Ia Maua le Atamai ma Talia Aoaiga

O IEOVA LE ATUA o le Aʻoaʻo Silisili lea o ona tagata. Na te aʻoaʻoina i latou e lē gata e uiga ia te ia lava ae faatatau foi i le olaga. (Isaia 30:20; 54:13; Salamo 27:11) Mo se faataitaiga, i le nuu o Isaraelu, na tuuina atu e Ieova perofeta, o sā Levī—ae maise lava ositaulaga—ma isi tane atamamai e auauna o ni aʻoaʻo. (2 Nofoaiga a Tupu 35:3; Ieremia 18:18) Na aʻoaʻo e perofeta tagata e faatatau i fuafuaga ma uiga o le Atua ma faailoa atu le ala saʻo ina ia uia. Sa iai i ositaulaga ma sā Levī le tiute tauave o le aʻoaʻoina atu o le Tulafono a Ieova. Ma o tane atamamai, po o toeaina, na saunia fautuaga aogā i le mataupu e uiga i le olaga i aso faisoo.

O Solomona, le atalii o Tavita, na matilatila o ia mai tane atamamai o Isaraelu. (1 Tupu 4:30, 31) I le vaai atu i lona mamalu ma lona tamaoaiga, na tautino atu ai e se tasi o ana malo e sili ona faaaloalogia, le tupu tamaitai o Seepa e faapea: “E itiiti mea na talaina atu ia te au, a e tele mea na le talaina atu; ua sili lava lou poto, ma lou manuia i le tala na ou faalogo i ai.” (1 Tupu 10:7) O le ā le ala o le atamai o Solomona? Ina ua avea Solomona ma tupu o Isaraelu i le 1037 T.L.M., na ia tatalo ai mo le “poto ma le atamai.” I le fiafia i le mea na ia talosaga ai, na tuuina atu ai e Ieova ia te ia le poto, le atamai, ma se loto malamalama. (2 Nofoaiga a Tupu 1:10-12; 1 Tupu 3:12) E lētioa la ‘tolu afe faataoto na faia’ e Solomona! (1 Tupu 4:32) O nisi o nei faataoto, faatasi ma “upu a Akuru” faapena foi ma upu a “Lemueli le tupu,” ua faamauina i le tusi o le Tusi Paia o Faataoto. (Faataoto 30:1; 31:1) O upu moni o loo faamatalaina atu i nei faataoto ua atagia ai le atamai o le Atua ma e faavavau. (1 Tupu 10:23, 24) Mo so o se tasi o loo faanaunau i se olaga fiafia ma taulau manuia, ua sili atu ona manaomia nei faataoto i aso nei e pei lava o le taimi na faatoʻā taʻua ai.

Taulau Manuia ma le Mamā Tau Amio—Faapefea?

O le sini autū o le tusi o Faataoto o loo faamatalaina i ona upu tomua: “O faataoto a Solomona le atalii o Tavita, le tupu o Isaraelu; ina ia iloa ai le poto ma ia aʻoaʻoina; ia lagona ai upu e atamai ai; ia maua ai le aʻoaʻoina i le poto, ma le amiotonu, ma le faamasinoga, ma le amio saʻo; ia avatu ai le faautauta i e faigofie [“lē lava le poto masani,” NW]; o le poto ma le mafaufau i le taulealea.”—Faataoto 1:1-4.

Maeu le maualuga o le fuafuaga e ao ona faataunuuina e “faataoto a Solomona”! Na faia “ina ia iloa ai le poto ma ia aʻoaʻoina” ai se tasi. O le atamai e aofia ai le malamalama i le tulaga o loo iai mea, ma faaaogaina lena poto e foia ai faafitauli, ausia ai sini, alofia ai pe aloese ai mai lamatiaga, po o le fesoasoani i isi ina ia faia faapea. “I le Tusi o Faataoto,” ua faapea mai ai se tasi tusi, o le “‘atamai’ o lona uiga o le ola i se auala poto—le tomai e faia ai filifiliga atamai ma ola ia taulau manuia.” Maeu la le tāua o le mauaina o le atamai!—Faataoto 4:7.

O loo saunia foi e faataoto a Solomona ia aoaiga. Pe tatou te manaomia lenei toleniga? I le Tusi Paia, o aoaiga ua faailoa mai ai se uiga o le faasaʻoga, aoaia, po o le faasala. E tusa ai ma le faamatalaga a se tasi tagata suesue i mataupu faale-Tusi Paia, na te “faailoa mai le toleniina i le itu tau amio, e aofia ai le faasaʻoina o faanaunauga o se tasi lea e ono taʻitaʻia atu ai i le faia o se mea sese.” O aoaiga, pe faia e i tatou lava ia i tatou po o le faaooina mai foi e isi, e lē gata ina taofia ai i tatou mai le faia o se mea sese ae uunaia ai foi i tatou ina ia suia i le lelei. Ioe, tatou te manaomia aoaiga pe afai tatou te mananao e tumau i le mamā tau amio.

