Savavali Faatasi ma le Atua—O Laasaga Amata
“Ia outou faalatalata atu i le Atua, ona faalatalata mai lea o ia ia te outou.”—IAKOPO 4:8.
1, 2. Aisea e te faapea mai ai o se faaeaga sili le auauna atu ia Ieova?
E TELE tausaga na puapuagatia ai le tamaloa i le falepuipui. Ona poloaiina lea o ia e tulai i luma o le pule o le nuu. Sa vave tele ona tutupu le faagasologa o mea. Na faafuasei ona iloa ane e le pagota ua auauna o ia mo le tupu sa sili ona malosi i lena vaitaimi i le lalolagi. O lē sa avea muamua ma pagota ua iai nei o ia i se tulaga sili ona maualuga ma ua matuā faamamaluina. O Iosefa—le tagata sa saisai muamua ona vae i filifili—o lea ua savavali faatasi nei ma se tupu!—Kenese 41:14, 39-43; Salamo 105:17, 18.
2 I aso nei, ua maua e tagata se avanoa e faia ai se auaunaga mo se tasi e silisili atu ona maualuga na i lo Farao o Aikupito. Ua valaaulia i tatou uma e Lē Silisili i le aoao o mea ina ia tatou auauna atu ia te ia. Maeu se faaeaga uigaese o le faia o lena auaunaga ma ati ae ai se faiā vavalalata ma Ieova, le Atua e ona le malosi uma lava! I le Tusi Paia, e faasino uma atu ia te ia le malosi malualii ma le pupula uigaese, faapea foi le toafilemu, le lalelei, ma le matagofie. (Esekielu 1:26-28; Faaaliga 4:1-3) E olaola le alofa i ana feutagaiga uma. (1 Ioane 4:8) E lē tāitai ona pepelo o ia. (Numera 23:19) Ma e lē tāitai foi ona lē taulau Ieova ia i latou o ē alolofa faamaoni ia te ia. (Salamo 18:25) E ala i le usitaia o mea amiotonu o loo ia faafinagaloina, e mafai ai ona tatou olioli i ni olaga fiafia, ma le uigā i le taimi nei, a o taulai atu manatu i le ola e faavavau. (Ioane 17:3) E leai se pule faaletagata na te ofoina mai se mea e mafai ona faatusatusa atu i na faamanuiaga ma faaeaga.
3. I le ā le auala na ‘savavali ai Noa ma le Atua moni’?
3 I aso ua leva, sa filifili ai le augātamā faatuatua o Noa ia ola e ogatusa ma le finagalo ma fuafuaga a le Atua. Ua faapea mai le Tusi Paia e faatatau ia te ia: “O Noa o le tagata amiotonu ia ma le sao i e tupulaga ma ia; sa la feooai o le Atua ma Noa.” (Kenese 6:9) O le mea moni, e lei savavali pe feooai moni faaletino Noa ma Ieova, auā e leai lava se tagata ua mafai ona ‘vaai i le Atua.’ (Ioane 1:18) Na i lo lea, sa savavali faatasi Noa ma le Atua i le uiga faapea sa ia faia mea na fetalai atu le Atua ia te ia e fai. Talu ai sa tuutoina atu e Noa lona ola i le faia o le finagalo o Ieova, sa ia olioli ai i se faiā mafana, ma le vavalalata ma le Atua e Ona le Malosi Uma Lava. I le pei o Noa, e faitau miliona tagata i aso nei o loo ‘savavali faatasi ma le Atua’ e ala i lo latou ola e ogatusa ma fautuaga ma faatonuga a Ieova. E amata faapefea e se tagata lena ala?
