Le Agora—O le Ogatotonu o Atenai Anamua

SA MATUĀ vevesi tagata atamamai o le aai o Atenai! E masani lava ona iai ni manatu fou e faasalalau faalauaitele i le agora, o le maketi lea po o le malae o lena aai o Eleni. Peitai, e matuā ese lava le taimi lenei. Ua faatoʻā taunuu ane lava i le aai se tamaloa Iutaia e foliga mai o “se folafola mai i atua ese.” Sa ia faia ni faamatalaga uigaese i “e na feiloai ma ia.” “Pe ala i se a le fai mai o lenei tagata sii i le lau?” o le fesili lea a tagata Epikuro faamaualuluga ma tagata Setoiko foliga pāū. Ioe, o le agora a Atenai o le nofoaga lea e faia ai finauga i le anoanoai o mataupu eseese. Peitai o le faailoa mai o ni atua ese—e leai la, ua matuā sili lava ona leaga lena mea!—Galuega 17:17, 18.

O uiga masalosalo na o tagata Atenai ina ua amata e le aposetolo o Paulo lana talaʻiga mo le uluai taimi i le agora o Atenai. Sa talanoa o ia e uiga ia Iesu Keriso ma le toetu. Ae mo le agaifanua lea sa foliga mai e talia so o se mea a Atenai, o le ā sa matuā ese lava e faatatau i le faailoaina mai o na talitonuga fou i le agora?

Ua Iai se Malae Tele i Atenai

O le mea sa uigaese moni, o le agora lava ia ma gaoioiga na faia ai iina e faatatau i le olaga faalelotu ma le olaga lautele o tagata Atenai. O le agora a Atenai o se ogaeleele malifa pe ā ma le 25 eka (tusa ma le 10 hekatea) e tū i le itu i mātū i sisifo o le Acropolis. E foliga mai i tuā i le senituri lona ono T.L.M., i le vaitaimi o le taʻitaʻi faapolotiki Atenai ma o le faitulafono foi, o Solon, na tuuina atu ai lenei fasi eleele e fai ma fanua e fausia ai se malae tele o le aai. O le faavaeina o faiga faatemokalasi i Atenai, ma le atili faamamafaina o olaga masani, na taitaia ai i le fausia o le tele o fale ina ua faagasolo uluai tausaga o le senituri na sosoo ai. O iina na toe faafouina ai le agora ma e sili atu ona mataina mea o le a tutupu iina.

O le upu Eleni a·go·raʹ e puna mai le veape o lona uiga “faapotopoto, faatasitasi.” E fetaui lelei lena i le faaaogaina o le agora e avea ma nofoaga autū o feiloaiga i le aai. Na oo ina avea le agora ma ogatotonu o le olaga faasamasamanoa ma le olaga lautele. O iina sa faauluulu i ai le faiga o pulega ma faamasinoga a tagata o le aai, o le nofoaga autū mo fefaatauaiga ma pisinisi, o le mea e fai ai mataaga o faaaliga o loo faamatilatila mai ai ni tala faa-Eleni, o le nofoaga e faaali ai tomai tau afeleti, ma o se nofoaga e sili ona moomia mo talanoaga a le au atamamai.

Pe e te fia malaga e matamata i toēga o malumalu, o faapaologa o fale tetele, o faatusa, o faatagata ma maa faamanatu, ma fale o le malo sa iai i le agora i Atenai? I se taumafaiga e iloilo le talaaga o le agora i aso ua teʻa, seʻi o tatou ō ese la mai le pisapisaō ma le vevesi o le aai i ona po nei ae tatou agaʻi atu i le auala gaoā, e ui atu ai i toēga o maamora, o maa ua vaneina, ma mea e pei o ni faitotoa ua malepelepe ae ua lilofia i vao ma laau iti.

