Ieova—Le Puna o le Faamasinotonu ma le Amiotonu
“O le Papa, e lelei atoatoa lana galuega, auā e faamasinotonu ona ala uma lava. O le Atua o le faamaoni, e lē o ia te ia se lē faamasinotonu.”—TEUTERONOME 32:4, NW.
1. Aisea ua ia i tatou ai se manaoga faalenatura mo le faamasinotonu?
E PEI lava ona iai i tagata uma se manaoga faalenatura mo le alofa, ua faapena foi ona tatou faanaunau uma ina ia faatino mai le faamasinotonu ia i tatou. E pei ona tusi le fofoga o le malo o Amerika o Thomas Jefferson, “o le [faamasinotonu] o se uiga e faalenatura ma na tupuga mai ma le tagata, . . . o se vaega e matuā tāua i lo tatou fausaga e pei lava ona tāua le lagona, le vaai, po o le faalogo.” E lē o se manatu e faateʻia ai, auā na foafoaina i tatou e Ieova i lona lava faatusa. (Kenese 1:26) O le mea moni, na ia tuuina mai ia i tatou uiga o loo atagia mai ai lona lava peresona, o se tasi o na uiga o le faamasinotonu. O le pogai lena ua iai ia i tatou se manaoga mo le faamasinotonu ma o le pogai foi lea ua tatou faanaunau ai e ola i se lalolagi e iai le faamasinotonu ma le amiotonu.
2. O le ā le tāua o le faamasinotonu ia Ieova, ma aisea e manaomia ai ona tatou malamalama i le uiga o le faamasinogatonu tauatua?
2 E faatatau ia Ieova, ua faamautinoa mai le Tusi Paia ia i tatou: “E [faamasino]tonu ona ala uma lava.” (Teuteronome 32:4) Peitai i se lalolagi ua pagatia i le lē faamasinotonu, e lē faigofie ai ona malamalama i le uiga o le faamasinogatonu tauatua. Peitai ane, e ala mai i itulau o le Afioga a le Atua, ua mafai ona tatou malamalama i le auala e faatino ai e le Atua le faamasinotonu, ma oo ai ina tatou atili talisapaia isi uiga ofoofogia o le Atua. (Roma 11:33) E tāua le malamalama i le uiga o le faamasinotonu mai le vaaiga a le Tusi Paia auā e ono taaʻina ai lo tatou faauigaina o le faamasinotonu i manatu faaletagata. I le vaaiga a tagata, e ono manatu i le faamasinotonu ua na o le faatatauina ma le lē faaituʻau o le tulafono. Pe, e pei ona tusi mai se faifilosofia o Francis Bacon, “o le faamasinotonu o le avatua lea i tagata uma o mea ua tatau ona latou maua.” Peitai ane, o le faamasinotonu a Ieova e tele atu isi mea e aofia ai.
E Faamafanafanaloto le Faamasinotonu a Ieova
3. O le ā e mafai ona iloa mai le iloiloina o upu o le uluai gagana ia o loo faaaogā i le Tusi Paia mo le faamasinotonu ma le amiotonu?
3 O le loloto ma le lautele o le faamasinotonu a Ieova e mafai ona malamalama lelei i ai pe a iloiloina le auala o loo faaaogā ai i le Tusi Paia upu o le uluai gagana.a O le mea mataina, i le Tusi Paia, e leai se eseesega matilatila o le faamasinotonu ma le amiotonu. O le mea moni, i nisi taimi e faaaogā faatasi ai nei upu faa-Eperu, e pei ona tatou matauina i le Amosa 5:24, lea o loo augani atu ai Ieova i lona nuu: “Ia tafe ifo le faamasinoga[tonu] e pei o vai, ma le amiotonu e pei o le vai e tafe tetele lava.” E lē gata i lea, e tele taimi o loo aliali faatasi mai ai upu o le “faamasinoga[tonu] ma le amiotonu” mo le faamamafaga o se manatu.—Salamo 33:5; Isaia 33:5; Ieremia 33:15; Esekielu 18:21; 45:9.
