Ierusalema—Po o ‘Faasili ea i Mea Uma E te Fiafia i Ai’?
“Ia pipii ae loʻu laulaufaiva i loʻu gutu, pe a le faasili Ierusalema i mea uma ou te fiafia i ai.”—SALAMO 137:6.
1. O le ā le uiga sa iai i le toatele o tagata Iutaia na faaaunuua e faatatau i le aai filifilia o le Atua?
TOETOE lava fitusefulu tausaga ua tuanai talu ona toe taliu uluai tagata Iutaia sa faaaunuua, e toe foi atu i Ierusalema i le 537 T.L.M. Na toe fausia le malumalu o le Atua, ae sa tumau pea faatafunaga o le aai. I le taimi lea, ua ola aʻe ai se isi tupulaga fou i le nuu o loo faaaunuua ai. E lē taumate o le toatele o i latou sa iai lagona e pei o lagona o le faisalamo o lē na pese: “Ierusalema e, afai e galo oe ia te au, ia galo lava i loʻu lima taumatau.” (Salamo 137:5) O nisi na latou faia mea e sili atu na i lo le tau ina manatua o Ierusalema; sa faamaonia mai i a latou gaoioiga e faapea, sa latou “faasili Ierusalema i mea uma [latou] te fiafia i ai.”—Salamo 137:6.
2. O ai Esera, ma na faapefea ona faamanuiaina o ia?
2 Mo se faaaoaoga, seʻi manatu i le ositaulaga o Esera. E oo lava i le taimi a o lei toe taliu atu i lona nuu, sa ia galue maelega e faasilisilia manaoga o le tapuaiga moni i Ierusalema. (Esera 7:6, 10) Sa matuā faamanuiaina Esera ona o lena mea. Na faaosofia e Ieova le Atua le loto o le tupu o Peresia ina ia avatu ia Esera le faaeaga na te taitaia ai se vaega lona lua o tagata faaaunuua sa toe foi atu i Ierusalema. E lē gata i lea, na foai atu e le tupu ia i latou ni meaalofa se tele o auro ma ario “e faamatagofie ai le fale o Ieova.”—Esera 7:21-27.
3. Na faamaonia faapefea e Neemia le avea o Ierusalema ma ona faanaunauga autū?
3 I ni tausaga e 12 mulimuli ane, sa iai foi le isi tagata Iutaia na ia faia se gaoioiga maumauai—o Neemia. Sa auauna o ia i le maota o le tupu o Peresia i Susana. Sa ia te ia se tofiga taualoa o le avea ma tautū uaina i le tupu o Aretaseta, peitai e lē o le mea lena na ia ‘faasili ona fiafia i ai.’ Na i lo lea, sa ia moomoo e fia alu atu ma toe fausia Ierusalema. Mo le tele o ni masina, na tatalo ai Neemia mo lenei mea, ma sa faamanuia mai Ieova le Atua ia te ia ona o lona faia faapea. Ina ua logotala le tupu o Peresia i le faanaunauga o Neemia, ona avatu lea e le tupu se vaegaau e ō atu faatasi ma Neemia, faatasi ai ma ni tusi e tuuina atu ai ia te ia le pule e na te toe fausia Ierusalema.—Neemia 1:1–2:9.
4. E mafai faapefea ona tatou faaali atu o le tapuaiga ia Ieova o loo faasili i mea uma tatou te fiafia i ai?
4 E mautinoa, o Esera, Neemia, ma le toatele o tagata Iutaia sa lagolagosua atu ia i laua na latou faamaonia mai, o le tapuaiga a Ieova, na faaautū i Ierusalema, na sili atu lona tāua na i lo se isi lava mea—sa ‘faasili i mea uma latou te fiafia i ai,’ o lona uiga, e sili atu na i lo se isi lava mea latou te ono maua ai le fiafia. Maeu se faalaeiau mai o na tagata ia i tatou uma i aso nei o ē o loo iai foi lena lava manatu agaʻi ia Ieova, i lana tapuaiga, ma lana faalapotopotoga ua taitaia e lona agaga! Po o le manatu moni ea lena o loo ia te oe? Po o e faaalia ea i lou tumau i galuega faale-Atua e faapea o le pogai sili o lou fiafia, o lou faaeaga lea e tapuai atu ai ia Ieova faatasi ma ona tagata tuuina atu? (2 Peteru 3:11) Mo ni faalaeiauga atili i lena fuafuaga, seʻi o tatou talanoaina iuga lelei o le malaga a Esera i Ierusalema.
