Lipoti a Ē Faalauiloa le Malo
Na Tauia lo Latou Faatuatua
O LE aposetolo o Paulo, o se tagata sa mataʻina lona faatuatua, ma sa ia faalāʻeiʻauina uso talitonu ina ia faapena foʻi ona ati aʻe le faatuatua. Na ia faapea mai: “E tatau i le alu atu i le Atua ona talitonu o loo soifua o ia, o ia foi na te tauia mai o e matua saili ia te ia.” (Eperu 11:6) O mea na tutupu i Mozambique ia o loo mulimuli mai, ua faaalia ai le auala e tauia ai e Ieova le faatuatua mālosi ma tali mai i tatalo faatauanau.
• O se tuafafine ua oti lana tane mai le itumalo i mātū o Niassa, sa popole po o le a faapēfea e ia ma lana fanau e toʻaono ona auai i le Tauaofiaga Itumalo, “Le Ala a le Atua i le Ola.” E na o le pau le auala e maua ai ana tupe o le faatauina atu lea o oloa i le maketi, ae ina ua latalata mai le aso o le tauaofiaga, sa lava tupe mo na o le pasese e ō ai i le malaga i le nofoaafi mo ia ma lona ʻāiga. Ae ui i lea, sa tonu ia te ia e tuu atu lona faatuatuaga i sauniuniga a Ieova ma faaauau pea i ana fuafuaga e auai i le tauaofiaga.
Sa ō atu o ia ma lana fanau e toʻaono i le nofoaafi. A o faagasolo le malaga, na faalatalata atu ia te ia le tagata e aoina pepa o pasese mo lana pepa. I le mātauina o lana pine fatafata, sa fesili atu le tagata po o le ā le uiga o le pine lea e faapipii i luma o lona ofu. Na taʻu atu e le tuafafine ia te ia e faapea, o le pine e faailoa ai o ia o se sui usufono i le tauaofiaga itumalo a Molimau a Ieova. Na fesili atu le tagataao pasese: “O fea o le a faia ai lenei tauaofiaga?” Ina ua iloaina o le tauaofiaga e faia i le itumalo lea e sosoo ane o Nampula, e tusa ma le 200 maila [300 kilomita] le mamao, na teʻi ai lava ua tuuina atu e le tamāloa ia te ia e totogi na o le ʻafa o le pasese masani mo ia ma lona ʻāiga! Ona ia avatu ai lea ia te ia ma lona ʻāiga o pepa e toe foʻi ai mo le isi ʻafa o lona pasese. Maʻeu se fiafia na oo ia te ia ona o le tuu atu o lona faatuatua ia Ieova!—Salamo 121:1, 2.
• Mo le tusa ma le 25 tausaga, na tatalo atu ai i le Atua se fafine sa toʻaga i le lotu ina ia faasino mai ia te ia le auala saʻo e tapuaʻi atu ai ia te ia. O le lotu lea sa ia auai atu i ai, e ō faatasi lava faiga faalotu ma faiga faauputuu, ma sa ia lē mautonu e faapea pe faamata sa fiafia le Atua i lenei ituaiga o tapuaʻiga.
Ua ia faamatala mai e faapea: “Sa ou manatua pea upu a Iesu ia o loo faamauina i le Mataio 7:7: ‘Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuʻituʻi atu, ona toina ai lea ia te outou.’ I le manatuaina o lenei mau, sa ou tatalo ai e lē aunoa i le Atua ina ia taʻitaʻiina aʻu i le upu moni. I se tasi aso, na talosaga mai ai le faifeʻau o la matou lotu i tagata uma o ē sa faigaluega i le maketi ina ia avatu ia te ia se aofaʻiga faapitoa o ni tupe faapea ma nisi o a latou mea ina ia mafai ai ona ia faamanuia atu ia i latou. Sa ou manatu i lenei talosaga e lē faale-Tusi Paia, o lea ou te leʻi avatua ai se mea. Ina ua vaʻai mai le faifeʻau ou te lē o avatua se ʻtaulaga,’ sa amata ona ia faitioina aʻu i luma o tagata uma o le ʻaulotu. Na ou iloa ai lava i lena aso e lē o le auala lenei e finagalo le Atua e tapuaʻi atu ai ia te ia, o lea na ou alu ese ai mai le lotu. Ae i le taimi lava lea e tasi, sa ou finafinau ai pea i le tatalo i le sāʻilia o le upu moni.
“I le iʻuga, na ou maua ai le lototele ma faafesootaʻi se tasi o loʻu ʻāiga e Molimau a Ieova. Sa ia ofo mai ia te aʻu se sāvali, ma i le faitau i ai, na vave ai lava ona ou iloa ua tali mai le Atua i aʻu tatalo. Mulimuli ane, sa amata ai foʻi ona talisapaia e laʻu paaga upu moni o le Tusi Paia, ma lesitala ai faaletulafono la ma faaipoipoga. Ae peitaʻi, mulimuli ane, na matuā maʻi lava loʻu toʻalua. Seʻi oo lava ina maliu, sa ia faamālosiʻau mai ia te aʻu ina ia ou finafinau i le ala o le upu moni ina ia ma toe feiloaʻi i le Parataiso.
“Ou te matuā faafetai ai pea lava ia Ieova mo le taliina mai o aʻu tatalo ma le faasinoina mai ia te aʻu o le auala saʻo e tapuaʻi atu ai ia te ia. Ua taliina foʻi aʻu tatalo i loʻu vaʻaia o laʻu fanau uma e toʻavalu ua avea ma auauna tuuina atu a Ieova.”