O Loo Faatalitali “ma le Naunau” Atu

“O loo faatalitali mea uma na faia ma le naunau i le faaalia mai o atalii o le Atua.”—ROMA 8:19.

1. O ā vala o loo tutusa ai le tulaga o Kerisiano i aso nei ma le tulaga o Kerisiano i le uluai senituri?

O LE tulaga o loo iai Kerisiano moni i aso nei ua pei o le tulaga o Kerisiano i le uluai senituri. Sa fesoasoani se valoaga i auauna a Ieova i na aso ina ia iloa ai po o afea na atofa e aliai mai ai le Mesia. (Tanielu 9:24-26) O le valoaga foi lena na valoia mai ai le faaumatiaga o Ierusalema peitai sa lei iai ni vala e mafai ai e Kerisiano ona latou muai iloa po o afea o le a faaumatia ai le aai. (Tanielu 9:26e, 27) I se tulaga tutusa, o se valoaga foi na muai faapogaia ai tagata aʻoga faamaoni o le Tusi Paia i le lona 19 senituri e nonofo faatalitali. E ala i le faafesootai atu o “taimi e fitu” o le Tanielu 4:25 ma “taimi o Nuu Ese,” na latou faatalitalia ai faapea o le a maua e Keriso le mana o le Malo i le 1914. (Luka 21:24, King James Version; Esekielu 21:25-27) E ui ina tele valoaga o loo i le tusi a Tanielu, ae leai se tasi o nei valoaga, e mafai ai e tagata aʻoga o le Tusi Paia i aso nei ona fuafuaina ma le saʻo aʻiaʻi po o afea o le a faaumatia ai le faiga aoao o mea a Satani. (Tanielu 2:31-44; 8:23-25; 11:36, 44, 45) Ae peitai, e lē o toe mamao ona tupu lea o lenei mea, auā o loo tatou ola nei i “ona po o le iuga.”—Tanielu 12:4.a

Le Mataala i le Taimi o le Faatasi Mai o Keriso

2, 3. (a) O le ā ua avea ma faamaoniga autū e iloa ai o loo tatou ola nei i le faagasologa o le faatasi mai o Keriso i le mana tautupu? (e) O le ā e faaalia ai sa tatau pea i Kerisiano ona mataala i le taimi o le faatasi mai o Keriso?

² E moni, o le valoaga na ala ai ona faatalitali Kerisiano a o lei maua e Keriso le mana o le Malo i le 1914. Peitai o le “faailoga” na tuuina atu e Keriso e faatatau i lona faatasi mai ma le faaiuiuga o le faiga o mea sa faamatilatila mai ai ni mea tutupu. Ma o le tele o nei mea tutupu o le a vaaia pe a mavae ona amata lona faatasi mai. O na mea tutupu—o taua, o oge, o mafuie, o faamaʻi, le faateleina o soligatulafono, o sauaga i Kerisiano, ma le talaʻiina i le lalolagi aoao o le Malo—ua avea ma faamaoniga autū e iloa ai o loo tatou ola nei i le faagasologa o le faatasi mai o Keriso i le mana tautupu.—Mataio 24:3-14; Luka 21:10, 11.

³ Peitai, o le aano moni lava o fautuaga faamavae a Iesu i ona soo o le: “Ina mataala ia, . . . ina mataala ia.” (Mareko 13:33, 37; Luka 21:36) O le faitauina ma le faaeteete o le mataupu atoa o nei timaiga ina ia mataala e faaalia ai sa lei faaautū le fetalaiga a Keriso i le mataala e mātau le faailoga o le amataga o lona faatasi mai. Na i lo lea, sa ia poloaiina ona soo moni ina ia mataala pea a o faagasolo lona faatasi mai. O ā mea ia mataala ai pea Kerisiano moni?

4. O le ā le fuafuaga o le a faataunuu e le faailoga na tuuina mai e Iesu?

⁴ Sa taʻu atu e Iesu lana valoaga sili i le taliina o le fesili: “Pe oo afea ia mea [mea tutupu e faagasolo atu i le faaumatiaga o le faiga o mea faa-Iutaia]? Pe se a foi le faailoga o lou maliu mai, ma le gataaga o le lalolagi [“lou faatasi mai ma le vaitaimi faaiuiu o le faiga o mea,” NW]?” (Mataio 24:3) O le faailoga na valoia o le a mafai ona mataulia ai e lē gata i le faatasi mai o le Keriso ae o mea foi e tutupu e faagasolo atu i le iuga o lenei faiga amioleaga o mea.