4. O le ā le uiga o le faatinoina o le faamasinotonu, ma o le ā le faatulagaga sili o le faamasinotonu?
4 O le ā le uiga o loo maua mai e nei upu Eperu ma le Eleni? O le faatinoina o le faamasinotonu e tusa ai ma le manatu a le Tusi Paia e uiga lea i le faia o le mea saʻo ma tonu. Talu ai o Ieova o ia lē ua faavaeina tulafono ma mataupu silisili mo amioga tatau, po o mea e saʻo ma fetaui, o le auala la o loo taulimaina ai e Ieova mea o le faatulagaga sili lea o le faamasinotonu. Ua faamatala e le Theological Wordbook of the Old Testament e faapea, o le upu Eperu o loo faauiga i le amiotonu (tseʹdheq) “e faasino i se tulaga o amioga e taliaina ma e tatau, ma o le mea moni i le F[eagaiga] T[uai] o loo faasino atu ai lena tulaga i le uiga ma le finagalo o le Atua.” O lea, o le auala o loo faatatauina ai e le Atua ana mataupu silisili, ae maise i le auala o loo ia feutagai ai ma tagata lē lelei atoatoa, ua faaalia mai ai le uiga moni o le faamasinotonu ma le amiotonu.
5. O ā uiga e felatai vavalalata ma le faamasinotonu a le Atua?
5 Ua faaalia manino e le Tusi Paia faapea e faamafanafanaloto le faamasinotonu a le Atua, ae lē faatiga ma lē alofa. Na pese Tavita: “E fiafia [alofa] Ieova i le faamasinoga[tonu], na te le tuua foi ona tagata amio Atua.” (Salamo 37:28) O le faamasinotonu o le Atua e uunaia ai o ia e faaalia le faamaoni ma le alofa mutimutivale i ana auauna. E uaʻi mai le faamasinogatonu tauatua i o tatou manaoga ma faapalepale i o tatou vaivaiga. (Salamo 103:14) E lē o le uiga o lena mea faapea e faataga pea e le Atua le amioleaga, auā o le faia faapea o le a faateteleina ai le lē faamasinotonu. (1 Samuelu 3:12, 13; Failauga 8:11) Na faamatala e Ieova ia Mose faapea o Ia e “alofa mutimutivale ma le alofa fua, e telegese lona toasa, a e tele le alofa ma le faamaoni.” E ui i sona naunau e faamagalo i sese ma agasala, ae o le a lē taofia e le Atua le faasalaga mai ia i latou ua tatau i ai.—Esoto 34:6, 7.
6. E faapefea ona feutagai Ieova ma lana fanau o loo i le lalolagi?
6 Pe a tatou mafaufau loloto i le auala o loo faaalia ai e Ieova le faamasinotonu, e lē tatau la ona tatou manatu ia te ia o se faamasino sauā, e na o le faasalaina lava o ē fai mea sese o loo uaʻi mai i ai. Nai lo lea, e tatau ona tatou mafaufau ia te ia o se tamā e alofa ae maumauai foi, e feutagai pea ma lana fanau i se auala e sili ona lelei na te mafaia. Na faapea mai le perofeta o Isaia: “Ieova e, o oe lava lo matou Tamā.” (Isaia 64:8) Ona o se Tamā e tonu ma amiotonu, e faapaleni ai e Ieova lona maumauai mo le mea saʻo ma lona alofa mutimutivale i lana fanau o loo i le lalolagi, o ē o loo manaomia se fesoasoani po o se faamagaloga ona o tulaga faigata o latou fesagai pe ona o vaivaiga o le tino.—Salamo 103:6, 10, 13.
Le Faamaninoina o le Uiga o le Faamasinotonu
7. (a) O le ā tatou te aʻoaʻoina mai le valoaga a Isaia e faatatau i le faamasinogatonu tauatua? (e) O le ā le matafaioi sa ia Iesu i le aʻoaʻoina atu o le faamasinotonu i nuu ese?
