Le Itu Po ua Faanatinati Ona Ala Ai!

“IA AUA le faatalale i le vaitaimi lenei ua tatou ola ai; ua oo i le itu po ua faanatinati ona ala ai mai le momoe.” (Roma 13:11, Knox) Na tusia e le aposetolo o Paulo na upu i Kerisiano i Roma pe tusa e 14 tausaga a o lei oo i le iuga matautia o le faiga o mea faa-Iutaia i le 70 T.A. Ona sa mataala i latou faaleagaga, na lei iai ai Kerisiano Iutaia i Ierusalema i le taimi tonu o le mala ma o lea na faasaoina ai i latou mai le oti po o le faapagotaina. Ae na faapefea ona latou iloa sa manaomia ona latou ō ese ma lē tatau ona toe ulu atu i le aai?

Na lapataia e Iesu Keriso o le a siosiomia e fili ia Ierusalema ma o le a olopalaina ē o loo nonofo ai. (Luka 19:43, 44) Ona mulimuli ane lea avatu e Iesu i ona soo faamaoni se faailoga e tele ni ona vala sa lei faigata ona iloaina. (Luka 21:7-24) Mo Kerisiano na ola i Ierusalema, o le tuua o le aai o lona uiga o le tuua lea o o latou aiga ma galuega. E ui i lea, o lo latou mataala ma sosola ese na faasaoina ai o latou ola.

Ina ua valoia e Iesu le faaumatiaga o Ierusalema, na fesili atu ona soo: “Pe oo afea ia mea? Pe se a foi le faailoga o lou faatasi mai ma le vaitaimi faaiuiu o lenei faiga o mea?” (Mataio 24:3, NW) I lana tali atu, na faatusatusa ai e Iesu lona faatasi mai i le lumanai ma le vaitaimi a o agai atu i le Lolo i le lalolagi aoao i aso o Noa. Na faasino e Iesu faapea na aveesea e le Lolo tagata amioleaga uma lava. (Mataio 24:21, 37-39) Na ia faailoaina ai e faapea o le a faalaa mai foi faapea le Atua i mataupu fai a tagata. I le ā le tele? Ia, i le tulaga o le a matuā aveeseina atoatoa ai le lalolagi leaga, po o le faiga o mea! (Faatusatusa i le 2 Peteru 3:5, 6.) Pe e mafai ona tupu lena mea i o tatou taimi?

Po o Tumau Lava Mea Pei Ona Masani Ai?

E toaitiiti ni tagata Iutaia o le uluai senituri na mafaufau o le a faaumatia lo latou aai paia o Ierusalema. O le lē talitonu faapena o loo iai pea i manatu o tagata o ē o nonofo i talane o se mauga mu peitai latou te lei vaai lava i se mauga o pa aʻe. Pe a taʻu atu lapataiga e masani ona faapea le tali mai, “E lē tupu lava lena mea i loʻu taimi.” Ua faamatala mai e Lionel Wilson o se tagata suesue i mauga mu faapea: “E masani lava pe tailua po o le taitolu senituri ma pa aʻe mauga mu. E te popole pe afai o le a siitia ou mātua i se isi nofoaga ona o le pa aʻe o se mauga mu. Ae afai na tupu i mātua o ou mātua, o lona uiga e faalētāua tele.”

Peitai, o faamatalaga saʻo e mafai ona tatou iloa ai faailoaga o le tulaga lamatia ma manatu mamafa i ai. O i latou na sosola ese mai le mauga o Pelée, sa iai se tasi na masani lelei ma mauga mu ma malamalama i faailoilo o le tulaga lamatia. O faailoga foi faapena na saʻo lelei lona faauigaina a o toeitiiti lava pa le mauga o Pinatubo. O ē suesue i mauga mu ia na faailoaina atu malosiaga lē vaaia na tutupu aʻe i totonu o le mauga na latou faatalitonuina tagata o nonofo ai ina ia tuua lea nofoaga.

E moni, o nisi o le a lē amanaiaina pea faailoga o le lamatiaga ma maumauai faapea o le a leai lava se mea e tupu. Latou te ono tauemua foi i latou o loo faia ni gaoioiga mautinoa. Na valoia e le aposetolo o Peteru o le a taatele i o tatou aso lea ituaiga o vaaiga. Na ia faapea mai: “Ua muamua ona iloa o lenei mea, e o mai i ona aso e gata ai o e tauemu, latou te savavali e tusa ma o latou lava tuʻinanau; e faapea mai, Ofea nei le folafolaga o lona afio mai? auā talu ona momoe o le augātamā, ua tutumau pea o mea uma pei ona faatoa faia.”—2 Peteru 3:3, 4.

