Se Tasi e Manatu Moni Mai Lava

E FAITAU afe tagata e faaalia latou te manatu mamafa moni mai lava. E lē o ia i latou le vaaiga lē alofa ma le manatu faapito faapea o faafitauli o isi e lē o so latou popolega lea. Na i lo lena, latou te faia le mea e gata mai ai lo latou mafai—o nisi o taimi e oo lava i le tuuina atu ai o o latou ola i se tulaga lamatia—ina ia faaitiitia ai le mafatiaga. O se gaoioiga maoaʻe lenei, o se gaoioiga ua taaʻina e uunaiga malolosi e lē mafai ona latou pulea.

O mafuaaga e pei o le matapeapea, o togafiti faapolotiki, o taua, ma mala faalenatura e mafai ona faavaivaia ai e oo lava “i taumafaiga e sili ona mautinoa ma maumauai e tafiesea le matelaina,” e pei ona fai mai ai se tagata e galue mo galuega fesoasoani. O le aveesea o le matelaina ua na o se tasi lea o faafitauli mai le anoanoai o faafitauli o loo fesagai ma tagata o loo manatu mamafa. O loo latou tauivi foi ma mea e pei o faamaʻi, matitiva, faiga lē tonu, ma le faatuputeleina o le mapuitiga e māfua mai i taua. Ae po o latou manumalo ea?

Na taʻua e le faatonu o se tasi o faalapotopotoga e aumaia ai fesoasoani e faapea, o i latou o loo faia na “taumafaiga mautinoa ma maumauai” ina ia faaitiitia le matelaina ma tiga e tai pei lava o le Samaria agalelei lea o loo taʻua i le tala faatusa a Iesu Keriso. (Luka 10:29-37) Ae po o le ā lava le mea latou te faia, na ia faapea mai, o loo faatuputupulaia pea le aofai o ē afaina i faalavelave. O lea na ia fesili ai: “O le ā e ao i le Samaria agalelei ona fai pe afai e faimalaga i le auala lava lea e tasi i aso uma mo ni tausaga ma toe maua foi se isi tagata ua afaina i faiga a le au faomea i vaiaso taitasi i tafatafa o le auala?”

O le a faigofie lava ona lolo atu i le mea ua faamatalaina o le ‘maʻi matautia o le faavaivai o lē o loo foai’ ma oo atu ai i le fiu ona o le lē mautonu. E viiviia i latou o ē e manatu mamafa moni lava auā e lē o faavaivai i latou. (Kalatia 6:9, 10) Mo se faaaoaoga, na tusi atu se tamaloa i le Jewish Telegraph a Peretania e faamālō atu i Molimau a Ieova, o ē “na fesoasoani i le faitau afe o tagata Siū ina ia faasaoina mai mafatiaga i Auschwitz” i le taimi o pulega a Nasi i Siamani. Na faapea mai le tusitala: “Ina ua tau lē maua ni meaʻai, na latou tufa atu a latou falaoa i o matou uso ma tuafāfine [Siū]!” Na faaauau ona faatino e Molimau mea latou te mafaia e tusa ai o mea na latou maua.

Peitai, o le mea moni e lē mafai e le fefaasoaai o falaoa po o le ā lava le tele ona aumaia se iuga atoatoa i puapuaga o tagata. E lē faapea ua faaleaogaina mea ua faia e tagata agalelei. E aogā tele so o se gaoioiga lava e faaitiitia ai mafatiaga. O na Molimau na fesoasoani e faaitiitia tiga o o latou uso pagota, ma mulimuli ane na faaumatia faiga faa-Nasi. Peitai, o loo faaauau mai pea le faiga o mea a le lalolagi lea e māfua ai na mafatiaga, ma o loo iai pea tagata e lē manatu mamafa. O le mea moni, “o i ai le tupulaga, o pelu o latou nifo, ma polo o latou nifo tuimanu; e aai ai i ē puapuagatia i le nuu, atoa ma tagata matitiva.” (Faataoto 30:14) Atonu, ua e tau mānatu ai pe aisea ua faapea ai.

Aisea ua Oo Mai ai le Mativa ma Mafatiaga?

I se tasi taimi, na fetalai ai Iesu Keriso: “Tou te nonofo pea ma e matitiva, o aso uma foi tou te loto i ai ua outou mafaia ona agalelei atu ia te i latou.” (Mareko 14:7) Pe sa uiga ea le fetalaiga a Iesu faapea o le a lē tāitai ona faaiuina le mativa ma mafatiaga? E pei o isi tagata, pe sa ia talitonu faapea o na puapuaga o se vaega o se fuafuaga a le Atua ina ia tuu atu ai le avanoa i tagata alolofa e faaalia ai le tele o lo latou manatu mamafa? E leai! E lei talitonu Iesu i lena manatu. Sa na ona ia faailoa mai le manatu faapea o le a avea le mativa ma vaega o le olaga a o tumau pea ona iai lenei faiga o mea. Ae na silafia foi e Iesu le mea lenei: Sa lē o se fuafuaga a lona Tamā faalelagi le oo mai o ia tulaga i le lalolagi.

