Puipuia Faaletulafono le Tala Lelei

MAI lava i le amataga talu ona atiina ae e tagata aai, o le umi foi lena talu ona ia fausia o pa. Ae maise lava i aso ua mavae, sa avea nei pa malolosi o se puipuiga. I luga o nei pa e masani i ē o loo puipuia, ona tau ai e puipui le pa ina ia aua le osofaia mai pe sopoia e i latou o loo faasagatau mai. E lē gata na maua ai e tagata o loo nonofo i le aai le puipuiga ae e masani foi ia i latou e nonofo i taulaga o loo faataamilo ai ona maua le sulufaiga i totonu o pa.—2 Samuelu 11:20-24; Isaia 25:12.

I se uiga tutusa, ua ati ae ai e Molimau a Ieova se pa—o se pa faaletulafono—e puipuia ai. E lē faapea ua fatuina lenei pa ina ia faaesea ai Molimau a Ieova mai isi tagata, auā o loo lauiloa Molimau a Ieova o ni tagata e faifaimea faatasi ma isi, ma faigofie ona mafuta ma isi. Na i lo lea, o lenei pa e faamalosia ai le saolotoga faavae ua faamautinoa mai i le tulafono mo tagata uma. I le taimi lava foi e tasi, e puipuia ai le aiā faaletulafono a Molimau ina ia mafai ona latou saoloto ai e fai la latou tapuaiga. (Faatusatusa i le Mataio 5:14-16.) Ua puipuia e lenei pa lo latou ala e tapuai ai ma lo latou aiā e talaʻi ai le tala lelei o le Malo. O le ā lenei pa, ma o faapefea ona atiina ae?

Atiina ae o se Pa Faaletulafono e Puipuia Ai

E ui lava o loo olioli Molimau a Ieova i le saolotoga faaletapuaiga i le tele o atunuu, ae i nisi atunuu o loo avea i latou ma taulaiga o osofaiga lē tonu. Pe a oo ina luia lo latou saolotoga e faapotopoto faatasi ai e tapuai po o le talaʻi ai mai lea fale i lea fale, ona latou taulimaina loa lea o nei mataupu i ala faaletulafono. E faitau afe faamasinoga faaletulafono ua aafia ai Molimau a Ieova i le lalolagi aoao.a E lē o faamasinoga uma e faamanuiaina. Peitai pe a latou faiaina i faaiuga a faamasinoga maulalo, e masani lava ona latou apili i faamasinoga maualuga. O le ā le iuga?

A o faagasolo tausaga o le 20 senituri, ua avea le manumalo o Molimau a Ieova i faamasinoga sa fai i le tele o atunuu ua fai ma faavae o a latou apili i isi faamasinoga e mulimuli mai. E pei lava ona fai aʻe se pa i piliki ma maa, ua fesoasoani nei faaiuga lelei e fai aʻe ai se pa e avea o se puipuiga faaletulafono. Mai i luga o lenei pa, o loo faaauau ai pea e Molimau a Ieova ona tau mo le saolotoga faalotu ina ia faaauau la latou tapuaiga.

Seʻi iloilo, e fai ma faaaoaoga, le faamasinoga o Murdock faasaga i le Commonwealth of Pennsylvania, lea sa fai e le Faamasinoga Maualuga a le Iunaite Setete le faaiuga ia Me 3, 1943. O le fesili lenei sa lāgā i le faamasinoga: Pe e tatau i Molimau a Ieova ona iai se laisene o fefaatauaiga mo le tufatufaina atu o a latou lomiga faalelotu? Na maumauaʻi Molimau a Ieova faapea e lē manaomia ona iai se laisene. O la latou galuega talaʻi e lē o se fefaatauaiga—ma e lei iai lava se taimi ua faia ai faapea. O lo latou sini e lē o le mauaina o tupe, ae o le talaʻia o le tala lelei. (Mataio 10:8; 2 Korinito 2:17) I le iuga o le faamasinoga o Murdock, na ioe le Faamasinoga faatasi ma Molimau a Ieova, i le faapea mai o le tausisia o se manaoga e totogi se laisene o le lafoga e avea o se tuutuuga i le tufatufaina atu o lomiga faalelotu e lē tusa ai ma le tulafono faavae.b O lenei faaiuga ua faataatia ai se faataimuaga lelei, ma o loo faaauau ona faaaogā ma le manuia e Molimau e avea o se faavae e apili ai le tele o faamasinoga talu mai lena taimi. O le faaiuga na fai i le faamasinoga o Murdock ua faamaonia le avea o se piliki mautu i le pa e puipui ai faaletulafono.

