Ia Faaauau Ona Agaigai i Luma Faaleagaga!

O le aso o lo tatou papatisoga o se aso e tatau lava ona tatou manatua ma faatāuaina pea. Auā foi, o le aso lea na tatou faalauiloa atu ai i le lautele lo tatou faia o se tuuina atu e auauna i le Atua.

MO LE toatele o tagata, sa manaomia ni taumafaiga tetele ina ia oo ai i lea tulaga—e pei o le lafoaia o ni masaniga leaga ua leva ona sau ai, o le lē toe faatasi ma aumea lē lelei, ma le suia o ituaiga mafaufauga ma amioga ia ua mautu ia i tatou.

E ui i lea, a o avea le papatisoga o se mea tāua ma fiafia ai i le soifuaga faa-Kerisiano, ae ua na o se amataga. Na taʻu atu e le aposetolo o Paulo i Kerisiano papatisoina i Iutaia e faapea: “O le mea lea ina tatou tuua ai ia o aʻoaʻoga muamua a Keriso, a ia tatou faaoo atu i le faaatoatoaga.” (Eperu 6:1) Ioe, e manaomia e Kerisiano uma ona “oo atu o i tatou uma lava i le loto gatasi i la le faatuatua, ma le iloa lelei o le Alo o le Atua, ia fai foi ma tagata matua, ia oo i le fua o le ua matua, e tatau ma le tumu o Keriso.” (Efeso 4:13) Seʻi vaganā lava ua tatou agaʻi i luma i le avea ma sē ua taʻumatuaina ona mafai moni lava lea ona tatou “faatumauina i le faatuatua.”—Kolose 2:7.

I ni nai tausaga ua tuanai atu, e faitau selau afe tagata tapuai faatoʻā tuuina atu ua ō mai i totonu o le faapotopotoga Kerisiano. Atonu o oe o se tasi o i latou. I le pei o ou uso i le uluai senituri, e te lē manao e pepe ai pea faaleagaga. E te manao e tupu aʻe, ia agaʻi i luma! Ae e faapefea? Ma o ā nisi o auala e mafai ai ona e faia lea agaigai i luma?

Agaigai i Luma e Ala i Suesuega Totino

Na taʻu atu e Paulo i Kerisiano i Filipi: “O laʻu tatalo foi lenei, ia faatuputeleina pea lava lo outou alofa, ma le iloa lelei, [“poto saʻo,” NW] atoa ma le faautauta uma.” (Filipi 1:9) O le tupu aʻe i le “poto saʻo” e matuā tāua tele i lou agaigai i luma faaleagaga. ‘O le aveina i fale o le poto saʻo e faatatau ia Ieova ma Iesu Keriso’ o se gaoioiga faifai pea, e lē o se mea e taofia pe a uma le papatisoga.—Ioane 17:3.

O se tasi o tuafafine Kerisiano lea o le a tatou faaigoaina ia Susana, na oo ina ia iloa lelei lena mea ina ua sefulu tausaga talu ona uma ona papatisoina o ia i le 16 o ona tausaga. Sa ola aʻe o ia i le upu moni ma sa auai pea o ia i sauniga faa-Kerisiano ma auai i le galuega talaʻi. Ua ia tusi mai faapea: “I ni nai masina ua tuanai, na ou iloa ai o loo iai se mea o loo matuā sese lava. Sa ou filifili e toe vaai totoʻa ma le faamaoni ia te au lava, po o le ā loʻu lagona i le upu moni, ma aisea ua ou iai pea i le upu moni.” O le ā na ia iloaina? Sa ia faaauau mai faapea: “Na ou iloaina ai mafuaaga o loʻu iai i le upu moni na matuā faateia ai lava aʻu. Sa ou manatua faapea a o oʻu tuputupu aʻe, sa faamamafaina ai sauniga ma le auaunaga i le fanua. Na foliga mai o le faia o suesuega totino ma le tatalo o le a iai se taimi e oo ai lava ina faia faapena. Ae ina ua ou iloiloina loʻu tulaga, na ou iloaina ai faapea sa lei tupu lenei mea.”

