Fesili Mai le Au Faitau

O le toatele o Molimau a Ieova e faamanatuina aso na faaipoipo ai. O se aso fanau o le faamanatuina lea o le aso na e fanau ai. Aisea la e faamanatu ai aso na faaipoipo ai ae lē faamanatuina aso fanau?

O le mea moni lava, e lē o manaomia e se Kerisiano ona faamanatuina aso uma ia. Peitai, e lē o le uiga o lea mea e tutusa le tāua o aso ia e lua, pe e ao foi i Kerisiano ona tagai i le faamanatuina o aso na faaipoipo ai e tutusa ma le faamanatuina o aso fanau.

E pei ona silafia, e mafai ona faapea o ia aso uma, o ni aso faamanatu, auā o se “aso faamanatu” o ʻle toe faamanatuina lea faaletausaga o se aso na faailogaina ai se mea na tupu.’ E mafai ona avea o se faamanatuga o so o se mea lava sa tupu—le aso na tupu ai se faalavelave tau taavale ia te oe, na vaaia ai le gasetoto o le masina, sa tou ō ai ma lou aiga tou te ʻauʻau, ma isi mea faapena. Ae e manino e lē faaliliuina e Kerisiano “aso faamanatu” taitasi e avea ma aso faapitoa pe faia foi se pātī e faamanatu aʻi. E tatau i se tasi ona iloilo vala o se mea na tupu ma filifili ai pe talafeagai.

Mo se faaaoaoga, na faatonuina faapitoa lava e le Atua Isaraelu ina ia faamanatuina faaletausaga le aso na sopoia ai e lana agelu fale o tagata Isaraelu i Aikupito ma le solaaga mulimuli ane ai a ona tagata i le 1513 T.L.M. (Esoto 12:14) Ina ua faamanatuina mulimuli ane e Iutaia e aofia ai ma Iesu le faamanatuga o lena mea na tupu, o le usitai lea i le taitaiga a le Atua, ma latou te lei faia faapea i le faia o se pātī pe na feaveai ai ni meaalofa. Na faatāuaina faapitoa foi e Iutaia le toe faapaiaina o le malumalu. E ui ina sa lei faatonuina mai i le Tusi Paia lea faamanatuga faatalafaasolopito, a ua faapea mai le Ioane 10:22, 23 sa lei faitioina lava e Iesu le faia o lea faamanatuga. Mulimuli lava, ua faia ai e Kerisiano se sauniga faapitoa o le faamanatuina o le maliu o Iesu. O le mea moni, e faia lenei mea i le usiusitai i le faatonuga manino ua maua i le Afioga a le Atua.—Luka 22:19, 20.

Ae faapefea aso faamanatu o faaipoipoga? I nisi atunuu, o se tu masani mo tane ma avā ona faamanatuina le tausaga na la ulu atu ai i le tulaga faaipoipoina, o se faatulagaga na amataina e le Atua. (Kenese 2:18-24; Mataio 19:4-6) E mautinoa lava, e lē o manatu faatauvaa le Tusi Paia i le faaipoipoga. Na auai Iesu i le ʻaiga fiafia o se faaipoipoga ma faia sana fesoasoani mo le fiafiaga o lea faaipoipoga.—Ioane 2:1-11.

Ua lē o se mea e lē masani ai mo se ulugalii i le faamanatuina o le la faaipoipoga, ona faaalu se taimi e toe manatunatu ai i le fiafiaga o lena aso ma le la faaiuga e galulue mo le taulau manuia i le avea o se ulugalii. Pe faamanatuina lea aso fiafia na o i laua o se ulugalii, pe valaaulia foi ni nai tauaiga po o ni uo vavalalata e iai ma i laua, e pule lava i laua. E lē tatau ona fai ma faamolemolega lea aso mo le faia ai o se faatasiga telē. I lea aso e ao lava i Kerisiano ona taitaia e mataupu silisili masani o loo ola ai i aso uma o o latou olaga. Pe manao la se tasi e faamanatu le aso na faaipoipo ai pe leai foi, o le mataupu lena e patino i le tagata lava ia.—Roma 13:13, 14.

Ae faapefea la, le faamanatuina faapitoa o se aso fanau? Po o tatou iloa ea ni faamaoniga mai le Tusi Paia o sea aso faamanatu?

Ia, i le amataga o lenei senituri, na faamanatu ai e Tagata Aʻoga o le Tusi Paia, e pei ona iloa ai Molimau a Ieova i lena taimi, ia aso fanau. O le toatele o i latou na teuina ni tamai tusi e taʻua o le Daily Heavenly Manna. Na iai i ia tusi se mau o le Tusi Paia mo aso taitasi, ma o le toatele o Kerisiano na latou tuuina se tamai ata i itulau e fesootai atu i aso fanau o o latou uso a Tagata Aʻoga o le Tusi Paia. E lē gata i lena, i le Watch Tower, Fepuari 15, 1909, na taʻua ai e faapea i se tauaofiaga i Jacksonville, i Florida, i le Iunaite Setete o Amerika, na valaauina ai i le pulelaa le peresitene o le Sosaiete sa iai i le taimi lena, le uso o Russell. Aisea? Na faaofo ai o ia i le avatua o se meaalofa o lona aso fanau, o ni pusa o moli ʻai suka, o fala ma moli. O se ata lena e faailoa mai ai ia i tatou faiga sa iai muamua. I le tulaga o mea na iai, e manatua ai e faapea i lena vaitaimi, na faamanatu ai e Tagata Aʻoga o le Tusi Paia ia Tesema 25 o se aso na fanau ai Iesu po o le aso fanau. Sa avea foi o se tu masani le faia o se ʻaiga faapitoa o le afiafi o le Kirisimasi i le ofisa ulu i Brooklyn.

