Ia Outou Galueaiina Pea lo Outou Faaolataga!
“Aʻu pele e, . . . ia outou galueaiina pea lo outou faaolataga i le mataʻu ma le gatete.”—FILIPI 2:12.
1, 2. O ā manatu taatele ua māfua ai ona lagona e le toatele o tagata faapea ua lē mafai ona latou puleaina le tulaga ua oo i ai o latou olaga?
“PE NA e fanau mai lava faapena?” E lata mai nei, sa faamatilatila ai lenei fesili i le faavaa o se mekasini lauiloa. I lalo ifo o le ulutala sa iai upu nei: “Uiga totino, uiga masani, e oo lava i filifiliga i le olaga. Ua faaalia i suesuega fou e foliga mai o nei uiga e te fanau mai lava ma oe.” O na manatu e ono lagona ai nisi faapea e itiiti lava se avanoa latou te puleaina ai o latou lava olaga.
2 Ua popole isi faapea o le leaga ona tausia aʻe i latou e o latou mātua po o le leaga ona aʻoaʻoina i latou e o latou faiaʻoga, atonu o le pogai lea ua latou malaia ai i se olaga lē fiafia. Latou te ono manatu ua tuupoina i latou e toe faia mea sese ia na fai e o latou mātua, e gaoioi e tusa o faalogona e sili ona leaga, ia lē faamaoni atu ia Ieova—pe a faapuupuu le manatu, e faia filifiliga leaga. Po o le mea ea lena o loo aʻoaʻo e le Tusi Paia? E mautinoa, o loo iai ni tagata lotu, e maumauai faapea o loo aʻoaʻo e le Tusi Paia se manatu faapena, le aʻoaʻoga o le muai tuupoina. E faapea mai lenei aʻoaʻoga, ua leva ona muai fuafuaina e le Atua mea taitasi uma e tutupu i lou olaga.
3. O le ā le feau faalaeiau o loo iai i le Tusi Paia e faatatau i lo tatou tomai e amoina ai le tiute tauave mo lo tatou lumanai?
3 O nei uma manatu eseese e tasi lava le feau o loo latou faaoo mai: E itiiti sau filifiliga i lou olaga, e itiiti se avanoa e te puleaina ai mea o le a oo i ai lou olaga. O se feau faavaivailoto, a ea, ma o le lotovaivai e faaopoopo atu i le faafitauli. Ua faapea ai le Faataoto 24:10: “Afai e te faavaivai i le aso vale, ua itiiti lava lou malosi.” Peitai ua faalaeiauina i tatou e iloa, e tusa ai o le manatu o le Tusi Paia, e mafai ona tatou ‘galueaiina lo tatou lava faaolataga.’ (Filipi 2:12) E mafai faapefea ona tatou faamausaliina lo tatou talitonuga mautinoa i lenei aʻoaʻoga faalaeiau a le Tusi Paia?
Le Galuega “Ati ae” o Loo Tatou Faia ia i Tatou Lava
4. E ui o loo tautala le 1 Korinito 3:10-15 i se galuega ati ae e faia i mea e lē mugofie i le afi, ae o le ā e lē faatatauina i ai lenei mea?
4 Seʻi manatu i le talafaatusa a le aposetolo o Paulo lea e maua i le 1 Korinito 3:10-15. O iina, o loo ia taʻua ai se galuega atiae faa-Kerisiano, ma e mafai ona faatatauina le mataupu silisili o lana talafaatusa, i le faiva i le tagata lava ia ma le faiva atu i isi tagata. Po o ia faatatauina ea faapea, o le filifiliga faaiu a se soo e auauna ia Ieova ma tumau ai i lena filifiliga, o se tiute tauave lea e paʻū atoa atu ia i latou o ē na aʻoaʻoina ma toleniina lena soo? E leai. Sa faamamafa e Paulo le tāua o le faia e le faiaʻoga o le mea e sili ona lelei na te mafai i le galuega atiae. Peitai e pei ona tatou aʻoaʻoina i le mataupu ua mavae atu, sa ia lei faapea mai e leai se filifiliga a le tagata suesue po o le soo i le mataupu. E moni, o loo taulai atu le talafaatusa a Paulo i le galuega o loo tatou faia i isi, ae lē o le atiina ae o i tatou lava. Ua manino lena manatu auā o loo taʻua e Paulo faapea o se galuega atiae sa faatalale le faiga e iu ina faaleagaina ae sao mai ai pea le tagata na faia le galuega. E ui i lea, e iai nisi taimi e faatatau atu ai e le Tusi Paia lena lava ituaiga o gagana i le galuega o loo tatou faia ia i tatou lava.
