“Ieova” po o “Iauē”?

E “MATAUTIA,” e “uigaese,” e “taufaafefe.” O le ā e ono māfua ai ona faaaogā e Eperu atamamai i le Tusi Paia, na faaupuga malolosi? O se finauga i le pe talafeagai ona avea “Jehovah” (Ieova) ma faaleoga saʻo i le gagana Peretania o le suafa o le Atua. Mo le silia i le selau tausaga, sa faifai tetele ai lenei feteenaiga. I aso nei, o le toatele o tagata atamamai e foliga ua mātele e faaaogā le upu lea e lua ona silapela “Yahweh” (Iauē). Ae pe o le faaleoga ea “Jehovah” ua matuā “taufaafefe”?

O le Mafuaaga o le Feteenaiga

E tusa ai ma le Tusi Paia, o le Atua lava na ia faaalia mai lona suafa i tagata. (Esoto 3:15) O faamaoniga faale-Tusi Paia e faaalia ai sa saoloto auauna anamua a le Atua e faaaogā lena suafa. (Kenese 12:8; Ruta 2:4) Sa iloa foi e isi nuu le suafa o le Atua. (Iosua 2:9) Sa matuā moni lena mea ina ua fesootai tagata sa Iutā o ē na toe foi mai le faaaunuuaina i Papelonia, ma tagata o le tele o nuu. (Salamo 96:2-10; Isaia 12:4; Malaki 1:11) Ua faapea mai le Interpreter’s Dictionary of the Bible: “E iai faamaoniga talafeagai e faapea i le vaitaimi o le talafaasolopito o sa Iutā i le va o le iuga o lo latou faaaunuua i Papelonia i le 538 T.A. ma le 1 T.A., e toatele tagata mai isi nuu sa tosina atu i le lotu a tagata Iutaia.” Peitai, e oo ane i le senituri muamua T.A., ua tuputupu aʻe se faiga faataulaitu e faatatau i le suafa o le Atua. Na iu lava, e lē gata sa lē toe faaaogaina saoloto e le nuu o Iutaia le suafa o le Atua, ae na iai foi nisi na latou matuā faasāina lava le toe faaleoina o lea suafa. O iina loa na mou atu ai lona faaleoga saʻo—pe moni lea?

O le ā e Mafai Ona Iai i se Suafa?

I le gagana Eperu, ua tusia ai le suafa o le Atua faapea יהוה. O nei mataitusi e fa, e amata faitau mai le itu taumatau i le itu agavale, ua masani ona faaigoa o le Tetakalamatone. E tele igoa o tagata ma nofoaga o loo taʻua i le Tusi Paia o loo iai se faapuupuuga o le suafa tauatua. Pe mafai ea ona iloa mai i nei igoa se auala sa faaleo ai le suafa o le Atua?

Fai mai George Buchanan, o se polofesa ua litaea mai le Wesley Theological Seminary, i Washington, D.C., i le Iunaite Setete o Amerika, o le tali i ai o le ioe. Ua faamatala e le polofesa o Buchanan faapea: “I taimi anamua, sa masani ona faaigoa e mātua a latou fanau i igoa o o latou atua. Lona uiga sa latou faaleoina igoa o a latou fanau i le auala na faaleo ai foi igoa o o latou atua. Sa faaaogā le Tetakalamatone i igoa o tagata, ma sa masani ona latou faaaogā le vaueli o loo ogatotonu.”

Seʻi manatu i ni nai faaaoaoga o igoa o loo taʻua i le Tusi Paia lea e aofia ai se faapuupuuga o le suafa o le Atua. O le igoa Ionatana, e tusia faapea Yoh·na·thanʹ po o Yehoh·na·thanʹ i le Tusi Paia Eperu, o lona faauigaga e faapea “ua foaiina mai e Yaho po o Yahowah,” o le tala lea a le polofesa o Buchanan. O le igoa o le perofeta o Elia o ʼE·li·yahʹ po o ʼE·li·yaʹhu i le faa-Eperu. Fai mai le polofesa o Buchanan, o le uiga o le igoa: “O loʻu Atua o Yahoo po o Yahoo-wah.” E faapena foi le igoa faa-Eperu mo Iosefatu, o Yehoh-sha·phatʹ, o lona uiga “ua faia e Yaho le faamasinoga.”