Na fautua mai le aposetolo o Paulo e faapea: “A ia tatou amio e tusa ma le tulaga [“faasologa,” NW] ua tatou aulia.” (Filipi 3:16) O se faasologa e mafai ona faatulaga ai se agaʻi i luma. A o lumanai lou papatisoga, e mautinoa lava sa iai sau faasologa faalevaiaso o le suesueina o le Tusi Paia ma se faiaʻoga agavaa. A o tuputupu aʻe lou talisapaia, ua e faaaofia ai i lenei faasologa o le sauniunia o lesona taitasi faalevaiaso, le vaaia uma o mau faasino o le Tusi Paia o loo iai, ma isi lava mea. I le taimi nei la talu ona uma lou papatisoga, po o faaauau pea ona e ‘amio e tusa ma lea faasologa’?

Afai e leai, atonu e manaomia ona toe faatulaga au mea e tatau ona faamuamua, ‘ia faamautinoa mea e sili ona tāua.’ (Filipi 1:10, NW) I o tatou olaga e ese le pisi, e manaomia le pulea totino ina ia tuu ese ai se taimi mo suesuega totino ma le faitauina o le Tusi Paia. Ae o aogā e maua mai ai, e alu aogā i ai taumafaiga fitā. Toe mafaufau i le mea na tupu ia Susana. Na ia taʻutino mai: “E tatau ona ou faapea atu na ou iai i le upu moni pe ā ma le 20 tausaga ua teʻa e ala i le na ona alu atu i sauniga ma auai i le auaunaga i le fanua.” Peitai, ua faaauau mai faapea lana faamatalaga: “Ua ou faia le faaiuga faapea e ui lava o nei mea e tāua, ae e lē mafai e na mea ona faatumauina aʻu pe a oo ina amata ona faigata tulaga o mea. O nei mea uma ua oo ina aliali mai talu ai ua matuā leai lava saʻu suesuega totino, ua seāseā lava oʻu toe tatalo ma ua lē o toe uigā foi. Ua oo nei ina ou iloaina e tatau ona toe fetuutuunai oʻu mafaufauga ma amataina se polokalame o suesuega totino uigā ina ia ou iloa lelei Ieova ma oo ina alofa ia te ia ma talisapaia le mea na tuuina mai e lona Alo mo i tatou.”

Afai e te manaomia se fesoasoani mo le faatulagaina o se faasologa aogā o se suesuega totino, o le a fiafia toeaina ma isi Kerisiano taʻumatuaina i lau faapotopotoga e fesoasoani atu ia te oe. E faaopoopo atu i lena, o mataupu o loo i Le Olomatamata o Me 1, 1995; Aokuso 15, 1993; ma Ianuari 1, 1987, o loo iai le tele o fautuaga aogā.

Le Manaoga ia Faalatalata Atu ia Ieova

O le isi vala e manaomia ona e taumafai malosi e agaigai ai i luma o le lua faiā lea ma le Atua. I nisi tulaga atonu o loo iai se manaoga tele i lenei itu. Mafaufau ia Anetonio, na papatiso a o laitiiti lava. Ua ia faapea mai: “O aʻu o le tamaitiiti muamua o lo matou aiga na papatiso. Ina ua uma loʻu papatisoga, sa faafeiloai aʻu e loʻu tinā i se opo mafana. Ou te lei vaaia lava o ia ua sili atu lona fiafia faapea. Sa tumu i le olioli, ma sa ou lagonaina loʻu malosi tele.” Peitai, sa iai le isi itu o le mea na tupu. Ua faaauau mai faapea Anetonio: “Mo se taimi umi lava, sa leai se isi tagata talavou na papatiso i le matou faapotopotoga. O lea la, na ou lagonaina loʻu mimita tele. Sa ou manatu faamaualuga foi i aʻu tali ma lauga i le sauniga. O le mauaina o viiga ma le faamaoniga mai i tagata sa sili atu ona tāua ia te au na i lo le mauaina o le viiga mai ia Ieova. Sa matuā leai moni lava saʻu faiā vavalalata ma ia.”