5. O ā mau e faaalia ai e tatau i Kerisiano ona faia le galuega “ati ae” ia i latou lava?
5 Mo se faaaoaoga, seʻi talanoaina le Iuta 20, 21: “O outou le au pele e, ia outou ati ae ia te outou i lo outou faatuatua e silisili ona paia, o le Agaga Paia tou te tatalo ai; ia outou faatumau ia te outou i le alofa o le Atua.” Iinei o loo faaaogā ai e Iuta le upu Eleni mo le “ati ae” lea foi o loo faaaogā e Paulo i le 1 Korinito mataupu e 3, peitai o le manatu o Iuta e foliga o loo faasino i lo tatou ati ae o i tatou lava i luga o le faavae o lo tatou faatuatua. Ina ua taʻua e Luka le talafaatusa a Iesu i le tagata na fau lona fale i luga o le papa, sa ia faaaogā le upu Eleni mo le “faavae” lea foi o loo faaaogā e Paulo i lana talafaatusa i se fale faa-Kerisiano. (Luka 6:48, 49) E lē gata i lea, o loo faaaogā e Paulo se gagana faafaatusa o le faamautu aʻe i luga o se “faavae” ina ua ia timai atu i ona uso Kerisiano e agaigai i luma faaleagaga. Ioe, o loo aʻoaʻo e le Afioga a le Atua faapea e tatou te faia foi le galuega “ati ae” ia i tatou lava.—Efeso 3:15-19; Kolose 1:23; 2:7.
6. (a) Faataitai mai le auala ua maua ai soo Kerisiano taitoatasi ona o iuga o se galuega atiae faifaatasi. (e) O le ā le tiute tauave ua iai i soo taitoatasi?
6 Po o le atiina ae o se Kerisiano o se galuega e fai e se tagata e toatasi? Seʻi faaāta i lou mafaufau faapea ua e fuafua e fau se fale. Ua e talosagaina se tagata tusiata mo se ata e fau agaʻi i ai lou fale. E ui e te manao e faia lava e oe le tele o le galuega, peitai e te ono totogia se tagata e tomai faapitoa i fauga fale ina ia lua galulue faatasi ma faasino mai ia te oe ni auala e sili ona lelei. Pe afai na te faataatia se faavae mausalī, fesoasoani ia te oe ina ia e malamalama i le ata o le fale, taʻu atu ia te oe meafaufale e sili ona lelei e faatau mai, pe oo foi ina ia faasino ia te oe le tele o mea e faatatau i le fausiaina o le fale, e mautinoa o le a e ioe ua faia e lena tagata se galuega lelei. Ae faapefea pe afai e te lē amanaia lana fautuaga, ua e faatauina ni meafaufale e taugofie pe lē lelei, pe oo foi ina e lē mulimuli i le ata tusi a le tagata tusiata? E mautinoa e lē mafai ona e tuuaʻia le tagata faufale po o lē na tusia le ata pe a paʻū le fale! I se tulaga tutusa, o soo uma Kerisiano o le iuga lea o se galuega atiae faifaatasi. O Ieova le matai sili na tusiaina le ata. E na te lagolagoina le Kerisiano faamaoni o lē, i le avea o sē “faigaluega . . . faatasi ma le Atua,” e aʻoaʻo atu ai ma ati ae e lea Kerisiano se tagata suesue. (1 Korinito 3:9) Peitai e aofia ai foi le tagata suesue. I le aotelega faaiu la, o le tagata suesue o ia lava e iai le avega tauave i le ala e ola ai. (Roma 14:12) Pe afai na te fia maua ni uiga lelei faa-Kerisiano, e ao ona ia galue mamafa e maua na uiga, ia atiina ae i totonu ia te ia.—2 Peteru 1:5-8.
