Tariu—Le Tupu sa Iai Sona Uiga Faamasinotonu
E FAATATAU i fausaga sa ia faia, na gugutu mai se tasi o tupu lauiloa e faapea: “E faatatau i le siosioina o Papelonia sa ou faia se pa malosi e puipui ai i le itu i sasaʻe. Na ou eliina se autu tele lava . . . sa ou faaaogā le simā ma piliki e fau ai se pa malosi tele, e foliga i se mauga, e lē mafai ona aveesea.” Ioe, sa faia e Nepukanesa le tupu o Papelonia se galuega tele o fausaga ma galue mamafa foi ina ia faamalosia le aai laumua o lona emepaea. Peitai o le aai o Papelonia sa lei faamaonia le lē mafaatoilaloina e pei ona sa ia mafaufau i ai.
Na oo mai faamaoniga o lenei mea ia Oketopa 5, 539 T.L.M. I le aufaatasi ai ma vaegaau a Metai, na faatoilaloina ai e le pule Peresia o Kuresa II ia Papelonia ma fasiotia lona pule Kaletaia o Pelesara. O ai nei o le a avea ma uluai pule o lenei aai lea faatoʻā faatoilaloina lava? Na tusi le perofeta a le Atua o Tanielu o lē sa iai i totonu o le aai i le taimi na paʻū ai e faapea: “Na maua le malo o Tariu le Metai i le onogafulu ma le lua o ona tausaga.”—Tanielu 5:30, 31.
O ai Tariu? O le ā le ituaiga pule sa iai i lona tulai mai? Sa faapeī ana faiga i le perofeta o Tanielu, o lē ua atoa le 70 tausaga o faaaunuua ai i Papelonia?
SE TUPU E LĒ MANINO LONA TALAAGA
E lē o manino faamatalaga faatalafaasolopito e faatatau ia Tariu le Metai. E toeitiiti lava leai ni faamatalaga tusitusia na faia e Metai. E lē gata i lena, o le faitau selau afe o toega o mea sa tusia ai faamaumauga anamua ia na eli aʻe i Sasaʻe Tutotonu e lē atoatoa ma misimisi le tele o faamatalaga. O isi foi tusitusiga faalauaitele anamua ia ua mafai ona faasaoina mai e lē tele, ma e senituri po o le sili atu foi le mamao ese mai i mea tutupu e faatatau ia Tariu.
Ae ui i lea, ua faaalia e faamaoniga e faapea ina ua mavae le faatoilaloina o Ecbatana, le laumua o Metai, sa mafai e le pule Peresia o Kuresa II ona maua le alofa faamaoni o tagata Metai ia te ia. Na amata mai ai iina ona aufaatasi Metai ma Peresia e tau i lalo o lana taitaiga. E faatatau i le latou faiā, sa taʻua e le tusitala o Robert Collins i lana tusi The Medes and Persians e faapea: “I taimi o le filemu sa tutusa lelei tulaga o tagata Metai ma tagata Peresia. Sa masani ona tofia i latou i tofiga maualuluga o le malo ma tofiga tau taʻitaʻi i le vaegaau a Peresia. O tagata ese pe a faasino atu ia Metai ma Peresia, sa leai se faaeseesega o ē na faatoilaloina ma lē na faia le faatoilaloga.” O lea na soo faatasi ai Metai ma Peresia ina ia faavae ai le emepaea o Metai ma Peresia.—Tanielu 5:28; 8:3, 4, 20.
E telē se vaega a tagata Metai sa fai i le faatoilaloina o Papelonia. Ua taʻu mai e le Tusi Paia e faapea: “O Tariu le atalii o Asueru, o lē na tupu mai Metai,” sa fai o ia ma uluai tupu o le emepaea o Metai ma Peresia, ina ia pule ia Papelonia. (Tanielu 9:1) O lona malosi tau tupu e aofia ai le pule e faia ai tulafono “faapei o tulafono a Metai ma Peresia ua le tālaina.” (Tanielu 6:8) O mea ua fai mai ai le Tusi Paia e faatatau ia Tariu ua aumaia ai foi ia i tatou sina malamalamaga e faatatau i ona uiga atoa ma le mafuaaga talafeagai ua lē tele ai ni faamatalaga e uiga ia te ia.