Manaomia Tele le Poto Saʻo
4. Ua faapefea ona faatonuina e Ieova ona tagata?
4 Ina ia savavali faatasi ma Ieova, e ao ona tatou iloa muamua o ia. Na valoia mai e le perofeta o Isaia: “O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foi e sili i mauga, ona gasolo ane ai lea o nuu uma i ai. E o mai lava nuu e tele, ma latou faapea ane, O mai ia, tatou o ae ia i le mauga o Ieova, o le fale o le Atua o Iakopo; e aʻoaʻo mai foi o ia ia te i tatou i ona ala, ona tatou savavali ai lea i ona ala; auā e alu atu le tulafono ai Siona, o le afioga foi a Ieova ai Ierusalema.” (Isaia 2:2, 3) Ioe, e mafai ona tatou mautinoa o le a aʻoaʻoina e Ieova i latou uma o loo saili e savavali i ona ala. Ua saunia e Ieova lana Afioga, le Tusi Paia, ma ua ia fesoasoani mai ia i tatou ina ia malamalama i ai. O se tasi o auala ua ia faia ai lenei mea e ala mai i “le auauna faamaoni ma le mafaufau.” (Mataio 24:45-47) E faaaogā e Ieova “le auauna faamaoni” e saunia faatonuga faaleagaga e ala mai i lomiga faale-Tusi Paia, o sauniga faa-Kerisiano, ma le fuafuaga o suesuega faale-Tusi Paia i aiga e aunoa ma se totogi. E fesoasoani foi le Atua i ona tagata ia malamalama i lana Afioga e ala mai i lona agaga paia.—1 Korinito 2:10-16.
5. Aisea e matuā tautele ai upu moni o le Tusi Paia?
5 E ui tatou te lē totogia ni tupe mo le upu moni o le Tusi Paia, ae o se mea e tautele. A o tatou suesueina le Afioga a le Atua, tatou te iloaina ai mea e uiga i le Atua lava ia—lona suafa, ona uiga totino, lana fuafuaga, ma le auala e feutagai ai o ia ma tagata. Tatou te iloa ai foi tali e tuusaoloto ai i tatou i fesili autū o le olaga: Aisea ua tatou iai iinei? Aisea ua faataga ai e le Atua puapuaga? O le ā se lumanai o iai? Aisea tatou te ola matutua ai ma oti? Pe iai se ola i tua atu o le oti? E lē gata i lea, ua tatou iloa ai po o le ā le finagalo o le Atua mo i tatou, o lona uiga, le auala e tatau ona tatou savavali ai ina ia faafiafiaina atoatoa o ia. Ua tatou iloa ai o mea na te faafinagaloina e talafeagai ma e matuā aogā pe a tatou faatatauina. Pe ana lē seanoa faatonuga a le Atua, e lē tāitai mafai ona tatou malamalama i na mea.
6. O le ā le ala ua mafai ona tatou tuliloaina ona o le poto saʻo o le Tusi Paia?
6 O le upu moni a le Tusi Paia e malosi ma uunaia ai i tatou e faia suiga i o tatou olaga. (Eperu 4:12) A o tatou lei aveina i fale le poto a le Tusi Paia, sa mafai ona tatou savavali i le na o “le tu a lenei lalolagi.” (Efeso 2:2) Peitai o le poto saʻo o le Afioga a le Atua ua faatulaga mai ai se ala e ese mo i tatou ina ia mafai ona tatou “savavali e tusa ma le Alii, ina ia fiafia mai o ia ia [i tatou] i mea uma.” (Kolose 1:10) Maeu se olioli pe a laasia o tatou laasaga amata i le savavali faatasi ma Ieova, le Peresona e silisili ona mataina i le vateatea aoao!—Luka 11:28.
Laasaga Tāua e Lua —Le Tuuina Atu ma le Papatisoga
7. A o tatou suesueina le Afioga a le Atua, o ā mea moni e faatatau i taitaiga a tagata ua oo ina manino mai?
7 A o tuputupu aʻe lo tatou malamalamaga i le Tusi Paia, ua amata ona tatou iloiloina mea o loo faia e tagata ma o tatou lava olaga e tusa ai ma le malamalamaga faaleagaga o le Afioga a le Atua. Ua amata ai ona manino mai le upu moni tāua. O le upu moni lena ua leva ona faamatalaina e le perofeta o Ieremia, o lē na tusi mai: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.” (Ieremia 10:23) O tagata—i tatou uma lava—e manaomia taiala a le Atua.
8. (a) O le ā e uunaia ai tagata e faia se tuuina atu i le Atua? (e) O le ā le tuuina atu faa-Kerisiano?