7 O le tulaga agaalofa o le faamasinotonu a Ieova sa faamatilatila i le afio mai o le Mesia. Na aʻoaʻo atu e Iesu le faamasinogatonu tauatua ma ia ola aʻe e tusa ai, e pei ona valoia e le perofeta o Isaia. E manino lava, o le faamasinotonu a le Atua e aofia ai le feutagai i se uiga faapelepele ma tagata o loo puapuagatia. Ona lē oo ai lea o i latou i se tulaga ua matuā pagatia ua lē mafai ai ona toe faaleleia lo latou tulaga. Na afio mai Iesu, le “auauna” a Ieova i le lalolagi ina ia “faailoa atu . . . i nuu ese” lenei vala o le faamasinotonu a le Atua. I mea uma lava, na ia faia ai faapea, e ala i le faataatia mai ia i tatou o se faaaoaoga ola o le uiga o le faamasinogatonu tauatua. Ona o ia o le “La laau amiotonu” a le tupu o Tavita, na naunautai ai Iesu e ‘saili le faamasinotonu ma tausisi i le amiotonu.’—Isaia 16:5; 42:1-4; Mataio 12:18-21; Ieremia 33:14, 15.
8. Aisea na lē manino ai le uiga o le faamasinotonu ma le amiotonu i le uluai senituri?
8 O lena faamaninoina o le uiga moni o le faamasinotonu a Ieova sa sili ona talafeagai i le uluai senituri T.A. O tane matutua o Iutaia ma taʻitaʻi lotu—le ʻau tusiupu, le ʻau Faresaio, ma isi—na latou folafola ma faataitaia se vaaiga sese o le faamasinotonu ma le amiotonu. O le iuga, o tagata lautele ia sa faigata ia i latou ona tausisia poloaiga na faataatitia e le ʻau tusiupu ma le ʻau Faresaio, e foliga mai sa latou manatu e lē mafai ona latou maua le amiotonu a le Atua. (Mataio 23:4; Luka 11:46) Na faaalia e Iesu le lē saʻo o lena manatu. Na ia filifilia ona soo mai nei tagata lautele, ma na ia aʻoaʻo atu ia i latou tapulaa amiotonu a le Atua.—Mataio 9:36; 11:28-30.
9, 10. (a) Na faapefea ona saili le ʻau tusiupu ma le ʻau Faresaio e faaalia la latou amiotonu? (e) Na faapefea ma aisea na faaalia ai e Iesu le leai o se aogā o mea na faia e le ʻau tusiupu ma le ʻau Faresaio?
9 Ae i le isi itu, sa saili le ʻau Faresaio i avanoa e faaalialia ai la latou “amiotonu” e ala i le tatalo po o le faia o ni foai faaaliali i le lautele. (Mataio 6:1-6) Na latou taumafai foi e faaalia la latou amiotonu e ala i le usitaia o le anoanoai o tulafono ma poloaiga—o le tele o na mea sa fafau aʻe lava e i latou. O na taumafaiga na oo ai ina latou “tuua . . . le faamasinoga[tonu] ma le alofa i le Atua.” (Luka 11:42) I le vaaiga mai fafo atonu sa latou foliga amiotonu mai, peitai i totonu na ‘tumu i latou i le amioleaga,’ po o le amioletonu. (Mataio 23:28) Pe a faafaigofie le manatu, sa itiiti lava so latou iloaina o le amiotonu a le Atua.
10 Ona o lena mafuaaga, na lapataia ai e Iesu ona soo: “A le sili la outou amiotonu i la le au tusiupu ma le au faresaio, e le sao atu lava outou i le malo o le lagi.” (Mataio 5:20) O le eseese tele o le faamasinogatonu tauatua na faataitaia mai e Iesu, ma le faafiaamiotonu faamaualuluga a le ʻau tusiupu ma le ʻau Faresaio, o le pogai lena o a latou fefinauaiga faifai pea.
