Tito—‘O se Aumea sa Galulue Faatasi mo lo Outou Lelei’

I NISI taimi, na mapuna aʻe ai faafitauli i totonu o le faapotopotoga Kerisiano i le uluai senituri. O nei faafitauli sa tatau ona foia, ma sa manaomia ai i lenei mea le lototele ma le usiusitai. O Tito o le tagata na faafetaiaia ma le taulau manuia le sili atu ma le tasi ni luʻi faapena. Ona o sē sa galulue faatasi ma le aposetolo o Paulo i le galuega, sa ia faia ai ni taumafaiga faamaoni ina ia fesoasoani atu i isi e faia mea i le auala a Ieova. O lea na taʻu atu ai e Paulo i Kerisiano i Korinito e faapea, o Tito sa ‘la galulue faatasi mo lo latou lelei.’—2 Korinito 8:23, NW.

O ai Tito? O le ā le vaega na ia faia i le foiaina o faafitauli? Ma e faapefea ona tatou maua aogā mai le iloiloina o lana amio?

Le Mataupu i le Peritome

O Tito, o se tagata Eleni e lei peritomeina. (Kalatia 2:3)a Talu ai na taʻua o ia e Paulo o “loʻu lava atalii i la le faatuatua ua tuu tele,” atonu la o Tito o se tasi o le fanau faaleagaga a le aposetolo. (Tito 1:4; faatusatusa i le 1 Timoteo 1:2.) Sa faatasi Tito ma Paulo, Panapa, ma isi mai Anetioka, i Suria ina ua latou ō atu i Ierusalema pe tusa ma le 49 T.A. e talanoaina le fesili na lāgā e faatatau i le peritome.—Galuega 15:1, 2; Kalatia 2:1.

Ua faapea mai le faamatalaga, talu ai o le faaliliuina o tagata o Nuu Ese e lē peritomeina lea sa talanoaina i Ierusalema, sa ave ai Tito ina ia faaalia ai e faapea, e mafai e tagata Iutaia ma ē e lē o ni Iutaia ona maua le finagalo malie o le Atua e tusa lava pe ua peritomeina pe leai. O nisi o sui o le faapotopotoga i Ierusalema o ē sa avea muamua ma Faresaio a o lei talia le Faa-Kerisiano moni, na finau atu e faapea, e tatau lava i tagata o Nuu Ese ua liliu atu ona peritomeina ma ia tausia le Tulafono, ae na teena lenei finauga. O le uunaia malosi o Tito ma isi tagata o Nuu Ese ina ia peritomeina, o le faafitia lea o le manatu e faapea, o le faaolataga e faalagolago i le alofa tunoa o Ieova ma le faatuatua ia Iesu Keriso na i lo o galuega o le Tulafono. O le a avea foi lea ma mea e teena ai le mea moni e faapea, ua maua e tagata o Nuu Ese po o tagata o isi nuu le agaga paia o le Atua.—Galuega 15:5-12.

Auina Atu i Korinito

Ina ua foia le mataupu i le peritome, na tuuina atu ai loa ia Paulo ma Panapa le pule atoatoa e talaʻi atu ai i atunuu. I le taimi lava e tasi, sa la taumafai malosi foi ina ia manatua tagata matitiva. (Kalatia 2:9, 10) O le mea moni, ina ua toe taʻua Tito i faamaumauga faagaeeina pe tusa ma le ono tausaga mulimuli ane, o le taimi lena o loo iai o ia i Korinito o le sui o Paulo i le faamaopoopoina o ni saofaga mo le au paia. Peitai, a o agaʻi atu Tito i le faia o lenei galuega, na oo foi ina fesoasoani atu i le foiaina o ni tulaga faigata.

I le tusi atu o Paulo i tagata Korinito, ua faaalia ai e faapea, na ia muai tusi atu ia te i latou ina ia “aua tou te feoai ma e faitaaga.” Sa ia taʻu atu ia te i latou ina ia faatea ese mai ia i latou se tagata faitaaga e lē salamō. Ioe, sa tusi atu e Paulo ia i latou se tusi malosi, ma sa ia faia faapea “ma loimata e tele.” (1 Korinito 5:9-13; 2 Korinito 2:4) I le taimi lea, na aauina atu ai Tito i Korinito e fesoasoani i le saofaga o loo faia iina mo Kerisiano matitiva i Iutaia. E lē taumatea foi sa auina atu o ia e matauina le tali mai a tagata Korinito i le tusi a Paulo.—2 Korinito 8:1-6.