8 O le malamalama i lenei mea moni tāua e faagaeeina ai i tatou e saili i taiala mai ia Ieova. Ma o le alofa mo le Atua e uunaia ai i tatou e tuuina atu o tatou ola ia te ia. Ina ia faia se tuuina atu i le Atua o lona uiga ia faalatalata atu ia te ia i le tatalo ma faia ma le manatu mamafa se folafolaga ina ia faaaogā o tatou ola e auauna ai ia te ia ma savavali ma le faamaoni i ona ala. O le faia o lenei mea, tatou te faaaʻoaʻo atu ai i le faaaoaoga a Iesu, o lē na foaiina atu o ia lava ia Ieova ma se filifiliga mausalī ina ia faatinoina le finagalo tauatua.—Eperu 10:7.
9. Aisea e tuuina atu ai e tagata taitoatasi o latou ola ia Ieova?
9 E lē tāitai ona soona tauanau pe uunaia faamalosi e Ieova le Atua se tasi ia faia se tuuina atu ia te ia. (Faatusatusa i le 2 Korinito 9:7.) E lē gata i lea, e lē faatalitalia mai e le Atua se tasi ina ia tuuina atu lona ola ia te Ia ona o ni lagona ootia lē tumau ua faafuasei ona faagaeeina ai. A o lei papatiso, e tatau ona avea se tagata o se soo, ma e manaomia ai i lena mea taumafaiga filigā ina ia ave i fale le poto. (Mataio 28:19, 20) Sa aioi atu Paulo ia i latou o ē ua uma ona papatiso ina ia ‘tuuina atu o latou tino o le taulaga ola, ma le paia, e taliaina e le Atua, o se auaunaga paia e faia e tusa ma lo latou tomai e fefulifulisai ai.’ (Roma 12:1, NW) O le faaaogaina foi faapena o lo tatou tomai e fefulifulisai ai, tatou te faia ai se tuuina atu ia Ieova le Atua. Ina ua iloaina le mea e aofia ai i le mataupu ma fefulifulisai ma le faaeteete, ona tuuina atu lea ma le lotomalie ma le olioli o o tatou ola i le Atua.—Salamo 110:3.
10. E faapefea ona fesootai le tuuina atu i le papatisoga?
10 Pe a uma ona faalatalata atu i tatou lava i le Atua e ala i le tatalo e taʻu atu ai la tatou filifiliga e savavali i ona ala, ona tatou laasia lea o le laasaga e sosoo ai. Ua tatou faailoa atu faalauaitele lo tatou tuuina atu e ala i lo tatou papatisoga i le vai. O se faalauiloaga lenei i le lautele e faapea ua tatou tauto e faia le finagalo o le Atua. I le amataga o lana faiva i le lalolagi, na papatisoina ai Iesu e Ioane, ma ua faataatia ai se faaaoaoga mo i tatou. (Mataio 3:13-17) Mulimuli ane, sa poloaiina e Iesu ona soo ina ia faia ni soo ma papatiso atu ia i latou. O lea la, o le tuuina atu ma le papatisoga o ni laasaga matuā manaomia mo so o se tasi e manao ina ia savavali faatasi ma Ieova.
11, 12. (a) E ono faatusatusaina faapefea le papatisoga i se faaipoipoga? (e) O le ā le faatusatusaga e mafai ona faia i le va o la tatou faiā ma Ieova ma le faiā e iai i le va o se tane ma le avā?
11 O le avea o se soo tuuina atu ma papatisoina o Iesu Keriso e tai tutusa ma le faia o se faaipoipoga. I le tele o atunuu, e iai nisi laasaga e muai uia a o lei oo i le aso o le faaipoipoga. E feiloai le alii ma le tamaitai, e faamasani le tasi i le isi, ma oo ina ulu le alofa ia i laua. Ona sosoo lea ma le faamau. O le faaipoipoga e faailoa atu ai i le lautele mea ua uma ona filifilia e i laua lava—ina ia ulu atu i le fusi o le faaipoipoga ma nonofo faatasi o se tane ma se avā. O le faaipoipoga e faailogaina ai i le lautele le amataga o lena faiā faapitoa. O le aso lena e faailogaina ai le amataga o le faaipoipoga. I le faatusatusa atu i ai, o le papatisoga e faailogaina ai le amataga o se olaga ua tuutoina e savali i se faiā tuuina atu ma Ieova.