Na faia e Ieova le Atua le lalolagi e avea ma parataiso, ae lē o se nofoaga e pagatia i le mativa, faiga lē tonu, ma mafatiaga. Na ia faailoa ai le tele o lona manatu mai i le aiga faaletagata e ala i le faia o sauniuniga matagofie e mafai ona faaopoopo i le fiafiaga i le olaga. Ioe, manatu i le igoa o le faatoaga lea sa iai o tatou uluai mātua, o Atamu ma Eva! Sa faaigoaina o Etena, o lona uiga o le “Fiafiaga.” (Kenese 2:8, 9) Sa lei faatapulaa e Ieova i tagata mea e manaomia i le olaga i se siomaga faanoanoa, ma le mapuitiga. I le faaiuga lava o lana galuega faalefoafoaga, na iloiloina ai e Ieova mea na ia faia ma faalauiloa mai e faapea ua “matuā lelei lava.”—Kenese 1:31.

O lea la, aisea ua taatele ai le mativa, o mafatiaga, ma isi mafuaaga o puapuaga i le lalolagi aoao i aso nei? O le faiga o mea amioleaga o loo iai i le taimi nei ua tulai mai ona sa filifili o tatou uluai mātua e fouvale i le Atua. (Kenese 3:1-5) Ona o lenei mea, ua lāgā ai le fesili pe faamata ua tonu i le Atua le poloaiina o ana foafoaga ina ia usiusitai atu. O lea ua faatagaina ai e Ieova se vaitaimi faatapulaa e tutoatasi ai fanau a Atamu. O loo manatu mai pea le Atua i le mea na tupu i le aiga faaletagata. Na ia faia le sauniuniga mo le aveesea o mea leaga uma ua faapogaia ona o le fouvale ia te ia. Ma e lē o toe umi, ae faaiua e Ieova le mativa ma mafatiaga—o le mea moni, o puapuaga uma lava.—Efeso 1:8-10.

Se Faafitauli ua Lē Mafai Ona Foia e Tagata

I le faasolo mai o senituri talu mai le foafoaina o le tagata, ua matuā mamao ese ai lava le fanau a tagata mai tapulaa a Ieova. (Teuteronome 32:4, 5) O le faaauau ona latou teena o tulafono ma mataupu silisili a le Atua, ua faapea ona fetauai ai tagata, ma “pule ai le tasi tagata i le tasi, e leaga ai o ia lava.” (Failauga 8:9) O taumafaiga uma ina ia aumaia se sosaiete e fai mea tonu, e sao mai mea uma o loo pagatia ai le toatele, ua lē taulau ona o le manatu faapito o i latou o ē mananao e faia mea i a latou lava auala na i lo le gauai atu i le pule silisili ese a le Atua.

E iai se isi faafitauli—lea e lē o ano i ai le toatele faapea o se talitonuga faanuupo e leai sona uiga. O lē na faapogaia le fouvale i le Atua o loo ia uunaia pea tagata i mea leaga ma le manatu faapito. O ia o Satani le Tiapolo, ma na taʻua o ia e Iesu Keriso “o le alii o lenei lalolagi.” (Ioane 12:31; 14:30; 2 Korinito 4:4; 1 Ioane 5:19) I le faaaliga na tuuina atu i le aposetolo o Ioane, ua matauina ai Satani o le puna autū o faanoanoaga—o lē ua sili ona tuuaʻia i le ‘faaseseina o le lalolagi uma.’—Faaaliga 12:9-12.

E tusa lava po o le ā le telē o le manatu mamafa o isi i o latou uso a tagata, ae o le a lē mafai lava ona latou aveesea Satani le Tiapolo po o le suia foi o lenei faiga o mea o loo ia faamalosia le faateleina o le aofai o i latou ua aafia i mafatiaga. O le ā la e manaomia ina ia foia ai faafitauli o le fanau a tagata? O le vaifofo e lē na o se tasi e manatu mai. E iai se manaoga mo se tasi e iai le naunautaiga ma le mana e tafiesea ai Satani ma lana faiga o mea lē tonu atoa uma.