Po o e talitonu ea ua tatou iai i “aso e gata ai”? I le tusi The Columbia History of the World, ua fesili ai John A. Garraty ma Peter Gay faapea: “Po o tatou vaaia ea le paʻū maulalo ua iai lo tatou soifuaga?” Ona suesueina lea e ia tusitala o talafaasolopito ia faafitauli o malo, le oso aʻe o soligatulafono i le lalolagi aoao ma le lē usiusitai o tagatanuu, le malepe o le olaga faaleaiga, le lē taulau o le faasaienisi ma sailiiliga o le poto auiluma ina ia foia faafitauli o tagata, le lē faatuatuaina o ē o fai ma taiulu, ma le matuā leaga o tulaga tau amio mamā ma lotu i le lalolagi atoa. Na la faaiu mai faapea: “Afai e lē o faailoga nei o se iuga moni lava, e mautinoa le foliga mai o faailoga lava ia o se iuga.”

O loo iai mafuaaga mautinoa tatou te talitonu ai o loo iai se “iuga” ua matuā lalata tele mai. Leai, e lē tatau ona tatou matatau i se iuga o le lalolagi laueleele, auā ua fai mai le Tusi Paia o le Atua “na faavaeina le lalolagi i luga o ona lava faavae, ina ia le gaee e faavavau faavavau lava.” (Salamo 104:5) Peitai, tatou te faatalitalia se iuga vave mo le faiga amioleaga o mea lea ua faapogaia le mafatia tele ai o tagata. Aisea? Talu ai ua mafai ona tatou vaaia ma le manino le tele o vala e fai ma faamaoniga e iloa ai aso mulimuli o lenei faiga o mea, e pei ona sa taʻua mai e Iesu Keriso. (Tagai i le pusa “Nisi Vala o Aso e Gata Ai.”) Aisea e lē faatusatusa ai upu a Iesu ma mea o loo tutupu i le lalolagi? O le faia faapea o le a fesoasoani ai ia te oe ia faia ni filifiliga poto mo oe lava atoa ma lou aiga. Ae aisea e tatau ona gaoioi ai loa i le taimi nei?

O Loo Iai se Manaoga Moni Ina ia Mataala Pea

E ui ina atonu e iloa e saienitisi le taimi e latalata ona pa aʻe ai se mauga mu, ae lē mafai ona latou taʻu saʻo maia le taimi tonu e tupu ai. E faapena foi e faatatau i le iuga o lenei faiga o mea, na fetalai Iesu: “A o lea aso ma lea itu aso e le iloa e se tasi, e le iloa lava e agelu i le lagi, e le iloa foi e le Atalii, ua na o le Tamā lava.” (Mataio 24:36) Talu ai tatou te lē iloa le taimi tonu o le a iu ai le faiga o mea o loo iai nei, ae na aumaia e Iesu le lapataiga lenei: “Ia outou iloa lenei mea, ana iloa e le matai o le aiga po o le fea itu po e sau ai le gaoi, po ua na leoleoina, a e le tuua e ia lona fale ia elia. O le mea lea ia outou nofo sauni ai; auā o le itu aso tou te le manatunatu ai, e sau ai le Atalii o le tagata [o Iesu].”—Mataio 24:43, 44.

Ua faaalia i upu a Iesu o le iuga matautia o lenei faiga o mea o le a oo mai i lenei lalolagi e faafuasei lava. E tusa lava po o i tatou o ona soo, e manaomia ona ‘faamaonia ua tatou sauni.’ O lo tatou tulaga e tai pei o se tagata o le aiga e puea faafuasei ona na te lei iloa le taimi e osofai atu ai le gaoi i lona fale.

I se uiga tutusa foi faapena, na fai atu ai le aposetolo o Paulo i Kerisiano i Tesalonia: “Ua outou iloa lelei lava, o le aso o le Alii e pei o le gaoi i le po. . . . Le au uso e, tou te le o i le pouliuli, ia maua mai ai outou e lena aso, pei o se gaoi.” Na faalaeiau atu Paulo: “Aua neʻi tatou momoe ai faapei o isi, a ia tatou mataala, ma ia faautauta.” (1 Tesalonia 5:2, 4, 6, faamatalaga i lalo o le NW) O le ā le uiga ia “mataala, ma ia faautauta”?

I le lē pei o le solaaga a Kerisiano o le uluai senituri mai Ierusalema, o la tatou solaaga e lē aofia ai le ō ese mai se aai patino. Ina ua uma ona timai atu i ona uso talitonu i Roma ina ia ala mai le momoe, ona uunaia lea o i latou e Paulo ina ia “faatea ese ai galuega o le pogisa,” a ia “oofu i le Alii o Iesu Keriso.” (Roma 13:12, 14) E ala i le mulimulitui atu i tulagaaao o Iesu, o le a tatou faaalia atu ai lo tatou mataala i tulaga ua iai taimi, ma o le a faafaigofie ai e lea mataala faaleagaga mo i tatou ona maua le puipuiga a le Atua pe a faaiuina le faiga o mea amioleaga o iai nei.—1 Peteru 2:21.