5. Na faapefea ona faaalia e Iesu e ui o loo faatasi mai faaleagaga, ae lei oo ina “sau” pe afio mai o ia?

⁵ Na faaalia e Iesu faapea, a o faagasolo lona “faatasi mai” (faa-Eleni, pa·rou·siʹa) o le a sau o ia i le mana ma le mamalu. E tusa ai o lena “afio mai” (e sau mai uiga o le upu Eleni erʹkho·mai), na ia folafola e faapea: “Ona iloa ai lea i le lagi o le faailoga o le Atalii o le tagata; ona taufaitagituʻi ai lea o ituaiga uma o le lalolagi; latou te iloa atu foi le Atalii o le tagata ua sau i ao o le lagi, ma le mana ma le mamalu tele. ‘Ia outou mataulia le faataoto i le mati; pe a faatoa tutupu ona tatupu, ma matala mai ona lau, tou te iloa ai ua latalata le tau vevela. E faapea foi outou, pe a outou iloa ia mea uma, tou te iloa ai, ua latalata ia [Keriso], ua i faitotoa lava. O lea, ia outou mataala ai; auā tou te le iloa po o le fea aso e sau ai lo outou Alii. . . . Ia outou nofo sauni ai; auā o le itu aso tou te le manatunatu ai, e sau ai le Atalii o le tagata.”—Mataio 24:30, 32, 33, 42, 44.

Aisea e Afio Mai ai Iesu Keriso?

6. O le a faapefea ona oo mai le faaumatiaga o “Papelonia le aai tele”?

⁶ E ui o loo faatasi mai Iesu Keriso o se Tupu talu mai le 1914, ae e muamua ona faamasinoina e ia o lenei faiga o mea ma tagata taitoatasi a o lei oo ina ia faaoo mai le faasalaga ia i latou na te faamasinoina faapea o ē o loo faia le amioleaga. (Faatusatusa i le 2 Korinito 5:10.) E lē pine ona tuuina lea e Ieova i loto o pule o le lalolagi le lagona ina ia faaumatia “Papelonia le aai tele,” le emepaea i le lalolagi aoao o lotu sese. (Faaaliga 17:4, 5, 16, 17) Na taʻua patino e le aposetolo o Paulo faapea o le a faaumatia e Iesu Keriso “le tagata o le amio leaga”—o taʻitaʻi lotu aposetate a Kerisinetoma, o se vaega iloga o “Papelonia le aai tele.” Na tusi Paulo: “Ona faaalia mai ai lea o le ua amio leaga, e fano o ia i le Alii o Iesu i le mānava mai o lona fofoga, ma faaumatia i le faaali mai o lana afio.”—2 Tesalonia 2:3, 8.

7. Pe a sau le Atalii o le tagata i lona mamalu, o le ā le faamasinoga o le a ia faaoo mai?

⁷ I le lumanai ua latalata mai, o le a faamasinoina ai e Keriso tagata mai atunuu uma e faavae aʻe i o latou uiga sa faaalia atu i ona uso a o iai i le lalolagi. Tatou te faitau ai e faapea: “Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ʻoti; ona tuu ai lea e ia o mamoe i lona itu taumatau, a o ʻoti i lona itu tauagavale. . . . Ona tali atu ai lea o le Tupu, e faapea atu [i mamoe], E moni, ou te fai atu ia te outou, auā na faia e outou i le tasi o e aupito itiiti o oʻu uso nei, o aʻu lea na outou faia i ai. . . . Ona o atu ai lea o [ʻoti] i le sala faavavau; a o e amiotonu e o atu i le ola faavavau.”—Mataio 25:31-46.

8. Ua faamatala faapefea e Paulo le sau o Keriso e faaoo mai le faamasinoga i tagata lē amioatua?

⁸ E pei ona faaalia i le faataoto i mamoe ma ʻoti, e faaoo mai e Iesu le faamasinoga faaiu i tagata uma lē amioatua. Sa faamautinoa atu e Paulo i ona uso talitonu sa mafatia le “mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mumū, na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu. E faasalaina i latou lava i le fanoga faavavau lava, ia teʻa ma le Alii ma le mamalu o lona malosi, pe a afio mai o ia ina ia viia i ona lava tagata paia.” (2 Tesalonia 1:7-10) A o tatou tatalia nei mea mataina uma o le a tutupu i le lumanai, pe ua lē tatau ai ea la ona tatou faatuatua ma ia matuā mataala pea mo le afio mai o Keriso?