O Malumalu ma Atua o Sulufaiga

E maofa tagata asiasi i le iai o le anoanoai o malumalu ma fale sa faia ai tapuaiga i atua eseese. O nei mea uma na avea ai le agora ma nofoaga sili e faaautū mai i ai tapuaiga, e lona lua atu i le Acropolis. A o faagasolo tausaga sili ona tamaoaiga o Atenai anamua, sa matuā aafia vala taitasi uma o le olaga lautele i mea faalelotu. O lona uiga o atua eseese ia sa faailoga faapea o “atua o sulufaiga” o matagaluega faalemalo ma auaunaga tau pulega, sa tofu lava le atua ma se malumalu e faia ai a latou tapuaiga iina i le agora.

O le malumalu sa lauiloa ai iina o le Malumalu o Hephaestus. Sa fesootai atu le atua fafine o Athena ma le atua o Hephaestus. Sa tapuaia uma nei atua iina o ni atua o meataulima. O le mauaina i suesuega i le eleele o fausaga sa faaaogā ai le uamea ma ipu na faia mai le ʻele, i autafa o lenei malumalu ua mafai ai ona fesootai atu ia Hephaestus, le atua Eleni o meataulima lea na manaomia ai le faaaogaina o le afi. Pe atonu i le lona fitu o senituri T.A., na faaliliuina atu ai lenei malumalu sa lelei ona faasaoina mai, mo le Lotu Orthodox a Eleni, o Sagato Siaosi, e ui lava e lē o toe faaaogaina faapena i aso nei.

O le mea moni, sa tatau ona iai se atua o sulufaiga o le agora. O le atua lea o Seu Agoraios, o lē ua taʻua faapea na ia faagaeeina faiva faafailauga, ma o ia lea na faapaiaina i ai se fatafaitaulaga matagofie na faia mai le maamora tautele e taʻua o le Pentelic. (Faatusatusa i le Galuega 14:11, 12.) O le fatafaitaulaga sa tū latalata ane o le Faatinā o Atua, sa faaitualalua ai se laina mataina o maafaamanatu o tagata taʻutaʻua.

Pe a sōsō laitiiti atu i luma, tatou te tau atu ai i se tamai malumalu o tagata Ionia. Na faaigoa e Pausanias, o le tagata e suesue i laufanua ma talafatai, lea malumalu faapea o le Malumalu o Apolo le Tamā. Aisea? Auā e tusa ai ma se talafatu a Eleni anamua, o Apolo o le tamā lea o Ion, lē na tupuga mai ai le ituaiga o Ionia, lea e avea ai tagata Atenai ma sona vaega.a I lenei vala, na avea ai Apolo ma se tasi o atua o sulufaiga o le faalapotopotoga tau pulega a le malo, ae maise lava i le fesootai atu ma faalapotopotoga o auuso eseese sa iai i le aai.

I le vaai atu i le itu i mātū, ua tatou iloa ai maa namu o toēga o se tamai malumalu, sa fausia i le vaitaimi ogatotonu o le senituri lona fa T.L.M. O iinei sa tapuaia ai Seu ma Athena Phatrios, o atua autū na o faalapotopotoga o auuso faalelotu mai tuaa anamua. E toetoe lava lē mafai ona avea ma tagatānuu o Atenai seiloga ua avea muamua ma sui o nei auuso. I le isi itu o le auala, tatou te tau atu ai i toēga o se fatafaitaulaga mo Atua e Sefululua (Twelve Gods).

I le Faapaologa o Seu Eleutherios (Saʻolotoga) na latalata ane, sa toe faamamaluina ai foi iina le atua sili o Eleni, ae i le avea ma atua o le saʻolotoga ma laveaiina. O lenei poletito, po o le faapaologa, sa avea ma nofoaga lauiloa ma o se nofoaga sa faatasitasi i ai. Ua taʻua faapea o le faapaologa lenei na faatasitasi i ai le faifilosofia taʻutaʻua o Socrates ma ana uo, o iina sa latou nofonofo ai ma talatalanoa pe savalivali solo foi. O le tele o faapaiaga ma faiga taulaga sa faia e teuteuina ai lenei faapaologa, e pei o talita a toa o ē na feoti a o tau e puipuia Atenai, sa iai fesootaiga tuusaʻo ma le laveaiina o le aai mai fili po o le faatumauina o le saʻolotoga.