O nei faamasinoga ua telē se mea ua faia ai ina ia puipuia le saolotoga faaletapuaiga mo tagata uma. E faatatau i le sao ua faia e Molimau a Ieova ina ia puipuia le aiā faaletagatanuu i le Iunaite Setete, ua faapea mai le University of Cincinnati Law Review: “Ua telē se sao o Molimau a Ieova i le atiaeina o tulafono faavae, ae maise lava o le faalautele atu o tuaoi o le puipuia o tapuaiga ma le aiā e faaali ai manatu.”

Faamalosia o le Pa

O manumalo uma faaletulafono taitasi, e atili faamalosia ai le pa. Manatunatu i ni nai faaiuga sa faia i vaitausaga e amata mai i le 1990 ua faapea ona aogā i Molimau a Ieova, atoa foi ma isi uma e mananao i le saolotoga i le lalolagi atoa.

Eleni. Ia Me 25, 1993, na lagolagoina ai e le European Court of Human Rights le aiā a se tagatānuu Eleni na te aʻoaʻo atu ai ona talitonuga faalelotu i isi. O le faamasinoga sa taulai atu lea ia Minos Kokkinakis, ua 84 tausaga lona matua i lena taimi. I le avea ai ma Molimau a Ieova, e tusa ua sili atu i le 60 taimi na molia ai o ia talu mai le 1938, na tulai faasefuluvalu i luma o le faamasinoga i Eleni, ma na sili atu i le ono tausaga na ia faaaluina i le falepuipui. Sa tele lava ina faasalaina o ia ona o le tulafono a Eleni lea na faavae mai i vaitausaga e amata mai i le 1930 na faasa ai le faaliulotuina o isi—o le tulafono lena na māfua ai le toeitiiti 20,000 moliaga o Molimau a Ieova mai le 1938 e oo i le 1992. O le faaiuga a le European Court e faapea ua solia e le malo o Eleni le saolotoga faatapuaiga a Kokkinakis ma faatonuina e totogi atu ia te ia le $14,400 Amerika. Fai mai le faaiuga a le Faamasinoga, o le mea moni lava o Molimau a Ieova o se “lotu aloaia.”—Tagai i Le Olomatamata o Setema 1, 1993, itulau 27-31.

Mekisikō. Ia Iulai 16, 1992, na faia ai se laasaga maoae i le puipuia o le saolotoga tau tapuaiga i Mekisikō. O le aso lena na faatuina ai le Tulafono tau Faapotopotoga Faalelotu ma Tapuaiga mo le Lautele. Ona o lenei tulafono, ua mafai ai ona faatagaina faaletulafono se vaega faalotu e avea ma tapuaiga ua faavaeina e ala i le lesitalaina aloaia. Muamua atu i lena, sa pei lava Molimau a Ieova o isi lotu i le atunuu, sa na ona iai ae e lei faamaoniaina faaletulafono. Ia Aperila 13, 1993, sa talosaga ai Molimau a Ieova ina ia lesitalaina. Ma le fiafia lava, ia Me 7, 1993, na lesitalaina ai faaletulafono i latou i le igoa La Torre del Vigía, A. R., ma le Los Testigos de Jehová en México, A. R., o nei vaega uma o ni vaega faalotu.—Tagai i le Awake!, Iulai 22, 1994, itulau 12-14.

Pasili. Ia Novema i le 1990, na logo atu ai e le Brazil’s National Institute of Social Security (INSS) le ofisa o le lālā a le Watch Tower Society e faapea, o faifeau tauofo uma o loo i le Peteli (o le igoa o nofoaga o lālā o Molimau a Ieova) o le a lē toe vaai i ai o ni faifeau faalelotu, o lona uiga la o le a i lalo o tulafono a tagata faigaluega a Pasili. Na apili e Molimau le faaiuga. Ia Iuni 7, 1996, na fai ai e le Komiti Faatonu o le Ofisa o le Loia Sili i Pasili se faaiuga e faamaonia ai le tulaga o faifeau i Peteli e avea ma vaega o le lotu, ae lē o ni ē galulue i galuega totogi.