O le fuafuaga la o faataoto e valalua—ina ia tuuina atu le atamai ma ia saunia ai aoaiga. E iai vala eseese o aoaiga tau amio ma le tomai tau le mafaufau. Mo se faaaoaoga, o le amiotonu ma le faamasinotonu, o ni uiga tau amio, ma e fesoasoani ia i tatou ina ia pipii mau atu i tapulaa maualuluga a Ieova.

O le atamai o se tuufaatasiga o ni vala eseese, e aofia ai le iloa, malamalama, tofamamao, ma le tomai tau le mafaufau. O le iloa o le tomai lea e vaai ai i se mataupu ma mataulia lona faatulagaga e ala i le malamalama i le sootaga o ona vaega ma le mea atoa, ma mauaina ai le uiga moni o lena mataupu. O le malamalama e manaomia ai le poto i mafuaaga ma se malamalamaga i le mafuaaga e saʻo ai pe sese se gaoioiga. Mo se faataitaiga, o se tagata e iai le iloa e mafai ona ia matauina ua agaʻi atu se tasi i se auala sese, ma e na te ono fautuaina vave lena tagata e uiga i le lamatiaga. Ae na te manaomia le malamalama ina ia iloa ai le mafuaaga ua agaʻi ai le tagata i lena auala ma ia saunia ai se auala sili ona aogā e faasaoina mai ai lena tagata.

O tagata e tofamamao e atamamai—ae lē faaseegofie. (Faataoto 14:15) E mafai ona latou muai iloa atu le mea leaga ma nofo sauni ai. O le atamai e mafai ai ona tatou atiina ae mafaufauga ma manatu lelei e aumaia ai taiala aogā i le olaga. O le suesueina o faataoto faale-Tusi Paia e tauia moni lava auā na faamauina ina ia tatou iloa ai le atamai ma aoaiga. E oo lava i ē “lē lava le poto masani” o ē e uaʻi atu i faataoto o le a latou maua foi le tofamamao, ma o “le taulealea,” o le a ia maua le poto ma le tomai tau le mafaufau.

Faataoto mo Ē Atamamai

Peitai, o faataoto faale-Tusi Paia, e lē mo na o i latou e lē lava le poto masani ma ē talavou. E mo so o se tasi lava e iai le atamai e faalogo ai. Ua faapea mai le tupu o Solomona: “E faalogo mai le tagata poto, e tupu ai pea lona poto; o le ua mafaufau foi e maua e ia le poto e pule ai; e lagona ai le faataoto ma lona faamatalaga; o upu a e popoto ma a latou upu lilo.” (Faataoto 1:5, 6) O se tasi ua ia mauaina le atamai o le a faateleina mea na te aʻoaʻoina e ala i le uaʻi atu i faataoto, ma o se tasi e iai le malamalama o le a faaleleia atili lona tomai e faafoe ai lona olaga ia taulau manuia.

O se faataoto e masani lava ona faailoa mai ai se upu moni loloto i na o nai upu lava. E ono avea se faataoto faale-Tusi Paia ma faaupuga e faafaigata ona malamalama i ai. (Faataoto 1:17-19) O nisi faataoto o ni tupua—o ni faamatalaga lavelave ma faigata e manaomia ona faamalamalamaina. E mafai foi ona iai i se faataoto ni faatusatusaga, tala faatusa, ma isi ituaiga o faaupuga. O le malamalama i nei mea e faaalu ai se taimi ma le mafaufau loloto. O Solomona, le tusitala o le tele o faataoto, na ia maua moni lava le tomai e malamalama ai i se faataoto. I le tusi o Faataoto, o loo ia taumafai ai e tuuina atu lena tomai i lana au faitau, o se mea e manao le tagata atamai e uaʻi i ai.

Le Amataga e Taʻitaʻia Atu ai i le Sini

O fea e amata ai e se tasi ona sailia le atamai ma aoaiga? Ua tali mai Solomona: “O le mataʻu ia Ieova, o le amataga lea o le poto; a e ʻinoʻino tagata valelea i le poto ma le aʻoaʻoina.” (Faataoto 1:7) O le poto e amata mai i le mataʻu ia Ieova. A leai se poto e lē mafai ona iai se atamai po o se aoaiga. O le mataʻu la ia Ieova, o le amataga lena o le atamai ma aoaiga.—Faataoto 9:10; 15:33.

