Le Fanau Mai o Iesu le Tala Moni

SEʻI mafaufau i se mea na tupu e lauiloa i le talafaasolopito o lou atunuu. Ua uma ona faamatalatala lelei, ma tusia e ni tusitala e sili atu i le toatasi o talafaasolopito. Peitai, e faapefea pe a taʻu atu e se isi ia te oe faapea o lenei mea e lei tupu moni, ua na o se talafaafagogo? Ia, seʻi faatatau mai la le mataupu ia te oe, e faapefea pe a fai mai se tasi faapea o le tele o faamatalaga na taʻu atu e lou aiga ia te oe e faatatau i le fanau mai ma le amataga o le soifuaga o le tuaa o lou tamā e faapea e sese? Po o le ā lava le tulaga, ae o faamatalaga faapenei e faapogaia ai lou ita. E mautinoa lou lē taliaina o ia ituaiga faamatalaga i le na o le faalogo i ai!

Peitai, ua tele lava ina lē amanaia e le aufaitio i aso nei faamatalaga faa-Evagelia a Mataio ma Luka e uiga i le fanau mai o Iesu. Ua latou faapea mai o nei faamatalaga e matuā feteenai lava ma e lē faigofie ona faafetaui, ma o loo aofia uma ai ni sese mataina ma e lē moni i le talafaasolopito. Pe e mafai ona moni lena mea? Na i lo le ioe i nei tuuaʻiga, seʻi o tatou iloiloina e i tatou lava faamatalaga a Evagelia. A o faia faapea, seʻi tatou vaai po o le ā o loo la taumafai e aʻoaʻo mai ia i tatou i aso nei.

Le Fuafuaga na Tusia Ai

O le faatulagaga ua fesoasoani lea e manatua ai le fuafuaga o nei faamatalaga faale-Tusi Paia. E lē o i laua o ni ē e faamaumauina ni talaaga o le olaga o se tagata; o i laua o fai-Evagelia. E tāua tele le iloa o le eseesega. I le tusia o le talaaga o le olaga o se tagata, e mafai e le tusitala ona faatumu le faitau selau o itulau, e taumafai ai e faamatala le tagata i se auala e agaʻi atu ai ina lauiloa e le toatele. O lea, o nisi tusitala latou te faaaogaina le tele o itulau e faamatalatala auiliili ai le tupuaga, le fanau mai, ma le amatamataga a o laiti o ē o loo latou faamatalaina. E ese mai ai la ma tala a Evagelia. I faamaumauga faa-Evagelia e fā, e na o Mataio ma Luka o loo la faamatala maia le fanau mai o Iesu ma le taimi a o laitiiti. Ae peitai, o lo la faanaunauga, e lē o le faailoa mai o le auala na tuputupu aʻe ai Iesu seia oo ina avea ma tagata e pei ona iai. Manatua, sa amanaia e soo o Iesu faapea sa soifua o ia o se peresona agaga a o lei afio mai i le lalolagi. (Ioane 8:23, 58) O lea la sa lei faasino atu Mataio ma Luka i le avea o Iesu ma tamaitiiti ina ia faamatala mai ai le ituaiga tagata na iai o ia mulimuli ane. Na i lo lena, sa la faamatala mea na tutupu e fetaui ma le fuafuaga o a la Evagelia.

Ma o le ā le la fuafuaga i le tusiaina o na faamatalaga? O le upu “evagelia” o lona uiga o le “tala lelei.” E tutusa feau sa faaoo mai e nei tane—o Iesu o ia lea o le Mesia folafolaina, po o le Keriso; ma na maliu o ia mo agasala o le fanau a tagata; ma na toe faatuina aʻe o ia i le lagi. Ae e manino le eseese o tupuaga o nei tusitala e toalua ma e eseese tagata faitau na fuafua i ai a la tusitusiga. O Mataio, o se ao lafoga, sa faatulaga lelei lana tusi mo tagata Iutaia. O Luka, o se fomai, na tusi atu i le “alii o Teofilo”—o lē atonu sa iai sona tulaga maualuga—ma e faaopoopo atu i ai, sa faalautele atu i tagata Iutaia ma Nuu Ese. (Luka 1:1-3) Sa filifili e le tusitala lava ia mea na tutupu sa matuā aogā ma e ono faatalitonu ai lana aufaitau. O lea la, i faamaumauga a Mataio sa faamamafa ai valoaga i Tusitusiga Eperu lea sa faataunuuina e fesootai atu ia Iesu. I le isi itu, o Luka, sa ia mulimuli atu i mea e sili ona mataina faatalafaasolopito ina ia amanaiaina e lana aofia e lē o ni tagata Iutaia.