O Loo Faatalitali ma le Naunau Atu i le Faaalia Mai o Keriso

9, 10. Aisea ua faatalitali ai ma le naunau i latou faauuina o loo iai pea i le lalolagi i le faaalia mai o Iesu Keriso?

⁹ ‘O le faaalia mai o le Alii o Iesu mai le lagi’ o le a lē gata ina ia aumai ai le faaumatiaga i ē amioleaga ae ina ia tauia ai foi o ē amiotonu. O ē o totoe o uso faauuina o Keriso o loo iai pea i le lalolagi atonu o le a oo i ai ni mafatiaga a o lei faaalia mai Keriso, peitai latou te olioli i lo latou faamoemoe mamalu faalelagi. Na tusi atu le aposetolo o Peteru i Kerisiano faauuina: “E faapei ona tofusia o outou faatasi i tiga o Keriso, ia outou olioli ai, ina ia fiafia outou ma le olioli tele pe a faaalia mai lona mamalu.”—1 Peteru 4:13.

¹⁰ Ua filifili maumauai le au faauuina ina ia tumau pea i le faamaoni seia oo ina ‘aoaoina atu i latou e Keriso ia te ia’ ina ia mafai ai e lo latou ‘faatuatua ua tofotofoina’ ona “avea ma mea e iu ai i le viiga, ma le mamalu, ma le manuia pe a faaalia mai Iesu Keriso.” (2 Tesalonia 2:1; 1 Peteru 1:7) E tusa ai o na Kerisiano faamaoni faauuagagaina, e mafai ona faapea atu: “E faapei ona faamaonia le moni o le upu ia Keriso ia te outou; o lea ua outou le matitiva ai i se mea alofa e tasi; a o faatalitali outou i le faaaliga o lo tatou Alii o Iesu Keriso.”—1 Korinito 1:6, 7.

11. A o faatalitali i le faaalia mai o Iesu Keriso, o le ā o loo faia e Kerisiano faauuina?

¹¹ Ua iai i le vaega totoe faauuina lagona o Paulo, o lē na tusi mai: “O loʻu manatu e le tatau ona faatusaina le tiga i nei ona po ma le manuia atali e faaalia mai ia te i tatou.” (Roma 8:18) E lē tau faamalosia lo latou faatuatua e ala i le faitauina o taimi. E tele mea latou te faia i le auaunaga a Ieova, i le saunia o se faaaoaoga matagofie mo a latou aumea, o “isi mamoe.” (Ioane 10:16) Ua iloa e lenei au faauuina le latalata mai o le iuga o lenei faiga amioleaga o mea, ma ua latou utagia ai le timaiga a Peteru: “Ia outou fusi ae i sulugatiti o outou mafaufau, ia faautauta, ia atoatoa ona faamoemoe i le alofa tunoa e molia mai ia te outou pe a faaalia mai Iesu Keriso.”—1 Peteru 1:13.

“O Loo Faatalitali Mea Uma na Faia ma le Naunau”

12, 13. Na faapefea ona “faapologaina e le iu vale” tagata, ma o le ā o loo moomoo atu i ai isi mamoe?

¹² Po o iai ea foi i isi mamoe se mea latou te faatalitali ma le naunau atu i ai? O le mea ua matuā mautinoa lena. Ina ua uma ona taʻua le faamoemoe pupula o i latou ua avea e Ieova mona “atalii” faauuagagaina ma o “suli faatasi ma Keriso” i le Malo faalelagi, ona faapea mai lea o Paulo: “O loo faatalitali mea uma na faia ma le naunau i le faaalia mai o atalii o le Atua. Auā ua faatoilaloina mea uma na faia i le iu vale, (e le o lona loto lea, a e peitai ona o ia na na faatoilaloina ai,) ma le faamoemoe ia tuusaunoa ia lava mea na faia ia le faapologaina e le iu vale, a e oo i le saolotoga o le fanau a le Atua e manuia ai.”—Roma 8:14-21; 2 Timoteo 2:10-12.