O ā uiga faaalia o Kerisiano i Korinito i le fautuaga a Paulo? Ona o le naunau i le fia iloa, atonu na aauina atu ai e Paulo ia Tito mai Efeso e sopoia le isi itu o le sami ua taʻua o le Aegean i Korinito, faatasi ma faatonuga ina ia toe vave lipoti ane i le vave e mafai ai. Afai na faataunuuina lena feau a o lei taofia femalagaaiga mo le taumalūlū (pe tusa o le ogatotonu o Novema), sa ono mafai la ona alu atu Tito i se vaa i Teroa po o le faimalaga atu foi i se malaga umi i le laueleele e ui atu i Hellespont. Atonu na vave ona taunuu atu Paulo i le nofoaga na tuutala e feiloai ai i Teroa, talu ai o le vevesi lea na faatupu e le au gaosi mea ario na faapogai ai ona ia tuua vave Efeso na i lo o le taimi na tuupoina. Ina ua mavae ona faatalitali ma le popole Paulo i Teroa, na ia iloa ai e faapea, e lē o malaga mai Tito i se vaa. I lea, sa manatu ai loa Paulo o le a ui atu i uta ma le faamoemoe e faafetaui ia te ia i le ala. I le taimi na ia savalia ai laueleele o Europa, sa uia ai e Paulo le ala i Egnatia, ma na iu ina la feiloai ai ma Tito i Maketonia. Sa maua e Paulo se mapusaga ma le olioli tele, ona sa lelei le tala na maua mai i Korinito. Na talia lelei e le faapotopotoga le fautuaga a le aposetolo.—2 Korinito 2:12, 13; 7:5-7.

E ui lava sa popole Paulo e uiga i le ituaiga o faafeiloaiga o le a oo i lona sui, ae o le Atua sa fesoasoani ia Tito i le faataunuuina o lona tofiga. Sa talia Tito ma le “mataʻu ma le gatete.” (2 Korinito 7:8-15) I le faaaogaina o upu a se tagata fai tofā o W. D. Thomas e faapea: “Ua mafai ona tatou manatu ai e faapea, e aunoa ma le faavaivaia o le malosi o fautuaga a Paulo, sa aioi atu ai ma le tomai ma le faautauta [Tito] i tagata Korinito; i le faamautinoaina o i latou e faapea, o upu e pei ona sa talanoa atu ai Paulo, sa na ona faia ona o le manatu mo lo latou lelei faaleagaga.” I le feagai ai ma lenei tulaga, sa oo ai ina matuā alofa tele Tito i Kerisiano i Korinito ona o lo latou agaga usiusitai ma le faia o suiga aogā. O o latou uiga tauleleia na avea ma puna o faalaeiauga ia te ia.

Ae faapefea le isi vala o le feau a Tito i Korinito—le faamaopoopoina o saofaga mo le au paia i Iutaia? Sa galue ai foi Tito i lena galuega, e pei ona mafai ona iloa mai i faamatalaga o loo maua i le 2 Korinito. O le tusi lena, atonu sa tusia i Maketonia i le tau e afu ai mea i le 55 T.A., e lei umi talu ona mavae le taimi na feiloai ai Tito ma Paulo. Na tusia e Paulo e faapea, o Tito o lē na amataina ona faia le saofaga, ua toe aauina atu nei ma isi fesoasoani e toalua, e lē o taʻua o la igoa, ina ia faamaeaina lea galuega. I le naunau fiafia i tagata Korinito, na matuā lotomalie ai Tito e toe foi atu i ai. A o toe faimalaga atu Tito i Korinito, e foliga mai sa ia aveina le tusi faagaeeina lona lua a Paulo i tagata Korinito.—2 Korinito 8:6, 17, 18, 22.