I le pei o Anetonio, o nisi latou te faia le tuuina atu ona o le faanaunauga ina ia faafiafia ai isi ae lē o se faanaunauga ina ia faafiafia ai Ieova. Ae ui lava i lea, e faatalitalia e le Atua i latou na e ola aʻe e tusa i la latou folafolaga e auauna atu ia te ia. (Faatusatusa i le Failauga 5:4.) Peitai ane, a aunoa ma le pipii totino atu i le Atua, e masani lava e lē faigofie mo i latou ona faia faapea. Ua toe manatua e Anetonio e faapea: “O le olioli tele lea sa ou maua i loʻu papatisoga sa puupuu lava. E lei atoa se tausaga talu ona uma loʻu papatisoga ae ou paʻū atu loa i le faia o se mea sese matuiā ma sa aoaia ai aʻu e toeaina o le faapotopotoga. O le toe faia pea o amioga leaga na oo ai ina faateaina aʻu mai le faapotopotoga. O le ono o tausaga talu loʻu tuuina atu ia Ieova, na puea ai aʻu ma faafalepuipuiina mo le fasioti tagata.”

Ati ae se Faiā Vavalalata ma Ieova

Po o le ā lava lou tulaga, e mafai e Kerisiano uma ona tali atu i le valaaulia a le Tusi Paia e faapea: “Ia outou faalatalata atu i le Atua, ona faalatalata mai lea o ia ia te outou.” (Iakopo 4:8) E lē taumatea sa e ati ae se tulaga vavalalata ma le Atua ina ua e faatoʻā amata ona suesueina le Tusi Paia. Ua e aʻoaʻoina e faatatau i le Atua e lē taumamao e pei o le tulaga o loo tapuaia nei e Kerisinetoma, ae o se peresona e iai sona suafa, o Ieova. Ua e aʻoaʻoina foi e iai ona uiga manaia, e pei o ia o “le Atua alofa mutimutivale ma le alofa fua, e telegese lona toasa, a e tele le alofa ma le faamaoni.”—Esoto 34:6.

Peitai, ina ia ola aʻe e tusa o lou tuuina atu e auauna i le Atua, e ao ona e matuā faalatalata atu ia te ia! E faapefea? Na tatalo le faisalamo e faapea: “Ieova e, ia e faailoa mai ia te au ou ala; ia e aʻoaʻo mai ia te au i ou magāala.” (Salamo 25:4) O se suesuega totino o le Tusi Paia atoa ma lomiga a le Sosaiete e mafai ona fesoasoani ia te oe ia iloa lelei ai Ieova. E tāua tele le auai e lē aunoa i tatalo mai le loto. Na augani mai le faisalamo: “Ia outou momoli atu o outou loto i ona luma.” (Salamo 62:8) A o e matauina le tali mai o au tatalo, o le a e lagonaina ai le naunau totino mai o le Atua ia te oe. O le a fesoasoani lenei ia te oe e lagona ai le valatalata atu ia te ia.

O tofotofoga ma faafitauli e aumai ai foi se isi avanoa e faalatalata atu ai i le Atua. E te ono fesagai ma ni luʻi ma ni tofotofoga o le faatuatua, e pei o maʻi, o omiga i le aʻoga ma le mea e faigaluega ai, ia po o faigata foi tau le tamaoaiga. Atonu foi e oo lava i faasologa masani faatiokarate o le auai i le faiva, le auai i sauniga, po o le suesueina o le Tusi Paia ma lau fanau e faigata mo oe. Aua e te taulimaina na o oe na faafitauli! Talosaga atu i le Atua mo se fesoasoani, ole atu mo lana taitaiga ma lana faasinoga. (Faataoto 3:5, 6) Aioi atu ia te ia mo lona agaga paia! (Luka 11:13) A o e mauaina le fesoasoani alofa mai le Atua, o le a atili ai ona e vavalalata atu ia te ia. E pei ona faaupu ai e le faisalamo o Tavita, “tofotofo ia outou, ma ia outou iloa e lelei Ieova; amuia lava le tagata o lē faatuatua ia te ia.”—Salamo 34:8.

