamanatu mai! Faatalitali ma le onosai! Ia pisi!

[Faaopoopoga i lalo]

[Ata i le itulau 7]

Aʻoaʻo nei e uiga i le folafolaga a le Atua i le Parataiso

[Ē Ana le Ata i le itulau 5]

Luko: Manu vaefa/Jim Harter/Dover Publications, Inc.; leoleo mamoe talavou: Tamaiti: A Pictorial Archive from Nineteenth-Century Sources/Grafton/Dover Publications, Inc.