O i latou o loo mulimuli atu ia Iesu Keriso o loo olioli i olaga uigā ma faamalieina. O le faitau miliona o Molimau a Ieova ua latou iloaina o le avega lea o le faia ma soo Kerisiano o se galuega alofa ma faafouina ai. (Mataio 11:29, 30, faamatalaga i lalo o le NW) O le laasaga muamua lava i le avea o se soo o le ‘aveina i fale o le poto e uiga i le Atua ma lē na ia auina mai, o Iesu Keriso.’ (Ioane 17:3) O loo asiasi atu Molimau i le faitau miliona o aiga i vaiaso taitasi ina ia fesoasoani i tagata ia maua “le poto saʻo o le upu moni.” (1 Timoteo 2:4, NW) E latou te fiafia tele e faia fua suesuega faale-Tusi Paia ma oe i lou aiga. Ma a o tupu aʻe lou poto i le Afioga a le Atua, e leai se faaletonu o lou talitonuina o le tulaga ese ua iai o tatou aso. O le mea moni, o le itu po faanatinati lenei e ao ona ala ai mai le moe!

[Pusa/Ata i le itulau 7]

NISI VALA O ASO E GATA AI

“E sii le taua e le tasi nuu i le tasi nuu”; ʻo le a aveeseina le filemu mai le lalolagi.’ (Mataio 24:7; Faaaliga 6:4)

O taua e lua a le lalolagi o lenei senituri, faatasi ai ma le tele o isi fetauaiga, ua aveesea ai le filemu mai le lalolagi. “O le Muamua—ma mulimuli ane ai le Lona Lua—o Taua a le Lalolagi na tulaga ese mai taua uma lava na tauina muamua atu,” ua tusi mai ai le tusitala o talafaasolopito o John Keegan, “e ese i le fua i le telē, i lona malosi, lona tulaga lautele ma tulaga i mea ma tagata na leiloloa ai. . . . Na faaumatia e Taua a le Lalolagi le toatele o tagata, leiloa ai le tele o le ʻoa ma faapogaia le tele o puapuaga e lei faapea ona faatupuina e se isi taua muamua atu i luga o se vaega tele o le lalolagi.” Ua sili atu ona faapuapuagatiaina e taua i le taimi nei fafine ma tamaiti na i lo fitafita. Ua suesueina e le UNICEF e faapea i le sefulu tausaga ua mavae, e lua miliona tamaiti na fasiotia ai i taua.

“Oge” (Mataio 24:7; Faaaliga 6:5, 6, 8)

I le 1996 na matuā oso vave aʻe ai i luga tau o le saito ma le sana Initia. O le ā le mafuaaga? O sapalai na teu faaagaga o ia meaʻai (cereals) i le lalolagi ua paʻū maulalo i le na o le 50 aso e mafai ona gafatia ai ona uma lea, o se fua sili ona maulalo i faamaumauga. O le siitaga o tau o meataumafa autū o lona uiga o le a faamativaina ai le faitau selau miliona o tagata i le lalolagi—o le toatele o i latou o tamaiti—e momoe fia aai.

“Mafuie i lea mea ma lea mea” (Mataio 24:7)

A o faagasolo le 2,500 tausaga ua mavae, e na o le iva mafuie na faaumatia ai le silia i le 100,000 tagata i mafuie taitasi. O le fa o ia lūlūga na tupu talu mai le 1914.

“Tupu tele o le amio leaga” (Mataio 24:12)

A o latalata atu ina uma le lona 20 o senituri, a ua faatupulaia ma taatele le amioleaga, po o le solitulafono. O le osofaia e tagata faatupu faalavelave o so o se tagata, o ē lē fefefe i le fasiotia o isi, ma fasiotiga tagata i se aofaiga tele ua aofia ai i vala matautia o nei aso sauā e gata ai.

ʻE iai faamaʻi i lea mea ma lea mea’ (Luka 21:11)

I le gasologa o tausaga o le 1990 i le 1999, e foliga mai e 30 miliona tagata o le a maliliu i le fatafata vaivai. Ua faasolo pea ina lē mafai e vailaau faafomai ona tapeina siama ninii e feaveaia faamaʻi. O le isi faamaʻi matautia o le malalia, ua taia ai le 300 i le 500 miliona tagata i tausaga taitasi ma maliliu ai le tusa ma le 2 miliona tagata. E oo atu i le iuga o lenei sefulu tausaga, ua faatalitalia ai le maliliu o le 1.8 miliona i le tausaga ona e pogai mai i le AIDS. Ua faalauiloa mai e le State of the World 1996: “I aso nei ua fesagai ai tagata ma se mala o faamaʻi pipisi.”

“E talaʻiina atu foi lenei tala lelei o le malo i le atu laulau uma.” (Mataio 24:14)

I le 1997, na faaaluina ai e Molimau a Ieova le sili atu i le tasi le piliona itula i le talaʻia o le tala lelei o le Malo. E sili atu i le lima miliona Molimau o latou avatuina e lē aunoa i tagata i atunuu e 232 lenei feau.

[Ē Ana le Ata]

FAO photo/B. Imevbore

U.S. Coast Guard photo

[Ata i le itulau 4]

Na sosola Kerisiano mai Ierusalema auā sa latou mataala faaleagaga