O le mataʻu i le Atua e lē o se fefe valea ia te ia. Na i lo lea, o se faaaloalo loloto ma le migao. E lē mafai ona iai se poto moni pe afai e leai lenei mataʻu. O le ola e mai ia Ieova le Atua, ma o le mea moni, e tāua tele le ola ina ia tatou maua ai le poto. (Salamo 36:9; Galuega 17:25, 28) E lē gata i lena, o le Atua na faia mea uma; o lea o le poto uma faaletagata e faavae aʻe i le suesue i galuega a ona aao. (Salamo 19:1, 2; Faaaliga 4:11) Na faagaeeina foi e le Atua lana Afioga tusia, lea e “aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu.” (2 Timoteo 3:16, 17) O lea, o le taulaiga autū o le poto moni o Ieova lea, ma e tatau i se tagata o loo sailia ona iai le mataʻu ma le migao ia te ia.

O le ā le tāua o le poto faaletagata ma le atamai faalelalolagi pe a leai se mataʻu i le Atua? Na tusi le aposetolo o Paulo e faapea: “Po o ifea le tagata poto? Po o ifea le tusiupu? Po o ifea le filifiligā o lenei lalolagi? E le ua avea ea e le Atua le poto o lenei lalolagi ma valea?” (1 Korinito 1:20) O le leai o se mataʻu faaleatua, o le a faia ai e se tagata atamai i mea faalelalolagi faaiuga sese mai mea moni ua lauiloa ma iu ai i le avea ma sē ua ‘na o se vale.’

O se “Asoa i Lou Ua”

Ona sosoo ai lea ma le tusi mai o le tupu poto i talavou: “Loʻu atalii e, faalogo mai ia i le aʻoaʻo atu a lou tamā; aua foi e te tuulafoaiina le upu a lou tinā; auā e fai ia mea ma pale matagofie i lou ulu, ma mea e asoa i lou ua.”—Faataoto 1:8, 9.

I Isaraelu anamua, na iai i mātua le tiute tauave mai le Atua o le aʻoaʻoina o a latou fanau. Na apoapoai atu Mose i tamā e faapea: “Ia i ai foi i lou loto o upu nei ou te fai atu ai ia te oe i le aso nei. Ia e matuā aʻoaʻo soo ai i lau fanau, ma ia e tautalatala aʻi, pe a ē nofo i lou fale, pe a ē savali foi i le ala, pe a ē taoto, pe a ē tulai foi.” (Teuteronome 6:6, 7) E telē foi le taaʻina a tinā. I le avea ma vaega o le faataunuuina o le pule a lana tane, e mafai ai e se avā Eperu ona faamalosia tulafono faaleaiga.

O le mea moni, i le Tusi Paia atoa, o le aiga o le faavae autū lea mo le tuuina atu o aʻoaʻoga. (Efeso 6:1-3) Mo le fanau ina ia usiusitai i o latou mātua talitonu, i se gagana faafaatusa ua teuteu i latou i se pale matagofie o le lalelei ma se asoa o le āva.

“E Aveeseina ai le Ola o Ē ua Iai”

A o lei auina atu o ia i le Iunaite Setete mo ni aʻoaʻoga maualuluga, na fautuaina ai e se tamā mai Asia lona atalii e 16 tausaga le matua ina ia aua neʻi auaufaatasi ma tagata amioleaga. O lenei fautuaga ua toe faamanatu mai ai le lapataiga a Solomona: “Loʻu atalii e, afai e faaoleole ia te oe tagata agasala, aua neʻi e usiusitai i ai.” (Faataoto 1:10) Peitai, na faamaoti mai e Solomona le mailei o loo latou faaaogaina: “Latou te fai mai, Tatou o; tatou te lamalama i le toto, ia tatou talialaina le ua fai fua lana amio lelei; tatou te foloolaina i latou, e pei o le tuugamau; ia atoatoa lava e pei o e o ifo i le lua. Tatou te maua ai oloa tāua uma lava; tatou te faatutumu o tatou fale i le vete; tatou te fai faatasi la tatou vili; ia tasi se taga tupe ia te i tatou uma.”—Faataoto 1:11-14.