12 Seʻi manatu i se isi faatusatusaga. Pe a mavae le aso o le la faaipoipoga, e tatau ona faalolotoina ma faamalosia atili le alofa i le va o le tane ma le avā. Ina ia matuā atili ona vavalalata le tasi i le isi, e ao i paaga uma faaipoipo e toalua ona tauivi ma le lē manatu faapito e tausisia ma faamalosia le la faiā faalefaaipoipoga. E ui tatou te lē faaipoipo ma le Atua, ae pe a uma lo tatou papatisoga, e tatau ona tatou galulue ina ia tausisia se faiā vavalalata ma Ieova. Na te matauina mai ma talisapaia a tatou taumafaiga ina ia faia lona finagalo ma mafana mai ai o ia ia i tatou. Na tusi mai le soo o Iakopo: “Ia outou faalatalata atu i le Atua, ona faalatalata mai lea o ia ia te outou.”—Iakopo 4:8.
Savavali i Tulagaaao o Iesu
13. I le savavali faatasi ma le Atua, o le faaaoaoga a ai e ao ona mulimuli ai?
13 Ina ia savavali faatasi ma Ieova, e ao ona tatou utagia le faaaoaoga na faataatia e Iesu Keriso. Na tusi mai le aposetolo o Peteru: “Na valaauina outou ona o lea lava mea; auā na tigaina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.” (1 Peteru 2:21) Talu ai o Iesu sa lelei atoatoa a o tatou e lē lelei atoatoa, e lē mafai la ona tatou mulimuli atu e aunoa ma se masei i le faaaoaoga na ia faataatia. E ui i lea, e faatalitalia e Ieova lo tatou faia o le mea sili tatou te mafai. Seʻi o tatou talanoaina ni vala se lima o le soifuaga ma le faiva a Iesu lea e ao i Kerisiano tuuina atu ona taumafai e faataitai i ai.
14. O le ā e aofia ai i le iloaina o le Afioga a le Atua?
14 Sa ia Iesu le poto saʻo aʻiaʻi i le Afioga a le Atua. A o faagasolo lana faiva, sa masani ona sii mai e Iesu manatu o Tusitusiga Eperu. (Luka 4:4, 8) O le mea moni, sa sii mai foi e taʻitaʻi lotu amioleaga o na aso manatu mai le Tusi Paia. (Mataio 22:23, 24) Ae o le eseesega, sa malamalama Iesu i le uiga o mau ma sa ia faatatauina i lona soifuaga. Na ia silafia e lē gata o mea maʻoti o fai mai ai le Tulafono ae faapea foi ma le agaga moni o iai. A o tatou mulimuli atu i le faaaoaoga a Keriso, e tatau foi ona tatou taumafai ina ia malamalama i le Afioga a le Atua, ia iloa le uiga, po o lona agaga moni. O le faia faapea, e ono avea ai i tatou o se aufaigaluega ua faamaonia tauatua, o ē e mafai ona “talaʻitonuina le upu moni.”—2 Timoteo 2:15.
15. Na faapefea ona faataatia e Iesu se faaaoaoga i le talanoa atu e uiga i le Atua?
15 Sa talanoa atu Keriso Iesu i isi e uiga i lona Tamā faalelagi. E lei taofiofia e Iesu lona poto e uiga i le Afioga a le Atua ia te ia lava. E oo lava i ona fili sa latou faaigoa o ia o “Le aʻoaʻo,” auā po o fea lava sa femaliuai solo ai o ia, sa ia talanoa atu ai i isi e uiga ia Ieova ma Ana fuafuaga. (Mataio 12:38) Sa talaʻi atu Iesu i le lautele i le malumalu, i sunako, i aai, ma faoa aai. (Mareko 1:39; Luka 8:1; Ioane 18:20) Sa ia aʻoaʻo atu ma le alofa mutimutivale ma le agalelei, sa ia faaalia le alofa i ē na ia fesoasoani atu i ai. (Mataio 4:23) O i latou sa mulimuli atu i le faaaoaoga a Iesu ua latou mauaina foi le tele o nofoaga ma auala e aʻoaʻo atu ai i isi e uiga ia Ieova le Atua ma ana fuafuaga ofoofogia.