Le Auala o Panathenaea

Ua iai se auala lautele, e ilaila e alu faalava i le moa o le agora e faaigoaina o le Auala o Panathenaea. O le igoa ma uiga faapitoa sa maua mai le tausamiga faalemalo a Atenai, o le Panathenaea. I le taimi o lenei tausamiga, e tauave i luga le veli o le atua fafine o Athena i le auala lenei mai le Fale o loo amata mai ai le Solo o le sauniga (e tū i tala ane o le faitotoa o le aai) seia oo atu i le Acropolis. O se vaneina o ata faa-Parthenon i se pa o se fale e mafai ai ona tatou iloa atu teuteuga ma le mamalu o le sauniga o le tausamiga—o tagata tietie solofanua, o kariota tutuu, o povi ma mamoe e fai ai taulaga, ma tama ma teine talavou o loo felauai mea e faaaogā mo le taulaga. Sa maimoaina le solo o le sauniga e tagatānuu o Atenai ma a latou mālō, ma na lelei ona saunia e le autusiata nei nofoaga mo ē auai ina ua latou tusia le ata o le fausaga o le agora. Mo se faaaoaoga, sa iai āi i luma o poletito ma faasitepu ma sa fuafuaina ma le atamai ina ia fetaui mo le auala e ui ane ai le solo o le sauniga. O le anoanoai o faasitepu na faia i lumafale sa mafai ona saofafai ai le toatele o tagata matamata.

“Ua Tumu i Tupua”

Ona o le putuputu faatasi o le tele o malumalu, o faatusa, ma maafaamanatu, e lētioa lava ona ‘tiga tele le loto o le aposetolo o Paulo a o matamata o ia i le aai ua tumu i tupua.’ (Galuega 17:16) Atonu sa faateʻia Paulo i mea na ia vaaia a o ulu atu i le agora. E anoanoai le tele o faatagata matagā a le atua o Hereme, o lea na manaomia ai se faapaologa atoa, sa taʻua o le Faapaologa o Hereme, ina ia tuu ai ia tupua. O ofu sa ufiufi ai isi faatusa o Hereme na valiina sa faaali mai ai koluse Eleni (swastikas)—o faailoga o le fanautama ma le ola. Sa iai le faatusa o Venus Genetrix, le atua fafine o le alofa faaleituaiga, faapea le faatusa o Dionysus lea e faaali mai ai le tele o koluse matagā. Ina ia faailogaina le “paia” o le agora, sa iai se maa tele na fai ma tuaoi, ma se pesini o loo iai i totonu vai “paia” mo le faamamāina o i latou uma e ulu atu i ai.

I le mātau atu i lena siomaga matuā mapolotu lava, e faigofie ai ona tatou malamalama i le mafuaaga na matuā lamatia ai le tulaga sa iai Paulo. Sa masalomia o ia faapea o “se folafola mai i atua ese,” ma na faamautinoa mai e le tulafono i lena vaitaimi faapea ‘e leai se tagata e tatau ona ia te ia so o se isi lava atua e ese mai, po o ni atua fou; e lē tatau foi ona ia tapuai faalilolilo atu i so o se atua ese vaganā ua faatagaina faalauaitele.’ E lētioa la, a aveina atu le aposetolo i le Areopako ina ia fesiligia ai.—Galuega 17:18, 19.

Le Nofoaga Tutotonu o Pulega

O le fale lapotopoto e taʻua o le Tholos o iina na faamautū ai le faauluuluga o le pulega a le malo o Atenai. O le toatele o taitaifono o le aai e momoe ai i lena fale i le po ina ia mautinoa o loo iai pea i taimi uma ni alii ofisa mo galuega. O se seti o fua faatulagaina sa teu iina i le Tholos. O fale mo isi matagaluega eseese o le pulega sa tutū latalata ane. Sa iai le Fale Fono i se āi i le vaega maupuepue i le itu i mātū i sisifo o le Tholos. O iina, e fai ai e sui o le Fono e toʻa 500 a latou fono lea e fai ai galuega faalekomiti ma sauniuni ai tulafono mo le Fono Faitulafono.