Ae faapefea Anetonio? “Sa amata ona ou mafaufau i le taimi na tele ai oʻu sini faaleagaga e faaautū atu i le faia o le finagalo o Ieova,” o lana faamatalaga lea. “E tiga tele lena mea. Ae e ala i nei tiga ma lē taulau, na ou manatuaina ai le alofa o Ieova. Sa umi se taimi a o lei oo ina ou toe mafai ona tatalo ia Ieova, ma sa ou faia faapea, ma na ou sasaa atu loʻu loto ia te ia, ma talosagaina lana faamagaloga. Na amata foi ona ou faitauina le Tusi Paia ma sa faateia aʻu i le tele o mea ua galo ia te au ma le itiiti o mea ou te iloa moni e faatatau ia Ieova.” E ui lava e tatau pea ona faaumaina taimi o Anetonio i le falepuipui mo lana solitulafono, ae ua ia mauaina fesoasoani mai i Molimau i lena vaipanoa ma ua iai nei o ia i le ala o le toe malosi faaleagaga. Ua faapea mai ma le loto faafetai Anetonio: “Faafetai ia Ieova ma lana faalapotopotoga, na mafai ai ona ou toese le tagata tuai, ma taumafai e ofu i le tagata fou i aso taitasi. O laʻu faiā ma Ieova ua sili atu nei ona tāua ia te au.”

Agaigai i Luma Faaleagaga i Lau Faiva

Na faatonu e Iesu Keriso ona soo ina ia avea ma ē talaʻia le “tala lelei o le Malo.” (Mataio 24:14) A o avea oe ma tagata talaʻi fou o le tala lelei, atonu e lē tele sou poto masani i le faiva. O le a faapefea la, ona e faia se agaigai i luma ina ia e ‘matuā faaiuina lau faiva’?—2 Timoteo 4:5.

O se tasi o auala o le ati ae lea o se vaaiga saʻo. Faamasani e vaai i le galuega talaʻi o se “oloa tautele,” o se faaeaga. (2 Korinito 4:7) O se avanoa e faaali atu ai lo tatou alofa, ma le faamaoni ia Ieova. O loo aumaia ai foi ia i tatou le avanoa e faaali atu ai lo tatou manatu mamafa mo o tatou tuaoi. O le faaaogaina ma le lē manatu faapito o o tatou tagata i nei tulaga e mafai ona avea ma mafuaaga o le fiafiaga moni.—Galuega 20:35.

Sa ia Iesu se vaaiga saʻo i le galuega talaʻi. O le tufa atu o upu moni o le Tusi Paia i isi sa pei o se “mea e ʻai” ia te ia. (Ioane 4:34) O le uunaiga sa ia te ia e fesoasoani ai i tagata atonu e talafeagai ona faamatalaina i upu nei, “Ou te loto i ai.” (Mataio 8:3) Sa mutimutivale le alofa o Iesu i tagata, ae maise lava i latou na “lailoa ma tuulafoaiina” e le lalolagi a Satani. (Mataio 9:35, 36) Pe e faapena ea oe ona e “loto i ai” e fesoasoani ia i latou o loo pogisa faaleagaga ma i latou o manaomia se faamalamalamaga mai le Afioga a le Atua? O le a e lagona la le uunaia o oe e tali atu i le faatonuga a Iesu: “O lenei, ia outou o atu e fai nuu uma lava ma soo.” (Mataio 28:19) O le mea moni, o le a uunaia oe e fai se sao atoatoa i lenei galuega i le tulaga e te mafaia e tusa ai ma lou malosi ma ou tulaga o iai.