Iapani. Ia Mati 8, 1996, na fai ai e le Faamasinoga Maualuga a Iapani se faaiuga i le mataupu i aʻoga ma le saolotoga tau tapuaiga—e manuia ai tagata uma i Iapani. Na aufaatasi uma le faamasinoga e faapea ua solia e le Municipal Industrial Technical College i Kobe le tulafono e ala i le faateʻa ese mai o Kunihito Kobayashi ona o lona musu e auai i toleniga e aʻoaʻoina ai le isi ituaiga o karate matautia. O lenei faaiuga ua faailogaina ai o le taimi muamua lea ua faia ai e le Faamasinoga Maualuga se faaiuga e faavae i le saolotoga tau tapuaiga lea e aloaia e le Tulafono Faavae a Iapani. Ona o le usiusitai i lona loto fuatiaifo ua uma ona aʻoaʻoina i le Tusi Paia, sa manatu ai lenei talavou Molimau e faapea o nei faiga e lē ogatusa ma mataupu silisili o le Tusi Paia e pei o lea e maua i le Isaia 2:4, e faapea: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.” O le faaiuga lenei a le Faamasinoga ua faataatia ai se faataimuaga lelei mo isi faamasinoga i le lumanai.—Tagai i Le Olomatamata Novema 1, 1996, itulau 19-21.

Ia Fepuari 9, 1998, na faia ai e le Faamasinoga Maualuga a Tokyo se tasi faaiuga mataina ua faamautū ai le aiā a se Molimau e suafa ia Misae Takeda e teena togafitiga faafomai e lē tutusa ma le faatonuga a le Tusi Paia ina ia ‘faamamao mai le toto.’ (Galuega 15:28, 29) O le faamasinoga lenei na toe apili i le Faamasinoga Sili Ona Maualuga, ma o loo faatali pea la pe faamata o le a faamautuina pea le faaiuga a le Faamasinoga Maualuga.

Filipaina. I se faaiuga sa faia ia Mati 1, 1993, sa aufaatasi uma ai le Faamasinoga Maualuga a Filipaina i se faaiuga e ʻau i Molimau a Ieova i se faamasinoga sa aafia ai ni talavou Molimau o ē na tuliesea mai i aʻoga ona sa latou teena ma le faaaloalo le faalo i le fuʻa.

O faaiuga lelei taitasi uma lava sa faia e faamasinoga ua pei o se maa po o se piliki ua faaopoopo atu e faamalosia ai le pa faaletulafono lea e puipuia ai le aiā e lē gata i Molimau a Ieova ae o tagata uma lava.

Puipuia o le Pa

E tusa e 153 atunuu ua lesitalaina ai faaletulafono Molimau a Ieova, ma o loo olioli ai ma le talafeagai i le tele o saolotoga, e pei ona faia ai e isi lotu aloaia. Ina ua mavae le faitau sefulu o tausaga o sauaga ma faasasaaga i Europa i Sasaʻe ma le atunuu sa taʻua muamua o le Soviet Union, ua amanaiaina nei faaletulafono Molimau a Ieova i atunuu e pei o Albania, Belarus, o le Czech Republic, Georgia, Hungary, Kazakstan, Kyrgyzstan, Romania, ma Slovakia. Peitai, o nisi atunuu i aso nei, e aofia ai nisi o atunuu i Europa i Sisifo ia ua leva ona faavae a latou faiga faafaamasinoga, o loo matuā luia ai lava po o le teena ai foi o aiā a Molimau a Ieova. O loo matuā gaoioi le ʻau tetee e taumafai e ‘faapogaia faalavelave e ala mai i le tulafono’ faasaga i Molimau a Ieova. (Salamo 94:20) O faapefea le tali atu i ai?c