7. O ā luʻi ua fesagai ma nisi Kerisiano, ma o le ā atonu e faamafanafanaina ai i latou?
7 O lona uiga ea la, e leai se aogā o uiga na fananau mai ma i tatou, lo tatou siomaga, ma le uigā o ē na aʻoaʻoina i tatou? E lē o lena. E amanaia e le Afioga a le Atua nei vala taitasi uma e tāua ma iai ni o latou taaʻiga. E tele faanaunauga agasala, ma lē lelei na fananau mai ma i tatou ma e faigata tele ona teena. (Salamo 51:5; Roma 5:12; 7:21-23) O toleniga faamātua ma le siomaga i le aiga e mafai ona iai sona aafiaga tele i se talavou—mo le lelei pe mo le leaga. (Faataoto 22:6; Kolose 3:21) Sa taʻusalaina e Iesu taʻitaʻi lotu Iutaia ona o āuga leaga o a latou aʻoaʻoga i isi. (Mataio 23:13, 15) I aso nei, o mea na o loo aafia ai i tatou uma. Mo se faaaoaoga, o loo fesagai nisi tagata o le Atua ma luʻi ona o tulaga faigata na latou fesagai a o laiti. E manaomia e i latou nei lo tatou agalelei ma faalogona alofa. Ma e mafai ona latou maua se faamafanafanaloto mai le feau a le Tusi Paia e faapea e lē o tuupoina i latou e toe faia mea sese ia na fai e o latou mātua pe ia lē faamaoni. Seʻi manatu i le auala ua faataitaia ai e nisi tupu o Iuta anamua lenei manatu.
Tupu o Iuta—Sa Fai a Latou Lava Filifiliga
8. O le ā le faaaoaoga leaga na maua e Iotama i lona tamā, peitai o le ā le filifiliga na ia faia?
8 Na avea Usia ma tupu a o talavou lava i le 16 o ona tausaga, ma sa avea o ia ma tupu mo le 52 tausaga. A o faagasolo le tele o lena taimi, sa ia “faia le amiotonu i luma o Ieova e tusa ma mea uma na faia e Amasia lona tamā.” (2 Tupu 15:3) Sa faamanuia o ia e Ieova i se faasologa sosoo o manumalo mataina a lana vaegaau. Ae faanoanoa lava ona sa oo ina fiasili Usia i lona tulaga manuia. Na oo ina faamaualuga ma fouvale o ia ia Ieova i lona ofoina atu o mea manogi i le fata faitaulaga i le malumalu, o se tiute e na o ositaulaga latou te faia. Na aoaia mamafa Usia ae sa ia matuā toatamai ai. Ona faalumaina lea o ia—na taia i le lepela ma faleesea ai seia oo lava ina oti. (2 Nofoaiga a Tupu 26:16-23) Na faapeī le tali atu a lona atalii o Iotama i lenei mea? Sa ono faigofie lava ona taaʻina le taulealea i uiga o lona tamā ma ono lē fiafia ai i le faasaʻoga a Ieova. Sa ono mafai foi e tagata lautele ona faaaafia o ia i ni taaʻiga sese auā sa latou faia pea faiga faalotu sese. (2 Tupu 15:4) Peitai sa faia e Iotama lana lava filifiliga. “Ua faia [“pea,” NW] e ia le amiotonu i luma o Ieova.”—2 Nofoaiga a Tupu 27:2.