Faamanuiaga ma Tiute Tauave
5. O ā faamanuiaga tautele na maua e i latou na aināina Iuta i aso o Esera?
5 O tagata e tusa ma le toʻa 6,000 ia na toe foi atu mai le tafeaga i lalo o le taitaiga a Esera, na latou avatu ni meaalofa o auro ma ario mo le malumalu o Ieova. O nei mea o lo latou tau aofai pe ā ma le 35 miliona tālā Amerika e tusa ai ma le aogā o le tupe i aso nei. O lona uiga pe ā ma le faafitu ona sili atu le tele o auro ma ario nei na i lo mea na mafai ona ave e uluai tagata o le tafeaga ia na ō muamua. Maeu se faafetai atu ia Ieova o tagata na aināina Ierusalema ma Iuta ina ua latou maua lenei lagolagosua a tagata ma mea faitino! Peitai o le oa o faamanuiaga mai le Atua na aumaia ai foi ma se tiute tauave.—Luka 12:48.
6. O le ā na iloa e Esera i lona nuu, ma o ā ona lagona i ai?
6 E lei umi ae iloa e Esera o le toatele o tagata Iutaia, e aofia ai nisi ositaulaga ma toeaina, sa latou solia le Tulafono a le Atua e ala i le faaipoipo atu i ni avā faapaupau. (Teuteronome 7:3, 4) Sa talafeagai le matuā tiga o lona loto i lenei solia o le feagaiga o le Tulafono a le Atua. “Ua ou faalogo i lenei mea, ona ou saeia lea o loʻu ofu ma loʻu ofu talaloa, . . . ua segia loʻu mauli.” (Esera 9:3) Ma, a o iai pea ma le fanauga a Isaraelu ua faapopoleina, na sasaa atu e Esera lona loto ia Ieova i le tatalo. A o faalologo tagata uma, sa toe taʻua e Esera le tulaga lē usiusitai o Isaraelu i taimi ua teʻa, ma toe faamanatu le lapataiga a le Atua i le mea o le a tupu pe afai latou te faaipoipo atu i tagata faapaupau o loo aināina le nuu. Ona ia faaiu atu lea: “Ieova e, le Atua o Isaraelu, o oe o le amiotonu; auā ua faatotoeina i matou, ua faasaoina, e pei ona fai i le aso nei; faauta, o i ou luma i matou ma a matou agasala; auā e le mafai ona tutū i matou i ou luma ona o lenei mea.”—Esera 9:14, 15.
7. (a) O le ā le faaaoaoga lelei na faataatia e Esera i le taulimaina o mea sese? (e) Na faapefea ona gaoioi tagata faimea sese i aso o Esera?
7 Sa faaaogā e Esera le faaupuga “matou.” Ioe, sa ia faaaofia ai ma ia lava, e ui sa lei agasala o ia. O le matuā loto mafatia o Esera faatasi ai ma lana tatalo faamaulalo na pāʻia ai loto o tagata ma uunaia ai i latou e faia gaoioiga e tusa ma le salamō. Sa latou faailoa atu se vaifofo e oo ane ai ni tiga—o i latou uma na solia le Tulafono a le Atua o le a latou toe faafoi atu a latou avā mai nuu ese i o latou nuu, ma faafoi faatasi atu ai ma a latou fanau. Na malie Esera i lenei faaiuga, ma ia faalaeiauina ai tagata uma na nofosala ina ia usiusitai. Ona o le pule lea na tuu atu ia te ia e le tupu o Peresia, sa maua ai e Esera le aiā e faaoo ai le sala oti i tagata uma na solia le tulafono, po o le faasaina o i latou mai le toe oo atu i Ierusalema ma Iuta. (Esera 7:12, 26) Ae foliga mai sa lei manaomia ona ia faia lena gaoioiga. Na faapea mai “le faapotopotoga uma, . . . E pei ona e fetalai mai ia te i matou, e faapea ona matou faia.” E lē gata i lea, na latou taʻutino: “Ua toatele i matou ua soli tulafono i lenei mea.” (Esera 10:11-13) O loo lisi mai i le mataupu e 10 o le Esera igoa o tane e toʻa 111 o ē na usiusitai i le faaiuga e ala i le toe faafoi o a latou avā o nuu ese ma fanau na latou fanauina.