E mananao Molimau a Ieova e galulue soosoo tauʻau ma faiga malo uma lava, ae latou te mananao foi i le saolotoga faaletulafono ina ia faia ai la latou tapuaiga. O lo latou talitonuga maumaututū lava e so o se tulafono po o se faaiuga faafaamasinoga e faasā ai i latou mai le usiusitai i faatonuga a le Atua—e aofia ai le faatonuga e talaʻi le tala lelei—e lē talafeagai. (Mareko 13:10) Afai e lē maua se maliega faatasi i se mataupu, ona ave lea e Molimau a Ieova le mataupu i le tulafono, latou te faia taumafaiga uma lava e mafai ona fai ina ia maua le puipuiga mo la latou aiā mai le Atua e faaauau ai le latou tapuaiga. E matuā talitonu atoatoa Molimau a Ieova i le folafolaga a Ieova e faapea: “O auupega uma e faia e tau ma oe e le manuia ia.”—Isaia 54:17.

[Faaopoopoga i lalo]

[Pusa i le itulau 21]

Puipuia Aiā Tatau a Molimau a Ieova

O sauaga o loo faia i Molimau a Ieova ua māfua ai ona latou oo atu i luma o faamasino ma taʻitaʻi o malo i le lalolagi atoa. (Luka 21:12, 13) E matuā faia e Molimau a Ieova taumafaiga uma e puipuia ai faaletulafono o latou aiā tatau. Ua fesoasoani manumalo na latou maua i faamasinoga i le tele o atunuu e puipuia ai le saolotoga faaletulafono o Molimau a Ieova, e aofia ai ma o latou aiā tatau ina ia:

◻ talaʻi mai lea fale i lea fale e saoloto mai tuutuuga ua avatu i ‘au faatau oloa faapisinisi—Murdock faasaga i le Commonwealth of Pennsylvania, U.S. Supreme Court (1943); Kokkinakis faasaga i le malo o Eleni, European Court of Human Rights (ECHR) (1993).

◻ saoloto e faapotopoto faatasi mo le tapuaiga—Manoussakis ma Isi faasaga i le malo o Eleni, ECHR (1996).

◻ filifili e tusa i o latou loto fuatiaifo pe faapefea ona faaalia le faaaloalo i le fuʻa po o le tagāvai o le malo—West Virginia State Board of Education faasaga ia Barnette, U.S. Supreme Court (1943); Supreme Court of the Philippines (1993); Supreme Court of the India (1986).

◻ teena le tautua i le vaegaau lea e faasalaina ai o latou loto fuatiaifo faa-Kerisiano—Georgiadis faasaga i le malo o Eleni, ECHR (1997).

◻ filifilia togafitiga ma vailaau e lē faasalaina ai o latou loto fuatiaifo—Malette faasaga ia Shulman, Ontario, Canada, Appeal Court (1990); Watch Tower faasaga ia E.L.A., Superior Court, San Juan, Puerto Rico (1995); Fosmire faasaga ia Nicoleau, New York, U.S.A., Court of Appeals (1990).

◻ tausia aʻe a latou fanau e tusa ai o o latou talitonuga faale-Tusi Paia e tusa lava pe luʻia nei talitonuga i fefinauaiga faaletulafono i le tausiaina o tamaiti—St-Laurent faasaga ia Soucy, Supreme Court of Canada (1997); Hoffmann faasaga ia Austria, ECHR (1993).

◻ iai ma ia faagaoioi ni matagaluega faaletulafono ia e mafai ona tuusaoloto i mea tau lafoga e pei foi ona faataga atu i matagaluega o loo faaaogā e isi lotu aloaia—People faasaga ia Haring, New York, U.S.A., Court of Appeals (1960).

◻ maua e i latou e tofia i ni auaunaga faapitoa faataimi atoa le faamāmā avega tau lafoga lea o loo maua e i latou o loo galulue faataimi atoa i isi lotu—Brazil’s National Institute of Social Security, Brasília, (1996).

[Ata i le itulau 20]

O Minos Kokkinakis ma lana avā

[Ata i le itulau 20]

O Kunihito Kobayashi

[Ē Ana le Ata i le itulau 19]

The Complete Encyclopedia of Illustration/J. G. Heck