E lē o se mea la e faateʻia ai, e lē tutusa a la faamatalaga. Ae e lē feteenai i laua e pei ona fai mai ai le aufaitio e feteenai. Sa lagolago le tasi i le isi, e galulue faatasi ma saosaolaumea ina ia maua ai se ata sili ona atoa.

Le Fanau Mai o Iesu i Peteleema

Sa faamauina e Mataio ma Luka le vavega uigaese e faatatau i le fanau mai o Iesu—na fanau mai i se taupou. Na faaalia mai e Mataio faapea o lenei vavega na faataunuu ai se valoaga na valoia mai e Isaia i senituri ua mavae. (Isaia 7:14; Mataio 1:22, 23) Sa faamatala mai e Luka na fanau Iesu i Peteleema ona sa faamalosia Iosefa ma Maria e ō iina ona o se tusigaigoa sa faatonuina e Kaisara. (Tagai i le pusa i le itulau e 7.) O le fanau mai o Iesu i Peteleema o se mea e mataina. I senituri muamua atu, na valoia ai e le perofeta o Mika le tupu mai o le Mesia i se taulaga itiiti ma le faatauvaa i tafatafa o Ierusalema.—Mika 5:2.

Ua lauiloa le po na fanau mai ai Iesu i le avea ma faavae o vaaiga ia o loo faaāta ai lona Fanau Mai. Ae peitai, e matuā ese lava le tala moni ma le mea o loo masani ona faaāta soo mai. O le tusitala o talafaasolopito o Luka, o lē na taʻu maia ia i tatou le tusigaigoa lea na malaga ai Iosefa ma Maria i Peteleema, sa ia taʻu mai foi ia i tatou e faatatau i leoleo mamoe sa iai ma a latou lafu i lena po tāua i fafo i le vao. O mea nei e lua na tutupu ua taitaia ai le toatele o tagata suesue i le Tusi Paia e talitonu faapea e lei fanau mai Iesu ia Tesema. Latou te taʻua le lē talafeagai ona faamalosia e Kaisara ia tagata Iutaia faatautee e malaga i o latou nuu moni i le vaitaimi o le tau mālūlū ma timuga, lea e ono atili ai ona faaosofia le feita o nei tagata tetee. E faapena foi ona lē talafeagai, e pei ona matauina ai e tagata popoto, le nonofo ai pea o leoleo mamoe ma a latou lafu i le fanua i le vaitaimi o le loulouā o le tau.—Luka 2:8-14.

Mātau sa filifili Ieova e faasilasila atu le fanau mai o lona Alo, e lē i tagata aʻoaʻoina ma taʻitaʻi lotu sa tele so latou taaʻina i na aso, ae i tagata galulue mamafa sa i fafo i le fanua. E foliga mai e itiiti se fesootaiga sa iai a tusiupu ma faresaio ma le au leoleo mamoe, o ē sa avea a latou faasologa masani o galuega ma mea sa lē mafai ai ona latou tausia nisi vaega o le tulafono tuugutu. Ae sa faaeaina e Ieova nei tane faatauvaa ma le faamaoni e ala i se faamamaluina tele—na faailoa mai e se vaega o agelu ia i latou faapea o le Mesia, lea sa faatalitali i ai tagata o le Atua mo le faitau afe o tausaga, ua fanau mai nei i Peteleema. O tane nei, ae lē o “tupu e toatolu” e pei ona masani ona faaataina mai ai i vaaiga o le Fanau Mai o Iesu, na latou asiasi atu ia Maria ma Iosefa ma iloa ai lenei pepe lē ponā o taoto i le fale o povi.—Luka 2:15-20.