8. Aisea na lelei ai mo tagata uma le gaoioiga vave ma le tiga o le toe faafoi o avā mai nuu ese?
8 O lenei gaoioiga sa lē gata mo le lelei o Isaraelu, ae faapea foi i tagata uma lava. Pe ana fai e lei faasaʻoina na mataupu, semanū e mitiia tagata Isaraelu i taaʻiga a o latou nuu tuaoi. I lena tulaga, na semanū e faaleagaina ai le gafa lea sa tatau ona tupuga mai ai le Fanau Folafolaina mo le faamanuiaina o le fanau uma a tagata. (Kenese 3:15; 22:18) Na semanū e faigata ai ona faamautinoa le tulaga o le Fanau Folafolaina e tupuga mai le gafa o le tupu o Tavita i le ituaiga o Iuta. I le 12 tausaga mulimuli ane, sa toe sagai atu ai manatu i lenei mataupu tāua, ina ua “vavaeeseina . . . le fanau a Isaraelu i tagata ese uma.”—Neemia 9:1, 2; 10:29, 30.
9. O le ā le fautuaga lelei ua aumaia e le Tusi Paia i Kerisiano ua faaipoipo i ni tagata lē talitonu?
9 O le ā se lesona e mafai e auauna a Ieova i aso nei ona aʻoaʻoina mai lenei tala? E lē o toe nonofo Kerisiano i lalo o le feagaiga o le Tulafono. (2 Korinito 3:14) Na i lo lea, ua latou usiusitai atu i “le tulafono a Keriso.” (Kalatia 6:2) O lea, o se Kerisiano o loo faaipoipo atu i se tagata lē talitonu, na te usitaia le fautuaga a Paulo: “Ai se tasi o le au uso ua i ai le avā le faatuatua, ua loto ina la nonofo ma ia, aua le molia o ia.” (1 Korinito 7:12) E lē gata i lea, o Kerisiano ua faaipoipo i ni tagata lē talitonu ua ia i latou le avega tauave faale-Tusi Paia ina ia galue e faataulau manuia a latou faaipoipoga. (1 Peteru 3:1, 2) O le usitai atu i lenei fautuaga matagofie ua masani ona iu ai i le faamanuiaga o le suia o loto o paaga lē talitonu e faatatau i le tapuaiga moni. O nisi ua oo lava ina avea o ni Kerisiano faamaoni ua papatisoina.—1 Korinito 7:16.
10. O le ā le lesona e mafai ona aʻoaʻoina e Kerisiano mai tane Isaraelu e toʻa 111 ia na toe faafoi a latou avā mai nuu ese?
10 Peitai, o le tulaga o tagata Isaraelu o ē na toe faafoi a latou avā mai nuu ese, ua aumaia ai se lesona sili ona lelei mo Kerisiano nofofua. E lē tatau ia i latou nei ona amata faia ni tuugatala ma tagata o le isi ituaiga e lē talitonu. E ono faigata le alofiaina o se faiā faapea, atonu foi e lagona ai le tiga, peitai o le laasaga lena e sili atu ona lelei ina ia maua ai e se tasi faamanuiaga faifai pea a le Atua. Ua poloaiina Kerisiano: “Aua tou te amo faalegatasi ma e le faatuatua.” (2 Korinito 6:14) So o se Kerisiano nofofua o loo faanaunau e faaipoipo e tatau ona ia fuafua e faaipoipo atu i se tagata talitonu o loo faatuatua moni.—1 Korinito 7:39.