Eseesega i le Va o le Faamasinogatonu Tauatua ma Faamasinoga Sese
11. (a) Aisea na fesiligia ai e le ʻau Faresaio Iesu e faatatau i le faia o faamalologa i le Sapati? (e) O le ā na faaalia i le tali a Iesu?
11 A o faagasolo lana faiva i Kalilaia i le tau e totogo ai mea o le tausaga e 31 T.A., na silafia atu ai e Iesu i totonu o le sunako se tagata ua gase lona lima. Talu ai o le Sapati, na fesili ai le ʻau Faresaio ia Iesu: “E tatau ea ona faamalolo i le sapati?” Nai lo le iai o ni lagona alofa moni mo le mafatiaga o si nei tagata mativa, ae o lo latou faanaunauga ia saili se tulafono e taʻusalaina ai Iesu, e pei ona faaalia i la latou fesili. E lētioa ona tiga le finagalo o Iesu i o latou loto ina a maaa! Ona ia fesili saʻo atu lea i le ʻau Faresaio i se fesili e talitutusa: “Pe sa ea le agalelei i le sapati?” Ina ua latou na ona faalologo, ona toe tali lea e Iesu lana lava fesili e ala i le fesiligia o i latou pe o le a latou lē laveaia ea se mamoe ua paʻū i le lua i le Sapati.b “E le sili lava ea le tagata i le mamoe?” na fetalai atu ai Iesu, ma le talafeagai lelei. “O lea e tatau ai [po o, le mea saʻo] ona agalelei i le sapati,” na ia faaiu atu ai. O le faamasinotonu a le Atua e lē tatau lava ona saisaitia mai i uputuu a tagata. Ina ua uma ona faamanino atu lena manatu, ona faamalolo ai lea e Iesu le lima o le tagata.—Mataio 12:9-13; Mareko 3:1-5.
12, 13. (a) I le eseesega ma le ʻau tusiupu ma le ʻau Faresaio, na faapefea ona faaalia e Iesu lona naunau e fesoasoani i ē agasala? (e) O le ā le eseesega o le faamasinogatonu tauatua ma le faafiaamiotonu?
12 Pe afai sa lē manatu mamafa le ʻau Faresaio ia i latou na iai tulaga faaletonu i o latou tino, na sili atu ai la ona latou lē manatu mamafa mo i latou sa matitiva faaleagaga. O la latou vaaiga sese i le amiotonu na oo ai ina latou lē amanaia ma ʻinoʻino i tagata ao lafoga ma tagata agasala. (Ioane 7:49) E ui i lea, e toatele tagata faapena na latou talia aʻoaʻoga a Iesu, e lē taumate sa logo i o latou tino lona faanaunauga e fesoasoani atu nai lo le avatu o se faamasinoga. (Mataio 21:31; Luka 15:1) Peitai ane, sa manatu faatauvaa le ʻau Faresaio i taumafaiga a Iesu e faamalolo ē ua mamaʻi faaleagaga. Na latou muimui ma le ʻinoʻino: “Ua talia e lenei tagata o e agasala, ua aai faatasi foi o ia ma i latou.” (Luka 15:2) I le tali atu i la latou tuuaʻiga, na toe faaaogā ai e Iesu se talafaatusa i tulaga faatausimanu. E pei ona olioli se leoleomamoe ina ua ia toe maua lana mamoe na leiloa, e faapena foi ona olioli agelu i le lagi pe a salamō se tagata agasala. (Luka 15:3-7) Na olioli Iesu lava ia ina ua mafai ona ia fesoasoani ia Sakaio e salamō mai ona ala agasala sa muai iai. Na ia fetalai: “Ua sau le Atalii o le tagata e saili ma faaola i le na le iloa.”—Luka 19:8-10.