E Fiafia Ieova i Ē Saili i le Upu Moni ma le Lotomaulalo

E fiafia Ieova i tagata lotomaulalo o ē alolofa ia te ia ma o loo matuā naunau e vaai atu i le faataunuuga o ana folafolaga. O le autū lena o manatu o loo aliae mai pea i mea e tutupu e taulai atu i le fanau mai o Iesu. Ina ua tusa o le masina talu ona fanau mai le tama, na avatu ai loa o ia e Iosefa ma Maria i le malumalu ona o le usiusitai i le Tulafono Faa-Mose, ma sa la faia iina se taulaga a lē o ni “uluga manutagi po o ni tamai lupe e lua fua.” (Luka 2:22-24) O le Tulafono lava ia e manaomia se tamai mamoe poʻa, peitai sa faataga ona fai le auala taugofie lea pe afai e matitiva. (Levitiko 12:1-8) Seʻi mafaufau i ai. Sa filifilia e Ieova le Atua, le Pule Silisili Ese i le aoao o mea, e lē o se aiga maumea ae o se aiga matitiva e avea ma aiga e soifua aʻe ai lona Alo pele e toatasi. Afai o oe o se matua, e ao ona faamanatu atu ia te oe e lenei mea e faapea o le meaalofa sili e mafai ona e avatu i lau fanau—e sili mamao atu na i lo le tamaoaiga faaletino po o se aʻoaʻoga maualuga faalelalolagi—o se siomaga lea i se aiga e faamuamua mea faaleagaga.

I le malumalu, e toalua isi tagata tapuai faamaoni, o ni ē faatauvaa sa faaeaina e Ieova. O le tasi o Ana, o se fafine e 84 tausaga le matua ua oti lana tane o lē “e lei alu ese ia i le malumalu.” (Luka 2:36, 37) O le isi o se toeaina faatuatua e suafa ia Simeona. Sa taufai faagaeetia uma i laua i le faaeaga na avatu e le Atua ia i laua—e vāai ai i lē o le a avea ma Mesia folafolaina a o lei maliliu i laua. Sa taʻua ai e Simeona se valoaga e faatatau i le tamaitiiti. O se valoaga sa tumu i faamoemoega peitai sa aofia ai foi ma ni faanoanoaga. Sa ia folafolaina e faapea o lenei tinā talavou, o Maria, o le a iai le aso e tuia ai i le faanoanoa ona o lana tama.—Luka 2:25-35.

Ua Lamatia le Tamaitiiti

O le valoaga a Simeona sa faaātaāta mai ai e faapea o lenei tamaitiiti e leai sana sala o le a avea foi ma taulaiga o faiga inosia. E oo lava i le taimi a o avea o ia ma tamameamea, na iai e āfua mai ai lava i lena vaitaimi le inosia o ia. O loo faamatala auiliili mai e le faamatalaga a Mataio pe na faapefea ona tupu lenei mea. Ua tuanai ni nai masina, ma ua nonofo nei Iosefa, o Maria, ma Iesu i se fale i Peteleema. Na faateia i latou i ni mālō asiasi mai se nuu mamao latou te lei faatalitalia. E ui lava i le tele o tamaloloa o loo faaāta atu i vaaiga o le Fanau Mai o Iesu, ae lē o taʻu patino mai e Mataio ia i tatou pe toafia tamaloloa na asiasi atu, na te lē o taʻua foi i latou o ni “tagata atamamai,” e lē o faapea mai foi o ni “tupu e toatolu.” Sa ia faaaogaina le upu Eleni o le maʹgoi, o lona uiga “o ē saili faailoga i fetu.” Ua lava lea e taʻu atu ai i le tagata faitau o loo iai se mea leaga o loo galue iinei, auā o le saili faailoga i fetu o le lagi o se faiga o loo faasa e le Afioga a le Atua ma sa matuā alofia e tagata Iutaia faamaoni.—Teuteronome 18:10-12; Isaia 47:13, 14.

O nei tagata saili faailoga i fetu sa mulimuli atu i se fetu mai sasaʻe ma o loo latou avatua meaalofa mo “le ua fanau mai o le tupu o tagata Iutaia.” (Mataio 2:2) Peitai e lei taitaia i latou e le fetu i Peteleema. Na tatai atu i latou i Ierusalema ma ia Herota le Sili. E leai se isi tagata i le lalolagi e pei o ia i le iai o sana auala po o sana pule e faaleaga ai i le pepe o Iesu. Na fasiotia foi e lenei tamaloa fasioti tagata ma le fiasili nisi sui vavalalata o lona lava aiga o ē sa ia manatu i ai o ni taufaamataʻu.a Ona o le atuatuvale i le faalogo atu i le fanau mai o lē o le a avea ma “tupu o tagata Iutaia,” na ia auina atu ai tagata saili faailoga i fetu e suʻe mai Ia lena i Peteleema. A o latou ō atu, sa tupu ai se mea e lē masani ai. O le “fetu” lea sa faapogaia ai i latou e malaga i Ierusalema e foliga mai ua muamua atu ia i latou!—Mataio 2:1-9.