11. I le pei o tane Isaraelu, e ono tofotofoina faapefea i tatou e tusa ai o le pogai o lo tatou fiafia?
11 E tele foi isi auala ua faia ai e Kerisiano ni fetuutuunaiga pe a faailoa atu ia i latou ua amata ona latou agaʻi atu i se tulaga e lē faale-Tusi Paia. (Kalatia 6:1) Mai lea taimi i lea taimi, o loo faailoa mai ai pea e lenei mekasini amioga lē faale-Tusi Paia e ono lē agavaa ai se tagata e tumau ona avea ma se vaega o le faalapotopotoga a le Atua. Mo se faaaoaoga, i le 1973, na oo ai ina malamalama atoatoa tagata o Ieova e faapea, o le faaaogaseseina o fualaau faasāina ma le faaaogaina o le tapaa o ni agasala matuia. Ina ia tuliloaina se ala faale-Atua, e tatau ai ona tatou “faamamā ia te i tatou i mea uma e leaga ai le tino atoa ma le agaga.” (2 Korinito 7:1) E toatele na latou matuā utagia lena fautuaga faale-Tusi Paia; sa latou loto malilie e puapuagatia i āuga faigata i le taimi amata a o taumafai e tuu ese na mea, ina ia mafai ona latou tumau o se veaga o tagata mamā o le Atua. Ua aumaia foi ni taiala manino faale-Tusi Paia e faatatau i mataupu o amioga faaleituaiga, o laei, o teuga, ma filifiliga atamai o galuega, o faafiafiaga, ma musika. Po o ā lava mataupu silisili faale-Tusi Paia ua faailoa mai ia i tatou, tau ina ia faamaonia atu lo tatou nofo sauni “e faia ni faasaʻoga,” e pei o tane Isaraelu e toʻa 111. (2 Korinito 13:11, NW) O le a faaalia ai i lenei mea faapea, o le faaeaga o le tapuai atu ia Ieova faatasi ma ona tagata paia ‘e faasili i mea uma tatou te fiafia i ai.’
12. O le ā na tupu i le 455 T.L.M.?
12 Ina ua mavae ona lipotia mai le tulaga na aafia ai le faia o avā mai nuu ese, e lei toe taʻu maia loa e le Tusi Paia ia i tatou ni mea na tutupu i Ierusalema mo le isi 12 tausaga na sosoo ai. E lē taumatea, atonu na atili feita ane nuu tuaoi o Isaraelu ona o le soloia o le tele o feagaiga o faaipoipoga. I le 455 T.L.M., na taunuu ai Neemia i Ierusalema sa faafeao ane e se vaegaau. Na tofia o ia e avea ma kovana o Iuta ma sa ia aumaia ni tusi faamaonia mai le tupu o Peresia e tuuina atu ai ia te ia le pule e na te toe fausia le aai.—Neemia 2:9, 10; 5:14.
Teteega Mai Tuaoi Lotovale
13. O le ā le uiga sa faaalia ane e tagata o lotu sese na tuaoi ma tagata Iutaia, ma na faapefea ona tali atu i ai Neemia?
13 Na tetee tagata o lotu sese o ē na tuaoi ane i le fuafuaga na oo ane ai Neemia. Na faamataʻu ane o latou taʻitaʻi ia te ia i le fesili ane: “Pe tou te fouvale ea i le tupu?” I le faaalia e Neemia o lona faatuatua ia Ieova, na ia tali atu ai: “O le Atua o le lagi, o ia lava na te faamanuia mai ia te i matou; o le mea lea e tulai ai o i matou ana auauna, ma faia le galuega; a o outou, e leai so outou tofi, po o se pule, po o se faamanatuga, i Ierusalema.” (Neemia 2:19, 20) Ina ua amata ona toe faafou le pa, o fili lava foi nei na taufaifai ane: ‘Se a le mea o faia e ia tagata vaivai o sa Iutā? Latou te toe atiina ae ea maa ai faupuegā-otaota ua susunuina? A alu ae i ai se alope, na te soloia lo latou pa maa.’ Na i lo le tali atu i nei faaupuga, sa tatalo Neemia: “Lo matou Atua e, ia e faafofoga mai; auā o loo inosia i matou; ma ia e faafoi atu lo latou faaluma mai i luga o latou ulu.” (Neemia 4:2-4) Sa faaauau pea ona faataatia e Neemia lenei faaaoaoga lelei o le faalagolago atu ia Ieova!—Neemia 6:14; 13:14.
14, 15. (a) Na faapefea ona taulima e Neemia le faamataʻu ane o faiga sauā a le fili? (e) Ua mafai faapefea e Molimau a Ieova ona faaauau i la latou galuega o le fausiaina faaleagaga e ui i teteega sili ona faigata?