E manino le mailei, o oa. Ona o le maua o polofiti i se auala vave, ua faatosina ai e “tagata agasala” isi ina ia auai atu i a latou faufauga sauā po o faufauga lē tonu. Ona o le fia mauaina o mea faaletino e lē tāitai ai popole nei tagata amioleaga i le faamasaatoto. Ua latou ‘foloolaina le tagata o loo aafia ai e pei lava o Seoli, po o le ave atoa foi,’ i le faoa uma lea o ana mea, e pei lava ona tuu atu i le tuugamau le tino atoa o se tagata. O lo latou valaaulia o le auai i solitulafono—latou te mananao e faateleina a latou mea mai auala piopio po o le ‘faatutumu o latou fale i le vete,’ ma latou te mananao i le tagata e lē lava le poto masani ina ia auaufaatasi i a latou gaoioiga po o le ‘faia faatasi la latou vili ma ia.’ Maeu le talafeagai o lenei lapataiga mo i tatou! Pe e lē o faaaogā ea e kegi a le au talavou ma ē faatauina fualaau faasāina na lava ituaiga o auala faatosina? Po ua lē avea ea le folafolaga o le mauaina vave o tupe ma tofotofoga i le tele o folafolaga tau pisinisi ua fesiligia lo latou faamaoni?

“Loʻu atalii e,” o le fautua mai lea a le tupu poto, “aua tou te o i le ala faatasi ma i latou; taofi ia ou vae neʻi ui i lo latou ala; Auā ua taufetuli o latou vae i le leaga, ma faataalise e sasaa ai le toto. I le valoiaina mai o lo latou iuga malaia, ua ia faaopoopo mai e faapea: “Auā e vae fua le upega a ua iloa e le manu lele. A o i latou ua lamalama i latou i o latou lava toto; ua latou talialaina i latou ia i latou lava ia oti. E faapena ala o i latou uma o e matapeapea i le oloa; e aveeseina ai le ola o e ua i ai.”—Faataoto 1:15-19.

“O i latou uma o e matapeapea i le oloa” o le a fano i o latou lava ala. O le mailei lava na tatao e tagata amioleaga e lamalama ai i isi, o le a toe maileia ai lava i latou. Pe o le a suia ea le ala o i latou o ē e fai mea leaga ma le loto i ai? E leai. E tiga lava ona iloa lelei atu se upega, ae felelei saʻo atu lava i ai manulele—meaola ‘o loo iai apaau.’ E faapena foi i ē amioleaga ona ua matuā faatauasoina e lo latou matapeapea, ua faaauau ai pea i a latou gaoioiga solitulafono, e ui lava o le a maua i latou mulimuli ane.

O Ai o le a Faalogo i le Leo o le Atamai?

Po ua iloaina moni e tagata agasala e faapea o o latou ala e malaia? Pe na lapataia ea i latou e faatatau i le iuga o o latou ala? E lē avea le lē iloa o se mea o se faamolemolega, auā o loo faalauiloa i nofoaga faitele lenei feau maʻoti.

Ua faailoa atu e Solomona e faapea: “O loo alaga le poto i fafo; ua leo tele i malae. Ua valaau o ia i le mea e sili ona taalili ai o tagata, o faitotoa o le aai; ua fai atu ana upu i le aai.” (Faataoto 1:20, 21) I se leo tele ma le manino, o loo alaga atu ai le atamai i le lautele ina ia lagona uma e tagata. I Isaraelu anamua e tuuina atu ai e tane matutua fautuaga atamai ma faailoa atu faaiuga faafaamasinoga i faitotoa o le aai. Mo i tatou, ua faapogaia e Ieova le atamai moni e faamauina i lana Afioga, le Tusi Paia, lea o loo mauagofie i le tele o vaipanoa. Ma o loo pisi ana auauna i aso nei i le faalauiloa atu faalauaitele o lana feau i so o se mea. Ua folafola moni atu lava e le Atua le atamai i tagata uma.

O le ā o loo fai mai ai le atamai moni? O lenei: “O outou e faigofie, tou te loto i le amio faigofie seia afea? ma e tauemu, latou te fiafia i le tauemuga seia afea? . . . Na ou valaau, a e lei mafafai outou; na ou faaloaloa loʻu lima, a e leai se na faalogo mai.” O ē valelea latou te lē utagia le leo o le atamai. O le iuga, “latou te aai ai i le fua o a latou amio.” O lo latou lava ‘liliu ese ma le nofo faatalanoa o le a fano ai i latou.’—Faataoto 1:22-32.

Ae faapefea la, lē na faaalu lona taimi e faalogo ai i le leo o le atamai? “E nofo o ia ma le fifilemu; e filemu o ia, e le fefe i se mea leaga.” (Faataoto 1:33) Tau ina ia avea oe ma se tasi o i latou o ē maua le atamai ma talia aoaiga e ala i le uaʻi totoʻa atu i faataoto faale-Tusi Paia.

[Ata i le itulau 15]

O le atamai moni o loo maua i le tele o vaipanoa