9. O ā nisi o taaʻiga lelei na maua e Aasa, ae na faapeī le tulaga na iu i ai lona olaga?
9 E 16 tausaga na avea ai Iotama ma tupu, ma tumau pea lona faamaoni ia Ieova i na taimi uma. O lea la, sa maua e lona atalii o Aasa se faaaoaoga e sili ona lelei a se tamā faamaoni. Na iai foi nisi taaʻiga lelei na maua e Aasa. Sa faamanuiaina o ia e ola i le vaitaimi sa faia ai i le nuu valoaga a perofeta faamaoni o Isaia, Hosea, ma Mika. Peitai, sa ia faia se filifiliga leaga. “Ua le faia e ia le amiotonu i luma o Ieova, e pei o Tavita lona tamā.” Sa ia faia faatusa o Paala ma tapuai atu i ai, ma susunuina foi nisi o ona lava atalii i le afi e fai ai taulaga i atua faapaupau. E ui i taaʻiga e sili ona lelei sa ia maua, ae na matuā matautia lona lē taulau o se tupu ma o se auauna a Ieova.—2 Nofoaiga a Tupu 28:1-4.
10. O le ā le ituaiga o tamā na iai Aasa, ae o le ā le filifiliga na faia e lona atalii o Esekia?
10 Pe a fua i le tulaga o le tapuaiga mamā, e faigata ona faaāta i le mafaufau se isi tamā e sili atu lona leaga na i lo Aasa. Peitai, sa lei mafai e lona atalii o Esekia ona filifilia sona lava tamā e fanau mai ai! O atalii ia na fasiotia e Aasa e fai ai taulaga ia Paala e foliga mai o uso lava o Esekia. Pe na avea ea lenei talaaga matautia e faamalaiaina ai Esekia i se olaga o le lē faamaoni atu ia Ieova? I le tuufaafeagai, sa avea Esekia o se tasi o tupu na sili ona lelei o Iuta—o se tagata faamaoni, e atamai, ma alofagia. “Sa ia te ia Ieova.” (2 Tupu 18:3-7) O le mea moni, e iai se mafuaaga e talitonu ai faapea, a o talavou pea le aloalii lenei o Esekia, sa avea o ia ma tusitala faagaeeina o le Salamo lona 119. Afai o le tulaga lena, e lē faigata la ona iloa le mafuaaga na ia tusia ai upu nei: “Ua sisina ifo oʻu loimata [“ou te lē mafai ona moe,” NW] ona o le faanoanoa.” (Salamo 119:28) E ui i faafitauli sa ia faanoanoa ai, ae na faataga e Esekia le Afioga a Ieova e taitaia lona olaga. Fai mai le Salamo 119:105: “O lau afioga o le sulu lea i oʻu vae, ma le malamalama i loʻu ala.” Ioe, sa fai e Esekia lana lava filifiliga—le filifiliga saʻo.
11. (a) E ui i taaʻiga lelei a lona tamā, ae o le ā le mamao na oo i ai le fouvale a Manase faasaga ia Ieova? (e) O le ā le filifiliga na faia e Manase a o faaiuiu lona olaga, ma o le ā e mafai ona tatou aʻoaʻoina mai lenei mea?
11 Peitai i se tulaga uigaese, sa aliai mai ai i se tupu e sili ona lelei o Iuta se tasi o tupu e sili ona leaga. O le atalii o Esekia o Manase sa ia matuā faaauilumaina faiga faaifo i tupua, faiga faataulaitu, ma faiga sili ona sauā i se tulaga e lei iai faapea muamua. Ua faapea mai le tala “ua fetalai mai [“pea,” NW] Ieova ia Manase ma lona nuu,” e foliga sa faaauala mai i perofeta. (2 Nofoaiga a Tupu 33:10) E tusa ai ma uputuu faa-Iutaia, sa tali atu Manase e ala i lona fasiotia o Isaia i le vaevaeina i le ʻili. (Faatusatusa i le Eperu 11:37.) E tusa lava pe saʻo lena mea pe leai, ae sa lei taulau ona faalogo atu Manase i lapataiga tauatua. O le mea moni, na ia susunuolaina nisi o ona atalii e fai ai taulaga, e pei lava o le mea na faia e Aasa le tamā o lona tamā. Peitai, ina ua fesagai lenei tagata amioleaga ma puapuaga matuitui i taimi mulimuli o lona olaga, sa ia salamō ma suia ona ala. (2 Nofoaiga a Tupu 33:1-6, 11-20) O lana faaaoaoga ua tatou iloa ai, e lē faapea a faia e se tagata ni filifiliga sili ona leaga ona lē mafai lea ona toe foi i le lelei. E mafai ona suia o ia.