16. O le ā le vavalalata o le faiā a Iesu ma isi ona uso tapuai ia Ieova?
16 Sa iai se faiā māfana a Iesu ma isi o ē na tapuai atu ia Ieova. I se tasi taimi a o talanoa atu Iesu i se motu o tagata, na ō ane ai lona tinā ma ona uso lē talitonu e fia talanoa ma ia. Ua faapea mai le tala a le Tusi Paia: “Ona fai mai ai lea o le tasi ia te ia, ‘Faauta, ua tutū mai i fafo lou tinā ma ou uso, ua fia tautala ma oe.’ Ona tali atu ai lea o ia, ua faapea atu i le na taʻu mai ia te ia, ‘O ai ea loʻu tinā? O ai foi oʻu uso?’ Ona faaloaloa ai lea e ia o lona aao i ona soo, ua faapea atu, ‘Faauta, o loʻu tinā ma oʻu uso, auā o lē faia le finagalo o loʻu Tamā o i le lagi, o loʻu uso lea, ma loʻu tuafafine, ma loʻu tinā.’ ” (Mataio 12:47-50) E lē o le uiga o lenei mea faapea sa teena e Iesu lona aiga, auā e iai mea na tutupu mulimuli ane e faamaonia ai sa ia lei faia faapena. (Ioane 19:25-27) Peitai, o loo faamamafa mai i lenei tala le alofa sa iai ia Iesu mo ona uso talitonu. E faapena foi i aso nei, o i latou o ē savavali faatasi ma le Atua latou te faauo atu i isi auauna a Ieova ma atili pele ai lo latou alofa i na auauna.—1 Peteru 4:8.
17. Sa faapeī lagona o Iesu e faatatau i le faia o le finagalo o lona Tamā faalelagi, ma e tatau faapefea i lena mea ona aafia ai i tatou?
17 E ala i le faia o le finagalo o le Atua, na faaalia ai e Iesu le alofa mo lona Tamā faalelagi. Sa usitai Iesu ia Ieova i mea uma lava. Na ia fetalai e faapea: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.” (Ioane 4:34) Na fetalai foi Keriso e faapea: “Ou te faia pea lava o mea e lelei [i le Atua].” (Ioane 8:29) Sa tele le alofa o Iesu i lona Tamā faalelagi o lea na “faamaulalo [ai] o ia e ia lava, ua na anaana ua oo ina maliu, o le maliu lava lea i le satauro.” (Filipi 2:8) O le iuga, na faamanuia atu Ieova ia Iesu, e ala i le faaeaina o ia i se tulaga tau pule ma le mamalu e lona lua atu ia Ieova lava ia. (Filipi 2:9-11) I le pei o Iesu, tatou te faaalia le alofa i le Atua e ala i le tausia o ana poloaiga ma e ala i le faia o lona finagalo.—1 Ioane 5:3.
18. I le ā le auala na faataatia ai e Iesu se faaaoaoga i le mataupu o le tatalo?
18 O Iesu o se tagata sa mafuta i le tatalo. Sa tatalo o ia i lona papatisoga. (Luka 3:21) A o lei filifilia ona aposetolo e 12, na alu le po atoa o tuutoina atu o ia i le tatalo. (Luka 6:12, 13) Sa aʻoaʻo e Iesu ona soo i le auala e tatalo ai. (Luka 11:1-4) I le po a o lumanai lona maliu, sa ia tatalo ai mo ona soo ma tatalo faatasi foi ma i latou. (Ioane 17:1-26) Sa avea le tatalo ma vaega tāua i le soifuaga o Iesu, e pei lava ona tatau ona iai i o tatou olaga, talu ai o i tatou o ona soo. Maeu se faaeaga mamalu o le talanoa atu i le Pule Silisili Ese Aoao e ala i le tatalo! E lē gata i lea, e tali mai Ieova i tatalo, auā na tusi mai Ioane e faapea: “O lenei foi le loto tele ua tatou maua i ona luma, pe afai tatou te ole atu ai se mea e tusa ma lona finagalo, e faafofoga mai o ia ia te i tatou. Afai foi ua tatou iloa, e faafofoga mai o ia ia te i tatou i se mea tatou te faatoga atu ai, ua tatou iloa e maua e i tatou mea tatou te faatoga atu ai ia te ia.”—1 Ioane 5:14, 15.