O le mea moni, talu mai lena taimi ua tutupu aʻe ai faaleagaga tagata o le Atua i le tele o vala. I tausaga o le 1920 agaʻi i le 1929, o le malamalama faateleina o le upu moni na mafai ai ona latou iloa manatu nei:

Sa lei fanau Iesu ia Tesema 25, o se aso na fesootai atu i lotu faapaupau. O loo faasino i tatou e le Tusi Paia ina ia faamanatuina le aso o le maliu o Iesu, e lē o le faamanatuina o lona aso fanau po o se aso fanau foi o so o se isi lava. O le faia faapea e ogatusa ma le Failauga 7:1 ma le mea moni e faapea o le auala e ola ai le olaga o se tagata faatuatua ma faamaoni e tāua na i lo le aso o lona fanau mai. E leai se faamaumauga a le Tusi Paia faapea na faamanatu e so o se auauna faatuatua lava sona aso fanau. O loo faamauina ai faamanatuga o aso fanau o tagata faapaupau, ma gaoioiga sauā na tutupu ai i ia aso fanau. Seʻi o tatou vailia le talaaga o le faamanatuina o na aso fanau.

Muamua o le aso fanau o Farao i aso o Iosefa. (Kenese 40:20-23) E faatatau i ai, ua amata ai le mataupu i aso fanau i le tusi a Hasting o le Encyclopædia of Religion and Ethics e faapea: “O le tu o le faamanatuina o le aso o le fanau mai e fesootai i lona faiga, ma le faitauina o le taimi, ma i mea o aofia ai, e fesootai ma nisi o uluai aʻoaʻoga patino faalelotu.” Mulimuli ane, ua sii mai upu e le encyclopedia a se tagata suesue faatatau i Aikupito anamua o Sir J. Gardner Wilkinson, o lē na tusi e faapea: “O tagata Aikupito uma lava e latou te matuā faatāuaina le aso, e oo lava i le itula o lona fanau mai; ma e foliga mai atonu, e pei ona faia i Peresia, na faamanatuina ai e tagata taitoatasi lona lava aso fanau i ni fiafiaga tetele, faafeiloaia o ana uo faatasi ai ma faiga faafiafia uma a tagata auai, ma le sili atu i le tulaga e masani ai o ituaiga meaʻai eseese mananaia e laulauina.”

O le isi aso fanau o loo taʻua i le Tusi Paia o Herota, lea na vavaeina ai le ulu (tulou) o Ioane le Papatiso. (Mataio 14:6-10) Ua saunia mai e le International Standard Bible Encyclopedia (lomiga 1979) lenei faamatalaga: “O tagata Eleni anamuā lava na latou faamanatuina aso fanau o atua ma tagata tāua. O le upu E[len]i genéthlia ua faasino atu i nei aso faamanatu, a o le genésia o se sauniga faamanatu o le aso fanau o se tagata tāua ua maliu. I le 2 Mak[apaio] 6:7 ua tatou maua ai se faamatalaga e faatatau i le genéthlia (le faamanatuga) faalemasina o le aso fanau o Anetikosa IV, o le taimi lea na faamalosia ai tagata Iutaia e ‘ʻaai i mea na osia ai taulaga.’ . . . Ina ua faamanatuina e Herota lona aso fanau, na gaoioi o ia e tusa ma le tu a tagata Eleni anamua; e lē o iai se faamaoniga o se faamanatuga o ni aso fanau i Isaraelu i taimi o tagata Eleni anamuā lava.”

O le mea moni lava, e lē o soona popole Kerisiano moni i aso nei i amataga ma fesootaiga iloga o tu po o faiga uma faalotu anamua, ma latou te lē o mananao foi e faaleamanaiaina faamaoniga manino o loo iai i le Afioga a le Atua. E aofia ai i lenei mea le manatu faapea e pau faamanatuga o aso fanau o loo i faamaumauga faale-Tusi Paia, o aso fanau faapaupau ma na fesootai atu i ni faiga sauā. O lea la, ua tuuina ai ma le manino e le Tusi Paia faamanatuga o aso fanau i se tulaga e lē manaomia, o se mea moni e lē tatau i Kerisiano faamaoni ona lē amanaiaina.

O le mea lea, a o avea o se mataupu totino a Kerisiano lava ia pe manao e faamanatu a latou faaipoipoga pe leai, ae o loo iai mafuaaga tāua e ao ai i Kerisiano taʻumatuaina faaleagaga ona aloese mai le faamanatuina o aso fanau.