12. O ā filifiliga tuufaafeagai na faia e Amone ma lona atalii o Iosia e faatatau i le auaunaga ia Ieova?
12 Sa ono mafai ona telē se lesona e aʻoaʻo e Amone le atalii o Manase mai le salamō o lona tamā. Peitai sa ia faia ni filifiliga leaga. ‘Ua faatele e Amone ana agasala’ seia oo lava ina fasiotia o ia. Peitai o lona atalii o Iosia sa matuā ese mai. E mautinoa sa filifili Iosia e aʻoaʻoina se lesona mai le mea na tupu i le tamā o lona tamā. Sa amata ona ia pule ina ua faatoʻā valu ona tausaga. I le na o le 16 o ona tausaga, na amata ai ona ia saili mo Ieova ma faamaonia o ia o se tupu lelei ma le faamaoni. (2 Nofoaiga a Tupu 33:20–34:5) Sa ia faia se filifiliga—se filifiliga saʻo.
13. (a) O ā mea tatou te aʻoaʻoina mai tupu o Iuta sa tatou talanoaina? (e) O le ā le tāua o toleniga faamātua?
13 O lenei iloiloga puupuu o tupu e toafitu o Iuta ua aʻoaʻo mai ai se lesona malosi. I nisi tulaga, o tupu sa sili ona leaga na tutupu mai ai ni atalii sili ona lelei, ae i le isi itu, o tupu na sili ona lelei na tutupu mai ai ni atalii sili ona leaga. (Faatusatusa i le Failauga 2:18-21.) E lē faaitiitia ai i lenei mea le tāua o toleniga faamātua. O mātua latou te toleniina a latou fanau e tusa ma ala o Ieova e mautinoa lo latou tuuina atu i a latou fanau o le avanoa e sili ona lelei ina ia avea ai ma auauna faamaoni a Ieova. (Teuteronome 6:6, 7) Ae o nisi foi fanau, e ui lava i taumafaiga sili ona lelei a mātua faamaoni, e latou te filifili lava e uia se ala sese. O isi fanau, e ui i taaʻiga sili ona leaga a mātua, ae latou te filifili lava e alolofa ma auauna atu ia Ieova. Faatasi ai ma lana faamanuia ua latou taulau manuia ai i o latou olaga. Pe iai ea ni taimi e te tau mānatu ai, po o lē fea filifiliga o le a e fai? Seʻi manatu la, i nisi o faamautinoaga totino a Ieova e faapea e mafai ona e faia le filifiliga saʻo!
E Talitonuina Oe e Ieova!
14. E faapefea ona tatou iloa e malamalama Ieova i le mea e gata mai ai lo tatou mafai?
14 E silafia mai e Ieova mea uma. Ua faapea mai le Faataoto 15:3: “O loo i mea uma lava fofoga o Ieova; o loo matuā silasila i e amio leaga ma e amio lelei.” Fai mai le faamatalaga a le tupu o Tavita e faatatau ia Ieova: “Na silasila mai ou fofoga i oʻu tino uma ina o afuafua; ua tusia foi uma lava i lau tusi, o ona aso foi na faia ai, a o leai ni oʻu tino.” (Salamo 139:16) O lea la, e silafia mai e Ieova faanaunauga sese o loo e tauivi i ai—po o ni faanaunauga na e ola mai ma oe po o ni faanaunauga ua oo ia te oe ona o isi taaʻiga ua lē mafai ona e puleaina. E malamalama lelei o ia i le tulaga ua faaaafia ai oe e nei faanaunauga. E sili atu lona malamalama i le mea e gata mai ai lou mafai na i lo oe lava ia. Ma e alofa mutimutivale o ia. E lē tāitai ona ia faatalitalia mai ia i tatou ni mea e sili atu na i lo mea tatou te mafaia.—Salamo 103:13, 14.