“Ia Faia Lou Finagalo, i le Lalolagi”

Ua folafola mai e le Atua e faaumatia lenei faiga amioleaga o mea. Ua ia te ia le naunautaiga ma le mana e faia ai faapea. (Salamo 147:5, 6; Isaia 40:25-31) I le tusi faavaloaga o le Tusi Paia o Tanielu, ua valoia ai faapea: “E faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau”—ioe, e faavavau. (Tanielu 2:44) Sa iai i le finagalo o Iesu Keriso lenei malo faalelagi e tumau ma agalelei a o ia aʻoaʻo ona soo ina ia aioi atu i le Atua i le tatalo: “Ia oo mai lou malo, Ia faia lou finagalo, I le lalolagi e pei ona faia i le lagi.”—Mataio 6:9, 10.

O le a tali mai Ieova i na tatalo auā o loo ia manatu moni mai lava i le aiga faaletagata. E tusa ai o upu faavaloaga o i le Salamo 72, o le a faatagaina e le Atua lona Alo, o Iesu Keriso, ina ia aumaia le mapusaga tumau i ē matitiva, o ē pagatia, ma ē mafatia o loo lagolago i le pulega a Iesu. O lea, na pese ai le faisalamo faagaeeina: “E faamasino e ia [le Tupu faa-Mesia a le Atua] o e puapuaga o le nuu; e faaolaina foi e ia le fanau a e ua matitiva, a e faamomomoina e ia o le ua faasaua. . . . E laveai e ia o lē mativa i lona alaga mai; atoa ma le ua puapuagatia, ma le ua leai sona fesoasoani. E alofa atu ia i le ua vaivai ma le ua mativa; e faaola lava e ia e ua matitiva. E laveai o ia ia i latou ai le saua ma le faamalo; e silisili foi o latou toto i lona manatu.”—Salamo 72:4, 12-14.

I se vaaiga e aafia ai o tatou aso, na vaaia ai e le aposetolo o Ioane “le lagi fou ma le lalolagi fou,” o se faiga fou o mea atoatoa ua faavaeina e le Atua. Maeu se faamanuiaga mo le fanau a tagata puapuagatia! I le valoia mai o mea o le a faia e Ieova, na tusi ai Ioane: “Na ou faalogo foi i le leo tele mai le lagi, ua faapea mai, ‘Faauta, ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu, e ia te i latou le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.’ Ua fetalai mai foi lē tietie i le nofoālii, ‘Faauta, ou te faia ia fou mea uma lava.’ Ua fetalai mai foi o ia ia te au, ‘Ia e tusi; auā o upu nei e moni ma le faamaoni ia.’”—Faaaliga 21:1-5, LF.

Ioe, e mafai ona tatou talitonu i nei upu, auā e moni ma faamaoni. O le a lē toe umi ae gaoioi Ieova e aveesea le mativa, fia ʻai, mafatiaga, faamaʻi, ma faiga lē tonu uma lava. E pei ona faailoa soo atu e lenei mekasini mai le Tusi Paia, e anoanoai faamaoniga e faailoa ai faapea o loo tatou ola i le taimi e faataunuuina ai nei folafolaga. Ua latalata mai lava le lalolagi fou folafolaina a le Atua! (2 Peteru 3:13) E lē toe umi, ae “faaumatia e [Ieova] le oti e faavavau” ma o le a “soloiesea foi . . . o loimata i mata uma lava.”—Isaia 25:8.

A o faatalitalia la le faataunuuina o lena mea, e mafai ona tatou fiafia ona e oo lava i le taimi lenei o loo iai tagata o loo manatu mamafa moni lava. O le mafuaaga sili o le fiafia ona o le manatu mamafa moni mai o Ieova le Atua lava ia. E lē o toe umi ae ia aveesea mafatiaga ma puapuaga uma lava.

E mafai ona ia te oe le faatuatuaga atoatoa i folafolaga a Ieova. Sa faia faapena e lana auauna o Iosua. Faatasi ai ma se mautinoa atoatoa, na ia taʻu atu ai i tagata anamua o le Atua e faapea: “Ua outou iloa ma o outou loto atoa, ma o outou agaga atoa, e lei iuvale se upu e tasi i upu lelei uma na fetalai mai ai Ieova lo outou Atua ia te outou; ua taunuu uma ia te outou, ua le iuvale se upu e tasi.” (Iosua 23:14) O lea, a o tumau pea ona iai lenei faiga o mea, aua neʻi faatagaina oe e lofituina e tofotofoga e te ono fesagaia. Ia lafo uma atu ou popolega ia Ieova, auā e manatu moni mai lava o ia.—1 Peteru 5:7.

[Ata i le itulau 7]

I le lalolagi fou folafolaina a le Atua, o le a lē toe iai i le lalolagi le mativa, mafatiaga, faamaʻi, ma faiga lē tonu