O le isi fale tāua mo mataupu a tagata lautele o le Faapaologa Tautupu. O iina e iai le ofisa o le Alii Sili po o le Faamasino Tāua o Atenai (Archon of Athens)—o se tasi mai alii sili po o faamasino tāua e toatolu o le aai. O iina e na te taulima mai ai le tele o tiute tau le pulega e fitoi tonu i mataupu faalelotu ma mataupu tau le tulafono. E matuā foliga mai lava, o iinei lea sa manaomia ona tulai ai Socrates ina ua molia o ia i ni amioga lē faaaloalo. O tulafono mai tuaa a Atenai sa vaneina i pa o le fale e faafesagai ma le fale o le alii tāua. I le maa lea e taatia i luma o le fale lava lena, e tutū ai alii sili tāua, po o faamasino autū, i tausaga taitasi ina ia fai a latou tautoga mo tofiga ua latou maua.

Le Faapaologa o Attalus

O le fale o loo sili ona lelei lona tausiaina mai pea o loo iai i le agora, o le Faapaologa o Attalus. A o avea ma alii talavou, sa aʻoga ai Attalus, le tupu o Perekamo (o le senituri lona lua T.L.M.), i aʻoga a Atenai, e pei ona sa aʻoʻoga ai isi fanau mai aiga tupu o atunuu o le Metitirani. Ina ua soloai ane la i lana nofoaiga, na ia faia atu ai lenei meaalofa matagofie—le Faapaologa o Attalus—mo le aai o lana aʻoga na aʻoga ai.

O le fuafuaga autū o le Faapaologa o Attalus ina ia saunia se mea matagofie e faamalumalu ma faapaolo ai tagata i taimi o faatasitasiga ma feofoofoaiga faasamasamanoa. O le fola ma le poletito sa mafai ona matuā avea o ni nofoaga lelei e iloa mai ai solo o sauniga, ae o lona taʻutaʻua i le tulaga o se mea e feofeoai ai tagata atonu na mautinoa ai foi le talafeagai e avea ma nofoaga autū e fai ai faatauga. Atonu sa ofo atu e le Setete faleoloa e totogi e le ʻau faipisinisi mo le faatauina atu ai o a latou oloa, ina ia avea lenei fale ma se auala e maua ai tupe a le malo.

Talu ai ua toe faafoisia lava i lona uluai fausaga na iai, ua avea ai le Faapaologa o Attalus ma faataitaiga sili ona lelei o se fausaga na fai i ni fua faakeometeri. O fua uma, o le matagofie o eseesega i fua i le va o le faatulagaina o le pito i lalo ma le pito i luga o potu uumi, le auala manaia ua malutia ai nisi mea ae malamalama isi mea, le anagatā ma le matagofie o meafaufale uma o loo fausia ai, o nei mea uma na faia ina ia tutasi ai lenei fausaga. E tele auala na faaaogā e faaitiitia ai le faatutusa o vaega uma o le fale, ae maise lava i le faaaogaina o ituaiga e tolu o teu i luga o potu tetele—le faa-Doric, le faa-Ionia, ma le faa-Aikupito.

Se Nofoaga e Fai ai Mea Faaleaganuu

O le fale na avea ma nofoaga e fai ai le tele o mea faaleaganuu i Atenai o le fale lea e fai ai Koniseti. O le fale na faimeaalofa ane ai Vipsanius Agrippa, le tane a le afafine o le emeperoa Roma, o Aokuso. O lona vaega pito i luma, le pulelaa, sa fola i maamora felanulanuai. O le faletaalo, lea na iai nofoaga e mafai ona nofoia e le tusa o le 1,000 tagata, sa tusa lona umī ma le 80 futu (tusa ma le 25 mita) ma sa atoina muamua i se taualuga e leai ni iviivi e lalago atu ai le pito i totonu. O se tasi lenei o faiga o taualuga na sili ona tulaga ese i na taimi anamua! Peitai ane, atonu o le tele o faafiafiaga sa faia iina sa ono fesiligia lo latou talafeagai mo Kerisiano moni ona o a latou tapulaa maualuluga tau amioga tatau.—Efeso 5:3-5.