13 O nei fetaliaiga ua faaalia manino mai ai le eseesega maʻoti o le faamasinogatonu tauatua, lea e saili e faamalolo ma laveai, ma le faafiaamiotonu, lea e saili e faasilisilia na o ni nai tagata ae faasalaina uma le toatele. O tū lē aogā ma uputuu na faia e tagata na oo ai ina faamaualuluga ma manatu faapito le ʻau tusiupu ma le ʻau Faresaio, peitai sa lelei ona faasino atu e Iesu faapea sa latou “tuu . . . o mea silisili o i le tulafono, o le amiotonu, ma le alofa, ma le faamaoni.” (Mataio 23:23) Tau ina ia tatou faataitai ia Iesu i le faaalia o le faamasinotonu i mea uma tatou te fai ma ia faaeteete foi i le mailei o le faafiaamiotonu.
14. Ua faapefea i se tasi o vavega na faia e Iesu ona faataitaia mai ai e amanaia e le faamasinogatonu tauatua tulaga o loo iai se tagata?
14 A o faaleaogaina e Iesu tulafono sa faia e le ʻau Faresaio, sa ia tausia pea le Tulafono Faa-Mose. (Mataio 5:17, 18) I le faia faapea, na ia lei faatagaina ai le soona faamamafaina o le uiga o lena Tulafono amiotonu e puleaina ona mataupu silisili. Ina ua paʻi mai i lona ofutele ma mālōlō ai se fafine sa mafatia i le puna toto mo le 12 tausaga, na fetalai atu Iesu ia te ia: “Loʻu afafine e, o lou faatuatua ua e malolo ai; ina alu ia oe ma le manuia.” (Luka 8:43-48) O upu tigaalofa a Iesu sa faamautinoa ai o le faamasinotonu a le Atua na amanaia ai le tulaga sa iai le fafine. E ui sa lē mamā o ia e tusa ai ma le tulaga faalesauniga ma o le mea moni o lea sa ia solia ai le Tulafono Faa-Mose i lona auai mai faatasi ma le motu o tagata, peitai sa tatau ona tauia lona faatuatua.—Levitiko 15:25-27; faatusatusa i le Roma 9:30-33.
Le Amiotonu e mo Tagata Uma
15, 16. (a) O le ā ua aʻoaʻoina mai ia i tatou e uiga i le faamasinotonu e le talafaatusa a Iesu i le tuaoi Samaria agalelei? (e) Aisea e tatau ai ona tatou alofia le fia “amiotonu naua”?
15 E lē gata i le faamamafaina o le tulaga agaalofa, ae sa aʻoaʻo foi e Iesu ona soo faapea e tatau ona faaaofia ai tagata uma i lena faamasinogatonu tauatua. O le finagalo o Ieova mo ia ina ia ‘avatua le faamasinotonu i nuu ese.’ (Isaia 42:1) O le manatu autū lena o se tasi o talafaatusa sili ona taʻutaʻua a Iesu, i le tuaoi Samaria agalelei. O le talafaatusa na ia tali atu ai i se fesili na lāgā mai e se tagata sa aʻoaʻoina le Tulafono o lē sa “faafiatonu o ia.” “O ai foi le tagata ma te tuaoi?” o lana fesili lea, e mautinoa sa iai lona manaoga e gata mai ona tiute tauave faaletuaoi i tagata Iutaia. Na faaalia e le tagata Samaria i le talafaatusa a Iesu le amiotonu faale-Atua, auā sa naunau o ia e faaalu lona taimi ma ana tupe e fesoasoani atu i se tagata ese mai se tasi nuu. Na faaiu mai e Iesu lana talafaatusa e ala i le fautuaina o lē na fesili: “Ia e faapea ona fai.” (Luka 10:25-37) Pe afai e faapena foi ona tatou faia mea lelei i tagata uma e tusa lava po o le ā lo latou lanu po o talaaga e tupuga mai ai, o le a tatou faataitaia ai le faamasinotonu a le Atua.—Galuega 10:34, 35.