E tatou te lē iloa lenei mea, pe o se malamalama moni na iai i le lagi pe o se faaaliga. Peitai ua tatou iloa o lenei “fetu” e lē mai le Atua. Ona o faufauga mai lē o loo leaga, na taitaia atu ai nei tagata tapuai faapaupau ia Iesu—o se tamaitiiti lē tagolima ma le lē mafesoasoania, e na o se kamuta mativa ma lana avā o loo leoleoina o ia. Na semanū e avea le toe foi atu o tagata saili faailoga i fetu ia Herota le tupu fia taui ma sui e tusa ai o lona manao, ma auala e taitaia atu ai i le faaumatiaina o le tamaitiiti. Peitai na faalaa ane le Atua e ala i se miti ma auina atu i latou i se isi auala i lo latou nuu. O le “fetu” la, e foliga e mai ia Satani le fili o le Atua, o lē o le a ia faia so o se taumafaiga lava e faaleagaina ai le Mesia. Pagā le faatagafai o le faafoliga mai o le “fetu” ma tagata saili faailoga i fetu e pei ona faaāta mai i vaaiga o le Fanau Mai o Iesu e faapea e mai le Atua!—Mataio 2:9-12.

Ae ui i lea, e lē o fiu Satani. Sa faaauau pea ana taaʻiga i le mataupu, sa faatonuina e le tupu o Herota, ina ia fasiotia uma pepe i Peteleema e i lalo ifo o le lua tausaga le matutua. Ae e lē mafai ona manumalo Satani i se taua faasaga ia Ieova. Sa matauina e Mataio e faapea ua leva ona muai silafia e le Atua lenei fasiotia ma le sauā o tamaiti lē sala. Na faapogaia foi e Ieova lē taulau atili o Satani, i lona lapataia o Iosefa e ala i se agelu ina ia sosola i Aikupito mo le saogalemu. Ua lipotia mai e Mataio e faapea i se taimi mulimuli na toe siitia ai foi e Iosefa si ona aiga toalaiti ma iu ai loa ina nonofo i Nasareta, lea na ola faatasi aʻe ai Iesu ma ona uso ma ona tuafāfine e laiti uma ia te ia.—Mataio 2:13-23; 13:55, 56.

Le Fanau Mai o Keriso —Lona Uiga mo Oe

Po ua faateia ai ea oe i lenei otootoga o mea tutupu o loo siomia ai le fanau mai ma le soifuaga o Iesu a o tamaitiiti? E toatele tagata faapena. E faateia i latou i le iloa e faapea o faamatalaga e matuā autasi ma saʻo, e ui lava i le finau maumauai mai o nisi faapea e feteenaʻi. E faateia foi i latou i le iloa o nisi o nei mea na tutupu na uluai valoia mai pe tusa o le faitau selau tausaga. E faateia foi i latou i le iloa o nisi o mea autū i faamatalaga a tusitala o Evagelia e matuā eseese lava mai mea o loo faaāta mai i tala ma vaaiga masani o le Fanau Mai o Iesu.

Atonu, o le mea e sili ona faateia ai i mea uma, ona o le tele o mea o loo faamanatu ai le Kirisimasi o loo misi ai manatu autū ia o loo faailoa mai e tusitala o Evagelia. Mo se faataitaiga, e itiiti lava se manatu o taulai atu i le Tamā o Iesu—e lē o Iosefa, ae o Ieova le Atua. Seʻi tomānatu i ona lagona a o ia tuuina atu lona Alo pele ia Iosefa ma Maria ina ia la tausia ma saunia mea manaomia mo ia. Seʻi tomānatu i mafatiaga sa i le Tamā i le lagi i le tuu mai o lona Alo e soifua aʻe i se lalolagi na iai se tupu na tumu i le ita, o lē o le a faia se faufauga ina ia fasiotia o ia mai lava i le taimi a o laitiiti! Ona o le anoanoai o le alofa mo tagata na uunaia ai Ieova e fai lenei taulaga.—Ioane 3:16.

E tele lava ina tuulafoaia le Iesu moni i le faamanatuina o le Kirisimasi. Ioe, e leai se faamaumauga o iai, faapea na ia taʻu atu ai i ona soo lona aso fanau; e leai foi se faamaoniga e iloa ai a mea la sa faamanatu e ona soo lona aso fanau.

E lē o le fanau mai o Iesu ae o lona maliu—ma o se mea na tupu e aafia ai le talafaasolopito o le lalolagi uma—lea na ia faatonu ona soo e faamanatu. (Luka 22:19, 20) Leai, e lei manao Iesu ia manatua o ia o se pepe e leai se mea e mafai ona ia faia, auā e lē o lona tulaga lena o loo iai i le taimi nei. E sili atu i le 60 tausaga talu le fasiotia o ia, na faaali atu ai Iesu ia Ioane i se faaaliga, ua avea o se Tupu malosi o loo tietie atu i se taua. (Faaaliga 19:11-16) O lona tofiga lena, o se Pule o le Malo faalelagi o le Atua, lea e manaomia ona tatou iloa ai Iesu i aso nei, auā ua avea nei o ia ma Tupu o lē o le a suia le lalolagi.