15. (a) O le ā se puna o faamafanafanaga mo i latou o ē ua mafatia ona o ni faiga faatiga sa faia ma le loto i ai e isi? (e) Ua faamamaluina i tatou taitoatasi e Ieova e ala i le tuuina mai ia i tatou o le ā le tiute tauave?
15 Ae i se isi itu, e lē o silasila mai Ieova faapea o i tatou o nisi ua lē mafesoasoania pe a fetaiai ma faigata. Pe afai sa iai ni mea na tutupu ia i tatou i aso ua teʻa, e mafai ona faamafanafanaina i tatou i le mautinoa e ʻinoʻino Ieova i na amioga leaga uma sa faia ma le loto i ai. (Salamo 11:5; Roma 12:19) Ae pe o le a ia faasao mai ai la i tatou mai āuga o a tatou gaoioiga sese pe afai tatou te toe liliu atu ma faia ma le iloa ni filifiliga sese? O le mea moni e leai. Ua faapea mai lana Afioga: “E taitasi ma ave i lana lava avega.” (Kalatia 6:5) Ua faamamaluina e Ieova ana foafoaga atamamai taitoatasi e ala i le tuuina atu o le avega tauave e fai ai le mea saʻo ma auauna ia te ia. E pei lava ona sa fai atu Mose i le nuu o Isaraelu: “Ou te valaau i le lagi ma le lalolagi i le aso nei e fai ma molimau ia te outou, ua ou tuuina atu i ou luma o le ola ma le oti, o le manuia ma le malaia; o lenei, ia e filifili i le ola, ina ia ola ai oe atoa ma lau fanau.” (Teuteronome 30:19) E iai le talitonuga o Ieova e mafai foi e i tatou ona faia le filifiliga saʻo. Tatou te iloa faapefea lena mea?
16. E mafai faapefea ona tatou taulau manuia i le ‘galueaiina o lo tatou faaolataga’?
16 Mātau le mea na tusi ai le aposetolo o Paulo: “O lenei, aʻu pele e, . . . ia outou galueaiina pea lo outou faaolataga i le mataʻu ma le gatete, . . . auā o le Atua, o loo galue i totonu ia te outou, ina ia outou loto i mea e finagalo malie ai o ia ma ia outou galulue ai.” (Filipi 2:12, 13) O le uluai upu Eleni e sau ai le upu “galueaiina” iinei o loo faaalia ai le faia ia maeʻa se mea. E leai la se tasi o i tatou ua faamalaiaina ia lē taulau pe ia faamaamulu. Atonu e iai le talitonuga o Ieova le Atua e mafai ona tatou faamaeʻaina le galuega ua ia tuuina mai ia i tatou e fai—le galuega e taitaia atu i lo tatou faaolataga—auā pe ana lē o lea, semanū na te lē faagaeeina lena faamatalaga. Ae faapefea ona tatou taulau manuia? E lē faia i so tatou lava malosi. Pe ana fai e lava so tatou malosi i totonu ma ia i tatou lava, semanū e lē manaomia fua ona “mataʻu ma le gatete.” Na i lo lea, o Ieova ‘e galue i totonu o i tatou,’ o loo galue lona agaga paia i o tatou mafaufau ma loto, e fesoasoani ia i tatou ‘ina ia loto ma galulue ai.’ I le iai o lena fesoasoani alofa, pe iai la se mafuaaga e lē tatau ai ona tatou faia ni filifiliga saʻo i le olaga ma tausisi i ai? E leai!—Luka 11:13.