O le faaleoga o silapela e lua o le Tetakalamatone faapea “Yahweh,” ua lē mafai ai ona avea le leo o le vaueli o, ma vaega o le suafa o le Atua. Ae i le tele o isi igoa faale-Tusi Paia o loo faaaogā ai le suafa tauatua, o loo lagona ai le faaleoga o lena vaueli ogatotonu, e lē gata i le igoa atoa ae o le faapuupuuga foi, e pei ona iai le igoa Ieonatana (Jehonathan) ma Ionatana (Jonathan). O lea, ua faapea mai le polofesa o Buchanan e faatatau i le suafa tauatua: “E leai se mea o aveesea ai le vaueli oo po o le oh. O nisi taimi sa faapuupuu ai le upu i le ‘Ya,’ ae sa lē tāitai ona faapuupuuina i le ‘Ya-weh.’ . . . Ina ua faaleoina le Tetakalamatone i le silapela e tasi, sa faapea ‘Yah’ po o ‘Yo.’ Ina ua faaleoina i silapela e tolu ona faapea lea ‘Yahowah’ po o ‘Yahoowah.’ Pe ana fai sa faapuupuuina i silapela e lua, semanū e faapea ‘Yaho.’”—Biblical Archaeology Review.

Ua fesoasoani mai nei faamatalaga ina ia tatou malamalama ai i le faamatalaga na faia e le tagata aʻoga atamai Eperu o le lona 19 senituri, o Gesenius i lana tusi Hebrew and Chaldee Lexicon to the Old Testament Scriptures e faapea: “O i latou e manatu o le יְהוָֹה [Ye-ho-wah] o le faaleoga saʻo lea [o le suafa o le Atua] e lē faapea ua leai sa latou faamaoniga e lagolagoina ai lo latou manatu. I le faaleoina faapena, e mafai ai ona faapuupuu silapela יְהוֹ [Ye-ho] ma le יוֹ [Yo], lea o loo amata ai le tele o igoa, ma atili faamaninoina ai le faamalamalamaga.”

E ui i lea, i le faatomuaga o lana faaliliuga talu ai nei o le The Five Books of Moses, ua taʻua ai e Everett Fox e faapea: “E lē o taulau uma taumafaiga ua leva ma taumafaiga fou nei i le sailia o le faaleoga ‘saʻo’ o le suafa Eperu [o le Atua]; e lē o faamaonia atoatoa foi le upu ‘Ieova’ lea e masani ona faalogoina i nisi taimi, faapena i le ‘Yahweh’ lea ua tau faamautuina e tagata atamamai.”

E mautinoa o le a faaauau pea le finauga a le au atamamai. Na taofia e tagata Iutaia lo latou faaleoina o le suafa o le Atua moni a o lei amata e le au Masoreta le faiga o le faaleoina o vaueli i se leo e tau latalata i ai. O lea, e lē o iai se auala maʻoti e faamaonia ai po o ā vaueli sa tuufaatasi ma konesane o le YHWH (יהוה). Peitai, o igoa o tagata iloga o le Tusi Paia—le faaleoga saʻo lea sa lē tāitai ona leiloa—ua saunia mai ai se auala mautu i le faaleoga i aso anamua o le suafa o le Atua. Ona o lenei mea moni, ua ioe ai nisi tagata aʻoga atamamai faapea o le faaleoga “Jehovah” ua lē o se faaleoga e “taufaafefe.”

[Ata i le itulau 31]

O “Jehovah” (Ieova) o le faaleoga lea ua sili ona taatele o le suafa o le Atua