¹³ E ala i le agasala a Atamu, “ua faatoilaloina ai” ē uma na tupuga mai ia te ia “i le iu vale,” ua fananau mai i noanoataga o le agasala ma le oti. Ua lē mafai ona latou tuusaunoa i latou mai lena noanoataga. (Salamo 49:7; Roma 5:12, 21) Maeu le moomoo o isi mamoe ina ia “tuusaunoa . . . ia le faapologaina e le iu vale”! Peitai, a o lei tupu lena mea, e iai nisi mea e ao ona tutupu e tusa ai o taimi ma tau a Ieova.

14. O le ā o le a aofia i “le faaalia mai o atalii o le Atua,” ma o le a faapefea ona iu ai lenei mea i le ‘tuusaunoaina o tagata ia lē faapologaina e le iu vale’?

¹⁴ E ao ona muai “faaalia” mai le vaega totoe o ‘atalii faauuina o le Atua.’ O le ā o le a aofia ai i lenei mea? I le taimi atofaina a le Atua, o le a manino atu ai i isi mamoe e faapea, ua faaiu le “faamaufaailogaina” o ē faauuina ma ua faamamaluina e nofotupu faatasi ma Keriso. (Faaaliga 7:2-4) O le a “faaalia” foi “atalii o le Atua” o ē toe faatutūina aʻe pe a latou auai faatasi ma Keriso i le faaumatiaina o le faiga o mea amioleaga a Satani. (Faaaliga 2:26, 27; 19:14, 15) Ma, a o faagasolo le Pulega a Keriso mo le Afe Tausaga, o le a “faaalia” atili ai i latou o ni ala faaositaulaga mo le faasoaina atu o aogā o le taulaga togiola a Iesu i tagata “na faia.” O le a iu lenei mea i le ‘tuusaunoaina o tagata ia lē faapologaina e le iu vale’ ma iu ai ina latou ulu atu i “le saolotoga o le fanau a le Atua e manuia ai.” (Roma 8:21; Faaaliga 20:5; 22:1, 2) Ona o na faamoemoega sili, po ua lē o le mafuaaga ea la lena mo isi mamoe latou te “faatalitali” atu ai “ma le naunau i le faaalia mai o atalii o le Atua”?—Roma 8:19.

O le Onosai o Ieova o le Faaolataga Lea

15. O le ā e lē tatau lava ona tatou faagaloina e tusa ai o taimi a Ieova faatatau i mea tutupu?

¹⁵ O Ieova o le Tausi Taimi Sili. O le a faamaonia le saʻo atoatoa e faatatau i le taimi o ana mea tutupu. Atonu e lē o taimi uma e tutupu ai mea i le auala tatou te faatalitalia totino e tatau ona iai. Peitai, e mafai ona iai lo latou faatuatuaga atoatoa, o folafolaga uma a le Atua o le a faataunuuina. (Iosua 23:14) Atonu na te faatagaina mea ina ia faaauau mo se taimi e umi atu nai lo le taimi e faatalitalia e le toatele. Peitai seʻi o tatou saili ina ia malamalama i ona ala ma ia mataʻia lona atamai. Na tusi mai Paulo: “Aue! le loloto o le tamaoaiga o le poto atoa ma le silafaga a le Atua. E le masuesueina ana faamasinoga; e le mafai foi ona iloa ona ala. Auā o ai ea se ua iloa le finagalo o le Alii? Po o ai foi se ua pulega faatasi ma ia?”—Roma 11:33, 34.

16. O ai ua iai i le tulaga e mauaina ai aogā mai le onosai o Ieova?

¹⁶ Na tusi Peteru: “Le au pele e, ua outou faatalitali i ia mea [le faaumatiaga o “lagi” tuai ma le “lalolagi” tuai ma le suia i le “lagi fou” ma le “lalolagi fou” ua folafolaina mai e le Atua], o lea ia outou finafinau ai lava ina ia maua outou e ia ma le manuia, ua le ponā, ma le le mataʻuleagaina. Ia outou manatu o le onosai o lo tatou Alii o le faaolataga lea.” Talu ai le onosai o Ieova, e faitau miliona ua latou mauaina le avanoa e faasaoina atu ai i le “aso o le Alii [Ieova],” lea o le a oo mai faafuasei e “pei o se gaoi.” (2 Peteru 3:9-15) O lona onosai ua maua ai foi e i tatou taitoatasi le avanoa e ‘galueaiina ai pea lo tatou faaolataga i le mataʻu ma le gatete.’ (Filipi 2:12) Na fetalai Iesu faapea, ‘ia tatou ia i tatou lava’ ma ia ‘mataala pea’ pe afai tatou te mananao e faamaonia i tatou ma taulau e “tutū i luma o le Atalii o le tagata” i le taimi e afio mai ai o ia mo le faamasinoga.—Luka 21:34-36; Mataio 25:31-33.