E lē taumate, na asiasi atu tagata fiailoa anamua i le Faletusi o Pantainos. Sa soo uma ona puipui i pusatoso o iina na teu ai tusi taai tusilima sa faia mai i paʻulaau ma paʻumanu. O le potu autū o le faletusi sa faasaga i le itu i sisifo, ma i le va o pou tetele, e mafai ona iloa atu ai e se tasi le lotoā o le faapaologa—o se nofoaga manaia mo sāvalivaliga, e nofonofo ai ma faitau, pe mafaufau loloto ai foi. Na mauaina ni tusitusiga o nisi tulafono se lua o tulafono a le faletusi. O na tulafono e faapea: “E leai se tusi e tatau ona aveesea,” ma le “E tatala [le faletusi] mai le itula muamua seia oo i le itula lona ono.”

Le Agora i Aso Nei

I tausaga talu ai, na toetoe lava maeʻa ona eliina i luga le agora e se aʻoga mai Amerika o suesuega i mea faaanamua, le American School of Classical Studies. O loo iai pea i lalo ifo o le paolo o le fale maualugā tele o le Acropolis, ma ua avea ma nofoaga e sili ona fiafia i ai se turisi o lē e fia matamata puupuu i le talafaasolopito o Atenai anamua.

O le maketi tele o oloa eseese o loo latalata ane, le Monastiraki Flea Market—e na o sina savalivali teisi mai lava i le agora ma le Acropolis—o se laasaga e tau atu ai i se isi lalolagi sili ona mataina. O iina e faateʻia, ae fiafia ai le tagata asiasi e matauina aganuu o le atamai faa-Eleni ma gaoioiga pei ni pasā a tagata Asia mai Sasaʻe Tutotonu, ma fefaatauaiga e mafai ona faapaʻū le tau o oloa. Ma o le mea moni, o le a vaaia ai iina e le tagata asiasi Molimau a Ieova o loo latou faia ma le olioli le mea tonu lava lea na fai e le aposetolo o Paulo i le silia ma le 1,900 tausaga ua mavae—le talaʻiina atu i le lautele o le tala lelei o le Malo ‘i ē latou te feiloai.’

[Faaopoopoga i lalo]

[Pusa i le itulau 28]

Faiga Faapisinisi i Atenai

O le agora sa lē gata o le ogatotonu lea o gaoioigafai uma a tagata atamamai ma tagata lautele o Atenai, ae sa avea foi o le maketi autū lea o le aai. Na oo ina avea Atenai ma ogatotonu o faiga faapisinisi, e taʻutaʻua ona o le tumau o le tupe, ma le faimea saʻo o ona alii sili po o faamasino tāua, o ē sa iai le aiā latou te faamautinoa ai o loo faia ma le faamaoni ma le saʻo fefaatauaiga uma faapisinisi.

Sa avea ma oloa e laʻu i fafo a Atenai le uaina, le suauu olive, le meli, le maamora, ma isi mea e pei o oloa e faia mai le eleele ma uamea sa gaosia. Ae sa tele ina latou maua mai ai le saito. Talu ai sa lei lava meaʻai na mauaina mai Attica (o le vaipanoa e latalata ane i Atenai) e fafaga ai ona tagata, na faamamafa ai lava tapulaa o fefaatauaiga faapisinisi. Sa tatau i le maketi i Piraeus (le taulaga o Atenai) ona lava ma totoe i taimi uma le sapalai o meaʻai fou e faatauina atu e lē gata mo tagata o le aai, ae mo fitafita foi o le vaegaʻau. Ma sa lē faatagaina le ʻau faatauoloa, e faaputu ese nisi oloa e faatau atu i ni tau taugata i taimi e utiuti ai na oloa.