Sa lē gata o Tito o sē e lelei i le faamaopopoina o mea, ae o ia foi o se ituaiga o tagata sa mafai ona tuuina atu i ai se tofiga faaeteetegata i ni tulaga faigata. O ia o se tagata lototele, taumatuaina, ma maumauai. E mautinoa sa manatu Paulo ia Tito o sē e tomai i le feagai ai ma luʻi faifai pea na faapogaia e “aposetolo silisili” i Korinito. (2 Korinito 11:5) O le uiga lenei o Tito, ua faamautinoa mai i le isi taimi lea e aliai mai ai o ia i le Tusi Paia, i se isi tofiga faigata.

I le Motu o Kereta

E foliga mai o se vaitaimi i le va o le 61 ma le 64 T.A., na tusi atu ai Paulo ia Tito, o lē sa auauna i lena taimi i le motu o le Metitirani, o Kereta. Na tuua ai o ia e Paulo iina ‘ina ia faasaʻoina mea na sese’ ma ia “tofia toeaina i lea aai ma lea aai.” I le tulaga lautele, sa iai se talaaga leaga o tagata Kereta e faapea e ‘tala pepelo, o manu feai leaga, e lē faigaluega ae usuusuaʻi ina aai.’ O lea la, i Kereta, o le a toe manaomia ai foi Tito ina ia gaoioi ma le lototele ma le maumauai. (Tito 1:5, 10-12, NW) Sa avea o se tofiga tāua tele, auā sa foliga mai na fua i ai le tulaga mo le lumanai o le Faa-Kerisiano moni i le motu. I le faagaeeina e le agaga paia, na fesoasoani ai Paulo ia Tito e ala i le faamaʻoti atu o agavaa e tatau ona vaavaai i ai mo ni ovasia i le lumanai. O na agavaa o loo aogā pea e tusa ai ma le tofiaina o toeaina Kerisiano.

E lē o taʻu maia i le Tusi Paia le taimi na tuua ai e Tito Kereta. Sa iai o ia iina mo se taimi umi na mafai ai e Paulo ona talosaga atu ia te ia ina ia saunia ni mea sa manaomia e Sena ma Apolo, o ē na mālōlō ai iina mai se malaga i se tasi taimi. Ae sa lē umi se taimi na nofo ai Tito i le motu. Sa fuafuaina e Paulo e aauina atu iina a lē o Aretima po o Tuiko, ona alu atu ai lea o Tito e faafeiloai le aposetolo i Nikopoli, e foliga mai o le igoa lena o le aai lauiloa e i le itu i mātū i sisifo o Eleni.—Tito 3:12, 13.

Mai le faasinoga puupuu mulimuli lava a le Tusi Paia ia Tito, ua tatou iloa ai e faapea, pe tusa o le 65 T.A., na auina atu ai o ia e Paulo i se isi foi tofiga. Na alu atu ai o ia i Talamatia, o se vaega i sasaʻe o le Sami Ateria i le vaipanoa lea ua faaigoaina i aso nei o Croatia. (2 Timoteo 4:10) E lē o taʻu maia ia i tatou po o le ā le mea a Tito na tatau ona fai ai iina, ae e iai le manatu, na auina atu o ia e faatonuina mataupu a le faapotopotoga ma auai i le galuega faamisionare. Afai o lea, atonu la sa faia e Tito se galuega e pei o lea na ia auauna ai i Kereta.

Maeu lo tatou loto faafetai ona o ovasia Kerisiano taumatuaina e pei o Tito! O lo latou malamalama lelei i mataupu silisili faale-Tusi Paia, ma lo latou faatatauina ma le lototele o na mataupu silisili ua fesoasoani e leoleomaluina ai le tulaga faaleagaga o le faapotopotoga. Seʻi o tatou faaaʻoaʻo i lo latou faatuatua ma ia faapei o Tito i le manatu mamafa mo le lelei faaleagaga o o tatou uso talitonu.—Eperu 13:7.

[Faaopoopoga i lalo]

[Ata i le itulau 31]

O Tito, sa avea o se aumea faigaluega lototele mo le lelei o Kerisiano i Korinito ma isi vaipanoa