[Faaopoopoga i lalo]

[Pusa/Ata i le itulau 7]

Pe sa Sese le Faamatalaga a Luka?

E FAAPEFEA ia Iesu, o lē sa soifua aʻe i Nasareta ma sa lauiloa foi o se tagata Nasareta, ona fanau mai i Peteleema, e tusa e 90 maila (150 kilomita) le mamao ese? Ua faamatala mai faapea e Luka: “O aso lava ia [a o lumanai le fanau mai o Iesu] na oo mai ai le poloaiga a Kaisara Aokuso ia tusia uma ai le lalolagi. Na faia lenei uluai tusiga ina o pule Kurenio i Suria. Ua o uma atu foi i latou ia tusia, e taitasi i lana lava aai.”—Luka 1:1; 2:1-3.

E anoanoai faitioga a le aufaitio o ē tetee i lenei faamatalaga faapea e matuā sese lava e lē saʻo, e sili atu ai ona leaga talu ai sa fai mai isi o se pepelo. Latou te finau maumauai faapea o le tusigaigoa lenei atoa ma le taimi na fai ai Kurenio ma kovana, na tupu i le 6 po o le 7 T.A. Afai e moni i latou, o le a faapogaia ai se masalomia o le matuā moni o le tala a Luka, auā e tusa ai ma faamaoniga e aliali mai na fanau Iesu i le 2 T.L.M. Peitai ua lē amanaia e lenei aufaitio manatu tāua e lua. Muamua, o loo tautino mai e Luka e sili atu i le tasi le tusigaigoa—mātau o loo ia faasino atu i “lenei uluai tusiga.” Sa ia iloa lelei e iai le isi tusigaigoa mulimuli ane. (Galuega 5:37) O le tusigaigoa mulimuli ane lenei na faia i le 6 T.A. na faamatala mai foi e le tusitala o talafaasolopito o Josephus. O lona lua, e lē avea le taimi na kovana ai Kurenio ma mafuaaga e faamalosia ai i tatou e tuu le fanau mai o Iesu i lena taimi mulimuli ane. Aisea? Auā e foliga mai e faalua ona auauna ai Kurenio i le tofiga lena. E toatele tagata suesue o le Tusi Paia e manatu faapea o le taimi muamua na galue ai e pe tusa o le 2 T.L.M.

O nisi tagata faitio ua faapea mai na faatupu e Luka lenei faamatalaga i se tusigaigoa ina ia mafai ai ona iai se mafuaaga e fanau mai ai Iesu i Peteleema, ina ia faataunuu ai le valoaga i le Mika 5:2. O lenei manatu ua avea ai Luka ma pepelo ma le loto i ai, ae e lē mafai ona faamaonia e se tagata tautuuaʻi se tuuaʻiga faapena i le tusitala maelega o lē na tusia le Evagelia ma le tusi o Galuega.

E iai foi se isi mea e lē mafai e ē faitio ona faamatalaina: Ua faataunuuina ai foi se valoaga i le tusigaigoa! I lona ono senituri T.L.M., na valoia mai ai e Tanielu se tupu o lē na te “faaui ane le faau taulaga i le nuu matagofie o lona malo.” Pe sa faatatau atu ea ia Aokuso ma lana faatonuga ina ia faia se tusigaigoa i Isaraelu? Manatua na ­valoia mai i le valoaga e faapea o le a “fano” le Mesia, po o le “Taʻitaʻi o le feagaiga,” i le taimi o le pulega a lē o le a tulai mai e sui i lenei pule. Ma sa “fano” moni lava Iesu ina ua fasiotia i le taimi o le nofoaiga a lē na sui ane ia Aokuso, o Tiperio lea.—Tanielu 11:20-22.

[Ata]

Kaisara Aokuso (27 T.L.M.–14 T.A.)

Tiperio Kaisara (14-37 T.A.)

[Ē Ana le Ata]

Musée de Normandie, Caen, France

Photograph taken by courtesy of the British Museum

[Ata i le itulau 8]

Na faaeaina e le agelu a Ieova leoleo mamoe faatauvaa e taʻu atu i ai le tala lelei o le fanau mai o Keriso