UA ALOFAGIA TANIELU
E lei leva talu ona pulea e Tariu Papelonia, ona faapea mai lea o le Tusi Paia, na tofia e Tariu “alii sili e tasi le selau ma le toaluafulu, latou te i ai i le malo uma lava. Ua tofia foi alii silisili e toatolu, ua i ai Tanielu.” (Tanielu 6:1, 2) Peitai, sa matuā lē fiafia lava isi alii silisili i le tofiga maualuga o Tanielu. Atonu o le faamaoni aʻiaʻi o Tanielu sa mafai ona faaitiitia ai faiga faapiopio, ma e lē taumatea na faapogaia ai le lē fiafia o isi. Atonu foi sa aafia alii silisili i le matauʻa, auā sa fiafia le tupu ia Tanielu ma mafaufau e fai o ia ma palemia.
I le faanaunau e taofia lea tulaga, na faufau ai e alii sili e toalua ma pule lagolago se mailei faaletulafono. Na latou ō atu i le tupu ma talosagaina lona sainia o se tulafono e faasa ai ona ‘faatoga atu i se tasi atua, po o se tagata,’ ae tau lava o Tariu mo le 30 aso. Sa latou fautua atu so o se tasi na te solia le tulafono ia lafoina i le lua o leona. Sa manatu Tariu o le a fiafia alii ofisa maualuluga uma o le malo i lenei tulafono, ma o le lafo faatū e foliga mai o se faailoaga o lo latou faamaoni i le tupu.—Tanielu 6:1-3, 6-8.
Na sainia e Tariu le tulafono ma e lei umi ae ia faafetaia tuusao ona āuga. Na avea Tanielu ma lē na uluai solia le tulafono, ona sa faaauau pea ona ia tatalo atu ia Ieova le Atua. (Faatusatusa i le Galuega 5:29.) Sa lafoina lava Tanielu faamaoni i le lua o leona e ui i taumafaiga faamaoni a le tupu i se faiga e sao ai mai le tulafono ua lē masuia. Na faaupu mai e Tariu lona mautinoa e faapea o loo i le Atua o Tanielu le mana e faaolaina ai le perofeta.—Tanielu 6:9-17.
Ina ua mavae le po sa anapogi ai ma sa lei tofā foi, sa faanatinati atu loa Tariu i le lua o leona. Maeu lona fiafia ina ua maua atu o loo ola pea Tanielu ma e lē o afaina foi! Ina ia faia le faamasinoga tonu, sa vave lava ona aumaia e le tupu i latou uma na molia Tanielu ma o latou aiga ma lafo i le lua o leona. Sa ia faia foi le faatonuga ‘ina ia gatete ma matatau i luma o le Atua o Tanielu ia tagata i itu malo uma o lona malo.’—Tanielu 6:18-27.
E manino lava, sa faaaloalo Tariu i le Atua ma le tapuaiga a Tanielu ma sa naunau foi e faasaʻo mea sese. Peitai, o le faasalaina o ē sa molia Tanielu atonu sa faapogaia ai faalogona leaga o isi alii sili. E lē gata i lea, o le faasilasilaga a Tariu lea na faatonuina ai i latou uma i le malo e ‘matatau i le Atua o Tanielu,’ sa ono faapogaia ai ni faalogona lē fiafia i taʻitaʻi lotu malolosi o Papelonia. Ona e talu ai sa aafia le au tusiupu i nei vala, e lē o se mea la e teʻi ai pe afai ua suia faamaumauga faalelalolagi ina ia aveesea faamatalaga e faatatau ia Tariu. Ae e ui i lea, o le faamatalaga itiiti i le tusi o Tanielu o loo faaalia ai Tariu o ia o se pule e iai sona uiga faimea saʻo ma faamasinotonu.