16 Ae i le isi itu, o le faaaoaoga a le ʻau tusiupu ma le ʻau Faresaio, ua faamanatu mai ai ia i tatou faapea pe afai tatou te fia faaalia le faamasinogatonu tauatua, e lē tatau la ona tatou fia “amiotonu naua.” (Failauga 7:16) O le saili e faaofo isi e ala i ni faaaliga faalialiavale o le amiotonu po o le soona faatāuaina o tulafono a tagata, o le a tatou lē maua ai le finagalo malie o le Atua.—Mataio 6:1.
17. Aisea e tāua tele ai mo i tatou ona faaalia le faamasinotonu faale-Atua?
17 O se tasi o mafuaaga na faamanino atu ai e Iesu i nuu ese le uiga moni o le faamasinotonu a le Atua, ina ia mafai ai e ona soo uma ona faaalia lenei uiga. Aisea e tāua tele ai lenei mea? Ua timai mai le Tusi Paia ia i tatou ina ia ‘faaaʻoaʻo i le Atua,’ ma o ala uma o le Atua e faamasinotonu. (Efeso 5:1) E faapena foi i le Mika 6:8 ua faamatala mai ai faapea, o se tasi o mea e faafinagaloina e Ieova o le tatau lea ona tatou ‘fai le faamasinotonu’ a o tatou savavali faatasi ma lo tatou Atua. E lē gata i lea, ua faamanatu mai e le Sefanaia 2:2, 3 ia i tatou e faapea, pe afai tatou te fia lilo i le aso o le toasa o Ieova, e tatau ona tatou “saili le amiotonu” a o lei oo mai lena aso.
18. O ā fesili o le a taliina e le mataupu o loo sosoo mai?
18 O nei la aso e gata ai o aso faigata, o se ‘taimi sili ona talileleia’ e faaalia ai le faamasinotonu. (2 Korinito 6:2) E mafai ona tatou mautinoa, pe a pei i tatou o Iopu, i le avea o le ‘amiotonu ma o tatou ofu’ ma le ‘faamasinotonu e fai ma o tatou ofu talaloa,’ o le a faamanuia Ieova ia i tatou. (Iopu 29:14) O le a faapefea e le faatuatua atu i le faamasinotonu a Ieova ona fesoasoani ia i tatou e vaai atu ma le mautinoa i le lumanai? E lē gata i lea, a o tatou faatalitalia le “lalolagi fou” amiotonu, e faapefea e le faamasinotonu a le Atua ona puipuia i tatou faaleagaga? (2 Peteru 3:13) O le a taliina e le mataupu o loo sosoo mai nei fesili.
[Faaopoopoga i lalo]
a I Tusitusiga Eperu, e tolu upu autū o loo faaaogā. O se tasi o nei upu o le (mish·patʹ) e masani ona faaliliu i le “faamasinotonu.” O isi upu e lua o le (tseʹdheq ma le upu e fesootai atu i ai o le tsedha·qahʹ) o loo faasino atu i le tele o taimi i le “amiotonu.” O le upu Eleni ua faaliliuina mo le “amiotonu” (di·kai·o·syʹne) ua faamatalaina faapea o le “uiga o le faia o le mea saʻo po o le mea tonu.”
b Sa lelei ona filifilia le faaaoaoga a Iesu auā sa faatagaina faapitoa e le tulafono tuugutu a Iutaia i latou e fesoasoani atu i se manu e puapuagatia i le Sapati. I nisi taimi, sa iai ni feteenaiga i lenei lava mataupu, e faatatau lea, i le pe talafeagai ma le tulafono ona faia se faamalologa i le Sapati.—Luka 13:10-17; 14:1-6; Ioane 9:13-16.
E Mafai Ona E Faamatalaina?
◻ O le ā le uiga o le faamasinogatonu tauatua?
◻ Na faapefea ona aʻoaʻo atu e Iesu le faamasinotonu i nuu ese?
◻ Aisea na sese ai le amiotonu a le ʻau Faresaio?
◻ Aisea tatou te manaomia ai ona faaalia le faamasinotonu?
[Ata i le itulau 8]
Na faamanino mai e Iesu le loloto ma le lautele o le faamasinogatonu tauatua