14 Ina ia faataunuu lo latou tofiga tāua o le talaʻi atu, ua faapena foi ona faalagolago atu Molimau a Ieova i aso nei i le Atua. O loo taumafai tagata tetee e taofia lenei galuega e ala i faifaiga. O nisi taimi, e toe faamaamulu ai ni tagata sa fiafia i le feau o le Malo ona ua lē mafai ona latou tatalia tauemuga. Pe a lē taulau tauemuga, atonu e feita le au tetee ma saili atu i faamataʻuga e ala i faiga sauā. O mea na sa fesagai ma tagata na fausiaina pa o Ierusalema. Peitai sa lei faamatauina ai Neemia. Ae na i lo lea, sa ia faaauupegaina tagata galulue ina ia tetee atu i osofaiga a le fili ma faamalosia lo latou faatuatua e ala i le faapea atu: “Aua neʻi fefefe outou ona o i latou; ia outou manatunatu i le Alii silisili ma le matautia, ma ia outou tau mo outou uso, o outou atalii, ma o outou afafine, o a outou avā, ma o outou fale.”—Neemia 4:13, 14.
15 E pei ona iai i aso o Neemia, ua faapena foi ona faaauupegaina lelei Molimau a Ieova ina ia faaauau pea i la latou galuega o le fausiaina faaleagaga e ui i teteega sili ona faigata. Ua saunia mai e “le auauna faamaoni ma le mafaufau” meaʻai faaleagaga e faamalosia ai le faatuatua, lea e mafai ai e tagata o le Atua ona fua tele mai e oo lava i vaipanoa o loo faasāina ai le galuega. (Mataio 24:45) O le iuga, ua faaauau pea ona faamanuia e Ieova ona tagata e ala i faatelega i le lalolagi aoao.—Isaia 60:22.
Faafitauli i lo Latou Lava Lotoifale
16. O ā faafitauli i lo latou lava lotoifale na faamataʻuina ai loto o ē na fausiaina pa o Ierusalema?
16 A o faagasolo le fausiaina o pa o Ierusalema ma ua oo ina maualuga le pa, sa atili ai ona faigata le galuega. O iina loa na aliai mai ai se faafitauli na faamataʻuina ai loto o ē o loo tauivi ma le galuega. Ona o le utiuti o meataumafa, sa faigata ai mo nisi tagata Iutaia ona mauaina ni meaʻai mo o latou aiga ma lē mafai ona totogi atu a latou lafoga i le malo o Peresia. Sa nonō atu i ai e tagata mauoa o Iutaia ia i latou nei ni meaʻai ma tupe. Peitai, i le lē tusa ai ma le Tulafono a le Atua, sa tatau i tagata matitiva Isaraelu ona tuu atu o latou fanua ma a latou fanau e faamau ai a latou aitalafu ina ia latou toe totogia atu tupe faatasi ma ni pasene faasili. (Esoto 22:25; Levitiko 25:35-37; Neemia 4:6, 10; 5:1-5) O lea sa faamataʻuina i latou e tagata e nonō mai ai tupe faapea o le a faasa o latou fanua ma faamalosia e faatau atu a latou fanau e fai ma pologa. Sa matuā ita Neemia i lenei uiga lē alofa ma le matapeapea i meafaitino. Sa vave ona ia gaoioi ina ia faamautinoa le iai pea o faamanuiaga a Ieova i le galuega o le toe fausiaina o pa o Ierusalema.
17. O le ā na fai e Neemia e faamautinoa ai le faaauau pea o le faamanuia a Ieova i le galuega o le fausiaina, faatasi ai ma ā iuga?
17 Sa faatulaga “se faapotopotoga tele,” ma faaali manino atu ai e Neemia i tagata mauoa o Isaraelu e faapea, o mea sa latou faia e lē fiafia i ai le finagalo o Ieova. Ona ia aioi atu lea i ē sa faia gaoioiga sese, e aofia ai ma nisi o ositaulaga, ina ia toe faafoi uma pasene faasili na latou aveina ma toe faafoi atu fanua sa latou aveina ae lē tusa ai ma le tulafono mai ia i latou o ē na lē mafai ona latou totogia pasene faasili. O se tulaga e faamālō ai ona na faapea mai ē na sese: “Matou te toe tuuina atu lava, matou te le toe saili atu se mea ia te i latou; e pei ona e fetalai mai, e faapea ona matou faia.” Sa lē o ni upu e leai se uiga nei upu, auā ua taʻu mai e le Tusi Paia e faapea “ua fai foi e le nuu e tusa ma lenei upu [a Neemia].” Ona vivii ai lea o le faapotopotoga uma ia Ieova.—Neemia 5:7-13.