17. O ā suiga e mafai ona tatou faia ia i tatou lava, ma e faapefea ona fesoasoani Ieova ia i tatou e faia faapea?
17 O le a iai toʻatugā e tatau ona tatou manumalo ai—atonu o ni amioga leaga ua masani ai i le olaga ma ni taaʻiga lē lelei e mafai ona faasese ai o tatou mafaufauga. E ui i lea, i le iai o le fesoasoani a le agaga o Ieova, e mafai ai ona tatou manumalo mai nei mea! E pei ona tusi atu Paulo i Kerisiano i Korinito, e matuā lava le malosi o le Afioga a le Atua e lepeti ai e oo lava i “ʻolo [“mea ua matuā mauaa,” NW].” (2 Korinito 10:4) O le mea moni, e mafai ona fesoasoani Ieova ia i tatou e faia ni suiga tetele ia i tatou lava. Ua uunaia i tatou e lana Afioga ina ia “to ese le tagata tuai o loo ua leaga” ae ia “oofu outou i le tagata fou ua faia e foliga i le Atua, i le amiotonu ma le amio lelei e faamaoni.” (Efeso 4:22-24) Pe mafai e le agaga o Ieova ona fesoasoani moni ia i tatou ina ia faia na suiga? E mautinoa lena mea! Ua faatupuina e le agaga o le Atua fua o le agaga ia i tatou—o uiga matagofie, ma le tautele e tatou te mananao uma lava e ati ae. O le uiga muamua o nei uiga o le alofa lea.—Kalatia 5:22, 23.
18. O le ā le filifiliga e mafai lelei e tagata mafaufau uma ona faia, ma o le ā e tatau i lenei mea ona fesoasoani ia i tatou e filifili maumauai e fai?
18 Ua faatulaga mai ai iinei se mea moni sili, e tuusaoloto ai. E lē gata mai le tele o le alofa o Ieova le Atua, ma ua faia i tatou i lona faatusa. (Kenese 1:26; 1 Ioane 4:8) E mafai la ona tatou filifili e alolofa ia Ieova. Ma o lena alofa—o le ki lea i lo tatou lumanai—ae lē o lo tatou olaga sa iai muamua, e lē o o tatou masei ua iai, e lē o lo tatou faanaunauga foi na ola mai ma i tatou ina ia faia le mea sese. O le alofa ia Ieova le Atua o le mea lena sa manaomia e Atamu ma Eva ina ia tumau ai ona la faamaoni i Etena. O le alofa lena e manaomia e i tatou taitoatasi ina ia tatou faasaoola atu ai ia Amaketo ma sao mai ai i le tofotofoga faaiu i le iuga o le Pulega Faa-Meleniuma a Keriso. (Faaaliga 7:14; 20:5, 7-10) O i tatou uma lava taitoatasi, po o ā lava o tatou tulaga, e mafai ona atiina ae lena alofa. (Mataio 22:37; 1 Korinito 13:13) Seʻi o tatou filifili maumauai e alolofa atu ia Ieova ma ati ae i tatou i lena alofa seia oo i le faavavau.
O le ā Sou Manatu?
◻ O ā manatu taatele e feteenai ma le aʻoaʻoga saʻo a le Tusi Paia e faatatau i le tiute tauave a tagata taitoatasi?
◻ O le ā le galuega ati ae e tatau i so o se Kerisiano ona faia ia te ia lava?
◻ E faapefea i faaaoaoga a tupu o Iuta ona faataitaia mai ai faapea e fai e tagata taitoatasi a latou lava filifiliga?
◻ Ua faamautinoa mai faapefea e Ieova ia i tatou faapea, e mafai ona tatou faia ni filifiliga saʻo i le olaga, e tusa lava po o ā taaʻiga leaga o siomia ai i tatou?
[Ata i le itulau 15]
Pe ua fuafuaina lou lumanai e tusa ma mea na e fanau mai ma oe?
[Ata i le itulau 17]
E ui lava i le faaaoaoga leaga a lona tamā, ae sa filifili le tupu o Iosia e auauna atu i le Atua