19. (a) O ā uiga o Iesu e tatau ona tatou faataitai i ai? (e) O ā itu tatou te maua ai aogā mai le suesueina o le soifuaga o Iesu ma lana faiva?
19 E anoanoai mea e aʻoaʻoina mai le iloiloina totoʻa o le soifuaga ma le faiva a Iesu Keriso i le lalolagi! Seʻi toe tepa atu i uiga sa ia faaalia: o le alofa, alofa mutimutivale, agalelei, malosi, paleni, agamalu, lotomaulalo, lototele, ma le lē manatu faapito. O le tele o lo tatou iloa e uiga ia Iesu, o le faateleina foi lea o lo tatou faanaunauga ina ia avea o ni ona soo faamaoni. O le poto e uiga ia Iesu e tataʻi atu ai foi i tatou ia vavalalata ia Ieova. Ae maise, sa avea Iesu ma faaātaga lelei atoatoa o lona Tamā faalelagi. Sa matuā mafana o ia ma Ieova, lea na mafai ai ona ia faapea mai: “O le ua vaai mai ia te au, ua vaai o ia i le Tamā.”—Ioane 14:9.
Ia Faatuatua i le Atua Na te Tausia Oe
20. E mafai faapefea ona tatou maua le mautinoa i le savavali faatasi ma Ieova?
20 A o amata ona tau aʻoaʻo le savavali a tamaiti, e lē maumau lelei a latou laa. E faapefea ona latou iloa savavali ma le mautinoa? Seʻi vaganā lava ua faataitai soo ma ia finafinau. Ia, o i latou o loo savavali faatasi ma Ieova e taumafai e savavali lelei ma ia savavali ma le mautinoa. E manaomia ai foi i lenei mea le taimi ma le finafinau. Na faaalia e Paulo le tāua o le finafinau i le savavali faatasi ma le Atua ina ua ia tusi mai: “O lenei, le au uso e, o le toe upu lenei, matou te aioi atu ma apoapoai atu ia te outou ona o le Alii o Iesu, faapei ona talia e outou mai ia te i matou le uiga o le ala e tatau ona outou savavali ai, ia fiafia mai ai le Atua ia te outou, ia faasilisili pea i ai outou.”—1 Tesalonia 4:1.
21. A o tatou savavali faatasi ma Ieova, o ā faamanuiaga e mafai ona tatou olioli ai?
21 Pe afai tatou te tuutoina atu atoatoa i le Atua, o le a ia fesoasoani mai ia i tatou ina ia savavali pea faatasi ma ia. (Isaia 40:29-31) E leai se mea e ofoina mai e lenei lalolagi e mafai ona faatusatusa atu i faamanuiaga o loo ia faatotō ifo ia i latou o ē savavali i ona ala. O ia ‘o loo aʻoaʻo ia i tatou i mea e aogā, o loo taʻitaʻiina i tatou i le ala tatou te ui ai. Ma pe afai e uaʻi atu o tatou taliga i ana poloaiga, o le a tusa ma se vaitafe lo tatou manuia; ma la tatou amiotonu, e tusa lea ma peau o le sami.’ (Isaia 48:17, 18) O le taliaina o le valaaulia ina ia savavali faatasi ma le Atua ma ia faia faapea ma le faamaoni, e mafai ai ona tatou olioli i le filemu ma ia e faavavau.
E Faapefea Ona E Tali?
◻ Aisea o se faaeaga mamalu ai le savavali faatasi ma le Atua moni?
◻ Aisea ua avea ai le suesue, le tuuina atu, ma le papatisoga, o ni laasaga amata i le savavali faatasi ma Ieova?
◻ E faapefea ona tatou mulimuli atu i tulagaaao o Iesu?
◻ E faapefea ona tatou iloa o le a tausia i tatou e Ieova a o tatou savavali faatasi ma ia?
[Ata i le itulau 13]
O le suesue, tuuina atu, ma le papatisoga, o laasaga amata na i le savavali faatasi ma le Atua