18. O le ā le uiga ua lauiloa ai Molimau a Ieova?
18 Ae faapefea o tatou aso? Na i lo le faia o ni faiga faatogafalea, ua lauiloa Molimau a Ieova i o latou uiga agaalofa i o latou uso talitonu ma isi ua pagatia i ni mala. E pei ona iai i aso o Neemia, ua iu lenei mea i le tele o faamatalaga faafetai o viiga ia Ieova. Peitai, i le taimi lava e tasi, ua iloa ai e “le auauna faamaoni ma le mafaufau” le talafeagai ona tuuina mai ni fautuaga faale-Tusi Paia e faatatau i mataupu faapisinisi faapea le manaoga ia alofia le faatogafalea o isi i ni faiga matapeapea. I nisi atunuu, e masani ona tāpā se tau telē mo se tamaitai faaipoipo, peitai e manino le lapataiga a le Tusi Paia e faapea, o tagata matapeapea ma ē fao mea o le a lē fai mo latou tofi le Malo o le Atua. (1 Korinito 6:9, 10) O le tali lelei atu a le toatele o Kerisiano i na fautuaga ua faamanatu mai ai le iloaina e na tagata Iutaia o lo latou tulaga agasala ona o lo latou faatogafalea o o latou uso matitiva.
Ua Maeʻa Pa o Ierusalema
19, 20. (a) O ā āuga na oo i tagata lotu tetee ina ua faamaeʻaina pa o Ierusalema? (e) O le ā le manumalo na oo i Molimau a Ieova i le tele o atunuu?
19 E ui i teteega uma, ae na faamaeʻaina lava pa o Ierusalema i totonu o le 52 aso. O ā āuga o lenei mea i tagata tetee? Na faapea mai Neemia: “Ua iloa e nuu uma na vagavagai ia te i matou, ona matuā faavaivai lea o i latou; auā ua latou iloa o lo tatou Atua na fai ai lena galuega.”—Neemia 6:16.
20 I aso nei, o loo tetee mai pea fili o le galuega a le Atua i auala eseese ma i nofoaga eseese. Peitai, e faitau miliona tagata ua latou vaaia le leai o se aogā o le tetee i Molimau a Ieova. Mo se faataitaiga, seʻi manatu i taumafaiga i taimi ua teʻa ina ia faamuta le galuega talaʻi i Nasi i Siamani, i Europa i Sasaʻe, ma le tele o atunuu o Aferika. Ua lē taulau uma na taumafaiga, ma e toatele tagata ua latou ioeina nei ‘o le Atua ua tatou faia ai le galuega.’ Maeu le avea o lenei mea o se taui mo ē ua leva ona faamaoni, ma latou avea le tapuaiga ia Ieova ‘e faasili i mea uma latou te fiafia i ai’ i na atunuu!
21. O ā mea tāua na tutupu o le a talanoaina i le mataupu o sosoo mai?
21 I le mataupu o sosoo mai, o le a tatou autaluina ai ni mea tāua na tutupu na taitaia atu i le faapaiaga olioli o pa na toe fausia o Ierusalema. O le a tatou talanoaina ai foi le auala ua latalata mai ai le faamaeʻaina o le aai e silisili atu, mo se manuia o le fanau uma a tagata.
E te Manatua?
◻ Na faapefea ona olioli Esera ma isi ia Ierusalema?
◻ O ā sese na fesoasoani atu Esera ma Neemia i le toatele o tagata Iutaia ina ia faasaʻoina?
◻ O ā lesona e mafai ona e maua mai tala o loo taʻua ai Esera ma Neemia?
[Ata i le itulau 15]
O Ierusalema sa faasili i mea uma e fiafia i ai Neemia, ae lē o lana galuega taualoa i Susana
[Ata i le itulau 17]
I le pei o Neemia, e manaomia ona tatou tatalo ia Ieova mo le taitaiga ma le malosi ina ia tatou faaauau ai pea i lo tatou tofiga sili ona tāua o le talaʻiga