Ia Faatalitali Pea ma le Onosai

17. O ā upu a le aposetolo o Paulo e tatau ona tatou utagiaina?

¹⁷ Na uunaia e Paulo ona uso faaleagaga ina ia taulai atu pea la latou vaai, ‘e lē i mea ua vaaia, a o mea e lē vaaia.’ (2 Korinito 4:16-18) Sa ia lē manao e iai se mea e faanenefu ai la latou vaai i le taui faalelagi na i o latou luma. E tusa lava po o i tatou o ni Kerisiano faauuina po o tatou o isi mamoe, seʻi o tatou manatua pea le faamoemoe ofoofogia ua faataatia i o tatou luma ma ia lē faamaamulu. Seʻi o tatou ‘faatalitali ma le onosai,’ e faamaonia ai “o i tatou e le o ni e tuumuli i le malaia, a o ni e faatuatua e ola ai le agaga.”—Roma 8:25; Eperu 10:39.

18. Aisea e mafai ai ona tatou tuu atu ma le mautinoa i ona po ma tausaga i le faitalia a Ieova?

¹⁸ E mafai ona tatou tuu atu ma le mautinoa ona po ma tausaga i le faitalia a Ieova. O le faataunuuga o ana folafolaga “e le faatuai mai” e tusa ai ma le faasologa o ana taimi. (Sapakuka 2:3) I le taimi nei, ua sili atu ona uigā ia i tatou le timaiga a Paulo ia Timoteo. Na ia faapea atu: “O lenei, ou te matuā fai atu ia te oe i luma o le Atua ma le Alii o Keriso Iesu, o le na te faamasinoina o e ola atoa ma e ua oti, ona o lona faaali mai foi ma lona malo; ia e talaʻi atu le upu, ia e faamalosi i ona aso e taugalemu ai, ma ona aso e le taugalemu ai . . . ia e fai le galuega a lē folafola le tala lelei, ia e matuā faaiuina lau faiva.”—2 Timoteo 4:1-5.

19. O le ā le mea o loo maua pea e tagata o Ieova le taimi e fai ai, ma aisea?

¹⁹ O loo iai ola i se tulaga lamatia—o tatou lava ola ma ola o o tatou tuaoi. Na tusi mai Paulo: “Ia oe lava ia te oe, atoa ma lau e aʻoaʻo atu, ia e tumau pea i ai; auā a ē fai lena mea, e faaolaina ai oe e oe atoa ma e ua faalogologo ia te oe.” (1 Timoteo 4:16) Ua puupuu lava le taimi mo lenei faiga amioleaga o mea. A o tatou faatalitali ma le naunau atu i mea mataina o loo i o tatou luma, seʻi o tatou matuā nofouta faapea, o loo iai pea le taimi ma tau a Ieova mo ona tagata ina ia talaʻi ai le tala lelei o le Malo. E ao ona faataunuu lena galuega e tusa ai ma lona finagalo malie. E pei ona fetalai Iesu: “Ona oo mai ai lea o le gataaga.”—Mataio 24:14.

[Faaopoopoga i lalo]

Se Autaluga

◻ E tusa ai o le faitauina o taimi, ua faapefea ona tali tutusa lo tatou tulaga ma le tulaga o Kerisiano i le uluai senituri?

◻ Aisea e ao ai i Kerisiano ona “mataala,” e oo lava i le taimi a o faagasolo le faatasi mai o Keriso?

◻ Aisea e faatalitali ai tagata ma le naunau atu i “le faaalia mai o atalii o le Atua”?

◻ Aisea e mafai ai ona tatou tuu atu ma le mautinoa ona po ma tausaga i le faitalia a Ieova?

[Ata i le itulau 17]

E ao i Kerisiano ona mataala pea e faatalitali i le afio mai o Keriso

[Ata i le itulau 18]

O loo tele pea mea e fai e le vaega totoe faauuina i le auaunaga a Ieova, ae lē o faavaea lo latou faatuatua i le faitauina o taimi