O le isi mea e fesoasoani ai e agaʻi i luma o le auai pea lava pea i le faiva—i vaiaso uma pe afai e mafai. O le faia faapea o le a fesoasoani e taofia ai le musuā ma le fefe lea atonu o loo faatuatuai ai le tagata lea e seāseā talaʻi. E iai foi isi auala e aogā ai ia te oe le auai e lē aunoa i le auaunaga i le fanua. O le a faatupuina ai lou talisapaia o le upu moni, e ati ae ai lou alofa mo Ieova ma tuaoi, ma fesoasoani ia te oe ia taulai atu pea i le faamoemoe o le Malo.

Ae faapefea, pe afai, o lou tulaga o loo iai nei e matuā faatapulaa ai lava lou auai i le galuega talaʻi? Afai e manino mai e lē faigofie ona fai ni fetuutuunaiga, ona aua lea le popole ae faamafanafanaina i le iloa o loo matuā faafiafiaina lava le Atua i so o se mea o loo mafai ona e faia, pe afai e faia ma lou tagata atoa lau auaunaga. (Mataio 13:23) Atonu e mafai ona e agaigai i luma i isi auala, e pei o le faaleleia o lou tomai i le talaʻiga. O loo maua se toleniga sili ona lelei e faatatau i nei tulaga i le faapotopotoga, e ala mai i le Aʻoga o le Faiva Faatiokarate ma le Sauniga o le Auaunaga. O le mea moni lava ia, o le tele o lo tatou lava saunia i le faiva, o le tele foi lea o lo tatou olioli i ai ma matauina iuga e maua mai ai.

E manino lava la, o le agaigai i luma faaleagaga e lē gata mai i le aso e papatiso ai se tasi. Sa tusi mai le aposetolo o Paulo e faatatau i lona faamoemoe o le mauaina o le ola e lē toe oti lava i le lagi e faapea: “Le au uso e, ou te le manatu ua ou maua, a o le mea e tasi ou te faia, ou te faagalogalo i mea ua tuanaʻi, ou te momoʻe punou aʻi foi i mea o lumanai, ou te tausisi atu i le faailoga, ia maua ai le taui na valaauina ai aʻu mai lugā e le Atua ia Keriso Iesu. O lenei, o i tatou uma o e ua fai ma tagata matua, ia tatou manatunatu faapena; afai foi e ese so outou manatu i se isi itu, o le a outou maua se faaaliga mai le Atua e faatatau i ai.”—Filipi 3:13-15.

Ioe, o Kerisiano uma lava, po o lo latou faamoemoe o le ola e lē toe oti lava i le lagi po o le ola e faavavau i le Parataiso i le lalolagi, e ao lava ona “momoʻe punou aʻi”—fai le mea e sili atu i lou malosi e masani ai, ina ia maua le sini o le ola! O lou papatisoga o se amataga lelei tele, ae ua na o se amataga. Ia faaauau ona taumafai atili e agaigai i luma faaleagaga. E ala mai i sauniga ma suesuega totino, o le a mafai ai ona “tagata matutua i le mafaufau.” (1 Korinito 14:20) Ia “mafai ai ona iloa lelei . . . o le uiga o le lautele, ma le umi, ma le loloto, ma le maualuga” o le upu moni. (Efeso 3:18) O le agaigai i luma ua e faia o le a lē gata ina fesoasoani ia te oe e faatumauina ai le olioli ma le fiafia i le taimi nei ae faamautinoa ai foi se nofoaga saogalemu i le lalolagi fou a le Atua, lea o le a mafai ona e agaʻi ai i luma e faavavau i le pulega a lona Malo faalelagi!

[Ata i le itulau 29]

E manaomia le pulea totino ina ia maua ai taimi mo suesuega totino

[Ata i le itulau 31]

O le iai o se vaaiga saʻo e fesoasoani ia i tatou e maua ai le olioli i le faiva